Camìn Aniciáticu [7]: TRESONA - VIOÑO

                     Camín Aniciáticu [7] : TRESONA - VIOÑO 
Ysiguimos per tierres pantanoses....

<< De pantanu a pantanu y sigo porque me toca >>
< Dexamos l'Embalse Tresona con una murnia mirada
y el ruxerrux de los remos llevónos hasta La Granda;
nun paró ehí la cosa pos yera bien de mañana,
 xubimos a Romadonga por mor d'una mariñana
y al par del ríu Vioño finamos la caminada.
Ellos tan en monesteriu y nós tamos de yacuada
con fenoyu celebraron dar con Niria nuna estaya
y con anís celebramos poder caltener la esperanza  >

      Nun pudo terminar meyor la estaya anterior: Xira nel Pantanu Tresona, a los pies del Palaciu Peñalver. ¡Qué marcu! : Agua, música, blasón y piragua. Cuatro constantes que nos puen identificar dafechu a munchos asturianos. Sí, piragua, ¿nun somos campeones olímpicos? ¿ Nun somos cabezaleros de los Descensos (Sella, Nalón, Navia,...)?.

Cabera mirada, con pega.

        Cuesta. Cuesta dexar el pantanu y el so entornu, sobre too sabiendo que nos empobinamos a la barrera d'Arcelor-Mitral. Sí, una barrera nel Camín de Niria. Queremos llegar a Vioño al traviés de Romadonga pero enantes debemos salir d'estes tierres pantanoses bordiando esti embalse y el siguiente.  Bueno, ¿qué son 13 kilómetros?...
       Lo que más de paez al track que pensamos siguir ye esto:
       [Palaciu Peñalver - San Vicente Tresona - ParqueAstur - Gudín - Fertiberia - Cotarón - Banzáu de La Granda - Romadonga - Bar Peláez - Sanestábanu de Vioño ]
 

Ponte qu'has de cruciar
si a Tresona quies algamar. 

        Por suerte yá tenemos una idea de cómo algamar al Embalse la Granda. Yá nos lo desplicare Tino cuando aportamos a Tresona:
        -  Al salir de Palaciu tiráis per esa caleyina, a mandrecha, hasta llegar al pueblu, Tresona. Tenéis que cruciar penriba la carretera xeneral y la vía'l tren xusto cuando veáis el Cementeriu.  Namás cruciar alcontráisvos cola ilesia parroquial. Baxar a la carretera AS-19 y tirái a mandrecha, camín de Candás.....      
         Camentáronnos al salir que, p'algamar a Tresona, podíemos tirar camín de Gabitos bordiando l'embalse hasta dar cola indicación de "Parque Astur" . D'ehí a Fertiberia pela AS-19 ... Pero prestónos más la indicación del Bar. Echamos la cabera güeyada al embalse y a caleyar  pal pueblu.  
En menos de venti minutos aportamos so la ponte l'autovía tres dexar atrás el cementeriu. Tábemos camentando al rodiu'l camín mientres ferregüeyábemos l'entornu  cuando s'avera a nós un rapaz, xubiláu d'Ensidesa, que se decatare'l discutiniu:

Entrada Arcelor Mittal

     - ¿Qué vos pasa, ho? ¿Nun alcontráis el camín afayaizu?
     - Tamos nello. Queremos travesar Arcelor pa llegar al embalse la Granda y ta la cosa chunga.
     - Pa nada. Baxáis a la carretera Candás y enseguida veis una entrada p'Arcelor. Igual el guadia vos dexa cruciar pente les instalaciones pero... Nun vos lo aconseyo: Víes, trenes, fumu...
      - Nun mos presta eso; igual un día venimos acompañaos de xente menudo y...
     - A min tampocu me fai gracia. Valvos más llegar a Fertiberia, cruciar les vies pela ponte como si fuereis pa Candás. Baxáis un poco y nel primer ramal a mandrecha tiráis dica'l Cotarón. Ye como dar la vuelta, nun vos esmolecer. Pasaréis el Centru Reto y, bordiando una canal, aportáis al embalse, xusto delantre'l banzáu.
     - ¿Y pa Romadonga?
     - Bordiáis l'embalse pela manzorga y xubiendo poco a poco algamaréis a Romadonga. Preguntái pel camín, hai dellos ramalucos que vos puen confundir.  

San Vicente Mártir,
ilesia parroquial Tresona.

          [ La Ilesia parroquial de San Vicente Mártir (Tresona) data de 1947 porque l'anterior esbarrumbó cuando la guerra.En cualisquier casu equíhebo ilesia dende la dómina medieval. 
      San Vicente foi un clérigu español, diáconu en Zaragoza, martirizáu por Diocleciano en 304. 
     Llama l'atención d'esta ilesia la cabecera semicircular. Les cubiertes sostienen con bóvedes de mediu cañón y los vanos con arcos de mediu puntu. El frente y los lladrales tan orniaos por un adriu sofitáu por unos vistosos arcos de mediu puntu sobro columnes]. 

     Atrás queden la Estación de la FEVE y la célebre Capiyina de San Pelayo (XVII) que tien un adríu a "cielu rasu" , ensin cubierta, acutáu por unes cadenes pergordes. Ta asitiada mui cerca de la ilesia parroquial y nel Camín Xacobéu (siguimos per él). Caltién una sóleda nave, en dos tramos abovedaos separaos pòr un arcu faxón que se sofita en cenciellos capiteles que salen de les parés, ya un ábside cuadrangular.

     Pasamos per delantre "Casa Generosa" y a la entrada d'Arcelor-Mittal , nel barriu'l Pedreru, falamos col guardia seguridá. Nun ponía torga alguna al nuesu pasu p llegar a La Granda pero si cuntábemos venir un día con reciella meyor buscar otru pasu. Ye nidio que na dómina medieval los nuesos mocinos nun s'atoparen con estos pilancos industriales pero nós siguimos enfotaos n'alcontrar un sitiu afayaizu y cercanu p'algamar a La Granda. A mandrecha, entamilgáu nun cuetu, acolumbramos el centru comercial Parque Astur.

Camín de Niria antroxando en Parque Astur

     - Bueno, yá que tamos equí....
     Fuimos echar una güeyada. Tuvimos que cruciar una ponte pergrande sobro l'autovía. Quedamos sosprendíos, pa bien, cuando vimos aquellos arcos de ferradura...
     - ¡Concho, si tamos na dómina del Reinu d'Asturies!
     - De xuru que'l Castu y Ramiro tendríen roblao esto.
     - Pos nun te digo ná del Magnu...
     -Vamos sacar unes semeyes, que va preta-yos abondo a los siguidores de Camín de Niria. 

             [Parque Astur de Corvera tien una situación privilexiada na salida 3 de l'autovía A-8, Tresona (Y). Dende'l puntu de vista arquiteutónicu ta construyíu por una sóleda planta ya inspiráu nel movimientu prerrománicu asturianu. Les tres entraes principales representen los pórticos de los Ayuntamientos d'Avilés, Xixón ya Uviéu.
     Como Gran Superficie ufierta tou tipu de tiendes: Alimentación, Ferretería, Moda (Ropa, Calzao), Cafetería, Electrodomésticos, Telefonía, Peluquería, Fotografía, Xuguetes y Hobbies. Tamién pues averate n'autobús municipal y tornar en coche propiu, mercáu ellí mesmo,  depués de ver una película nel cine.  ]

Escuela de Primaria en Gudín.

    - Como pa nun dir velu...
          Tornamos a la xeneral (AS-19 ).  Travesamos Gudín y llegamos a Fertiberia.
Pel camín vimos la escuela y delles cases de corredor, antigües, en bastante mal estáu, por cierto, pero que nos dan una idea del tipu de pueblu qu'había enantes de desembarcar esti ensame industrial. Esto tuvo que ser mui guapo. Bueno, entá queden sitios abondo pa esfrutar de la naturaleza y del padremoñu: los Embalses (Tresona, Granda y la Furta) cola bayura de flora y fauna que caltienen;  el Campu de Golf de Los Balagares, los palacios (Peñalver, los Solís o los Bango), la infinidá d'horros y paneres d'estilu carreño; Ilesies como la de los Solís en Rodiles o Sanestébanu en Molleda, casones... y delles rutes de senderismu a cuala más prestosa.  Y qué te digo de L'Escañoriu, esa garganta producía pol Ríu Arlós al so pasu per una falla...
       Pero agora tamos en Fertiberia; ye lo que toca.  Y contentos.

FERTIBERIA 

          [Fertiberia: Ye una empresa cabezalera n'Europa no que cinca a la fabricación de fertilizantes (agricultura y xardín) asina como'l primer productor de materies primes talo l'amoniacu (NH3) y  d'urea (CH4 N2O), únicu na Península Ibérica, que lluéu merquen a otres empreses pa tresformalo  en fertilizantes, fármacos o productos de llimpieza].


     - Mira, la ponte sobro les víes que nos camentó Tino.
     - Va pa Candás, asina que vamos tirar per ella.
     - Sáca-y una semeya al tren pa manda-yla a Vettel.
          Pasamos la ponte, baxamos un poco y vemos el cartelu : <Cotarón.>
     - Efeutivamente, tamos tirando p'atrás.
     - Claro, de colar per Arcelor nun tuviere fecho falta, díbemos más derechos.

         Agora vamos per una carreterina de nada. Tamos como sapozaos ente l'arboleda y yá tenemos ganes de colar d'ellí.
     - Ehí ta'l Centru Reto.
     - ¿Ves esta canal?
     - Vaya pila agua que lleva. ¿D'aú vien? ¿Pa ónde va?
     - Tien que venir del embalse la Granda y llevar l'agua p'Arcelor.
     - Siguimos por tierres pantanoses. ¿Alcuérdeste lo que diz la "Guía'l pelegrín de Niria" ?

