Suaños de Merindades [2] "Piedra y agua pelos Cañones del Ebro"

  SUAÑOS  de  MERINDADES (2)

                                    < Misión : PATERNA > 

                                          <Piedra y agua pelos Cañones del Ebru>

Torre-Campanariu dende'l Claustru del Conventu Samartín d'Elines

zzzzzzz..  < SUAÑU  3u. El viaxe de  Selim Marwán a Les Merindades >....zzzzzzz 

Ramiro I

        [[ Tengo bastante claro lo que Ramiro quier de min: Convencer a Paterna que'l so casoriu col aspirante al tronu d'Asturies - qu'abarcaba tol norte de España hasta los Pirineos - ye un bon negociu pa tolos cristianos en xeneral y en particular pa los del Norte que tendríen un reinu más fuerte col qu'enfrentar al enemigu árabe. Ellos aconceyaren embaxo una bandera (l'Islam)  tolos pueblos del Oriente Próximu dende la península Arábiga hasta'l Magreb pasando per Exiptu y n'actualidá yá dominen tamién cuasi tola Península Ibérica y la Septimania, nel Sur de Francia. Alfonso II yá lo albirtió: 

Alfonso II, el Castu.
 Rei d'Asturies
(S:WP)

    - Hai que paralos porque terminen por facese con Europa y hasta cuerre peligru 'Imperiu romanu d'Occidente, el bizantín. Yo pauté con Carlomangu - seique dalgunos nun lo quixeren entender - , l'emperador más importante de la dómina pa pone-yos un frenu, una barrera (los francos nomáronla Marca Hispánica, Alfonso I "Tierra de naide") que los ficiera recrease nes sos conquistes mientres los cristianos díbemos faciéndonos más fuertes pa dir emburriándolos dica'l sur, pasu ente pasu, aprovechando los momentos de debilidá del Emiratu  pola cantidá de rocees que tienen ente ellos de xemes en cuando. Yá sabéis que la clas dominante árabe quédase colo meyor d'Hispania y desprecia a les otres races - "impures" - como los yemeníes o bereberes. 

        . Como m'encamentare Ramiro voi a palaciu pa falar con Ordoño, un chaval de 20 años - fíu y mano drecha de so pá - pa tratar al rodiu del viax hasta Medina de Pomar, capital oficiosa d'aquel naciente condáu de Les Bardulies que la xente yá conocía como Castiella, por mor de la bayura  castiellos que se taben llevantando naquella amplia zona  que llindaba con Carranza, Trasmira y Valle de Mena pel norte; los Montes Obarenes pel sur y col Valle de LLosa y la llanura alavesa pel este.   

Hixem I 
(Semeya: Wpedia)

             Convién facer alcordanza que los árabés tienen la obligación coránica de facer la yihad una vez al añu, polo menos. Les últimes razies que llegarren hasta Uviéu yá quedaben bien atrás nel tiempu, foron les de 794 y 795 na dómina de Hixem I (tamos en 841) cuando reinaba n'Asturies Alfonso II. Na primera d'elles el xeneral Abd al Malik alcontró la muerte en Llutos por mor d'una engatada que-y preparó'l Castu cuando intentaba colar pa Córdoba camín del Puertu Ventana. En 795, el so hermanu Abd al Karim, quixo vengalu y llegó hasta Uviéu tres derrotar a Alfonso delles veces ( Nes Babies, Ríu Quirós, Les Caldes, Uviéu....)  pero nun lu prindó (¿escondióse nel Aramu?) y seique llevare una considerable cacida nun pudo regala-y al Emir de Córdoba "la xoya la corona": el Rei. Claro que .... (Nun lo camientes con naide qu'entá ye un secretu) ¡llevóme a mín!; sí, a min y a tola familia d'astur Selím Marwán, pero esta ye otra hestoria qu'entovía nun ye la hora de cuntar. 

                                  Taba diciéndovos que les caberes razies solíen facéles los árabes entrando pel este,  per Pancorbo, y empobinando dica Álava y la Bardulia porque yera menos montañoso y el botín más seguru ya petecedor. Por eso Ramiro, el guerreru, yera'l preferíu por Alfonso envede'l so cuñáu Nepociano, más negociador ( vete a saber lo que tuviere resultao meyor), quería casar en Bardulia para xunir les fuercies colos castellanos y que les rezies nun fueren una romería braniega a les playes del norte. 

        - Hola, Ordoño; ¿cómo tas?. Vésete mui ufanu y tienes perbona pinta.

Ordoño I 
(S: Wp)

        - Gracies, Selim. El que va necesitar suerte y bonomía yes tu pa consiguir la mano de Paterna y la alianza de los nacientes condesos de Castiella. Si consiguimos tener de la mano a Diego Rodríguez, el pá de Paterna, los condesinos de la redolada vendrán detrás. Yá t'esplicaría padre que  ye perimportante poner un tapón na Bureba pa refugar les permanentes sangríes braniegues per aciu la yihad. Téngote fecho una llista colo más imprescindible que ties que llevar pal viaxe, a ver qué te paez, pero lo primero ye marcar nel mapa los puntos polos que vas a pasar. 

        - Tuve pensando nello y creo que voi retornar pel Camín Primitivu hasta llegar a Uviéu onde debo entregar un informe al Rei, que pa eso me tien unviáo equí. 

        - D'alcuerdu; a ver cómo pones a padre que lleva equí unos cuantos años faciendo méritos p'algamar el tronu. 

        - Nun creyo qu'haya problemes, vese que ye un paisanu de munchu caráuter, coles idees clares y sentíu d'Estáu, que ye lo qu'anda buscando'l Rei: compromisu cola Reconquista. 

            - Gracies, Selim. Asina que pasarás per Fonsagrada, el monte Acevo, el castru del Chao Samartín, Grandas de Salime, subirás el Palu y pela Ruta los Hospitales baxarás a la Puela (Pola d'Allande). D'ehí tires pa Tinéu, Salas, Curniana, Grao, Les Regueres ya Uviéu. 

        - Veo que conoces perbién la Xuta Xacobea. Ye una de les coses en qu'Alfonso tien puesto munchu enfotu; piensa que'l apóstol Xacobu tien de tener una importancia capital como unificador de los reinos cristianos por eso hai que curiar los caminos pa facer más llevadera la visita al Santu Patrón d'España en Santiago Compostela, que ye onde aprució'l so cuerpu incorruptu.

        - En Galicia, como pudisti comprobar a la ida, tenémoslos bastante bien seique a vegaes son una torga dao que facilita les razies musulmanes. Sábelo bien Alfonso, pos tuvimos que padeceles y mui fuertes nos años 808 y 825. Bueno, ¿qué precises pal viax amás de la Carta de Recomendación de Ramiro que te traigo equí. (Apúrre-yla). 

        - Pienso que podéis pasar por un garapiellu de monxos que van de treslladu, dende'l Monesteriu de Samos hasta San Xuan de la Foz, yá nes Merindaes. Lllevaréis una mula cola comida ya un caballu gallegu colos preseos pa defendese en casu d'apuru.  Vas dir acompañáu por dos soldaos, ún talo un monxu ya otru de criáu; tu mesmu vas pasar por un prior. Hasta los bandíos suelen respetar lo relixoso; va ser más fácil pa vós.  Los caballos de los soldaos tamién van ser de pura raza autóctona gallega - Equus caballus* - , un machu ya una fema que lluéu regalaréis a Paterna, una namorada  los caballos que tien una cuadra con delles races estremaes. La to yegua gallega dáis-yla a Alfonso asina como'l caballu que lleva les armes y los regalos pa la familia de don Diego. Tu cueyes n'Uviéu una yegua asturcona que vas regalar a Don Diego xunto col asturcón que va llevar dende ellí les armes y los regalos. 

