Territoriu Comanche [2a]: <Aguilar de Campoo>
<<La lleenda de Bernardo del Carpio>>
(Semeya tomada en xusticia de
<EMILIOFS.SEXTANS>)
<< De Bernardo ye'l blasón, les desdiches míes son >>
 |
| Ferregüeyando, talo l'aigla del so escudu, la villa d'AGUILAR de CAMPOO. |
< Buscando a Bernardo del Carpiu
alcontré Aguilar de Campoo,
si'l astur merecía la pena
yá te digo, ¡GALLETES GULLÓN!;
col to arume llarasti d'historia
la mio casa y el mio corazón.
Navegué pel biforcu'l Pisuerga
- ¡cuasi entro na Plaza Mayor!-
y tres pagar el Portazgu nel Barriu
Xudíu, un requexu candial dignu de toa mención,
entré gayoleru na Plaza
entré gayoleru na Plaza
d'España,
talo fuere yo'l Rei de Castiella
o l' Infante la corte LLeón.
Caleyé embebíu baxo arcos, galeríes , portalaes
- barafuste Aguilar de Campoo -
talo fuere yo'l Rei Les Asturies
o'l mesmísimu Carpiu, tres ganar cualisquier turruxón.
Esperaba alcontrar con Alfonso, o don Tello, o Manrique ,
talo fuere yo'l Rei de Castiella
o l' Infante la corte LLeón.
Caleyé embebíu baxo arcos, galeríes , portalaes
- barafuste Aguilar de Campoo -
talo fuere yo'l Rei Les Asturies
o'l mesmísimu Carpiu, tres ganar cualisquier turruxón.
Esperaba alcontrar con Alfonso, o don Tello, o Manrique ,
- el Marqués d'Aguilar de Campoo (I) -
pa tomar un culete de sidra,
al compás del eternu ding-dong
de la torre de la Colexata,
esi suañu ilustre, paradigma de Plaza d'altor.
Pos tampoco'l Rei anglo-navarru,
- el fíu de don Sancho y Leonor -
de victoria nes Naves de Tolosa,
pela plaza del pueblu s'amosó.
- El Sabiu, que ta entreteníu
col Fueru, la cosa del más altu honor.
- A Don Garci que lu tán esperándo
Isabel y Fernando,
pa tomar un culete de sidra,
al compás del eternu ding-dong
de la torre de la Colexata,
esi suañu ilustre, paradigma de Plaza d'altor.
 |
| ¿Un vermtín na Plaza España d'Aguilar ? |
- el fíu de don Sancho y Leonor -
de victoria nes Naves de Tolosa,
pela plaza del pueblu s'amosó.
- El Sabiu, que ta entreteníu
col Fueru, la cosa del más altu honor.
- A Don Garci que lu tán esperándo
Isabel y Fernando,
por asuntos de fuercia mayor;
que Granada ta'l cabu
la cai, y equí,
facemos falta toos.
Asina que'l vermú voi a tomalu
cola Reina de mio casa, ventolín de la corte de Lleón.
Mirando de revisgu la Casona, ¡cuántu Llinax!,
embredamos dica la Peña Aguillón
tres rindir homenax a Xuan Martín,
esi bravu marín
que con El Cano'l mundiu arredoló.
Tornamos pal entamu de la villa,
la primera que'l Sabiu sentenció,
pos sabía que cerca, en Brañosera,
otru sabiu y Castu regaló
a los valientes llibertarios d'estes tierres
el primer Fueru que n'España se tresnó.
Tengo a tiru piedra esi castiellu,
lo que fuere de mano un turruxón,
y talo aiga planio sola villa
qu'un día la GALLETA encumó.
Yo tuvi la suerte d'agospiar
que Granada ta'l cabu
la cai, y equí,
facemos falta toos.
 |
| <Ventolín de la Corte de LLeón> |
cola Reina de mio casa, ventolín de la corte de Lleón.
Mirando de revisgu la Casona, ¡cuántu Llinax!,
embredamos dica la Peña Aguillón
tres rindir homenax a Xuan Martín,
esi bravu marín
que con El Cano'l mundiu arredoló.
Tornamos pal entamu de la villa,
la primera que'l Sabiu sentenció,
pos sabía que cerca, en Brañosera,
otru sabiu y Castu regaló
a los valientes llibertarios d'estes tierres
el primer Fueru que n'España se tresnó.
Tengo a tiru piedra esi castiellu,
lo que fuere de mano un turruxón,
y talo aiga planio sola villa
qu'un día la GALLETA encumó.
Yo tuvi la suerte d'agospiar
ellí onde Bernardo s'enterró,
al pie Santa María la Real
un monesteriu, mostrense, que quedare ¡como Dios!.
Pienso na mio castra, namás
me queda encamentar, Señor,
a Santa Cecilia:
- ¡Echáme un gabitu, por favor!. >>
*********************************
al pie Santa María la Real
un monesteriu, mostrense, que quedare ¡como Dios!.
Pienso na mio castra, namás
me queda encamentar, Señor,
a Santa Cecilia:
- ¡Echáme un gabitu, por favor!. >>
*********************************
Cuido, seguidor del <Camìn de Niria> , que tarás un pelín ablucáu al ver rellacionáu nos titulares d'esti post a Bernardo del Carpio col <¡Bon Camín!>, ye dicir, col Camín Primitivu. Pero si te pares a pensar y prestes un pocu d'atención decataráste qu'hai farda a esgaya pa que-y dediquemos una entrada a esti mitu español colos raigaños n'Asturies y rellacionáu dafechu col <Camín Xacobéu>. ¿Y qué ye'l <Camín Primitivu> sinón qu'una variante del Camín de les Estrelles que nos lleva a Santiago Compostela?
Cuenten les Cróniques series qu'Alfonso II d'Asturies, conocíu como'l Castu, morriere ensin tener descendencia y que nin tan siquier tuviere la gracia de conocer esposa dala pero ... ¿Sedrá eso verdá del too o será lo qu'interesó cuntar naquellos momentos? ... Porque camienten les males llingües que llegó tar esposáu con Berta, la hermana Carlomagno, ¡hala, vaya braguetazu!, magar nun tuvieren fíos.
Sicasí ¿acabó col Castu la castra de Pelayo?... Porque hai quien afita qu'Alfonso tenía una hermana, Ximena, qu'andando a los sos deleres algamó a tener un fíu natural col Conde de Saldaña, San Díaz.
¿Nun pudo esti neñu, al que la lleenda conoció como Bernardo del Carpio, ser el sucesor d'Alfonso II? ... Al fin y al cabu'l Rei Mauregato yera fíu natural d'una mora y Silo cuido que tamién ( y ye que l'AMOR nun entiende de races, compañeru).
Y a lo que vamos, pa xustificar la farda d'esti post entendemos que: "Tolo que tien rellación con Alfonso II ye xida a esgaya pa formar parte de la hestoria del nuesu <¡Bon Camín!>".
¿Y nun ye esti Rei Castu'l promotor del <Camín Primitivu>?. Dempués de too ¿nun ta Carlomagno rellacionáu dafechu col Camín Xacobéu cuando en realidá morriere dellos años enantes de dar - descubrir - cola tumba del Apóstol? ... ¿Y nun ye Bernardo coetaneu del Emperador y hasta adversariu suyu en Roncesvalles, según los "cuentos de la llingua afilada"? ... ¿Y nun ye entós Bernardo sobrín del inventor del Camín Primitivu?... Les lleendes surden por una necesidá social como cuido que pasó con esta triste, épica ya apasionante hestoria de Bernardo del Carpiu; por too ello vamos colar hasta Aguilar de Campoo onde los premostratenses afayaron la so tumba y la espada que-y ganó al míticu Roldán; de xuru que, analayando sobro l'aigla del so escudu, alcontrarémos daqué pa cuntavos ....
Cuenta esta lleenda que Bernardo del Carpio ta enterraú nuna fastera de la Peña LLonga, n'Aguilar de Campoo, naquella dómina "territoriu comanche" del Reinu Astur. Por eso nós queremos fer un viax al Medievu, a los sieglos VIII y IX, o quiciabes dalgo más, hasta'l sieglu XII polo menos... Pero vós sabéis que los nuesos viaxes son reales, qu' analayamos pela hestoria pero patiando les tierres que vieron espoxigar los nuesos mitos. Queremos ver la tumba del nuesu mocín, del héroe medieval que fizo tremar el mitu ¿del más célebre?, el mesmísimu Cid Campeador; queremos dir a Aguilar de Campoo porque ye territoriu de nueso, ¿petezvos venir con nós?
***********************************
¿Y si enantes tratamos d'asitianos nel mapa y conocemos daqué al rodiu d'esta villa?. Nunca nun ta demás conocer la so hestoria partiendo de la so situación xeográfica.
Aguilar de Campoo ye una villa de realengu (embaxo'l patrociniu del Rei y non d'un Noble) dende l'añu 1255, cuando Alfonso X el Sabiu tevo l'honor de concede-yos la so Carta Puebla.
Asitiada al nordeste la Montaña Palentina taba percorría pola calzada romana que xunía Herrera de Pisuerga con Santander. Tamién hai un ramal del Camín Xacobéu que crucia'l Pisuerga nesta zona del <Camín del Norte>: "Ruta del Besaya". Equí crúciase col Camín Olvidáu", esi que va poco percorrieron los nuesos amig@s - Carme y Pepe - a bordu d'una "Madreña Caleyera".
Tien el municipiu de Campoo - del llatín Campodium - perteneciente al "Geoparque de Las Loras" una superficie de 237 km2 ya una población al rodiu los 6920 habitantes, circa los 30 H/km2. Na Edá Media Aguilar pertenecía a la Merindá de Campoo, nel Valle cántabru de Reinosa, xunto con Suso,Yuso ya Enmedio, pero más tarde formó merindá independiente.
Dicen que si anguaño hai daqué que la fai célebre ye la so Industria Galletera per un llau y l'embalse d'Aguilar per otru pero nós sabemos qu'hai más... ¿Nun s'alcuentra la tumba de Bernardo del Carpiu, el nuesu mocín, n'Aguilar de Campoo? ... Pero lo meyor sedrá ponese a caleyar y ... ¡yá veremos con qué nos atopamos!. ¡Venga, vamos p'Aguilar!
*******************************
El Ríu Pisuerga al pasu per Aguilar ...
Aguilar de Campoo ta bañada dafechu pol Ríu Pisuerga que la traviesa d'Este a Oeste tando dambes orielles xuníes por delles pontes como: La Ponte Mayor, El Portazgu, El Puente la Teya o la Pasarela'l LLocu, ..... Na Oficina de Turismu dícenme que son DOCE (12) les pontes con que te pues alcontrar na redolada d'Aguilar; ¿quién soi yo p'arrepostiar? ....
El Ríu Pisuerga ñaz (1800 m/a) del amiestu de delles fontes cerca de Brañosera (Sierra d'Hijar) esmuciéndose darréu embaxo les montañes. Torna xurdir 3 km más p'alantre, na Cueva del Coble y va corriendo S-O dica la Tierra de Campos pasando per Cervera, Aguilar de Campoo, Herrera, Venta de Baños ... Entra na provincia de Burgos y depués en Valladolid pa embocar, tres 283 Km de percorríu, nel Ríu Duero, per Geria. Tien munchos afluentes como'l Carrión, l'Arlanza o l' Esgueva.
El Pisuerga, al pasu per Aguilar, forma una islla - La Cascah.era - travesada pol Paséu del Llocu que de Santa Clara tien de llevate hasta'l Polideportivu y/o a la Ilesia San Andrés y hasta la mesmísima Peña Aguillón, esi iconu rupestre que prevoca a l' arrecha Torre Samiguel.
****************************
. Cuatro cosines de la HESTORIA d'Aguilar
Cántabros, romanos, visigodos y árabes tuvieron viviendo per estes tierres nun va tanto pero yá sabemos que muncho antes tiénense alcontrao restos neandertales nel valle la Horadada, asina como del calcolíticu ya Edá del Bronce pero cuando de verdá Aguilar alquier un verdaderu altor foi na Edá Media. Estes históries cuéntanosle Peridis como naide nes sos noveles, que tuvi el placer de lleer:
"Esperando al Rey" , "La Reina sin reino" y "La maldición de la reina Leonor" . (Tien una triloxía al rodiu la Reconquista qu'habrá que feregüeyar).
Nel añu 822 , tiempos d'Alfonso II el Castu, paez ser que los benitos fundaron n'Aguilar un monesteriu y de 824 ye'l Primer Fueru que se conoz n'España, el de Brañosera (como comentamos aparte) pudiendo considerase como la primer Merindá. Y to esto col enfotu de dir entamando cola repoblación.
D'Aguilar salieron tropes d'Alfonso VI pa conquistar Toledo y Alfonso VIII tuvo muncha consideranza con Aguilar cola que s'empeñó p'afitar dafechu la repoblación.
El 14 de Mayu de 1255 tando de visita Alfonso X, el Sabiu, conviértela en villa de Realengu per aciu del Primer Fueru de Castiella (depués vendría'l de Sahagún); privilexu que caltuvo hasta 1332 con unes llendes bien acutaes.
