¡Bon Camín!
Al rodiu'l Camín Primitivu [ III ] : ¡ULTREYA!
La cabera estaya del Camín Xacobéu Portugués:
<Padrón - Santiago Compostela>
 |
| PÓRTICU de la GLORIA , Catedral de Santiago Compostela
La META del pelegrín, talo tuvieres ellí.
(Semeya del pintor: Jenaro Pérez Villaamil)
|
Por mor de los viaxes del IMSERSO pa xubilaos xurdió la manera de visitar Santiago y d'esta miente fer, al traviés del programa "Turismu de Naturaleza", la cabera estaya del Camín Portugués: <Padrón - Santiago de Compostela>. Paeznos una manera bien digna de "tomar la espuela" no que cinca e esti Camín Primitivu, el primeru que s'estableció pa dir conocer el sepulcru d'aquel Apóstol qu'algamó'l títulu de <Patrón d'España> tres predicar, guapamente, l'Evanxeliu nesta tierra. A nós va aforranos la visita cabera a la ciudá Santa ( o non ...).
 |
| Caminos Xacobeos portugueses. (Semeya: wikipedia) |
Como ocurre en tolos sitios nun hai una única manera de llegar a Santiago, los caminos son infinitos, tantos como les persones que los quieran entamar. Sicasí los portugueses tamién tienen dellos caminos oficiales: ún pela costa y dellos pel interior aprovechando a vegaes les antigues calzades romanes, como la Vía de La Plata Portugesa. Vamos ver:
. El Camín de la Costa saldría de Setúbal o LLisboa hasta Oporto, tiraría per La Guardia, Bayona, Vigo, Pontevedra, Padrón y yá hasta Compostela.
. El Camín Central - más al Interior - sal de Llisboa pa Coimbra y tamién s'avera hasta Porto pa llegar a Tuy pasando per Ponte de Lima. De Tuy va a Porriño, Redondela (o Vigo, que nun se nos enfade'l Caballero) y a Pontevedra. Xuntos los caminos de costa ya interior tiren per Caldes de Reis a Padrón y tres fermosu paséu (Ye'l que vamos embredar nós) llegues a la capital espiritual del cristianismu occidental (y del mundu enteru, que equí en Santiago somos toos bien recibíos).
. El Camín de la Plata Portugués (non la Vía de la Plata hispana) que saliendo de Tavira ha pasar per Évora, Castello Blanco, Almeida, Braganza, Verín, Ourense, Lalín y Santiago.
********************
 |
| PLAZA del OBRADOIRU, puntu caberu de la RUTA XACOBEA. Tán n'obres; 2021 ye añu xacobéu y esto tien qu'esllumar. Toi seguru que lo algamaréis y pa entós nós taremos rematando'l <Camín Primitivu>: ¡El ¡BON CAMÍN! La TUMBA del APÓSTOL ye la nuesa META. |
 |
| Cabera Etapa del Camín Xacobéu Portugués : <Padrón - Santiago Compostela> (Semeya: Eroski Konsumer) |
. Día 2º : <A ESCLAVITUDE - O MILLADOIRO>, al rodiu los 11 km. Yá en Santiago visita
llibre pela ciudá, mui guapo.
. Día 3º : <O MILLADOIRO- SANTIAGO>, como unos 8 km. Darréu visita guiada pela ciudá Santa, Patrimoniu cultural de la Humanidá dende 1985.
 |
| P'allá vamos, dimpuestos a too. |
Estes tres estayes son les qu'en principiu taben alcordaes pero a la fin foron un pelín tracamundiaes por mor de la bona esperiencia de la nuesa GUÍA: SUSANA. Ye dicir, pa faceles más homoxénees el primer día llégase a "A Picaraña", 2 km más p'allá d'A Escravitude; d'esta miente queden unos 8,5 km de media diaria; bona idea, señora Susana. Les etapes quedaron asina:
1º .- < Padrón - A Picaraña >
2º .- < A Picaraña - O Milladoiro >
3º .- < O Milladoiro - Santiago C. >
********************************
<< El VIAXE hasta Santiago >>
Xixón, Llunes a 9 de Marzu de 2020.
 |
| ¡ULTREYA! : La xubilatería asturiano na Estación del ALSA d'Uviéu camín de Compostela. |
 |
| Alfonso II , el Castu, nun requexu de Santiago. (Tampoco vos matasteis, xostrones) |
Nós tuvimos la suerte de contar col retueyu que nos dexó a les (8:00) na parada l' ALSA de Xixón y pa les 8:45 yá teníemos les maletes faciendo cola nel Andén nº 39; el de la xubilatería. Claro, depués tuvimos que tornar ande les oficines pa presentar les credenciales y recoyer los númberos d'asientu permanente pa toes les escursiones de la estancia:
- Tocáronvos el 45 y 46.
- Amén.
Nun día claru y fresquín salimos colos 5' de cortesía que se dan cuando falta daquién, como foi'l casu. A midida que vamos dexando la capital va cubriéndose'l cielu con delles ñubes ablancaes que pa nada menaciaben agua: ¡Coño, tando yo d'escursión cómo va llover! (Claro, qu'esto nun lo sabíen los mios collacios).
( Nota: No que cinca a la semeya la escultura d'Alfons II el Castu dicir que ye d'agradecer pola asturianía pero cuido qu'esti debía tener una sonadía enforma más bultable. ¿Seique nun vos dais cuenta que cuasi too-ylo debéis a elli? ... Xelmírez fizo muncho, pero con trampes, enaltando la figura de Carlomagnu - que pasó de nós dafechu y pa enriba taba muertu - y arrequexando'l valir del Rei astur-vascu, hispanu, gallegu. El día que vea a Alfonso'l Castu na Plaza l'Obradoiru igual vos perdono esti desdexu).
 |
| L'entamu del <¡Bon Camín!> La Catedral d'Uviéu. |
Amiro pa la torre de la Catedral y faigo alcordanza d'aquel Rei Castu qu'emprimó con tou esto. El foi'l primeru en facer les maletes y tresnar un séquitu que lu llevare hasta'l Campus Stellae porque un emisariu del Obispu d'Iria Flavia, Teodomiro, tuviere-y mandao avisu que n'un vieyu cementeriu romanu, cerca de la diócesis d'Iría, afayóse un sarcófagu mui antiguu col cuerpu incorruptu d'un home decapitáu.
- ¡¡¡¡Santiago!!! - glayaron al empar les voces d'Iría ya Uviéu que xuníes nos cielos prevocaren una trona escomanada que se sintiere en toa la Europa cristiana (los paganos ficiérense los suecos, pero alpuntaron na llibreta).
- ¡Teudano, prepáralo too que vamos pa Galicia!
- ¿Pero qué pasa, Señor; escaecióse-y yá lo d'Ablaña? ... Nun tamos como p'alloñanos de la corte; entá queda munchu zampón qu'allampia pol tronu ...
 |
| L'Obispu Teodomiro confirmando l'ARCA MARMÓRICA nel Campus Stellae de Santiago Compostela. - Esti ye Santiago; hai que dar anuncia al Rei Alfonso. |
- El mio fiel Teudano, ¿sabes que cerca de Padrón pue qu'apruciera l'Arca Marmórica?
- ¿Colos restos de Xacobu?
- Lo qu'oyes. Tán cumpliéndose los bagagüeyos: Les anuncies del Llibru <Breviarium Apostolorum> (VI-VII) de que Santiago viniere predicar a Hispania y tres tornar a Xerusalén - onde fore decapitáu por Herodes Agripa - los sos discípulos traxeron el so cuerpu a enterrar cerca Iria Flavia, onde predicare; tamién runcien los clamores del
<O Dei Verbum> (VIII) de Beato proclamándolu como Patrón d'España. Nun podemos quedar quietos,Teudis, hai que confirmar el milagru y aprovechar el so valir pa la llucha escontra l'infiel. Tenemos menester d'un nuevu líder del cristianismu agora que Carlomagnu yá nun ta. Y esti yá nun pue morrer, ye eternu.
- Nun ta mal tirao, Señor. Pue sirvir d'aunión ente los nuesos y que tengan daqué más importante polo que lluchar y, de pasu, escaecer un poco la corona. De xuru que francos y navarros van xuncise pa con nós.
- Ye preciso qu'estudies bien el tarrén pa llevantar una catedralina "in situ". Tien de convertise nel centru de pelegrinación d'Occidente.
- ¡¡¡ Trema, Roma !!!.
**************************
 |
| La nuesa GUÍA: SUSANA siempre pendiente del últimu de la fila. ¡¡¡ GRACIES !!! |
- Hola a t@s. Soi Susana, la guía que va acompañavos durante estos cinco díes d'estancia en Santiago. Lo primero que debéis saber ye que diremos siempres nel mesmu autobús coducíu por esti chófer tan modernu que se llama Jaime. Casi la mitá de los asientos, los que veis llibres, currespuenden a un grupu de madrilanos que llegarán al mesmu hotel que nós n'otru autobús, procedentes del aeropuertu, pero les actividaes fadrémosles xuntos n'esti que tamos. (GRACIES, Jaime; conduces enforma meyor que Fernando Alonso: nin un frenazu, nin un cucurrabucu peles dunes ...Chapeau)
Agora voi cuntavos p'enriba, a grosso modo, lo que vamos facer estos díes sicasí camiento que yá tenéis una idega:
 |
| El Ríu Sar de paséu per Santiago Parque "Euxenio Granel". |
. Güei, llunes día 9 de Marzu, llegaremos pa la hora de la xinta - sobre la una y media - que sedrá nel propiu hotel, como tolos díes. Fadremos una paradiña a mediu camín pa estirar les pates porque'l viax dura unes 4 hores. Al llegar dexáis les maletes na Sala de Receición hasta depués de comer que será cuando nos dean el númberu d'habitación tres entregar los DNI de cadún.
La comida a les dos (14:00), sírvesenos na propia mesa, teniendo en cuenta que'l sitiu qu'ocupéis güei va ser el mesmu pa los cinco díes.
La tarde tendréisla llibre; podéis quedar nel Hotel Congreso o dar un vueltu hasta Santiago, bien andando o n'autobús municipal. La cena, a les nueve (21:00), ye tipu buffet.
 |
| Padrón: Ríu Sar de Paséu pel Espolón |
Podéis desayunar a partir de les 7 1/2 hasta les 9 pol sistema de buffet. Darréu saldremos dica Padrón pa entamar cola primer estaya : <Padrón - Escravitude- A Picaraña>. En principiu taba previsto finar n'Esclavitude pero vamos fer un par de kms más a la fin de repartir meyor les caminaes; esperiencia.
La comina nel Hotel Congreso y pela tarde diremos toos xuntos nel autobús hasta Santiago onde tendremos una Visita Guiada pa conocer los finxos de la ciudá: Plaza del Obradoiro y redolada.
 |
| Casa-Muséu "Rosalía de Castro" |
. Miércoles día 11 de Marzu.
Pela mañana 2ª Estaya del Camín: <A Picaraña - O Milladoiro >, unos 8,5 km. Los que cuerran más qu'esperen nel Bar, onde veréis l'autobús de nueso.
Pela tarde, tres la xinta nel Hotel, diremos toos a Padrón, otra vuelta, pa visitar la Casa de Rosalía de Castro, la Ilesia de Santiago, la Fonte del Carme, el Cai, el Parque y, en fin, conocer un poco meyor la villa onde predicó l'Apóstol.
 |
| -¡Santiago Máxicu! |
Pela mañana la tercer y cabera estaya pa completar la etapa <Padrón- Santiago>, unos 8 km. La meta ye na Dársena 23 de Xoan XXIII a les (12:45) onde l'autobús - alcordáivos - nun pue esperar más de 10 minutos.
Na tarde habrá una visita guiada y voluntaria al <Santiago Máxicu>, esos requexos de la ciudá con hestories interesantes pero que nun suelen apaecer pelos llibros. Remataremos col esconxuru d'una Bruxa ¡auténtica!. La espuela pondrémosla en <Casa Cotón> con una degustación de dulces, quesos, vinos y llicores de la zona.
 |
| Pazu "O Faramello" |
Pela mañana habrá una visita voluntaria (15 €) al Pazu "O Faramello" que inclúi la cata d'un vinu de la zona.
La xinta a la una menos cuartu (12:45) y darréu viax de torna hasta Uviéu.
- Espero que lo pasen perbién y naide nun lleve pa casa'l "coronavirus".
****************************
Agospiamos nel Hotel Congreso ****, na Rua das Mamoas de Montouto, nº 4, que s'alcuentra nes afueres de Santiago (5 Km), nel Barriu San Saturnino, como a un cuartu d'hora en coche hasta la Plaza del Obradoiru. Tamién se pue dir n'autobúes (nº 6) o en tren. Esto tien bona pinta.
 |
| Cuartu nel "Hotel Congreso" |
La comida de bienllegada tuvo bien: Fideguá y carne asao regao con viño da terra.
Tres un siesta reparadora empobinamos carretera Santiago pa pasar la tarde y dir afinando la pata.
- ¿Hai muncho d'equí a Santiago, Señora?
- Qué va, meu neñu; unos 5 km, eso non he nada pa vosotros.
La señora que taba regando les plantes de la entrada semblaba ser la dueña mayor de la propiedá pero yá dedicada a los deleres propios de la edá.Vese que taba avezada a dir a Santigo, otru tiempu, andando. Ya eso foi lo que nós ficimos; a les 5 y media caleya pa la ciudá. Prisa, cero.
Casi tol camín había cera o bien un arcén anchu magar que dacuando yera preciso cambiar de mano; eso nun nos prestaba nada. Pasamos la Urbanización Sadurniño, el Parque Montouto, Os Tilos y l'Outeiro.
 |
| Charrando con José Martí, l'héroe independentista cubanu. -¿Independencia?... ¡Vas arreglada! A aguantar pol carcamal, monina. |
Poco antes d'entrar, nos rimeros de la ciudá bañaos por ríu Sar, vimos una indicación a mandrecha que t'empobinaba a la "Ciudá de la Cultura" de Santiago pero pasaben yá de les seis y media (>6:30) y nun quedaba tiempu pa saborguiala como Dios manda pos la torna yera empruna y metíasenos la nueche enriba nun tramu desconocíu pa nós; <otra vuelta>.
Lo más que ficimos foi sacar unes semeyes nel Parque Euxenio Granel, una zona bien allegada por mayores, deportistes y pas/mas con rapacinos.
Llegamos poco antes de la cena, xusto pa tomar una ducha y baxar fer buffet. Enantes de dir pala cama nun podía faltar el carih.illu de coñac, tan propiu d'estes vacaciones ensin volante.
*************************
Martes, 10 de Marzu de 2020.
Día segundu. Primeru caminada: Estaya 1ª
<Padrón - A Esclavitude - A Picaraña (8,5 km)>
 |
| ¡Equí entamó too! PADRÓN (aniciu de la Ruta): Vista dende l'antoxana'l Monesteriu del Carme. Cerca d'esta ponte, qu'enllaza L'Espolón cola Ilesia de Santiago, foi onde varó la "barca da pedra" col cuerpu de Santiago. |
Tenemos l'autobús preparáu pa llevanos hasta Padrón, na redolada la ponte sobro'l Ríu Sar d'onde vamos entamar.
 |
| Salimos dende la Plaza d'Abastos onde quedáremos aparcaos. |
Equí tamos dispuestos a emprentar cola primer caminada que tien de pasar pelos municipios de Padrón, Teo, Ames y Santiago. Fai un día perguapu p'andar: claru y frescu.
De Padrón y tolo que significa vamos falar depués pos vamos volver pela tarde a conocelo meyor: La so Ilesia, la Ponte, la Fonte del Carme, la casa Rosalía, la villa y el Xardín Botánicu.
***********************************
 |
| Ilesia de Santiago de Padrón, al cabu l'Espolón: Entamu la 1ª Estaya Rosalía delantre <el templu que quixi tanto> |
Vamos entamar la caminada dende un puntu emblemáticu de Padrón, al pie la Ilesia de Santiago, nun cabu del Paséu del Espolón, a la vera de la Ponte sobro'l Sar, mesmo onde l'Obispu Xelmírez determinó construyir un Puertu que comunicara la ciudá cola mar per aciu de la Ría del Ulla, onde emboca'l nuesu Ríu. Anguaño yá nun ye posible pasear pel Cai dao que nel sieglu XVII les riaes y ábanos de sable camudaron el cursu de la Ría faciendo inservible'l puertu. Debía ser de siempres un puntu conflictivu porque precisamente equí foi onde encalló la <barca da pedra> na que los discípulos tresportaben el cuerpu de Santiago. El piedrón onde se vieron obligaos a amarrar la barca entá se caltién al abellugu na Ilesia de Santiago que tenemos delantre nós y que namás vamos ferregüeyar per fuera pos güei pela tarde pasaremos el día en Padrón pa conocelo meyor..... ¿O .... cuido que te petez un trailer daqué yá ? .... Pos venga, nun nagües. ¡Ehí va un avance de la tarde!
********************************
 |
| Baxu paliu. Nel Paséu del Espolón Ana y Pepita encamentándose a Rosalía "En las orillas del Sar" y rezando a Santiago - tán mirando pa la Ilesia - pa que'l "coronavirus" nun nos faiga tornar pa casa antes de tiempu. (Entá nun yéremos conscientes de lo que s'avecinaba. El Gobiernu tampoco, pero tuvimos suerte; gracies a Xacobu.) |
PADRÓN
 |
| PADRÓN: La ciudá Flavia onde avaró'l cuerpu de Santiago procedente de Jaffa. Siempre anubierta por mor d'ábanos y riaes construyó una canal pa disviar les agües crecides del Sar al Ríu Ulla. ¡Salvaos! |
Tien una superficie de casi 50 km2 ya una población d'unos 8700 habitantes, casi 180 h/km2.
Compónenla cinco parroquies : San Pedro de Carcacia, Santa Mª de Cruces, Santa Mª d'Herbón, Santa Mª d'Iría Flavia y el Padrón de Santiago Apóstol.
Padrón < pedrón = piedra o altar dedicáu al dios Neptuno que s'alcontraba a la oriella del Ríu Sar y anguaño ta abellugada na Ilesia parroquial del pueblu, Santiago de Padrón.
Hestoria de Padrón:
P'averanos a la primer rellación colos padroneses tenemos qu'alluganos a les mámoes (túmulos) de la Paradegua o a los petroglifos de Bouza Abadín, nel vecín ayuntamientu de Dobro; o al castru de Picadizo (Rois), o al castru Valente (Herbón) , ¿y por qué non al míticu y llexendariu Castru Lupario?
 |
| Ríu Sar. Non mui lloñe taba'l célebre Puertu navegable pela Ría d'Arousa hasta'l Mar. |
Anguaño Iría ye una parroquia que nun dista 2 km de la capital, Padrón. Naquella dómina la xente dedicaba a l'agricultura y a la pesca, teniendo en cuenta qu'esta comarca ta bañada polos ríos Sar y Ulla y yera navegable pola Ría dende'l Puertu de Padrón hasta la mar, a menos de diez kilómetros (<10 km).
Precisamente'l Puertu marcó la hestoria d'esta villa pola so importancia pesquera y comercial pero algamó'l cume cuando ente los años 820 ya 830 - non 813* - apruz el sepulcru de Santiago na viesca de Llibredón, a 25 km de Padrón. Daquella yá tenía Iría Flavia sede arzobispal siendo'l so obispu' l cuciu Teodomiro (819-847) que nun tardó cinco minutos ponelo en conocimientu del Rei Alfonso II el Castu que tenía la capital n'Uviéu. Sí l'Apóstol Santiago morrió nel 44 d.X. en Xerusalén ¿cómo llegó'l so cuerpu a Compostela? ....
Dende'l puertu de Jaffa (Tel Aviv - Israel) - tres ser decapitáu por Herodes Agripa - foi treslladáu per mar hasta la bocana del Ulla y darréu xubiérenlu < nuna barca da pedra **> pela Ría hasta llancar onde más tarde s'instalare'l Puertu del Padrón. Pa más seguridá llevaríase'l cuerpu per tierra hasta la viesca LLibredón (Compostela) guardándolu nun mausoléu romanu xunto colos dos collacios de prédica,Teodoro y Anastasio, que fueren los encargaos de la traslatio. Esti camín <Padrón-Santiago> ye'l que vamos siguir nós - ¿hai quién dea más?- y dir descubriendo al tiempu dalgún de los misterios qu'arrodien esti fechu milagrosu.
 |
| El sosias de Xelmírez contemplando les obres |
Yá pueo contestate esta pregunta afirmativamente pos foron los flaires los que traxeron la grana los pimientos d'América pa plantalo nos güertos del Monesteriu d'Herbón, que ta a nada de Padrón.
* 813 non foi l'añu del afayu del sepulcru porque Teodomiro entá nun yera obispu D'Iria Flavia neses feches. Eso fuere un inventu de los promotores del Códiz Calistinus pa fer parte a Carlomagnu - que morrió nel 814 - de la "inventio", dao que yera'l Rei (Emperador ) más importante de la dómina. Na Ilesia de Santiago de Padrón camienten que la fecha pudo ser 820, un añu depués que Teodomiro fuere consagráu como obispu d'Iria (819-847); ye como si tuviere esperándolo, naguando por ello. ** <Barca da pedra> ye una barca que tresportaba "pedra" pel entornu de la Ría del Ulla, non que fuere la barca de piedra, que'l "Ribeiru" nun da pa tanto.
*** El Cai o muelle que construyó Xelmirez esanició nel XVII por mor de les riaes del Sar que camudaron l'entornu de la Ría. D'estos astilleros salieren les primeres galeres que tuvo l'Armada Española, ¡toma esa!.