La Canal qu'acarria l'agua l'embalse La Granda

         " Travesamos numberosos regatos y tierres empantanaes, dexamos atrás aldegues ya ermites y cruciando cuetos y valles algamamos a un llugar nomáu ROMADONGA". 

         ¿Llegaremos?...      
         De momento llogramos salir  con alivu d'aquel tramu avesíu y, de sópitu,  acolumbramos una espeyante masa d'agua:
     - ¡Mira, qué pasada!
     - Paez un mar aseleciendo metanes la viesca. ¡Qué tranquilidá!
          Xusto aportamos delantre'l banzáu de la presa, onde la Torre Control. La presa ye de materiales sueltos y ta asitiada a dalgo más de 20 m. sobro'l calce.  Aprovechamos pa sacar unes semeyes.

Torre de Control nel Embalse La Granda.
<Coríos esnalando ¿ pente l'agua ?> 

      [ L'Embalse la Granda - asitiáu dafechu nel conceyu de Gozón -  pertenez a Arcelor Mittal y foi diseñáu d'aquella (1956) por ENSIDESA p'abastecer d'agua a la empresa siderúrxica. Forníu por mor del Ríu Granda y dalgún regatucu más, tien una capacidá de 3,2 Hm/3 (3.200.000 m/3) ya una superficie acuática de 32,50 Ha (325.000 m/2)]  

¿Petezte faer un Cursín na Residencia La Granda?

  
   - ¿Ves aquella casona moderna allalantrones? 
     - ¿Na otra oriella? ... Sí. 
     - Ehí quedaba Franco cuando venía pescar al embalse. Agora celébrense los Cursos de la Granda. 
     - Oí falar d'ellos... 
     - Aconceya, dende 1979, xente estudioso d'América ya Europa pa camentar al rodiu la situación mundial; seminarios científicos d'actualidá. 
    - Deben pasalo de putamadre pero'l mundu paez recular a galmiaes...
    - Anda, esfruta de lo que tienes, que nun ye poco. 
    - Ties razón; con too y con éso nunca se tuvo meyor... 
    - Según pa quién... 
    - ¡Anda, agora póneste tu a pensar!...

Aigla Real pasándolo en grande ente carrizos y salgueros
mientres navega pel pantanu la Granda.
    - ¡Toma, una pareya azulones volando!

     -Y allí, n'aquella especie de balsa flotante, hai una Garcia Real.
     - Ta lleno d'elles. Eses balsines tan puestes arremente pa que reposen les aves.
          Siguimos bordiando'l pantanu, pela manzorga, buscando'l norte.
     - Vaya grande que ye...
     - Tien más de cuatro kilómetros de costa (4 Km) y pasa d'un kilómetru cuadráu (> 1 km/2) de cuenca propia.
     - Equí tien d'haber una diversidá biolóxica bien bayurosa.
     - Yá te digo, ta considerada como ZEPA (Zona Especial Proteición d'Aves). Pero hai munches especies.

          [Les Aves que más abunden na Granda y con presencia dafechu son: L' azulón, el Cormorán, la Focha, el Martín pescador y la Gaviota patimariella, Cerceta común, Porrón moñudu, el Zampullí, la Cuyar común y el Porrón européu. Tamién pues ver la Garcetes , l'Avetorillo o'l Porrón acollaráu. Y más. 
    Nos Anfibios: la rana perezi y el sapu común. Ente los inseutos: el Moyaculos o Sacagëyos (libélula) , el Caballín de mar o la Vacalloria.
    Y polos Reptiles : Llagartesa de roca  y  el Llagartu verdinegru ]

Caminante, ve tranquilu
porque yo miro por ti,
pero tu pon tol procuru
en curiar bien del Camìn,
porque  ayalga como esta
va tardar en aprucir.

     - Equí tenemos ún bien chungu, un dinosauriu.
     - ¡H.a, h.a! Ye una llagartesa roquera. Esta perdióse darréu la Xira'l Tresona.
     - Amírala bien.... Paezme un Teleocrater rhadinus... 
     - Nun te pases, tío; qu'esi midia cerca dos metros ya mediu metro d'altor, amás ... yera carnívoru...
     - Entós dando les fusties.¡Vamos!
     -Los que van dando les fusties son estos chavales que vienen faciendo  futing pela visca de ribera..
     - Y aquellos otros tan pescando...

Una Islla nel Embalse de La Granda-

           [Tocante a la Flora son los salgueros y l'humeral los dominantes n'esta viesca de ribera. Lluéu tenemos plantes como: la salicaria, el llantén d'agua, el lliriu mariellu, o la menta acuática ente los que más se ven; pero hai munchísimes más como les espadañes y los carrizos. ¿Por qué nun t'averes a veles?]

     - ¡Anda, una islla! . Una islla metanes el pantanu.
     -Tien d'haber hasta caza n'aquel biescu.
     - Pero dominen salgueros y el  pinos sobro la viesca ribera.

P'algamar a Romadonga hai que xubir una cuestina mui sele
 pero ye una satisfaición pergrande caleyar per estes praderes.
De xemes en cuando tonamos la vista p'asitiar l'embalse nesti entornu.
Ellí, al fondu acolumbramos el míticu Picu Gorfolí. 

   Llegamos a un cruz al cabu l'embalse. A mandrecha primero, a manzorga depués. Hai qu'entamar a xubir sele pa dir camín de Romadonga. Tamos caleyando per un pandu, abiertu y con numberosos praos y tierres de llabor. Esto ye mui granible y dondo pa trabayar. Nun los veo pasando fame depués de la Guerra. Maxino estes faces acorropìnaes de maizales coles fabes amosando pente la fueya y les güertes mistes con tou tipo d'hortalices, entá se ven anguño. Presta sentir les vaques pastiar per esti verdemar. Vamos preguntando pola ilesia de San Martín del Cardu.

La Ilesia de San Martín del Cardu
asitiada nuna llomba del barriu de Romadonga.

   - Romadonga ye un barriu de  la parroquia d'El Cardu ( amás de La Ería, La Ren y Zanzabornín).
 La ilesia ta allarriba, nel cuetu, tres pasar  aquella palmera. Ye mui importante, ¿eh?. Nun dexéis de vela.
     - ¿D'ehí a Vioño cuántu habrá?
    - Tres ó cuatro kilómetros. Tenéis que chocar cola carretera xeneral d'Avilés a Luanco. Vais dar  frente un bar: "Casa Peláez".
         Preguntamos a otra señora un poco más alantre. Andamos un poco.
     - Yá se ve la espadaña.
     - ¡Dios! ¿Qué ye aquello? ¿Ves lo mesmo que yo?
     - ¡Una mariñana!
     -Paez la casa los Pitufos. ¿Ves que color tien?
     - Ta remocicada dafechu y pintada de viola. Entá caltienen la cuadra como cochera. ¡Vaya gustu!
     - Mereció la pena venir hasta equí namás por ver esta ayalga.
  Hai unos neños xugando nos columpios de l'antoxana. Falamos cola dueña que nos camienta al rodiu la casa. Aporten los mayores al ruxerrux del alderique.  Tán persatisfechos de la obra; nun ye d'estrañar, toi yo. Tomamos unes semeyes col so asensu.

CASA  MARIÑANA  en Romadonga 

        [ La casa mariñana pue considerase'l prototipu de la casa rural asturiana, sobremanera na franxa central. Ye una casa terrera, d'una altura, con cubierta de teya a dos agües y  planta rectangular - cuasi cuadrada magar nun lo paeza - que se distribúi per aciu d'un portalón central que da accesu a les habitaciones, corte y cocina.  
     El portalón, cubiertu, ye una pieza perimportante y que cumple delles funciones: Trasteru provisional, taller pa iguar los preseos o centru de rellaciones sociales,nun hai sitiu más afayaizu pa facer un calechu (la xente reune pa calechar, polo menos nes Babies).
     Nel centru, embaxo cubierta, alcuéntrase la tenada, enriba la cuadra, a la que s'acede dende'l portalón. Los lladrales empléguense como sobráos pa guardar sobre too " aquello que nun mos atrevemos a tirar por mieu a perder algo de nós".

Planta Casa Mariñana

     Los muros son de mampostería enyelsao colos corneyales canteaos. Nel llar, que s'amuesa arredondiáu per fuera, suel colocase un sardu - texíu de vares d'ablanu - pa secar les castañes. 
     La distribución y estructura de la Casa Mariñana almite delles variantes y, les más modernes, tienen un pisu y hasta corredor: ¡Son la envidia de cualisquier asturianu!] 

         Cuatro pasos y tamos delantre la

La Ilesia San Martín bien abellugada.

        [Ilesia de San Martín del Cardu. Ye una construcción moderna, del sieglu XX. Nave en cruz llatina, cabecera rectangular, vistosa espadaña ya un adriu a dos cares demasiáu cubiertu, pal mio gustu. Había que vela per dientro. Los que deben tar a gusto son los parroquianos, que nun pasen gota fríu pel iviernu mentanto se ponen al día so les caberes anuncies de la selmana. ¿Entós pa qué son los adrios?... Gracies a ellos tiénense iguao munchos enguedellos de l'aldea. ¿Y cuántes vaques se tienen mercao nestos pòrticos?... Tien romería  con procesión mui célebre. ]

Esta caparina que tas viendo tuvo entreteniéndonos un ratu pel camín de Romadonga a Vioño.