Darréu conviértese en cabecera de la gran Merindá d'Aguilar de Campoo que funcionaba col derechu de behetría o benefactoría, ye dicir, que los vecinos podíen escoyer al so señor ente dellos candidatos, cosa que nun-yos prestó nada a los fih.osdalgos qu'en tiempos de Pedro I, el Cruel,* solicitaron al rei qu'eses tierres pasaren a ser de Señoríu (¡Periquí!... Pero nun hebo nada que facer). Tenía la Merindá 262 llocalidaes y l'alfoz d'Aguilar 34 aldees.
Don Pedro d'Aguilar, fíu d'estraperlu d'Alfonso XI y Leonor de Guzmán, foi titular del Señoríu ente los años 1332 y 1338 asina como de los términos de Llébana y La Pernía pero al morrer ensin descendencia pasó a manes del so hermanu Don Tello de Castiella, que tamién yera conde Vizcaya y Señor d'Aguilar, castañeda y Lara que caltuvieron los descendientres darréu la so muerte en 1370 sacante Vizcaya que pasó otra vuelta a los Reis de Castiella.
Otru de la reciella los 10 foi Enrique II de Castiella, el <fraticida> por cargase al so hermanu Pedro I, qu'en parte buscólo un poco él. Tamién ye conocíu como'l primer Trastámara, dinastía de la que nacería Sabel la Católica, la Gran Reina d'España.
En 1480 los Reis Católicos creen el Marquesáu d'Aguilar de Campoo siendo don Garci IV Manrique de Lara, ñetu de Don Tello, el Primer Marques d'Aguilar. Ellos fueron, los Manrique dueños y señores - Grandes d'España (1520) - hasta'l desaniciu del Antiguu Réxime nel sieglu XIX.
El Rei Carlos I d'España y V d'Alemania visitó Aguilar en dos ocasiones: 1517 cuando vieo facese cargu del gobiernu de Castiella (España) y en 1522 cuando arrampló cola espada de Bernardo del Carpiu que taba na so tumba (anguaño ta n'Armería Real de Madrid).
Precisaba la fuerza del astur pa controlar l'enorme imperiu que tenía embaxo'l so mandu.
Cuando'l 10 d'Agostu de 1519 partió la espedición de Magallanes de San Lucar de Barrameda a la cata les Islles de les Especies un marineru d'Aguilar diba a bordu, Xuan Martín, que foi de los pocos que llegó con El Cano tres años depués.
Nel sieglu XVIII l'agricultura y la industria fariñera yeren los dos puntales de la economía llocal como se conoz pol catastru del Marqués de la Ensenada. Tenía 7 molinos: 4 del Monesteriu Sta. Mª la Real, ún del Capitán Malla, otru del Turrunteru y el caberu pertenecía a la Marquesa d'Aguilar. Tamién había, gracies al Pisuerga, dellos batanes p'abatanar (suavizar) el pañu.
Durante l'Antiguu Réxime Aguilar constituyóse en municipiu constitucional formando parte del Partíu d'Herrera de Pisuerga. Cuntaba daquella (1842) con 186 llares pa 967 vecinos.
A primeros del XIX, durante la Revolución Francesa, los aguilareños pasáronlo fatal cola presencia del exércitu francu que tomaron el conventu les clarises como cuartel xeneral; les monxines salvaron polos pelos, menos mal, pero los ''llibertarios" gavachos dieron fueu al monesteriu enantes de colar.
Nel tiempu de Sabel II (1833) el municipiu pasó de Cantabria a Palencia . En 1921 Unamuno visita la prestosa villa como dexa constancia nel so llibru de viaxes:"Andanzas y visiones españolas". Ente los años 50 y 60 del XX constrúyese'l Pantanu d'Aguilar que tantos beneficiós aportó pero a partir de los 70 entama la despoblación de los pueblos qu'entá continúa .... por desgracia. ¿Qué va a ser d'España? .... ¿Sufriremos una nueva, lenta ya incruenta invasión que vaya rellenando los espacios vacíos? .... Yo nun lo veré, pero presiéntolo.
***
* Pedro I, el Xusticieru: En tiempos de Don Pedro los fih.osdalgos, nobles y caballeros que vieron mui menguaes les sos rentes por mor de la Peste Negra - que mata al mesmu Rei Alfonso XI - y les males colleches solicitaron-y nes Cortes de Valladolid (1351) que los privilexos de behetría que teníen les villes de realengu fueron abolíos y pasaren a ser Señoríos p'asina poder esprimir más a los campesinos y villanos (pequeños burgueses de les nacientes villes).El Rei vio ui menguaos los sos drechos de "fonsadera", "martiniega" y "xusticia". Esto cuéntanoslo per bien el Becerro de las behetría.
*****************************
Enantes d'embredar el camín d'Aguilar facemos un percorríu per internet pa dir ubicándonos. La primer conclusión que sacamos ye qu'AGUILAR de CAMPOO ye una ciudá considerada como Conxuntu hestóricu-artísticu dende 1966 por mor del so padremoñu cultural con edificios o güelgues de calter relixoso, civil y militar; polo que foi y polo que ye: una AYALGA.
Echamos sinón una güeya al planu turísticu la villa y ¡quedamos ablucaos! .... Alpuntamos al tuntún los llugares a visitar y mirái lo que nos sal:
. Les VISITES n'Aguilar:
. La Muralla defensiva (XII).
. La Plaza Mayor: La Colexata Samiguel (1541), Casa los 7 Llinaxes, Casa-Palaciu los
Marqueses d'Aguilar XVI (galeríes acristalaes), los soportales, les terraces, l'ambiente
chigril ....
. Monesteriu Santa Mª la Real (XII) col so célebre Paséu, el Muséu del Románicu, el
Claustru o la Posada (ehí pensamos agospiar).
. El Monesteriu femenín de Santa Clara (XV), con vida monástica, Hospedería y Dulcería.
. El Castiellu Medieval (XI-XII), nel Peñón d'Aguilón.
. La Ermita románica de Santa Cecilia (embaxo'l Castiellu) col so Mirador. MHA.
. La Ilesia San Andrés (treslladu d'un antiguu monesteriu, xunto al Castiellu).
. Parque Islla de San Roque, Islla Cascah.era (M. Sta. Clara).
. Les Puertes de la Villa: De Reinosa, El Portazgu (Hospital, xunto Ponte), San Roque (La
Islla), La Cascajera (y Paséu), Tenerías (Molín de Malla). La Barbacana (Sta. Mª o del
Paséu Real). Puerta La Tobalina (c. Casa Marcos Gutiérrez= BºXudíu).
Puerta Palaciu los Villatorre (Plaza Mayor).
. Les 5 Pontes d'Aguilar: Mayor, El Portazgu, Les Teneríes, Ponte del molín del
Turruntero, Ponte de la Teya, .......
. Les Fábriques de "Galletes Gullón" y "Siro" (al pie Sta. Cecilia).
. La Biblioteca de Bernardo del Carpio (equí piérdome yo, verás).
. La TUMBA del Carpiu, la cabera, onde queremos reflexonar y, per aciu d'un alderique col nuesu protagonista poder cuntar la so hestoria:
- ¿Cómo t'enterasti de quien yeres, Nardo? ... ¿Qué te dixo'l Rei Alfonso cuando-y dexixíste la llibertá de to padre? ... ¿ Cómo te sentó que Carlomagno quixere invadir España...? ... ¿Por qué te nomen Del Carpiu?... ¿Cómo foi la pelea con Roldán ?.... Son munches les entrugues que llevamos nel tinteru ...
Na REDOLADA d'Aguilar alcontramos:
. El Macizu kársticu de Les Tuerces y el Cañón de la Horadada.
. L'Embalse d'Aguilar.
. L'Eremitoriu de los santos <Justo y Pastor>, n'Olleros de Pisuerga.
. Y non tan lloñe ... ¡¡Peña Amaya!!, l'antigua capital del Ducáu de Cantabria.
¡Madiós, y esto sigue! ...
Visto lo visto lo primero al llegar al pueblu sedrá dir visitar la Oficina de Turismu col envís que nos apurran la información afayaizo pa poder trazar un plan; son demasiaes coses .... ¡qué guai!.
***********************************
El viax Xixón-Aguilar, l'agospiu ...
Yá acutáremos por internet un cuartu pa los díes 13 y 14 de Febreru na Posada del Monesteriu de Santa María la Real, nel barriu del Carpiu nes afueres de la mesma Aguilar de Campoo. Yera'l nuesu petite y cumplióse dafechu.
Salimos el mesmu día 13, xueves, a les 8 la mañana, de Xixón; tenemos l'autopista A-8 al par de casa. Pel camín del norte embredamos dica de Villaviciosa, LLanes, Unquera, San Vicenten la Barquera, Cabezón y Torrelavega. Equí disviamos hacia'l sur pela l'autovía A-6 camín de Reinosa siguiendo la ruta de Palencia que pasa per Aguilar de Campoo. Una romería de viaye per autopista de casa a casa que nos llevó dos relaxaes hores y cuartu pa unos 230 km = (102 x h); pa min ¡una barbaridá!.
- Alonsín, dedícate a les dunes, fíu, que <la cai ye mía>.
Casi nun tuvi tiempu de falar cola muyer (bueno, la muyer conmigo). La verdá ye que da gustu caleyar per esti país; entá m'alcuerdo cuando dellos fines de selmana echábemos tres hores llargues dende LLanes a Xixón.
********************************
< BRAÑOSERA: TERRITORIU COMANCHE >
Col rixu altu camentando en Brañosera llegamos a Aguilar pela carretera de Reinosa. Si queremos entrar na villa debemos franquiar la muralla per aciu d'una puerta: La Puerta de Reinosa, cómo non.
- Vamos ver, rapazos; enantes d'atacar les muralles de la ciudá , como pretendéis, ye presiso trazar un PLAN, andar al debalu ye pa volvese llocos. Yá sabéis lo que dícía aquel xeneral francés: <Pa derrotar al enemigu hai que conocelu>.
- Tampoco va ser mui difícil, ¿eh?, porque esta cuestión yá la tenemos estudiada dende va tiempu.
Lo meyor pa conocer y visitar la villa, que foi de realengu con Carta Puebla (1255) d'Alfonso X el Sabiu , ye siguir el siguiente planing. Mirái, consta de tres rutes estremaes y al empar interrellacionaes pos tou ensambla harmonioso.
Ehí va esti croquis pa visitar AGUILAR y conocer bien la villa :
1. Ruta los Monumentos.
2. Ruta la Muralla (Puertes de la villa).
3. Ruta los Palacios.
4. La redolada del municipiu: Embalse, Cañón de la Horadada, Ilesia Rupestre ...
1. RUTA de los MONUMENTOS.
Entramos n'Aguilar pela Puerta de Reinosa y per l'Avenida Ronda vamos llegar hasta Santa Cecilia, abellugada pol Castiellu. Darréu, pola Avenida Cervera empobinamos dica'l Monesteriu de Santa María la Real, onde pensamos agospiar.
Más tarde, pol Paséu del Monesteriu, vamos dir a Santa Clara, na Islla del LLocu, pasando les Puertes del Paséu Real y San Roque asina como la Ponte Mayor.
Agora vamos visitar el Centru de la Villa pasando antes pela Ilesia San Andrés, asitiada cerca la Ciudá Deportiva. Salimos de Santa Clara pel Paséu del LLocu dexando a manzorga el Parque Infantil. Una pasarela sobro'l Pisuerga - la Ponte la Teya - déxanos n'Avenida del Soto, yá cerquina la Ilesia.
- Esta ponte nómase "El Puente la Teya" - camienten unos señores bien amables.
- (Madiós, salimos del Paséu del Llocu pa entrar nel Puente La Teya. Nun-y dixi ná a la muyer pero pensé en cambiar de barriu).
¿Por qué llamen a eso el Paséu del LLocu?
- Más pola maldá de la xente que por otra cosa. En realidá ye un homenax a un paisanín que nun dexaba día del añu ensin visitar esta zona magar el tiempu que ficiere. Tenía una ruta y nun se salía d'ella: Entamaba na Plaza Mayor, tomaba'l Paséu la Cascah.y cruciando la Islla del Parque averaba a Les Clarises pa cruciar el Pisuerga pela Ponte la Teya entrando nel Paséu del Sotu que lu llevaba hasta'l Portazgu pa entrar na Plaza Mayor, onde escomencipiare'l percorríu. Más guapo nun pue ser, esti taba llocu pero de contentu. En realidá yera un home tranquilu, amable y charraba con cualisquiera que-y prestare atención. ¡Viva la llocura!.
- Munches gracies pola información, Señor. (Y yá m'empobino enforma más tranquilu dica la Plaza Mayor)
Salimos pela ¡Avenida de Villallanu!, buscando'l cogollu la ciudá. LLegamos a la Plaza URSI onde ta'l muséu del mesmu nome. Na Plaza de Tobalina alcontramos la Casa Escudu Zorrilla . Damos la vuelta pel Paséu de les Teneríes pa entrar nel cascu antigüu per aciu la Puerta l'Hospital (El Portazgu), una pasada.