        - D'esta miente Alfonso tendrá una pareya de caballos gallegos, Paterna otra pareya de caballos gallegos y Don Diego una d'asturcones, ¿nun ye asina? . 

        - Perfeuto; asina toos quedarán contentos. A Paterna présta-y munchu leer asina que vais lleva-y unes copies de: "Los Comentarios del Apocalipsis", de Beato de Llébana; "Les Etimoloxíes" de San Sidoro de Sevilla; una "Crónica Mozárabe de 754" ya una "Biblia de Danila" escrita na corte d'Uviéu mui de recién.  

Caballu Pura raza galega
(Semeya: Wp)

*Ecuus caballus: El caballo de "pura raza galega" ye un subtipu del Ecuus caballus, talo l'asturcón o el llosín; un poni de poca alzada (1,20 - 1,35) cola pelame castaña o prieto, la cabeza pequeña, les orelles curties y fuerte grupa. Los caballos gallegos caltienense retrataos en petroglifos de la Edá del Bronce (2400 a 2000 años e.X.) pero esta raza gallega ye mui posible que la importaren los celtes nos sieglos VII-VI e.X.

        - ¿Dalgún regalu más?

        - Vais llevar unes cosines de comer de les que nun s'estropien pel camín, que va ser un poco llargu: Un quesu gallegu de "Tetilla", un tarru  "Miel de Galicia", un pelleyín d'Alvariñu, otru de "Ribeiro " tinto ya un xarru d'oruxu. Si con esto nun convences al paisanu ye que nun yes fíu del Cadí, Said ben Ibrahim. 

        - De poder lleva-y un poco pulpu tendríalo garantizao. 

        - Pues fala-y dello asina como de los mariscos. Prométe-y que si un día vien equí tastiará'l Paradisu Terrrenal. 

        - Ordoño, tengo que dicite que n'Uviéu va xuntáseme la muyer, esta nun pierde esi viax seique la....

        - Que se mazcarite de monxa tamién. Si vos entruga daquién dicís que vais llevala al monesteriu femenín de Samiguel de Pedroso, cerca Belorado; el qu'inauguró Fruela nel añu 759. Creo que Paterna estudió ehí. 

        - Igual te faigo casu y la dexó ellí ; ¡h.a!, ¡h.a!, ¡h.a!. 

                                                 .....................................

Uviéu a primeros del IX
(Semeya: Mirabilia Ovetensia)

     

    .. Cuando llegaron a Uviéu pel Camín Primitivu la pequeña comitiva empobinó dica'l Monesteriu benitu de San Vicente (781) onde agospiaren los dos acompañantes de Selim. San Vicente foi ún de los núcleos primixenios de la ciudá d'Uviéu llevantáu polos monxos Máximo y Fromestano que yá llevaben venti años (761- 781) viviendo naquellos terrenos propiedá del Rei Fruela [722 (757-768)] onde llevantó una pequeña basílica a San Salvador que más tarde enantaría l'actual Rei, Alfonso II [760- (791-842)], sobre manera por mor de les razies de los Mugait en 784 y 785. 

La Foncalada
(Semeya: Mirabilia Ovetensia)

        Selim foi pa so casa pos taba casáu con Lluna, a la que comociere nes Babies nel viaxe que lu trexo de Córdoba a Uviéu. Vivíen nuna casina de planta y pisu, con un mínimu de xardín, que taba asitiada estramuros la ciudá, nel barriu que conocíu como La Foncalada. Teníen dos fíos, una pareyina: Abdel y Davoecia; ellí tomaba enseñances nel monesteriu San Vicente y ella nes Pelayes, daqueña conocíu como de San Xuan Bautista de les Dueñes.  

¡DESPEGANDO, entama'l viax!
Colamos pa les Merindades

            Como yá suponíemos Lluna apuntóse al viaxe, nun taba dispuesta a quedar ensin maríu otra vuelta, amás les desconocíes Merindades llamáben-y muncho l'atención y al endefechu quería conococer a la futura Reina Paterna, qu'ella nesos asuntos de casoriu sentíase talo pexe nel agua. Selim nun punxo munchos reparos pos sabía del bon güeyu de la parienta y podía apurri-y valiosa información a la qu'un home yera más difícil que llegare. Asina que mazcaritada de monxa benita tenía previsto montar una burra y siguir con ellos la ruta prevista del norte: Uviéu, Pola de Siero, Amandi, Colunga, Llanes, San Vicente la Barquera, Torrelavega,  Reinosa , Soncillo, Güeyu Guareña, Villarcayo y Medina de Pomar onde'l conde Diego, pá de Paterna, tenía asitiáu'l so castiellu. 

                        ...............   CATALPÁS: Fin del Suañu (3) ................

                                            **********************************

            Dexamos los suaños medievales y entamos cola relidá. Dos vieyos nun Citröen camín de les Merindaes. Los nuesos protagonistes ancestrales van agospiar en Medina de Pomar, la primer capital de les Merindaes pero nós vamos facelo bien cerquina, en Villarcayo, nel Hotel Doña Ximena, l'asturiana que va casar col Cid Campeador. Como veis nun damos puntá ensin filu.  

Colándose per Orbaneh.a del Castiellu

        En Santa Gadea d'Alfoz agospiamos durante un par de nueches  y aprovechamos los díes pa fer unes visites pela contorna: Amás de conocer el propiu pueblu fuimos, por recomendación de los mesoneros, a visitar : Samartín d'Elines - que pertenez a Cantabria - pasando por Presillas pa visitar los eremitorios rupestres y pela tarde alleganos a <Orbaneh.a del Castiellu>, onde l'agua flui per dayuri. Al día siguiente, yá camín de Villarcayo, encamentáronnos nun dexáremos de visitar el Monumentu Natural de <Güeyu Guareña> [Misión: Paterna (3)], cerca d'Espinosa los Monteros, enantes d'empobinanos dica la capital, Villarcayo, onde pensábemos agospiar.  Como nada nun sabíemos al rodiu Les Merindades nun tuvimos otra que siguir les indicaciones de los naturales de la zona. 

                                                        ***

        Salimos del Alfoz de Santa Gadea bien tempranino tres tomar un desayunu bien competente d'esos que Rosa sabe preparar perbién: fruta, tostaes, cafetín, embutíos caseros de la zona y daqué llambitá.

                             EREMITORIU:  ILESIA DE SAMIGUEL

Eremitoriu: Ilesia de Samiguel 
escavada na roca.

    Como nun conocíemos les carreterines de la zona yera meyor asegurar peles carreteres nacionales más transitaes y menos espuestes a perdenos, anque de xuru eso diba ocurrir igual. Asina que xubimos hasta'l Pantanu del Ebro y n'Arih.a tomamos la Bu-642 hasta Ciruelo onde prindamos la N-623 dica'l sur pasando pel Alfoz de Bricia camín de los Eremitorios Rupestres de Presilla siempres per carreterines bien curiaes pero que de nun ser poles indicaciones afayaices entá nun tuviéromos llegao. 

        L'eremitoriu más célebre ye'l conocíu como Cueva de Samiguel y a elli nos empobinamos tres travesar una viesca de pinos, carbayos ya alcines  que t'asitiada no cimero d'un parque natural a unos 800 m. d'altor.  La cueva - seique d'afuera nun lo paeza - ye una ilesia en toa regla, con pisos escavaos mercé al peñón  kársticu nel que s'alcuentra. 

Ilesia de Samiguel
escavada na roca.  (VIII/XIX)

        Podemos dicir que na planta baxa, zarrada por una verxa , tenemos una ilesia de planta basilical con tres naves y los sos correspondientes ábsides, con sos altares de roca y fornarines p'astiar los santos afayaizos.

