SUAÑOS de MERINDADES (5).- Misión:PATERNA.- "La Santina de Cillaperlata"

 SUAÑOS de MERINDADES (5)

                        Misión: PATERNA 

                                 <Una Virxen pa un pueblu: La Santina de Cillaperlata>

                                    

La VIRXE  de  CUADONGA  en  Cillaperlata, la Madre la Reconquista.

                                                   .......................................

                           ........ ZZZ ...zzz ... SUAÑU  (7u BIS) .... zzz... ZZZ....

        Hola, collacios. ¿Yá descansasteis? ... ¿Alcordaisvos que quedamos suañando nel post anterior?... Pos entá nun s'acabó, yo sigo nel mesmu suañu (6º bis) y .... ¿Tenéis alcordanza del viax que tábemos faciendo con Paterna, la futura reina d'Asturies - si acasu Ramiro ye p'algamar a Rei -  a los rimeros de lo fuere'l primixeniu reinu de Castiella: Trespaderne, Tedeh.a, Frías, Tobera, Cillaperlata, ...?. Dexáime que vos refresque la memoria un poquiñín...

Muralla de Llugo, ¿residencia de Ramiro?
(Semaya: canapatrimonio.com)

       Yo, Selim Marwán, y dos collacios más vinimos dende Llugo a Les Bardulies (Castiella) - pasando per Uviéu - por mandáu del Gobernador de Galicia, Ramiro, col envís de conocer y sobre tou convencer a Paterna y a so pá, Don Diego Rodríguez, condesu por aprobación popular d'aquella naciente Castiella, qu'un casoriu entre dambes families sedría un bon negociu pa toos, asturianos y castellanos. Los emires cordobeses, cumpliendo'l mándáu del Islam, veníen añu tres añu unviando razies braniegues al Norte peninsular arruinándonos la vida, les cases, les colleches y d'esta miente pa nada nun yéremos a medrar. 

        Ramiro fuere l'elexíu por Alfonso'l Castu pa tomar el relevu nel gobiernu d'Asturies - cuando él faltare -  dende qu'en 830 lu asimiló al tronu y l'unviare como Gobernador a Galicia a la fin de dir conociendo l'oficiu. Ye por eso que Ramiro, yá mayorín y tralláu en milenta mil batalles, diba trazando un plan pa cuando-y llegare'l momentu - que nun podía tardar - dao que'l Rei Alfonso ya andaba polos 80 y tuviere una vida bien ximelgada.  

San Julián de los Prados (Santullano) Alfonso II
Les pintures son dalgo increyible, talo la obra. 
- A ver cómo t'arregles, Ramiro, pa superar esto.

            Ramiro - el vara de la justicia, como sería recordáu- tenía un plan, yera un estadista y como barruntaba que muncho tiempu nun diba tener quería aprovechalu y pasar a la hestoria talo un Rei de verdá. Y nun lo tenía fácil, delantre suyo había otru fenómenu estadísta perdifícil d'algamar, porque superar la solombra d'Alfonso'l Castu yera misión cuasi imposible. 

            Tenía Ramiro planes artísticos de lo más orixinal que quería plasmar na falda del Monte  Naranco, dao qu'Uviéu yá lu convirtiere'l Castu na <Civitas Episcopal> y daqué más. Tenía planes relixosos que pasaben por unificar tolos pueblos embaxo la cruz, y pa ello quería acabar con toles tradiciones ancestrales y ritos relixosos de los nuesos ancestros  a los que taba dimpuestu a persiguir hasta'l desaniciu; pero esto podía ser un erru, un arma de doble filu,  porque un cosa son les bruxeríes malines ya otro les costumes atáviques que los nuesos antepasaos  caltuvieron, dende que la memoria tien alcordanza, pa rellacionase col más p'allá y ameyorar el más p'acá.

Samiguel de Liño - Ramiro I - Naranco
(Semeya: buendiatours)

        Y tenía tamién planes repobladores pa dir pali-pali habitando los valles y llanures tresmontanos: Mena, Villarcayo, Mediana, LLosa, Tobalina, Valpuesta, Valdegobía,  Al-Qilá ... Les Bardulies o Castiella, como yá s'entamaba conocer. ¿Por qué te cuento yo estes coses que me cuentare Ramiro cuando lu fui visitar en nome del Rei Alfonso?... Pos pa que sepas quien ye la persona que m'unvió a Castiella col enfotu de llogar un alcuerdu matrimonial beneficiosu pa los cristianos en xeneral. ¿Cómo podía negame?.. D'otra miente taba arranáu por conocer nueves tierres y Les Merindades sonábenme a Paradisu Terrenal. Tampoco voi negar que naguaba por conocer a aquella muyer que diba ser la Reina d'Asturies, tenía de tener daqué especial y yo taba ansiosu por descubrilo. A fin de cuentes yera'l mio oficiu, y la mio misión: PATERNA.

    

Les Merindades (Cillaperlata?
- ¿Paterna na Cuevona sobro l'Ebru?
- ¿Tendría llugar equí la Batalla de 722?

              Aportamos al castiellu que don Diego tenía en Medina de Pomar onde díbemos pasar dellos díes. Había que falar nidio col conde y espone-y lo que pretendía Ramiro pa ver si taba d'alcuerdu en collaborar dafechu; había que descubrir la personalidá de Paterna, saber de les sos intenciones y si taría al altor de les circunstancies, llegáu'l casu; y tamién había que conocer les Merindades, la naciente Castiella, y les sos necesidaes. Quedábame un bon trabayu per delantre, pero prestosu; facía alcoldanza de mio padre adotivu'l  Cadí, Said ben Ibrahim iban Amed al Muawiya, un grandísimu negociador almiráu y respetáu tantu polos emires árabes como polos propios cristianos. Yo intentaba algamar esi respetu nel mundu cristianu pero ensin traicionar enxamás a los que m'educaron dende'l mundu aviesu, dende la otra cara la mesma moneda, dende l'Islam; dambes relixiones creen n'un solu Dios - magar nos llamen politeistes - y con medios pa espardelo non tan estremaos .... 

...         Les coses diben saliendo bien porque foi la mesma Paterna la que m'invitó a conocer Les Merindades; al endefechu yo podía dir conociéndola a ella, les intenciones de so padre y tamíen el tarrén que yera preciso fortificar pa torgar no posible que les  razies árabes nos ficieren tantu dañu a los cristianos  del Norte. 

                                                .....................................

Valle del Ríu Nela, dende'l castiellu Tedeja.

            Yá sabéis que salimos de Medina nuna espedición d'once miembros: Paterna, dos criaes - Gadea ya Elvira -, cinco soldaos de don Diego más yo mesmu - Selim ben Said al Marwán - y los dos soldaos que m'acompañaren dende Galicia, Sinderico y Argimiro. La primer escursión peles Merindades foi dica'l sur: Frías, Tobera, Trespaderne, Cillaperlata y quiciabes Oña siguiendo'l calce del ríu Nela . Pasamos por Villacampada, Bustillo de Molina, Moneo, el célebre castiellu Cebolleros, la capital Nofuentes, el turruxón de Mih.angos y Trespaderne pa terminar agospiando nel castiellu de Tedeh.a, del primeru que se tien noticia na naciente Castiella. 

            Foi un viaxe perinteresante travesando pumares y güertes, campos de cereal como en Villacomparada, o los alfareros de Bustillo, heriedes del Islam; la villa de Moneo y lo que fuere una villa romana en Samartín de Mancobo. En Cebolleros - que sabroses les cebolles rellenes con trucha - vimos un castiellu orixinal, fechu con regodones; en Nofuentes llamónos l'atención una talla de la Virxe y pocu depués de pasar la ponte romano-medieval de Mih.angos dímonos un bañu en ríu ya unes monxes brindáronnos con una merienda mui especial: morciella de Burgos y pastelinos caseros pa rematar. Tamos en tierres visigodes y enantes de pasar una ponte sobro'l Nela pa xubir  castiellu de Tedeh.a cola fin d'agospiar  Paterna empobinó escontra mío:

Ponte románica (XII) sobro'l Nela. Trespaderne.
- Nel altu, a mandrecha acolúmbrase'l
<Castiellu de  Tedeh.a>

        - Hola, Selim. P'algamar al castiellu hai una cuesta curtia pero mui pindia, cuido que podíemos  cambiar de caballos, ¿quies que montemos los asturcones que tán más frescos?. 

        - ¿Tienes gana probalos, eh? . ¿Qué te paeció la fema pura raza galega?

        - Pa tratase d'una poni nun dexa de ser mui fuerte. Tien munchu puxu y al empar una monta bien duce; yo vini encantada con ella, dábame muncha seguridá pos ye obediente y fácil de llevar. Enxamás s'encabritó cuando fue preciso saltar. ¿Qué me dices del llosín?

        - Noble y tranquilu, bonu de guiar. ¿Qué usu-y dais nes Merindades?

        - Val pa too. Trabaya nel campu, dase al paséu y empléguenlu los soldaos. Padre ta promocionando la raza y entrenándolos con fines guerreros. Quier que seya'l caballu oficial de Les Bardulies, o Castiella, como lo quieras nomar. Ye orixinariu del Valle de Llosa que ceo vas conocer. 

Caballu llosín.
(Semeya: Wp. zaldía)

       [[  El caballu llosín, o jaca burgalesa, ye un poni grande y negru orixinariu de Castiella, en concretu del Valle de Llosa pero abonda tamién per tou Burgos y Palencia. Tevo a puntu'l desaniciu pero torgárelo  D. Ricardo de Juana qu'instaló un centru pa cría y seleición d'esta raza en Pancorbo, seique la cosa nun sigue pa tirar cohetes. Mui apropiáu pa rutes de montaña tevo gran importancia tanto durante la Reconquista como na conquista d'América. 

        Ye un caballín qu'anda entre 1,35 ya 1,45 m. d'alzada siendo'l machu daqué más altu que la fema.  Tien les oreyes pequeñes y curvaes como los braeros caballos asina como una frente plana ya unos güeyos bien espresivos y colos belfos dalgo abultaos. Col cuellu anchu na base y finu n'aunión cola cabeza presenta clines a esgaya lo mesmo que na cola. D'aspeutu daqué rústicu ye por embargu finu ya elegante asina como resistente y sobre tou mui noble. ]]

    

Esgobiu de La Horadada, 
ente La Tesla y La Llana.

    

        Charra que te charra al rodiu los caballos díbemos pasu ente pasu ascendiendo hasta'l castiellu.  Seique algo tarde podíemos decatanos de les vistes tan increyibles que se podíen apreciar; en varies milles na redolada yera imposible que dalgún grupu les pudiera cruciar d'incógnitu ensin ser acolumbráu. 