Perdémonos ... La Plaza, la Colexata Samiguel, el Muséu Sacru, El Palaciu los Marqueses de Villatorre, el Palaciu los Manrique (¡yá te digo, compañeru!), la Casa de los VII Llinaxes, la Fundación Calderón Ruíz, l'Arcu Portada del Palaciu los Villatorre que quedó ensin rematar porque los caporales, los Marqueses d'Aguilar, nun queríen que nada nin naide-yos ficiere sombra. ¡La envidia!.
Tornamos a casa, fechos polvu cruciando la Puerta la Cascajera y Paséu Real del Monesteriu tres tomar antes un daqué nuna terraza de la Plaza España. Pa la Muralla la barbacana casi nun ficimos nin casu (¡!) porque tábemos mataos; pa mañana.
1.1. El CASTIELLU d'AGUILAR
Bien cerca la Puerta de Reinosa, entamilgáu nun cuetu (970 m/a) qu'abelluga a l'ayalga de Santa Cecilia, alcuéntrase'l castiellu d'Aguilar del que se caltién la traza esterior. Enantes de conocer el pueblu quiero subir hasta'l Mirador y ferregüeyar talo l'aigla esplayada que lleva'l so blasón la villa de realengu nacida a la vera del Pisuerga; foron bien espabilaos aquellos Condes Munio y Argilo al buscar esti sitiu p'asitiase si facemos casu al Fueru Brañosera (824).
Esti edificiu medieval d'arte románico y forma trapezoidal, con cubos nes esquines y otru nel centru de la cara sur, la más llarga, tenía dos entraes: una,apuntada, al este, qu'entá se caltién ya otra al sur-oeste, tapiada dafechu por mor del so mal estáu. De cerca pue comprobase que les muries, de sillarexu (40 - 38 - 31 y 20 m/ll ), dexen enforma que deseyar por mor de delles regalles.
Entamó esti castiellu por un turruxón defensivu - más tarde torre del homenX - en tiempos de la Reconquista (IX), ¿sedría Munio, quiciabes, el primeru en llevantar una torre vixía?... Lo que ye'l castiellu actual tien data del XII, con igües nel XIV y tamién nel XX, cuando yá nun tenía usu poliorcéticu, claro.
El castiellu taba protexíu alredor por sendos recintos tamién fortificaos:
.Una portiella xunto la esquina sur-este daba pasu a un recintu esterior, más baxu, del que se caltienen una torre y dos llenzos de la muria.
. Otra portiella al norte daba pasu a otru recintu que s'estiende pol oeste-sur-este-note con tramos de 58 y 68 m/ll del que se caltienen la portiella, dos cubos ya un fosu.
Por mor de la donación del castiellu por parte de Fernando II a la so 3ª muyer el so fíu Alfonso IX
(1171-1230 ) viose obligáu a asitialu al corresponde-y como herencia so madre. L'alcaide Marcos Rodríguez defendiólu de manera tala que'l mesmu Alfonso-ylu devolvió.
En 1517 foi visitáu por Carlos I al que-y llamaron l'atención tanto la so magnífica situación como la so mala loxística armamentística. Durante la Guerra Civil del 36 foi bombardeáu reparándose nos años 60. Les escavaciones de 1986-89 dataron el turruxón primitivu nel X y dieron con un barcal (alxibe) a los pies del mesmu
***
Les primeres noticies documentaes por mor d'unes donaciones al Monesteriu Sta. Mª la Real son de 1039 cuando reinaba en Lleón Fernando I, al rei qu'arimó como rei consorte precisamente´'l Condáu de Castiellla al Reinu de Lleón en 1037. (Daquién lu considera'l Primer rei de Castiella-Lleón, otros prefieren da-y el títulu a Fernando III el Santu).
La primer tenencia conocida del castiellu túvola Rodrigo González de Lara en 1125, siendo reina de Castiella-Lleón doña Urraca I, fía d'Alfonso VI y ma del emperador Alfonso VII.
Blasón del Marquesáu d'Aguilar:
<Cuarteláu en sotuer (aspa)> .
L'escudu de los marqueses d'Aguilar - mui guapu, por cierto - tien la forma del típicu español : rectangular, arredondiáu en punta y cuarteláu, nesti casu en sotuer:
1º Cuartel : En campu de gules un castiellu d'oru aclaráu d'azur (Reinu de Castiella).
2º Cuartel: En campu de plata un lleón de gules (Reinu de Lleón).
3º Cuartel: En campu de plata un aigla esplayada de sable (Por Aguilar).
4º Cuartel: En campu de gules dos calderes xaquelaes d'oru y sable, gringolaes de siete cabeces de sierpe en sinople en ca asa (Señoríu de Lara).
La bordura de plata engalanada con siete armiños de sinople.
En timbre la corona del marquesáu.
El primer Señor d'Aguilar de Campoo (amu del castiellu) foi don Tello de Castiella (hermanu de Pedro'l Cruel), fíu natural d'Alfonso XI y Leonor de Guzmán, que tamién llevaba los señoríos de Castañeda, Berlanga, Monteagudo, Lara y Vizcaya. En tiempos de los Reis Católicos el castiellu yera heride de Don Garci V Fernández Manrique de Lara, canciller Mayor de Castiella, al que los reis nomaron primer Marqués d'Aguilar de Campoo.
El castiellu foi reformáu nos siglos XII y XIV abellugando n'él al entós arzobispu de Sigüenza, cardenal don Pedro Gómez Barroso (1322-1374), por orde del rei don Pedro'l Cruel (1334-1369); polo visto al clérigu nun-y llevaba'l bazu ver presa a la reina doña Blanca de Borbón (pero home, señor cura, si fuere otra ...)
- Ai, don Pedro; cómo nun-y van llamar el cruel ... Mete presa a la muyer, encierra a so madre, cepilla un hermanu, inténtalo con otru ... ¡Usté ye la virxe!
<< Morrerás tu, rei don Pedro,
que matasti ensin xusticia
los meyores del to reinu.
Cepillasti al propiu hermanu
al Mestre, ensin Conceyu,
y a to madre desterrasti
darás-y a Dios cuenta d'ello.
Tienes presa a Doña Blanca
ya anoxasti a Dios por ello
mas si tornes a querella
date podría herederu;
otramiente pue que sepas
has pagar caru'l recelu.
¿Qué salen males les fíes?
farda tuya y mal gobiernu,
y el to hermanu, don Enrique
fairáse cargu del Reinu.
Morrerás a puñalaes
y verás ceo l'infiernu >>
*******************************
1.2. La ILESIA de SANTA CECILIA
A la solombra de La Peña d'Aguillón, abellugada pol Castiellu, alcontramos la Ermita de Santa Cecilia. Ye una gozada entrar nuna ciudá al traviés d'una puerta perantigua y al poco acolumbrar la torre románica d'una ilesia apuntando al cielu. Yá t'imaxines onde tas, nuna MAQUETA MEDIEVAL.
Santa Cecilia , monumentu históricu-artísticu dende 1963, ye una ilesia románica en sillería del XII, enantada nel XIII y remocicada nos sieglos XVII y XVIII. Tien planta rectangular de tres naves con techume de madera que terminen n'ábsides tamién rectangulares pero con bóveda de crucería mientres el presbiteriu tien forma d'arcu apuntáu.
Pero si dalgo llama l'atención del visitante ye la torre cuadrada de tres palantes con ventanes bífores na segunda que paecen abrise al mundu:
- Quiero que vengáis a visitame pa contemplar los apóstoles tallaos por Ursi y los capiteles decoraos: unos con motivos vexetales ya otros, más llamatibles, con pasaxes de la Biblia talo que "La matanza de los inocentes".
La portada, na fachada sur, cubierta por texaroz con canecinos ye apuntada con cuatro arquivoltes que descansen sobro ocho columnes de bases bien simples, ye pa engañar y lleves el sustu cuando pases al interior pa contemplar el realismu de la so iconofrafía grupal, un luxu asiáticu namás propiu de maestros de postín: El sacrificiu d'Isaaac, La venta de Xosé, lluches de guerreros, animales diabólicos y "la xoya la corona" con <La matanza los Inocentes>: Herodes arrodiáu polos soldaos a degüellu, madres berrando colos oyíos tapaos pa nun sentir los llamentos ... La verdá, Herodes foi bien gochu.
1.3. COLEXATA de SAMIGUEL
"De torre a torre y tiro porque me toca ".
La ilesia antigua de Samiguel foi llevantada como parroquial d'Aguilar enantes de 1220 pero los oríxenes reales cuido que puen ser visigóticos teniendo la primer tresformación nel sieglu XI. Metíos nel XIII realizense delles igües como la portada románica, el primer tramu de la torre o la capiella bautismal. A primeros del XIV entamóse cola planta gótica actual a instancies del arcipreste García González sabiéndose que pa 1346 yá debía tar rematada pos l'obispu de Sigüenza concedía indulxencia plenaria al que la fuere visitar.
En 1541 accedió a la categoria de Colexata por mor de Xuan Fernández Manrique de Lara, III Marqués d'Aguilar, que-y comió'l tarru al Papa Paulo III cuando taba en Roma d'embaxador de Carlos I. Tan bien lo fizo que la sonadía d'esta nueva colexata anubrió la d'otres de la redolada talo: Samartín de la Escalada ( un abá d'esta llevantó Santa Mª la Real d'Aguilar), Samartín d'Elines (¡Eh, esto nun me gusta nada!; equí tuvimos nós de visita y cantando nun chigre colos parroquianos) y la Sta. Cruz de Castañeda.
Na segunda mitá del XVI dáse-y un pisu más a la torre - nun aguantaba la competencia de Santa Cecilia - y tamién se coloquen el Retablu Mayor, la capiella del Santu Cristu y dellos sepulcros embaxo arcusoliu, talo los de los Marqueses d'Aguilar. La Sala Capitular y la Sacristía son yá obres del XVIII.
DESCRIPCIÓN:
Apreciense n'esta ayalga dellos estilos perfechamente conxugaos: prerrománicu, románicu, góticu, renacentista, barrocu ya herrerianu. ¿Hai quién dea más?.
De planta rectangular con tres naves cubiertes por bóvedes de crucería más transeptu, cruceru ya un ábside pentagonal de tres pisos y ventanes bífores ya oxivales.
El retablu Mayor caltién una escultura del Patrón: Samiguel Arcánxel y otra de la Virxe de l'Asunción. Na nave de la Epístola puen apreciase la Capiella de los Probes y otra, mui sonada, del Cristu xacente d'Aguilar. Dellos sepulcros de personaxes bien celebraos n'Aguilar complementen esta ayalga arquiteutónica.
1.4. MONESTERIU de Santa Mª la REAL
Hai n'Aguilar de Campoo una antigua abadía premostratense, declarada MN en 1866, que de nun ser por un grupu de persones amantes del Arte y del Padremoñu anguaño taría esaniciada dafechu, vamos que sedría polvu d'estrelles, un solarón abandonáu que namás caltrendría'l recuerdu d'un pasáu gloriosu. Gracies a los procuros de los vecinos ya un grupu d'emprendedores al mandu del dibuxante Peridis güei podemos non solo contemplar sinón hasta agospiar nesti vetustu monesteriu qu'entamó llevantase nel sieglu XII nun estilu de transición ente'l románicu y el góticu colos elementos del arte cisterciense. Gracies a estos soñadores tenemos un BIC declaráu MHAN.
Faru cultural na Edá Media tevo Santa María llarga vida mercé a los flaires premostratenses que nun fueron a aguantar el tirón de la desamortización de Mendizabal en 1835. Anguaño, remocicáu dafechu, abelluga la Fundación Santa María la Real, el Muséu ROM: Románico y Territorio, ye tamién Centru d'Enseñanza (IES, Escuela Idiomes,UNED ) y hasta alberga un Hotel de **** estrelles (onde pienso agospiar , DM, a nun tardar) a pocos metros del edificiu principal.
Gracies a esta fundación podemos contemplar la ilesia primixenia , el claustru cola sala capitular y llocutoriu asina como'l refectoriu y la sala los monxos:
. La Ilesia abacial, al septemtrión del conxuntu monásticu, tien planta basilical de tres naves de cuatro tramos separaes por arcos apuntaos que descansen sobro potentes columnes que se ven coronaes por nervios que van texendo una bóveda de crucería. Les naves emboquen nun cruceru de bóveda de cañón y rematen n'ábsides poligonales; anguaño dos pos el septemtrional foi convertíu na Capiella del Santu Cristu nel XVII.
La ilesia comunica col claustru per aciu de tres puertes nel lladral meridional ya una cuarta asitiada al occidente, na fachada principal, Sobro ella una ventana cisterciense coronada pola célebre espadaña - dos cuerpos y (4+1) güeyos o troneres, - iconu de la Fundación Sta. Mª la Real qu'amuesa nesta ilesia la esposición del ROM, con delles maquetes del románicu palentín.