 Les naves tás separtaes por dos columnes qu'afiten dos talos arcos de mediu que-y dan a la ilesia un caráuter mui singular. La planta superior, a la qu'anguaño s'accede per una escala de fierro, presenta una terraza qu'apodera tol valle. Dende ella podemos baxar al pisu d'embaxo per otra escala de fierro bien afitada na paré. 

    - Baxa tranquila, nun tengas mieu, qu'esta piedra ye blandio. 

    - ¡ C......! 

        La datación más probable ye ente finales del VIII y pricipios del IX, ye dicir, un prerrománicu  asturianu - al qu'asemeya - construyida nos primero tiempos de la Repoblación.  ¿Tendríen dalgo que ver nel asuntu los primeros reis de les Asturies, llocos pola Repoblación de la Bardulia?.... 

                                                    ***

        . Salimos impresionaos d'aquella primitiva ilesia que tuviere escavao la Fe d'aquellos cristianos que sufríen añu tres añu les racies de la yihad islámica (Ún de los preceutos del Corán obligaba a los gobernantes a fer la yihad cuando menos una vez al añu) . ¡Cuánta fe! Y cuantos tolones aquellos cristianos p'arriesgase a vivir na frontera del Reinu Astur. 

       De Presillas a Samartín d'Elines hai cuatro pasos (4 km, quiero dicir) y nun tienes más que siguir la carretera que pasa per Arroyuelos (BU-V-6116) p'aportar a esi pueblín ta cuciu que nomamos Samartín.

Samartín d'Elines (Cantabria). A mandrecha la Colexata amosando'l turruxón.

        Samartín d'Elines pertenez por embargu a la provincia de Cantabria, que nós conocíemos por Santander; y a dicir verdá que los sos habitantes lo lleven a muncha honra como pudimos comprobar más tarde nel "Bar de Jose". Pertenez al municipiu de Valderredible asitiáu na comarca de Campoo-Los Valles. Los tres barrios de Samartín - el d'Arriba, na base de la Peña Camesía; el de Les Cabrerices y el d'Abaxo, a dambes orielles del ríu - formen parte de la granible vega del valle que va embozando dica'l sur pa perdese nos peñeos caliares del Cañón del Ebru, el dios d'esta guapa zona y delles más. 

        El pueblu malpenes llega a los 50 habitantes ellí censaos pero pel branu la población aumenta a fargataes mercé, sobre manera, a la 

Ábside y Torre-Campanariu de 
Samartín d'Elines (Cantabria)

        La Colexata románica de Samartín   que foi de mano un monesteriu medieval d'una importancia pergrande como amuesa que nelli apruciera una de les poques obres en Cuaderna Vía que conservamos: "Miseria de Ome", asina como tamién unos arcos mozárabes (X) nel cementeriu y unes ventanes que dan al norte.

     La fábrica mozárabe yá debía tar amortizada nel añu 1102 que ye cuando entama construyise l'actual Ilesia Románica magar que'l Claustru trapezoidal sía bien posterior, del XVI. Precisamente nesi claustru son dignos de mención una coleición de sarcófagos onde destaca ún goticu del XIII con una espada ya una inscripción de 1231. Tamién s'amuesa una Cáscara del Pelegrín, lo que lleva a pensar se tratare d'un noble al que prindó la muerte faciendo'l Camín Xacobéu. Vese que la propaganda del "Códiz Calistín" taba faciendo efeutu. 

Presbiteriu Samartín d'Elines.
Una ayalga del románicu cántabru.

        El templu tien una sóleda nave con presbiteriu y bien rematada con un ábside cuasi circular dividíu en cais onde s'abren grandes ventanales engalanaos con columnines. 

El lladral meridional (sur) presenta una infrecuente torre-campanariu cilíndrica que-y da munchu barafuste a esti conxuntu eclesial.  Los canecinos son otru ornatu natural del románicu seique equí pues alcontrarlos de combates incluso dalgunos esibicionistes. (Hai que llenar la Ilesia y per otru llau la mente de los artistes ye bien llibre)

        Los protagonistes principales d'esti templu románicu puen considerase estos dos: los arcos semicirclares n'arquiteutura y los estremaos lleones n'escultura. L'arquiteutu xuega cola distribución de los arcos, tanto esterior como interiormente,  dándo-y al conxuntu un aspeutu maxistral, a lo qu'ayuden los capiteles historiaos como'l de "La matanza los inocentes" (¿alcordaisvos d'otru col mesmu tema en Santa Cecilia d'Aguilar del Campoo?). Un xeniu, el paisanín. 

                                                    ***

             Cuando terminamos d'almirar la ilesia-conventu de Samartín fuimos a buscar un chigre pa tomar daqué porque tábemos esfamiaos y muertos de sede. Nun mos costó muncho alcontar "Casa Jose", que ye l'únicu que hai. Había unos cuantos mozos que taben tomando algo y echando unes cantaraes. El que llevaba la zoz cantante - col permisu del emocionáu dueñu del Bar - nomábase Javi . Buscamos acomodu nuna esquina pa nun estorbar y al minutu taba Jose entrugándonos:

    - ¿Qué va ser, señores?

    - Bueno, queríemos pinchar daqué si fuere posible. 

    - En Casa Jose ye posible too. ¿Qué queréis , unos pinchinos? .... Sí, yá veo pola cara lo que vos apetez . Pa beber vino y casera, ¿non?... Val, d'alcuerdu, ensiguida toi equí. Mentantu podéis cantar, si nun lo facéis cóbrovos más.

        Nun diximos nin media. Primero punxo la bebía y al ratu taba ellí con una bandexa d'embutíos: chorizu, xamón, cecina, morciela, quesu y una ensalada mista. Mientres dábemos cuenta d'aquellos manxares (menos mal que taba too riquísimo) los mozos siguíen cantado ya invitándonos a que lo ficiéremos nós tamién. Alegamos nun conocer los cantares y quedaron  un tantu estrañaos:

    - Pero coimes, ¿nun conocéis a Nando Agüeros, l'autor de "Vientos del Norte"?

    - La música quier sonamos, de xuru que la sentimos daqué vez, pero nun podemos dicir que conozcamos a Nando. Pa min qu'asemeya a Victor Manuel. 

    - Sí, pue ser. Nando Agüeros ye un cantautor cántabru (Torrelavega 1974) que tien unos cantares preciosos nacíos del so apegu a la tierra cántabra con raigaños n'Asturies. 

ORBANEH.A del CASTIELLU
Nel Cañón del Ebro

        Los collacios de Samartín d'Elines ofreciéronnos a ringlón siguío un recital en toa  regla de la música d'esti cantautor. Y pa que coláremos contentos remataron con un canciu a "La Santina". ¡Toma!. Asina que salimos empapizaos camín d'Orbaneh.a del Cestiellu que yera la nuesa parada de la tarde. Quién nos diba dicir que cuatro años más tarde díbemos escuchar en direuto, na LLaboral de Xixón, a Nando Agüeros dándonos un inolvidable recital (2020). Agora colamos pal recital del Agua: Orbaneh.a del Castiellu.

                                                    Tabayón : Cascada del Agua 

        Pola BU-643 llegamos a Orbaneh.a nun satiamén pos nun hai namás que 10 km escasos. El paséu en coche, bordiando'l Cañon del Ebru, ye daqué sensacional. Díbemos camentando pel camín a qué carayu va la xente a ver el Cañón del Colorado teniendo equí esta artesanía pedresa natural. Los dibuxos kársticos nes llombes del Cañón del Ebru nun tienen comparanza con otros que fixere Dios. Piedra y agua, agua y piedra metanes d'aquel verdor son un manxar pal alma de cualisquier andador. Si tienes ocasión nun dexes de venir per equí; toles Merindaes son un clamor. 

Orbaneh.a del agua, de les pontes, les cases 
montañeses, la piedra caliar y la toba*. 