A la fin algamamos a la picalina, onde ta sitiáu'l castiellu. Tres tomar un respiru Paterna camentó:

    - Ellí tenéis el Valle de La Horadada por si daquién vien del sur por Oña dende la Bureba, allacuyá'l valle de Tobalina, aquelli ye'l  l'ampliu valle del Ríu Jerea, allalantrones acolumbramos la calzada romana que pasa al pie los tabayones de Tobera y esí ye'l valle del Nela, d'onde veníemos; esti castiellu yera un puntu poliorcéticu de primer nivel. Non en vanu calletramos que fuere yá utilizáu por romanos, visigodos, ya árabes, y agora por nós, los cristianos, fíos de la Santina.

        - Sí, ye un llugar estratéxixu onde los heba. Lo de los "fíos de la Santina" yá me lo esplicarás depués, pero dime:

¿Paterna algama'l castiellu?
- Paterna que duerma onde quiera,
yo agospio equí. ¡Puf, toi fecha polvu!

 ¿Por  qué creyes que to padre tien tantu enfotu nél?. 

    - Los visigodos llevantaron equí una construición perpotente, más de 300 m. de muralla pa caltener una guarnición afadiza. Creemos que yá lo utilizaben los romanos por algunes bases cuadraes qu'alcontramos embaxo les torres. Les güelgues visigodes aprucen per uquier en tola redolada, de xuru que nós somos descendientes direutos de los cántabros. Hai quien diz esti castiellu foi cosa de don pedro, Duque de Cantabria nel añu 740; pero ta por demonstrar. Los árabes tuvieron que facese con esto lo mesmo que con Pancorbo ya otros puntos estratéxicos camentando en pura lóxica. 

Padre quier establecer, amás del serviciu d'anubda, otru de castellanía con un merín o tenente que faiga funcionar les tierres y viesques de la redolada. El tarrén ye mui granibles por mor de los ríos y nes viesques hai caza a esagaya y madera pa construyir.

        - Esto va gusta-y a Ramiro que pretende repoblar toles Bardulies al rodiu los castiellos que tais llevantando. Cuido que tien la mesma idega que to padre. Pa ellos nun va ser difícil ponese d'alcuerdu. ¿Y pa ti?. ¿ Qué pienses tu d'un posible casoriu? ...

        - ¿Posible?... ¿Ye que Ramiro nun lo tien claro?... ¿Namás vienes a espiar? ¿Nun traes denguna propuesta concreta?. Ven, sienta equí, n'esti escañu. Vamos charrar un poco mientres descansa el personal y tomamos una sangría de vinu Chacolí.

Una de les obres que Ramiro
taba tramando pal Naranco.
(Semeya: mirabiliaovetensia)

        - Ramiro quier conocete, saber lo que pienses, y que tu lu conozas a él. Ellí tien los sos planes y prestaría-y que tu fueres sensible a ellos, que nun te casares namás que pol mester de les circunstancies polítiques. Nun quier un floreru, quier que participes y al empar llevase bien contigo. 

        -¿Y como ye Ramiro, aparte de bastante mayor? ¿Qué tien esi home na tiesta?. 

        - Tien yá unos años pero ta en bona forma porque-y presta cazar ya entrenase pala guerra, cuando nun ta nella. Yá sabes que ta vilbu y tien trés fíos de la primer muyer. Ún d'ellos, Ordoño, sedrá'l so sucesor que, por cierto,  ta mui preparáu y ye un estratega maxistral partidariu incondicional de la repoblación de Castiella. Ramiro busca un alcuerdu políticu pero prestaría-y tener al llau una Reina duce, intelixente y culta que lu apoyare dafechu nos sos planes. 

        - ¿Sabes tu acasu cuálos son?

<Civitas episcopal>, Uviéu a primeros del IX
(Semeya: Mirabiliaovetensia)

        - Tengo una idega porque'l mesmu me los cuntó. Tando la capital, Uviéu, amurallada y llarada d'edificios relixosos llevantaos pol Castu, <Civitas episcopal> la nomen, Ramiro quier construyir una pequeña ciudá anexa nel Monte Narancu, a poco más de dos milles del centru. Pero una ciudá mui especial con edificios llevantaos con téuniques arquiteutóniques innovadores. Namás por esto yá merez la pena vivir esperiencia tala n'Uviéu. Sé bien lo qu'a ti te presta l'arte. Esto va ser único, mira lo que te digo, Paterna; hasta Alfonso-y diba tener envidia de poder velo.

        - ¿Dalguna cosina más que se-y tenga ocurrío, negociador? Sabes bien vender la xata, ¿eh?.

        - El cargu de Rei nun va ser fácil, siempres hai candidatos al puestu a fargataes; igual tien que poner firmes a daqué trepa . Llueu tán les razies de los míos -  Paterna esbocexa una sorrisa - como cada branu y la gran cantidá de maleantes qu'atarraquinen los caminos . Quier poner orde y  acabar cola bruxería ancestral de los pueblos. Va tener trabayu abondo ya una compañera firme y sabía sedría una bendición pa elli y pal Reinu. Paterna, tienes una oportunidá única. ¡Ah! Y piensa que'l to hermanu Rodrigo diba salir mui beneficiáu; ye un chaval con remangu, avezáu a mandar y que sabe lo que se precisa d'él. Rei nun sedrá, un fíu tuyu tendrálo dificil pero los Rodríguez podéis sacar muncha tayada  al emparentar col Rei, y Castiella tamién.

                                                :::::::::::::::::::::::::::::::

        Al día siguiente llevantamos al alba. La mio sospresa foi que les dos criaes de Paterna y los mios collacios yá andaben llevantaos y col fueu prendíu. Taben calentando daqué :

Vaques terreñes
(Semaya: lacantabriaburgales.wordpres.com)

    - Bon día, dames y collacios, ¿podemos saber qué tais calentando?

    - Llechi, señor. 

     -  ¿Llechi? ¿D'ónde lo sacasteis?.- Y los cuatro soltaron una carcaxada que llamó l'atención de Paterna y los cinco soldaos qu'aprucieron de sópitu. 

    - Argimiro y Sinderico foron a catar les dos vaques que s'acovecen  nel tendeyón. De mano nun se dexaben pero tanto aporfiar .... - Y tornaron a rir prevocando la carcaxada xeneral. 

    - Les vaques terreñes*- intervién Paterna - son orixinales de los Montes  Obarenes, bien cerquina, como sabéis. Son un poco rústiques pero adáutense bien a la montaña y son mui apreciaes como animal de carga, sobre manera del cereal. 

*[Anguaño esaniciaron de Les Merindades. Namás queden,  protexíes pol Gobiernu Vascu, nos parques naturales de Valderejo y Gorbea]

    Rucamos una mazana - obligatorio na redolada de Medina de Pomar - , un poco quesu, unes raxes de cecina y llechi caliente con delles tostaes de miel. Yá tábemos dimpuestos a comer el mundu, o polo menos un cachín de Les Merindades. Entrugamos a Paterna:

        - ¿ Qué planes tienes pa güei, Paterna?

"Piquiñina y galana"

        - Vamos baxar a Tespaderne y empobinanos pel Valle de La Horadada camín de Cillaperlata, hai una hestoria d'una Virxe que vos va sorprender; ye dalgo qu'un asturianu tien de saber. 

        Quedamos mirándonos con cara interrogación un tanto ablucaos.....

        - La verdadera Virxe de Cuadonga vive en Cillaperlata ... ¿Cómo vos quedó el cuerpu, asturianos? . Pel camín voi cuntándovos daqué y , si sois bonos, llévovos dica un Monesteriu cercanu, San Xuan de La Foz, onde pasé una pequeña temporada estudiando cuando entá yera una guaja; trátase d'un monesteriu dúplice, d'homes y muyeres, pero separtaos, ¿eh?. 

  

         Sí, baxamos a Trespaderne, y fuimos a visitar la Santina de Cillaperlata, una Virxe piquiñina y galana qu'Alfonso I trexo d'Asturies a ruegos d'Ermesinda - la so muyer, fía de don Pelayo - y asitióla na ilesia del Monesteriu de San Xuan pa que monxos y monxes rogaren  cada día a la Santina, la Virxe oficial del primer Reinu d'Asturies, col envís que-yos diere furcies a los cristianos na so llucha escontra los herexes del Islam. Féxose tan popular que cada añu yera sacada en procesión, el día 8 de Setiembre,  percorriendo toles cais del pueblu. Tamién Paterna-y temía munchu enfotu. Comenté-ylo:

"Bolu 3 tablones".- Les Merindades

    - Esa devoción que sientes pola Santina, Paterna, va aportate munchos devotos tanto n'Asturies como con Ramiro. ¿Ves, yá te marcasti otru bolu?

    - Oi, Selim; ¿sabes xugar al "Pasabolu tablón"? .... Tengo d'echate una partida cuando nel campeonatu d'Espinosa los Monteros... A ver esos asturianos que tantu presumís de xugar a los bolos.

    - Yo xuego a "La Cuatriada" y tengo d'echate otra partida cuando teamos n'Uviéu, a ver eses  castellanes de tantu cocorocó...

    - Nosotros tamién cuatriamos, nun te vayas enquivocar, monín. - Carcaxada xeneral al ver a Paterna emplegar los diminutivos asturianos. 

                                  .........ZZZZzzzzz..... FIN del SUAÑU (7U BIS) .....zzzzZZZZZ.....

......     TORNEMOS a la REALIDÁ ....

Trespaderne dende'l castiellu de Tedeja.

            [[ Trespaderne ye un municipiu de la comarca Les Merindades perteneciente al Partíu Xudicial de Villarcayo que se tien formao nel Oligicenu de la Era Terciaria. Les sos tierres, bañaes polos ríos Ebro, Nela y Jerea, tán cerca la Sierra de la Tesla y del Esgobiu La Horadada que da pasu a la villa viniendo del sur. Llenda coles merindades de Cuesta-Urria (a la que perteneció) y la de Valdivieso asina como'l Ríu Ebro y el Valle de Tobalina. La parte superior, llana, ye aprovechada pa la sema de cereal, que se tresportaba con vaques "terreñes" trayíes de los Montes Obarenes.  De mano perteneció Trespaderne a la Merindá de Cuesta-Urria pero dende 1896 tien ayuntamientu propiu. Algamó a tener ferrocarril (Santander-Mediterráneu) dede 1830 hasta 1985, anguaño Vía Verde. 

Tartalés de Cilla (Trespaderne)
Ermita VII - VIII Visigoda
-Ta llueu. Prefiero la Cuevona Cuadonga

        El so patrón ye San Vicente y celebra varies fiestes onde lo más importante ye la comunión de los vecinos colos foriatos, siempres ¡bienllegaos!. Anguaó tien Polígonu Industrial (La Niesta) ya un circuitu permanente de Motocross. 