. El Claustru yel prototipu del arte cisterciense magar que los flaires fueren premostratenses. De planta cuadrangular y dos pisos presenta cuatro galeríes o pandes - con bóvedes de crucería - que s'abren al xardín central por arcos oxivales de ventanes trífores separaos por contrafuertes. Los antiguos capiteles hestoriaos foron en so tiempu treslladaos al Muséu Nacional pa evitar el desaniciu.
. Una puerta na panda occidental da pasu a la Sala Capitular, de planta rectangular y bóveda de crucería que s'afita en dos nerviaos pilares centrales.
. El claustru tamién da pasu a otres dependencies monacales como'l llocutoriu abovedáu o'l refectoriu , cola típica arquería ciego. La cilla, la cocina o los dormitorios tán mui iguaos o tresformaos.
HESTORIA del Conventu
Santa María la Real tien un orixe llexendariu.
Camiéntase que nel sieglu IX tando de caza pela zona un noble caballeru nomáu Alpidio dio casualmente na viesca con un par d'eremitorios dedicaos a Santa María y a los apóstoles Pedro y Pablo que calteníen reliquies de los titulares ya un arcón que guardaba una imax de Xesús Nazarenu xacente (anguaño amuésase na Colexata Samiguel). Comunicó-ylo'l cazador al so hermanu Opila, daquella abá de Samiguel de Tablada (Burgos), que lo tomó como un badagüeyu ya entamó cola construcción d'una nueva abadía.
Les visites foron aumentando cola devoción de la xente que decidió quedar a vivir na redolada, orixe de la villa. Hai un documentu de 822 - falsu, por desgracia - que cuenta cómo un sobrín d'Opila llevantó un Monesteriu a San Pedro y Pablo d'Aguilar y que 30 años más tarde (852) recibió una donación familiar del conde Osorio. Yá en 950 Osorio Almírez procedió a una refundación embaxo l'advocación de Samartín d'Aguilar siguiendo, seguramente, la Regla Beneditina.
Les primeres noticies ciertes son de 1020 nel cartulariu d'Aguilar que da cuenta d'unes donaciones - como les de la Condesa Ofresa - afitando la esistencia d'una comunidá dúplice: monxos y monxes.
L' añu 1169 ye fundamental pa la hestoria del monesteriu pos el Rei Alfonso VIII (1158-1214) - el de Les Naves de Tolosa (1212) dónalu a los premostratenses de Sta. María la Retuerta (Valladolid) pasando a nomase Santa María la Real pos el Rei tóma-y munchu apegu y ye entós cuando s'entama col gran edificiu protogóticu. A partir d'esi momentu foron sucediéndose les donaciones, heredaes y privilexos reales algamando a ser un iconu tanto agropecuariu como artísticu y cultural magar que tampoco-y faltaron los pleitos. En 1222 foi consagrada la so ilesia.
Nel XIV enantaron los problemes pa Santa María:
. En 1233 hai una rebelión de monxos escontra l'ába (hai que h.odese).
. Depués vien la Peste Negra y les guerres civiles de los Trastámara (XIV) a toca-yos los pinrreles.
Tienen un repique nel XV pero'l meticón de Felipe II torna colos problemes nel XVI. Otra vuelta vuelve resurdir nos sieglos XVII y XVIII aumentando les sos dependencies pero cola Guerra la Independencia los flaires vense abocaos a tomar unes vacaciones. Cuando tornen l'abá, un lliberal convencíu (yá tien méritu), tien qu'esclaustrar por mor de los carlistes (1833); cola Desamortización de Mendizabal vien-y la puntiella pos nun foi alcontrar comprador pal Monesteriu (sí pa tierres y posaes ya otres dependencies) y foi esbarrumbando pasu ente pasu cuando non saqueáu a conciencia (algunos capiteles consiguieron salvase y tán al abellugu nel Mu. Arqueolóxicu Nal.).
Ente 1955/68 Belles Artes emprimó con delles igües talo na cubierta, claustru o sala capitular pero nun ye hasta 1978 en que l'Asociación d'Amigos del Monesteriu d'Aguilar toma cartes nel asuntu y acomete dafechu la so restauración con criterios estremaos a los anteriores; agora nun se trata solo de pone-y cara sinón de da-y utilidá per aciu d'una Escuela Taller Arquiteuto-Arqueolóxica. Anguaño funciona como centru d'enseñances (IES, UNED, E. Idiomes o impartición de cursos), como Muséu del Románicu (ROM) y ye amás la morada d'esta Asociación. El polifacéticu arquiteutu Peridis* vien de trespasar la so presidencia col enfotu de da-y un aire más acordies colos nuevos tiempos dixitales (los años nun pasen en baldre, llebaniegu; gracies por TANTO, entamador. ¡Ah!, como sé que yes del Madrid espero esfrutes la tan merecida xubilación viendo xugar a Mbapée, que será como resucitar a Di Stéfano. Yo paso la mía lleendo los tos llibros).
* El llebaniegu José Mª Pérez González "Peridis" - namoráu d'Aguilar y del Románicu - foi, ye, un esclavu-amante del trabayu: arquiteutu, hestoriador, dibuxante, humorista, escritor y sobremanera entamador como lo demuestra cola creación de la "Fundación Santa María la Real del Patrimoniu Históricu":
- <Una ruina pue ser una esperanza>, o'l surdimientu del "ave fénix".
(Espero qu'esti seya'l mio casu. De momentos toi lleendo los tos llibros que me tan prestando un cachu. Doña Berenguela ye'l mio petite, ¡menuda fema!).
1.5. CONVENTU Santa CLARA
El Monesteriu de Santa Clara (BIC 1991) foi fundáu en 1435 por don Xuan Fernández Manrique, conde de Castañeda y Señor d'Aguilar cola fin fuere moráu por franciscanos*, como asina asocedió pero ...
En 1485 don Garci Fernández Manrique, I Marqués d'Aguilar, tomó'l determín de treslladar a les monxes clarises* de Santa Mª de la Camesa - a 3 km d'equí - que vivíen nun conventu de lo más cutre apoderáu pola humedá. Los flaires nun punxeron el menor reparu y colaren a vivir a Herrera. ¡Menudu aciertu, manín! ... Entá siguen enclaustraes equí (bueno, cuando la Guerra la Independencia tuvieron que escondese una temporada) faciendo dulces y galletes caseres como nun podía ser d'otra manera (habrá que probalo). Como les monxines tán en réxime de clausura (vaya fatada) namás pues visitar l'edificiu per fuera y la capiella. Una verxa diz: ¡Stop!.
La construcción ye mui simple como correspuende al estilu de los probes franciscanos. Un edificiu en sillería de planta rectangular de dos pisos y llaráu de ventanes dientro d'un recintu tapiáu nel que tienen ilesia, güertu, obrador, refectorio (comedor), cocina, claustru de dos plantes, biblioteca y sala capitular.
La ilesia ye d'una nave con cuatro bóvedes de crucería y presbiteriu rectangular.
* Franciscanos y clarises son relixos@s hermanaos n'una Orde fundada por San Francisco d'Asís y Santa Clara d'Asís en 1212 qu'hasta tuvieron una Orde Seglar.
1.6. La ILESIA San ANDRÉS
A les afueres del pueblu, metanes d'una moderna barriada, alcontramos la cabecera d'una ilesia antigua frente a una fermosa portada cuayada d'arquivoltes. La ilesia románica de San Andrés (XII), formó parte d'un monesteriu asitiáu na falda del Monte Aguilón, per onde tán el castiellu y l'actual Santa Cecilia. En 1908 los restos foron treslladaos al cementeriu y darréu a esta Islla que llenda'l Ríu Pisuerga.
La cabecera del templu consta de tres ábsides, circular el del centru siendo los de los lladrales de cabecera plana.
El transeptu cúbrese con bóveda de crucería.
Los capiteles tán decoraos con motivos bucólicos, tanto animales o vexetales.
2. RUTA de la MURALLA: De puerta en puerta.
Paseando pela villa d'Aguilar
Güei llevantamos ceo col envís de y tres d'un deasayunu competente pretendemos dar un vueltu pel migoyu la ciudá d'Aguilar, arrodiando lo que yera'l cascu vieyu, ye dicir, siguiendo les güelgues de l'antigua muralla y sobremanera les puertes d'entrada de les que - gracies a Dios - se caltienen testimonios bien bultables. Asina que tres un desayunu competente miramos el planu de la villa y trazamos el track que vien darréu; como siempres una ilusión pos siempre apruz daqué maravioso que nos tuerce felizmente la idea.
Esta, más o menos, ye la idea del track a siguir:
< Monesteriu Santa Mª Real - Paséu del Monesteriu - Puerta Real (P. Barbacana ó Sta María) - Puerta de San Roque (Pª Molín de Malla) - Parque de S. Roque - Ponte Mayor - Paséu la Cascah.era - Parque Infantil (ferregüeyamos Sta. Clara) - Puerta la Cascah.era - Plaza d'España (Colexata, Palacios, Muséu) - Puerta l'Hospital (P. del Portazgu ó P. les Teneríes ó P. Sª Trinidá) - Paséu de Les Teneríes (Ponte) - Puerta de Tobalina (Bu. Xudíu) - Puerta de Reinosa - Avenida Ronda - Santa Cecilia - Castiellu - Paséu de la Barbacana ( MURALLA).
Salimos de la casa monacal - al W. la ciudá - y siguiendo el Paséu del Monesteriu, cerquina del ríu, llegamos a la
Puerta del Paséu Real onde aprovechamos pa sacar unes semeyes de la puerta y la contorna porque hai un paisase idílicu cola puerta, el Ríu Pisuerga, la Islla de S. Roque, la Ponte Mayor o'l Paséu la Barbacana con restos nidios de la muralla. ¿Lo más candial del pueblu? ...
La entrada que nos ocupa nómase Puerta Real por ser la que da entrada al paséu que va al monesteriu de Santa María. Hai quien la conoz como la Puerta la Barbacana - pos ta al llau d'esi paséu - construida a finales del XIV tien una traza ablucante; trátase d'un cubu cuadráu de sillería al esterior y mampuestos per dientro (hai qu'aforrar) que destaca sobro la muralla más d'un cuerpu y que remata nun matacán coranáu por una almena del sieglu pasáu. El pasu ye al traviés d'una puerta oxival, que caltién les güelgues del rastrillu (la rexa), engalanada col aigla del escudu d'Aguilar. El tar asitiada al par de la muralla da-y, si cabe, más prestancia.
***************************
Salimos a l'Avenida Ronda pa entrar n'Avenida Palencia per aciu de la Ponte Mayor pa echar un vistazu a la Islla de San Roque. Tornamos y a cuatro pasos yá tenemos otra puerta:
La Puerta de San Roque ta al entamu del Paséu La Cascah.era y enfrente la capiella qu'esi santu tien dedicada na islla; pero ye quiciás más conocía como Puerta del Molín del Capitán Malla. seique ye probable qu'antaño fuere conocía la Puerta de Pabones. En cualquier casu trátase d'una puerta bien chula de doble arcu, de mediu puntu la superior ya apuntada la inferior.
********************************
La puerta de la Cascah.era, ta asitiada al este del paséu del mesmu nome, al sur de villa.
Nun ye otro qu'un portiellu del XVII del que namás queda un arcu de mediu puntu de sillería arenisca que pudo ser la entrada d'una casona-palaciu cola fachada amirando pal Pisuerga. Ye probable qu'ehí tuviere'l porticu d'entrada.
Apellídase de la Cascah.era pola cantidá de cascayu qu'había nesa zona averada al ríu; nós nomaríemoslo cascayal, como'l prau de güelu.
******************
... Namás pasar la Puerta La Cascah.era entramos nel migollu la ciudá, na Plaza España, lo más ¿guapo?, turístico de la villa seique esta nun fuera la xida del nuesu viaxe; yá sabéis que nós vinimos por mor del astur Bernardo del Carpio, el sobrín "natural" d'Alfonso'l Castu y del conde de Saldaña qu'engatusó a la infanta Ximena col so bronceáu castellanu y aires de trovador. Pue suponese que desendolcare'l cargu de comes palati n'Uviéu durante algún tiempu, qu'aprovechó dafechu. Salió-y torda, al condesu lleonés pero <París bien val una misa>
< Madrugaba'l conde Sancho
- el condesu de Carrión -
a da-y al agua al so caballu
de la castra d'asturcón.
Mientres el caballu bebe
siéntese guapa canción,
les aigles, que van suañando,
danse, ¡ai! de capitón.
- Bebi santu, bebi, ho,
que l'agua la Foncalada
ta bendita d'ilusión
y si bebes con procuru
dicen, que vien con perdón.
Mientres el caballu bebe
echa Sancho una canción:
- Bebi, mio caballu, bebi
y encamiéntate al Señor,
que como s'entere'l Rei
va armase la de dios.
El Rei, que lo ta sintiendo,
a la so hermana llamó:
- ¿Sabes, fía, porque clamia
el palafreneru Mayor?