***************************
 |
| La Ilesia de Santiago ta a manzorga, namás cruciar la célebre Ponte de Santiago y a mandrecha L'Espolón |
Cuando en 1095 se tresllada la sede obispal d' Iria a Compostela esta ilesia prerrománica va perdiendo importancia, non asina la villa de Padrón que por mor del Cai que tresnare Xelmírez va algamando más sonadía al convertise nel puertu del espoxigante burgu de Santiago. Sicasí al consiguir Xelmírez l' Obispáu (1100) entama una serie de reformes nes ilesies qu'afeuten a la ilesia de Padrón:
- ¡Pero esto que va ser, carayu!.
¡¡¿La primer ilesia del cultu xacobéu fecha una triste llaceria ?!!
¡¡¡ Manes a la obra !!!
 |
| Portada de la Ilesia "Santiago de Padrón". |
Tres del Añu Santu de 1456 la Ilesia de Padrón algamó delles ya importantes reformes gótiques siguiendo les instruiciones del Obispu Rodrigo de Lluna (1449-1600): añédense-y dos torres ya un Hospital de pelegrinos nuevu ( que tevo en funcinamientu hasta'l XIX) y los dos ábsides de los lladrales refáense otra vuelta, magar la techume sigue siendo de madera. Lo que nun se desanicia ye la llábana epigráfica de Xelmírez qu'entá podemos contemplar anguaño (el propagandista mayor del Reinu).
En 1852 visitaron esta ilesia los duques d'Orleans, Lluis de Montpensier y María Luisa, la hermana de Sabel II. Queden litografíes importantes d'aquella visita (Qué poques d'Asturies).
 |
| La Traslatio pel Mediterraneu. |
Cuando en 1858 Sabel II visita Galicia, tres de pasar un mes inolvible n'Asturies, los xacobeos (que non xacobinos) algamen de la Reina un compromisu pa iguar el templu que llevaba cuatro años peslláu; nun corríen bonos tiempos pa la ilesia por mor de la Desamortización de Mendizabal (1845). Les obres neoclásiques finaron en 1867 (taba la Reina Sabel iguando les maletes pal exiliu parisín) tres elevar el templu pa torgar les riaes del Sar camudando-y la orientación: Cabecera pal ríu, pal Oeste. Tamién se caltuvo un púlpitu góticu ya una imax de "Santiago pelegrín".
Nesti llugar onde tuvo l'hospital llevantáronse unes escueles qu'anguaño son oficines municipales, ¡yá nun hai guajes!.
Dos llenzos ornen esta ilesia: Ún de < l'Apaición de la Virxe a Santiago > ya otru al rodiu la < traslatio>.
< Equí entamó too, pelegrín >
L'iconu d'esta ilesia, el símbolu por escelencia, ye'l piedrón, l'ara votiva (quiciabes antes un menhir) d'un templu romanu dedicáu a Neptuno, el Dios de les Agües, onde según la tradición tevo amarrada la <barca da pedra> col cuerpu de Santiago que venía de Xerusalén. Les agües nesta zona son perimportantes como vinimos camentando; nun hai más que ver que la propia villa de Padrón ye una islla metanes del Ríu Sar. Caltién el "Piedrón" una inscripción que nos amuesa la dedicatoria pola parte d'un pueblu celta romanizáu: < los orieses al Dios Neptunu>
Tien polo tanto'l Piedrón una hestoria perllarga: Menhir neolíticu, Ara votiva romana, finxu Xacobéu, bita del cai (hasta los fenicios atracaron equí) .... Arriendes d'ello hai tamién una hestoria xacobea:
 |
| La translatio per Padrón (Wp) |
[[ Cuando los discípulos de Santiago arribaron a la Ría col so cuerpu pidieron permisu a la Reina Lupa (xefa nel castru de Teo) pa desembarcar pero esta, que nun conocía'l pañu, andaba roceana y nun-yos lu concedió porque al posar el cuerpu nuna llábana, esta foi derritiendo hasta quedar l'apóstol enxeitáu na mesma:
- ¡Maxa, esto ye maxa! ¡Encerrá-ylos, son peligrosos!
Lliberaos por unos ánxeles píden-y a la Reina Lupa namás los dexe sapozar el cuerpu dignamente. Hebo que negociar muncho con ella pa que los dexare enterralu. A la fin hasta-yos dexó unos gües pa tresportalu, nun yera tan mala:
- ¡Enterrá-ylu bien lloñe! .
Tres varios intentos d'entierru terminaron alcontrando un cementeriu romanu nel Monte Llibredón, en Compostela:
- Esti <Arca Marmòrica > ye'l llugar afayadizu- arrespotiaron los discípulos. ]]
***************************
¿Qué podemos fer en Padrón amás de visitar la Ilesia de Santiago?
. Pasear a la vera del Sar pel Paséu del Espolón talo facía Rosalía de Castro y visitar la so Casa-Muséu.
 |
| Asina-y quedó la cara a Rosalía cuando vio la torna que-y fice al so poema. (- Pondré tol procuru n'igualo con otru, fía) |
< Al traviés la xamasca perenne qu'oyir dexa rumores perraros,
y énte un mar d'ondulante verdor,
amorosa mansión de los páxaros,
de les mios ventanes veo
el templu que quixi tanto.
El templu que tantu quixi ...
Mas nun sé dicir yá si lu quiero
Que nel rudu vaivén qu'ensin tregua
Ximielguen los mios pensamientos,
Duldo si'l rancor cativu
vive xuníu a l'amor nel mio pechu.>
(Imitando a Rosalía, a la manera de mio)
 |
| Fonte del Carme (Padrón) "El Bautismo de la Raiña Lupa". "La Traslatio" |
De sillería granítica, ta ornada con boles y rematada con un frontón. Tien un fornicu onde s'amuesa la figura del Santu bautizando a la Reina Lupa ya otru cola Virxe de los Dolores, mui visitada poles embarazaes col envís de tener un partu feliz.
 |
| Santiago faciendo vela pel Sar cola Reina Lupa. (Anda, al final yeren collacios) |
Lo que sí sabemos ye que foi iguada a finales del XVIII, tiempos de Carlos IV. (Lo que nun sé yo ye por qué se llama <Del Carme>, ¿quiciabes porque taba al par de Cai d'onde salíen los marineros a faenar pela ría?. La Virxe del Carme ye la Patrona la Marina, la mía, "Cabu 2ª Amanuense", del 3º del 68, tres facer la instrucción nel Ferrol a les órdenes del Sarxentu Antón y el cursu de cabu en San Fernando (Cádiz) onde mandaba'l Capitán Pavón (ceo algamó a Comandante).
Cuido que n'esta fonte foi bautizada la Reina Lupa tres convertise al cristianismu por mor de los milagros de Santiago. Qué lleenda más guapa pa camudar paganos en cristianos; estos cures .... sábenles toes (claro que los romanos facíen lo mesmo, pero al aviesu) .
 |
| Ponte de Santiago- Conventu del Carme |
La Ponte de Santiago ye d'orixe medieval - siempre se diz lo mesmo - pero tuvo munches igües a lo llargo del tiempu. Lo que sí sabemos ye que foi perimportante, esencial pal comerciu ente los pueblos de dambes orielles del Sar. En 1790 tevo una igua pergrande y yá en 1845 (Sabel II) una enriá esboroñó dos de los cuatro güeyos tardándose enforma n'axeitalu (1852). Tamién se la conoz como la <Ponte del Carme>, seguramente polo dicho anantes; d'equí salíen los barquinos pal mar y porque comunica'l Convento del Carme
( A Trabanca) col cascu vieyu la ciudá, onde tán la Ilesia y la Fonte.
 |
| Ponte sobro'l Ulla - Pontecesures (Semeya: Pintirest) |
La Ponte Romana de Padrón-Pontecesures.
Si quies entrar en Padrón viniendo del sur, de Pontecesures, tienes que facelo al traviés d'una ponte romana sobro'l Ríu Ulla. Seique anguaño nun queden güelgues de la traza romana caltiense n'alcordanza'l topónimu pos quedare rexistrao que vien de la dómina d'Augusto, ente 27 e.X. y 14 d.X.
Sicasí la reforma más importante foi la llevada a cabu pol Mayestru Mateo*- ehí queda eso- , ún de los grandes constructores de la Catedral de Santiago. Tien la ponte trece (13) güeyos unos con bóveda oxival ya otros de mediu puntu.
En Catoira, a 10 km d'esta ponte y 12 de Padrón, foi onde l'Obispu Cresconio mandó tresnar les nueves Torres del Oeste col enfotu de poder controlar meyor les razies vikingues que simpre entraben dica Santiago per aciu la Ría d'Arousa, vía Ríos Ulla y Sar.
 |
| Santu dos Croques (el de los cabezazos) (Semeya:hostelocastelo.com) |
[Yera tradición ente los estudiantes - y dalgunos pelegrinos - arrodiyase énte'l Santu y chocar cabeza con cabeza a la fin de buscar una tresferencia intelectual. Como algunos queríen aprobar pasando los díes de "ribeiros" pel barriu antiguu, los cabezazos yeran talos que'l propiu Santu viose obligáu a pidir clemencia al Cabildru; anguño ye preciso estudiar pa poder aprobar,<os viños, the weekend>]
***********************************
PERSONAXES ILUSTRES de PADRÓN
 |
| Camilo José CELA, nel Espolón. |
Ente los Personaxex ilustres de Padrón tenemos a : Macías l'Enamoráu, Rosalía de Castro, Camilo José Cela, Pepe Domingo Castaño y más ....
. Macías yera un poeta y trovador que namorare d'una dama de l'alta castra y .... pagólo caro (Yá vos lo cuntaré cuando teáis más tranquilos).
. Rosalía de Castro (1837-1885) foi una poetisa de gran valir representante del Rexurdimientu gallegu y precursora de la poesía moderna española , al empar que Bécquer. Los sos "Cantares gallegos" son un iconu pal pueblu galáicu.
. Don Camilo José Cela (1916-2002), marqués d'Iría Flavia, foi un escritor cabezaleru de la Post-Guerra con obres como: "Viaxe a l'Alcarria", "La familia de Pascual Duarte" o "La Colmena"(El Casiellu). Llogró ser miembru de l'Academia Española de las Letras" y algamó'l Premiu Nobel ( 1989) y el Cervantes en (1995).
. Pepe Domingo Castaño ye un trovador, presentador de TV y llocutor de radio qu'entá sigue n'activo na Cadena Cope: <Hola, hola, hola .... Pepe ! >; yes un gallu , un trabayador, exemplu pa la mocedá. Nun te retires nunca.
*****************************************
ENTÁ siguimos cola PRIMER ESTAYA, yá salimos de Padrón, eh:
<< PADRÓN - O ESCLAVITUDE - A PICARAÑA [8,5 km.]>>
Puntos d'interés: [ Padrón (Colexata) - Iría Flavia - Pazos - Romarís - Rueiro -
Anteportas - Tarrío - Villar - Esclavitude (Sta María de Cruces) - A Picaraña].
Puntos d'interés: [ Padrón (Colexata) - Iría Flavia - Pazos - Romarís - Rueiro -
Anteportas - Tarrío - Villar - Esclavitude (Sta María de Cruces) - A Picaraña].
Tamos al final del Paséu de Espolón, xunto la Ponte sobro'l Sar . Salimos bordiando la Ilesia de Santiago do Padrón y empobinamos pela cai Murgadán; torcemos a mandrecha na rua Corredoira da Barca y darréu a manzorga, Cai Dolores, dica Iría Flavia, antigua sede arzobispal y anguaño parroquia del conceyu de Padrón.
 |
| Colexata de Santa María d'Iria Flavia (Semeya:bing.com) |
Ensiguida damos cola Colexata de Santa Mª la Mayor d'Adina, al par del cementeriu onde ta enterráu Camilo José Cela (dende que dixisti aquello de la Santina quitéte'l Don). Los primeros nicios d'esta ilesia hai dir buscalos a la dómina romana, al sieglu I d.X, tiempos de Vespasiano* que convirtió Iria Flavia nun "municipium".
*[Vespasiano foi ún de los trés emperadores de lo que se conoz como "Dinastía Flavia" (69-96 d.X.). Los otros fueron Tito y Domiciano.]
 |
| Santa Mª d'Adina, n'Iría Flavia |
Nun ta Santa María nel asentamientu de la primitiva, demasiao averada al puertu y espuesta a les razies vikingues que xubiendo pela Ría d'Arousa atracaben n'Iria pa tirar camín de Compostela. Otramiente ta perbién asitiada cerquina la vía romana "Brácara (Braga)-Astúrica Augusta (Astorga)", per onde vieno Almanzor, que precisamente desanició la primitiva ilesia visigótica-prerrománica. Trabayu pal obispu d'Iria, Cresconio (1037-1066), que foi'l que la camudó de llugar.
 |
| Ancestral Cementeriu d'Adina (Iria Flavia) - Mira, la tumba embaxo l'árbol ye la de Camilo. |
Por ello Xelmírez dio l'emburrión definitivu al burgu Compostela (que Cresconio yá enantare enforma) y sobremanera a la so catedral, ameyorando los caminos xacobeos, sobre too'l "francés", y poniendo a Santiago nel cumal eclesiásticu sofitándose pa ello na propaganda del <Códiz Calistinus>, el primer panfletu turísticu que se conoz.
Cresconio foi' l'obispu qu'enaltó la sede Iria-Compostela ya intentó facela sede apostólica - Episcopus iriensis et Apostolicae Sedis, prestaba-y que lu nomases - seique el Papa León IX nun-ylo consintió ya al endefechu escomulgólu por atrevíu. Sedría Xelmírez el que lo algamó cola venia d'otru Papa, Calisto II , yeren otros tiempos, dómina del Cluny.
Lo que va ganando Compostela va amiyándolo Iría Flavia, pero Padrón (con Santa María) ye un dignu segundón, quedando la nuesa Santa col títulu de Colexata.
 |
| Tímpanu de la GLORIA: < LES CINCO PELEGRINES XACOBEES > Santiago anda esprecetáu por saludales. Los obispos anden roceanos .....: - ¿ Vendrán pidi-y el sacerdociu y poder alministrar los Sacramentos? - Convién teneles vixilaes, Señor Arzobispu; semblen ser d'armes tomar. |
Santa María d'Adina ye un eduficiu de planta rectangular con tres naves, cruceru, presbiteriu y bóveda d'arista. La portada, d'arcos apuntaos percontiaos sobro columnes, presenta un célebre tímpanu de tradición románica que cuenta cola representación de l'Adoración de los Reis Magos onde María lleva la voz cantante. Nel interior alcontramos dellos retablos, el mayor de Miguel de Romay asina como una talla en granitu de la Virxe María. Tamién tien delles capielles como "La capiella del obispu de Quito" y "La capiella del Sagrariu". Formando parte del adríu la ilesia ta l'actual Cementeriu, onde antes Rosalía (foi treslladada a Compostela) y agora Camilo (quítote'l Don polo que dixisti de la Santina) entretienen a los antiguos vecinos coles sos poesíes ya hestories eteres.
******************************
Salimos d'Iria Flavia tres cruciar les víes del tren embredando pela N-550 camín de Pazos. Tres d'un xiru a manzorga vamos enredándonos peles rues Romarís, Ruerio y Anteportas colo que llevamos andaos unos 4 km; falta dalgo más de la mitá pa finar la ruta de güei.  |
| Camín de Santiago Entrando n'otru mundu. |
 |
| - ¿Échovos un gabitu? Soi un gallu cola llavadora. |
Per una recta asfalcada vamos aportar al Tarrio, que pertenez a la parroquia de Sta. María de les Cruces onde podemos contemplar los típicos horros gallegos . Palipali empalmamos con Villar y tres tornar a la N-550 vamos aportar A Esclavitude, lo que diba ser el fin de la estapa, pero siguimos un pelín más, hasta A Picaraña, pa facer más curtia la caminada de mañana.
[ L'horru de Galicia ....... ye una construcción singular, un ¿inmueble? destináu a guardar la collecha añal con unes condiciones de ventilación imprescindibles asina como un prácticu aisllamientu de roedores - llambiones a más nun poder - pal granu que s'ensucha col envís de caltenelu nel tiempu. El maíz ye'l preferíu pero fabes y arbeyos son un complementu ideal pa una dieta equilibada.
 |
| Horru gallegu (Semeya:blogspot.com -Wp) |
L'horru suel tener tar constituyíu por una cámara de planta rectangular de piedra o madera y cubierta a dos agües por llousa o teya árabe y que va sofitada nunos pilares o pegollos (esteos) de piedra - o madera - más o menos altos col envís d'aisllala de la humedá del suelu y qu'al empar tenga la meyor ventilación posible per aciu les rendixes que queden ente les colondres o cureñes verticales que conformen l'armazón de la cámara onde se guarda'l granu o cualisquier otra collecha.
 |
| Pequeños, guapo y práuticos Nun hai casa que nun tenga ún. |
Cualquier horru que se preste tien de tener dalguna representación simbólica que faiga referencia a los llares de la casa col envís de que les meigues abelluguen les colleches: trisqueles, cruces, figures de santos, cálices, .. Ye difícil alcontrar una casería por pequeña que sea que nun tenga un horru, ¡son tan pequeños y guapos de facer ...]]
************************
 |
| Santuariu d'Esclavitude, cruceiru. |
A Escravitude ye un llugar de la parroquia Les Cruces, conceyu de Padrón y comarca del Sar , que nun llega a los 100 habitantes. Lo más bultable d'esti pueblu ye'l Santuariu d'Escravitude seique ye del (XVIII) tien la so farda en dos fechos que camienta la tradición:
(1). Cuando en en 1582 el cura de la parroquia de Cruces tuvo a piques de morrer pola mor d'un árbol que cayó al pie d'él quixo da-y les gracies a Dios mandando esculpir una imax de la <Virxe col Neñu> qu'asitió xunto a una fonte perantigua que la xente entamó a nomar la Fonte Santa.
(2) . En 1732 un vecín de Salnés que carecía d'hidropesía empobinó dica l'Hospital de Compostela pa tratar d'ameyorar la so enfermedá pola mediación del Santu Patrón. Al pasar per Esclavitude foi hasta la célebre Fonte Santa y de pasu encamentase a la Virxe. ¡Milagru!. A los tres días taba sanu como un coral y camentó al altu la lleva aquel milagru que l'agua y la Vixe ficieren nél curándolu de la esclavitú d'aquella malura.
 |
| SANTUARIU d'ESCLAVITUDE Si tomes d'esti agua y se te pon el pelo colorao ¡adiós a tolos males ! |
Tres visitar Santa María Cruces vamos salir d'A Esclavitude per un tramu con dellos cambios de direición hasta dar con un pasu a nivel sin barreres que nos mete n' Angueira de Suso. Per aciu d'un emparráu inacabable vamos algamar a Arenal, de primeres, y darréu A Picaraña, fin de la PRIMER ESTAYA. Anduvimos 2,5 km más de lo previsto nel llibru de ruta; pero qué ye eso pa un@s gall@s asturia@s.
***************************
La tarde del Miércoles, 11 de Marzu de 2020, fuimos pasala en Padrón pa completar el conocimientu d'esta vílla xacobea tan interesante. Yá camentamos al rodiu la so Hestoria, de la Ilesia de Santiago, de la Ponte y el Cai, de la Virxe del Carme y dimos unes pincelaes sobro dalgún personax cabezaleru pero quiero enaltalo cola Casa-Muséu Rosalía, el Xardín Botánicu o'l celebérrimu poeta Macías, asina como una visita virtual a Santiaguiño do Monte, dao que nun hebo tiempu material p'algamar hasta'l requexu.
La Casa-Muséu Rosalía de
Castro ta asitiada nel barriu d'A Matanaza, nes afueres de Padrón y pa llegar hasta ella tenemos que cruciar el Canal del ríu Sar y darréu les víes de la Estación del tren.
Trátase d'una antigua casa - planta rectangular - de ciertu bienestar, tipu pazu cenciellu y de calter agrícola. Tien planta y pisu y ta arrodiada d'un xardín mui curiáu que na dómina Rosalía yera'l güertu casa. Anguaño florecen una bayurosa varidá de camelies de les que tantu s'afaten en Galicia.
 |
| Casa-Muséu "Rosalía de Castro" |
El Muséu caltién además un Auditoriu, una sala pa Centru d'Estudios, otra nomada como Fundación Rosalía y completando la casería rural un llagar pa facer vino y "aqua vitae"(oruxu), qu'hai iviernos mui duros de cuando en vez ya otramiente ye preciso pa facer los esconxuros per aciu la queimada.
 |
| 1884. A cabera semeya de Rosalía: FAMILIA |
Cuido que Rosalía nun tevo unos estudios reglaos pero sabemos qu'aprendió Dibuxu y Música en Santiago algamando a tocar siete (7) instrumentos. Tamién conocemos el so amor pol Teatru llegando a actuar de moza en delles obres. Foi seguramente n'esta época onde alquirió una conciencia social de clases - que llueu amosó nes sos obres - en rellación con otros collacios del LLicéu de la Mocedá, talo Manuel Murguía, Eduardo Pondal y Aurelio Aguirre, los capos del <Banquete de Conxo>, del que falaremos enantes d'entrar en Santiago. Tamién vivió en Madrid nun ambiente lliterariu de postín en casa de Carmen Lugín de la que yeren habituales los hermanos Bécquer, Nombela o Avendaño.