        .En Trespaderne conócense asentamientos paleolíticos como los d'El Caballón y La Blanca pero la braera hestoria entama cola llegada los romanos que dexaron güelgues nes pontes y sobremanera nel Castiellu vixía de Tedeja. Los visigodos asitiaron per equí asina como en Tartalés de la Cilla, Mijangos o Cillaperlata. Tamién-yos prestaron estes tierres a los árabes prevocando la fuxida de los cristianos al Norte, como recomendare Alfonso I con aquel lema de la fraxa de "Tierra erma" al rodiu del Duero.  

Camentando si entrar nel 
Monesteriu d'Oña

        Trespaderne (36,81 km2), separtada o xunida con Oña per aciu d'El beyu de La Horadada, coyó puxu al entamu del XI (1011) cuando Sancho García I - ñetu de Fernán González - algamó a conde de Castiella y fexo construyir el Monesteriu mistu d'Oña - con monxes de San Xuan de la Foz  (Cillaperlata) y monxos de S.Salvador de Loberuela -  embaxo l'agospiu de San Salvador, siendo la so fía, Tigridia, la primer abadesa.  

 Na so redolada son célebres, amás del Castiellu de Tedeja, Tartalés de la Cilla (eremitorios), la Ermita de Les Encinilles (la Virxe del "Prietu día"), la Peña Mayor (Sierra La Llana), les riberes del Nela y Jerea ya una milenaria viesca de carbayos. ]]

                                                    ::::::::::::::

      ..... Dexamos a Selim y Paterna colos sos suaños y nós vamos a baxar a la nuesa realidá. Cuando fuimos a Cillaperlata nun tábemos agospiando en Trespaderne sinón nel "Hotel Torre-Palacio de los Alvarado", nel Ribero, a unos 4 km d'Espinosa los Monteros. Baxamos a desayunar nel mesmu hotel  - una pasada d'edificiu - enantes de tirar camín de Cillaperlata, talo si fuéremos a Frías.  

             Son en total 33 Km nos qu'emplegaríemos poco más de media hora de nun ser porque aparcamos en Medina cola fin d'antroxar un ratín pela parte antigua la ciudá. Somos unos sentimentales incorrexibles y yo quixi ver a Paterna salir galopìando del castiellu y perdese, melota al vientu, pela ribera del Nela.

Hotel "Torre-Palaciu de los Alvarado"(El Ribero)
Equí agospiamos esti añu, na suit del Conde...

        Pela N-629 tiramos en direición Medina de Pomar y siguimos el camín que tan bien conocemos: Cebolleros, Nofuentes y Trespaderne. Equí pela carreterina BU-530 tardamos más d'un cuartu d'hora en percorrer los 4 km escasos que nos lleven a un pueblu que duerme a la vera del Ebru. Agora toca buscar la ilesia la Santina. Yá sintiéremos falar del asuntu y tuviérennos dicho que nel pueblu hai un señor que s'encarga d'enseñáloslo too y cuntar la so hestoria.

        Como esta hestoria la tengo escrita nesti mesmu blog ["De co casa a Cuadonga (y 10)..."] voi  repetívosla; si nun vos da más corrixo un poco, copio y pego, ¿acuéi? . 

            : La Santina de Cillaperlata.

La  SANTINA 
<La Virxe de Cuadonga>, en Cillaperlata .
 Trespaderne - Fuere Merindá de Cuesta-Urria - Burgos

      Seique dellos hestoriadores piensen  Cuando en 1777 se produz l'incendiu del Templu del Milagru en Cuadonga quedáremos ensin imax de la Santina hasta que'l Cabildru d'Uviéu aportó otra a cambiu de la Cruz de Pelayo (estos nun dan puntá ensin filu). ¿Pero sabía la Virxe  lo que facía?... Pos sí, dao que tenía una semeya que fuere llevada a Les Merindaes, en concreto a Cillaperlata, cerca de Trespaderne, vamos que nun diba desapovisar. 
       Al enteranos d'esti affaire salimos disparaos - bueno, esperamos les vacaciones - camín de Burgos. Tolos años vamos pasar unos díes nes Merindaes: Villarcayo, Medina de Pomar, Espinosa los Monteros, Frías, Oña... (Estes histories yá vos les cuntaré .... Bueno, son les vos toi cuntando últimamente (<SUAÑOS de MERINDADES> ) pero esi veranu fuimos drechos a Cillaperlata.

Cillaperlata. Tuvi a puntu de coyer esti pueblín y
trayelu p'Asturies. Nun me dexó la parienta:
- Si lu llevamos quedamos ensin farda 
pa venir a Les Merindaes. Baxa la grúa.

        Salimos de palaciu - tábemos agospiaos nel Hotel Torre-Palaciu los Alvarado, a once km d'Espinosa de los Monteros -  camín de Trespaderne pa lluéu buscar Cillaperlata enantes de llegar a Oña. Paramos en Medina de Pomar pa visitar el Castiellu y facer dalgunes compres dao que namás hai 33 km dende "casa" (dormíamos na suit del conde, menudo polvu, manín). 

     De Trespaderne a Cillaperlata hai 4 km escasos por BU-530. Entramos nel pueblu per aciu una ponte perantigua sobro'l Ríu Ebro qu'en realidá ye la presa d'un central llétrica. Tábemos duldosos si pasar o non y entrugamos a unos caminantes ....

 Nuestra Señora de Cuadonga
ta abellugada en Cillaperlata.
Señores, mientres Claudio cuire d'Ella
cuido ye la más segura d'España.

 

               - Pasái tranquilos, mozos; toos lo facemos; otramiente hai que dar muncha vuelta pa entrar en pueblu.

       Cillaperlata ta asitiada nun cuetu colos pies bañaos  pol Ebro; les cais son estreches y les cases tán apegaes unes con otres magar que tamién les hai individuales, pero siempres cerca'l migollu'l pueblu.
    - Bonos díes. ¿La ilesia del pueblu tará abierta?
    - Tenéisla ellí, al fondu. Na ventana ta'l teléfonu de Claudio, él acude siempres gustosu.
       Claudio aportó nunos minutos, ye como si tuviere esperando. Siempres ta esperando cuntar la historia de la ilesia y de la Santina. Mientres llegaba fisgamos pelos cristales y vimos una virxe col neñu na antoxana la capiella:
            - Mira, la Santina. Tiénenla a la vista de tol mundu.

Cillaperlata: Ilesia Santa María (agospia la Santina)
y Fonte de Cuadonga, inmigrante (¿Cabeces de Picu?)

          Claudio ye un paisanu d'unos setenta y picu,  afable y servicial. Nun tardó cinco miunutos en aportar con una sorrisa d'oreya a oreya; taba feliz de la vida porque diba face-y un serviciu a la Virxe, a la so Virxe, a la Santina y de pasu a la comunidá pos ye una forma de tener a Cillaperlata nel mapa. Claro qu'entá tienen más... Yá veremos.
    - La verdadera Virxe de Cuadonga ye esta que ta nel altar, la de fuera ye una semeya. ¿Cómo díbemos tenela nel estragal, ho, sola y pasando fríu. ¡De manera alguna!.
    - Aseméyense pero al tiempu son bien diferentes.
    -  Esta Virxe estrémase bien de la que tenéis en Cuadonga. Dambes lleven corona, seique diferentes, y dambes tán con el Neñu pero esta tien una cara más amplia y escamplada, talo que Chusín; la vuesa tien la cara más ovalada. La rosa na mano diestra tamién ye común. Y si vos decatáis la vuestra ta de pie mientres la nuesa remanez sentada.
     - Claro, ye más vieya y cansa más.
     - ¡H.a, h.a, h.a! . Bueno, ties tola razón que ye más vieya pos según dellos hestoriadores tanto esta como la qu'ardió en 1777 yeren dos  talles ximielgues del sieglu XII; la vuesa quedó ellí y la nuesa vieno pal Monesteriu de San Xuan, onde estudiare Ermesinda, la fía de Pelayo y muyer d'Alfonso I, fíu de Pedro de Cantabria. La rellación ente Cantabria y Asturies asina como ente los monesterios benitos de Cuadonga y Cillaperlata ye nidia, somo fíos de la mesma madre. Bueno, nosotros tamién tenemos dalgunes reliquies como una espina de la cruz de Cristu o un güesu del barazu d'un santu.

       - Don Claudio, tien usté de visitar l'Arca Santa de la Catedral d'Uviéu, entós sabrá lo que son reliquies; hasta la Sábana Santa, tenemos. 

    Tomo nota, y si daqué día pueo ...

Eremitoriu en Cillaperlata,
sobro les agües d'El Ebro.
Tamién s'emplegó como Sala Conceyos y cuadra.

     - Claudio,  ruxe per círculos burgaleses que la Batalla Cuadonga igual tevo llugar n'esta zona...
     - Ye qu'hai delles coincidencies: La batalla ocurrió cerca d'un cueva que cai sobro un ríu, ¿non?. Pos ehí mesmo, detrás vuestro, tenéis una cuevona, un ermitoriu que pinga sobro'l Ríu Ebru, depués podéis vela. Y la Virxe de Cuadonga qu'agabitó na batalla veisla delantre vueso. Tenéi en cuenta qu'Alfonso yera fíu de Pedro, Duque de Cantabria, y la Bardulia pertenecía al ducáu.
    - Vamos, qu'Alfonso conocía esto como la palma la mano... Dos vírxenes ximielgues, dos cueves, los ríos que se mecen, moros, una batalla ...
     - Yá toi arranáu por vela. Y esto que-y digo, ¿ a qué pue debese la coincidencia de los nomes de la Virxe?
     - Yá sabéis lo que cuenten les lleendes; que'l Rei Alfonso I, el xenru Pelayo, casáu con Ermesinda, llevantó un monesteriu mistu (pero ensin ayuntamientos, ¿eh?) en Cuadonga y resulta qu'equí mesmo, nes afueres de Cillaperlata, tamién había - queden los restos - d'otru monesteriu beneditín onde cuiden que la propia Ermesinda tevo profesando...
    - ¡Esto ye mui gordo! Asina que tamién dos monesterios benitos... ¿Podemos ver les güelgues?

Ruines del Monesteriu de S. Xuan dela Foz
Cillaperlata

    - Claro, llévovos yo depués de venir del mélicu. Andamos los del pueblu faciendo llimpieza pa que nun se desanicie del too. El Monesteriu de San Xuan de la Foz - San Juan de la Hoz, dicen ellos -  tien oríxenes prerrománicos, visigóticos según  dalgunos espertos, del VII. Ta adosaú a un roqueru no que fue'l Barriu d'Arriba del pueblu, anguaño esaniciáu.
    - Asina que del VII... ¿Y qué pasó con él?
    - Bueno, la mayor parte ye románico algamando'l so rellumu nel XII. Más tarde les monxes pasaron a vivir nel Monesteriu d'Oña, que foi llevantáu por Sancho García, conde de Castiella.
     - ¿Nun sería'l el pá de Tigridia?
     - La mesma, la guaja quería ser monxa y refugó'l matrimoniu....
     - Que ye la representación popular que fain n'Oña tolos años los propios vecinos...
     - ¿Conocéislo?
     - L'añu pasáu fuimos velo, ¡es-pec-ta-cu-lar!. Bueno, nun mos enrollemos, tábemos cola Santina...
¿Asina que Cillaperlata y Cuadonga teníen un intercambiu cultural?
    - Si quies llamalo ansí... Lo que ta claro ye que cuando se talló esta virxe féxose otra igual pa Cuadonga, o al revés, el casu ye qu'había dos ximielgues: La de Cuadonga y la de Cillaperlata.
    - Y tres del incendiu de 1777 cómo nun se sacaría otra igual por esta...
    - Covadonga pidiónosla pero nun se-y dio, ¡ye nuesa!. Sicasí dexámosvosla va unos años pa una esposición; eso sí, tuvisteis que paganos la restauración.