- Nun ye'l mozu , Rei Alfonso,
nun yel mozu , mio señor,
ye'l mayordomu palaciu,
el condesu de Carrión.
- Véolu a sucu baxeru
pa tener cargu d'honor.
Debía de tar glayando,
pos vive equí como Dios.
- Ta mui contentu n'Uviéu,
ta percontentu, Señor,
pero cometió un erru
y nun ye p'abrir el corazón.
- ¿Sabes tu de qué se trata
y nun la sabe'l Señor?
Pues cuntámelo, Ximena ,
por si alcuentro solución.
- Ye que la cosa ye sería,
mui gorda, diría yo;
fuimos xuntos, a caballu
y guañó lo qu'entamó.
- Tas metiéndome medrana
y yá pienso no peor.
- Perdónamos Rei, hemanu,
perdónamos, por favor,
pecamos, somos humanos
seique pecamos d'AMOR.
- Si ye lo que toi pensando
vais pagalo a mogollón,
pos los asuntos d'estáu
nunca nun tienen perdón.
- ¿Y el guaje que yá tuviemos
va pagales polos dos?
- Del guaje, ai, Dios, qué espantu,
voi faceme cargu yo,
pero tu méteste a monxa
y el condesu, pal cuartón;
esi nun ve na vida
otru día más el sol
por abusar de confianza
y metela de tacón.
La política ye serio,
cuando se trata d'honor.
- Bebi mio caballu, bebi,
bebi acibre polos dos
que cuando s'entere'l Rei
va desterrame a Xixón.
El conde Sanz de Saldaña
yá nun pisó el Molinón
y los amantes quedaron
en Segunda División:
ella pa les Clarises
y elli pal Requexón;
hai que ser fatos del culu
pa nun ver la solución. >>
*************************
La Plaza España ye'l centru vital de la villa. Nella tenemos el Palaciu porticáu con arcos de mediu puntu de los Manrique, Marqueses d'Aguilar de Campoo, d'estilu barrucu del XVI y cantería ornada col escudu familiar. El títulu fuere-y concedíu pols Reis Católicos el 25 de Marzu de 1482.
Un poco apartada, como queriendo pasar desapercibida, la Portada renacentista del Palaciu los Villatorre (llegaron al 1º pisu pero tuvieron que tiralu porque daba solombra a los Marqueses).
Portales de cases-galería acristalaes, l'arrecha Colexata Samiguel col Muséu Sacru, la Fundación Calderón Ruíz, la Casa los VII LLinaxes .... Nun pue menos pa una villa de Realengu concedíu por Alfonso X el Sabiu el 14 de Mayu de 1255.
Al lláu d'esta ilustre Plaza llucen tamién les Places de Torreh.ona, Marmoleh.o, San LLorienzu y Xuan Martín, ente otres ....
************************************
. Salimos de la Plaza bordiando la ilesia Samiguel pa buscar la célebre
Puerta del Hospital o de Les Teneríes, que por dellos nomes se conoz, asina como la Santísima Trinidá, antiguu hospital al que taba yustapuesta y que fuere mandáu construyir por Francisco de Soto* nel sieglu XV. Como emboca na Plaza onde s'asitia la Colexata daquién llámala Puerta de Samiguel.
La Puerta por embagu ye del XVIII talo que la Ponte l'Hospital, con bancos corríos en piedra pa esfrute paseantes como nós, pelegrinos llaceriaos o comerciantes que vienen del sur.
Esta Puerta Les Teneríes - d'arcu mediu puntu - ye d'estilu renacentista y va rematada por un coronamientu neoclásicu onde s'amuesa l'aigla esplayada del escudu d'Aguilar.
Les Teneríes yera'l barriu averáu al Ríu Pisuerga onde gremiu los curtidores trabayaben los pelleyos de los animales. Taba a les fueres porque golía permal, como se pue suponer.
Nesta puerta cobrábase tamién el Portazgu, nome col que ye conocía pola xente.
* Francisco de Soto yera Arcipreste de Fresnu y, amás del Hospital de la Trinidá, tamién mandó construyir na Colexata Samiguel una capiella funeraria, a los pies de la nave de La Epístola, onde él mesmu ta enterráu. Esta ponte presenta una singularidá qu'enxamás viere en dengún otru; los tornamieos tienen unos bancos corríos de piedra, supongo que col envís d'aselar mientres te toca la vez pa pagar.
- ¿Qué faes, ne; ¿tas buscando la moneda pa paga-y a Caronte?.
- Calla, xostrón; voi sentame nesti bancu a la espera que me curen nel Hospital de la Santísima Trinidá; que de tola corte celestial preciso yo, p'alicar d'esta afogaera.
- Pa eso anda menos y paga más.
************************
Pel Paséu de Les Teneríes alcanzamos la Ponte del mesmu nome, que debemos cruciar p'algamar a la Plaza URSI onde alcontramos un Muséu de Talles de Madera.
Empobinamos dica la Cai Tobalina per aciu la Puerta de Les Teneríes más conocida como
La Puerta de Tobalina (fecha con piedra llixero de toba) ta asitiada al sur-este de la muralla la villa (queden güelgues), mesmo al par del Barríu Xudíu, onde pasa un tanto desapercibida al tar enllastrada ente les llamatibles cases adosaes del barriu al que se podía entrar viniendo pel camín de Villallano siguiendo'l marxe esquierdu del Ríu Pisuerga, onde teníen los talleres los curtidores, d'ehí vien el nome de Les Teneríes. Les pieles güelen enforma mal y el ríu, estramuros de la villa, yera un sitiu bien afayaizu pa ello. Tamién a la Puerta del Hospital se la conoció como Les Teneríes porque dambes counicaben cola zona los curtidores. El nome de Tobalina vien de la toba, piedra cola que tán llevantaes la mayoría les cases del barriu.
Asemeya a la Puerta de Reinosa pero ye daqué más simple. Construyida nel sieglu XIV en piedra arenisca y de planta cuadrada caltién un arcu alpuntáu de sillarexu mentanto'l restu del pañu ta fechu de mampuestos.
******************************
Tres l'esfrute pente les cais del Barríu Xudíu salimos de la Plaza Ursi pela Cai Tobalina p'almirar les cases de toba hasta empatar cola antigua Cai Matías Barrio y Mier, onde probablemente entremos a xintar nún de los románticos mesones qu'abelluga; eso sí, tres visitar la cabera puerta del pueblu que nos queda pendiente, la primera y más notable que conocimos al entrar na villa:
La Puerta de Reinosa tamién cobraba portazgu a los productos que veníen de Burgos o de la costa. Presenta un arcu oxival dientro d'un llenzu la muralla de sillares d'arenisca y rematada con mampuestos de piedra caliar. Al esterior l'aigla del escudu d'Aguilar saluda a los ¡Bienllag@s!
El xudíu que la fizo en 1381 debió queda mui satisfechu y quixo que'l so nome quedare n'alcordanza de manera tala que nos dexó una llábana epigráfica nos dos idiomes oficiales: castellán ya hebréu alh.amiáu: <Isaac Zamelek. 1381>, ehí queda eso.
Les puertes de la ciudá, afayaes nun segundu arcu de mediu puntu, taben protexíes por un rastrillu del que se caltienen les güelgues; entá queden los güecos de la tranca. La Puerta de Reinosa ta declarada MNH-A dende 1925.
Al Barriu Xudíu pues entrar per delles puertes, en realidá per toes pero les más afayaices son esta Puerta de Reinosa que venimos de camentar, la del Hospital o Portazgu y sobremanera la Puerta de Tobalina ( o Les Teneríes). En realidá hebo un momento nel que los xudíos debíen tener controláu cuasi tou'l migollu la ciudá con cases, xudería y mercáu: Tobalina, Plaza Ursi, P. Reinosa, Cai Matías Bu. y Mier, Plaza España, Cais del Mercáu, Puente y Pozu ..... Nada queda intramuros la ciudá fuera del so algame. Camiéntase que la ermita asitiada xunto al Portazgu yera la sinagoga. Pero ...
Los xudíos, pueblu migrador, intelixente, y sobremanera emprentador que llegaron a España seguramente en barcos fenicios fue estableciendo na costa pasando darréu al interior. Hai documentos qu'afiten la so esistencia n'Aguilar de Campoo nel sieglu XII onde formen una alh.ama o xudería pa vivir en comuña. La so unidá y capacidá pa espoxigar suel llevar apareyáu'l racismu y esto obliga a dictar lleis como la de 1483, dómina los Reis Católicos, que los obliga a treslladase estramuros la ciudá. Los d'Aguilar merquen les cases les Barriu'l Sutu , a la vera'l Pisuerga, onde tán Les Teneríes o curtidores de pieles (que tan célebres ficieren a los palentinos). Yá na domina visigótica lo tuvieren crudo n'España terminando por ser collaboracionistes de los árabes que los solíen utilizar pa gobernar les numberoses places conquistaes en tan pocu tiempu.
En 1492 los Reis Católicos dicten la espulsión de los xudíos d'España - magar lo qu'agabitaren pa terminar la reconquista - y los d'Aguilar nun son la esceición magar tolo que ficieren por Aguilar: - ¡Hala, a la puta cai!....
Llucísteisvos, Católicos. Salieron pela Puerta de Reinosa, la que se llevantó a cuenta d'Isaac Zamelek, d'orixe xudíu.
Moralexa: <Nesta vida nun convién abusar
pue cayete, fatu, una morrá>; yá lo sabes Messi, dexa daqué pa Djurdjevic.
*****
Bien cerquina la Puerta Tobalina afaya'l Palaciu de Velarde, al que vamos echar una güeyada tres la xinta, o quiciás pela tardiquina, tres una siesta reparadora nel Albergue la Real; esta Ruta de les Puertes de la Muralla ye bien prestosa, pero fraya.
¡Dios, entovía nun acabamos! .... Si nos queda la muralla del Paséu La Barbacana y el tramu de muralla de l'Avenida Ronda.
- Esi dámoslu por vistu que yá pasemos delles veces per delantre.
- Acuéi; vamos descansar un poco que llevamos al llombu media ciudá medieval ....
***************************
¡Quédanos la muralla ... del Paséu la BARBACANA!. Ansí que de la Puerta de Reinosa vamos tirar pela Avenida Ronda dica la plaza Xuan Martín; ehí tenemos precisamente la Cai la Muralla
y serpentiando pel Pozu, Pesquera y la Caleya vamos algamar la Plaza'l Mercáu. Pela Cai del Puente pretendemos alcanzar la muralla del Paséu la Barbacana pero enantes vamos detenenos un momentín pa fotografiar el
Palaciu de los Villalobos-Solórzano que prácticamente ta asitiáu nuna esquina de la Plaza España. Ye un gran edificiu de sillares con llamatibles portones de mediu puntu na fachada principal, amás d'otra puerta más pequeña. El principal lleva guardapolvu ya un gran escudu enriba. A min traime n'alcordanza el neolásicu Palaciu Xovellanos de Xixón, colos sos nobles balcones abiertos al pueblu.
Durante sieglos foi l'abellugu residencial de los miembros del Cabildru la Colexata Samiguel qu'esfrutaben como verderones del clásicu y trabayáu patiu interior.
Anguaño pertenez a <Caja España> , por eso ta como nuevu. (¿Ánde andabeis cuando s'intentó vender el Monesteriu SªMªR ?).
Nel sieglu XIV Aguilar taba arrodiada d'una MURALLA de la que yá pudimos ver dellos llenzos, cubos y puertes. Camiéntase que pudo entamar llevantase nel sieglu XIII darréu la concesión de la Carta Puebla en 1255 por Alfonso X pero esto contradizlo un documentu de compra-venta (1191) d'unes tierres cerca de la Puerta Les Cabezudes por parte del Monesteriu de Santa María; vamos, que'l Sabiu nun tiraba les perres al Ríu (Pisuerga).
El trazáu de la muralla diba de < La Barbacana (W) a l'Avenida Ronda (N) siguiendo pela Cai Constitución (E) y bordiando pela oriella'l Pisuerga (S) hasta zarrar el círculu na Puerta Real, al pie de la Barbacana >.
Magar qu'en tiempos de Pedro I el Cruel sufriera munchos estropicios la muralla entá se caltienen interesantes trozos de la mesma, como vamos a ver:
. Nel Paséu la Barbacana queden 200 m con tres turruxones. El primer tramu, xunto la Puerta Santa María ta mui iguáu con güecos abiertos y altura rebaxada.
. N'Avenida de Ronda hai unos 100 m dividíos en dos tramos de 1,70 m/a; amosando un cubu'l más llargu y pudiendo comprobar el tipu de construcción nel que da a la cai Xuan Martín.
. N'Avenida Constitución caltiense un turruxón (XIV-XVI) defensivu, semicircular y de tres plantes que foi utilizáu como vivienda.
. Xunto a la Puerta Tobalina - al final de Cai Constitución - queda otru llenzu de muralla que foi aprovecháu p'adosar una vivienda na que s'abrieron una puerta y dos ventanes.