          [ La Caparina ye un inseutu del orde de los lepidópteros. Son animales diurnos, anque hai dalgún noctámbulu, que favorecen la polinización, per aciu d'una trompa enrollable cola que lliben el néctar de les flores ¡hasta emborrachase!. La Vanesa tamién pue alimentar de fruta podre na seronda, enantes de colar pal Mediterraneu (ye migratoria) si pue, porque a la primer xelada... Au revoir. 

Yá sabes que ye un cosina feble y pequeña pero hai una per Nueva Guinea (Ornithoptera alexandrae) que pue tener hasta 30 cm. d'envergaura; la fema (¡menuda hembra!), el machu ye algo más pequeñu. 

Les dos pares d'ales, tan simétricamente policromaes, sírven-yos pa termorregulase, pa dicir "equí toi yo" y pa cortexar, ¡toma!. ¿Sabes cómo se... eso... les caparines?... Cada familia tien el trucu particular pero en xeneral los machos, cuando ven una fema que-yos gusta empiecen a producir unes  feromones pergoloroses (sustancies que prevoquen comportamientos específicos n'otros de la mesma especie) y al empar entamen con exercicios d'exibición - como si fueren aviones el día de la patria. Cuando la fema se decata yá quedó inoculada.  Hai machos tan celosos que pa togar a la novia otres cópules tápa-y el aparatu - xenitalia - con pastia pegañoso; hai que ser malinu.....
        El casu ye que la fema pon cientos de miles de güevinos nuna planta (la Vanesa vive nes ortigues). Del güevu sal un guxán nomáu oruga o larva que devora la fueya  y se tresforma en crisálida. Dexa de comer y sufre una metamorfosis pasando p'adulta y saliendo de la crisálida al francir el so esqueletu. Y otra vuelta la burra al trigu... Y too pa durar tan poco. La caparina ye namás qu'una ilusión].

Dexamos atrás les tierres empantanaes
(La Granda, Tresona, La Furta)
 p'adientranos en Vioño.

         Pero depués de la mariñana yá nun tamos pa ilesies, y menos modernes. Asina qu'a tirar p'abaxo  camín de Casa Peláez. Yá toi camentando nunos güevos con patates frites... La GO-4 ye una carreterina llocal, pertranquila, que va dexando un filu buxu pente aquella alfombra verde de  praos y tierres de llabor. De xemes en cuando vese acompasada pol ruxerrux d'un regatu que busca talo una sierpe la fondiega la parroquia, allá onde los cabezaleros de Vioño llevantaren un palaciu rural. Ye'l Ríu Vioño que desemboca na Ría d'Avilés per aciu la playa de San Balandrán.

          [ Vioño ye una parroquia de Gauzón de 2,91 Km/2 dedicada a Sanestébanu. Asoma nos papeles por primera vez nel añu 905 - tiempos d'Alfonso III - como una donación del Castu - Sancti Stefani de Bionio -  a la ilesia de San Salvador d'Uviéu. Claro que... estos testamentos hai quien diz que nun son de fiar por mor de los trapicheos del obispu Pelayo nel sieglu XII. (¿pero de verdá que pudo inventase éso?). 
 Lo que paez más serio ye la rellación del censu parroquial del obispu Gutierre de Toledo en (1385/86), siendo rei de Castiya-Lleón-Asturies Xuan I, onde apaez nomada como Sancto Estevan de Bionno.
     Ta conformada por cinco barrios: Vioño, la Buenavista, la Cabrera, la Pedrera y Polvorosa ]

          Pies en polvorosa ye lo que punximos nós. Pasamos la Ganadería Valdés y nuna d'aquelles llombes acercamos a unos caballos pardos que pastiaben per aquella bucólica estampa. Queremos trespasala a la retina la cámera pa nun escaecela enxamás. De sutrucu, al buscar posiciones, acolumbramos nel finxu'l cielu una mancha cande bastante bultable:

    - ¿Qué ye aquello, aquel garapiellu claru? - entrugué señalando l'horizonte.
    - Mira pola cámera; si lo amplíes nótase meyor.
    - Anda, si ye una ilesia... Pero hai daqué más...

- ¿Sedrá aquello'l Monesteriu?
- ¿Aquel garapiellu cande?
- Sí; esa mancha blanca
 que ta perbién situada.
- Toi arranáu por llegar.
- ¿Y si vamos en caballu?
- Paezme que ye'l d'Onirio.
- De xuru que tan ellí. 

  - Oi, ¿nun tamos en Vioño? ... ¿Qué dicen les Cróniques d'esta zona? ... Sácales de la mochila y vamos echar una güeyada:

     " Travesamos numberosos regatos y tierres empantanaes, dexamos atrás aldegues ya ermites ensin malpenes detenenos nun fuere namás pa dar colos caminos más afayaizos. Cruciamos cuetos y valles y, al atapecer, dende un llugar nomáu Romadonga y siguiendo'l calce del ríu Vioño, aportamos a un monesteriu ruinosu...."

     - ¡Para, para!... ¿Dixisti un monesteriu ruinosu?... Cusbia allalantrones... ¿Nun sedrá aquel garapiellu cande'l  monesteriu?...

Chisbando Casa Peláez y
¿el ruinosu Monesteriu?

     - Puede. Entainando, yá toi arranáu por llegar.... ¡Ixuxú!
         P'abaxo tolos santos ayuden. Una aisllada casa colorá pon un puntu de sospresa naquel tapiz verde y castañu. Yá vemos el tránsitu de la carretera AS-238 que xunce Avilés con Luanco. Y llegamos a Casa Peláez, un bar mui frecuentáu pola xente de la zona onde camienta les anuncies de la parroquia y rimeros (como nel adriu de San Martín del Cardu). Tamién los caminantes y la xente que tien afición a los callos para per equí. Nós tamién lo facemos pero, de momento, pa tomar una clara; enantes tenemos que llegar al monesteriu. 

     - El camín cuéyes ehí mesmo.  Volviendo la esquina del bar tenéis una riega; paez poca cosa pero ye'l Ríu de Vioño, que desemboca na Ría d'Avilés tres recoyer les agües de regueros como La Barrera, la Torre o Alvares.

Salimos de Casa Peláez
per aciu d'un ponticu
camín del ¿Monestriu?

         Salvámoslu per aciu d'una cucia ponte onde se tan bañando unos coríos (azulones) ayenos a los esmolecimientos de los caminantes. Cruciamos los praos en direición NW hasta dar cola carretera xeneral ( GO-10) que va pa Manzaneda. Cuando llevamos andao como un kilómetru columbramos, a mandrecha, una casona pergrande...



    - ¿Veis aquello?
    - ¿Aquel garapiellu cases?
    - Sí. La casona cola torre, l'horru, y nun sé qué coses más.
    - ¿Ta perbién asitiada, eh?. Na rimada la llomba y arrodiada pol ríu.  ¿Averámonos?
    - Dende lluéu; el Camìn de Niria pasa per esta ponte sobro'l Ríu Vioño. Un poco más allá tien d'alcontrase la Ilesia.
    - ¿Nun sedrá'l Monesteriu?
    - De momento tenemos esti palaciu:

Casona-Palaciu de La Ponte a la vera'l Ríu Vioño
Entamigáu na llomba ¿el Monesteríu?

          [La Casa de la Ponte pertenez a la familia García-Pumarino que llevantó tamién la Casa de Llano-Ponte n'Avilés tres facer fortuna nel Perú. Esta quintana caltién, además de les tierres que l'arrodien, horru, cuadres y una capiya del XVIII . 
      Don Rodrigo García Pumarino, natural de Manzaneda, emigró a Lima cuando tenía 15 años. Cuciu él, fexo perres a esgalla y tornó al pueblu, depués de cuarenta años, fechu un indianu de pro mercé a los sos negocios navales. Mercó tierres en Vioño, cerca la ilesia Sanestébanu, a la vera'l ríu y construyó una casona-palaciu a la que s'allegaba al traviés d'una Ponte. ¿ Vien-y d'ehí'l topónimu?. 
     Claro que'l verdaderu palaciu llevantólu na Plaza España de la villa d'Avilés, al entamu la cai Rivero, como tien de ser. Entá pues dir velu (pienso dir), foi'l cine Marta y María nun va tanto. Los descendientes camudaron esti palaciu a Francisco de Llano Ponte por una propiedá nel barriu Sabugo d'Avilés. 
      Qu'esti home foi un cabezaleru naquella dómina (s.s. XVII - XVIII ) sabémoslo porque nel so escudu d'armes amuésense delles veneres (conches del pelegrín) y cruces de Xacobu, non en vanu algamó a Caballeru de la Orde de Santiago. Decatémonos que Velázquez p'algamar a categoría tala hebo de pintar Les Menines... ¡Tela!...
      Don Rodrigo morrió ensin fíos (nun da tiempu a too) pa gayola de los sobrinos. Tovía siguen echándo-y mises na capiya d'escontra casa dedicada a Santa Rosa de Lima, claro.]

Llavaderu de La Ponte al par del Ríu Vioño

  - ¿ Por qué tendrá esa palmera na finca?. Nun me pega pa una casona rural...
     - Porque l'home que la construyó foi un indianu. 
     - ¿Yá había indianos nel XVII?  
     -Y antes, anque nun se nomaren asina. Depués de 40 años n'América echábala de menos, normal.
        Dexamos la casa, el ríu, la ponte y embredamos camín de la ilesia. 
     - Toi enforma cansada. ¿Qué tal si vamos hasta'l monesteriu a ver si nos dan posada?
     - Tornemos a les Cróniques. Si dagún de los nuesos protagonistes se tuviere agospiao equí igual nós tamién pudiéremos pidir abellugu, ¿paezte, ne?. 
     - Diba prestate. Voi lleer....

- ¿Tengo pinta monesteriu, eh?
Soi Sanestébanu de Vioño. Sorry.