< El qu'a bona solombra arima
bona sombra lu acovez>
LA OBRA DE ROSALÍA
 |
| - Corréi, corréi; que Rosalía va echanos unos "Cantarinos gallegos" |
."Cantares gallegos" (1863): Un canciu a la dignidá de la LLingua Gallega, al paisax y a les costumes y tradiciones de Galicia. L'impautu popular foi tan grande que foi considerada como l'entamu de Xurdimientu Gallegu. Íntima, amorosa y social-patriotica remueve les conciencies de la sociedá gallega esplotada y emigrante.
. "Follas novas" (1880): Onde se mez la señaldá de la vida col ansia de llucha social por mor de la emigración forzosa y la inxusticia social reflexada nel abandonu de la infancia y la marxinación de la muyer, nominándose como una verdadera feminista.
La tercer gran obra de Rosalía ye "En las orillas del Sar", poemariu escritu en castellán poco anantes de morrer, moza entá (48 años), enferma de cáncer, llarada de fíos y con un maríu que l'agabitó sinceramente p'algamar lo que foi seique la tenía escaecía naquellos momentos caberos.
Pero Rosalía escribió muncho más, en prosa y en versu, en gallegu y castellán por ello nun podemos dexar de llau que se la considera, xunto a Bécquer la creadora de la Poesía Moderna.
*************************************
 |
| Saludando a Macías, daprendiendo d'Amor. |
Na mesma tarde del Miércoles 11 de Marzu fuimos visitar el célebre
XARDÍN BOTÁNICU de Padrón
(BIC 1946) mui averáu a la tradición xacobea por tar cerquina del llugar onde llegó'l cuerpu xacente del Apóstol a mediaos del sieglu I d.X. seique nun s'afayare hasta IX.
La tradición, como na Verxa xacobea; la lliteratura con Rosalía, l'amor con Macías o la política con Castelao danse cita nesta mancha verde y fusia qu'engalana la ciudá. Más de 300 especies viven en perfeuta harmonía nos 10.000 m2 de parque onde les dos Secuoyes Xigantes (una pa Macías ya otra pa Rosalía), la Palmera Senegal, la Corona de Cristo, el Roble Fastigiáu o'l Castañu d'Indies son les xoyes de la corona, pero hai muncho más ....
 |
| Con Castelao, ehí queda eso. |
Porque los enamoraos suelen sentar a confesar confidencies nel "Bancu de los enamoraos" mientres suspiren coles gotes de la Fonte Ornamental .
Nun pue faltar nesti xardín del XIX - en 1869 yá taba consideráu ún de los cabezaleros d'España - una escultura a un Maestru como Don Ernesto Gende asina como otra al políticu nacionalista Castelao, ¿con quién sinón diba charrar Rosalía?.
 |
| Corona d'Espìnes de Cristu |
Esti xardín da pa escribir un llibru más gordu que'l de Petete pero namás voi ponete na pista d'un piedronés mui célebre por mor del AMOR:
MACÍAS NAMORADO yera un trovador y escritor gallegu del XIV (1340-1370) que dedicaba les sos canciones - en galego y castellán- a una dama d'alta castra - fía del Marqués de Villena - cola que llegó a intimar y por aciu d'ello terminó..... El so maríu tenía muncha puntería.
La so obra recuéyese nel Cancioneru de Baena.
*************************************
SANTIAGUIÑO DO MONTE
< Quien va a Santiago y nun va a Padrón
o fai la romería o non >
. Hai un llugar en Padrón, un iconu xacobéu de postín, que nun pudimos visitar, y bien que lo sentimos, por mor del tiempu y del coral: Santiaguiño do Monte. Intentámoslo; xubimos hasta'l Monesteriu del Carme, paramos a tomar aliendu y de pasu unes semeyes úniques ya inolvidables, pero los valtos del coral y l'escasu tiempu que nos quedaba torgónos la visita a esti SANTUARIU xacobéu (Hai un Vía Crucis de 136 peldaños; namás me falta poner la "Corona d'Espines" del Xardín Botánicu). En cualisquier casu disponemos de daqué información y algo vamos a cuntavos ....
Dicen, camiéntase yá dende finales del VI nel Breviarium Apostolorum :<“Hic [Santiago] Hispaniae occidentalia loca predicat”> que Santiago tuviere predicando n'España tres del repartu que fixeren los Apóstoles en reunión darréu l'Ascensión del Señor Xesús. Los pedroneses afiten dafechu que tuviere predicando - primeros de los 40 d.X - na zona de Padrón . Y precisamente nun cuetu qu'había - hai - un poco p'arriba del Monesteriu del Carme, un llugarín bien afayaizu polo que cuenten que ye onde Santiago y los sos discípulos se reuníen pa tresmitir la <Bona Nueva> y convertir al cristianismu a los gallegos mentanto Roma s'apropiaba de los castros celtes ( la Reina Lupa vivió nún - C. Lupario - pero bautizó equí ) p'arramplar col oru y tolo que pillaba.
Anguaño equí reune la chavalería'l pueblu (hailos > 70) al rodiu'l Santuariu: el Roqueru nuna viesca, la Ermita, la Casa del Ermitañu y la Fonte Milagrosa, la qu'un día fexo xurdir l'Apóstol pa matar la sede del pueblu.
o fai la romería o non >
 |
| Certificáu: PEDRONÍA roblada |
. Hai un llugar en Padrón, un iconu xacobéu de postín, que nun pudimos visitar, y bien que lo sentimos, por mor del tiempu y del coral: Santiaguiño do Monte. Intentámoslo; xubimos hasta'l Monesteriu del Carme, paramos a tomar aliendu y de pasu unes semeyes úniques ya inolvidables, pero los valtos del coral y l'escasu tiempu que nos quedaba torgónos la visita a esti SANTUARIU xacobéu (Hai un Vía Crucis de 136 peldaños; namás me falta poner la "Corona d'Espines" del Xardín Botánicu). En cualisquier casu disponemos de daqué información y algo vamos a cuntavos ....
Dicen, camiéntase yá dende finales del VI nel Breviarium Apostolorum :<“Hic [Santiago] Hispaniae occidentalia loca predicat”> que Santiago tuviere predicando n'España tres del repartu que fixeren los Apóstoles en reunión darréu l'Ascensión del Señor Xesús. Los pedroneses afiten dafechu que tuviere predicando - primeros de los 40 d.X - na zona de Padrón . Y precisamente nun cuetu qu'había - hai - un poco p'arriba del Monesteriu del Carme, un llugarín bien afayaizu polo que cuenten que ye onde Santiago y los sos discípulos se reuníen pa tresmitir la <Bona Nueva> y convertir al cristianismu a los gallegos mentanto Roma s'apropiaba de los castros celtes ( la Reina Lupa vivió nún - C. Lupario - pero bautizó equí ) p'arramplar col oru y tolo que pillaba.
 |
| "O Parrandeiro" (El Parranderu) |
Anguaño equí reune la chavalería'l pueblu (hailos > 70) al rodiu'l Santuariu: el Roqueru nuna viesca, la Ermita, la Casa del Ermitañu y la Fonte Milagrosa, la qu'un día fexo xurdir l'Apóstol pa matar la sede del pueblu.
Yo déxovos una semeya del llugar col sellu de la PEDRONÍA, ye dicir el Diploma que condece'l Conceyu de Padrón a los pelegrinos que visiten los santos llugares xacobeos d'esta villa y redolada. Porque yá sabéis el dichu:
< El que va a Santigo y nun ve Padrón o fai romería o non >.
Los asturianos del IMSERSO amás de pelegrinos tamién somos romeros.
La Traslatio que vemos a manzorga lleva'l sellu de la PEDRONÍA lo mesmo que semeya superior de "Santiaguiño do Monte". Vamos, que tamos EM-PADRONAOS.
***********************************************
(2) << A PICARAÑA - O MILLADOIRO [< 9 km] >>
El Miércoles 11 de Marzu ficimos la
Segunda Estaya:<A Picaraña-O Milladoiro>
de la Etapa Oficial <Padrón - Compostela>, lo que supón unos 9 km, más o menos.
Amaneció dalgo nuble, más pola neblina qu'otra cosa pero yá la xente del hortel camentaba que seguramente espeyaba, como de contino. Y nun s'enquivocaron; un solín tibiu, seique agradable, ensiguida salió a acompañanos.
 |
| < A PICARAÑA>, salida 2ª Estaya. |
Nun me presta un res estes escorripandes, llévenme col ganchu y malpenes tendría tiempu a tomar delles semeyes de nun ser pola bondá de la Guía, Susana, que muncho m'aguantó, la probe. Claro, escribir na llibreta nin una lletra de manera tala que la mayor parte les fotos nun sé onde asitiales; ¡al carayu!, pondrévos dalguna pa que tengáis daqué idega de cómo ye aquello. Lo que sí vos dexo nidio son los finxos xacobeos importantes, como'l Castru Lupariu (O Faramello).
 |
| FÁBRICA, soterraña, de PAPEL (Pazu "O Faramello") |
 |
| Rúa do Francos |
Bien cerquina d'equí (2,5 km) alcuéntrase'l Castru Lupario - fechu una gocha - onde según la tradición vivía la Reina Lupa, que tanta importancia tevo na traslatio del Apóstol Santiago. Pos esti santuariu xacobéu ta, al paicer, fechu una triste llaceria; mereció-y la pena a Lupa agabitar el treslladu del Apóstol a Compostela poniendo gües y carru y terminar convirtiendo al cristianismu. ¡Santa, qué escaecía te tienen!.
* Del "Pazu O Faramello" yá fadremos un aparte, que vien que lu merez.
*****************************
 |
| Castru Lupario (Semeya:pintirest.com) |
"< Cuando llegaron a Galicia los restos del Apóstol Santiago quisieron asentalos nos dominios d'esta Reina pero ella, roceana, enviólos talo Pilatos al gobernador de Duio qu'intentó desfacese d'ellos consiguiendo únicamante la so muerte. D'estamiente los discípulos tornen a Lupa otra vuelta por una resolución. ¡Menudu papelón! ... ¿Qué faigo con ellos? ... Son peligrosos ...
 |
| El Bautismu de la Raiña Lupa Fornicu na Fonte del Carme (Padrón) |
Col envís de desfacese d'ellos mándalos con unos gües ensin domar a buscar les lloses del sepulcru al Monte Llicinu (Picu Sacro) porque sabe qu'ehí ta la ¡Cueva del Cuélebre! Mercé a una cruz que llevaben los discípulos el monstruu queda fulmináu al empar que los bravíos gües vienen tornase mansulinos dafechu.
- Traéime a esos cristianos, quiero que me falen de lo so relixón.
La Reina convirtióse al cristianismu y tres bautizase - como apreciamos na Fonte do Carme de Padrón - agabitó pa que'l Santu fuere enterráu como se merecía, na tumba marmórica d'un cementeriu romanu>".
Hai quien ve na Reina Lupa la representación d'una diosa precristiana, la deidá femenina de Lugh; vamos, qu'esta Reina Lupa ye de los nuesos.
 |
| Cruciando la Ponte sobro'l Ríu Tinto Camín de les Muralles del Castru Lupario al traviés del Pazu O Faramello |
Cerca del Castru Lupariu hai una ponte medieval, d'un solu güeyu, sobro'l Ríu Tinto pol que transitaben los pelegrinos xacobeos; anguaño buscóse daqué más cómodo escaeciendo'l mitu de la Reina Lupa; una pena pergrande ya incomprensible porque pa min ye tan importante'l Camín como'l fin; ye dicir, tolo que vas esfrutando, aprendiendo y compartiendo.
*********************
Siguimos cola ruta prevista:
 |
| <Pel Camín Xacobéu Portugués> |
Al par d'un cruceru, de los más antiguos de Galicia, pasamos per delantre la Ermita San Martiño . Per una pista asfalcada arribamos a Osebe na parroquia de San Xuan de Calo y cruciamos les víes pa entrar en Casallonga. Tomamos el Camín de Riotinto onde cruciamos una riega y d'esta miente entramos en Pedreira.
 |
| Caleyando per una CARBALLEIRA |
Darréu xubimos una carretera que nos introduz, per aciu la Travesía Do Porto, en Milladoiro, el más bultable núcléu poblacional del Conceyu d'Ames. A les 12 y media (12:30) ya tábemos buscando l'autobús,, aparcáu cerca la Casa Cultura pero enantes vínonos perbién refrescar nel Bar, que lo teníemos bien merecío. Cuando llegamos los porras dalgunos yá paecíen amoriar.
Ensiguida llegamos al Hotel Congreso (enteré más tarde con satisfaición que foi ún de los centros escoyíos en Santiago pa collaborar cola pandemia del "coronavirus". Chapeau.) y a les tres y media (13:30) yá tábemos otra vuelta n'autobús camín de Padrón pa una visita guiada.
FIN de la SEGUNDA ESTAYA.
*****************************************
ANEXU a la 2ª Estaya: < PAZU "O FARAMELLO" >
Mañana del Vienres, 13 de Marzu de 2020.
El vienres, tres la xinta, colamos de vuelta a Asturies, pero na mañana tenemos una visita guiada a un pazu. Nós alpuntámonos de mano ensin saber ónde díbemos, námas queríemos conocer un PAZU, el Pazu "O Faramello". Cuando miramos el mapa y vimos que'l pazu taba n'antigua Ruta Xacobea, al par mesmo del ¡Castru Lupario! cuasi nos desmayamos. Díbemos dir a ún de los icononos xacobeos por escelencia, a la morada de la Raiña Lupa: ¡Guauuuu!. Bueno, al par ...
 |
| PAZU: " O FARAMELLO", onde algún día antroxare la Raiña Lupa Cuando l'home se mez cola Naturaleza alcuentra'l Paradisu. |
 |
| ¡BIENLLEGAOS! < Que vos afayéis nesta casa > GRACIES. |
- ¿Veis estes boles de la entrada? .... Eso significa qu'equí lluchóse escontra los franceses na Guerra la Independencia. Lluéu veréis unes cadenes porque equí quedó'l Rei. Y asina foi, Alfonso XIII agospió nesti Pazu'l sieglu pasáu.
Al entrar, tanto'l Rei como nós somos saludaos con esta inscripción de bienllegada:
< Pax intrantibus. Salus inhabitantibus. Foelicitas exeuntibus > .
- GRACIES.
Namás dar una güeyada al entornu yá nos dimos cuenta que'l Rei sabía bien onde quedar de posada: Metanes d'una viesca de carbayos una casona-palaciu blasonada, una capiella desimía, xardinos per uquier, terraza barroca, un Ríu que nos separa d'un cuetu de carbayos, una Ponte piedra que nos xune a un camín, roques, estanques, palombares y muries de piedra, una Fonte decimonónica y delles coses más qu'en principiu nun somos a estremar.
- Una inmensidá d'historia tien d'escondese nesti Pazu - camiento cola muyer.
- Vamos escuchar el guía.
 |
| XACOBU curia "O Faramello" abellugáu pol Castru Lupario. |
El Pazu tien una estensión de 126.000 m2 y la Casona-Palaciu ocupa 2100 m2 distando 12 km tantu de Padrón como de Santiago. Como veis ta asitiaú nel calce del Riu Tinto, afluyente del Sar y pertenez al Ayuntamientu de Rois. Los carrascos más antiguos del país podéis velos nesta viesca y por eso tán representaos nel Escudu del Ayuntamientu.
 |
| El MOLÍN. A manzorga, soterraña, la FÁBRICA PAPEL. |
- ¿Taba la fábrica embaxo tierra?
Como veis eso de la "cubierta vexetal" , que tan de moda ta agora, yá lo tuvo esti Pazu va 300 años. ¿Cómo lo veis?. ¡Ah! Y Felipe V nun quería otro papel que nun viniere d'O Faramello.
 |
| RETABLU ROCOCÓ José Gambino |
- Si vos fixáis esta capiellina carez de Cristu, la figura central ye la Virxe, arrodiada polos apóstoles, esto vien dicinos la gran importancia que tenía la muyer nesti Pazu (como en toos, fíu). El retablu ye cosa de José Gambino, un célebre escultor del rococó ñacíu nesti Pazu, que trabayó na fachada del Obradoiru, nel conventu d'Herbón, nel Palaciu Rajoy, nel pazu d'Oca (Pontevedra) .... Nun paraba; trés fíos de so ya un xenru siguieron la so llinia.
Tamos ablucaos nesti padadisu d'agua, piedra, viesca y coloríu que vamos percorriendo embebíos tres de Gonzalo.
 |
| CONXUNTU: Capiella, Horru, Cruceiru y Cenador. |
Pasamos l'adriu de camelies, l'antigua caballeriza convertida en Salón d'Eventos y sintiendo'l ruxerrux del Ríu Tinto cruciamos la Ponte da pedra que nos dexa nun camín de poco pisar.
- Esti camín que tais pisando ye'l verdaderu Camín Xacobéu, per equí pasó'l cuerpu de Santiago camín de Compostela pa ser enterráu nel Arca Marmórica.
- ¿Queda cerca'l Castru Lupario?
- Tais delantre d'él. ¿Nun ves eses muries de piedra?... Son les llendes del Castru. Ehí vivió la Reina Lupa qu'a la fin foi la qu'andechó col treslladu de los restos hasta Santiago.
Yo nun podía creyelo, ¡taba delantre l'adebecíu Castru Lupario! . Tuvi a piques d'alquilar un taxi'l llunes que llegamos p'averame hasta elli y .... ¡Teníalu delantre mio!.
- Andamos en tratos colos ayuntamientos a ver si torna pasar otra vuelta per equí pero tienen que cumplir con delles condiciones imprescindibles.
Yo rezo pa que s'arregle, tanto'l pasu pel camín como la igua del castru que ta medio abandonáu; fáiseme imposible: ¡un finxu xacobéu d'altor escaecíu de la mano de Dios! .
Na Casona-Palaciu entramos; nun podemos dar fe porque nun ye conveniente explayar los muebles sabelinos, los tapices flamencos o les lámpares de cristal de Murano, ayalgues adebecíes por ciertos cacos.
********************************************
(3) Xueves, 12 de Marzu de 2020 :
<< O MILLADOIRO - SANTIAGO COMPOSTELA (8 KM)) >>
Seguramente'l topónimu de Milladoiru vien pola situación estratéxica del llugar.
O Milladoiro ta allugáu nuna llomba dende la que pues acolumbrar la Catedral ya una parte importante de Santiago, ye un MIRADOR, milladoiro, como dicen per equí.
Otros, humildense énte la visión tan impresionante que se tien de Santiago: humilladoiro, y hasta se ponen de rodiyes pa echar una oración (Nós nun nos arrodiyamos pero rezar .... Algún Santu nos tien de sentir) .
San Xosé d'O Milladoiro ye parroquia independiente dende 2009 en que s'estremó de Santa María de Biduído. Tien cerca de 900 habitantes y, rara avis, con abundancia de neños, a los que se tienen dedicaos dellos parques (importantísimo curiar esti personal). Ye normal teniendo en cuenta que les pareyes moces vienen vivir equí, mui cerquina la capital, porque les viviendes son más barates.
Esti pueblu fízose célebre en 2011 por mor del Códiz Calistinus, cuando fuere robáu de la Catedral y guardáu nun garaxe d'esta llocalidá (Vaya,ho; guapa enseñanza pa los guajes).
**************************************
Pela Rúa do Esquíos aportamos al mirador o "Monte del Gozo" del Camín Portugués: Agro dos Monteiros (262 m/a), la cota más alta d'esti Camín en Galicia. Agora baxamos per una pista asfalcada y vamos atayando per delles siendes hasta algamar a Rocha Vella, na parroquia de Conxo, yá conceyu do Santiago. Tres arrodiar un poco pa salvar les víes del tren vamos cruciar el Ríu Sar pela Ponte Vella. Xube, palipali, vamos dexando atrás delles aldees del conceyu de Conxo, talo Torrente, hasta algamar l'antigua Ilesia de Santa María, anguaño Hospital Psiquiátricu.
Santiago a tiru flecha; fáltenos dos kilómetros y mediu (2,5 km).
***********************
Tres pasar la Ponte Vella entramos na parroquia de Conxo, antes municipiu independiente de Santiago. Equí hebo un castru prerromanu - el Castriñu de Conxo - que ye célebre por caltener unos petroglifos grabaos na roca. El nome de Conxo pue que venga d'Almerico Canogio que morrió asesináu nel Camín Xacobéu por namorase de Rusuinda y ta enterráu na redolada del monesteriu. (En Galicia ye peligroso namorase, que-ylo pregunten a Macías).
Nel sieglu XII (1106-1129) Diego Xelmírez manda construyir un Monesteriu (anguaño Hospital Psiquiátricu), hasta con piscifactoría, onde había una ilesia prerrománica fecha una triste llaceria de manera tala que tola vida xiraba al rodiu de so, como ye de suponer.
En 1835 (Desamortización M.) Conxo queda constituyíu como municipiu independiente pero en 1921 ye anexáu al conceyu de Santiago; tamosfalando d'una dómina onde mangoniaba'l el caciquismu ( los alcaldes nomábense a deu) col que nun pudo acabar l'Estatutu Municipal de Primo de Rivera (1924).
Seique ye un barriu periféricu sigue calteniedo esi aldu rural tan candial. D'equí salió'l primer tren de Galicia camín de Carril en 1873 pero antes, en 1856, reinando Sabel II, tevo llugar nesti barriu un casu mui célebre naquella dómina: <El Banquete de Conxo> : [Orde y Fraternidá]
El 2 de Marzo de 1856 aprovechando les boquiaes del Bieniu Progresista (1854-56) y coincidiendo cola honomástica - décimu aniversariu de los Mártiles de Carral* - los estudiantes, obreros y artesanos compostelanos ficieron una espicha - nun Belvedere de les afueres de Conxo - colos papeles cambiaos: "los ricos estudiantes yeren los sirvientes de los humildes obreros": Pasáronlo de P.M. pero a la sociedá tresnuechada compostelana papiaba-y el culu:
- Esto nun se pue aguantar. Estos mamarrachos con eses perrares idees socialistes van acabar col orde establecíu, la familia y la propiedá.