. A la vera del Ríu, na Cai del Puente, continúa'l el llenzu que foi tamién aprovecháu pa construyir delles viviendes encastraes na muralla. Nesta zona tamién hai abiertes delles portielles que dan salida al ríu.
. Les intervenciones arqueolóxiques de 2008 ente'l Molín de Malla (San Roque) y Sta María descubrieron un pañu d'unos 30 m/ll x (1,6-2,1) x 1,40 (70 cm a vista).
. En 2014 los arqueólogos alcontraron, onde tuviere la fábrica de Galletes Fontaneda, un tramu de (16 x 1,6 m/a).
Y la gran pregunta: ¿Llegaba la muralla hasta'l castiellu? .... Nun queden güelgues nidies d'ello pero ... Yo tengo lleío que nos baxos del castillu había una puerta que comunicaba cola villa ... ¿Será verdá? ... Polo menos queda guapo, ¿eh?.
************************
PELA REDOLADA D'AGUILAR
Tres visites tenemos feches pela redolada d'Aguilar: A la Ermita Rupestre d'Olleros de Pisuerga, Al Cañón de La Horadada y al Embalse d'Aguilar; tres díes con viaxes nun dan pa más.
Tres un desayunu buffet na Posa Real emprentamos camín d'Olleros de Pisuerga pela carretera Palencia:
- Siempre carretera Palencia - insiste la recepcionista del Hotel, que nos lo esplica nun mapa.
Siempres pela N-611. Queda cerquina, unos 8 km.
Lo primero que queríemos visitar yera la Ilesia rupestre de Justo y Pastor asitiada n'Olleros de Pisuerga (908 m/snm), llocalidá perteneciente a la Ruta del Beseya, nel Camín Xacobéu.
Per una carretera escelente pasamos Valoria d'Aguilar y en menos d'un cuartu d'hora yá tábemos aparcando na plaza'l pueblu, xunto una capiella enllastrada nel cogollu la aldea, por cierto, bien pavimentada. Nun fizo falta preguntar ónde quedaba la ermita porque son dellos los lletreros que te lo indiquen. Entramos por sur nun parque o Área Recreativa a la vera del Pisuerga, al abellugu d'un pinal y frente a un granible pandu; sitiu más afayaizu ye difícil d'alcontrar.
Ensiguida columbramos una especie de torre-escalera de bultables dimensiones que nos llamó l'atención. Lo que sambla ser un turruxón defensivu o vixía ye en realidá una torre-campanariu, desimía de la ilesia, a la que s'accede per un escalerón esterior Dimos una vuelta alredor y la cristiana, faciendo de Naomí Cambel, subió hasta onde'l vértigu-y permitió, dao que carez de barandiella tornamieos:
- Monina, son les torgues de ser guapa. Yo nun amueso cualquier cosa nel mio blog. ¡P'arriba!
Asitiada sobro un montículu caliar, afuracáu na base talo fuere una cripta, esti campanariu del XVIII entamó por ser la espadaña exenta de la ilesia rupestre que s'encuentra a pocos metros.
Turruxón ya Ilesia tán asitiaes na base d'una montaña de roca blanco arenisco, con betes tipo Liesegang (por mor del óxido de fierro), afuracada per uquier y conocida como Monte Cildá onde queden les güelgues d'un castru celta ocupáu más tarde por romanos y visigodos.
La Ermita Rupestre, l'exemplu hispanu más bultable d'esti tipu de ilesia-eremitoriu, ta dedicada a los Santos Xusto y Pastor. Magar un tantu inciertos los sos oríxenes vienen del sieglu VIII cuando los monxox dedicaos al "ora et labora" teníen qu'escondese por mor de les racies mores tres la invasión del 711, pero quiciabes los oríxenes puean ser anteriores.
Damos vueltes, recreándonos nel entornu enantes d'acceder per una rampla-escalera al adriu esterior de la ilesia, una especie de mirador, de forma cúbica, sofitáu en poderoses columnes toscanes capitelaes. Presta contemplar la redolada dende equí: el campanariu desimíu, la viesca de ribera acompasada pol ruxerrux del Pisuerga, la granible vega o la necrópolis furacada na montaña.
L'interior, la ilesia propiamente dicho, ye una ayalga a la que s'accede al traviés d'una portada (1753)con doveles d'arenisca amestaes a la roca formando un arcu de mediu puntu con escudu na clave y que remata nuna moderna espadaña. Ye una sospresa. Sambla ser una ilesia románica de dos naves - separaes por un pilar y tres columnes - cubiertes con bóveda de cañón simulando tar sofitaes n'arcos faxones y que rematen n'ábsides semicirculares abovedaos en fornu. El coru de madera, la sacristía, el batisteriu, el cristucol altar, les policromaes pintures tres del retablu y el coloríu misteriosu que proyecta la lluz esterior al traviés d'unos ventanos nel imafronte dan-y a esta capiella un aldu máxicu que te tresporta a más p'allá. ¡Vete a vela!.
***********************************
Salimos d'Olleros pa dir hasta Les Tuerces pasando por Mave. Sintiéremos falar que nesti pueblu los romanos tuvieren una ceca, una fábrica de perres, vamos, y petecíanos fisgar a ver si quedaba algún vestixu (quiciabes dalguna moneda perdida), güelgues d'un pasáu bultable. Tuvimos que dexar la xubida al Castru de Cildá, que bona pena nos dio, pero a too nun se pue andar.
Enteráremos qu'una cosa ye Mave ya otra Santa María de Mave. Primero alcontramos Mave pero pasamos dafechu y tiramos per aquella llanera hasta Santa María, onde ta'l conventu, lo nueso. Aparcamos delantre la ilesia que magar la espadaña-campanariu nun paecía tener mui bona pinta adosada como ta a una nave de ladrillu vistu que nun diba mui p'allá. Sicasí había un daqué qu'amosaba badagüeyos primorosos: ¡Un nial activu de cigüeña que descansando enriba'l campanariu! .
Siguimos el lletreru del <Hotel Conventu> y vimos que tenía Restaurante.
- El conventu de Santa María ta reconvertíu n'Hotel, y tien restaurente.
- ¿Tas diciéndome que ye la hora'l vermú?
- Non, né; ye que toi arranáu por dir al bañu ....
- Esto ye grandioso pero nun veo actividá; ta to pates arriba y xente trabayando ...
- Bonos díes, señores; ¿tará'l Bar abiertu?
- Sentímoslo abondo pero'l Complexu hoteleru entovía ta zarráu, tamos remocicándolu.
Dimos una vueltuca pela antoxana y salimos ente los xardinos.
- Cuando se remate la obra cuido va tener mui bona pinta; amás tien el Ríu al lláu y cerca tán Les Tuerces, La Horadada, el Castru de Cildá, la Ermita Rupestre ....
Santa María de Mave foi un monesteriu benitu embaxo l'advocación de Santa María la Real col que casi acaba la Desamortización de Mendizabal (1835) de nun ser porque un monxu quedare como párrocu y más tarde fuere declaráu Monumentu Artísticu en 1931 pasando depués a ser reconvertíu n'Hotel-Restaurante al qu'angüaño tán remocicando.
Hestoria: Nun se sabe a ciencia cierta l'entamu del monesteriu pero si sabemos que Mave, en poder de los árabes tres la invasión de 711, foi reconquistada (754) pol xenru don Pelayo, Alfonso I el Católicu, cuando taba tresnando aquello que se conoció como < tierra quemada>: llegaba, reconquistaba y aconseyaba a la xente que colare pal norte col envís de facese fuertes ellí. Toos nun-y facíen casu y preferíen quedase pa repoblar eses zones, tremendamente espuestes a la barbarie, echándo-y munchu cuayu, eso sí. Mave pue que fuera una d'elles y tenemos antecedentes que nos lo amuesen. ¿Nun vos alcordáis que'l cántabru Alfonso I taba casáu con Ermesinda, la fía Pelayo, que tuviere "estudiando" nel conventu benitu de la Foz en, Cillaperlata, onde ta verdadera escultura de la Santina? ... ¿Y nun sabemos tamién - fálase bien d'ello - qu'Alfonso creó un monesteriu benitu na propia Cuadonga? ... Les repoblaciones entamaben per una ilesia, un conventu ya un abá con dellos monxos.
Lo que tamién sabemos ye que Mave yera célebre dende que los romanos crearen ellí una ceca y tamién foi mui conocida en tiempos visigóticos. Y ye que Mave suena a perres ...
Cuando en 1011 Sancho García funda'l Monesteriu d'Oña pa la so fía Tigridia aríma-y como dote dellos monesterios de la zona, unu d'ellos foi Mave. Por cierto, namás morrer l'abadesa oñense (1030) camudóse la regla benita, pol "llibretu del Cluny.
Durante un tiempu debió pasar a manes de los premostratenses de Santa Mª la Real d'Aguilar de Campoo pero en 1121, Doña Urraca - la fía d'Alfonso VI y ma d'Alfonso VII - tornólu otra vuelta a los oñenses. P'acá y p'allá anduvo (Oña-Aguilar) en tiempos d'Alfonso VIII y siguientes llegando a pertenecer a Sancha Ximénez de los Cameros que tres una igua importante na Ilesia dexólu pa Oña.
Foi otra señora, doña Xuana Gómez, la qu'al morrer dexa perres pa tresnar dos naves a la ilesia.
Les grandes reformes vinieren a partir del XVII col claustru neoclásicu asina como bayura de dependencies.
La ilesia de Sª Mª de Mave , d'influyencia borgoñona (cisterciense), ye d'estilu románicu transición siendo llevantada ente los años 1200 y 1208. Llevantada sobro sillares d'arenica blanco tien tres naves de tres tramos caduna con cruceru y triple cabecera semicircular. La nave central lleva bóveda de cañón apuntáu sobro arcos faxones y el cruceru remata nuna cúpula octogonal semiesférica. Nes columnes y capiteles los cistercienses yeren bastante sobrios.
********************
Tres la vuelta afayaiza pela redolada l'Hotel- Monesteriu tornamos a Nave pa tomar un daqué y de pasu entrugar cómo podríemos llegar a Les Tuerces o'l Cañón de la Horadada que taben cerquina. Tuvimos la suerte d'entrugar al Guarda Forestal de la zona:
- Tiráis derecho y namás cruciar la xeneral yá ves la indicación pal Cañón de la Horadada. Podéis dir andando dende equí o aparcar al entamu de la ruta. Ye una sienda ancha y llevadera qu'amás tán iguando los empleaos. Ensiguida vais alcontrar una casona al pie del Ríu (Pisuerga, como non) . Trátase d'una antigua Central Hidroeléctrica yá abandonada.
- Un puru pa esta zona, supongo.
- Y gordu, tenía munchos emplegaos. Munchos vivíen elli mesmo, entá veréis les cases. La cosa del trabayu anda bastante chunga per equí; la GALLETA ye la que nos salva.
- Nes afueres d'Aguilar vese un polígono industrial.
- De Galletes GULLÓN* y Fontaneda, agora nel Grupu SIRO**.
Un poco atristayaos pola murnia situación económica del país salimos camín de La Horadada col enfotu de llegar a Les Tuerces si'l tiempu lo permitía. N'Información y Turismu dixéronnos que podíemos dir hasta Villaescusa de le Torres pa ver primero'l complexu kársticu de Les Tuerces pero la cosa pintó al aviesu: Primero'l Cañón y depués .... En cualquier casu les formaciones rocoses son asemeyaes.
*Con GALLETES GULLÓN, Alberto Fernández campeón:
Ye la única fábrica de tipu familiar que se caltién n'Aguilar de les cinco qu'hubiere nun momentu: Gullón, Fontaneda, Fontibre, Tefe y Ruvil.
La familia Gullón entamó en 1892 con un fornu panaderu, el trigu de les tierrres de Campoo y l'azúcar de les colonies españoles, tou de casa. Tuvo esta galleta la suerte (hai que ganala) de tener d'abanderada a la infanta Isabel de Borbón que un quería ver otres en casa (tampoco hai que pasase, monina, que mira cómo te punxisti. De lo que nun hai dubia ye de la energía que dan ....)
La empresa GULLÓN ye un iconu de la resistencia pos foi capaz a soportar los avantares de la Guerra, la guerra del sector y la reciente crisis industrial. Anguaño ye la mayor d'España ocupando la fábrica una estensión de 120.000 m2. y siendo al empar la más moderna d'Europa. (Por eso les galletes tán tan buenes, agora me lo esplico, yo).
** ¡Qué buenes son les GALLETES FONTANEDA!:
Ye otra de les supervivientes magar los numberosos avantares que sufrió; chapeau, depués de too. El burgalés Eugenio Fontaneda entamó (1881), tres aprender l'oficiu pasteleru en Reinosa, poniendo una empresina familiar n'Aguilar pa facer bizcochos, galletes y chocolate (qué "malaidea", tío ; vas acabar conmigo) y pasando ceo (1918) a los pies del Castiellu d'Aguilar (pero él rezaba a Santa Cecilia). Galletes "María" tenía tecnoloxía Alemana y Suiza
El so fíu Rafael Fontaneda pegó-y a la empresa un emburrión morrocotudu entamando cola producción en cadena (1923) tres contratar a los meyores galleteros vascos y catalanes.