    " Al atapecer, dende un llugar nomáu Romadonga, y siguiendo'l calce'l ríu Vioño, aportamos a un monesteriu ruinosu onde un garapiellu de monxos y monxes , casi toos aneyos, andaben esmolecíos nel trabayu la madera pa fabricar aperios de llabranza y preseos pa les cases. Tamién pasaben el tiempu sacando filos, bordando y texendo manteles y prendes de llana y llinu. Un buen mozu - nun se trataba del abade, porque esti yera un cabuexu  coles barbes hasta cintura y güeyos encostraos que malpenes podía movese - que paecía ocupase de tola organización y l'acoyida de los visitantes, díxonos:
     - Acabáis d'aportar a ún de los monesterios más antiguos del Reinu. Foi fundáu pol Valerio, dicípulu del ermitañu Fructuoso y que llegó equí dende'l Valle del Silenciu, xunto al monte sagráu d'Aquina. 
    Como siguíemos esmolecíos por mor de les sos desplicaciones, añedió:
     - Mirái. ¿Veis eses plantas que crecen  ehí enguedellaes?. Col so aceite repulgamos les firíes y col so arume refugamos  la tristura.
       Como taba atapeciendo naquél día esin lluna y arriendes d'ello llevantara un airón solobre que torboniaba los caminos,  aquel bigardu nomáu Epicino brindónos un cuartón onde preparamos unos llechos - per aciu d'unes esteres y delles brazaes de yerba seco - pa pasar la nueche. Tamién nos ofreció quesu, alguna fruta y pataques. La carne, la sidra y el vinu taben esaniciaos dafechu naquélla abadía (tirái pa Casa Peláez, fatos). 

Sanestébanu de Vioño 

Como pa disculpase enrollóse cuntándonos cómo vivíen naquel cenobiu y darréu quixo saber de nós. Al enterar que yera fíu d'un conde y amigu de los señores de Gauzón - bienfechores d'aquella badía -  la cosa dio un vuelcu y quixo arreglalo brindándonos una cama más xeitosa y dalgún llicorucu* d'esos qu'amiyen dende'l cielu en díes mui señalaos. Refuguélo, nun yera'l casu, teníemos otros esmolecimientos. 

    - ¿Pues danos alguna pista sobro les persones que buscáis?
     Cuando-y describí al alfareru Rigio quedó pensatible y entamó a dar vueltes alredor de la mesa en que comíemos. Al cabu llamó a un monxu mozu que yera de la parte Viodo. 
    - ¿Suénate algo un alfareru de la zona apellidáu Rigio?
    De sópitu quedó un poco fuera bolos pero....
    - Mio tíu Xelado, el ferreru, tien un pariente que de bien chicu entró al serviciu d'un alfareu portugués...
     - ¡Ixuxú! ¡Son ellos! ¡Viva la madre superiora!
      El monxu Epicino entamó a rir y dar glayíos como si yá los tuviéremos alcontrao. Yo entá nun yera celebralo y quedare un poco apangáu al nun poder colar darréu. Clodo decatóse:
    - Señor, mañana salimos galopiando en cuantes risque l'alba. En cuatro galmiaes tamos en Viodo delantre de Niria y Rigio. Yá verás que contentos se ponen. 
    Onirio tamién vino a dame cuayu:
    - Señor Melendo, mañana, enantes del meudía yá podrás ver a Niria y nosotros el mar. 
     El letible monxu tamién quixo sumase a la fiesta y foi pañar un ramu flores marielles de fenoyu qu'espardió pela sala a la fin d'espantar la señaldá. 
       
* De xuru que'l llicor tenía l'arume, el sabor y les propiedaes anti-morriña del anís del finoyu.

¿Sienres el ruxerrux?

       << El fenoyu (foeniculum vulgare) conocíu tamién por cenoyu o hinojo per Castiella ye una yerba que alcanzar hasta los dos metros d'altor per aciu d'un tallu firme y arrechu. Dase nes zones templaes del glogu pero ye orixinaria del Mediterrániu onde crez asilvestrada magar que tamién se planta por mor de les sos propiedaes culinaries y aromátiques (tien un arrecendor a anís de lo más prestoso) y curatives.
     La fueya, verde escuro, ye estrencho y allargao rematando  nunos segmentos puntiaos y duros a la fin d'aforrar agua por trespiración. Les flores presenten n'inflorescencies en umbela - con cinco estames y dos carpelos - de color mariello. El frutu ye un esquizocarpiu de dos mericarpios pentagonales bien prietos y cinco costielluques bien marcaes. 
      Nun ye d'estrañar que les conocieren na badía de Vioño dao que Carlomangnu (742-814) per aciu del Capitulare de villis vel curtis imperii teníala recoyida a la fin de promocionar la so plantación.
     ¿Por qué plantala? Poles sos propiedaes culinaries y tonificantes (¿pa la tristura los monxos?)
     El fenoyu nun tienen desperdiciu: La fueya y el tallu como yerba arumosa, les semilles como especies y el bulbu como hortaliza. Afinando:
     . Cola semiente puen alliñar platos como'l curri, panes, pescaos, tartes, salses... Loa xitanos andalusínos idearon un platu de "fabines con fenoyu" y en Cieza (Murcia) arumen les aceitunes. 

"Foetidum vulgare", el petite de los monxos.

    . En Marruecos empléguenlo n'ensalaes y nos asaos de corderu y ternera. 
    . Na Francia occitana va como ingrediente na "llubina a la provenzal". 
    . Na India faen un entemecíu d'especies seques, tostaes y molíes que nomen Garam masala" (especias calientes), una d'elles pue ser el finoyu amás de : culantru, comín, pimienta negro, chile cardamomo, ñuez moscao... ¿Por qué nun tresnes unes albondigues con esti preparáu?. Póneste como una moto.  
    . De la semiente tamién se saca un aceite, rico en anetol, que s'emplega en fitoterapia y tien propiedades dixestives. (Los monxos nun diben mal encaminaos, ¿eh?.Toos sabemos el bon tonu corporal que te dexa una copina d'anís tres una yacuada. Tenía razón madre:" Vete estudiar colos monxos qu'esos saben muncho". Pena nun se me pegare algo más).
**** CHISME : Acaba chivame un monxu, petit comité, que'l fenoyu tien munches más propiedades. Amás d'antidepresivu empléguenlu pa casi too: pa curar el colón irritable, cólicos, gases, riñones, bazu, fígadu, catarros, tensión arterial, problemas d'estómagu, y.... pa da-y puxu a la libido.]                               

Monxu n'oración de Laudes

         Yá veis, collacios; el monesteriu que nos traía pela cai de l'amargura resultó ser la Ilesia de Sanestébanu de Vioño, documentada nel XV pero yá con fábrica del XX. Tien planta en cruz llatina con pórticu-adriu cubiertu  a dos agües sobro arcos de mediu puntu. Destaca l'eleváu l'ábside cuadrangular asina como la espadaña a dos vanos. Tamién tien adosáu'l cementeriu parroquial. Un garapiellu bultable d'edificios que dende lloñu pues tracamundiar dafechu por un monesteriu.


         Bueno, llegó la hora colar.  Mañana, sedrá otru día. Tamos dispuestos a realizar la estaya cabera: "Vioño - Viodo".  Tenemos a Niria a tiru piedra... Siento ansiedá y pena. Ansiedá de consumación, pena de terminación. Quiero que Niria y Melendo pongan les coses clares y vivan xuntos pa siempre y nos dean fíos .... y más histories. Pero a mi fíname'l camín, el Camín Aniciáticu ; pero lo vida sigue y nós tamién. Porque .... Qué razón tenía aquél:
               <Lo importante nun ye'l destín, seique'l camín>, polo menos pa min.

          Pero depués d'esta caminada tamién nós necesitamos tonificar. Tamos en Vioño (Gozón), ¿ qué meyor sitiu que Casa Peláez?.  Asina que p'allá nos empobinamos. Ta asitiáu na  carretera xeneral Luanco-Avilés (AS-19), nel barriu La Pedrera xunto a "Comercial Vioño".  Ye un bar pequeñu y antigüu con un poco terraza alredor onde para la xente la zona a camentar les anuncies o cenciellamente pa esparder. Tamién vien a comer xente d'afuera, sobre too los callos, normalmente por encargu. Nós vamos aprovechar pa saltar la norma y xintar aquello qu'en casa ta vedao por mor del ensebe.

 

    - Güevos con patates frites y un choricín pa dar color...
    - ¿Fritu tamién?- entruga Ramón, l'home que lu rexenta.
    - ¡Home...! Crudu quedaría mui esblanquiñáu.
    - ¿Y pa beber?
    - Vino; nun tenemos qu'agarrar el coche.  Bueno anda, con casera - dixi, tres pidir asensu con una mirada.
         Darréu la pitanza y ponenos como monxos nun día d'esos onde s'abracen los cures (misa cantada con tres o más cures) ....
    - ¿Un cafetín?
    - Acuéi, güei ye fiesta...
    - ¿Sólu?
    - Home... Si ye bautizáu con unes gotines d'anís...

                                GRACIES:

Esta rosa alcontréla pel camín, ye pa tí.

       . Gracies a F. Argüelles por prestame los personaxes (bueno, secuestrelos, la verdá,  pa que digan les coses a mio manera) de la novela : "A la sombra de los abedules" . Pido perdón por ello pero... Pasámoslo tan bien xuntos percorriendo los caminos d'Asturies, arramando pallabres y cargando histories nes alforxes, camentando al rodiu les coses de la vida, aprendiendo a conocer la nuesa historia y a nós mesmos... Porque'l Camín de Niria ye un camín p'aniciase nel cococimientu del ser humanu y del mediu nel que mora. Porque en realidá toos - los personax y nós - tenemos el mesmu enfotu, toos andamos a la cata de Niria.
     . Gracies a la Wikipedia que tantos servicios nos presta. Y a webs como les de los Ayuntamientos de Carreño, Gozón o Avilés.
     . A la "Guía de los amantes de la Naturaleza" de Michel Chinery. Y a la "Guía de los Insectos de Europa" de Wolfgang Dierl.
       Bueno, quédame pa deberes lleer esti llibru: "Luanco y el concejo de Gozón", de Ignacio Pando García-Pumarino.