La Virxe Prieta d'Encinillas
(Vecina de la Santina en Cillaperlata)

    - Bien fecho, cazurrinos. Oi, Claudio, ¿yá esta otra virxe que tenéis equí?. Nun paez la Santina...
    - Non, ho; esta ya la Virxe de la Encinilla. ¿Qué ye, que nunca nun sentísteis falar d'ella?
    - Quier soname, ¿tien algo que ver con una  batalla qu'asocedió nun día mui prietu? ...
    - ¡H.a,h.a,h.a!.  Un día mui prietu... ¡H.a,h.a!.. La Batalla del Negro día, sí.
    - Qué interesante... Cunta, cunta...

    - Ello yera la dómina de don Pelayo cuando en Damasco mandaba Hixam y n'Alandalus gobernaba.... Bueno, en 726 nun se sabe mui  bien quien yera'l cabezaleru porque hasta tres walís hebo esi mesmu añu (Anbasa b.S. Al Kalbi, Udrha Al Fhiri, Yayha ben Salama A. Kalbi). Y entamamos a falar de lo que pudo asoceder... Son munches les histories que se cuenten, en Cillaperlata tienen la suya.... o les suyes, porque son delles les versiones qu'alcontramos al rodíu

                                             Entamu d' El CRONICÓN  d'Oña.

   < La Batalla del Prietu Día > pero en xeneral toes coinciden:
  1. La batalla ocurrió en tiempos de don Pelayo que tevo agabitáu por Pedro, duque de Cantabria (el pá d'Alfonso I, darréu xenru de Pelayo).
    2. La refriega tevo llugar xunto a la viesca d'Encinilles, onde se llevantó más tarde una ermita, que podemos contemplar anguaño sicasí nos prestaría la remocicasen ensiguida. La lleeenda cuenta qu' l propiu duque Pedro ta equí sapozáu.
     3. Sapozaos equí hai munchos pos aprucieron más de quinientes tumbes pela rodiada. Diz el beneditín G. d'Argáiz nel XVII que más de 8000 moros quedaren embaxo la solombra les alcines... Yá se sabe que cuando falamos de moros too se desaxera un pelín...

Delicadura

     4. A tiru flecha, en Cillaperlata, alcontramos la imax de la Virxe de Cuadonga anguaño abellugada na Ilesia Nuestra Señora y quién sabe si antaño na Cueva-Eremitoriu qu'hai xusto tres d'esa mesma ilesia. Por cierto, la cueva ta bañada, protexida más bien, pol caudalosu ríu Ebru, bien cerca onde emboquen los ríos Nela, Oca y Jerea.  La Cuevona asturiana ta protexida por tres riegues: La Deva (Onna), el Reinazu y la Guxana que conflúin toos a los pies de la Basílica formando'l ¿Ríu Cuadonga?.

La lleenda...

Ermita na viesca d'Encinillas
Onde se llibró la Batalla del Negru Día.
(Semeya: Burgospedia)

    Cuenta'l fantásticu padre Argáiz que nel añu 726 ( d'esto nun ta mui seguru; vamos, que si arima un poco más péga-y al 722, el mui h.odíu) Pelayo quitáre-yos Lleón a los caldeos, mandaos por Mohamed dexando de tenente nel puestu a un tal Fermosillo. Crecíu Pelayo tiró hacia Llébana a la cata de moros pero al nun alcontrar dengún tornó dica Les Merindaes y nun campu, al lláu de Trespaderne, onde se mecen les agües del Ebro y del Nela, alcontró los que buscaba, ¡moros! abellugaos embaxo les montañes de Tedeja*, no que da al Valle de Tobalina que llenda colos Montes Obarenes. Pero Pelayo taba allegáu a dios, o meyor, a la Virxe, y anque de mano quedare sosprendíu terminó por imponese; claro que pa ello.... Tevo que rogar a la Virxe - ¿la de Cuadonga, la d'Encinilles o ...sedrá la mesma? que-y estirare'l día un poco más seique atapecía y quería rematar lo que taba ganando. Si dalguién nesti mundu tien empatía cola Virxe esi ye Pelayo. Más d'ocho mil (¡puf!) colaren Ebru abaxo; los cristianos quedaren sapozaos, cristianamente, nel campu de batalla onde se llevantó l'actual Ermita de Las Encinillas. 

Trespaderne dende'l Castiellu de Tedeja.

        Pa más enchipe de los cillaperlatos bien cerca d'equí, al entamu'l Valle l'Horadada hai otra ilesia nomada Nuestra Señora de Regodos (reis godos) onde dicen tar enterraos dalgunos reis godos (como en Cuadonga) o cuando menos notables... El casu ye que la capiella ta abovedada - y non adintelada con madera - con piedra de toba (Tobalina ta cerca), talo que Santa María del Naranco; ¿copió Ramiro I, el Vara de la Xusticia, el que nos trai güei equí, pa l'actual Santa María del Naranco?.  

 Sía como fuere Cillaperlata y Cuadonga tienen munches coses en común  ¿nun deberíemos tar harmanaos?

*[Dicen que'l de Tedeja foi'l primer castiellu que se llevantó per aciu la Repoblación entamada polos reis del Reinu d'Asturies. Nós xubimos al castiellu - Pelayo nun lu tenía entá - asitiáu estratéxicamente pa controlar el pasu a la meseta burgalesa. Control y vistes espectaculares. Si enantes de xubir lleéis el llibru: "El caballero del jabalí blanco", de J.J. Esparza, va prestavos más. Y siguirèis con otros llibros del citáu autor...]. 

                                             ***************

            .... Selim Marwán, Paterna y restu la espedición nun tuvieren tiempu d'ir a visitar Oña. Naquelles dómines, sieglu IX entá Sancho nun fixere construyir el Monesteriu, Almanzor nun tuviere nacio y los monxos y monxes vivíen, cola mosca tres la oreya, nel conventu benitu de San Xuan de la Foz por eso nun tuvieren muncho enfotu en visitar esti pueblu que nun garraría puxu hasta sieglu XI con Sancho García. Pero nun ye'l casu nuesu; nós sí que fuimos a conocer Oña, sobremanera a antroxar col <CRONICÓN d'OÑA>. Tamién d'esto tenemos daqué escrito nesti blog 

[Camín Primitivu: ¡Bon Camín! <La batalla del Clavih.o>....]   por eso voi pasávoslo tal cual dao que nos queda muncho por visitar nes Merindades. 

EL CHRONICÓN d’OÑA

Per Oña, faciendo tiempu pal Chronicón.

      Ente los díes 8 y 15 d’Agostu (2018) los vecinos del pueblu medieval d’Oña (Burgos) tuvieren el gustu de danos a conocer los anicios históricos del so monesteriu per aciu d’una representación teatral onde los protagonistes tán interpretaos polos mesmos onienses.

Trenta años (anguaño 32) lleven estos increyibles actores metiéndose na pelleya de Tigridia, de Sancho García, d’Urraca, d’Iñigo, de Fernando I y hasta del Cid Campeador. Yo tuvi la suerte de viaxar a la Edá Media sentáu na mesma butaca onde los nobles castellanos aldericaben al rodiu la conveniencia o non de pautar col Victoriosu, Almanzor.

      Si daqué día tienes un suañu mira a ver si pues perdete pela Bardulia medieval y rematar col Chronicón d’Oña, nunca nun despertarás d’esta pantasía.

                                                       ---------------------------------

Monesteriu de San Salvador d'Oña
Vamos siguir a los actores, el Chronicón vien d'entamar.

        El Chronicón cuenta los episodios qu’ocurrieron en Castiella nel añu 1.011
( sieglu XI).

El Monesteriu de San Salvador d’Oña ta asitiáu n' Oña, capital de la Comarca la Bureba, provincia de Burgos y Comunidá de Castiella-Lleón seique por proximidá ya hestoria pue considerase una Merindá más.

     Predominen nél dos estilos:

       . Góticu: Ilesia y Sillería

       . Barrocu: Fachada y Retablu principal.

       Foi fundáu nel sieglu XI (1011) por Sancho García, conde de Castiella y nietu del celebérrimu conde Fernán González. Donó-ylu a la so fía Tigridia como monesteriu mistu o dúplice: con monxes de San Xuan de Cillaperlata y monxos de San Salvador de Loberuela.

Dende’l 30 de xunu de 1033 el Monesteriu pasó a depender namás de los monxos cluniacenses por orde de Sancho’l Mayor de Navarra y la so muyer Doña Mayor. San Salvador llegó a tener más de 70 monesterios del norte Burgos, Cantabria y valle del Pisuerga palentín embaxo’l so abellugu o xurisdición.

1. EL CHRONICÓN: Testu del espectáculu.

      <El Chronicón entama peles cais del pueblu, que ye'l protagonista cabezaleru>

      Nel añu 970 palma Fernán González, el primer conde d’aquelles tierres onde cien años atrás entamaron a llevantar castiellos pa defendese de les continues racies de los moros; tierres de la Bardulia que pasaron a nomase Castiella. Al so bravu fíu Garci Fernández tocó-y baillar cola más fea, Almanzor, y nun paraba de llevar hosties. De manera tala que’l fíu d’esti, Sancho García (995-1017), más políticu y realista decidió pautar con aquel xostrón mentanto se recomponía.

     - ¡Agora verás, Mugait!… ¡Vas enterate lo que ye un cristianu!

     Pasen años d’amarraza, d’espellica n’espellica, hasta la muerte del invencible en 1002.

Tres la muerte d’Al-Mansur (el victoriosu) vienen años d’intriga en Córdoba y Sancho aprovecha pa sacar pechu. Ponse de parte de Suleymán que se convierte en califa y esti, agradecíu, devuelve-y tolo que-y quitare Almanzor pelos rimeros del Dueru.

      - El qu’a bon árbol s’arima…

APOTEOSIS final del Chronicón,

Nós vímoslo asina:

    << Cuatro fíes tien don Sancho

con Urraca de Saldaña,
cuatro fíes a casar
pa facer grande la Patria:

    Doña Sancha va amestar

col conde de Barcelona,

mientres Urraca emparienta

con Guillermo de Gascona

y Tigridia ye abadesa

del Monesteriu d’Oña.