La tercera xeneración con Euxenio (ñetu) tevo mui implicada nel desendolcu turísticu del pueblu. Vinieron crisis y llevóse mal pero tres costoses negociaciones pudo salvase Fontaneda (y Aguilar) gracies a la so inclusión nel grupu SIRO, qu'amás de les galletes ellabora otros productos alimentarios talo pan de molde o especial celíacos (bona idega, hai que tar al día y esperimentar:
"O anovar o finar ").
*** ALBERTO FERNÁNDEZ, el "Galleta": Como amante de la caravana ciclista dende los tiempos de Bahamontes (ganó'l Tour del 59, eh, Peridis) siéntome en deuda con esti campeón que morrió'l mesmu añu que nació'l mio fíu (1984), precisamente cuando venía de recoyer el premiu al meyor deportista español del añu.
Nacíu en Cantabria y criáu n'Aguilar foi ciclista profesional ente los años 1978-84 corriendo nos equipos : Novostil, Moliner, Teca y Zor. Yera escalador puru pero tamién rodaba bien algamando'l top 10 nel Tour del 82, siendo 3º nel Giro y Vuelta del 83 y quedando segundu al añu siguiente, 1984. ¡Menuda Vuelta esa del 84!. Dengún de los grandes (Perico, Lejarreta, Gorospe, Chozas, Belda, Juan Fdez, Saronni o Moser ) pudo col descocíu Éric Caritoux que-y sacó ¡6 segundos! al nuesu mocín, (¡Faltóte namás una GALLETA, rapacín!).
Otramiente Alberto tien munchos trunfos en carreres de menos barafuste, talo: Volta Cataluña, Selmana Catalana, Vuelta a Asturies, Valles Mineros, Trofeo Masferrer, Vuelta al País Vascu y Vuelta a Castiella.
Dexó un gran recuerdu ente los aficionaos al ciclismu de la dómina pos yera bon chaval y compañeru d'equipu.
Tienes el consuelu de tar sapozáu xunto a Bernardo del Carpio viendo planiar eternamente les aigles que vienen de la Peña Aguillón hasta'l Castiellu; les mesmes a les que tu imitabes peles montañes d'Europa. D.E., gallu.
EL CAÑÓN de la HORADADA
Nómase "Cañón de la Horadada" a un beyu que'l Ríu Pisuerga dibuxó nun tarrén caliar ente los municipios d'Aguilar de Campoo (Olleros de Pisuerga) y Pomar de Valdivia (Villaescusa de les Torres) pela zona de Les Lores y Les Tuernes.
La marxe isquierda de la montaña tayada bríndanos un ablucante paisax cubista-impresionista grabáu na roca con Cueves (polo menos 20) habitaes anguaño por bayura de colonies d'esperteyos y aves rupícules onde antaño ¿malvivieren? grupos neolíticos humanos que se sosteníen de la pesca, la caza y d'aquelles primeres semes que los ficieren sedentarios. Viendo esti cañón y les praeríes de los pandos que lu bordien nun ye d'estrañar nun punxieren munchu enfotu en colar d'ellí. De fechu aprucieren güelgues del Paleolíticu, Calcolíticu (ente Neolíticu y Edá de Bronce) , del tiempu los romanos y hasta altomedievales. Ferramienta musteriense C.Corazón y Los Espinos), enterramientos, vasos cerámicos, y una punta de flecha calcolítica .... LLares, cuartos y silos del Bonce demuestren estos asentamientos históricos.
Presta caleyar per esta sienda, sierpe caliar que va ascendiendo hasta nivelate a l'altura de les aigles, símbolu de la comarca d'Aguilar y tol Campoo. Van y vienen , segures de si mesmes, aportando ramines pa dir tresnando'l nial.
A vegaes la roca ta completamente afuracada y tenemos que colar pente cueves rupestres, posibles viviendes de los nuesos ancestros neolíticos.
Embebíos, ascendiendo per esta sierpe caliar, nun reparamos na hora.
- Esto ye más llargo de lo que paez. Si tiramos pa Les Tuerces nun vamos poder dir al Pantanu enantes de xintar; ¿qué facemos?
- Les formes informales de Les Tuerces nun serán mui estremaes de lo que veos equí. Meyor será dir dando la vuelta que nos queda l'Embalse y un buen trote pela villa.
- Sí, nun podemos echar munchu tiempu porque los díes son entá pequeños, a les siete (7) yá atapez.
Tornamos pendientes de les aigles que debíen tar iguando'l nial pa poner un poco más palante
re 2 ó 3 güevos de los que namás saldrá ún palantre faciéndose la pareya cargu de criar la "criatura". Suelen ser monógames y nunca nun cambien de pareya o menos sía por viudedá. Carnívores, présta-yos pola vida'l pescao y equí tiénenlo a güevu.
****************
El PANTANU d'AGUILAR
De Mave fuimos derechos al Pantanu y anque pasamos per delantre casa - Posada Santa María - nin tan siquier paramos y continuamos derechos al aparcamientu qu'hai no que se conoz como "Playa d'Aguilar". Dimos una vueltuca y sentamos a comer nuna mesa puesta a costa fecha por Ayuntamientu: Tortilla, filetes empanaos, quesu, xamón y galletes formen la dieta caleyera d'esta pareya d'aigles que suel analayar per territoriu astur, seique seya comanche.
... L'Embalde d'Aguilar - el más grande de los 5 de Palencia - foi construyíu por Agromán-Ecsa ente 1953-64. La presa tien casi mediu kilómetro de llonxitú (498 m) y el pantanu una capacidá de 247 Hm3 ocupando una estensión de 1646 Ha pertenecientes a los municipios de Salinas y Aguilar midiendo la contorna 55.5 Km. Cuando'l nivel de les agües ta mui baxu puen vese les güelgues de los pueblos qu'anubrió: Cenera de Zalima, Villanueva del Río, Frontada y Quintanilla de la Berzosa.
... Esta presa construyóse col envís d'acutar el calce del Ríu Pisuerga qu'añagaba a vegaes les cais de la villa d'Aguilar controlando les enriaes; abastecer d'agua corriente a los pueblos de la contorna, almacenar agua pal riegu agrícola en tola provincia asina como tamién en Valladolid, Burgos y Zamora. Tamién produz enerxía llétrico y sirve d'esparcimientu per aciu d'actividaes acuátiques completándolo con una playa ¿artificial? ya un Área Recreativa con aparcamientu. Bien cerquina tines el Bar-Restaurante "El CHili", por si te quies poner como un quicu; equí comes cola vista ...
LA TORNA
Pasamos la mañana del sábadu ... paseando pela villa del Sabiu, un percorríu a conciencia tres dexar La Posada en bona hora. Lo primero aparcar nel solar de Fontaneda pa xubir hasta'l castiellu y ferregüeyar la histórica ciudá por cabera vez. Depués los encargos de Galletes Gullón pa tola vasca y al traviés del Barríu xudíu entrar na Plaza España pa inmortalizar palacios, galeríes acristalaes y el Muséu Sacru na Colexata. Un últimu paséu a la vera del Pisuerga inmortalizando na Tableta Samsum agües, pontes, parques, monesterios y casones semimedievales iguaes con tol procuru.
Fuimos a tomar un platu combináu - hai que conducir llixero - al bar de la Estación d'Autobuses pasando embaxo la Puerta de Reinosa. Darréu colamos carretera Santander tres despidinos de Santa Cecilia col noxu de nun poder cariciar el capitel de '' La matanza los inocentes".
En menos de dos hores y media tábemos entrando pela puerte casa; asina da gustu viaxar. ¡Cómo cambió esta España!.
ANEXU 1º : La Primer Vuelta al Mundu
Los llibros d'historia que manexamos el públicu en xeneral nun suelen ser otro que unos panfletos qu'encumen a unos cuantos cabezaleros. Pero tres d'esi aplausu, reconocíu , hai muncha intrahestoria que pocos conocen y menos allaben.
Cuando Magallanes salió del Puertu de San Lucar de Barrameda el 20 de Setiembre de 1519 con 5 naves y 239 navegantes col envís d'alcontrar una ruta marítima a les islles de Les Especies tirando dica occidente naide nun pendaba qu'a a fin diba a completase la primer vuelta al mundu en barcu.
Financiaba la espedición la corona española en manes del nuevu Carlos I, que tenía daquella 18 años. Tres años, menos unos díes, diben emplegar nel cometíu tres perder al comandante Magallanes, 4 naves y 236 homes /265/; namás tornaron 30 al mandu de Xuan Sebastián El Cano que nin tan siquier yera ún de los comandantes priixenios de les naves. Otru de los héroes yera Xuan Martín, natural d'Aguilar de Campoo; vese que les galletes dan munchu aquél.
Los avantares qu'estos valientes pasaron nu tienen contaera n'esti post: Crucieron l'Atlánticu, bordiaron América del Sur pel Estrechu de Magallanes, travesaron l'Océanu Pacíficu y llegaron a Les Marianes pasando cerca d'Australia pa entrar nel Océnu Índicu y llegar hasta África doblando'l Cabu Bona Esperanza y tirar pal norte hasta les Islles Cabu Verde, Canaries y ....¡San Lucar, otra vuelta! .
Yera'l 6 de Setiembre de 1522, el Rei yá s'afeitaba.
Nota: Carlos I lleva al cintu la espada qu'arrampló a Bernardo del Carpiu na tumba de la Peña LLonga, frente al Monesteriu. (Dicen les males llingües qu'a vegaes dormía con ella; suañaba colos hugonotes )
ANEXU II : Renembrando la Hestoria de Bernardo del Carpio
..... Cuido que nun ye preciso escribir nesti post otra vuelta la historia - lleenda - de Bernardo del Carpiu; yá la cuntamos dafechu na entrada anterior :
<¡Bon Camín! [2b] Bernardo del Carpio, la lleenda> pero nun ta demás que faiga equí un pequeñu resume por si daquién nun s'averó al anterior. Nun vos canso, namás cuatro pallabrines.
Cunta la lleenda - daquién afita que la hestoria pue cuadrar dafechu - que Bernardo del Carpio foi un caballeru de la corte d'Alfonso II el Castu que ñaciere de los amores, naturales, de Doña Ximena Froilaz - fía del rei Fruela y la Reina Munia, ya hermana d'Alfonso II - y del conde Sancho (San) de Saldaña, sobrín polo tanto del Rei.
Nada podemos afitar a ciencia cierta que dengún de los tres personax esistiren de verdá, nin Ximena, nin Sancho y muncho menos Bernardo; magar d'ello creóse una lleenda al rodiu d'esti fechu que se caltuvo pelos siglos. Alfonso, solteru, castu y ensin descendencia podía, bien sûr, asociar esti neñu a la corona y nombralu herederu, asina que l'esliz de los amantes creaba un problema seriu d'Estaú. ¿Taben los eternos enemigos familiares d'Alfonso dimpuestos a ello? ... ¿Taba'l Rei pol tal llabor ?.... ¿Dábense otres circunstancies paraleles y favoratibles a la inventio de Bernardo del Carpiu? .... Vamos ver....
El casu ye que - según la lleenda y los cantares de xesta - el guaje ñació ensin que'l Rei se decatare. Pero "lo que nun se pue esconder, queda a pública subasta" y el Rei terminó enterando. Púnxose como un basiliscu y magar el matrimoniu a furto de los pas nun los perdonó; a ella metióla nun conventu y a elli nel cuartón de por vida. El que tuvo más suerte foi Bernardo que se crió na corte d'Uviéu talo un caballeru medieval ensin saber quienes yeren los sos pas. Pero ... Un día enteró y foi reclamar al Rei la llibertá de los pas dao la bayura de servicios que-y tenía prestao.
-¿Soltólu el Rei? ... ¡Non!
La hestoria treslládase a los tiempos d'Alfonso III el Magnu, col que tien una rocea por mor del Castiellu que lu identifica, el del Carpiu, en Salamanca. Cuando a la fin-y concede l'indultu yá ye tarde; llevaba so padre dos díes muertu.
Los cantares de xesta atribúin a Bernardo incuntables fechos memorables pero'l de más sonadía, el que lu pon en "candelabru" ye <La batalla de Roncesvalles> na que foi'l paladín que dio muerte al héroe francés por antonomasía, Roldán. Yá nun fueren los vascos o los árabes, il capo yera Bernardo, al que los cantares encumaren p'enriba del francu.