C. A. [6]: Posada (Llanera) - Pantanu Tresona

  C. Aniciáticu [6] : POSADA (LLanera) - Pantanu TRESONA

"Salimos de mañanina
camín del Banzáu Tresona :
suaves montes, llargos pandos,
y tierra perpantanosa.
¿Por qué nun vienes conmigo
a decubrir esta historia?

           Esta caminada pue facésevos un poco llarga asina que voi ponevos como motos enantes d'entamar: <Coser y cantar>, yá veréis.

 

<<GRUPU FOLKLÓRICU de CORVERA>>

        Tamos en Posada Llanera, delantre l'Ayuntamientu. Intentamos aparcar pela zona. Sacamos unes semeyes al parque enfrente, cosa guapa. Entramos na Oficina Turismu a pidir información de les rutes y del conceyu en xeneral. Xusto ehí tenemos dexao a los nuesos mocinos el día caberu, aquel que dende Ules nos trexo peles Cueves del Tuernes y les tierres del Valiente, en San Cucufate.

<<Camín de Niria>> tres les güelgues de Melendo

          " Enseguida paró de llover y una lluna desfigurada y partía igual aprucía qu'esmucía. Siguimos a ciegues un camín de piedres sintiendo'l canciu les curuxes, el bramíu d'algunos gües y el chaflotiar de los caballos  per aquel senderu enllamuergáu "


          Nós tenemos más suerte; un solín feble y caldiu vien a saludanos, los llares tán de la mano. Queremos llegar al Altu la Miranda y buscar darréu'l camín más afayaizu pa colar a Cancienes. Mira tu per ónde tornamos al Camín Xacobéu, esi qu'entamó en tiempos del Castu, el primer pelegrín. De xuru que foi'l mesmu que siguieren los nuesos protagonistes, yá en tiempos del Magnu.. Va ser el meyor. Los pelegrinos d'anguaño tiénenlu bien tresnáu.  Envede dir pela la carretera xeneral AS-17, que tien un trasiegu infernal, tiramos pel camín de les curuxes que va paralelu.
          Yá llevamos fechos - dende que salimos de Cenera - ¡60 kilómetros!. Somos unos gallos: 60/5=12 KM  de media por día de caminada. ¡Yá quixere'l McLaren d'Alonso!. Tamos empixaos ya entá queremos más. De momento hasta Cancienes quédennos unos 13 kilómetros, cuando aportemos a ver cómo tamos de fuercies .....
          Camienten que pa xubir a La Miranda hai una cuestina sele, depués baxar y baxar hasta'l Cruce Campañones y llano, llano hasta Nubleo. Si nun cansamos muncho podemos algamar el Pantanu de Tresona , Pour quoi pas?. Bueno, l'ilusoriu track que nos espera ye esti:

      [Posada - La Minona - Altu la Miranda - Cruce Campañones - Cancienes - Nubleo - El Portazgu - Banzáu del Tresona ]

Parque de Posada: Oficina Turismu
Equí entamamos güei.

         Tres les consultes en mapes topográficos (28-II y 29-I) ya otros d'usu común tomamos el determín de xubir al Altu La Miranda buscando'l vieyu camín de la Minona, bordiando'l Monte Santufirme (439 m.) pel oeste. Nel mapa fácil pero hasta dar col camín afayaizu tuviemos qu'entrugar un par de veces:
     - P'arriba y manzorga. Vais alcontrar el Depósitu d'Agua, dexáislu a mandrecha. Xubís pel pinar pali-pali hasta enllanar. Veréis la Minona abandonada y como nuna romería, ensin davos cuenta, yá tais nel Asador de la Miranda.

¿Ves el Depósitu d'Agua? ... ¡A manzorga! 

           Dexando'l Parque a mandrecha embredamos dica'l norte hasta una rotondina. Tiramos a manzorga y pela Cai Mon  llegamos a la Cai Quintana. P'arriba, pel barriu de Caraviés - con cases perguapes - hasta columbrar el Depósitu d'Agua. Lo meyor pa nun perdese siguir les marques del Camín Xacobéu; y ye que nun lu vamos abandonar hasta algamar al pantanu.
Pasamos pel Castiellu, que pertenez al dueñu de Conxelaos Basilio, mira per onde ehí mercamos abondo. Perguapa la "Casa Argentina" y tol entornu del camín.


         Da gustu ver esta tierra de maizón, porque ta semao'l maíz solo, non con fabes; n'esti casu sedría un maizal. Yá tan les panoyes en formación avanzada y, de sutrucu, reparamos nuna que destaca de les otres poles b arbes coloraes. Toi camentando nel día la esfoyaza, ¿alcordaisvos lo que-y pue pasar a la qu'alcuentre la panoya colorá? ...

El día la esfoyaza, al tiempu enristrar les panoyes, la moza qu'alcuentre la panoya colorá ta na obliganza de cumplir los deseyos del restu los enristadores, davezu tener que morrear con dalgún de los cortexadores. Estos xuegos tan inocentes foron prohibíos (h.a, h.a) pola G.C. en tiempos del Dictador :
          <El canciu de la panoya
            yá nun se pue nin cantar
            porque dicen qu'echa multa
           la Guardia Municipal >

La panoya colorá
  petite de la moza namorá

          [El maíz ( Zea mais) ye un cereal de la familia de les graminies. Planta monoica con flores masculines en racimos y femenines n'espigues. Los frutos son unos granos mariellos perabondantes y nutritivos. Vieno d'América del Sur y afincóse n'España nel siglu XVII bien rápido (a Dios gracies, pos munches fames tien quitao) en climes tan afayaizos como'l d'Asturies: suave y mugo.
Plántase na primavera darréu cuchar, llabrar y gradiar ( o retobatiar)  la tierra. Más tarde hai que sallar ( quitar meruxa)  y arrendar (arrimar tierra a les plantes).
La collecha na seronda : la caña coles panoyes déxase secar na tierra faciendo cuques (mazos con figura de conu ) y l'estarucu (la raíz ) queda na tierra p'abonu.
Dicen que lo trexo ún de Tapia Casarigu y seguramente ye verdá qu'estos tapienses son mui echaos p'alantre (toi pensando nel collaciu Manolín, direutor dellos años nun colexu del barriu'l Natahoyu]

¡Adiós, Minona, adiós!

          Yá, por fin, columbramos el Depósitu del Agua.
     - ¡Alto!, nun tires p'allá, bórdialu y sigui per esi camín anchu de grava, a manzorga.    Enseguida vas metete nuna viesquina onde abonda l' ocalitu, el pinu y el felechu; claro que la vexetación autóctona bilta per auquier. Unos charcos nel camín traennos n'alcordanza a los nuesos mocinos que pasaren per equí un día lluviosu, chaflotiando pente'l barru la llamuerga.
         Caminando a la solombra llegamos a La Minona. Entá se caltienen dos prefabricaos y unes cases habitaes.

Nel Barriu la Teyera: Áridos TRASFAL

         Facemos un altu nel camín cuando acolumbramos una fábrica a la izquierda la carretera xeneral.
     - Meca, mira... Nun ye una, son dos.
     - Esa zona tien el topónimu de La Teyera.
     - Antes sedría una teyera pero angüaño....
     - Tenemos que investigar.  Vamos sacar unes semeyes...

        [Esta vegada envede entrar n'internet entramos nun chigre de Posada pa buscar la información: "Restaurante'l Gatu":
     - La primer empresa d'áridos qu'alcontráis , tirando p'Abarrio,  pertenez a CEID.
La segunga, un poco más arriba, nel barriu La Teyera ye de TRASFAL.
Tamién aprovechamos pa falar d'otres histories, como siempre....]

Malus doméstica en formación. 

          Pel camín de la Minona, enantes d'aportar a La Miranda, vimos una pumarada colos árboles yá cargaos de mazanines en procesu de formación. Presta veles. Viennos n'alcordanza'l llagarín de Pilarina y Gelín, los nuesos tíos. Daba gustu entrar ellí pol tiempu la pisa:
     < N'aquel arume a sidra duce cabíen toles histories , y yeren los llagares talo alambiques del alma del nuesu pueblu y guardaben los corazones d'aquelles mazanes los secretos de too lo que nel futuru tendría de sucedenos> 
    F.A.: "A la sombra de los abedules"

          Y llegamos al Altu la Miranda. Una zona amplia nun cruce carreteres: Una, a mandrecha, que va pa Villabona. Sigue la xeneral AS-17 que vien de Posada y tira p'Avilés; y quédanos otra llocal, mui cenciella (Ll-9) que se toma a mandrecha l'Asador de La Miranda, la nuesa.