             ORBANEH.A del CASTIELLU (Orbaneja del Castillo)  ye una llocalidá de la provincia de Burgos (Castiella-Lleón) , llindando con Cantabria, asitiada na comarca de Páramos y qu'alministrativamente pertenez al municipiu de Valle de Sedano, seique antiguo fuere independiente. Hasta hebo un tiempu que perteneció al marquesáu d'Aguilar del Campoo (Yá sabésis del enfotu que-y tenemos a esta llocalidá, por mor de Bernardo del Carpio y delles coses más  que podéis lleer en sendes entraes nesti mesmu blog <Camín de Niria>. 

Orbaneh.a ye agua y piedra caliar como'l so propiu nome indica. Deriva del hidrónimu "orw"= fluyir, movese. Lo más destacable d'esti conxuntu hidráulicu natural ye la "Cascada de la Cueva" que nun ye otro qu'un pequeñu y rápidu regatu que ñaz y muerre nel Ebro nun abrir y pesllar los güeyos pero  qu'orixina un sensacional tabayón de 25 m. Si esti preste lu encaxes nuna fana de 200 m de fondo imaxina l'entornu que tienes. 

* La toba ye una piedra igneo, de tipu volcánico,  que pesa perpoco polo que s'emplega abondo n'arquiteutura pa facer arcos y bóvedes. Ramiro I, el Xusticieru, tien echao mano d'ello en Santa María del Naranco. 

Orbaneh.a del Castiellu, ún d'esos sitios onde la mano de Dios diz: ¡STOP!

        Esti pueblu , como tamién podemos deducir del nome, tien los sos oríxenes na Edá Media onde había un castiellu; magar sabemos que la so redolada - Cueva de Niésparo - tevo habitada dende'l Epipaleolíticu onde aprucieron dellos preseos líticos de caza. Tamién nel pueblu vivieren mozárabes que colaren d'Al Andalus y xudíos que dexaron constancia nes alh.ames (aljama= sinagoga, llugares de reunión pa tomar determín nos asuntos de la comunidá). Ye perprestoso pasiar per esti pueblu medieval, de cais estreches y empiedraes y cases d'estilu montañes coles balconaes de madera, mentantes se siente el ruxerrux del agua per tolos hastiales. Por algo lo Templarios instalaron equí un Conventu ya un Hospital pa los pelegrinos xacobeos. Los Reis Católicos apurieron-yos el títulu de villa y quedaron los vecinos desimíos d'algunos impuestos. 

        Ye la hora de colar. Ensiguida atapez y entá tenemos que tornar al agospiu en Santa Gadea d'Alfoz. Llegamos a tiempu de cenar - ¡qué vien nos trata Rosa! - y tres un ratín de calechu fuimos ceo pal cuartu porque al día siguientes teníemos qu'agospiar en Villarcayo, la capìtal de Les Merindades, y fer dalguna ruta pela redolada, qu'equí venimos a trabayar.  

    

 

AGASAYOS:

. A los caseros de "El Rincón de Gadea", que nos trataron con tol procuru. 

. A Jose y los sos amigos del Bar que nos dieron perbién de comer y  llenáronos el día colos "Vientos del Norte" per aciu de Nando Agüeros. 

. A la <wikipedia> y  dellos blogs, talo: <arteguias.com>, <viajeros 3.0>, <terranostrum.es>. 

. A los caminantes y nativos qu'alcontramos pel Camín y que nos apurrieron sustanciosa información.

Suaños de Merindades [1] . Misión: PATERNA

                  SUAÑOS de MERINDADES    

        

                                    Misión: PATERNA [1]

                                              (SEMEYA: Puentedey .  Merindá de Valdeporres)

TUNEL del  TIEMPU: < Ayeri tuvi un suañu de Merindaes >  
Si quies conocer esta historia ye preciso que lu travieses, ¿atréveste?

                    

            Hola, collacios, ¿cómo vais?. ¿Creyéis que vos tengo abandonaos por mor del COVID o dalgo ansí?... Pa nada, nun camiento n'otra cosa qu'en poder cuntavos dalgunos viaxes o esperiencies que tengo pasao  estos años atrás camín de Les Merindaes, esi terciu septentrional de Burgos onde xurde l' entamu de Castiella, biltu del <Castellán>. Ye verda que nos meses caberos tuvi de pasar pel taller del HUCA a tresnar unos tubos que, según los mecánicos, taben un poco tomaos; pero gracies a los Sanitarios, a la Santina, a Xacobu y dellos allegaos más podemos siguir dando guerra una temporada más; la pena ye qu'esta pandemia tiennos un tanto llimitaos por eso quiero cuntavos dellos suaños que tuvi arriendes deles visites que ficimos a les Merindaes estos años atrás (2016-17-18), cuando entá la nuesa madre taba énte nós.  Habéis de perdoname si alcontráis dalguna incongruencia  nos rellatos pero ye que <los suaños, suaños son> y a vegaes tán lloñe nel tiempu.... 

            Suañé que yera un <mozárabe> qu'arribó a les Asturies durante'l reináu del Rei Castu y .... ¿qué vos paez si vos voi cuntando la historia de la mio vida, pasu ente pasu, mentanto voi percorriendo Les Merindaes de Burgos nel quiqueniu  anterior a la pandemia? ...  Ye muncha tarea pa un aficionáu a la lliteratura pero cuido que si nun lo intento agora yá tendré qu'esperar  a <esotra vida> que naide nun conoz en verdá. ¿Podréis perdoname esti atrevimientu? ..... Entós vamos p'allá: < ¡Por Dios y por Alá!>.

                                  zzzZZZzzz   SUAÑU  PRIMERU (1º)  zzzZZZzzz

         - Traéime al mozárabe. Tengo un mandáu pa elli.
         - Nel intre, señor Gobernador. 
          Tamos en Llugo, nel palaciu de Ramiro, el Gobernador de Galicia encamentáu pol rei Castu, nuna casona pedresa na que destaca una torre que sambla ser un homenax. Per estes dómines nómenlos pazos. 
          Corría'l final del branu del añu 841 cuando la fueya de la viesca de ribera qu'orniaba'l Ríu Miño anunciaba la seronda. Los árabes llevaben más d'un sieglu aposentaos n'Hispania. Nunca nun llegaron a  pensar, daes les facilidaes qu'alcontraren de mano, qu'un garapiellu d'asturgodos diba pone-yos tantos pilancos pa facese cola península dafechu. 

EQUÍ ENTAMÓ TOO...
- ¿Que nun quieren baxar?... Esperái in poco, qu'estos asnos xabaces sácolos yo d'ehí.
- ¡Alqamaaaa!... ¿Ánde vas? ... ¡Torna equí qu'esos convénzolos yo!
- Pelayo, ¿tas ehí?
- ¿Nun me ves, obispu traidor?.
- Ríndite y nun sías fatu. Namás quedáis cuatro gatos llevantiscos en toa Hispania.
- Cola ayuda la Santina creceremos talo'l granu de mostaza. Y tu ponte no peor ...

         - Bueno, vamos colar; media ocena d'asnos xabaces nun van torgar que cantemos victoria - camentaren los sarracenos tres l'amarraza Cuadonga del añu 722, un deceniu llargu tres la INVASIÓN. 

          Pero los asinus africanus - ¡qué paradoxa! - nun ye qu'aguantaren tapacíos tres los Montes Cantábricos; seique aconceyaren, foron nomando  princeps (Pelayo, Alfonso I, Fruela, el Castu...) qu'enantaron aquel cativu reinu del norte peninsular y hasta s'atrevieren a llegar a Portugal naquella grandonada del noventa y ocho (798) cuando llantaron la bandera blanca cola cruz roxa nel turruxón del Delta del Tah.o, na mesmísima Llisboa.
    - Con esta cacida yá tengo pa llevantar San Salvador y hasta Santa María - comentó'l  rei de les Asturies Alfonso II, al que la xente-y dio por nomar: el Castu, por aquello que nun acontraba muyer pa casar  (depués d'una madre vasca y una tía Adosinda igual yera pa pensalo). 