- ¡Espartero dimisión y O' Donnell al sillón!
Qué remediu, el tinerfeñu O'Donnel entamóla a cañonazos col Congresu y Espartero - esperáu y aclamáu por pueblu español - sacó'l culu, abandonó la llucha y retiró a fer vinu a La Rioh.a, d'onde yera la muyer.
- Nun quiero acabar cola Monarquía. Siempres fui y sedré fiel a la Reina (Sabel II).
(Tamién ye verdá que cuando años más tarde-y propusieron ser Rei negóse dafechu.).
*Los Mártiles de Carral ... Durante la "Década Moderada (1844-54") del reináu de Sabel II unos militares gallegos qu'alzaron escontra'l Presidente Narváez por demasiao conservador ( recorte de les llibertaes y una centralización afogante) terminaron fusilaos: Doce, capitaneaos pol coronel Diego Solís y Cuetos.
Al Banquete del galleguismu asistieron xente de la talla del cabezaleru Aurelio Aguirre, qu'echó un discursu, y Eduardo Pondal , que recitó una poesía en castellán (menos mal, si lo fai en galego entá lu tán buscando). Ye de suponer qu'a esta espicha solidaria y reivindicativa nun faltaríen Rosalía de Castro - que ceo coló pa Madrid - y el que terminó por ser el so maríu (1856), l'escritor Manuel Murguía asina como tampoco Paz Novoa. L'acontecimientu armó revuelu talu que'l gobiernu mandó l'exércitu arrodiar el robledal "nes orielles del Sar" porque temíen qu'aquello fuere l'entamu d'una rebelión; non fíos, namás una prevocación.
*****************************************
Bueno, cola mochila cargada con estes hestoriescuéstanos trabayu xubir la cuesta de Conxo, y claro, siempres somos los "últimos de la fila".
Vamos fer el paséu trunfal peles cais d'ún de los tres finxos del cristianismu medieval:
Santiago de Compostela; los otros yeren Roma y Xerusalén.
Rua Sánchez Freire, cai García Prieto, Avenida Villagarcía d'Arousa qu'emboca na saudade Rosalía de Castro que da pasu Xuan Carlos I. Agora caleyamos pel Parque l'Alameda onde podemos contemplar una de les estatues más célebres de la ciudá: Les dos Maríes, de César Lombera. Tán guapes, les h.odíes, con esos collorinos tan llamatibles.
- Vamos entrar nel Cascu Vieyu la ciudá. Ehí taba la Puerta Faxeira, una de les siete (7) puertes d'accesu a la villa tres l'amurallamientu de la mesma darréu la invasión d'Almanzor en 997.
- Ehí ta la Rúa do Franco y paralelo a ella la Rúa do Villar onde s'alcuentra la Oficina de Turismu. ¿Qué tal si tomáis daqué nel Bar Cestaño mientres recueyo un poco información de la ciudá, too ye poco pal blog.
Cuando torné pasando pela céntrica Plaza do Toural, con una fargatada de mapes, ellí taben les dos santes - Guía y Parienta - reponiendo fuercies con unos pinchos d'impresión. Yo alpunteme al carru, como ye de suponer:
< Comer y arrascar namás consiste n'entamar>.
Pela cai más animada de Santiago, la Rúa do Franco, vamos algamar la PLAZA del OBRADOIRU siguiendo les torres de la so imponente CATEDRAL. L'Apóstol ta invitándonos entrar per aciu'l Pórticu de la Gloria. El coral ta valtiándonos a un ritmu esmoleciente ... Curiao, manín, que nun ta elli pa munchos trotes ... Pero vamos enfotaos; sabemos que'l Santu ta con nós y güei nun nos pue pasar nada que nun sía daqué glorioso. Son munchos los meses que llevamos esperando esti momentu. Colo que nun cuntábemos (poco previsores) yera colos andamios por mor de les obres de remocique por aciu l'Añu Santu Compostelanu que ta al cayer, en 2021. Sentamos nel "Kilómetro 0" de la Plaza , talo dellos pelegrinos que tres munches xatonaes algamaben a la so adebecida meta, y echamos una güeyada a los principales edificios de la Plaza: La Catedral, el Palaciu o Pazu de Raxoi (Gobiernu Rexonal), Hostal de los Reis Católicos ( Parador Nacional), el Palaciu Xelmírez (Arzobispáu) y Colexu San Xerónimu.
Podemos dicir que la caminada prevista : <Padrón-Santiago Compostela> dase por finada pero entá nos quedaben dos sorpreses pa pone-y la espuela: "La visita guiada al cascu vieyu" y el "Santiago Máxicu" pa conocer la intra-hestoria la ciudá. Eses cuntámosles darréu, agora vamos implorar esta
< Oración al Apóstol >:
<Oración al Apóstol>
< Enaltemos al Apóstol
con canciones y piedá
que les almes güei respiren
una gayola ensin par.
Dende'l cielu, coronáu,
bendiznos a fartucar;
güei llegamos a Santiago
antroxando Felicidá,
la so fe santa guardemos
nel futuru caleyar.
Elli trexo la creyencia
de doctrina celestial
y por ella, ¡y por España!,
la xusticia va trunfar.
(magar los malos Borbones ,
que, ¡Dios!, tenga nel altar.
Rezo yo pa que la Infanta
salga derecha y lleal
pos como vien d'asturiana
ye un seguru p'acertar).
Quede equí la mio plegaria
talo'l PIEDRÓN nel altar
ya espero, mio Santiaguiñu,
aguante un poco'l coral
pos ando pel Primitivu
y prestábame finar (llee acabar).
Si faigo alcordanza d'ello
ye por mor d'un Rei llegal
- asturianu de nacencia
y vascu per parte ma -
qu'envede robar les perres
nos fizo una catedral
- en San Paio una capiella
pal Apóstol reposar -
acueductos ya ilesies
como San Tirso'l Real
y hasta inventó'l Primitivu
pa invitanos caleyar
dica Santiago, na menos,
bendita y candial ciudá.
Voi pidite, énte la tumba,
- de nueves remocicá -
salves otra vuelta a España
que tien la corona manchá.
Daquella torno pa casa
(cuelgo'l sombreru,
guardo la capa,
doi la cayá,
miro al revisgu)
y como que nun pasó ná
yo sigo a los mios deleres
y vós - toos - ¡a trabayar!. >
****************************
Na tarde del Martes 10 de Marzu ficimos una visita guiada a Santiago pa conocer los principales edificios históricos de la ciudá Santa, esos que nacieron y crecieron al empar que'l mitu xacobéu. Aparcamos, como siempres, na Dársena Joan XXIII - 400 m del Obradoiru - onde nos esperaba'l simpáticu Guía, arranáu por tresmitinos la bayura conocimientos qu'atesora. Voi tratar de fer alcordanza dalgo de lo muncho que contó nes dos escases hores que tenía.
- Gracies pol to esmolecimientu, enantes que l'olvide, Señor Gabriel.
Mientres nos averamos a esi "mar de piedra", que vía Unamuno, camienta que Santiago ye la capital de Galicia dende 1985; que tien cerca de < 100.000 habitantes de los que'l 35 % son flotantes, ye dicir, estudiantes na so mayoría, dao que Santiago ye ciudá Universitaria amás d'ún de los tres finxos de pelegrinación cristiana xunto Roma (romeros) y Xerusalén (palmeros).
- Lo primero no que reparamos foi na Ilesia-Conventu San Francisco (una de les 75 que pues alcontrar en Santiago) fundáu pol mesmísimu San Francisco d'Asís en 1214 cuando vieno a Galicia talo un pelegrín más.
Cuenta la lleenda que'l d'Asís agospió en casa d'un carboneru nomáu Cotolai, que vivía nel Monte Pedrosu, al que-y encamentó llevantar una ilesia-monesteriu no que se conoz como "El Valle de Dios" (onde ta anguaño). Al arrepostiar que nun tenía medios el Santu empobinólu al Monte San Paio (Pelayo) onde alcontraría un tesoru. El tarrén mercóse a los monxos benitos de Samartín Pinariu por una cesta añal de pexes, vezu que llegó hasta'l XVIII.
Esti primer monesteriu esbarrumbó nel sieglu XVIII y namás queden d'él nel nuevu cinco arcos del claustru y el sepulcru del tal Cotolai. La nueva ilesia entamó siendo arzobispu Maximiliano y sigue les traces barroques de Simón Rodríguez con planta xesuítica en cruz llatina de 3 naves, cruceru con bóveda de cañón y cúpula media naranxa. Una tribuna percorre les capielles de los lladrales y la sacristía ye tan ancha como'l templu.
La fachada barroca foi llevada a cabu por Flai Manuel Caeiro pero como s'allongó nel tiempu foi rematada más tarde pero yá con influyencia neoclásica. San Francisco preside'l cuerpu central de la fachada (3 cuerpos y 3 cais) abellugáu por cuatro columnes dóriques. Columnes xóniques abelluguen un ventanal pergrande y al empar sofiten el frontón triangular del tercer cuerpu.
L'adriu queda más baxu que'l nivel de la cai y enfrente suyo álzase un monumentu tipu cruceru n'honor del santu patrón: San Francisco d'Asís.
Anguaño'l Conventu ta dedicáu a Hotel y a Colexu Mayor y la Ilesia fai les veces de Catedral al tar esta n'obres que deben acabar pal añu XUBILAR que vien: 2021.
***
Agora tomamos la Cai San Francisco p'averanos a la Plaza del Obredoiru. N'otru tiempu tendríemos qu'entrar dientro la muralla qu'arrodiaba la ciudá al traviés d'< A Porta San Francisco> pero nun queda denguna de les 7 que tenía; foron desaniciaes como símbolos del Antiguu Réxime (Hai que pensar llargo, carayu).
Un edificiu rectangular de sillería destaca al entamar la cai: La Facultá de Melicina, lo que fuere l'antiguu Hospital de Pelegrinos:
- Si queréis entrar al Obradoiru tenéis que curavos enantes.-
Hai que facese cargu de cómo llegaríen los pelegrinos de la dómina a Compostela tres meses, ya hasta años, per eses abegoses caleyes llaraes de peligros. Una bona cura enantes d'entrar nel Santa Santorum nu taba mal, que too nun se pue dexar pal Zebedú qu'andaba esprecetáu, yeren - son, somos - munchos los pelegrinos qu'aconceyen na Plaza sobre manera dende que s'espardió la propaganda xacobea per aciu del <Códiz Calistinus>
***
La Plaza del Obradoiru - o "taller de piedra" - ye'l símbolu de Santiago Compostela.
Ehí foi onde aprució l'Arca Marmórica colos restos del Apóstol Santiago ya onde Alfonso II llevantó una ilesia prerrománica y anguaño tenemos una Catedral que nun para de remocicar; nestos momentos tán cola cabera igua col envís de dexala talo una patena con vistes al Añu Santu Xacobéu de 2021, ¡yá nada!.
- ¡Toi como llocu pola música!.
¿Qué quier dicir Añu Santu? .... El Papa Calisto II (1122) concedió-y a esta ilesia'l privilexu xubilar d'indulxencia plenaria, ye dicir, que te fueren perdonaos tolos pecaos si algamabes como pelegrín a Santiago (si'l regalu lu agabites con una comunión confesada y dexes una "propinuca" nel cepillu quedes cande ñeve). Claro, esto nun pasa tolos años, namás aquellos nos que'l 25 Xunetu caiga de domingu. Espero aprovechar esta bicoca pal añu que vien (2021) si Santiago agabita y los valtos lo permiten, qu'ún se confiesa pecador acérrime.
Pa saborguiala bien sentamos nel centru de la plaza, nel "Kilómetru 0", onde una pareya de mozos taba "tomando la cebá " y miramos embelesaos pa la Catedral. Facemos alcordanza ....
(1) La CATEDRAL de SANTIAGO COMPOSTELA
L'actual Catedral de Santiago tien los sos oríxenes na Edá Media, na primera mitá del sieglu IX. Cuando ente los años 820 y 830 tien llugar l'afayu del <Arca Marmórica>, el sepulcru del Apóstol Santiago, nel Monte LLibredón , un llugar perteneciente a la diócesis d'Iría Flavia, l'obispu Teodomiro comuníca-ylo al Rei Alfonso II el Castu y esti, tres visitar el milagru decide abellugar el sepulcru embaxo una ilesina prerrománica. Tamién se llevanó un batisteriu ya otra ilesina al Salvador , al que siempres tenía presente la corona astur. Pa la visita de 834 (quiciabes tuvo enantes) conocemos documentalmente que taba terminada.
A finales del sieglu IX Alfonso III el Magnu (899) decátase de la importancia qu'esta inventio tien pa la cristiandá y decide facer una gran ampliación: Planta basilical de tres naves quedando l'antigua englobada nel presbiteriu de la nueva. El sepulcru colos discípulos onde taba, na cabecera un altar al Salvador y los absidiolos pa San Pedro y San Xuan, dos finxos de la Ilesia. Tola corte uvieina acompañada por 17 obispos vinieron a bendicir l'acontecimientu, a dase'l pote, vamos. Esto de la política nun cambió un pimentu del Padrón.
Sabíalo Almanzor; sabía de la importancia que'l Apóstol tenía pa los cristianos y a finales del sieglu X (997) arrasa con tou Santiago ( y lo qu'alcontró pel camín) pero nun s'atreve col sepulcru:
- Al Santu nin tocalu, trai mala suerte.
Pero pal añu 1000 yá taba l'obispu Mezonzo manes a la obra. En 1075, reinando Alfonso VI, l'obispu Diego Peláez entama construyir una catedral románica pero comete l'erru d' enfrentar al Rei y tien que dexalo pa prau hasta 1088. Nesti intre ye cuando entra en xuegu'l gallu la quintana, Diego Xelmírez, que siendo alministrador de la diócesis y col sofitu del obispu Dalmacio y del xenru'l Rei - Raimundo de Borgoña - tira palantre coles obres que nun van parar n'años.
Pa 1101 el Maestru Esteban yá tien acabaes les capielles del Deambulatoriu y la Fachada de les Plateríes. Pa 1111 taben terminaos los brazos del cruceru (Xelmírez atrásala al so tiempu) y en 1128 yá s'emplegaba pal cultu.
En 1140 tán cubiertos seis tramos de les naves y en 1168 el Mayestru Mateo faise cargu de les obres (paga Fernando II ) teniendo que finar coles naves tres llevantar una orixinal cripta al tiempu qu'entama col Pórticu de la Gloria siendo la consagración definitiva del templu en 1211, reinando Alfonso IX (¡Qué suerte, xostrón; cómo te lo dexó papi! . Bueno... tu tamién punxisti lo tuyo. GRACIES a dambos) .
El Pórticu actual nun ye tal cual el de Mateo, cuando se tresnó la cabera (?) fachada barroca dalgunes figures foron retiraes y caltiénense nel Muséu Catedraliciu. (Vamos ver si cuando finen les igües actuales pal 2021 nun tenemos dalguna sospresa ....).
El Pórticu de la Gloria ye d'estilu románicu tirando a protogóticu - les figures tienen espresión - y foi realizáu por Mayestru Mateo y los sos discípulos por encargu de Fernando II de Lleón (1157-1188) que tuvo apurriendo cien (100) maravedinos añales durante venti años (1168-1188).
El Pórticu pue estructurase en tres partes: La Cripta, o mundu terrenal; el Pórticu o puerta del Xerusalén celestial y el Rosetón, que permitía la illuminación permanente d'esta ayalga.
Tres arcos de mediu puntu - románicos - cuerrespuenden con caduna de les naves de la ilesia sofitaos en pilaronos de columnes amestaes. L'arcu central (¡Ai, Dios, qué arcu!) ye doble que los otros dos de los lladrales y tien un tímpanu (¡Ai, Dios, qué tímpanu) sofitaú nun partelluz (¡Ai, Dios, qué columna!) na que descansa'l nuesu mitu ¡SANTIAGO!, la xida del nuesu viax.
********************************
(2) Al entrar na Plaza l'Obradoiru viniendo per San Francisco alcontramos, a manzorga, l'Arzobispáu o Palaciu de Xelmírez .
. El Pazu de Xelmírez o antiguu Palaciu Episcopal foi mandáu construyir pol Azbispu Diego Xelmírez ente los años 1120 y 1136. Asitiáu nel lladral norte de la Plaza l'Obradoiru, pegáu a la Catedral, namás caltién d'aquella dómina les tres puertes d'enllaz cola Basílica: Puerta los Gramáticos, Puerta de la Torre y Puerta la Tribuna. Foi mui pocu tiempu sede del Parllamentu de Galicia - hasta que pasó a la Plaza de Fonseca (1982) y darréu a la Plaza del Horru (1989) - y anguaño ta dedicáu a Muséu de la Catedral.
Xelmírez sofitó la so carrera eclesial nel mitu de Santiago y cuando por fin algamó a lo más alto consideró que'l palaciu obispal de la Plaza Plateríes que llevantaren los Reis Alfonso II (h. 830) y magar la gran ampliación d'Alfonso III (h. 880) yeren poco cosa pa elli - el promotor del Camín Xacobéu per aciu del <Códiz Calistinus> - y entamó facer ún nuevu. Tamién ye verdá que del antiguu malpenes quedare nada tres la "visita turística" d'Almanzor (998) y les revueltes de Santiago en 1117.
- Equí vienen príncipes, reis y magnates; precisamos d'un palciu que tea al altor.
. En 1180, Pedro Suárez de Deza fizo alguna reforma y nel XIII (1250) l'arzobispu Xuan Árias quixo amosar el so poderíu sobro la ciudá encargándo-y al mayestru Boneth delles igües importantes al estilu dominante francés: Palaciu + Capiella personal + Salón duplex d'usos estremaos + Turruxón, símbolu del poder temporal (manda güevos col eclesiásticu). Nos sieglos XV y XVI más reformes de los Mendoza, Fonseca y Ulloa y Maximiliano d'Austria. Nel XVIII dáse-y otra planta que conlleva camudar la fachada por una barroca que faiga de sofitu o contrafuerte.
- ¡Ai, Dios! Si'l Castu y Teodomiro llevantaren la cabeza ...
En RESUME: Tenemos un edificiu civil - de los pocos - en forma de "T" de tres plantes alliniáu cola fachada románica de la Catedral que tien accesu pola Plaza L'Obradoiru. Si pases el pórticu románicu escondíu tres la fachada barroca del XVIII darás na planta cola Sala d'Armes (1u. pisu) dividía en dos naves de cinco tramos con bóvedes d'arista sofitaes n'arcos de mediu puntu.
Sales al patiu y quedes pensatible, ablucáu, hasta que ves les escaleres invitándote a escalar. Xubes y entres nel góticu Salón de Ceremonies (2º pisu) col qu'Arias -l'obispu - impresionaba al personal: Una salona rectangular (32 x 8,40) dividía en seis tramos con bóvedes de crucería tripartita, arcos faxones y los impagables canecinos hestoriaos. Ún d'ellos representa un banquete, ¿la boda d'Alfonso IX de Lleón con Berenguela de Castiella?... De xuru que Peridis* diz que sí pero otros ven a Fernando III el Santu, el que trexo les campanes de Córdoba que nos robare Almanzor, pelegrinando cola so muyer Beatriz de Suabia. A la pitanza nun-y falta de nada: Xente sentao, de pie, rezando o bendiciendo... Comensales, sirvientes, músicos y hasta daquién llavándose les manes ... (Hai que prevenir el <coronavirus>).
* De Peridis tines que lleer polo menos esti llibru: <La Reina sin reino>, y vas saber quien ye Doña Berenguela de Castiella y reina que fuere de Lleón.
Pero .... ¿qué tán comiendo? .... ¡Empanada! ...
¿Empanada de llamprea de les preses del Sar? ..... Yo nun me resisto y voi buscar cómo se tresna porque quiero comer talo un Rei, seique sía namás por una vez.
Ferregüeyando la yacuada, dende les claves más altes, los ánxeles allumen la fiesta con un discu solar ya una lluna creciente talo fixo Mateo nel Pórticu de la Gloria. A ver si tenemos la suerte de velo cuando finemos el ¡Bon Camín!, el Camín Primitivu que nos amosó'l Castu y que nós vamos siguiendo pasu ente pasu; yá salimos Asturies, tamos en Fonsagrada, esa Fonte Santa qu'un día bien cercanu entá pertenecía al Principáu d'Asturies.
Hai otres estancies de postín talo la cocina, la sala del arzobispu Manrique (XVI) y por si fuere pocu dende los corredores pues acolumbrar los canecinos románicos de la fachada norte la Catedral.
Dente los canecinos hai ún qu'amuesa tres ánxeles sosteniendo un cartelu que reza: < VIR FIDELIS/ CORONAVITUR IN CELIS>**. Lo que te digo, badagüeyando'l CORONAVIrus... : Llavándose les manes, encamentándose a la empanada de Santiago del Padrón , rezando y ... dos músicos tocando'l "Resistriré" nuna especie organillu, el "Dúu Dinámicu" de la dómina.
** <VIR FIDELIS CORONAVITUR IN CELIS> ..." El varón (@) fiel será coronáu nel cielu".
- ¿Ves?... ¡Pal cielu !. Más claro nun pue tar.
*****
(3) A mandrecha, embocando na Plaza, tenemos un fermosu palaciu renacentista:
L'Hostal de los Reis Católicos o Parador Nacional.