Altu La Miranda (240 m) .
A mandrecha entama la carreterina Ll-9

          Entramos tomar un vermú nel Asador, tampoco ye la hora la xinta. Güel a lleña. Yá tan prendios los tres fornos. Menos mal que colamos darréu.... Esti restaurant ye especilista en cochinillu ( garantía de Segovia) y en llechazu (I.G.P.* Castiella y Lleón) tien amás "Arroz con morciella d'Aranda", callos caseros, pan de casa, empanaes.... Vamos, que pa saborguiar estos manxares nun tienes falta desplazate tan lloñe; n'esti asador tienes la garantía d'orixe. Tomamos nota, que pa eso pelegrinamos, pa conocer.
           (*I.G.P. : Identificación Xeográfica Protexía)

Hotel ROYAL

           Salimos a la cai y, xusto a manzorga, garramos una carreterina cuestarriba. Nun ye difícil siguila porque tien la marca xacobea: la concha'l pelegrín. Enllanamos vamos viendo cases y caseríes como la del Molineru, onde retratamos unos caballos. Qué vista más guapa. Un edificiu acoloratáu, modernu y pergrande llámanos l'atención. Ye´l conocíu Hotel Royal que ta nuna curva xigantesta de la carretra Avilés. ¿Déxovos una semeyina?

Crucia defrente pa Villar, nun t'arrepentirás.
(Del Camín Xacobéu la señal verás )

         Tamos baxando. Vamos viendo de xemes en cuando la xeneral d'Avilés, hasta que cruciamos con ella. En frente vemos un cartelu que diz Villar y p'allá tiramos poniendo muncho procuru al cruciar la carretera. Vaxamos per un tramu rural y ensin tráficu algún hasta que damos cola Riega de Villar. Entós entamos a xubir hasta'l pueblu d'esti nome. Darréu volver a baxar dexando atrás unos invernaderos y llueu la Casa los Trasgos (una casa particular perguapa  protexida por unos trasgos que taben xuegando n'antoxana) hasta la Riega Alvaré.
     - Mira ehí ta la xeneral d'Avilés.
     - Tamos nel Cruce Campañones. Allárriba hai un Área Recreativa, pero nun pasamos per ella. Nosotros a manzorga.
    - Vamos pasar per aquella ponte tan guapa.
     - Ta sobre'l Ríu Cazones. 
     Llevantamos la vista al frente, faciedo visera cola mano, pero nun somos acolumbrar el final daquella recta. Una cera perguapa va acompañanos hasta´l Pantanu, masque entós nun lo sabíemos.  Intentaremos dir descubrindo coses pa que nun mos resulte aburría. ¿Pero qué dixi? ... ¿Aburría?... Ye la primera vez que me vien esta idega a la mente. Vamos ver... De momento entramos nel "Val de Solís".

Villardebeyo cola Ilesia Samiguel

        " Cabalgamos per una llanera, colos campos entá prietos y, a eso del amanecerín, algamamos a un llugar nomáu Cancienes"

        Nuna casina aisllada, a manzorga la carretera, una señora danos una voz:
    - Mozos, ¿queréis llevar unos piescos?
    - Bueno...
    - Tan perbonos; puru almibre.
       Echamos un par d'ocenes na mochila. De bona gana la tuviéremos llenao pero nun yera plan d'abusar.
    - Llevái más, ho; van perdese y ye una pena.
    - Vamos comer dos o tres pero nun convién cargar pesu.
    - ¿Hasta ónde vais?
    - Queremos llegar al Pantanu.
    - ¿A Tresona?
    - Hasta'l Palaciu.
    - Coimes, menuda caminada. Pero bueno, sois xóvenes... Yo tamién fui moza, ¿eh?
    - ¿Ñació usté equí?
    - En Campañones. Yéremos 11 hermanos y enxamás pasé fame, ¿eh?. Casé y viví en Candás cuando'l mio home trabayaba n'Ensidesa. Y yá d'equí pal cielu.
     - Cuando baxábemos de Villar vimos una capiella na llomba...
    - Sí, la Capiya de San Xusto y Pastor. Merez la pena xubir a vela, ta perbién entamilgada, y pues aprovechar la romería que se celebra'l primer fin de selmana de setiembre. La procesión ye mui celebrada en Corvera. Sal de la ilesia parroquial de Rodiles (Santa Mª de Solís) y xube hasta la ermita; unos 2 km abarrotaos de romeros. La capiyina tien un sóleda nave, pórticu ya espadaña.
    - Será otru día, güei quédanos un camín enforma llargu. Bueno, ta lluéu, señora. La próxima vez que pasemos picámos-y al timbre, sobre too si hai piescos.

Panera tipu Carreño

        Enfilamos recta alantre per una cera que llega al Pantanu, según nos camentare un emplegáu del Ayuntsmientu. Dexamos el desvíu p'Agüera y en menos de media hora llegamos a Rodiles . De sutrucu, a mandrecha, un tanto tapecida, acolumbramos una ilesia.  ¿Tendrá daqué d'orixinal?. Ensin pensalo embredamos pela carreterina que va a l' aldea Rodiles. Un altarín en plena antoxana ye l'anticipu de daqué con prestixu. Agora te lo cuento pero sepas que ceo llegaremos a Samarriba onde vimos una cantera pero llamónos más l'atención una casona pergrande que taba pal desgüace, ¡Qué pena!.¡Cuántes casones vemos ansí!  Siguimos caminando agradecíos al son del Ríu Alvares, que ruempe la monotonía d'esti atípicu Camín de Niria, tan planu, tan llargu.

          [Esta  Panera, tipu "carreño", tien seis pegollos y el teyáu a cuatro aguaes (2 a 2) con dos moños. Si subimos pela subidoria hasta'l corredor podremos apreciar unos perguapos dibuxos d'estilu barrocu daqué estremaos de los medievales del estilu villaviciosa. D'una mecedura dambos saldrá l'estilu allande. 
     Como podemos apreciar pola semeya l' horru (panera)  el tipu carreño presenta talles y dibuxos de colores chillones en puertes y cureñes. Gústa-yos muncho llamar l'atención pa demostrar el poderíu familiar: < Onde lo hai, se gasta >]

Ilesia de Santa María de Solís (Rodiles)

         [La ilesia de Santa María de Solís, de probable orixe prerrománicu (VIII-X), ye d'estilu barrocu con planta y ábsides rectangulares. Nel interior destaca la bóveda estrellada con terceletes d'estilu góticu sofitaos n'impostes decoraes. El retablu barrocu vieno de la célebre ilesia de Santa María de la Vega (Uviéu) . Nun lladral del ábside hai un arcusóléu , afitáu en tres figures zoomorfes, onde ta sapozáu l'insigne Gutierre de Solís, conde nos tiempos de doña Urraca*. L'escudu de la familia amuésase nuna doble cornisa adintelada.

* Igual hai una guapa hestoria pa rebuscar... Los Solís, doña Urraca...]

       [ El llinax de los Solís ye orixinariu d'Asturies, del conceyu de Corvera y con descendientes en Tinéu. Más tarde tamién s'asitiaron en Salamanca, Estremadura, Andalucía y hasta nel Nuevu Mundu. Nun ta claro d'onde vien l'apellidu, hai delles teoríes. Pue que venga del Rei Silo pero la que más me presta a mín ye la que cuenta la lleenda y que Tirso d'Avilés nos dexó plasmada en versu:

"Id que con el Sol is"
Escudu de Solís

<< Vi en sangre el sol dorado
     Derechos todos sus rayos
     A do dijo el sol loado
    Un dicho pronosticado
    A sus varones Pelayos
    Cuando todos se partieron 
    Bien vengáis que con el sol is.
    Con sol fueron y vinieron 
    y do a los moros vencieron
    puso el (bon) rei Solís >  
        Por desplicar un poco esta lleenda: < Ello foi una vegada na que don Pelayo diba persiguiendo a los moros. Taba cayendo la tarde y empobinándose al capitán d'un escuadrón díxo-y:
     - "Id que con el sol is" -.  Quería dicir que tiraren tres d'ellos qu'entá teníen tiempu prindalos enantes d'atapecer.
        Quedó aquel llugar bautizáu como Solís y donó-y el valle al capitán como Señoríu de Solís. ]

¿La xarré de Rigio y Niria?
Tarán tomando la parva.

          "Cabalgamos per una llanera colos CAMPOS entá prietos y a eso de riscar l'alba algamamos a un llugar nomáu Cancienes onde unos posaderos vinieron a danos cuenta del pasu de delles carretes el día d'enantes. ¿Sedría alguna la de Rigio?".

          Siguimos señoríu alantre pelo fondero d'aquel valle ensin historia, camentaba yo. Nun hai llugar ensin historia. Toos tenemos una más o menos célebre. Tamos llegando a Cancines y acolumbramos les instalaciones d'una cooperativa:
         [Agropecuaria Corvera, ye una empresina d'ambetu asturianu que ñaz a primeros de los 80 a partir de l'antigua Hermandá de Llabradores de Corvera (1943). De mano unos molinucos pa fabricar piensu pero col tiempu surden nueves necesidaes: tratamientu de semilles, fertilizantes, ferretería, seguros, cursos de formación... hasta la seición lláctica nel 92, el braeru puxu de la entidá. Tamién tien como productos estrella la Pulpa de remolacha y la Fariña de soh.a. ]

         Cancienes - antigua capital del conceyu - ye un pueblu grande; rondará los 2000 habitantes. La so capital, Nubleo, queda a kilómetro y picu y Avilés a 8 km escasos, siguiendo'l Camín de Niria pola AS-17.
Ta bañáu polos ríos Pielgu y Alvares y tien Estacíon de Ferrocarril (Cercaníes de la RENFE), como nós mesmos comprobamos camín de Nubleo, pasando pembaxo la ponte del Ríu Alvares. Pero enantes una clara n'El Encanto pa reponer llíquidos, que fai munchu calor.

Esto foi la Casa'l Conde. 