Bien podía ser el PAZU O FARAMELLO  la  residencia en Galicia del Gobernador Ramiro.
Tuviérelo pensao pero a la fin decatose que'l so sitiu taba en LLugo, <Lucus Augusti>,
la capital romana por escelencia, por tradición; eso daba más barafuste a cualisquier rexidor.

        Podríemos nomalu'l xuiciosu, el xustu, el valerosu, l'estratega, l'estadista .... Too ésto y más yera Alfonso Froilaz, el primer REI de verdá - investíu con tol orde góticu toledanu -  que tenía'l Reinu d'Asturies. Pero esti rei tan mayor que llevaba GOBERNANDO  cincuenta años taba a piques de dar les boquiaes... Sabíalo, y por eso tenía nomao sucesor a Ramiro - al que llevaba preparando algún tiempu - masque daquién nun lo quixera entender ... Nin tan siquier el so pariente Nepociano - un poco mayor pa estos trotes, magar tampoco nun lo quixo entender - dao'l so parentescu pero El Castu vía mui llargo y sabía que'l Reinu precisaba d'un Cid, una guerreru q'uenfrentare los árabes y non que trapichare namás. Nepociano* yera finu pero pasárase-y l'arroz.

*(Nepociano, nun te cafies, la hestoria cuéntennosla los que ganen, y qué vamos facer si nun tenemos otra cosa .... Perdona, ho; yo téngote na llista talo un Rei más).

Plaza del Obradoiru (Santiago Compostela)
onde'l rei Ramiro pue que ficiese'l Máster
enantes de coronase como Rei de les Asturies.
Tenía nivel, los monumentos del Narancu (Uviéu)
nun son cualquier cosa.

        Ramiro barruntábalo, nun yera fatu, sabía que'l tronu d'Uviéu dependía d'esti máster na Universidá Santiago y poro taba tresnando un casoriu políticu, dao que quedare vilbu d'ha poco p'acá. Amás Uviéu naguaba por una reina (llevaben 50 años ensin ella, yá taba bien) y elli - Ramiro Bermúdez - precisaba tener el control de la ñaciente Castiella, la tierra los Bárdulos y de  dellos pueblos hispanos más, que venía repoblando a velocidá marcmárquez; la torga yeren los árabes que-y coyeren el gustu a veraniar nel Norte y nun había primavera - nin tan siquier esperaben el branu - que nun se nos presentaren en casa famientos y secañosos (del sangre, namás), coses qu'obligaba la  yihad.


         Ramiro, el que ganó l'apellíu d'El xusticieru, taba tramando planes pa cuando algamare al tronu:
     - Asina que tu yes El Mozárabe. 
     - Bueno, soi namás Selim ibn Said ben Mugait y delles coses más. 
     - Para, para; que yá te veo venir ....

      - Nun s'esmoleza, Señor; llámeme como cuasi tol mundu: Selim Marwán. 

      - Cuido que te sientes arguyosu del to pasáu árabe. 

    - Nun ye pa menos; siempre me trataron con tol procuru. Soi lo que soi gracies a ellos. 
     - ¿Y por qué nun quedasti en Córdoba pa siempre?
     - Un home precisa conocer los sos raigaños.Yo criéme na Córdoba del emigrante omeya Abderramán I, el Falcón d'Alandalus, pero fui educáu en total llibertá relixosa, por raro que vos paeza. Conozo perbién los dos credos y crecí nel respetu d'ambes cultures. Pa nada nun toi adoctrináu, como dicís per estes dómines; pero un día decidí que yá yera tiempu de conocer los mios oríxenes. 
     - ¿ Y agora que yá los conoces, lleves una década equí, nun crees que yá ye la hora d'escoyer?
     - Nun veo por qué . Dios namás qu'hai ún, nómese como se quiera: Alá o Yhavé, Zeus o Iovi , Lugh o Natura, Messi o Cristiano, Maradona ... Cadún ye un Dios a la manera de so. 
     - Bueno, bueno... Yá siguiremos falando d'esto n'otra ocasión. Mandéte llamar por otru asuntu...
     - Sedrá un gociu pergrande intercambiar paeceres con vós, señor gobernador. Los árabes - remaché con intención - pasamos muncho tiempu aldericando nes mezquites.  ¿Cuál ye esi asuntu tan secretu del que quier tratar conmigo?
     - ¿Por qué pienses que ye secretu?
     - Mandó salir a tol mundu...
     - Ye verdá. Yes bien cuciu, dignu fíu de to padre adotivu... 
     - ¿Llegó a conocelu?
     - Malpenes... Nuna ocasión coincidimos na corte d'Uviéu pero namás que lu vi de refilón cuando diba tratar con Alfonso. Pero sentí falar d'elli enforma. Tenía talante. Yera mui apreciáu ente los míos al tiempu de negociar; cuido que demasiao ....

     - Gracies polo que me toca. Elli tamién emponderaba enforma al vuesu rei'l Castu, el to valedor... 
     - Pos d'esto quería falate..... Necesito que me vaigas hasta la Bardulia, un llugar pergupu onde entamen abondar los castiellos, y qu'un día va conocese como Les Merindaes.  Pa que te faigas una idega voi enseñate un mapa, una ayalga que fexo un romanu va munchos años y que llegó a min de pura casualidá.  Ehí diz onde tán asitiaos los bárdulos y los pueblos de la redolada .... 

                     -  ¡¡¡¡¡¡¡CATAPLÁSSSSSSSsssss!!!!

Pueblos prerromanos norte Iberia
(Semeya Wikipedia)

    - ¿Qué pasa? ¿Ónde toi? ¿Qué ruíu ye esti?
    - Tas nel suelu, manín; acabes de cayer de la cama... Siéntolo abondo, queríu; al tropezar cola siella salióme volando la escudiella l'almuerzu y ... llevasti un sustu morrocotudu. 
    - Cagondiez, agora que taba a puntu de fer un viax nel tiempu... 
    - ¿Un viax? ¿Aú? Alpúntome. 
    - A la Bardulia.
    - ¿Ónde ta éso?
    - Anda pel norte de Burgos... Sé que ye la tierra de los bárdulos pero... Vamos miralo n'interné ...

    - Busca un mapa que diga: "Pueblos prerromanos del norte d'Iberia".     

    - Equí diz: <Bardulia quae nunc appellatur Castella>, según la Crónica Alfonsina. Agora entama conocese por Castiella, de xuru polos munchos castiellos que se tán llevantando. Nun hai añu que nun sufran una razia, polo menos. 

    - Per ehí van los tiros ... Agora busca'l Mapa ...

    - Debe ser esti .... Los Berrones ... los Pelendones, los caristios ...

    - Los Berones non, nun los tracamundies, los Berrones son del mio pueblu... (Tolivia- Pola Llaviana)
    - Oi, chachu; ¿cómo ye que has faer un viax a un sitiu que pa nada nun conoces y que p'a enriba son caristios ...?
    -  Son caristios, non caros. En cualquier casu ye un encargu de Ramiro.
    - ¿El de Carme? - ella sigui al endefechu la chancia.
    - Non, el futuru Rei de les Asturies. 
    - ¡Ah, los tos suaños!... Pos nada, si quies conocelos alpúntome; yo pa Castiella tiro siempres encantada.
    - Vamos ponenos a ello...
    - Mira esti mapa, el norte de Burgos ye conocío como Les Merindades.
    - ¡Ah, claro, Les Merindaes! Agora m'alcuerdo... Tienme falao Chema d'ello, por eso esti suañu... 
    - Mira que resume tengo equí... Pa entamar nun ta mal, date una idea.