L'Hostal de los Reis Católicos (XVI) reconvertíu en Parador Nacional foi mandáu llevantar por Isabel y Fernando na so visita a Compostela (1486) col envís de tener un sitiu afayaizu pa curar los pelegrinos qu'algamaben a Santiago tres facer "El Camín". Hebo qu'esperar a finar la Guerra de Granada pa ponese a ello siendo l'encargáu l'arquiteutu real Enrique Egas qu'echó diez en finalu (1501-1511) seique tevo delles reformes a lo llargo del tiempu.
La fachada ye d'estilu góticu platerescu ( namás hai dos en Galicia d'esti estilu) con portada renacentista ya una balconada barroca del XVII. En principiu tenía dos claustros góticos pero más tarde (XVIII) el güertu convirtióse n'otros dos patios barrocos quedando una planta en forma de cruz griega (4 brazos iguales) .
La fachada gótico-plateresca ta llarada d'escultures entamando poles de los Reis Católicos y siguiendo por Cristo, Santiago , Ánxeles y Apóstoles. Tampoco falten Adán y Eva, María Madalenena, San Xuan Bautista, Santa Catalina o Santa Cecilia. Pa completar esta ayalga nun falten figures fantasioses sobro les que se sofita la balconada neoclásica de Flai Tomás Alonso nin gárgoles obscenes afatando la cornisa.
A min lo que presta ye la portada custodiada por dos notables escudos de Castiella ya arriquecida por santos y mitos del cristianismu nes sos pilastres. Nel frisu, a la manera romana, los 12 Apóstoles capitaneaos por Pedro y Pablo, formando parte d'esti Arcu Trunfal. Y nel centru d'esi Arcu, sobro la pechina, ábrese'l balcón del Cuartu o Camera Real onde los Reis s'amosaben pa recibir los afalagos del pueblu, too estudiao.
*****
(4) Frente por frente - esafiante - la fachada barroca de la Catedral de Santiago hai palaciu pergrande, Pazo de Raxoi, dicen ellos. El Palaciu Rajoy ye la sede del Gobiernu Rexonal, el de la Comunidá, dao que Santiago ye la so capital asina como tamién la del Ayuntamientu. Nun se mecen: Ayuntamientu a manzorga y Gobiernu Rexonal a mandrecha; nel centru un frontón triangular pa poner orde: Santiago Matamoros (por nun dicir cristianos), dominante, na celebérrima Batalla del Clavih.o. [Podéis echa-y una güeyada n'esti blog "Camín de Niria": <Al rodíu'l Camín Primitivu: La Batalla del Clavih.o>.
Trátase d'un edificiu d'estilu neoclásicu (1776) que mandare construyir l'arzobispu compostelanu Bartolomé Raxoi Losada col enfotu de formar confesores (anda, que nun sois pecadores los gallegos). y foi llevada a cabu pol inxenieru francu Carlos Lemaur.
Pero nun creyáis que foi fácil llevantar esti edificiu tan guapu, pero otru llau ..... Nel tarrén a poniente de la Plaza taben asitiaes les cárceles, civil ya eclesiástica (tovía con eses...), asina como un restu de muralla polo que'l Ayuntamientu reclama la parte de so y presenta otru proyeutu ... Seminariu confesores, colexu pa los guajes del coru, cárceles ¿ y por qué non un Ayuntamientu nuevu? .... Como yéremos poco "parió la güela" y los vecinos d'al llau, los del Hospital (Hostal R.C.) de Pelegrinos ponen el gritu nel cielu:
- ¡Eh, quieto parao! ... Tas metiendo'l focicu en casa ayena. Esi tarrén ye l'antoxana l'Hospital; ye de nueso, ¡polvo!.
Nin Santiago s'acampaba con aquella triba; hebo que llamar a Capitanía y hasta la mesmísima Real Cámara; sicasí tuvieren qu'invocar a Salomón: Seminariu a mandrecha, Consistoriu a manzorga y los Cuartones nel mediu, por si a acasu, con Santiago Matacristianos nel cumal del frontispiciu. Eso sí, cuando se punxeron manes a la obra .... Nun hai como los gallegos pa trabayar la piedra; ente 1766 y 1772 taba fechu. (Yo toi viendo al nuesu Rajoy, sentáu sorriente na escalinata la Catedral, ensin dicir nin "mus" y viéndoles venir ... <Yá sabía yo que me lo dibeis iguar; h.e, h.e >).
La verticalidá de la fachada catedralina contrasta colos 90 m. d' horizontalidá del Palaciu Raxoi, un edificiu neoclásicu afrancesaú con téuniques italianes onde destaca la enorme portalada (loggia, italiana) con sillares a tizón y arcos adintelaos o de mediu puntu que sofiten los dos cuerpos del edificiu engalanaos por bayura de ventanales rectillínios que dan prestancia a un bloque tan monolíticu. El frontón triangular fai alcordanza nel tímpanu de la "Batalla del Clavih.o", asina como'l Santiago Guerrilleru la picalina, son talo'l puntu de fuga d'arcada y galeríes. El frontón foi diseñu de Ferro con mano d'obra de José Gambino ( el que nació en Faramello) y J. Ferreiro.
Completen esta ayalga un áticu balustráu que cubre tol segundu pisu asina como dos frontones circulares nos lladrales .
La parte d'atrás ye dalgo más cenciella con un patiu central y dos bloques prismáticos nos lladrales y les cárceles nos baxos. De los represaliaos qu'hebo equí na Guerra'l 36 val más nun alcordase, nun vayamos cafiar a Santiago.
*****
(5) L'últimu monumentu del que podemos esfrutar na Plaza ye'l Pazo San Xerome o Palaciu de San Jerónimo onde anguaño reside'l Rectoráu de La Universidá de Santiago (1980) foi llevantáu nel XVI como Colexu Universitariu y desendolcó munchos años el llabor de Colexu Mayor hasta 1840 y tamién d'Escuela de Maxisteriu.
Ye obra llevada a cabu pol bon facer del arzobispu compostelanu Alfonso III de Fonseca (1475-1534) que s'empeñó en que los estudiantes probes, artistes y artesanos tuvieren un edificiu dignu y sacalos del Hospiciu de l'Azebachería, que tamién dependía de los Fonseca. Tevo'l gustu de treslladar la portada románico-gótica del Hospiciu al nuevu edificiu asitiáu na zona meridional de la Plaza l'Obradoiru.
************************
¡¡¡¡ SOR...PRE...SA !!!!
[[ Esto nun tenéis que cunta-ylo a naide, eh .... ¡Psssssss! ..... Ye un secretu ente nós ....
Cuando'l Guía, Gabriel, terminó la función - y nun lo digo pola serenata del gaiteru catedraliciu - invitónos entrar na Catedral pa ver un poco cómo diben les obres, d'esta miente comprenderíemos porqué nun se podía fer una visita en toa riegla. Yera al nuesu llibre albedríu: entrar per una puerta y salir per otra que daba, xustamente, a la tienda souvenirs. El casu ye nós nun tábemos dimpustos a salir del Obradoiru ensin chisbar un pocu aquella ayalga.
Yo nun te pueo desplicar cómo .... Taba escuro, llarao d'andamios ya obreros, dimos vueltes, xubimos y baxamos escaleres y dimos con un pasiellu onde una verxa fierro nos torgaba'l pasu .... Al fondu, allumada por una lluz sele y misteriosa, talo tuviéremos nuna cripta ....
- Mira, ¿qué ye aquello?
- Asemeya la Caxa de les Ágates de la Catedral d'Uviéu ...
- Tu, esvaries, como siempre....
- Nun va ser L'Arca Marmórica ....
- ¡H.a, h.a, h.a! . De vez en vez peor... Colo calladino que lo tienen .... Tu tas tochu dafechu, nin.
- Bueno yo voi tomar una semeya ....
- ¡¿Qué faes, fatu?! ¿Nun t'alcuerdes que Guarda dixo que <de fotos nada>?
- Yá t'oyí, navaya ... Yo nun sé si ye o nun ye l'Arcis Marmoricis, pero por si acasu ... Llevo un añu esperando esti momentu y tu quies arruiname la vida .... Xacobu tien de llibrame del peligru, sabe bien l'enfotu que tengo nél.
- ¡Quita'l flash, polo menos! ...
- Y tu echa una güeyada por si'l Guarda anda cerca ....
- ¿Nun pues esperar que terminemos el <¡Bon Camín!: El Camín Primitivu >, que pa entós yá tarán les obres iguaes?
- Yo podría, pero Xacobu non; sé que quier veme. Cuido que tien un menxás pa min talo que yo pa él. Cuando tornemos la próxima vegada sedrá pa da-y les gracies por tenese cumplío.
- ¿Y yo voi poder conocelu?
- Nel momentu afayaizu; en cualisquier casu tu sabes bien que nós namás tenemos un pruyimientu, nun fai falta ser mui llistu p'aldovinalu ...
- Val, tira la semeya mientres yo m'encamiento al Apóstol (y a la misericordia del Guarda).
Yo nun sé si ye o non pero voi busca n'Internet, por si fuere, a ver qué alcuentro al rodiu l'Arca Marmórica pero nun pienso camentalo agora, eso déxolo pa cuando tengamos fecho'l <¡Bon Camín!>. Siéntolo por ti, collaciu, pero preciso informame bien, conocer de cabu a rabu tola HESTORIA qu'arrodia al Apóstol, aquel pescador del llagu Tiberiades, fíu de Zebedéu y Salomé, que tevo la suerte de participar nel fechu más trescendental de la hestoria de la humanidá: el ñacimientu del FÍU DE DIOS.
El <El Breviarium Apostolorum> , un llibru que s'escribió nel sur de Francia o'l norte d'Italia ente'l sieglu VI ó VII y que cuenta la vida los apóstoles darréu l'Ascensión del Señor cuenta onde foi destináu cadún d'ellos a predicar la <Bona Nueva>. A Santiago tocó-y España y diz que <llegó a predicar nes tierres más occidentales d'Hispania> ... San Isidoro, Beato de Llébana o Aldhelmo de Sherborne asina lo piensen. Tamién cuenta'l Breviariu que < foi enterráu un 25 de Xunetu nun "Arcis Marmoricis" > ... Nada màs asemeyao al pequeñu recintu funerariu onde aprució, decapitáu, el posible cuerpu de Santiago... Sufrió esti Arca munches reformes asina como la catedral pero elli sigui ellé, nel mesmu sitiu onde Alfonso II y Teodomiro tomaren el determín d'asitialu, nel prebiteriu la ilesina prerrománica.
ANEXU I: < SANTIAGO MÁXICU>
Tarde del Xueves 12 de Marzu de 2020.
Na tarde del Xueves, tres algamar na mañana a Santiago dende Milladoiro y dar por terminada la Etapa <PADRÓN-SANTIAGO> ficimos otra visita a la ciudá del Apóstol. Esta vegada nun se trataba de conocer monumentos d'altor seique restolar peles cais de la villa - acompañaos por una Bruxa de verdá- pa rescatar dalgunos llugarinos d'esos que ves de pasada pero malpenes repares nellos. Namás te voi dexar una pincelada porque fechizáu como andaba nun acerté a tomar bona nota de la bayura d'embruxos qu'acorropina esta Santa Capital magar el gran enfotu que la Bruxa Ana punxo nello (siéntolo abondo, Meiga Ana). Si nun acierto a plasmalo nel papel ye por mor del plasmu qu'entá caltengo, farda mía, dende llueu, pero ... dalgo m'alcuerdo ...
1) CRIME de la CAI BALCONADA.
La casona balustrada y con xardín qu'anguaño acueye'l Vicerrectoráu de la Universidá tien una lleenda mui prieta.... Falen del asesinatu del Arzobispu Don Suero...
Too vien de la dómina de Pedro I, el Cruel, cuando andaba a la tema col so hermanu Enrique II Trastamara, qu'a la fin foi'l que ganó . Partícipes d'esti entueyu son les lluches de poder por mor de la obispalía de Santiago ente les cases nobiliaries de los Deza-Churruchao - que taben con Pedro - y los Berenguel Landoria que saltaben por Enrique - terminaron cola muerte d'un Churruchao.
(Bona la ficimos ...). Paez ser que don Suero Gómez de Toledo, que fuere capellán de Pedro, pasóse al bandu d'Enrique y un día apaeció muertu (1366) xunto col Deán na mesma Catedral, si bien la lleenda popular asitiólo nesta cai qu'hebo de presllase un tiempu y ser rociada con sal.
La lleenda popular - mui granible - atribuyó la farda a los amores del preláu con una dama d'alta castra.
2) La Ilesia Santa María SALOMÉ
Na Rúa Nova, una de les cais emblemátiques de Santiago, n'ampliación del burgu compostelanu,
hai una ilesia con traza románicu-barroca que ta dedicada a una muyer, la única, a María Salomé. ¿Quién ye María Salomé?.... Ye la ma de Santiago Zebedeo, l'Apóstol que vieno predicar a Galicia y que ta sapozaú na Catedral, la xida de tola historia Xacobéa. Salomé - madre tamién del Apóstol Xuan - ye prima de la Virxe María y acompañóla nel tránsitu de la Cruz.
Mandada fundar nel sieglu XII (1140) pol chantre Pelayo Abad nos caberos tiempos del mecenes Xelmírez - ¿cómo se diba mover un deu ensin cuntar con él?- entá caltién nel pórticu (XVI) restos de la portada románica de triple arquivolta onde s'aprecien unes escultures de calter célticu - lo celta ta mui presente en Galicia - de la Virxe embarazada y la Virxe de la Lleche.
La ilesia ye de planta cuadrada con brazos pequeños sofítaos n'arcos de mediu puntu. La cúpula tien forma media naranxa y ta lladada d'escudos. Nel sieglu XVIII llevantóse una torre-campanariu (barroca) asemayada al del Monesteriu de San Fitz de Solovio.
Quixo la casualidá que n'esta ilesia morriere de sutrucu Mª Teresa de la Cruz, la ma de Rosalía de Castro.
Dio pa muncho esta Ilesia, colos temes celtes y los rituales pa la fertilidá nes cames de piedra o los baños durante 9 díes pero a min lo que me más me prestó foi lo de dir a la Playa La Lanzada, porque si ehí nun algames que quede embarazada .... Namás te queda la Santina, fíu.
Salió hasta la Santa Compaña (La Güaxa) y cómo pues llibrate d'ella si l'alcuentres: abrazándote a un cruceru o zarrándote nun círculu onde faes el signu de la cruz.
*******
3) <RESTAURANTE ASESESÍN>
Paseamos pel delantre la Plaza la Universidá onde ta la Facultá de Xeografía-Hestoria ( ellí mesmo podéis ver la estatua d'Alfonso II, el Castu) y salió a cuentu'l célebre "Mesón de Bernardo y Esperanza" conocíu como "Restaurante Asesino" . Lo qu'entamó por ser un cenciellu comedor terminó por ser un iconu la ciudá; equí xintaron Alfonso XIII (esti taba en toes), Ramón y Cajal, Torrente Ballester, Unamuno (conociendo la intrahestoria la ciudá) ...
Paez ser que nel añu 1873 (Amadeo de Saboya taba pensando en colar) una pareya cosecheros de vinu d'Orense vino instalase a Compostela, frente la Universidá, pa introducir el so caldu na ciudá. Cuando los profesores intentaron compra-y el Ribeiru el dueñu arrepostió-yos:
- Equí nun se vende vinu, regálase.
D'esta miente foi'l chigre garrando clientela mientres tomaba les tacines con quesu y xamón. Al poco los mesmos universitarios foron demandándo-yos un menú diariu; y asina entamó too ... ¿Por qué el nome d' <ASESINO> ? ....
Tando un empleáu matando un pitu delantre'l chigre esmucióse-y de les manes y echó andar dando les boquiaes escaleres arriba pela universidá. ¡Menudu baturiciu!. El gallu esnalar, el mozu embelar y los estudiantes torgando-y el pasu coles capes pa que nun lu pudiere prindar ....:
- ¡Asesín, déxalu vivir! .
Tantu enfotu punxeron unos ya otros que'l gallu terminó afogáu; d'aquella p'acá quedó-y el nome al chigre sobremanera depués qu'un estudiante tuvu l'aciertu d'iguar un dibuxu del affaire que quedó como'l logotipu del restaurante.
****
4) La CASA de la TROYA
De la Plaza Marzadelos y La Universidá, darréu intentar salvar el gallu, empobinamos pela Cai Preguntorio :
- ¿Ónde ta la "Casa de la Troya"?
- Pasáis la Plaza de Cervantes, entráis na Cai de l'Acibechería y yá dais colo Rúa de la Troya.
<La casa de la Troya> ye una novela del escritor español V. Alejandro Pérez Lugín (1870-1926) ambientada na villa de Santiago que tuvo un éxitu mui bultable nel momentu que la escribió (1915).
Trata d'un estudiante universitariu, Gerardo Roquer, al que so padre unvía a Compostela porque nun había otra más alloñada de Madrid, ciudá que conocía perbién sacante les aules de la Universidá.
De mano tomólo como un castigu -y yera - pero los collacios de la pensión - <La casa de la Troya>- y l'ambiente, cais y monumentos d'una ciudá pequeña y candial ficieron camudar d'actitú convirtiéndolu nun bon estudiante. Por si fuere poco Carmiña asoleya la so vida con un amor tienru y melgueru como namás una gallega sabe tresmitir. ¡Salváu!.
***
5) <ROSAMANTA>
Nun termináremos la llección y yá taba la Guía Ana metiéndonos el mieu nel cuerpu cola hestoria ROMASANTA, un home llobu, vendedor ambulante y <sacamanteques> (chupasangre o home del sacu) de verdadera profesión que fizo esapaecer más de 13 muyeres al paecer pa saca-yos el sebu que llueu vendía pelos pueblos.
D'esti coño d'histories entá m'alcuerdo yo cuando guaje. Col envís que nun nos alloñáremos muncho de casa siempre te cuntaben les histories del "Chupasangre", "el Sacamanteques", la "Paparosoria", "l'Home del sacu" y la madre que los parío ... (Como si nun tuviéremos bastante coles hestories de la Guerra 36 ...)
El casu ye que Manuel Blanco Romasanta foi xulgáu n'Allariz en tiempos de Sabel II y terminare condergáu a muerte pero'l psicólogu consigue-y l'indultu por ser l'únicu casu conocíu n'España de "licantropía clínica" (home qu'actúa como l.lobu) y merecía la pena ser estudiáu.
*******
6) < ¡¡ MEIGAS FORA !! >
Y yá metíos en farina la Guía Ana fálanos un poco d'esas muyeres gallegues - y asturianes - que la xente conos como Bruxes o Meigues cuando en munchos casos nu foron otro que sanadores o curanderes de la xente probe que nun teníen medios p'acudir a bon doctor. El casu ye que munches d'estes muyeres - a vegaes tamién homes, pero a estos mirábaselos con otru aquél - llegaron a algamar un padremoñu considerable por agradecimientu al so bon facer.
Como la envidia ye mala conseyera na dómina del santón Felipe II, por exemplu, foron atacaes pola inquisición p'arrampla-yos colos sos bienes y yeren obligaes hasta facer "ordalíes" (caminar penriba d'un fueu) pa demostrar la so inocencia. (La madre que los parió). En Santiago esta "caza de bruxes" tenía llugar nel Monesteriu de Samartín Pinariu (Esti Monesteriu dio pa too).
......
<< Eu non creo nas meigas pero habelas, hainas>>
Doi fe dello. N'Asturies conozo delles Bruxes y en Santiago vengo d'alcontrar un par d'elles, de Meigues, camiento yo. De les primeres nun quiero falar; cuéntase d'elles que si faen tratos col Diañu, que si monten n'escobes voladores p'allegar a los aquelarres, que si echen mal de güeyu, o te lu quiten ... Yo traigo conmigo una cigua d'azebache por si acasu ... La cultura popular trata d'estremar unes d'otres : Que si les Bruxes son más de caleya y les meigues más caseres; que si les primeres son más males y les segundes más buenes ... Nós conocimos dos en Santiago y saliéronnos redondes: La Meiga Ana, que puso tol enfotu en cuntanos la intrahestoria* de Santiago y la Meiga del Mesón (que del so nome nun soi alcordame, ¡perdón!, por quedar embaecíu) que nos enseñó a iguar una queimada y a ¡tastiala!.
*Intrahistoria: Pallabra inventada por Unamuno - que conocía bien Santiago - asina que nun la toca nin dios.
Apagó la lluz del cuartu. Virtió oruxu nun cacíu de barru cocío que punxo a calentar al fueu qu'ella mesma entamó tres prender con una cerilla una cucharada d'Acua vitae... Foi echando azucre y revolviendo ... Tamién echó cachinos de mazana, gayos de naranxa ya unos granos de café....
(Si amestó daqué embruxu yo nun fui a decatame). De xemes en cuando prebaba con una garfiella de barro a ver si taba nel so puntu ...
Como pidió voluntarios pa iguar la bendita "bébora" yo nun punxi torga alguna (Per otra parte yera'l más dispuestu, claro, que pa eso soi de La Rebollá) .
Cuando consideró que'l alcohol perdiera virulencia (a estes edaes nun tamos pa goles de Panenka) sirviónos la melecina nunos vasinos de barru (dalgún quedó con él, mal fecho. En cualquier casu valía más que lu incluyerais nel preciu). Y tres lleer toos xuntos l'esconxuru brindamos al gritu de :
¡Meigas fora!
Yo quedé como nuevu, y hasta repetí. Y colamos pal Hotel más contentos qu'una rosa tres recibir l'esconxuru direutamente d'una MEIGA. Toi benditu, a Santiago quèda-y poco que trepar conmigo.