Queda una por casar,

la imponente Muniadonna

qu’echa’l llazu a Sanchu’l Grande,

¡yá ye Reina de Pamplona!.

    

Pero don Sancho nun cansa

de d’afilar la so espadona 

y a lo postrer de la vida

tendrá recompensa bona:

Sancho García,
el de los <Bonos fueros>

    - A la fin yá tengo un fíu

pa que lleve la corona,

va nomase don García

de Castiella, a muncha honra.

El mesmu día que casa

mándenlu pa la piedrona.

Don Sancho palma del sustu

mientres Castiella lu llora.

   - ¿Fuisti tu, Sanchu Garcés,

el que mancilló la honra?

¿Nun fuisti pa conformate

con llevar a Muniadonna

qu’a Castiella dexes vilba

pa engarciar la to corona?

Si tuvisteis parte alguna

nesta tamaña andrómica

que Dios venga y vos demande

dende’l Chronicón d’Oña.

     Tardó Sanchu tiempu a esgaya

en combayar cola tropa:

Chronicón, aplausu fianal.

   - Pa que veáis que nun tengo

ardicia por tala gloria

dexo al mio fíu Fernando

al mandu vuesa corona.

(¿Y quién manda per detrás

como que nun quier la cosa?).

Cinco fíos, polo menos,

tevo ¡ai, señora Muniadonna!;

sedrá’l segundu, Fernando,

el que va algamar la gloria

axuntando yá pa España

Castiella, Lleón y Pamplona.
                                                    - Maríu,
                                                          nunca nun vi cosa tala
                                                          como'l Chrinicón d'Oña. >>

                                             ******************************

Una mirada sobro l'Ebru  (Cillaperlata)

ESTIMANCES:

. A Claudio, pola so amabilidá y disposición. La Santina tien-y un sitiu reserváu, al par d'ella, nel cielu.

. A los vecinos de Oña, pola so constancia y fe nel Cronicón d'Oña, na so hestoria . 

. A la wikipedia. A la web del Ayuntamientu de Trespaderne y a la web d'<elcondadodecastilla.com> que siempres ta presente nos nuesos escritos sobremanera nes rellaciones d'Asturies con Castiella. 

. A tolos fotógrafos que tengo nomao nesti post. 

. A los dueños o llevadores del Hotel-Torre de los Alvarado, que tan bien nos tienen tratao. 

. A Paterna, la nuesa "guía espirirual" nestos <SUAÑOS de MERINDADES> asina como a Selim Marwán, el nuesu sosias.  

SUAÑOS de MERINDADES .- MISIÓN:PATERNA [4] "Nos rimeros de les Bardulies"

                                      

             SUAÑOS  de  MERINDADES (4)

                                MISIÓN: PATERNA  

                                <Pelos rimeros de Les Bardulies cola futura Reina d'Asturies>

Averándonos al paradisu de  FRÍAS 

                        ZZZZZZzzzzz.... SUAÑU (Nu.6) .....zzzzzZZZZZ

            [ Soi, pa los cristianos, Selim Marwán, ¿alcordaisvos?. Voi camín de Les Bardulies,  encomendáu por Ramiro, Gobernador de Galicia a propuesta del rei Castu, col envís de cumplir un mandáu naquelles tierres al norte de Burgos y Álava a les que la xente empencipiaba nomar CASTIELLA pola bayura d'Al Qilá que se taben llevantando n'esta zona.

Castiellu de Frías 

         L'enfotu los cristianos del Norte yera poner un frenu al les razies árabes y al empar dir  afitando una repoblación que llevaba al rodiu d'un sieglu gotiando pero qu'adebecía dir asentando dafechu ensin tener qu'escondese nes montañes añu tres añu cada vez qu'un garapiellu moros venía d'escursión a les tentadores playes del Norte, a los idílicos valles de Llosa, Mena o Tobalina, a la llanura alavesa, a los campos de Villarcayo, a les güertes de Medina de Pomar.... Yá lo ficieren los romanos a los que nun hebo manera d'echar y anguaño instalaron los árabes que tornen, ganadores, otra vuelta a abusar .... Pero esta vegada los cristianos tán dimpuestos dafechu a reconquistar; repoblación ya espada a son les armes a emplegar. Yo toi ente dos mundos que nun quieren la paz; intento comprender a los bandos pero a Selim ben Said al Marwán, namás que-y queda rezar y pasar per esti mundu siendo una persona cabal. 

Castiellu primitivu, ¿un poco asemeyáu al 
de Don Diego ?

            Costó arribar al castiellu de Don Diego Rodríguez, nes Bardulies, asitiáu no alto de Medina de Pomar por mor de los dientes de dragón que'l conde fixere colocar col enfotu de torgar un posible - y casi seguru - ataque musulmán que nos obligó dir faciendo la sierpe hasta un fosu en "V" que salvamos per aciu d'una ponte llevadiza que trespasaba una rústica muralla de piedra mampostería engrandada con una empalizada o barganal. Los mios collacios, Argimiro y Sigeredo, y yo mesmu fuimos recibíos nel Patiu d'Armes pola muyer y la fía del comes que nun s'alcoltraba en casa seique aportó al atapecer acompañáu del so fíu Rodrigo; veníen de visitar les nueves obres d'ampliación del castiellu de Tedeja, nes llendes del so condáu, la naciente Castiella, mesmo al par d'un pueblín conocíu por Trespaderne. 

Castiellu Medieval ( Montsoriu). Por mor del so
afayaizu asentamientu enxamás foi conquistáu.

        Cuando sentimos los glayíos y l'estrueldu la caballería entrando n'antoxana de palaciu cortamos la entretenida y granible conversacíon con Paterna y so madre y salimos con elles a saludar al anfitrión. 

    - Dios vos salve, don Diego, el Señor sía con Vós. - Diximos empobinándonos al conde al tiempu qu'abangábemos la tiesta con munchu requiloriu en señal de reconocencia. 

    - Seyáis bienllegaos, amigos, que'l serviciu d'anubda yá nos punxo sobre avisu la vuesa visita ya unos criaos diéronnos los detalles de quién sois vós. Pa los emisarios de Ramiro esta ye la so casa; esperamos sía del vuesu enfotu. 

    - Munches gracies, Don Diego. El candial tratu recibíu pola vuesa muyer Mencía y la neña Paterna yá nos amuesa la clas de caballeru que sois Vos. El futuru rei Ramiro tendrá conocencia cierta de la vuesa gratitú ya enfotu pa con nós. 

    -  Mencía. ¡H.e, h.e!.. La mio muyer nómase en realidá Paterna Mencía pero prestá-y que se emplegue Paterna pa la so fía, qu'en realidá bautizó como Urraca Paterna, pero ella namás emplega'l segundu. Mencía la madre y Paterna la fía. Amén, digo yo. 

    - Asina sedrá, Don Diego; por Paterna conocíemos la neña y  Paterna sedrá, vive Dios.  Díxonos  doña Mencía qu'andabeis per Trespaderne col envís de visitar les meyores d'un castiellu asitiáu nun puntu mui estratéxicu que vos pue aportar una valiosa información por aciu les razies árabes.  

Monesteriu femenín Samiguel del Pedrosu
  Fruela I (759). Abadesa: Nonabella
¿Estudió Paterna n'él?

    - Asina ye, astures.  El castiellu de Tedeh.a tien una situación poliorcética envidiable (718 m/a); ye perdifícil d'asaltar y al empar abarca una panorámica impresionante contolando'l valle de La Horadada al sur, el valle del Nela al norte y mesmo'l de Tobalina, al este. Cualisquier invasión pue acolumbrase a munches milles de distancia colo que pue dir alvirtiendo al restu los castiellos de Les Bardulies. Yá sé que vos suena a chino pero si nos facéis l'honor d'agospiar unos cuantos díes na nuesa casa la mesma Paterna, qu'adebez cabalgar, pue amosavos el gran valir de les tierres de Castiella. Ramiro debe saber bien lo que significa controlar y establecese dafechu n'esta rexón, como lo intentaren el so predecesor Alfonso'l Castu y hasta so padre Fruela qu'en 759 llevantó'l Monesteriu Benitu femenín de Samiguel del Pedroso, na Bureba. Y nun falemos de Paterna qu'otra reina más afechisca nun l'alcuentra en dengún reinu cristianu. Nun m'empobina dicilo solo l'amor de padre pos si faláis con ella decatareisvos ceo de la so preparación; cuidela col tol procuru pero ella respondió meyor. Ye una muyer fecha pa ser Reina; los ecos que sintió Ramiro son del so valir el clamor. 

    - Aldovináis los nuesos pensamientos, don Diego. Nada nos prestaría más que conocer Castiella de la mano la so fía Paterna; naide meyor qu'ella pa poner al tantu a Ramiro de lo que Castiella significa pal Reinu d'Asturies y pa España. 

    - Sía, pues. Falái con ella, trazái un plan y disponéi lo necesario pal viax; magar yo nun puea acompañavos pienso agabitavos en tolo que preciséis. Por razones del cargu tengo que andar sollerte pa facer xusticia onde me llamen ya iguar les fronteres onde fuere menester. Sabéis que esto ye tierra seminuevo de repobladores y les presures, castiellos y cenobios dexixen muncha xusticia y llabor. Pocos díes paro en casa, Castiella tienme absorbíu'l tiempu y la razón. 

                                                .........................

Salimos de Medina de Pomar camín de Trespaderne y Frías.

        Paterna taba como lloca de contenta. Quería probar los caballos - asturcón y gallegu - que triximos y de pasu amosamos el grandor de les sos Merindades a llombu d'un caballu llosín - a min tocóme una yegua - qu'ella curiaba col mayor de los procuros. Esti viaxe diba permitinos conocer a la futura Reina d'Uviéu asina como la naciente Castiella, la llinde o marca coles tierres sarracenes.  La cosa pinta n'oros; namás pienso en Lluna - la mio muyer - que nun pudo acompañanos nesti viax al Edén: Les Merindades, la cuna de Castiella onde, en ciertu modo, ella mesma tien los sos raigaños. 

Paterna traza'l viax
de la primer visita. 

    - ¿ Cuál va ser el primer viax con que nos quies sorprender, Paterna? - entrugué-y yo.

    - Vamos siguir el camín que mio padre fizo últimamente dica'l sur, hasta Trespaderne, más o menos: Nofuentes, Trespaderne (Tedeh.a), Cillaperlta, Oña - quiciás - y el valle de Tobalina onde Frías ye ...Yá lo veréis, prefiero que me lo cuntéis vós. Si'l tiempu da igual llévovos a visitar los tabayones de Tobalina, un gociu pa los sentíos. 