   

Comarques de Burgos
  (Semeya Wikipedia)

          [ Les Merindaes son una contorna que vien a ocupar el cuartu norte la provincia de Burgos y poro pertenez la Comunidá de Castiella-Lleón. Llenda al norte con Vizcaya y Cantabria que tamién la zarra pol oeste, al este llinda cor Álava y al sur pola redolada de Los Páramos y La Bureba.
     Los 27 municipios que la conformen tienen una estensión de 2.821 k/m2. La so capital ye Villarcayo* que pertenez a la merindá de Castiella la Vieya (Nel "Reinu del Norte" la capital ye Cigüenza, pequeñu llugar al par de Villarcayo) y ta llancada nuna llanera pergrande atravesada pol Ríu Nela, que conflúi nel Ebro allá per Trespaderne.

*¿Villarcayo= Villa de Arcadio?. En 925 apaez nel Cartulariu de Cardeña como "Fonte Arcayo" por mor d'una donación al monesteriu de Cigüenza. Dalgo más tarde "Villa Archayo" figura como donación de Sancho García ya Urraca al monesteriu d'Oña.

     A llombu ente los Montes Cantábricos y los llanos de Castiella presenten Les Merindaes un abanicu de climes estremaos ente húmedos y secos con variedá de paisax. En xeneral podemos dicir que los iviernos son dalgo llargos y fríos mientres que los branos son suaves y curtios (de lo más afayaizo pa unes tranquiles vacaciones). El promediu de lluvies al añu ye de 1000 mm/3.  Amás de tar bañada polos entamos del Ríu Ebro onde conflúin bayura de ríos talo que Nela, Trema, Trueba, Xerea, Rusecu, Cerneh.a, Salón.... tien otros, como'l Cadagua ya Ordunte que desemboquen na vertiente cantábrica. 
        Una merindá yera un tarrén de realengu tuteláu por un noble que sopelexaba'l títulu de Merín y taba encargáu d'impartir xusticia . Enrique II donó-ylo a los Velasco pasando a ser señoríu hasta que Felipe II rescató'l títulu d'Alcalde y Xusticia Mayor.
 De mano Les Merindaes yeren siete (Acta Xunta Xeneral 5-1-1556): Castiya la Vieya, Cuesta Urria, Llosa, Montih.a, Sotoscueva, Valdeporres y Valdivielso pero foron enantándo con otres como Mena,Trespaderne, Los Monteros,Tobalina, Alfoz de Santa Gadea.... y dividiéndose en Partíos, Xuntes y Tercios. Llegaos a 1835 suprímese l'Ayuntamientu Xeneral de Les Merindaes pasando a ser el Municipiu la nueva autoridá alministrativa . Anguaño tiense recuperao esta calificación de Merindaes como unidá xeográfica, histórica y turística ( que buenes perres da, g.a D.).]]

                                ***********************************  

                                    ........zzz    ZZZ  zzz     SUAÑU  2u ... zzz  ZZZ  ZZZ ........... 

<Locus Sancti Iacobi> 
Anicios de Santiago Compostela.

   

  Yá debía faltar poco p'alborecer. Galdíu como taba de preparar el viax de Les Merindaes quedéme fritu. Volví a dormime. Volví a suañar que taba na corte Ramiro por mor d'una encomienda que quería faceme.  

    - Quería proponete, Selim, facer un viaxe , ¿alcuérdeste lo que tenemos falao la cabera vez?....
    - Ai, Señor; yá sabéis que toi equí unviáu pol rei Alfonso col envís de comprobar los avances fechos nel <Locus Sancti Iacobi> y  nel Camín Xacobéu, tanto na catedralina de Santiago como no que cinca a la seguridá los caminos y na naciente ciudá xacobea. Darréu del viax del Castu n' 834 son munchos los pelegrinos que s'averen a implorar el perdón énte'l sepulcru del Apóstol.  
    - Y tamién tas equí por dalgo más, so llaín, pero eso nun vas cuntámelo, ¿eh?...
    - Señor Gobernador, yo namás soi un mandàu. 
    - Entós aprovecho pa mandate yo algo y asina compruebes in situ como va'l Camín Primitivu. 
    - Si nun ye torga pa la encomienda real...
    - Nada imposible pa un cuciu como tu ... Verás, yá sabes que'l rei Alfonso favoreció la repoblación al sureste de les tierres de Cantabria, eso que se conoz como la Bardulia y que dalgunos entamen a nomar <Castiella>. 

Monesteriu femenín de Samiguel del Pedrosu.
Rei Fruela 759. Abadesa: Nonabella.
Primeros tiempos de la Repoblación.  

     - Toi bien al tantu de lo qu'ellí ta pasando. La xente ta repoblando les tierres de los bárdulos y d'otres tribes prerromániques qu'abenayá abellugaron tamién a caristios, vascones, autrigones, berones, pelendones... ye dicir: Burgos, Álava y La Rioh.a .  Yá sabemos que Fruela llevantó un monesteriu femenín en tierres de la Bureba, tierres que quedaren ermes pola política del otru Alfonso de caltener una estaya de <tierres de naide> a les que nun podía garantizar la so defensa.

    - ¿De naide San Miguel del Pedrosu ?... Poco-y duró, porque Fruela nun llevaba dos años cuando llevantó esti monestriu (759). Igual lo tenía entamanao'l mesmu Católicu (Alfonso I). 
    - Igual, pero estos conocimientos tuyos nun faen otro qu'afitar  que yes la persona afayadiza pa esta misión. <Misión: PATERNA>.

En Taranco (Valle de Mena) aprució por primera vez nesti
Monesteriu de San Vicente'l el nome de Castilla. 
¿La bárdula Paterna rinde cultu a Castiella?

    - ¿Pa busca-y una novia, señor Gobernador?
    - ¿Qué sabes tu d'éso, puñeteru?
    - Na corte sábese cuasi too, señor.
    - Y qué se sabe, al endefechu?
    - Que pensáis mui llargo, Froilaz... Y que nun taba mal enllaciar, pola de buenes, coles tierres del oriente del reinu... 
    - ¿Asina qu'esi ye'l comentariu trending topic  xeneralizáu na corte?
    - Bueno, algo se camienta.... ¿Ando atináu?... 
    - ¡Ah!, entós ye más bien cosa tuya, ¿eh, cabritu?... 
    - Nun se confíe, gobernador... Na corte d'Uviéu ta tresnándose'l el desembarcu... 

    - ¿El desembarcu? ...

    - El Rei ta cansu y mui mayor... hai qu'andar sollerte... El relevu ta al volver la esquina.
    - Dao que paeces sabelo too... ¿Conoces tamién el nome de la nuviella mentada?:........
    - Baráxense delles posibilidaes pero... 
    - Paterna, na Bardulia, lleva más papeletes que ninguna.  La tierra  los castiellos, el petite veraniegu de los mios parientes- afité camudando con goña'l tonu de voz. 
    - Pos yo voi quita-vos esi viciu - arrepostió nel mesmu tonu.  Pienso siguir cola repoblación y ameyorar la seguridá de la Bardulia; por eso quiero que vayas visitalo y de pasu... 
   - De pasu conocer a Paterna, a la familia y entamanar unes rellaciones prematrimoniales. 
   - Bueno, dalgo hai yá falao pero ando arranáu por saber lo que piensen na familia y si ella taría dimpuesta... Y como yes tan arteru, tres conocer dambes partes, sabrás ponderame la conveniencia del casu. 