¡ Ah!, escaecíame .... Paramos pel camín pa mercar dellos productos de Galicia en <Casa Cotón>. Nós traximos delles caxes de Santiaguiños (algunes nun les pude repartir por mor del <coronavirus>) ya una botellina d'oruxu por si pinta tresnar una queimada pa ver lo aprendío.... Agora que ta ún tan enfotáu nes meigues ...
< L'ESCONXURU >
[ Uxos, curuxes, sapos y bruxes. Con esti sacu llevantaré les flames
Degorrios, trasgos y diaños d'esti fueu qu'asemeya al del Infiernu
nubeiros de les ñevaes vegues. y fuxirán les Bruxes a caballu
Cuervos, sacaveres y meigues de sos escobes, diéndose a bañar
fechizos de les curanderes. a una playa de sable gordo.
Podres tueros güecos ¡Sentíi, sentíi, los bramíos
llar de viermes y alimañes que dan les que pa nada puen dexar
lluminaria de les Guaxes de quemase n'àguardiente
agüeyu de prietos fechizos quedando ansí purificaes.
fedor de muertos, troneres y rayos. Y cuando esta bébora baxe
Agullu del perru, anuncia de la muerte pelos nuesos gargüelos
focicu de sátiru y pie del coneyu. quedaremos llibres de los males
Pecadora llingua de mala muyer de la nuesa alma y de tou embruxamientu.
casada con un home vieyu. ( A ver ...) (Y quedamos, chachu).
Erebu de Satán y Belcebú Fuercies del aire, tierra, mar y fueu,
claror de les cadarmes ingrientes . a vosotros faigo esta llamada:
Cuerpos tullíos de los indecentes, Si ye verdá que tenéis más poder
peos de los infernales culos, que la xente humano, equí ya agora
ruxíos de la mar embravecía. facéi que los espíriritus de los collacios
Barriga inútil de muyer soltera que tean fuera, pàrticipen
falar de gatos col rixu al altu la lleva, con nosotros d'esta Queimada.
guedeya puerca de la cabra mal nacía. Torna: Selmo
< La bona Meiga alza entós la copa
y brinda colos chic@s del IMNSERSO
<¡Meigas fora!>
(Y yo digo pa mios íntimos adientros:
¡TORNAREMOS!>
ANEXU II: <EMPANADA de LLAMPREA>
La empanada de llamprea ye un de los típicos bocaos de Padrón y dalgún sitiu más de Galicia, pero tampoco hai munchos. Nesta villa romana (Iría Falvia) hai delles "pesqueires" nel Ríu Sar (afluyente del Ulla) pa poder pescales asina como artes estremaes:
Yá sabes que la llamprea ( Petromyzon marinus o Hyperoartia) ye un pexe agnatu, ensin quexal (mandíbula), d'esqueletu cartilaxinosu, que respira per 7 pares de furacos nos lladrales la cabeza pos escarecen d'agalles. Vive - ye un fósil viviente - dende los tiempos de maricastaña (500 Millones d'años) nel Mar llegando hasta'l de los Sargazos (qué bien te lo pases, bribona; córresla más que la <Madreña Caleyera>) y tornen a esgüevar nos ríos onde ñacieren (talo'l salmón) faciendo una cama ente la grava d'una corriente sele. Los "ammocetes" - guxanos - pasen dellos años viviendo ente la basa del ríu alimentándose por filtración de materia orgánico y microorganismos. Darréu, estes viérbenes, pasen un tiempu de tresformación ensin prebar bocáu hasta qu'emigren al mar o llagunes alimentándose del sangre o texíos d'otros pexes per aciu de la so ventosa bucal con una llingua dentada que caltria no que pilla. Tres dos o tres años marinos d'alimentación sangrina (hematófoga) tornen a esgüevar al ríu onde nacieren y ye cuando s'aprovecha pa pescalos.
Pos con estos "bichos" casi dinosáuricos de focicu achapláu pue iguase una empanada y d'esta miente llevar la comida d'un sitiu pa otru; ¿por qué non a la fiesta del Parrandeiru en Santiaguiño do Monte?. ¿Intentamos saber cómo la igüen, por si acasu?... Perdimos una bona ocasión esti sábadu de Pascua, cuando ye tradicional, pero'l <coronavirus> matónos. Nun mos desanimemos, vamos a ello:
. Ingredientes:
1). Una LLamprea 2). Dos cebolles 3). Tres dientes d'ayu
4). Una copa vinu tinto (o dos, la 2ª p'animar)
5). Sal y pimienta 6). Un par de fueyes de lloréu.
7). Un cachu pan duro. 8). 1/2 kilu fariña
9). 30 gm de formientu (lleldu) prensao y fresco.
10). Más sal.
11). Un pocu aceite, diría yo.
. Desendolcu (a pasiquinos):
1. Tresnar la masa: Dilir el formientu con un pocu d'agua tibio ya una cucharina sal al tiempu que vas echando la fariña, pasu ente pasu, hasta tresnar un bollu consistente. Párteslu en dos cachos, tápeslos con un pañu amoyecíu o papal film y póneslo a reposar en sitiu frescu separtao de les corrientes hasta algamar qu'aumente otru tanto.
2. Iguar la llamprea: Escaldes la llamprea y quítes-y el pelleyu con un cuchiellu, por exemplu. Darréu sáques-y les tripes faciendo un corte na barriga, cortes la parte d'arriba la cabeza y cuésguela boca abaxu pa recoyer el sangre nun cazu (equí nun se pierde nada) onde yá echáremos el vinu d'antemano. Cuando dexe de sangrar vas cortando la llamprea en tacos o rodaxes como de 3 cm; guardes el fégadu y pones tol procuru en dir apartando l'espinazu que ye talo tripa blanco.
3. Ponelo a morcar (macerar) tola nueche con un ayu, cebolla, sal y pimienta. Al otru día sacar, secar, enfarinar y freir les rodaxes hasta que tomen un colorín prestosu.
4. N'otru sartén aparte pones a rustir (rehogar) l'ayu cola cebolla y cuando se torne tresparente amestes les rodaxes de llamprea que van cubrise col sangre y vinu del amugue (maceráu) dexándolo cocer hasta que la salsa, reducío, amazacute. Rusties aparte'l pan y el fégadu, tritúreslo y améstelo cola salsa del morcáu hasta que lliguen.
5. P'ARMAR la empanadada cueyes los bollos fermentaos y estíreslos. Ún poneslu na base del molde tres espolvoriar un pocu fariña. Enriba viertes el rellenu la llamprea sobro la base y tapes col otru trozu de masa fermentao. Zárrase la empanada con procuru teniendo la picardía de facer un buracu nel centru pa que pierda'l vapor. Coles faraguyes que sobren de la masa pue ornase la empanada. La mio prima Violeta píntala con güevu batíu pa que cueya color.
NOTA: Collacios, dexo al pendiente el tresnar una empanda ( nun podrá ser de llamprea, claro) qu'amosaré la próxima vegada pero nesti tiempu raru del COVID que nos tocó vivir fóiseme imposible alcontar el lleldu pa la masa. ¿Tais toos amasando en casa, h.odíos? ... Un ABRAZU
ESTIMANCES:
. Gracies al Estáu Español, y al IMSERSO en particular, por financiar en bona parte estos viaxes tan prestosos, otramiente munchos de los xubilaos nun podríemos facelos.
. Gracies al Hotel Congreso por agospianos y pol afalagosu tratu recibíu. SUERTE.
. A la nuesa Guía, la letible Susana, pola so paciencia y el tratu tan candial que tien pa colos "mayores" asina como al chófer Jaime, que conduz como los ánxeles. MILENTA MIL GRACIES.
. A los Guíes Gabriel y Ana asina como a la Meiga que me salvó del "coronavirus" por mor de la queimada. (Chisco güeyu).
. A los allegres compañeros de viax - madrilanos y asturianos - que tuvieron un comportamientu de primera.
. A Don Gonzalo Rivero d'Aguilar por amosanos con tantu ciñu un finxu del Camín Xacobéu como ye'l Pazu "O Faramello" , territoriu que fuere de la Reina Lupa, per onde pasaren los restos del Apóstol camín del Arca Marmórica (S. Compostela): Una ayalga histórica nun llugar máxicu. Y gracies pol vinu y la fardela.
. A Don Manuel Garrido pol so llibru :<Guía de Padrón>, prestosu de lleer y que tanto nos aportare pa poder escribir esta hestoria.
. A ALFONSO II, el Castu (760-842), Rei d'Asturies, Galicia y norte d'ESpaña. Na so dómina tevo llugar l'afayu del sepulcru de Santiago, l'Arca Marmórica, nel Monte Lliberdón, siendo Teodomiro l'Obispu d'Iria Flavia. Alfonso foi'l <Primer Pelegrín>, que saliendo d'Uviéu llegó hasta Santiago onde mandó construyir una catedralina prerrománica p'abellugar el cuerpu incorruptu y decapitáu de Santiago.
GRACIES Rei Alfonso; tu inventasti <El Camín Primitivu>, el mio <¡Bon Camìn!>
. A Wikipedia, pola bayurosa información que nos apurre de contino. ¿Qué sedría de min en sin ti? Gracies.
. ¿Y la Xacopedia, de la que toi tul día tirando de la teta? ... GRACIES.
. A Eroski Consumer, que nos guía pel <Bon Camín> y nesti casu nel <Camín Portugués>.
. A dellos blogs, talo: <arteguías.com>, <Parquefluvialdesantiago.org>, <santiagoturismo.com>,<elrinconpoliticamenteincorrecto.blogspot.com>. <A la web del Ayunyamientu de Santiago>. A<obrador delalamprea.com>. A <MiguelPesca>, que m'enseñó delles artes de pescar y cocinar; toite bien agradecíu, chaval.
A <taringa.net>.
. A Rosalía qu'espubliza la so receta d'empanada de Llamprea en <cookpad.com>.
. Y por último -¿? - a Xacobu'l Zebedéu, al que la xente conoz como SANTIAGO, que camudó les redes del Llagu Tiberiades polos cucios veleros qu'engalanaben la Ría d'Arosa; el mariscu gallegu y la llamprea tiren tanto que tres tornar a Xerusalén y ver el martiriu venir camentó colos sos discípulos:
- De poder ser enterráime en Galicia.
Les negociaciones cola Raíña Lupa pa nada nun foron fáciles de mano pero ¿hai daqué imposible pal nuesu Santu: Xacobu?.... Gracies a él tamos toos equí. Dende'l ciñu pola Raíña Lupa :
¡Viva Galicia! ¡Puxa Asturies!.
- Esti camín que tais pisando ye'l verdaderu Camín Xacobéu, per equí pasó'l cuerpu de Santiago camín de Compostela pa ser enterráu nel Arca Marmórica.
- ¿Queda cerca'l Castru Lupario?
- Tais delantre d'él. ¿Nun ves eses muries de piedra?... Son les llendes del Castru. Ehí vivió la Reina Lupa qu'a la fin foi la qu'andechó col treslladu de los restos hasta Santiago.
Yo nun podía creyelo, ¡taba delantre l'adebecíu Castru Lupario! . Tuvi a piques d'alquilar un taxi'l llunes que llegamos p'averame hasta elli y .... ¡Teníalu delantre mio!.
- Andamos en tratos colos ayuntamientos a ver si torna pasar otra vuelta per equí pero tienen que cumplir con delles condiciones imprescindibles.
Yo rezo pa que s'arregle, tanto'l pasu pel camín como la igua del castru que ta medio abandonáu; fáiseme imposible: ¡un finxu xacobéu d'altor escaecíu de la mano de Dios! .
Na Casona-Palaciu entramos; nun podemos dar fe porque nun ye conveniente explayar los muebles sabelinos, los tapices flamencos o les lámpares de cristal de Murano, ayalgues adebecíes por ciertos cacos.
 |
| El CARRU la TRASLATIO Con esti y un par de gües llevaron a XACOBU a Compostela |
Vimos más coses y ficimos más semeyes: fontes, molinos, horros, camelies, carbayos, carros y cadenes .... A la fin entramos n'antigua Bodega onde l'anfitrión nos convidó a un vinu y nós aprovechamos pa mercar una botellina d'oruxu, acua vitae pal nuesu cuerpu rendíu.
Xusto al cruciar una riega un campu plantáu de carbayos xóvenes recuerdanos una traxedia d'autobús reciente, pero val más pensar en positivo. Al salir pa dir coyer l'autobús de vuelta vimos los cartelos anunciando la xubida al Castru asina como una célebre Ponte Medieval de piedra; pa otra vuelta.
********************************************
(3) Xueves, 12 de Marzu de 2020 :
<< O MILLADOIRO - SANTIAGO COMPOSTELA (8 KM)) >>
 |
| Ferregüeyando SANTIAGO COMPOSTELA dende "Agro dos Monteiros" (O Milladoiro) (seguramente) |
O Milladoiro ta allugáu nuna llomba dende la que pues acolumbrar la Catedral ya una parte importante de Santiago, ye un MIRADOR, milladoiro, como dicen per equí.
Otros, humildense énte la visión tan impresionante que se tien de Santiago: humilladoiro, y hasta se ponen de rodiyes pa echar una oración (Nós nun nos arrodiyamos pero rezar .... Algún Santu nos tien de sentir) .
 |
| - Venga, chaval@s, yá queda poco |
San Xosé d'O Milladoiro ye parroquia independiente dende 2009 en que s'estremó de Santa María de Biduído. Tien cerca de 900 habitantes y, rara avis, con abundancia de neños, a los que se tienen dedicaos dellos parques (importantísimo curiar esti personal). Ye normal teniendo en cuenta que les pareyes moces vienen vivir equí, mui cerquina la capital, porque les viviendes son más barates.
Esti pueblu fízose célebre en 2011 por mor del Códiz Calistinus, cuando fuere robáu de la Catedral y guardáu nun garaxe d'esta llocalidá (Vaya,ho; guapa enseñanza pa los guajes).
**************************************
 |
| Cruciando la Ponte Vella, sobro'l Sar |
Santiago a tiru flecha; fáltenos dos kilómetros y mediu (2,5 km).
***********************
 |
| Petroglifos del Castriñu de Conxo (Semeya: Lansbricae. Wp) |
Nel sieglu XII (1106-1129) Diego Xelmírez manda construyir un Monesteriu (anguaño Hospital Psiquiátricu), hasta con piscifactoría, onde había una ilesia prerrománica fecha una triste llaceria de manera tala que tola vida xiraba al rodiu de so, como ye de suponer.
En 1835 (Desamortización M.) Conxo queda constituyíu como municipiu independiente pero en 1921 ye anexáu al conceyu de Santiago; tamosfalando d'una dómina onde mangoniaba'l el caciquismu ( los alcaldes nomábense a deu) col que nun pudo acabar l'Estatutu Municipal de Primo de Rivera (1924).
 |
| Banquete de Conxo (Jorjum. WP) |
Seique ye un barriu periféricu sigue calteniedo esi aldu rural tan candial. D'equí salió'l primer tren de Galicia camín de Carril en 1873 pero antes, en 1856, reinando Sabel II, tevo llugar nesti barriu un casu mui célebre naquella dómina: <El Banquete de Conxo> : [Orde y Fraternidá]
El 2 de Marzo de 1856 aprovechando les boquiaes del Bieniu Progresista (1854-56) y coincidiendo cola honomástica - décimu aniversariu de los Mártiles de Carral* - los estudiantes, obreros y artesanos compostelanos ficieron una espicha - nun Belvedere de les afueres de Conxo - colos papeles cambiaos: "los ricos estudiantes yeren los sirvientes de los humildes obreros": Pasáronlo de P.M. pero a la sociedá tresnuechada compostelana papiaba-y el culu:
- Esto nun se pue aguantar. Estos mamarrachos con eses perrares idees socialistes van acabar col orde establecíu, la familia y la propiedá.
- ¡Espartero dimisión y O' Donnell al sillón!
Qué remediu, el tinerfeñu O'Donnel entamóla a cañonazos col Congresu y Espartero - esperáu y aclamáu por pueblu español - sacó'l culu, abandonó la llucha y retiró a fer vinu a La Rioh.a, d'onde yera la muyer.
- Nun quiero acabar cola Monarquía. Siempres fui y sedré fiel a la Reina (Sabel II).
(Tamién ye verdá que cuando años más tarde-y propusieron ser Rei negóse dafechu.).
*Los Mártiles de Carral ... Durante la "Década Moderada (1844-54") del reináu de Sabel II unos militares gallegos qu'alzaron escontra'l Presidente Narváez por demasiao conservador ( recorte de les llibertaes y una centralización afogante) terminaron fusilaos: Doce, capitaneaos pol coronel Diego Solís y Cuetos.
 |
| Bien cerquina d'esti parque, nuna viesca a la vera del Sar celebróse'l Banquete de Conxo: [Orde y Fraternidá] |
*****************************************
 |
| "Les dos Maríes", de César Lombera. |
Vamos fer el paséu trunfal peles cais d'ún de los tres finxos del cristianismu medieval:
Santiago de Compostela; los otros yeren Roma y Xerusalén.
Rua Sánchez Freire, cai García Prieto, Avenida Villagarcía d'Arousa qu'emboca na saudade Rosalía de Castro que da pasu Xuan Carlos I. Agora caleyamos pel Parque l'Alameda onde podemos contemplar una de les estatues más célebres de la ciudá: Les dos Maríes, de César Lombera. Tán guapes, les h.odíes, con esos collorinos tan llamatibles.
 |
| Porta Faxeira, la nuesa entrada camín del Obradoiru |
- Ehí ta la Rúa do Franco y paralelo a ella la Rúa do Villar onde s'alcuentra la Oficina de Turismu. ¿Qué tal si tomáis daqué nel Bar Cestaño mientres recueyo un poco información de la ciudá, too ye poco pal blog.
Cuando torné pasando pela céntrica Plaza do Toural, con una fargatada de mapes, ellí taben les dos santes - Guía y Parienta - reponiendo fuercies con unos pinchos d'impresión. Yo alpunteme al carru, como ye de suponer:
< Comer y arrascar namás consiste n'entamar>.
 |
| Praza do Toural, centru d'alcuentros Al fondu los arcos de la Rúa do Villar |
Pela cai más animada de Santiago, la Rúa do Franco, vamos algamar la PLAZA del OBRADOIRU siguiendo les torres de la so imponente CATEDRAL. L'Apóstol ta invitándonos entrar per aciu'l Pórticu de la Gloria. El coral ta valtiándonos a un ritmu esmoleciente ... Curiao, manín, que nun ta elli pa munchos trotes ... Pero vamos enfotaos; sabemos que'l Santu ta con nós y güei nun nos pue pasar nada que nun sía daqué glorioso. Son munchos los meses que llevamos esperando esti momentu. Colo que nun cuntábemos (poco previsores) yera colos andamios por mor de les obres de remocique por aciu l'Añu Santu Compostelanu que ta al cayer, en 2021. Sentamos nel "Kilómetro 0" de la Plaza , talo dellos pelegrinos que tres munches xatonaes algamaben a la so adebecida meta, y echamos una güeyada a los principales edificios de la Plaza: La Catedral, el Palaciu o Pazu de Raxoi (Gobiernu Rexonal), Hostal de los Reis Católicos ( Parador Nacional), el Palaciu Xelmírez (Arzobispáu) y Colexu San Xerónimu.
Podemos dicir que la caminada prevista : <Padrón-Santiago Compostela> dase por finada pero entá nos quedaben dos sorpreses pa pone-y la espuela: "La visita guiada al cascu vieyu" y el "Santiago Máxicu" pa conocer la intra-hestoria la ciudá. Eses cuntámosles darréu, agora vamos implorar esta
< Oración al Apóstol >:
 |
| <Santiago pelegrín >, escoltáu polos sos discípulos más fieles: Teodoro y Anastasio. <- Como nun nos enfresquéis ceo nun llegamos pal Añu Xacobéu> |
< Enaltemos al Apóstol
con canciones y piedá
que les almes güei respiren
una gayola ensin par.
Dende'l cielu, coronáu,
bendiznos a fartucar;
güei llegamos a Santiago
antroxando Felicidá,
la so fe santa guardemos
nel futuru caleyar.
Elli trexo la creyencia
de doctrina celestial
y por ella, ¡y por España!,
la xusticia va trunfar.
(magar los malos Borbones ,
que, ¡Dios!, tenga nel altar.
Rezo yo pa que la Infanta
salga derecha y lleal
pos como vien d'asturiana
ye un seguru p'acertar).
Quede equí la mio plegaria
talo'l PIEDRÓN nel altar
ya espero, mio Santiaguiñu,
aguante un poco'l coral
pos ando pel Primitivu
y prestábame finar (llee acabar).
Si faigo alcordanza d'ello
ye por mor d'un Rei llegal
- asturianu de nacencia
y vascu per parte ma -
qu'envede robar les perres
nos fizo una catedral
- en San Paio una capiella
pal Apóstol reposar -
acueductos ya ilesies
como San Tirso'l Real
y hasta inventó'l Primitivu
pa invitanos caleyar
dica Santiago, na menos,
bendita y candial ciudá.
Voi pidite, énte la tumba,
- de nueves remocicá -
salves otra vuelta a España
que tien la corona manchá.
Daquella torno pa casa
(cuelgo'l sombreru,
guardo la capa,
doi la cayá,
miro al revisgu)
y como que nun pasó ná
yo sigo a los mios deleres
y vós - toos - ¡a trabayar!. >
****************************
Na tarde del Martes 10 de Marzu ficimos una visita guiada a Santiago pa conocer los principales edificios históricos de la ciudá Santa, esos que nacieron y crecieron al empar que'l mitu xacobéu. Aparcamos, como siempres, na Dársena Joan XXIII - 400 m del Obradoiru - onde nos esperaba'l simpáticu Guía, arranáu por tresmitinos la bayura conocimientos qu'atesora. Voi tratar de fer alcordanza dalgo de lo muncho que contó nes dos escases hores que tenía.