    Componíemos la comitiva, amás de Paterana ya un servidor, los mios collacios  Argimiro y Sinderico, yá de soldaos-criaos, asina como dos criaes de Paterna - Gadea y Elvira - más otros  5 soldaos, refuerzu de seguridá del propiu Don Diego. ]]

                                 ........ FIN  del   SUAÑU (6º) .....

                                                 :::::::::::::::::::::::::::::::::::

LA  NUESA  REALIDÁ (1)

                 La realidá, naturalmente, ye que la Parienta y yo visitamos xuntos Les Merindades, como nun podía ser d'otra miente. Aquel añu punximos el cuartel xeneral en Trespaderne agospiando nel "Hostal-Restaurante José Luis" dende aprovechamos pa facer estes visites que Paterna acaba proponer: Tedeh.a, Frías, Cillaperlata ya Oña, onde tomamos la espuela recreádonos col "Cronicón D'Oña ", una obra de teatru representada polos vecinos del pueblu que nos tien de llevar a los tiempos de Sancho García de Castiella (995-1017) y d'Almanzor [939-1002], alredor del mileniu. Pero vamos pasu ente pasu que ye muncha la gayola que nos queda por cuntar ...

Castiellu de Les Cueves
Cebolleros

        El día que pensábemos agospiar en Trespaderne tomamos el camín de Villarcayo y pasamos per Medina de Pomar y siguiendo la N-629  pelos márxenes del Ríu Nela entramos na Merindá de Cuesta-Urria con capital en Nofuentes pero un pelín antes disviamos dica - Cebolleros pa visitar la célebre Torre neorrománica o Castiellu de Les Cueves llevantáu a finales del XX  por un paisanu casáu nel pueblu - Serafín Villarán - qu'emplegó unos 25 años en facelu con regodones del Ríu Nela (1978- 2003) trabayando namás los fines del selmana dao que'l so verdaderu oficiu yera soldador nel País Vascu.  D'esta miente lo que yeren unes cueves que quixeren ser bodegues - pero fueron el petite pal enriedu de los guah.es - terminaron por convertise nun verdaderu castiellu. Bueno, en realidá él nun llegó a velu termináu del too pos morrió un pelín antes, nel añu 1998. Nós tuvimos meyor suerte.        

Trespaderne dende Tedeh.a,
el caprichu de Don Diego, y de tantos ....

    

         Per Nofuentes pasamos como si tal cosa pos la idega yera instalase y xintar nel Hostal José Luis (Trespaderne) pa poder visitar el Castiellu de Tedeh.a pela tarde. Tomamos el menú del día y pueo dicir qu'enxamás comí una carne más rico, nada que me supiere tan bien. Tres una pequeña siesta reparadora - esi día veníemos de Xixón - tomamos el determín de xubir hasta'l castiellu al que Don Diego-y tenía apegu talu. Nós nun quedávemos atrás pos teníemoslu por un mitu dende que lleéremos la hestoria de "El caballero del jabalí blanco" y "El Reino del Norte", del escritor valencianu J. J. Esparza, un gran Maestru,  les cuales obres son talo unes CRÓNIQUES pa nós.  

            Dende l'hostal hasta la base del cuetu onde ta asitiáu'l castiellu hai dos kilómetros andando pela ciudá y l'estrarradiu. Como tábemos un poco cansaos y el castiellu taba la mar d'epicoretáu decidimos dir en coche hasta onde pudiéremos. En realidá yera tornar pela N- 629 - trespasando la ponte medieval y les víes del tren - hasta un puntu onde encontraremos una desviación col cartelu afayaizu: <Castillo de Tedeja>. Lo que fuere un camín avesíu anguaño ye una carretera formigón iguada de recién pero empinada de carayu.  Aparcamos nun ensanche fechu a remente y tiramos andando'l mediu kilómetru que nos quedare (igual yera más pero adebecíemos tantu llegar ...)

EL  CASTIELLU DE TEDEH.A (Tedeja)    

La mio PATERNA nel Castiellu de Tedeh.a 
- El que tenga valor que xuba, <Camín de Niria> ta a la espera.

     Ye una fortaleza asitiada al sur-oeste de la ciudá  nuna llomba caliar a 718 m/a. - onde se funden les agües del Ebru y Nela - sobro'l Beyu de La Horadada  y nos rimeros de la Sierra de la Tesla. Privilexu natural, comunica Les Merindades con Oña y La Bureba, al sur; al norte controla el valle del Nela y al este los de LLosa y Tobalina; un chollu poliorcéticu qu'enxamás pasó desapercibíu. 

Allugamientu del castiellu de Tedeh.a

        Tedeh.a vien del llatín = tetelis , ye dicir, tutela o vixía. Esto quier dicir que yá lu emplegaren los romanos (V) como lo amuesen tamién dalgunos restos alcontraos talo les bases cuadraes sobro les qu'asienten les torres semicirculares de la muralla.  Ye nidio qu'esti conxuntu tien un caráuter militar que fueron usando de cotino los diversos pueblos: romanos, godos, árabes y cristianos esceciendo'l so valor estratéxicu a partir de mediaos del XIV, asentada dafechu la Reconquista nestes tierres.

Escobiu de La Horadada, onde l'Ebru torbonia
la piedra con tol puxu de la mocedá. 

    Vamos ver como nos cuenta Zonio de Mena nel "El caballero del jabalí blanco" el primer conocimientu que tien elli d'esti castiellu ; cola venia de J.J. Esparza intentaremos tornalo al asturianu:

 [[  Dende Oña travesamos los beyos dica'l norte buscando'l Ríu Trueba (el que pasa per Espinosa los M. y Medina de Pomar). Entramos nel tarrecible Escobiu de La Horadada, onde l'Ebru torbonia la piedra con tol puxu de la mocedá.  Nun lladral de la foz, como colingando d'un monte, había un castiellu pervieyu. Aquel paraxe conocíase por Tedeh.a,  y a l'aldega más cercana como Trespaderne. Anguaño naide nun había ellí, sacante una xente estraño de pinta  pergafa que vivía en cueves naturales; debíen ser pastores mediunómades como los que Teudano y yo tuviéremos visto en Ventosa. El Castiellu de Tedeja nun yera otro qu'una pila ruines pero mañana pudiere algamar a ser un sofitu esceicional. Caltúvelu na memoria.]] 

         La mente hestórica de don Justo Pérez d'Urbel afita como fundador a Don Pedro (m.740), duque de Cantabria y consuegru de don Pelayo, seguramente poles güelgues visigótiques que queden pela redolada : Mijangos, Tartalés de Cilla, Tedeja, Cillaperlata, San Xuan de la Foz en Cillaperlata, Santa María de los Reis Godos (onde los espaterios del Rei treslladaríen el Panteón de los Reis Godos tres la toma de Toledo por Tarik )... Pero sí sabemos que nel 790 apruz una donación del abá de S. Xuan de la Foz (<< in locum qui dicitur Cellaprelata subtus Tetelia>>), en 934 apaez nunos Votos de Fernán González al monesteriu de Samillán de la Cogolla; en 1035 nómase l'alfoz de Zetelia, ente 1040 y 1049 "Teleguilla" ta gobernada por Fortún López, en 1054 gobierna l'alfoz de Tedeja el señor Galindo Bellacoz de Colindres y en 1366 Enrique II concede los drechos del citáu alfoz a Pedro Gómez de Porras. 

Estructura defensiva
(Semeya:El Condadodecastilla.es)

        Esta fortaleza  inespugnatible por aciu d'un fosu escaváu en "V" con casi 300 m de muralla y protexida por seis cubos semicirculares de piedra - tou ello con dos metros de grosor en mampostería -tien una estensión de 2 Ha, y si cuntamos los axacentes de Santa Mª los Reis Godos y Peña Cortada podemos suponer qu'abarcaba unes 10 Ha teniendo en cuenta que la muralla pue baxar hasta'l Ríu Ebro. Si al oeste tenía una atalaya que facía de barbacana defensiva al este alcontróse la puerta d'entrada protexida por una torre cuadrada de sillería con probable base romana.

        Cuendo baxamos yá yera tardiquino; el sol, d'un amariellu-naranxa que me tresportaba a los colores de la infancia, diba buscando l'horizonte seliquino, pa facenos esfrutar. Tábemos embebíos faciendo de vixíes agüeyando tola redolada dica los cuatro puntos cardinales: la villa Trespaderne que t'invita entrar pela ponte romana, l'esgobiu de La Horadada faciendo la sierpe pel fondu camín d'Oña, la llanera'l Ríu Nela que remata en Medina de Pomar o les montañes qu'abelluguen el val de Tobalina... Tando allarribones fici alcordanza del pasaxe del Nuevu Testamentu cuando'l Diablu tentó a Xexús :

        - Doite tou esto, si abangándote m'adores. - De tener ocurrío equí, Xexús tuviere pasáolo bien mal.

        Dimos una vuelta pel pueblu tres sacar unes semeyes a la ponte romana del Ebru, bien cerquina d'onde recibe les maxestuoses agües del Nela que naciendo en Valdeporres bendiz a Villarcayo y Medina de Pomar faciendo tan granibles les sos tierres como afiten les güelgues que dexaron los pueblos de l'antigüedá. 

        Tres la cena, nel Hostal, y el vueltu pela ciudá - la nueche siempres te sorprende con lluces y solombres que'l día nun pue amosar - lo que nunca nun falta ye'l carah.illu de coñá (años más tarde, nel Reinu de Tudmir, aprendimos que como un asiáticu nun hai ná) que convierte los suaños en realidá.  

                                                    .............................

Cuando pasamos camín de Frías los xirasoles tornaron
la so mirada dica nós; ¿o taríemos suañando?. 

     Tres el desayunu nel Hostal embredamos camín de FRÍAS pela carretera BU-530 que pasa al llau de Cillaperlata, pero qu'esperamos otru día pa visitar. Son 15 minutos, o dalgún más, pa percorrer los 15 km que nos separen. Antes de llegar a Frías hai una llanura inmensa y ye que tamos nel Valle de Tobalina.  Vimos al final, nel finxu'l cielu, una especie farallón que destacaba na planicie magar la pequeña sierra que tenía detrás. Al dir acercádonos un pocu yá nos decatamos qu'aquel farallón yera daqué más grande, yera un pandu onde sobresalíen dos finxos asitiaos nos lladrales .... Yera un pueblu entamilgáu nuna rasa rocosa onde la Ilesia y el Castiellu paecíen abellugar aquel benditu llugar.... Frías yera  un pueblu eleváu, nacíu de la roca, que quería dicíi a tou'l valle de Tobalina qu'ellí taba'l Rei, qu'ensin elli, aquella maravía de valle yera vilba, que los fíos nun yeren del sangre real.  Llegó un momentu en que les tierres cercanes llararon los campos xirasoles y al venos pasar torcieron la vista hacia nós y entós nun tuvimos más remediu qu'aparar. Aparcamos a la oriella la carretera y entamamos a xugar a semeyeros, cuando de pie, cuando echaos, cuando retorniándonos en postures imposibles ....  Nun sé'l tiempu que perdimos, ¿perdimos?, naquel benditu llugar; d'ellí nun había manera de colar.... 