Muralla Romana de LLugo <Lucus Augusti>
Semeya: Wikiland

    - Señor, nun me perestime. No que cinca al interés políticu yo namás podré apurrir una opinión, y bien humilde, por cierto; y tocántenes a lo personal...
    - Nun te faigas el fatu, tu sabes bien lo que s'espera d'una reina y lo qu'espero yo de ti.
    - ¡Ah!, si namás ye éso... ¿Cuándo teo que colar?
    - Vete preparando'l fatu, nun hai tiempu que perder. A partir d'agora lo más importante pa ti ye la     <MISIÓN:PATERNA>
    - ¿Dalguna recomendación, Señor Gobernador?
    - Lleves una carta pal condesu don Diego, el pá de Paterna, pa que te traten talo un Señor y nu ponga torgues a los tos desplazamientos pela Bardulia, d'onde tomarás bones notes p'ameyorar nun futuru próximu la seguridá de la zona. Conveníate llevar nes alforxes les <Cróniques d'Esparza> pa que conozas la zona un poco meyor.
    - Algo me quier sonar...
    - ¿Nun conoces estos códices? : <La gran aventura del reino de Asturias>, <El reino del norte >, 

<Los demonios del mar> y <El caballero del jabalí blanco>. De momento tienes bastante con eses. De lo que precises pal viaxe fala col mio fíu Ordoño, anda al tanto de too. 
         Al salir corriendo choco cola puerta y ....        

               ¡¡¡¡¡¡¡¡¡¡¡¡¡¡¡ CATAPLASSSSSssssss!!!!!!!!!!!!

         Cada vez qu'espierto d'un suañu apaez la costiella velando...

Les Merindaes de Burgos, d'España, d'Asturies.
(Porque los asturianos equí tenemos muncho que dicir,
y que ver....)

    - Bueno parienta,vamos  preparar el viax. Tengo equí dellos mapes y esti llibru: <Las Merindades de Burgos>, de Mariano Cano Gordo. 
    - Voi meteme n'Internet a ver qu'alcuentro... ¡Guáu, tenemos la tira de blog's, pdf's,  páxines web, amás de la Wikipedia!:
     .  <elcondadodecastilla>, <7 Merindades>, <las merindades.com>, <minube.com>... y dirán saliendo más. Por información nun va quedar. 
         Tres lleer a esgaya tomamos el determín de marcar los finxos que nun podíemos escaecer, lluéu yá diríen apaeciendo otros sobre la marcha. Foron estos: Villarcayo, Medina del Pomar, Frías, Espinosa los Monteros, Valle de Mena, Valle de Llosa, Trespaderne, Cillaperlata y Oña. 
    Asina que preparamos les maletes, los llibros, l'ordenador y marcamos nel mapa'l primer puntu de llegada: Santa Gadea d'Alfoz, al entamu Les Merindaes, onde alcontraremos abellugu pa los dos primeros díes. 

                   Día primeru: < Xixón - Santa Gadea d'Alfoz

Los legionarios de la IVª de Macedonia
llegaron a Retortillo y nun hebo manera d'echalos:
- ¡Nosotros d'equí nun mos movemos!
De Reinosa pal cielu. 

     Salimos de Xixón a les siete la mañana. Furnimos de pan na <Tahona de Vega> porque nunca nun se sabe lo que pue asoceder... La ruta prometía (como siempres que marcha ún de viaxe, ¿o non?): Camín de la costa per A-8 hasta Reinosa pasando per: Villaviciosa, Colunga, LLanes, Unquera, San Vicente... Equí facemos alcordanza de les <Cróniques> al ver un cartelu que diz :"Potes". 
  -   [Per esti pueblu, tien pasao Zonio de Mena camín del monesteriu de Santu Toribiu de Llébana, onde'l Beatu escribiere los <Comentarios del Apocalipsis> que tantu polvu llevantaren. 

- Sí, yá sé qu'esti Beato traite pela Cai de l'Amargura; con eso yera migo de la reina Adosinda ....

- Ye un personax bien singular. Un probe monxu de Llébana tiense enfrentao al mesmísimu arzobispu de Toledo, escribió los célebres <Comentarios del Apocalipsis> y n'<O Dei verbum> - dedicada al Rei Mauregato - proclama a ¡Santiago como Patrón d'España!;  casi ná, menuda polvarea llevantó ... 

- Y bien que'l Rei Alfonso'l Castu lo aprovechó magar nun lu tragara por apartalu del tronu que-y dexare'l Rei Silo...

- Eso nun fai qu'amosar lo intelixente que yera: <Primero'l Reinu, darréu ún>.

- Bono, yá tendremos tiempu falar d'ello, agora esfruta con San Vicente la Barquera. 

 

San Vicente la Barquera (Cantabria)

     Pasamos l'espectacular pueblu de la Barquera (barc=agua), onde 80% ta nel Parque Natural d'Oyambre, pa dir camín de Cabezón  de la Sal y llegar a Torrelavega onde dexamos l'autopista 

A-8 pa entrar n' A-67 camín de Reinosa. Debíemos salir pola 1ª pero ensin saber por qué ficímoslo pola 2ª, la de Motamorosa, y tuvimos que preguntar:
    - Dais la vuelta y na rotonda tiráis camín de Xulióbriga, la ciudá romana, pasando por Bolmir (CA-732). Dende ehí a Santa Gadea d'Alfoz poco más de media hora. 
    
             Pa entamar..... ¡¡¡¡¡UNA   de   ROMANOS!!!!!!!!

Muséu: Una <domus> romana
- Voi pa casa tomar un cafetín, ta algo fresco. 

      Xulióbriga ye una de les nueve ciudaes que los romanos fundaren en Cantabria; seguramente la cabezalera. Ta asitiada na fastera d'una llomba, a unos 900 m/snm, nun llugar de lo más vistoso y soleyero sobro'l valle de Reinosa y dominando L'Embalse del Ebro. Tien tola pinta de ser l'asentamientu d'un castru apruciendo al endefechu restos de la Edá del Fierro.  Anguaño caltiénse un pueblín al que nomen Retortillo. Abenayá taba arrodiao por una viesca onde pastiaba ganao ovino y nos pandos cultivábase'l cereal que se guardaba nos horros de los queda constacia (Sí, ho; los horros tamién los inventaron o promocionaron los romanos).
     La Legio IV Macedonia fúndala 15 años e.X. - al acabar  les Guerres Cántabres -  n'honor de Cayo Xulio César, pá adoptivu d'Augusto, y ta nun puntu de pasu ente la meseta (Herrera de Pisuerga) y el puertu de Victoriae Iuliobrigensium (¿Santander?) pasando per Suances. Foi un llugar importante que dio xente cabezalero na Tarraconense. 
    La ciudá paez abandonase nel s. III pero foi recuperando a la llargo de la Edá Media onde s'instalaren un cementeriu y lluéu una ilesia románica - Santa Mª de Retortillo - enriba'l mesmu foru, d'onde partía una cai porticada. Les buelgues más notables alcontraes son: 

Planta del Foru (Wp)

    . El foru, pequeñu y asitiáu na parte más alta. 
    . La "Casa los Morillos", del 80 d.X.
    . La "Casa los Mosáicos", onde s'aprecien les güelgues d'unes termes con hypocaustum (sistema de calefaición que producía vapor caliente soterraño quemando madera). El xefe taba bien calecíu pos cuando sopla l'airón nel Retortillo... 

Ilesia enriba'l FORU

    . La Tabernae, que nun yera'l chigre como pensaba de mano ( yá llevábemos dos hores llargues dende que saliéremos de casa y echábase de menos un cafetín... ¿Cómo s'apañaríen los romanos?). Pos les tabernaes yeren unos edificios tipu insula  (de pisos) que taben nun tarrén aterrazáu (¡qué espabilaos!) qu'emplegaben nesti casu como almacenes y comercios. Vamos, les "tabernes" vienen ser tamién como los baxos comerciales d'anguaño, que dellos significaos tien esta pallabra. Con dicir que nós pasamos a nomales chigres...  
    . Queden restos d'un alfar, onde fabricar teyes y recipientes cerámicos pa caltener el granu, llíquidos o cacía.  