- Gracies pol to esmolecimientu, enantes que l'olvide, Señor Gabriel.
Mientres nos averamos a esi "mar de piedra", que vía Unamuno, camienta que Santiago ye la capital de Galicia dende 1985; que tien cerca de < 100.000 habitantes de los que'l 35 % son flotantes, ye dicir, estudiantes na so mayoría, dao que Santiago ye ciudá Universitaria amás d'ún de los tres finxos de pelegrinación cristiana xunto Roma (romeros) y Xerusalén (palmeros).
 |
| Al fondu: Cruceiru y Conventu San Francisco. |
- Lo primero no que reparamos foi na Ilesia-Conventu San Francisco (una de les 75 que pues alcontrar en Santiago) fundáu pol mesmísimu San Francisco d'Asís en 1214 cuando vieno a Galicia talo un pelegrín más.
Cuenta la lleenda que'l d'Asís agospió en casa d'un carboneru nomáu Cotolai, que vivía nel Monte Pedrosu, al que-y encamentó llevantar una ilesia-monesteriu no que se conoz como "El Valle de Dios" (onde ta anguaño). Al arrepostiar que nun tenía medios el Santu empobinólu al Monte San Paio (Pelayo) onde alcontraría un tesoru. El tarrén mercóse a los monxos benitos de Samartín Pinariu por una cesta añal de pexes, vezu que llegó hasta'l XVIII.
Esti primer monesteriu esbarrumbó nel sieglu XVIII y namás queden d'él nel nuevu cinco arcos del claustru y el sepulcru del tal Cotolai. La nueva ilesia entamó siendo arzobispu Maximiliano y sigue les traces barroques de Simón Rodríguez con planta xesuítica en cruz llatina de 3 naves, cruceru con bóveda de cañón y cúpula media naranxa. Una tribuna percorre les capielles de los lladrales y la sacristía ye tan ancha como'l templu.
La fachada barroca foi llevada a cabu por Flai Manuel Caeiro pero como s'allongó nel tiempu foi rematada más tarde pero yá con influyencia neoclásica. San Francisco preside'l cuerpu central de la fachada (3 cuerpos y 3 cais) abellugáu por cuatro columnes dóriques. Columnes xóniques abelluguen un ventanal pergrande y al empar sofiten el frontón triangular del tercer cuerpu.
L'adriu queda más baxu que'l nivel de la cai y enfrente suyo álzase un monumentu tipu cruceru n'honor del santu patrón: San Francisco d'Asís.
Anguaño'l Conventu ta dedicáu a Hotel y a Colexu Mayor y la Ilesia fai les veces de Catedral al tar esta n'obres que deben acabar pal añu XUBILAR que vien: 2021.
***
 |
| Facultá de Melicina |
Un edificiu rectangular de sillería destaca al entamar la cai: La Facultá de Melicina, lo que fuere l'antiguu Hospital de Pelegrinos:
- Si queréis entrar al Obradoiru tenéis que curavos enantes.-
Hai que facese cargu de cómo llegaríen los pelegrinos de la dómina a Compostela tres meses, ya hasta años, per eses abegoses caleyes llaraes de peligros. Una bona cura enantes d'entrar nel Santa Santorum nu taba mal, que too nun se pue dexar pal Zebedú qu'andaba esprecetáu, yeren - son, somos - munchos los pelegrinos qu'aconceyen na Plaza sobre manera dende que s'espardió la propaganda xacobea per aciu del <Códiz Calistinus>
***
 |
| PLAZA DEL OBRADOIRU, kilómetru 0. Catedral, Hostal Reis Católicos, Palaciu Xelmírez y Conventu San Xeromo. (Semeya tomada dende la portalada del Palaciu Rajoy) |
La Plaza del Obradoiru - o "taller de piedra" - ye'l símbolu de Santiago Compostela.
 |
| - Perdime ... ¡Y mirái lo qu'alcontré! ... |
- ¡Toi como llocu pola música!.
¿Qué quier dicir Añu Santu? .... El Papa Calisto II (1122) concedió-y a esta ilesia'l privilexu xubilar d'indulxencia plenaria, ye dicir, que te fueren perdonaos tolos pecaos si algamabes como pelegrín a Santiago (si'l regalu lu agabites con una comunión confesada y dexes una "propinuca" nel cepillu quedes cande ñeve). Claro, esto nun pasa tolos años, namás aquellos nos que'l 25 Xunetu caiga de domingu. Espero aprovechar esta bicoca pal añu que vien (2021) si Santiago agabita y los valtos lo permiten, qu'ún se confiesa pecador acérrime.
Pa saborguiala bien sentamos nel centru de la plaza, nel "Kilómetru 0", onde una pareya de mozos taba "tomando la cebá " y miramos embelesaos pa la Catedral. Facemos alcordanza ....
(1) La CATEDRAL de SANTIAGO COMPOSTELA
L'actual Catedral de Santiago tien los sos oríxenes na Edá Media, na primera mitá del sieglu IX. Cuando ente los años 820 y 830 tien llugar l'afayu del <Arca Marmórica>, el sepulcru del Apóstol Santiago, nel Monte LLibredón , un llugar perteneciente a la diócesis d'Iría Flavia, l'obispu Teodomiro comuníca-ylo al Rei Alfonso II el Castu y esti, tres visitar el milagru decide abellugar el sepulcru embaxo una ilesina prerrománica. Tamién se llevanó un batisteriu ya otra ilesina al Salvador , al que siempres tenía presente la corona astur. Pa la visita de 834 (quiciabes tuvo enantes) conocemos documentalmente que taba terminada.
 |
| La Catedral de SANTIAGO na Plaza del Obradoiro |
A finales del sieglu IX Alfonso III el Magnu (899) decátase de la importancia qu'esta inventio tien pa la cristiandá y decide facer una gran ampliación: Planta basilical de tres naves quedando l'antigua englobada nel presbiteriu de la nueva. El sepulcru colos discípulos onde taba, na cabecera un altar al Salvador y los absidiolos pa San Pedro y San Xuan, dos finxos de la Ilesia. Tola corte uvieina acompañada por 17 obispos vinieron a bendicir l'acontecimientu, a dase'l pote, vamos. Esto de la política nun cambió un pimentu del Padrón.
Sabíalo Almanzor; sabía de la importancia que'l Apóstol tenía pa los cristianos y a finales del sieglu X (997) arrasa con tou Santiago ( y lo qu'alcontró pel camín) pero nun s'atreve col sepulcru:
- Al Santu nin tocalu, trai mala suerte.
Pero pal añu 1000 yá taba l'obispu Mezonzo manes a la obra. En 1075, reinando Alfonso VI, l'obispu Diego Peláez entama construyir una catedral románica pero comete l'erru d' enfrentar al Rei y tien que dexalo pa prau hasta 1088. Nesti intre ye cuando entra en xuegu'l gallu la quintana, Diego Xelmírez, que siendo alministrador de la diócesis y col sofitu del obispu Dalmacio y del xenru'l Rei - Raimundo de Borgoña - tira palantre coles obres que nun van parar n'años.
Pa 1101 el Maestru Esteban yá tien acabaes les capielles del Deambulatoriu y la Fachada de les Plateríes. Pa 1111 taben terminaos los brazos del cruceru (Xelmírez atrásala al so tiempu) y en 1128 yá s'emplegaba pal cultu.
En 1140 tán cubiertos seis tramos de les naves y en 1168 el Mayestru Mateo faise cargu de les obres (paga Fernando II ) teniendo que finar coles naves tres llevantar una orixinal cripta al tiempu qu'entama col Pórticu de la Gloria siendo la consagración definitiva del templu en 1211, reinando Alfonso IX (¡Qué suerte, xostrón; cómo te lo dexó papi! . Bueno... tu tamién punxisti lo tuyo. GRACIES a dambos) .
El Pórticu actual nun ye tal cual el de Mateo, cuando se tresnó la cabera (?) fachada barroca dalgunes figures foron retiraes y caltiénense nel Muséu Catedraliciu. (Vamos ver si cuando finen les igües actuales pal 2021 nun tenemos dalguna sospresa ....).
|
| PÓRTICU de la GLORIA , talo tuvieres ellí. (Semeya del pintor: Jenaro Pérez Villaamil) |
El Pórticu pue estructurase en tres partes: La Cripta, o mundu terrenal; el Pórticu o puerta del Xerusalén celestial y el Rosetón, que permitía la illuminación permanente d'esta ayalga.
Tres arcos de mediu puntu - románicos - cuerrespuenden con caduna de les naves de la ilesia sofitaos en pilaronos de columnes amestaes. L'arcu central (¡Ai, Dios, qué arcu!) ye doble que los otros dos de los lladrales y tien un tímpanu (¡Ai, Dios, qué tímpanu) sofitaú nun partelluz (¡Ai, Dios, qué columna!) na que descansa'l nuesu mitu ¡SANTIAGO!, la xida del nuesu viax.
********************************
(2) Al entrar na Plaza l'Obradoiru viniendo per San Francisco alcontramos, a manzorga, l'Arzobispáu o Palaciu de Xelmírez .
 |
| Palaciu o PAZU de Xelmírez (MUSÉU de la CATEDRAL) |
 |
| Arzobispu XELMÍREZ (Baracaugustana. Wp.) "Tombo do Toxos Outos" |
Xelmírez sofitó la so carrera eclesial nel mitu de Santiago y cuando por fin algamó a lo más alto consideró que'l palaciu obispal de la Plaza Plateríes que llevantaren los Reis Alfonso II (h. 830) y magar la gran ampliación d'Alfonso III (h. 880) yeren poco cosa pa elli - el promotor del Camín Xacobéu per aciu del <Códiz Calistinus> - y entamó facer ún nuevu. Tamién ye verdá que del antiguu malpenes quedare nada tres la "visita turística" d'Almanzor (998) y les revueltes de Santiago en 1117.
- Equí vienen príncipes, reis y magnates; precisamos d'un palciu que tea al altor.
. En 1180, Pedro Suárez de Deza fizo alguna reforma y nel XIII (1250) l'arzobispu Xuan Árias quixo amosar el so poderíu sobro la ciudá encargándo-y al mayestru Boneth delles igües importantes al estilu dominante francés: Palaciu + Capiella personal + Salón duplex d'usos estremaos + Turruxón, símbolu del poder temporal (manda güevos col eclesiásticu). Nos sieglos XV y XVI más reformes de los Mendoza, Fonseca y Ulloa y Maximiliano d'Austria. Nel XVIII dáse-y otra planta que conlleva camudar la fachada por una barroca que faiga de sofitu o contrafuerte.
- ¡Ai, Dios! Si'l Castu y Teodomiro llevantaren la cabeza ...
 |
| Palaciu de Xelmírez: Salón de Ceremonies . (Semaya Wp: Zaratelman) |
En RESUME: Tenemos un edificiu civil - de los pocos - en forma de "T" de tres plantes alliniáu cola fachada románica de la Catedral que tien accesu pola Plaza L'Obradoiru. Si pases el pórticu románicu escondíu tres la fachada barroca del XVIII darás na planta cola Sala d'Armes (1u. pisu) dividía en dos naves de cinco tramos con bóvedes d'arista sofitaes n'arcos de mediu puntu.
Sales al patiu y quedes pensatible, ablucáu, hasta que ves les escaleres invitándote a escalar. Xubes y entres nel góticu Salón de Ceremonies (2º pisu) col qu'Arias -l'obispu - impresionaba al personal: Una salona rectangular (32 x 8,40) dividía en seis tramos con bóvedes de crucería tripartita, arcos faxones y los impagables canecinos hestoriaos. Ún d'ellos representa un banquete, ¿la boda d'Alfonso IX de Lleón con Berenguela de Castiella?... De xuru que Peridis* diz que sí pero otros ven a Fernando III el Santu, el que trexo les campanes de Córdoba que nos robare Almanzor, pelegrinando cola so muyer Beatriz de Suabia. A la pitanza nun-y falta de nada: Xente sentao, de pie, rezando o bendiciendo... Comensales, sirvientes, músicos y hasta daquién llavándose les manes ... (Hai que prevenir el <coronavirus>).
* De Peridis tines que lleer polo menos esti llibru: <La Reina sin reino>, y vas saber quien ye Doña Berenguela de Castiella y reina que fuere de Lleón.
 |
| Banquete: "Sirvientes cola EMPANADA" (Semeya:arteguias.com) |
¿Empanada de llamprea de les preses del Sar? ..... Yo nun me resisto y voi buscar cómo se tresna porque quiero comer talo un Rei, seique sía namás por una vez.
Ferregüeyando la yacuada, dende les claves más altes, los ánxeles allumen la fiesta con un discu solar ya una lluna creciente talo fixo Mateo nel Pórticu de la Gloria. A ver si tenemos la suerte de velo cuando finemos el ¡Bon Camín!, el Camín Primitivu que nos amosó'l Castu y que nós vamos siguiendo pasu ente pasu; yá salimos Asturies, tamos en Fonsagrada, esa Fonte Santa qu'un día bien cercanu entá pertenecía al Principáu d'Asturies.
 |
| El <DÚU DINÁMICU> de la dómina tocando'l "Resistiré" (Semeya Wp: Gerardo Rosa) |
Dente los canecinos hai ún qu'amuesa tres ánxeles sosteniendo un cartelu que reza: < VIR FIDELIS/ CORONAVITUR IN CELIS>**. Lo que te digo, badagüeyando'l CORONAVIrus... : Llavándose les manes, encamentándose a la empanada de Santiago del Padrón , rezando y ... dos músicos tocando'l "Resistriré" nuna especie organillu, el "Dúu Dinámicu" de la dómina.
** <VIR FIDELIS CORONAVITUR IN CELIS> ..." El varón (@) fiel será coronáu nel cielu".
- ¿Ves?... ¡Pal cielu !. Más claro nun pue tar.
*****
(3) A mandrecha, embocando na Plaza, tenemos un fermosu palaciu renacentista:
L'Hostal de los Reis Católicos o Parador Nacional.
 |
| Hostal dos Reis Católicos: Parador Nacional |
 |
| Portada Parador - Como llocos por ver a los Reis Católicos amosase nel balcón de la Camera Real. |
La fachada gótico-plateresca ta llarada d'escultures entamando poles de los Reis Católicos y siguiendo por Cristo, Santiago , Ánxeles y Apóstoles. Tampoco falten Adán y Eva, María Madalenena, San Xuan Bautista, Santa Catalina o Santa Cecilia. Pa completar esta ayalga nun falten figures fantasioses sobro les que se sofita la balconada neoclásica de Flai Tomás Alonso nin gárgoles obscenes afatando la cornisa.
A min lo que presta ye la portada custodiada por dos notables escudos de Castiella ya arriquecida por santos y mitos del cristianismu nes sos pilastres. Nel frisu, a la manera romana, los 12 Apóstoles capitaneaos por Pedro y Pablo, formando parte d'esti Arcu Trunfal. Y nel centru d'esi Arcu, sobro la pechina, ábrese'l balcón del Cuartu o Camera Real onde los Reis s'amosaben pa recibir los afalagos del pueblu, too estudiao.
*****
(4) Frente por frente - esafiante - la fachada barroca de la Catedral de Santiago hai palaciu pergrande, Pazo de Raxoi, dicen ellos. El Palaciu Rajoy ye la sede del Gobiernu Rexonal, el de la Comunidá, dao que Santiago ye la so capital asina como tamién la del Ayuntamientu. Nun se mecen: Ayuntamientu a manzorga y Gobiernu Rexonal a mandrecha; nel centru un frontón triangular pa poner orde: Santiago Matamoros (por nun dicir cristianos), dominante, na celebérrima Batalla del Clavih.o. [Podéis echa-y una güeyada n'esti blog "Camín de Niria": <Al rodíu'l Camín Primitivu: La Batalla del Clavih.o>.
 |
| Pazu Raxoi : Palaciu Gobiernu oficial de GALICIA y Ayuntamientu |
Pero nun creyáis que foi fácil llevantar esti edificiu tan guapu, pero otru llau ..... Nel tarrén a poniente de la Plaza taben asitiaes les cárceles, civil ya eclesiástica (tovía con eses...), asina como un restu de muralla polo que'l Ayuntamientu reclama la parte de so y presenta otru proyeutu ... Seminariu confesores, colexu pa los guajes del coru, cárceles ¿ y por qué non un Ayuntamientu nuevu? .... Como yéremos poco "parió la güela" y los vecinos d'al llau, los del Hospital (Hostal R.C.) de Pelegrinos ponen el gritu nel cielu:
- ¡Eh, quieto parao! ... Tas metiendo'l focicu en casa ayena. Esi tarrén ye l'antoxana l'Hospital; ye de nueso, ¡polvo!.
Nin Santiago s'acampaba con aquella triba; hebo que llamar a Capitanía y hasta la mesmísima Real Cámara; sicasí tuvieren qu'invocar a Salomón: Seminariu a mandrecha, Consistoriu a manzorga y los Cuartones nel mediu, por si a acasu, con Santiago Matacristianos nel cumal del frontispiciu. Eso sí, cuando se punxeron manes a la obra .... Nun hai como los gallegos pa trabayar la piedra; ente 1766 y 1772 taba fechu. (Yo toi viendo al nuesu Rajoy, sentáu sorriente na escalinata la Catedral, ensin dicir nin "mus" y viéndoles venir ... <Yá sabía yo que me lo dibeis iguar; h.e, h.e >).
 |
| Frontón: La Batalla del Clavih.o y Santiago Guerrilleru |
La verticalidá de la fachada catedralina contrasta colos 90 m. d' horizontalidá del Palaciu Raxoi, un edificiu neoclásicu afrancesaú con téuniques italianes onde destaca la enorme portalada (loggia, italiana) con sillares a tizón y arcos adintelaos o de mediu puntu que sofiten los dos cuerpos del edificiu engalanaos por bayura de ventanales rectillínios que dan prestancia a un bloque tan monolíticu. El frontón triangular fai alcordanza nel tímpanu de la "Batalla del Clavih.o", asina como'l Santiago Guerrilleru la picalina, son talo'l puntu de fuga d'arcada y galeríes. El frontón foi diseñu de Ferro con mano d'obra de José Gambino ( el que nació en Faramello) y J. Ferreiro.
Completen esta ayalga un áticu balustráu que cubre tol segundu pisu asina como dos frontones circulares nos lladrales .
La parte d'atrás ye dalgo más cenciella con un patiu central y dos bloques prismáticos nos lladrales y les cárceles nos baxos. De los represaliaos qu'hebo equí na Guerra'l 36 val más nun alcordase, nun vayamos cafiar a Santiago.
*****
 |
| Palaciu San Jerónimo La Portada, una pasada. |
(5) L'últimu monumentu del que podemos esfrutar na Plaza ye'l Pazo San Xerome o Palaciu de San Jerónimo onde anguaño reside'l Rectoráu de La Universidá de Santiago (1980) foi llevantáu nel XVI como Colexu Universitariu y desendolcó munchos años el llabor de Colexu Mayor hasta 1840 y tamién d'Escuela de Maxisteriu.
Ye obra llevada a cabu pol bon facer del arzobispu compostelanu Alfonso III de Fonseca (1475-1534) que s'empeñó en que los estudiantes probes, artistes y artesanos tuvieren un edificiu dignu y sacalos del Hospiciu de l'Azebachería, que tamién dependía de los Fonseca. Tevo'l gustu de treslladar la portada románico-gótica del Hospiciu al nuevu edificiu asitiáu na zona meridional de la Plaza l'Obradoiru.
************************
¡¡¡¡ SOR...PRE...SA !!!!
[[ Esto nun tenéis que cunta-ylo a naide, eh .... ¡Psssssss! ..... Ye un secretu ente nós ....
Cuando'l Guía, Gabriel, terminó la función - y nun lo digo pola serenata del gaiteru catedraliciu - invitónos entrar na Catedral pa ver un poco cómo diben les obres, d'esta miente comprenderíemos porqué nun se podía fer una visita en toa riegla. Yera al nuesu llibre albedríu: entrar per una puerta y salir per otra que daba, xustamente, a la tienda souvenirs. El casu ye nós nun tábemos dimpustos a salir del Obradoiru ensin chisbar un pocu aquella ayalga.
 |
| ¡Quieto parao! |
- Mira, ¿qué ye aquello?
- Asemeya la Caxa de les Ágates de la Catedral d'Uviéu ...
- Tu, esvaries, como siempre....
- Nun va ser L'Arca Marmórica ....
- ¡H.a, h.a, h.a! . De vez en vez peor... Colo calladino que lo tienen .... Tu tas tochu dafechu, nin.
- Bueno yo voi tomar una semeya ....
- ¡¿Qué faes, fatu?! ¿Nun t'alcuerdes que Guarda dixo que <de fotos nada>?
- Yá t'oyí, navaya ... Yo nun sé si ye o nun ye l'Arcis Marmoricis, pero por si acasu ... Llevo un añu esperando esti momentu y tu quies arruiname la vida .... Xacobu tien de llibrame del peligru, sabe bien l'enfotu que tengo nél.
- ¡Quita'l flash, polo menos! ...
- Y tu echa una güeyada por si'l Guarda anda cerca ....
- ¿Nun pues esperar que terminemos el <¡Bon Camín!: El Camín Primitivu >, que pa entós yá tarán les obres iguaes?
- Yo podría, pero Xacobu non; sé que quier veme. Cuido que tien un menxás pa min talo que yo pa él. Cuando tornemos la próxima vegada sedrá pa da-y les gracies por tenese cumplío.