         Al salir del pueblu reparamos nuna antigua casona-palaciu, singular ella pero fecha una llaceria, como casi siempre: Casa'l Conde nº 1. (Otru día que pasé, camín de la xira'l Tresona, taba sufriendo una razia; cuando lleas esto igual nun queden que les parés)
          Entramos en Nubleo per aciu d'un Taller d'Artesanía  piedra. En frente la parada l'autobús ta l' Archivu Históricu y, al salir del pueblu, endamiáu nun cuetu, l'Ayuntamientu'l conceyu. Llama l'atención el modernu edificiu. Facemos alcordanza d'un collaciu que tien una fía trabayando equí. Magar sía la capital del conceyu nun dexa de ser una parroquia de Cancienes; casi nun llega a los doscientos habitantes.

Archivu Históricu Municipal de Corvera

          [ L'Archivu Históricu de Corvera *  ta asitiáu nel edificiu qu'abellugó l'Antigüu Ayuntamientu. Ta un poco reformáu; los escudos que taben nes esquines la fachada agora tan tapando unos antiguos furacos y el teyáu presenta un vistosu picu central sobre l'escudu qu'antes nun tenía. Enguapió.
Caltién 210 documentos que van del sieglu XVI al XX. Tamién pues consultar documentos del Xulgao de Paz, nacimientos, defunciones...
Quiciabes lo más bultable sía  un fondu nobiliariu del sieglu XIII otorgáu por don José Luis Ureña Fernández Blanco'l caberu propietariu de la Ermita la Consolación enantes de dona-yla al Consistoriu ].
            *XAGUATÁU: Teníemos duldes, pero van xagüetándose. L'edificiu del Archivu Históricu de Corvera, asitiáu na carretera AS-19, en Nubleo, nun ye'l mesmu que la casa los Bango, de la mesma llocalidá. Son de construcción mui asemeyada pero l'Archivu presenta un vértice na cubierta de la fachada principal que la de los Bango escarez. Como nun ye plan de quedar asina... prometemos reparar esti enguedeyu amosando la semeya esclaratoria en cuantes nos encartie. Gracies pol vuesu atoldu.

Fonte La CONSOLACIÓN (Nubleo)

              Caminando ablucaos pola magna obra de la ponte l'autopista sobro'l ríu Alvares damos cola Fonte la Consolación. ¡Cuánta xente cargando xarros!. Por algo será. Facemos cola.
     - Yo tengo un restaurant y cocino les fabes con ello. Saben d'otra manera. Amás ta bendito, ehí detrás ta allugada la Ermita la Consolación.
Nós facemos lo propio, ¡a cargar! ; por agua bendito que nun quede. Ye un sitiu afayaizu y bien acondicionáu con aparcaeru y too. Per aciu d'un llavaderu bien iguau tienes accesu a una viesca de ribera qu'engalana tola llomba.
         Benditos como tábemos xubimos una custina hasta que, a manzorga, damos con una caleyina pindia que remata n'escalera y llévate a la Ermita la Consolación. Nun desaprovechamos tantu pa unviar una plegaria a la Virxe a la fin que nos disponga ante l'Altísimu y escuche los nuesos encamientos, que nun son pocos.

Avérate a la Ermita La Consolación

          [ La Ermita la Consolación ta allugada nuna roca tapecida ente la tarmuda vexetación d'un biescu. De propiedá municipal tien planta cuadrada con adriu, sacristía ya espadaña. Nel interior ta sapozáu nicolás Fernández Blanco y Alas, heriede la Casa Bango. ]

     Dende la ermita acolumbramos al nordeste, acullá del riu Alvares, como una mancha d'agua. Ye l' Humedal de la Furta. 

          [L'Humedal de la Furta ye un embalse pequeñu ( 5 Ha = 50.000 m/2 de mancha) célebre por albergar numberoses clases d'aves, residentes o de pasu, qu'alcuentren nesta charca'l paraisu natural (ZEPA). Tamién caltién peces, anfibios y dellos invertebraos. La viesca de ribera qu'arrodia esta buelga nun torga para nada que pueas comtemplar toa clas de páxaros dende los observatorios armaos pa ello. Nun t'asustes si ves pasar una nutria.
      L'humedal ta en tarrén de la DU PONT y pue visitase acutando día y hora col Ayuntamientu Corvera (985505701).]

Una charca pel embalse. El Paraisu los coríos .

       Caminanébemos despistaos agüeyando l'humedal  por mor d'un banda azulones que, sobrevolando'l ponte Alvares, foi a posase na buelga cuando s'avera a nós un rapaz con pinta d'antepasáu, una tablet na mano y ganes dar el palique:


     - ¡Alto ehí, pelegrinos!. ¿Nun veis el cartelu?
    - ¡El Portazgu!. ¿¡Otru!? Yá pasamos el d'Olloniegu.
    - Pos equí hai otru. El Portazgu d'Avilés.
     - ¿Hai que volver pagar?.
     - Nel alfoz d'Avilés nin Dios entra ensin pagar; nin sal tampoco.
     - Tamos gapos, manín. ¿Y si fuere d'Avilés?
     - Pero nun yes, desembolsa.
     - ¿Y si fuere a ver el Rei?
     - Pero nun vais. Con esi cuentu yá me vinieren otros va poco.Que yeren amigos d'Alfonso, dicíen... ¡Qué morru!
     - ¿Alfonso III el Magnu ta n'Avilés?
     - Sí, ta de vacaciones en Raices, con Ximena, la so muyer.
     - ¿Nel célebre Castiellu de Gauzón?
     - Nel mesmu. Pero nun quier visites, anda mui arranáu.
     - ¿Entós?
     - Ta iguando la Cruz de la Vitoria.
     - Nunca nun oyí falar d'ella. ¿Ye pa tanto la cosa ?
     - Nun vos podéis maxinar. Tengo un vecín trabayando nes salines y ellí nun se fala d'otra cosa... Tan revistiendo la Cruz de Pelayo d'oru y piedres precioses. Quier convertila nel símbolu de la monarquía astururiana.  
    - Esta va ser mui gorda. Bueno, nun-y sobrará al probe; camiéntase pel reinu que la muyer y los fíos anden preparándo-yla... Vamos, que quieren facelu dimitir y repartise'l reinu.
    - Mui guapo, agora que tenemos un reinu d'Asturies competente, dominando tol norte d'Hispania, quieren desfacelu.

EL MAGNU y XIMENA:
 --Fonso, tienes que dexalo. Son munchos años.
-T oi como un chaval, muyer.
- Yo yá nun aguanto la lliturxa;
 amás  tengo ganes dir veraniar a Castiella.
- Coño, ne, podemos dir de xemes en cuando;
¿tu nun ves qué guapo ye Avilés?
Mentanto los guah.es van foguiándo col gobiernu provisional.-
 A los tos fíos va pasáse-yos l'arroz y
quieren les manes llibres pa facelo a so manera.
- Ta bien, ta bien... Anda, tira pa Zamora.  

    - Yá verás, esto va terminar como'l rosariu  l'Aurora: Galicia pa un lláu; pal utru la Bardulia, o Castiella como-y dan por llamar agora; los vascones a lo suyo... Quedaremos solos, al tiempu; en cuatro díes pastu de moros.
    - Bueno, ho, los cántabros tarán con nós; que tenemos el sangre mecío.
    - Nun me fiaría muncho.... Quieren a Pelayo pa ellos solos...
    - Bueno, ¿ y vosotros pa ónde vais, sí pue sabese?
    - Tamos faciendo'l "Camín de Niria".
    - ¿Niria?... Paez que quier soname... ¿Nun será una mocina de la tiz blanco y pelo prieto que tien pasao col padre nuna carreta?
    - De xuru que sí. ¿Diben dica la mar?
    - Sí, p'hacia'l Cabu Peñes... Y pocu depués pasaron tres a caballu preguntando por ellos. Y agora venís vosotros.
     - Tamos falando de lo mesmo, toos tamos siguiendo'l "Camín de Niria". Bueno, ¿ qué te paez si tomamos un pinchín pa celebrar esti alcuentru nel tiempu?. Traemos chorizu, vino...
    - Paezme perfeuto. Esperái, dexáime salir de la ventana del tiempu - diz el bon home pinchando una tecla - Una parva como esta nun pue ser virtual....
     Y mientres dábemos cuenta d'aquellos manxares entá nos alvierte...
     - Tais nel Alfoz d'Avilés, la ciudá del Fueru...

          [ El Fueru d'Avilés foi otorgáu a esta ciudá de realengu por Alfonso VI nel añu 1085 y quedó confirmáu en 1155 pol so nietu Alfonso VII, lo que significó l'esporpolle definitivu la ciudá qu'alquirió unos drechos políticos, económicos y comerciales perimportantres, de manera tala  qu'hebo de pesllase dientro d'unes muralles d'ochocientos metros de perímetru. ]

     - ¿Entós nun tenemos que pagar?
     - Pagáis col derechu remembranza histórica: faciendo alcordanza la historia. Pero tengo que ponevos la robla na vuesa "Guía'l Pelegrín de Niria", apurríimela p'acá:

<< Yo, Alfonso III el Magnu, Rei de les Asturies, tengo a bien
autorizar el llibre pasu peles tierres del alfoz d'Avilés
 a los pelegrinos del "Camín de Niria".
Que Dios vos tenga embaxo'l so abellugu.
Adefonsus, Rex >            

     - Y yá que tamos d'alcordances ¿qué camienta la nuesa "Guía del pelegrín de Niria" al rodiu'l camín a siguir?
     - Asina de memoria...

Peles tierres empantanaes del Tresona
-tres les güelgues de Niria y pa Rigio -

caminaren los nuesos mocinos
que son ellos: Melendo, Clodo ya Onirio.

          " Atravesamos numberosos regatos y tierres empantanaes, dexamos atrás aldees ya ermites y cruciando cuetos y valles algamamos a un pueblín nomáu... "
  
  - Vamos, que nun t'alcuerdes... ¡H.a, h.a, h.a!
    - Yá me vendrá, nun t'esmuelgues. Tien daqué que ver cola Santina...
   