DOMUS romana (Wikip)

    . Zócalos de la planta de varies cases rectangulares, non mui grandes. Si entres nel Muséu puen desplicate les partes d'una casa:l'ostium (puerta entrada),  l'adrium (patiu central), el vestibulum (entrada o estragal) el triclinium (comedor), la culina (cocina), el cubiculum (cuartos pa dormir),

 laraium (ara o altar a los dioses), el tablinum (oficina), la tabernae... Tuvimos mala suerte porque entá nun taba abierto.
    

    Xulióbriga ta en Retortillo, como queda dicho. Agora tiramos camín del Alfoz. Ye una mañana calentina . Baxamos sele, como tastiando'l vinu la zona; nun apetecía dexar aquella atalaya: ¡qué vistes de Reinosa! . Vamos bordiando l'Embalse del Ebro pola CA-730. L'agua ye la nota dominante.

-¡Meca, ye l'aniversariu José!
- Vamos echar una oración naquella capiella.
por un collaciu que nos dexó l'añu pasáu.

     Vemos una capiella y paramos echar una plegaria pos veníemos camentando sobro'l nuesu collaciu José que, xusto facía un añu, venía d'abandonamos y andábemos un poco murnios. 
Pasamos per Horna, Arroyo, Les Roces, Llano, Bimón y Arija. Equí paramos nun cruce pa preguntar, por si acasu. Si los romanos nun inventaren el GPS sedrá por que nun ye de fiar del too... 
    -De frente. Pilláis la BU-V-6423 y llegáis al "Rincón de Santa Gadea" nun santiamén.
        Y asina foi. Santa Gadea ye un pueblín del alfoz qu'exerce de capital del municipiu perteneciente al partíu xudicial de Villarcayo. 

                 

                                             ***** CAMÌN  del  AGOSPIU ******

"El Rincón de Gadea", agospiu.

         La casa rural onde agospiamos - antigua casona reformada con sabor a antiguo - ye perconocida, tanto polos vecinos como por los turistes que busquen tranquilidá: preciu llevaderu y bona comida casero. Nin que dicir tien qu'equí, pel branu, nun se t'apeguen les sábanes pola calor; duérmese talo los ánxeles. 
    Trátase d'una antigua casona reformada, con dos pisos y balcones tipu montañes, onde se sienten les pisaes del tiempu sobro'l pisu de madera. Tol mundu echa un gabitu nesti negociu familiar onde Rosa, la ma,  ye'l catalizador.

     - Mientres llega la hora de la xinta ¿ por qué nun dais una vuelta pel pueblu?
     - Bona idea, ansí estiramos les pates un poco, que tan encambriaes. ¿Qué podemos ver nesti alfoz?
     - Guapa pallabra, ¿eh?. Tien raigaños árabes. Venía ser una contorna na que dellos pueblos vivíen embaxo la xurisdición d'un merín o noble que moraba davezu nun castiellu onde s'abellugaba la vecindá por mor de les razies mores. Equí al llau tenemos tamién l'alfoz de Bricia. 
    - ¿Nun hai otru Santa Gadea en Burgos?
    - Sí, Santa Gadea del Cid; pero eso ta más al sur, nos rimeros de la célebre Sierra de Pancorbo. ¿Conocéis Miranda del Ebro?
    - Pasu ente pasu... Conoceremos Burgos de norte a Sur. Agora vamos conocer Gadea. 
     - Bueno, pos alcontraréis algo de tipu montañes, la ilesia, l'ayuntamientu, un palaciu...
     - Vamos echar una güeyada y si éso depués preguntámoste...Ta lluéu. 

 Gadea, capital de Santa Gadea d'Alfoz : Un pueblu castellanu

         Asina que vamos dar un paséu pela capital del alfoz - qu'abarca tamién Higón y Quintanilla - y en so tiempu tevo embaxo'l señoríu de la Merindá de los marqueses d'Aguilar a los que'l pueblu llegó a pagar : alcabales, hermandaes y martiniegues. Enantes foron realengu del infante don Pedro, fíu de Sancho IV, y más tarde de don Tello, fíu d'estranxis d'Alfonso XI. Tamién perteneció al Bastón de Laredo, una de les cuatro villes de la Hermandá de la Costa (con Santander, San Vicente y Castro-Urdiales) a les qu'Alfonso VIII concedió'l Privilexu Vieyu en 1200.  

Ilesia parroquial de San Andrés

     Como en casi tolos pueblinos castellanos lo más bultable arquiteutónicamente ye la ilesia parroquial - nel Barriu d'Arriba - embaxo l'advocación del apóstol San Andrés y non a Santa Águeda, como se pudiera maxinar, masque ésta tenga dedicada una ermitina. Esta ilesiona tien pasao munches llaceries a lo llargo la so esistencia. Delante la ilesia hai una Estela Medieval en forma de disco - conocida por La Palma que caltién ¿una cruz?.
La Patrona de Gadea ye Santa Gadea (Águeda), una santa italiana que foi martirizada en Catania por orde del procónsul Quintilinus al refugar los sos pettites carnales (¡gochu!). Ye la patrona de Sicilia dende que - per aciu la so intervención - detúvose l'avance del volcán Etna. 

     L'edificiu consistorial, en piedra de sillería, data de 1707 y ta ornáu por un reló enriba'l balcón. Cuenta una lleenda que nesi solar hebo abenayá un monesteriu de monxes beneditines. Igual un día Santa Àgueda nos afita la información...

La Casona los Bustamante.

     Esti alfoz, célebre poles sos agües sulfuroses y con tierres de segunda calidá, foi ricu por embargo - tamos mirando'l Madoz - na producción de patates, centenu, trigu y llegumes. Tenía ganáu vacunu, caballar y llanar asina como caza abondante, por mor del Monte Hih.edo, en: llebres, perdices, palombes, xabalinos ya osos.     
     Restolando pel pueblu entá nos quedaba por descubrir una casona palaciu nel Barriu d'Abaxo: La torre o Casona los Bustamente. Destaca sobre la sillería una vieira de pelegrín, un ventanal custodiáu por columnes ya unos turruxones cilíndricos. 
     

  Y falando de blasones namás queda rematar esta entrada col  Blasón de Santa Gadea.
Al primer vistazu yá podemos apreciar los símbolos distintivos del Alfoz: La Santa, un castiellu y los medios d'esistencia.

         [ L'escudu de Santa Gadea ta partíu ( d'arriba a baxo) y mediu cortáu (diestra-siniestra)pos, anque paez lo contrario, namás ta cortáu'l mediu la diestra; el de siniestra ye enterizu masque paezca cortáu al terciu. 
Nel primer cuartel, sobro campu azur, el bustu de Santa Gadea con cercu d'oru y la palma'l martiriu. 
Nel segundu cuartel, sobro campu de gules, castiellu (Castiella) n'oru:  donxonáu  (la torre central más alta que les otres), aclaráu n'azur (puerta y ventanos),mazonáu de sable (amosando les llinies de sillería) y sobromontáu por tres estrelles d'oru d'ocho puntes. 
Nel tercer cuartel,nun campu d'oru, tarmudu carbayu en sinople afrutáu d'abellotes d'oru,col troncu de sable y vaca pasante; too ello sobro terraza sinople. 
Al timbre corona real zarrada].

                    *****************************************

AGASAYOS:
1. A dellos Blog's: <Crónicas de las Merindades > . <Las 7 Merindades>. <bibliotecagonzalodeberrceo.com>. <elcondadodecastilla>, <las merindades.com>, <minube.com> y dalgún otru del que nun soi facer alcordanza. 

2. La <Wikipedia>  una compañera permanente a la que ye imposible agradece-y tanto.