Ponte Medieval de Frías sobro'l Ebru.
Pasu casi obligáu ente la Meseta y el Norte. 

            Fuimos averándonos al pueblu perdíos ente un mar de xirasoles que nos dexaron a la vera del Ríu Ebru que debíemos cruciar pero... A manzorga había una bellissima Ponte Medieval (XII, góticu) -allombada nel centru - colos raigaños na dómina romana y que sufrió delles tresformaciones a lo llargo de los sieglos.  Agüano nun ye preciso pasala col coche pero antiguo yera'l pasu natural, tres pagar el portazgu, como ye de talantar, pa entrar na villa. Volvimos a parar. Semeyes y más semeyes naquella ponte que nos podía aupar al paradisu de Frías al traviés d'un mundu pasáu qu'adebeces remembrar, magar que nun lu conocieres sacante en suaños, Suaños de Merindaes. 

Dende la Ponte de Frías 

        La Ponte fortificada con un turruxón de tres altures - por mor de los impuestos - sobro 9 güeyos mide 143 m de llargor por 3,5 d'anchura. Yera'l pasu obligáu pola calzada romana que comunicaba la Meseta y La Rioh.a col norte  cantábricu: Bilbao (por Orduña), Cantabria y Asturies. 

        Y yá, por fin, arribamos a Frías col coral nun puñu, con una pergrande ilusión. Sabíemos qu'aquel pueblu nun mos podía defraudar; nada nun teníemos lleío al rodiu la so hestoria, tábemos vírxenes de tolo que se refier al rodiu Les Merindades y Frías ye una hestoria más que debemos descubrir, ¿quies acompañanos a caleyar peles sos cais? . 

... Tres enredar pela Ponte faciendo semeyes a mamplén terminamos agarrando'l coche p'averon al pueblu dao que después pensábemos siguir la carretera camín de la Toba, un máxicu llaráu de tabayones que s'esparden pela infinita piedra toba qu'abonda nesi llugar. 

FRÍAS, mapa colos finxos principales de la villa
(Semeya: Folletu de "turismoburgos")

            Había indicaciones de los parkings asina que dexamos el coche nel primeru qu'atopamos, el que ta xusto embaxo del Castiellu que tantu nos llamare l'atención; vamos, nel Paséu de Ronda ¡Yera impresionante! Les güelgues de la torre del homenax - desimía del restu les edificaciones interiores - taben xusto enriba nós, ¡como p'asaltar aquel castiellu!, magar les sos almenes y los turruxones arredondiaos que la conformen. Dientro, nel Patiu d'Armes, una cisterna pergrande ya un pozu van dar pasu a los edificios residenciales - como la del Alcayde - qu'amuesen unos ventanales xeminaos ya hestoriaos de lo más prestoso. Al norte, bodegues, caballerices, almacenes,..).

Aparcando en Frías, al pie del castiellu;
que sía'l Duque'l que-y dea de comer a los caballos.

        Pa entrar nel castiellu ¿había que pedir permisu al Papa?: salvar un fosu, una ponte llevadiza, una antepuerta-torre con buhedera , un alamud (barra de fierro) ya un rastrillu; amás taba protexida con saeteres, troneres, cañoneres ... Meyor llamar a Serguéi Bubka, el saltador de pértiga rusu (6,15 m) que forzar la puerta. Claro que tamién había una puertuca disimulada, por si acasu había que colar escopetáu...   

        EL CASTIELLU de los DUQUES de FRÍAS o de los VELASCO ta como sabemos asitiáu nun lladral del roqueru de toba conocíu como La  Muela; nel lladral opuestu otru finxu corona l'entramáu urbanu de la villa, la Ilesia San Vicente. Dende la so privilexiada talaya contrala'l Valle de Tobalina y el pasu del Ríu Ebro, ye dicir, el comerciu de la Meseta col norte peninsular. Ta bastante bien conserváu pos tevo munches igües a lo llargo de los sieglos; anguño emplégase con fines turísticos y deportivos.

        La primer mención a esti Padremoñu Hestóricu arréyase al añu 867, tiempos d'Ordoño I, que como so padre andaba enfotáu na Repoblación de la naciente Castiella y precisaba de finxos estratéxicos col envís de frenar el poderíu árabe. 

El Fueru de Frías
 (Alfonso VIII 1202)

    

        En 1201 dótase d'una muralla en condiciones y pasa de los Armengol a la Corona dándo-y Alfonso VIII de Castiella - el de les Naves de Tolosa - un gran valir poliorcéticu ameyorando entá les sos defenses y repoblándola con xente trayío del castiellu de Petralata (Navarra), tres la batalla que-yos ganó (1199). Foi la época de mayor puxu mercé tamién al Fueru de Frías, copiáu del bien célebre de Logroño que desimía del pagu de portazgos reduciendo los pechos del Rei a la mitá y teniendo amás en cuenta les ganancies de cada cual. D'otra miente ellos mesmos elexíen el so Merín ente la xente del pueblu. Celebraben mercáu tolos díes (azog) amás d'un más grande los sábados. Tamién taben desimíos los sos habitantes de dir a la guerra pos ya fecíen sacrificiu a esgaya con vivir y defender el pasu de la Muela. Fernando III, el Santu, confirmó esti fueru y entá lu ameyoró.  

¡FRÍAS!
 Les cases colingantes y la Torre l'Homenax 

    La prosperidá de Frías atraxo xente enforma y los xudíos ensiguida s'enteraren llegando a formar piñu nel Barríu la Xudería, estramuros la muralla la ciudá (XIII), que tenía tres puertes: La Cadena, la Medina y la del Postigu. Formando parte d'esta muralla, colingando de la paré rocosa, había (hai) unes cases como colgaes de una escarpia - cases colgantes - con entramaos de madera que son un arquetipu del equilibriu arquiteutócicu de la ciudá de La Muela; si te presten les emociones fuertes nun les pues dexar de visitar; en tres díes nun te podrás nin peinar. 

 En 1446 pasa a manes de los Velasco que-y faen una bona restauración pero la xente'l pueblu taba que trinaba pos vieron amenorgar los sos drechos de behetría - ¡que tamos nes Merindades, Reina Isabel! -y hasta llegaron a les manes, digamos armes. En 1492 en pagu los favores los Velasco a los Reis Católicos, na conquista de Granada, concediéron-yos el Ducáu de Frías (¡lo que-vos falta, fredenses!). Tres la Guerra la Independencia quedó valera la so función militar pasando en 1920 a manes municipales, hasta güei. 

¿Qué, un vermutín a la solombra
la Torre l'Homenax?

   

       Angüaño Frías ye un pequeñu municipiu independiente (30 km2) formáu por tres llocalidaes: Frías, Quintanaseca y Tobera. N'iviernu queda poca xente en pueblu pero durante'l branu hai un ambiente escomanáu como podemos ver pola semeya. Les cais empiedraes, les cases balconaes de poca altura y con collores térrosos, la bona predisposición de la xente, la hestoria , la cultura ,y l'arquiteutura d'edificios como'l castiellu, les ilesies, los conventos, la xudería, les cases colingantes o l'ambiente les terraces de los chigres son un atractivu irresistible pa cualisquier visitante de Les Merindaes. 

        Cerca les "cases colgantes", faciendo frente al castiellu, nel estremu opuestu de la Muela, una ilesia fai de contrapesu a l'arrecha torre del Homenax: 

        La Ilesia fortificada de San Vicente ye d'estilu románicu tardíu (XIII), talo que'l castiellu, pos forma parte del conxuntu defensivu de la ciudá merce a la torre- campanariu, cuasi piramidal, que l'abellugaba nel otro estremu de la villa. Taba provista de troneres y almenes talo d'ún castiellu se tratare. 

Ilesia San Vicente, de raigaños románicos.

        Cuando en 1906 s'esbarrumbare la torre y con ella parte de la ilesia camentóse en reformala coles perres de la venta de la Portada Románica al Muséu de Claustros de New York. Don J. Calleja, l'arquiteutu burgalés encargáu de la obra, fexo un conglomeráu eclécticu - con predominiu barrocu - que nun gustó a muncha xente porque ruempe l'idega medieval de la ciudá, magar que la ilesia nun quedare nada mal. De mano tenía una nave pero na Edá Moderna añediéronse-y dos capielles, la del Santu Cristu y la visitación. Tien dellos retablos pero'l principal lleva a San Vicente abellugáu por San Xosé y Sanestébanu, el subtenente la ciudá. Esta ilesia abelluga tamién una bona coleición de retablos, pintures, sepulcros ya imaxinería relixoso. 

    ... Estramuros la ciudá  alcontramos delles cose interesantes como'l barriu la Xudería, la Ilesia de San Vítores, El Conventu San Francisco, el Llavaderu y el conventu del Vadillo. Madre de Dios, la vida na Edá Media taba dominada dafechu pola nobleza y la  Ilesia, ¡qué aburrimientu!.  

Trabayu nel campu,
el Conde alleiciona al Mayordomu. 
(S: El castillo de Montsonís, Maribel Pendás)

        Nun principiu la Economía de Frías podía considerase de subsistencia y afitábase n'agricultura de los cereales (trigu, centenu, cebada, avena y maíz, más tarde. El llinu yera otru cultivu tradicional pa texer ropa - en un tiempu llegó haber un centenar de telares - asina como la llana les oveyes. Otru negociu sonáu foi'l vinu de chacolí qu'esanició cuando la filoxera acabó coles viñes en 1900, pasando entós les tierres a cultivar cereales, más seguros. Los flaires del conventu de Vadillo yeren unos artistes cultivando esti vinu, asina como nos llagares de Tobalina (normal, taben en llendes d'agua, como veremos más tarde). Tamién tuvieren importancia grande los productos de güertes, como les fabes ya una rica variedá de frutales estremaos. Tamién na Edá Media abondaron cantidá de gremios como los: alfareros, canteros, carpinteros, cereros, cerraxeros, ferraores, ferreros, llibreros, xastres, sombrereros o zapateros, pademás tuvieren mélicu, ciruxanu, vetrinariu y boticariu. 

        Los tabayones o cascaes del Ríu Molinar, en Tobera, son una ayalga difícil d'olvidar.

                                                .........................................       

         A pocos kilómetros de Frías, a la salida del beyu per onde cuerre'l Ríu Molinar alcontramos una aldega maraviosa, llarada de tabayones, que ye imposible dexar de visitar: TOBERA, que nun tiempu llegó a ser considerada como un barriu la ciudá de Frías. Paez imposible que n'un kilómetru de ríu puea haber tal bayura d'agua llibre que s'axeita nunes impresionantes cascaes. Tal merez la pena velo que los romanos fixeron pasar la calzada que xunía la Meseta col Norte peles llendes d'estos tabayones. ¿Vamos dexar mal a los romanos?... Pos vamos a veles. 