        Baxamos la cuesta del Portazgu y cruciamos una ponte sobro'l Ríu Pielgu. Sabíen bien onde poner los pontazgos.
Al xubir p'hacia Los Campos dexamos a mandrecha un pequeñu Polígonu Industrial, onde s'alcuentra la "Marmolería la Consolación", claro.  Enllanamos hacia l'altura l'Institutu pero nós buscamos el Pantanu pel sitiu más afayaizu, asina que n' Entrevíes tiramos a mandrecha pela cai Pin de Pría. Lo primero la Plaza de Llingua, como tien que ser, onde ta la Biblioteca. Siguimos pela  cai Santa Cruz hasta enfocar el pantanu. Nun ye preciso, pero yá que tamos equí... Vamos faer una visita a les instalaciones del Centru, al par del Área recreativa de Gabitos.
      - ¡Menudu fumazu! ¿Qué xaréu sedrá esi?
     - ¿ Qué tais celebrando, chavalina?
     - La Xira'l Tresona. Ye'l primeru de Mayu.
     - Guapa manera de festeyar el Día'l Trabayu.
        Ta toa la chavalería del mundu nesti requexu l'embalse. Nos Gabitos tienen una carpa con música moderno pa mover l'esqueletu. Nun lo hai como la mocedá. Cómo apetez regresar nel tiempu y sentir de cerca a Serrat y a Victor Manuel...  Y hasta los Archiduques de Cholo Juvacho. ¡Cagondiez!
   

El Centru d'Altu Rendimientu

[ Centru d'Altu Rendimientu o Tecnificación Deportiva en tres modalidaes: Remu, Piragüismu y Tiru con Arcu. Tien les siguientes instalaciones: Campu de Regates, Balsa d'Entrenamientu, Gimnasiu, Hangares de Remu y Piragüismu, Pista Polideportiva, Sala pa Tenis de Mesa , Sala d'Ergonomía, Serviciu Mélicu y de Fisioterápia, Torre de los Xueces y una Residencia con 25 habitaciones dobles, tres individuales, TV...
La finalidá d'esti complexu ye preparar a los deportistes d'élite nel meyor entornu social ya educativu posible. El sitiu ye inmeyorable, asina ¡qu'a trabayar!. ]

Palaciu Peñalver, tomando resuellu.
<<Esta casa foi refecha nel añu 1894 pol Escmu.
 Sr. Conde de Peñalver y Marqués d'Arcos>>
¡Menos mal !

          Nun fai falta abandonar la cai Santa Cruz p'algamar al Palaciu, una carreterina bien sele a la oriella l'embalse  llévanos hasta lli. Peteznos agarrar una canoa p'atravesar el Pantanu. Metanes el camín  paramos a falar con un andariegu que tenía pinta conocer l'entornu.
    - Oiga, ¿ per equí algamamos a Palaciu?
    - Derechinos al Palaciu Peñalver. A la fin d'esti camín veréis un Área Recreativa (Overos), Al cabu, embaxo la ponte que ta rematando'l banzáu de la presa, veréis el castiellu. Pasáisla y, manzorga, ya tenéis
         [El Palaciu de los Rodríguez de Lleón y Señores de Trasona ye'l clásicu palaciu rural asturianu d'estilu barrocu: Un cuerpu central ente dos torres llevantao en sillarexu y mampostería con sillares en vanos ya esquines. Data de finales del XV y foi reformáu nel XIX cuando pasó a manes de los Condes Peñalver tres esfrutalu los Trelles, los Sierra y los Argüelles (¡coño, un ancestru señoritu!).
      L'únicu B.I.C. de Corvera - menos mal - ye un edificiu de planta cuadrangular qu'encierra un patiu interior de doce columnes toscanes que sofiten, con otros seis pies derechos, un corredor de madera. Nel centru del suelu, empiedráu, caltiénse una escultura del "neñu espinariu" dientro d'un estanque. Al segundu pisu pue accedese al traviés d'un arcu carpanel que da nuna escalera monumental.
     La fachada, mui reformada, presenta l'escudu familiar y la imax de la Santina]

La Santina Cuadonga
va llevate a Romadonga

     - Mira, la Virxe de Cuadonga na fachada.
     - ¡Cuadonga non, Romadonga! Acabo d'alcordame, ehí tenemos que llegar.
     -¿Sabe usté cómo, señor? - entrugamos al dueñu del bar de palaciu, onde entramos tomar el vermú.
 [La familia Prendes lleva más de trenta años col arrinendu los baxos del Palaciu qu'empleguen como Bar. Casi se pue dicir que tan sostiendo col so aliendu los sillares y balcones d'esta ayalga a puntu del desanicie. Quel dommage! . ]
     - Pos sí; tenéis que llegar al Pueblu Trasona, cruciar l'autopista penrriba una ponte, xunto a la ilesia. Baxáis a la carretera AS-19 y tiráis hasta la planta de Fertiberia tres pasar per Gudín. Tornar pa manzorga pela carretera Candás.  Pasáis penriba les víes del tren y tiráis a mandrecha, baxando un poco. Enseguida veis la indicación de Cotarón, debéis siguila. Pue paecevos raro porque volvéis p'atrás, pero ye esa. Un caminucu llévavos hasta l'Embalse la Granda tres pasar el Centru Reto. Encamiéntovos bordiar el pantanu pela manzorga y siguiendo una carretera asfalcada llegáis a Romadonga.
    - Oiga, tengo la cabeza lloca. ¿Nun podría faceme un dibuxín?

Qué sedría de la xira
de nun ser por vós, Guajería .

    - Sí, home, sí. Pa eso ta equí Tino que trabayó n'Ensidesa munchos años y agora nun fai otro que caleyar pel entornu . Tará encantáu, yá veréis qué demostración col esi GPS que-y traxeron los Reis.


          [El Pantanu de Tresona foi construyíu nos años 50 p'abastecer d'agua a la biltante  Ensidesa asina como a la bayura d'habitantes qu'aportaron a la comarca por mor de la xorreciente siderurxa. Tamién s'aprovecha pa facer deportes náuticos y como llugar d'espardimientu de los habitantes del alfoz d'Avilés ( ya otros) .
     Tien una llonxitú de costa d'unos 5 km , más de mediu km de llargor y 500 m. d'anchor; una capacidá de 4,10 km/3 sobre 61 Ha (610.000 m/2) de superficie.  Abastezse per aciu los ríos Alvares y Narcea, esti por mor d'una canal de 27 km.]

Antroxando pel Tresona

          El primeru de Mayu, fiesta del Trabayu, celébrase na redolada l'embalse la Xira del Trasona. De primeres corría la organización per cuenta d' Ensidesa pero anguaño ye l'Ayuntamientu Corvera'l que cuerre con ello. Si nun tienes ganes llevalo de casa nos chigres del práu - o nos afitaos de siempres -  pues mercar el  bollu preñáu, típu d'estes romeríes. Los guah.es pásenlo de viciu con delles actividaes infantiles y viendo les competiciones deportives mentanto los grupos folklóricos amenicen l'ambiente.  La sidra cuerre más que'l ríu Alvares pente los puestos d'artesanía y sobre too  na verbena que pon la espuela a la romería.

                                                <  La Guagua'l Tresona > , por si canses.             

<< Cuando llegues al Pantanu Tresona
pasarás de setenta kilómetros
tres les güelgues de los nuesos mocinos,
son ellos: Melendo, Clodo y Onirio. 
A eso del riscar l'alba, salimos 
de la villa de Posada;
 pel camín de La Minona, algamamos 
al Altu La Miranda.
  Pa llegar hasta Villar, cruciamos 
la carretera asfalcada.
Y llegamos al cruce, Campañones
 enantando la mirada.
 Tou'l valle del Sol-ís, percorrimos
con Cancienes ena cara.
Pali-pali a Nubleo, llegamos
 nel centru la comarca.
Pel alfoz d'Avilés, circulamos 
¡Madiós, qué cosa más guapa!
 El Pantanu de Tresona ¡aportamos!
¡ Ai, Señor, cuánta remembranza!

GRACIES POR DEXAME RESTOLAR NA VUESA VIDA:

Gracies por tar ehí

. A Melendo, Clodo ya Onirio que nos van dexando les güelgues del Camín Aniciáticu. A Magilo, que nos va dando les pautes pa percorrer esi camín de bon aquel. A Flaino, que nos presta la so llibrería per aciu la cuala vamos texendo la cadarma esta historia.... A Rigio, que nos abelluga Niria mentanto algamamos a ella.  A Afonso'l Magnu, que nos prendió nel pechu la Cruz de la Vitoria cuando algamamos al alfoz. Y a Gencio, por armar esta bolera.
. A la wikipedia, al blog del Comerciu y a los Ayuntamientos Corvera y Llanera.
. A Marisa, que se crió n'Arcadia y por eso tien un blog tan guapu:<leyendesasturianes> 
. Al Señor Prendes, arrendatariu del Palaciu. A Tino, xubiláu d'Ensidesa, pero non del Embalse, asina como a Encarnina de Campañones que siguió'l mandáu de la lleenda: "Id que con el sol is" y quedó en Solís pa siempres. Y a toles persones anónimes coles que compartimos información y vivencies ensin les cuales enxamás tendríemos iguao esti Camìn.
.  A dellos blogs: <mirabiliaovetensia>, al que yá entro por viciu; <eltesorodeoviedo.es>, <arteguías.com>, <elcondadodecastiella.es>......
. Y caberamente quiero dedicái esta ruta a Nel Anxel González Fuentes, pol so ciñu pa con Avilés.