- ¿Y yo voi poder conocelu?
- Nel momentu afayaizu; en cualisquier casu tu sabes bien que nós namás tenemos un pruyimientu, nun fai falta ser mui llistu p'aldovinalu ...
- Val, tira la semeya mientres yo m'encamiento al Apóstol (y a la misericordia del Guarda).
 |
| - Santi, ¿tas ehí? |
Yo nun sé si ye o non pero voi busca n'Internet, por si fuere, a ver qué alcuentro al rodiu l'Arca Marmórica pero nun pienso camentalo agora, eso déxolo pa cuando tengamos fecho'l <¡Bon Camín!>. Siéntolo por ti, collaciu, pero preciso informame bien, conocer de cabu a rabu tola HESTORIA qu'arrodia al Apóstol, aquel pescador del llagu Tiberiades, fíu de Zebedéu y Salomé, que tevo la suerte de participar nel fechu más trescendental de la hestoria de la humanidá: el ñacimientu del FÍU DE DIOS.
El <El Breviarium Apostolorum> , un llibru que s'escribió nel sur de Francia o'l norte d'Italia ente'l sieglu VI ó VII y que cuenta la vida los apóstoles darréu l'Ascensión del Señor cuenta onde foi destináu cadún d'ellos a predicar la <Bona Nueva>. A Santiago tocó-y España y diz que <llegó a predicar nes tierres más occidentales d'Hispania> ... San Isidoro, Beato de Llébana o Aldhelmo de Sherborne asina lo piensen. Tamién cuenta'l Breviariu que < foi enterráu un 25 de Xunetu nun "Arcis Marmoricis" > ... Nada màs asemeyao al pequeñu recintu funerariu onde aprució, decapitáu, el posible cuerpu de Santiago... Sufrió esti Arca munches reformes asina como la catedral pero elli sigui ellé, nel mesmu sitiu onde Alfonso II y Teodomiro tomaren el determín d'asitialu, nel prebiteriu la ilesina prerrománica.
ANEXU I: < SANTIAGO MÁXICU>
 |
| - ¿Petezte dar un vueltu pel Santiago Máxicu? |
 |
| Pel Santiago Máxicu - Los símbolos nel dintel de les puertes indíquennos el receutor de los impuestos: L'obispu, El M. San Martín Pinario, los Benitos ... |
Na tarde del Xueves, tres algamar na mañana a Santiago dende Milladoiro y dar por terminada la Etapa <PADRÓN-SANTIAGO> ficimos otra visita a la ciudá del Apóstol. Esta vegada nun se trataba de conocer monumentos d'altor seique restolar peles cais de la villa - acompañaos por una Bruxa de verdá- pa rescatar dalgunos llugarinos d'esos que ves de pasada pero malpenes repares nellos. Namás te voi dexar una pincelada porque fechizáu como andaba nun acerté a tomar bona nota de la bayura d'embruxos qu'acorropina esta Santa Capital magar el gran enfotu que la Bruxa Ana punxo nello (siéntolo abondo, Meiga Ana). Si nun acierto a plasmalo nel papel ye por mor del plasmu qu'entá caltengo, farda mía, dende llueu, pero ... dalgo m'alcuerdo ...
1) CRIME de la CAI BALCONADA.
 |
| La CASA BALCONADA |
Too vien de la dómina de Pedro I, el Cruel, cuando andaba a la tema col so hermanu Enrique II Trastamara, qu'a la fin foi'l que ganó . Partícipes d'esti entueyu son les lluches de poder por mor de la obispalía de Santiago ente les cases nobiliaries de los Deza-Churruchao - que taben con Pedro - y los Berenguel Landoria que saltaben por Enrique - terminaron cola muerte d'un Churruchao.
(Bona la ficimos ...). Paez ser que don Suero Gómez de Toledo, que fuere capellán de Pedro, pasóse al bandu d'Enrique y un día apaeció muertu (1366) xunto col Deán na mesma Catedral, si bien la lleenda popular asitiólo nesta cai qu'hebo de presllase un tiempu y ser rociada con sal.
La lleenda popular - mui granible - atribuyó la farda a los amores del preláu con una dama d'alta castra.
2) La Ilesia Santa María SALOMÉ
 |
| La Portada de "María Salomé" |
hai una ilesia con traza románicu-barroca que ta dedicada a una muyer, la única, a María Salomé. ¿Quién ye María Salomé?.... Ye la ma de Santiago Zebedeo, l'Apóstol que vieno predicar a Galicia y que ta sapozaú na Catedral, la xida de tola historia Xacobéa. Salomé - madre tamién del Apóstol Xuan - ye prima de la Virxe María y acompañóla nel tránsitu de la Cruz.
Mandada fundar nel sieglu XII (1140) pol chantre Pelayo Abad nos caberos tiempos del mecenes Xelmírez - ¿cómo se diba mover un deu ensin cuntar con él?- entá caltién nel pórticu (XVI) restos de la portada románica de triple arquivolta onde s'aprecien unes escultures de calter célticu - lo celta ta mui presente en Galicia - de la Virxe embarazada y la Virxe de la Lleche.
 |
| Ilesia María SALOMÉ, ma del Apóstol Santiago. Na Rúa Nova |
La ilesia ye de planta cuadrada con brazos pequeños sofítaos n'arcos de mediu puntu. La cúpula tien forma media naranxa y ta lladada d'escudos. Nel sieglu XVIII llevantóse una torre-campanariu (barroca) asemayada al del Monesteriu de San Fitz de Solovio.
Quixo la casualidá que n'esta ilesia morriere de sutrucu Mª Teresa de la Cruz, la ma de Rosalía de Castro.
Dio pa muncho esta Ilesia, colos temes celtes y los rituales pa la fertilidá nes cames de piedra o los baños durante 9 díes pero a min lo que me más me prestó foi lo de dir a la Playa La Lanzada, porque si ehí nun algames que quede embarazada .... Namás te queda la Santina, fíu.
Salió hasta la Santa Compaña (La Güaxa) y cómo pues llibrate d'ella si l'alcuentres: abrazándote a un cruceru o zarrándote nun círculu onde faes el signu de la cruz.
*******
3) <RESTAURANTE ASESESÍN>
Paseamos pel delantre la Plaza la Universidá onde ta la Facultá de Xeografía-Hestoria ( ellí mesmo podéis ver la estatua d'Alfonso II, el Castu) y salió a cuentu'l célebre "Mesón de Bernardo y Esperanza" conocíu como "Restaurante Asesino" . Lo qu'entamó por ser un cenciellu comedor terminó por ser un iconu la ciudá; equí xintaron Alfonso XIII (esti taba en toes), Ramón y Cajal, Torrente Ballester, Unamuno (conociendo la intrahestoria la ciudá) ...
 |
| Universidá - ¡Qué escapa'l gallu! |
- Equí nun se vende vinu, regálase.
D'esta miente foi'l chigre garrando clientela mientres tomaba les tacines con quesu y xamón. Al poco los mesmos universitarios foron demandándo-yos un menú diariu; y asina entamó too ... ¿Por qué el nome d' <ASESINO> ? ....
Tando un empleáu matando un pitu delantre'l chigre esmucióse-y de les manes y echó andar dando les boquiaes escaleres arriba pela universidá. ¡Menudu baturiciu!. El gallu esnalar, el mozu embelar y los estudiantes torgando-y el pasu coles capes pa que nun lu pudiere prindar ....:
- ¡Asesín, déxalu vivir! .
Tantu enfotu punxeron unos ya otros que'l gallu terminó afogáu; d'aquella p'acá quedó-y el nome al chigre sobremanera depués qu'un estudiante tuvu l'aciertu d'iguar un dibuxu del affaire que quedó como'l logotipu del restaurante.
****
4) La CASA de la TROYA
De la Plaza Marzadelos y La Universidá, darréu intentar salvar el gallu, empobinamos pela Cai Preguntorio :
- ¿Ónde ta la "Casa de la Troya"?
- Pasáis la Plaza de Cervantes, entráis na Cai de l'Acibechería y yá dais colo Rúa de la Troya.
 |
| - Estudiantes asturianos y madrilanos de la 3ª Edá pidiendo agospiu na <Casa de la Troya> |
Trata d'un estudiante universitariu, Gerardo Roquer, al que so padre unvía a Compostela porque nun había otra más alloñada de Madrid, ciudá que conocía perbién sacante les aules de la Universidá.
De mano tomólo como un castigu -y yera - pero los collacios de la pensión - <La casa de la Troya>- y l'ambiente, cais y monumentos d'una ciudá pequeña y candial ficieron camudar d'actitú convirtiéndolu nun bon estudiante. Por si fuere poco Carmiña asoleya la so vida con un amor tienru y melgueru como namás una gallega sabe tresmitir. ¡Salváu!.
***
 |
| L'Home l.lobu, Por si lu alcuentres ... |
Nun termináremos la llección y yá taba la Guía Ana metiéndonos el mieu nel cuerpu cola hestoria ROMASANTA, un home llobu, vendedor ambulante y <sacamanteques> (chupasangre o home del sacu) de verdadera profesión que fizo esapaecer más de 13 muyeres al paecer pa saca-yos el sebu que llueu vendía pelos pueblos.
D'esti coño d'histories entá m'alcuerdo yo cuando guaje. Col envís que nun nos alloñáremos muncho de casa siempre te cuntaben les histories del "Chupasangre", "el Sacamanteques", la "Paparosoria", "l'Home del sacu" y la madre que los parío ... (Como si nun tuviéremos bastante coles hestories de la Guerra 36 ...)
El casu ye que Manuel Blanco Romasanta foi xulgáu n'Allariz en tiempos de Sabel II y terminare condergáu a muerte pero'l psicólogu consigue-y l'indultu por ser l'únicu casu conocíu n'España de "licantropía clínica" (home qu'actúa como l.lobu) y merecía la pena ser estudiáu.
*******
6) < ¡¡ MEIGAS FORA !! >
 |
| ¿BRUXA o MEIGA?... El casu ye que tresna la queimada como Dios. |
Como la envidia ye mala conseyera na dómina del santón Felipe II, por exemplu, foron atacaes pola inquisición p'arrampla-yos colos sos bienes y yeren obligaes hasta facer "ordalíes" (caminar penriba d'un fueu) pa demostrar la so inocencia. (La madre que los parió). En Santiago esta "caza de bruxes" tenía llugar nel Monesteriu de Samartín Pinariu (Esti Monesteriu dio pa too).
......
 |
| Deprendiz de Bruxu. Asina da gustu. |
Doi fe dello. N'Asturies conozo delles Bruxes y en Santiago vengo d'alcontrar un par d'elles, de Meigues, camiento yo. De les primeres nun quiero falar; cuéntase d'elles que si faen tratos col Diañu, que si monten n'escobes voladores p'allegar a los aquelarres, que si echen mal de güeyu, o te lu quiten ... Yo traigo conmigo una cigua d'azebache por si acasu ... La cultura popular trata d'estremar unes d'otres : Que si les Bruxes son más de caleya y les meigues más caseres; que si les primeres son más males y les segundes más buenes ... Nós conocimos dos en Santiago y saliéronnos redondes: La Meiga Ana, que puso tol enfotu en cuntanos la intrahestoria* de Santiago y la Meiga del Mesón (que del so nome nun soi alcordame, ¡perdón!, por quedar embaecíu) que nos enseñó a iguar una queimada y a ¡tastiala!.
*Intrahistoria: Pallabra inventada por Unamuno - que conocía bien Santiago - asina que nun la toca nin dios.
 |
| La Meiga tresnando la bébora máxica |
Apagó la lluz del cuartu. Virtió oruxu nun cacíu de barru cocío que punxo a calentar al fueu qu'ella mesma entamó tres prender con una cerilla una cucharada d'Acua vitae... Foi echando azucre y revolviendo ... Tamién echó cachinos de mazana, gayos de naranxa ya unos granos de café....
(Si amestó daqué embruxu yo nun fui a decatame). De xemes en cuando prebaba con una garfiella de barro a ver si taba nel so puntu ...
Como pidió voluntarios pa iguar la bendita "bébora" yo nun punxi torga alguna (Per otra parte yera'l más dispuestu, claro, que pa eso soi de La Rebollá) .
Cuando consideró que'l alcohol perdiera virulencia (a estes edaes nun tamos pa goles de Panenka) sirviónos la melecina nunos vasinos de barru (dalgún quedó con él, mal fecho. En cualquier casu valía más que lu incluyerais nel preciu). Y tres lleer toos xuntos l'esconxuru brindamos al gritu de :
¡Meigas fora!
Yo quedé como nuevu, y hasta repetí. Y colamos pal Hotel más contentos qu'una rosa tres recibir l'esconxuru direutamente d'una MEIGA. Toi benditu, a Santiago quèda-y poco que trepar conmigo.
¡ Ah!, escaecíame .... Paramos pel camín pa mercar dellos productos de Galicia en <Casa Cotón>. Nós traximos delles caxes de Santiaguiños (algunes nun les pude repartir por mor del <coronavirus>) ya una botellina d'oruxu por si pinta tresnar una queimada pa ver lo aprendío.... Agora que ta ún tan enfotáu nes meigues ...
< L'ESCONXURU >
 |
| <¡¡MEIGAS FORA!!> (Pero non mui lloñe) |
Degorrios, trasgos y diaños d'esti fueu qu'asemeya al del Infiernu
nubeiros de les ñevaes vegues. y fuxirán les Bruxes a caballu
Cuervos, sacaveres y meigues de sos escobes, diéndose a bañar
fechizos de les curanderes. a una playa de sable gordo.
Podres tueros güecos ¡Sentíi, sentíi, los bramíos
llar de viermes y alimañes que dan les que pa nada puen dexar
lluminaria de les Guaxes de quemase n'àguardiente
agüeyu de prietos fechizos quedando ansí purificaes.
fedor de muertos, troneres y rayos. Y cuando esta bébora baxe
Agullu del perru, anuncia de la muerte pelos nuesos gargüelos
focicu de sátiru y pie del coneyu. quedaremos llibres de los males
Pecadora llingua de mala muyer de la nuesa alma y de tou embruxamientu.
casada con un home vieyu. ( A ver ...) (Y quedamos, chachu).
Erebu de Satán y Belcebú Fuercies del aire, tierra, mar y fueu,
claror de les cadarmes ingrientes . a vosotros faigo esta llamada:
Cuerpos tullíos de los indecentes, Si ye verdá que tenéis más poder
peos de los infernales culos, que la xente humano, equí ya agora
ruxíos de la mar embravecía. facéi que los espíriritus de los collacios
Barriga inútil de muyer soltera que tean fuera, pàrticipen
falar de gatos col rixu al altu la lleva, con nosotros d'esta Queimada.
guedeya puerca de la cabra mal nacía. Torna: Selmo
< La bona Meiga alza entós la copa
y brinda colos chic@s del IMNSERSO
<¡Meigas fora!>
(Y yo digo pa mios íntimos adientros:
¡TORNAREMOS!>
ANEXU II: <EMPANADA de LLAMPREA>
La empanada de llamprea ye un de los típicos bocaos de Padrón y dalgún sitiu más de Galicia, pero tampoco hai munchos. Nesta villa romana (Iría Falvia) hai delles "pesqueires" nel Ríu Sar (afluyente del Ulla) pa poder pescales asina como artes estremaes:
 |
| LLAMPREA: Hyperoartia o Petromyzon marinus (Semeya: taringa.net) |
 |
| Pesqueira d'Herbón (MiguelPesca) |
Pos con estos "bichos" casi dinosáuricos de focicu achapláu pue iguase una empanada y d'esta miente llevar la comida d'un sitiu pa otru; ¿por qué non a la fiesta del Parrandeiru en Santiaguiño do Monte?. ¿Intentamos saber cómo la igüen, por si acasu?... Perdimos una bona ocasión esti sábadu de Pascua, cuando ye tradicional, pero'l <coronavirus> matónos. Nun mos desanimemos, vamos a ello:
 |
| Pescadores de llamprea na "estacada" (Obrador.com) |
1). Una LLamprea 2). Dos cebolles 3). Tres dientes d'ayu
4). Una copa vinu tinto (o dos, la 2ª p'animar)
5). Sal y pimienta 6). Un par de fueyes de lloréu.
7). Un cachu pan duro. 8). 1/2 kilu fariña
9). 30 gm de formientu (lleldu) prensao y fresco.
10). Más sal.
11). Un pocu aceite, diría yo.
. Desendolcu (a pasiquinos):
 |
| A ver si te queda como esta (Afuegolento.com .-Koldo Royo) |
2. Iguar la llamprea: Escaldes la llamprea y quítes-y el pelleyu con un cuchiellu, por exemplu. Darréu sáques-y les tripes faciendo un corte na barriga, cortes la parte d'arriba la cabeza y cuésguela boca abaxu pa recoyer el sangre nun cazu (equí nun se pierde nada) onde yá echáremos el vinu d'antemano. Cuando dexe de sangrar vas cortando la llamprea en tacos o rodaxes como de 3 cm; guardes el fégadu y pones tol procuru en dir apartando l'espinazu que ye talo tripa blanco.
3. Ponelo a morcar (macerar) tola nueche con un ayu, cebolla, sal y pimienta. Al otru día sacar, secar, enfarinar y freir les rodaxes hasta que tomen un colorín prestosu.
 |
| La empanada de MiguelPesca quedó-y bien xeitosa. |
5. P'ARMAR la empanadada cueyes los bollos fermentaos y estíreslos. Ún poneslu na base del molde tres espolvoriar un pocu fariña. Enriba viertes el rellenu la llamprea sobro la base y tapes col otru trozu de masa fermentao. Zárrase la empanada con procuru teniendo la picardía de facer un buracu nel centru pa que pierda'l vapor. Coles faraguyes que sobren de la masa pue ornase la empanada. La mio prima Violeta píntala con güevu batíu pa que cueya color.
NOTA: Collacios, dexo al pendiente el tresnar una empanda ( nun podrá ser de llamprea, claro) qu'amosaré la próxima vegada pero nesti tiempu raru del COVID que nos tocó vivir fóiseme imposible alcontar el lleldu pa la masa. ¿Tais toos amasando en casa, h.odíos? ... Un ABRAZU
ESTIMANCES:
. Gracies al Hotel Congreso por agospianos y pol afalagosu tratu recibíu. SUERTE.
 |
| La nueva Raíña Lupa: La nuesa Guía SUSANA. Ella va carretanos hasta L'Arca Marmórica. Paciencia y bon talante ye lo qu'asoleya esta Neña. |
. A los Guíes Gabriel y Ana asina como a la Meiga que me salvó del "coronavirus" por mor de la queimada. (Chisco güeyu).
. A los allegres compañeros de viax - madrilanos y asturianos - que tuvieron un comportamientu de primera.
. A Don Gonzalo Rivero d'Aguilar por amosanos con tantu ciñu un finxu del Camín Xacobéu como ye'l Pazu "O Faramello" , territoriu que fuere de la Reina Lupa, per onde pasaren los restos del Apóstol camín del Arca Marmórica (S. Compostela): Una ayalga histórica nun llugar máxicu. Y gracies pol vinu y la fardela.
. A Don Manuel Garrido pol so llibru :<Guía de Padrón>, prestosu de lleer y que tanto nos aportare pa poder escribir esta hestoria.
. A ALFONSO II, el Castu (760-842), Rei d'Asturies, Galicia y norte d'ESpaña. Na so dómina tevo llugar l'afayu del sepulcru de Santiago, l'Arca Marmórica, nel Monte Lliberdón, siendo Teodomiro l'Obispu d'Iria Flavia. Alfonso foi'l <Primer Pelegrín>, que saliendo d'Uviéu llegó hasta Santiago onde mandó construyir una catedralina prerrománica p'abellugar el cuerpu incorruptu y decapitáu de Santiago.
GRACIES Rei Alfonso; tu inventasti <El Camín Primitivu>, el mio <¡Bon Camìn!>
 |
| ALFONSO II el Castu, Rei d'Asturies <El primer pelegrín> (Semeya na Rúa do Castro, de Santiago) |
. A Wikipedia, pola bayurosa información que nos apurre de contino. ¿Qué sedría de min en sin ti? Gracies.
. ¿Y la Xacopedia, de la que toi tul día tirando de la teta? ... GRACIES.
. A Eroski Consumer, que nos guía pel <Bon Camín> y nesti casu nel <Camín Portugués>.
. A dellos blogs, talo: <arteguías.com>, <Parquefluvialdesantiago.org>, <santiagoturismo.com>,<elrinconpoliticamenteincorrecto.blogspot.com>. <A la web del Ayunyamientu de Santiago>. A<obrador delalamprea.com>. A <MiguelPesca>, que m'enseñó delles artes de pescar y cocinar; toite bien agradecíu, chaval.
A <taringa.net>.
. A Rosalía qu'espubliza la so receta d'empanada de Llamprea en <cookpad.com>.
. Y por último -¿? - a Xacobu'l Zebedéu, al que la xente conoz como SANTIAGO, que camudó les redes del Llagu Tiberiades polos cucios veleros qu'engalanaben la Ría d'Arosa; el mariscu gallegu y la llamprea tiren tanto que tres tornar a Xerusalén y ver el martiriu venir camentó colos sos discípulos:
- De poder ser enterráime en Galicia.
Les negociaciones cola Raíña Lupa pa nada nun foron fáciles de mano pero ¿hai daqué imposible pal nuesu Santu: Xacobu?.... Gracies a él tamos toos equí. Dende'l ciñu pola Raíña Lupa :
¡Viva Galicia! ¡Puxa Asturies!.
No hay comentarios:
Publicar un comentario