-¿Oiga, son los romanos?...
Que llevo dos hores esperando
y per esta calzada nun pasa nin el tato.
¿Pinchó la xarré?.. Voi llegar tarde a Orduña 
y a mio suegra nun l'aguanta nin la Virxe de la Foz.

            Parte del agua que ñaz nos Montes Obarenes discurre per una roca específico, volcánico, poco pesao - la toba -  que forma un esgobiu ente Tobera y Frías y da llugar a dellos tabayones - hasta cuatro pues ver - de lo más guapo que te pueas maxinar. 

¿Paterna percorriendo la Ruta el Ríu Molinar?

        

        El paséu pues entamalu nel mesmu pueblu de Tobera y dir ascendiendo a la vera'l ríu - hai escaleres- cola gayola les cascaes hasta algamar a un finxu máxicu , la Foz de Tobera,  onde una ponte romana d'un güeyu - per onde pasaba la calzada romana - , un amilladaderu (a Cristo), una ilesia-ermita al abellugu la montaña (Nuestra Señora de la Foz) ya una cascada o tabayón que completa aquel llugar sacru, de natura ensin igual. Tamién pues facelo al revés, aparcar cerca la ponte, baxar col ruxerrux de ríu y tornar a xubir. Más p'abaxo del pueblu aprovechábase pa llevantar molinos pos yera muncho'l granu que daba'l Valle de Tobalina. Años más tarde batanes, ferreríes, pisones ya otros artiluxos hidráulicos pa facer papel - célebres yeren les imprentes de Burgos - llaraben aquel cachu de ríu hasta los mesmos pies de Frías. En feches más recientes tamién se llevantaron pequeñes centrales p'abastecese de lluz y corriente llétrico. La redolada d'esti crespu ríu facilita unos frutales y güertes de regadíu como nun se vio otru tal. 

        Pasamos una tarde inolvidable percorriendo la Ruta'l Ríu Molinar ente'l ruxerrux del agua, la piedra toba, el mufu y les cascaes;  les pontes, les capielles, los güertos, la xente'l pueblu de TOBERA y turistes a pandiar. Namás faltaron los romanos que fixeren la calzada que xunía La Bureba con Orduña, la meseta burgalesa colos montes del País Vascu, y pasaba pel esgobiu y la  Ponte de Tobera. Pero nun se pue tener too. Tornamos al "Hostal-Restaurante José Luis" como tresportaos nuna nube, yera como si tuviéremos pasao pel Güeyu de Dios (Pontedei) y entráremos nel "Tunel del tiempu". Una cena reparadora ya un bon descansu ye lo que precisábemos pa continuar a la mañana siguiente, Cillaperlata ya Oña son los siguientes puntos a visitar. Cayimos redondos na cama y ... volvimos a suañar...

                                                :::::::::::::::::::::::::::::::::::::

                .................... zzzzZZZZ .........SUAÑU (7u) ........ ZZZZzzzzzz.............

        ... [[ Bien tempranino yá taba la comitiva preparada por Paterna pa salir camín de Trespaderne col envís de visitar el Castiellu de Tedeh.a, Frías, Tobera, Cillaperlata y quiciabes Oña si'l cuerpu quedaba pa ello.. Yéremos once en total: Paterna y dos criaes, cinco soldaos de Don Diego, yo mesmu, Selim Marwán y los dos soldaos que m'acompañaben siempres: Argimiro y Sinderico. 

Per estos campos de Castiella díbemos caleyar
con Paterna, la futura Reina d'Asturies. 

        Tábemos nel Patiu d'Armes iguando los últimos preparativos del viax. Yo montaba un caballu llosín por deséu espreso de Paterna y ella la yegua gallega, regalu de Ramiro. El caballu y la yegua asturcones veníen cuasi de refrescu, con delles provisiones, col enfotu de montalos más palantre, quiciabes pa xubir al castiellu de Tedeh.a fueren lo más apropiao.  Padre, madre y  criaos de Paterna asina como los soldaos que quedaben salieron a despidinos asina como la mayoría de los habitantes del castiellu. Tres pasar la ponte llevadiza sobro'l fosu, dellos vecinos que vivíen estramuros, tamién s'aunieron a la despidida. Toos tábemos percontentos, sobremanera Paterna que se sintía talo la heroina d'un cuentu; aquella espedición comandábala ella, la futura Reina d'diba ser parte bien importante la naciente Castiella. 

Pumarada
(S: pintirest)

    .... Na falda del castiellu cruciamos el Ríu Trueba per una guapa ponte madera y fuimos caminando dica'l sur siguiendo l'ampliu camín que va bordiando'l Ríu Trueba, primero, y el Nela dempués. Díbemos dexando atrás les célebres güertes de Villacomparada y los campos de cereal: mih.u, trigu, centenu, cebá.... Llamaben l'atención los pumaraes, con variedaes  estremaes de mazana que se daba especialmente bien. En Bustillo vimos trabayar los alfareros, herederos de los musulmanes que diba cuatro díes qu'emburriáremos dica'l sur; daba gustu velos torniar pieces cerámiques de barru de lo más emplegao: cántaros, cacíes, ... Pasamos Moneo, un pueblu un tantu especial porque tando nes Merindaes caltién los Fueros vizcainos igual que dellos pueblos de Llosa. Cerquina, en Samartín de Mancobo  entá puen apreciase les güelgues d'una villa agrícola romana como figura nel Bercerru de Les Behetríes.

Castiellu Les Cueves
(Cebolleros)

        Entramos nes tierres conocíes como Cuesta Urria . En Pradolamata, xunto al Ríu Nela, llamen l'atención les güertes , llaraes sobre manera de lechugues. Dalgo asina pasa en Cebolleros, onde la xente nos brindó con unes cebolles rellenes de truches - pescaes nel Nela -  y regaes col vinu la tierra, dao que yera rica en viñeos; tamién teníen semao bayura de cereal. El comentariu la cena foi sobro un vecín del pueblu que s'empeñare en llevantar él sulu un castiellu con regodones del ríu; deseyámos-y suerte y esperamos, qu'al cuntar esto, yá lu tenga termináu. Cuayu hai que tener. [ Entrando nel Tunel del Tiempu, en Pontedei, tiénennos dicho qu'años más tarde la Reina Sabel la Católica agospió nesti mesmu pueblu cuando visitaba Les Merindades. ¿Dormiría nel Castiellu de regodones? ]. 

            Poco depués pasamos pela capital d'esta Merindá que nomen Cuesta Urria, Nofuentes, célebre por una talla de la Virxe qu'alcontró una rapaza vecina y qu'ella mesma custodiaba nuna  capiellina cercana. Yera detardiquina y facía munchu calor cuando arribamos a la ponte romana que cruciaba'l Nela empobinándose hasta'l celebérrimu pueblu de Mih.angos. Nun mos pudimos aguantar y pocu depués de pasar la ponte había una olla que nos taba pidiendo a gritos:

        - Veníi, dáivos un chapuzón. 

Ponte romana sobro'l Nela (Mih.angos)
Nin Paterna pudo resistir el chapuzón. 

        Nin Paterna pudo resistise y hasta la futura Reina, aprovechando la tapadera d'un xerrón, tuvo refrescando un bon ratu nes poles agües cristalines d'aquel ríu que nos acompañò tul día na escursión. Esto nun fizo qu'aumentar la fame pero había que llegar a Trespaderne (10 milles en total) pasando antes por Mih.angos, onde so padre tenía un turruxón, ún de tantos de los qu'había previsto pa formar una barrera defensiva escontra l' invasor. 

Yera un pueblu preciosu coles cases de barru y madera y solana nel pisu superior. Nesti pueblu tiénense alcontrao güelgues d'un templu de la dómina visigoda - siglu VI , Recaredo (586-601) . Tamién nos atraxo la curiosidá la bayura de viñeos, variedá Chacolí, qu'había na redolada, talo que los monxos de Vadillo, nes faldes de La Muela de Frías; a fin de cuentes siguimos tando nos rimeros de la Sierra de La Tesla. Unes monxes sabichegues que nos vieron, quixeron enterar quién yéremos nós. Cuando averiguaron que Paterna yera la fía'l Conde, nun tuvieron tiempu p'agasayanos con unos pinchos de morciella de Burgos ya dellos pastelinos fechos por elles mesmes; xusto lo que precisábemos p'algamar con gracia a Trespaderne, como asina asocedió. 

        Los escatafinos visigodos en toa esta zona son perabondantes: Tedeh.a, Tartalés de Cilla, Cillaperlata o  Mih.angos son exemplos nidios que dende'l sieglu VI asentaron per equí.  

    - ¿Ónde agospiamos, Paterna?

    - Pasada la ponte sobro'l Nela vamos xubir hasta'l Castiellu de Tedeh.a, ye poco más d'una milla. Mio padre tien iguaes unes cabañes mui afayaices tantu pa los que tán de cotino como pa los que podemos venir de cuando en vez. Pasaremos ellí la nueche y mañana l'alba saldremos dica Cillaperlata y Frías. Yo cuido qu'Oña tien de quedar pa otra vuelta, a fin de cuentes yá queda fuera les llendes la nuesa xurisdición. Pa xubir la cuesta cambiamos polos caballos que tán más frescos.... 

            El  SUAÑU (7u) continúa, entá nun s'acabó; pero yo toi cansu d'escribir y buscar información, asina que te dexo pa que duermas y, de pasu, descanso un poco yo, que mañana ye otru día y de xuru continúa la emoción. 

                                                    .......................................

      ESTIMANCES:

La porosidá de la toba permite que s'asienten
bayura de plantes colingando les sos muries.

. A Mariano Cano Gordo, autor de "Las Merindades de Burgos", el mio llibru guía pa estos spots; ¿qué fadría yo ensin vós?

. A la "Asociacion Cultural Amigos de Tedeja" col so presidente Roberto Fernández, pol ponderatible trabayu que llevaren a cabu nel castiellu de Tedeja, el primero del que se tien noticia nidia en Castiella.

. A los blogs: "elcondadodecastilla.es", "burgossinirmaslejos.com", "ciudaddefrias.es", "castillos del olvido.com", "raices de castilla.com", "fotonazos.es" y dalgunos más que, por descuidu, nun m'alcordé d'alpuntar. 

. A les páxines web de Frías, Trespaderne ya Oña. 

. Al "Cronicón de Oña" del qu'entá caltengo la emoción. Espero  nunca nun se rindan los onienses. 

. A Maribel Pendás, Ll. Pedemonte y C. Rivas polo so llibru :"El castillo de Montsonís". 

. A la wikipedia, como siempres, pola bayurosa información que m'apurre.