¿Cuála ye la farda pa qu'esto fuere asina? .... Tres el descubrimientu de la tumba del Apóstol Santiago en Compostela (gracies, según el "Códiz Calistinus" al francu Carlomagno) entamóse una riada de pelegrinaciones al Arca Marmórica como nun se conociera otra; la mayoría yeren francos que favorecíos polos reis hispanos (Alfonso VI lleva la palma) non solo s'asitiaben en territoriu hispanu sinón que diben ocupando los altos cargos de gobiernu y sobremanera les obispalíes. La nobleza hispana nun podía consentilo, taben quedando ensin les canonxíes eclesiástiques y ensin el control del pueblu y de munchos señoríos. Esta nobleza foi la que "catalizó" la lleenda: Enaltar a Bernardo y ablayar a Roldán y a Carlomagno que tenía pretensiones al tronu d'Asturies, l'abanderáu d'aquella dómina pa los cristianos. Esta lleenda afitóse tamién nos fechos d'otros "Bernardos" reales, como Bernardo de Ribagorza, por exemplu.
El Padre Vicente - como muncha xente importante a lo llargo de los sieglos - pensaba que Bernardo del Carpio pudo esistir si la fecha la Batalla Roncesvalles fore treslladada de 778 - cuando ocurrió, realmente, a 808 , cuando Carlomagnu andaba encetáu cola <Marca Hispana>.
Verdá o non, la Parienta y esti que vos entretién fuimos a Aquilar de Campoo estos díes pasaos, agospiamos nun Monesteriu premostratense (dormimos na celda del Abá, como nun podía ser d'otra miente) y pasámoslo de viciu caleyando pola Primer ciudá castellana que tevo CARTA PUEBLA gracies a un Rei Sabiu, Alfonso X; cuasi ná. La redolada d'Aguilar tampoco nun tien desperdiciu; la capiella eremitoriu de "Xusto y Pastor", el Pantanu y el Cañón de la Horadada quedaron pa siempres nel nuesu coral. Entá siguimos adulzándonos coles GALLETES GULLÓN.
Un ABRAZU, COLLACIOS, y fasta ceo; mañana pela mañana (9-3-20) vamos camín de Compòstela cola IMSERSO. Si damos col Apóstol yá vos lo cuntaré; yo caltengo esperances, ¿y tu?...
Si nun tienes fe polos menos fartúcate de galletes, ye los que lleves per delantre.
ESTIMANCES:
. Páxina Web del Ayuntamientu d'Aguilar de Campoo.
. Asociación d'Amigos "Bernardo del Carpio" del Carpio-Bernardo, pueblu de Salamanca.
. A la "Fundación Santa María la Real" pol so valir y el so trabayu entamador.
. A la Asociación ARCO, Amigos del Patrimoniu d'Aguilar de Campoo, que yá somos collacios.
. Blog's: <castillosdepalencia.es>, <asturnatura>, <arteguias.com>, <castillosdelolvido.com>, <románicoaragones@ono.com>. <FRIKIPIEDRAS.blogspot.com>
. Pido prestaes unes semeyes mentanto visito Aguilar a : <A. Andrés>. (Dalgunes voi dexales, Andrés, porque paezme un honor y mereces que se te reconoza'l trabayu).
. A la Wikipedia, onde abebento de contino, como siempres,
. Al blog de Rebeca Gavilán Yela <recuerdosdemimochila>, una visita per Aguilar.
 |
| Alfonso II (Llibru de los Testamentos) |
Cuenten les Cróniques series qu'Alfonso II d'Asturies, conocíu como'l Castu, morriere ensin tener descendencia y que nin tan siquier tuviere la gracia de conocer esposa dala pero ... ¿Sedrá eso verdá del too o será lo qu'interesó cuntar naquellos momentos? ... Porque camienten les males llingües que llegó tar esposáu con Berta, la hermana Carlomagno, ¡hala, vaya braguetazu!, magar nun tuvieren fíos.
Sicasí ¿acabó col Castu la castra de Pelayo?... Porque hai quien afita qu'Alfonso tenía una hermana, Ximena, qu'andando a los sos deleres algamó a tener un fíu natural col Conde de Saldaña, San Díaz.
 |
| <bernardodelarpio.org> |
Y a lo que vamos, pa xustificar la farda d'esti post entendemos que: "Tolo que tien rellación con Alfonso II ye xida a esgaya pa formar parte de la hestoria del nuesu <¡Bon Camín!>".
¿Y nun ye esti Rei Castu'l promotor del <Camín Primitivu>?. Dempués de too ¿nun ta Carlomagno rellacionáu dafechu col Camín Xacobéu cuando en realidá morriere dellos años enantes de dar - descubrir - cola tumba del Apóstol? ... ¿Y nun ye Bernardo coetaneu del Emperador y hasta adversariu suyu en Roncesvalles, según los "cuentos de la llingua afilada"? ... ¿Y nun ye entós Bernardo sobrín del inventor del Camín Primitivu?... Les lleendes surden por una necesidá social como cuido que pasó con esta triste, épica ya apasionante hestoria de Bernardo del Carpiu; por too ello vamos colar hasta Aguilar de Campoo onde los premostratenses afayaron la so tumba y la espada que-y ganó al míticu Roldán; de xuru que, analayando sobro l'aigla del so escudu, alcontrarémos daqué pa cuntavos ....
 |
| Tumba de Bernardo del Carpio. Los héroes nunca nun muerren. Ehí tenéis al nuesu mocín analayando sobro la Peña LLonga. |
***********************************
¿Y si enantes tratamos d'asitianos nel mapa y conocemos daqué al rodiu d'esta villa?. Nunca nun ta demás conocer la so hestoria partiendo de la so situación xeográfica.
 |
| (Semeya idealizada d'Aguilar de Campoo, quiciabes pratrocinada por "Galletes Gullón", de les que yá soi adictu) |
Asitiada al nordeste la Montaña Palentina taba percorría pola calzada romana que xunía Herrera de Pisuerga con Santander. Tamién hai un ramal del Camín Xacobéu que crucia'l Pisuerga nesta zona del <Camín del Norte>: "Ruta del Besaya". Equí crúciase col Camín Olvidáu", esi que va poco percorrieron los nuesos amig@s - Carme y Pepe - a bordu d'una "Madreña Caleyera".
Tien el municipiu de Campoo - del llatín Campodium - perteneciente al "Geoparque de Las Loras" una superficie de 237 km2 ya una población al rodiu los 6920 habitantes, circa los 30 H/km2. Na Edá Media Aguilar pertenecía a la Merindá de Campoo, nel Valle cántabru de Reinosa, xunto con Suso,Yuso ya Enmedio, pero más tarde formó merindá independiente.
Dicen que si anguaño hai daqué que la fai célebre ye la so Industria Galletera per un llau y l'embalse d'Aguilar per otru pero nós sabemos qu'hai más... ¿Nun s'alcuentra la tumba de Bernardo del Carpiu, el nuesu mocín, n'Aguilar de Campoo? ... Pero lo meyor sedrá ponese a caleyar y ... ¡yá veremos con qué nos atopamos!. ¡Venga, vamos p'Aguilar!
*******************************
El Ríu Pisuerga al pasu per Aguilar ...
 |
| Dexo que la to imaxinación navegue pel Pisuerga hasta entrar na Plaza Mayor. |
El Ríu Pisuerga ñaz (1800 m/a) del amiestu de delles fontes cerca de Brañosera (Sierra d'Hijar) esmuciéndose darréu embaxo les montañes. Torna xurdir 3 km más p'alantre, na Cueva del Coble y va corriendo S-O dica la Tierra de Campos pasando per Cervera, Aguilar de Campoo, Herrera, Venta de Baños ... Entra na provincia de Burgos y depués en Valladolid pa embocar, tres 283 Km de percorríu, nel Ríu Duero, per Geria. Tien munchos afluentes como'l Carrión, l'Arlanza o l' Esgueva.
El Pisuerga, al pasu per Aguilar, forma una islla - La Cascah.era - travesada pol Paséu del Llocu que de Santa Clara tien de llevate hasta'l Polideportivu y/o a la Ilesia San Andrés y hasta la mesmísima Peña Aguillón, esi iconu rupestre que prevoca a l' arrecha Torre Samiguel.
****************************
. Cuatro cosines de la HESTORIA d'Aguilar
 |
| Una ayalga de foto tomada de la web del Ayuntamientu. |
"Esperando al Rey" , "La Reina sin reino" y "La maldición de la reina Leonor" . (Tien una triloxía al rodiu la Reconquista qu'habrá que feregüeyar).
Nel añu 822 , tiempos d'Alfonso II el Castu, paez ser que los benitos fundaron n'Aguilar un monesteriu y de 824 ye'l Primer Fueru que se conoz n'España, el de Brañosera (como comentamos aparte) pudiendo considerase como la primer Merindá. Y to esto col enfotu de dir entamando cola repoblación.
 |
| <Esperando al Rey> ye un llibru de Peridis de la dómina Alfonso VIII |
El 14 de Mayu de 1255 tando de visita Alfonso X, el Sabiu, conviértela en villa de Realengu per aciu del Primer Fueru de Castiella (depués vendría'l de Sahagún); privilexu que caltuvo hasta 1332 con unes llendes bien acutaes.
Darréu conviértese en cabecera de la gran Merindá d'Aguilar de Campoo que funcionaba col derechu de behetría o benefactoría, ye dicir, que los vecinos podíen escoyer al so señor ente dellos candidatos, cosa que nun-yos prestó nada a los fih.osdalgos qu'en tiempos de Pedro I, el Cruel,* solicitaron al rei qu'eses tierres pasaren a ser de Señoríu (¡Periquí!... Pero nun hebo nada que facer). Tenía la Merindá 262 llocalidaes y l'alfoz d'Aguilar 34 aldees.
 |
| Alfonso XI y Leonor de Guzmán <Nun perdíen un minutu los dos mancebos, 10 fíos d'estraperlu tuvieron ellos> |
Don Pedro d'Aguilar, fíu d'estraperlu d'Alfonso XI y Leonor de Guzmán, foi titular del Señoríu ente los años 1332 y 1338 asina como de los términos de Llébana y La Pernía pero al morrer ensin descendencia pasó a manes del so hermanu Don Tello de Castiella, que tamién yera conde Vizcaya y Señor d'Aguilar, castañeda y Lara que caltuvieron los descendientres darréu la so muerte en 1370 sacante Vizcaya que pasó otra vuelta a los Reis de Castiella.
Otru de la reciella los 10 foi Enrique II de Castiella, el <fraticida> por cargase al so hermanu Pedro I, qu'en parte buscólo un poco él. Tamién ye conocíu como'l primer Trastámara, dinastía de la que nacería Sabel la Católica, la Gran Reina d'España.
 |
| Palaciu de los Marqueses d'Aguilar na Plaza España |
En 1480 los Reis Católicos creen el Marquesáu d'Aguilar de Campoo siendo don Garci IV Manrique de Lara, ñetu de Don Tello, el Primer Marques d'Aguilar. Ellos fueron, los Manrique dueños y señores - Grandes d'España (1520) - hasta'l desaniciu del Antiguu Réxime nel sieglu XIX.
El Rei Carlos I d'España y V d'Alemania visitó Aguilar en dos ocasiones: 1517 cuando vieo facese cargu del gobiernu de Castiella (España) y en 1522 cuando arrampló cola espada de Bernardo del Carpiu que taba na so tumba (anguaño ta n'Armería Real de Madrid).
Precisaba la fuerza del astur pa controlar l'enorme imperiu que tenía embaxo'l so mandu.
Cuando'l 10 d'Agostu de 1519 partió la espedición de Magallanes de San Lucar de Barrameda a la cata les Islles de les Especies un marineru d'Aguilar diba a bordu, Xuan Martín, que foi de los pocos que llegó con El Cano tres años depués.
 |
| El Molín de Malla. <Debaxo del molín ñació un romeru, quien fuera cortexada del molineru> |
Durante l'Antiguu Réxime Aguilar constituyóse en municipiu constitucional formando parte del Partíu d'Herrera de Pisuerga. Cuntaba daquella (1842) con 186 llares pa 967 vecinos.
A primeros del XIX, durante la Revolución Francesa, los aguilareños pasáronlo fatal cola presencia del exércitu francu que tomaron el conventu les clarises como cuartel xeneral; les monxines salvaron polos pelos, menos mal, pero los ''llibertarios" gavachos dieron fueu al monesteriu enantes de colar.
 |
| Ayuntamientu d'Aguilar |
***
* Pedro I, el Xusticieru: En tiempos de Don Pedro los fih.osdalgos, nobles y caballeros que vieron mui menguaes les sos rentes por mor de la Peste Negra - que mata al mesmu Rei Alfonso XI - y les males colleches solicitaron-y nes Cortes de Valladolid (1351) que los privilexos de behetría que teníen les villes de realengu fueron abolíos y pasaren a ser Señoríos p'asina poder esprimir más a los campesinos y villanos (pequeños burgueses de les nacientes villes).El Rei vio ui menguaos los sos drechos de "fonsadera", "martiniega" y "xusticia". Esto cuéntanoslo per bien el Becerro de las behetría.
*****************************
Enantes d'embredar el camín d'Aguilar facemos un percorríu per internet pa dir ubicándonos. La primer conclusión que sacamos ye qu'AGUILAR de CAMPOO ye una ciudá considerada como Conxuntu hestóricu-artísticu dende 1966 por mor del so padremoñu cultural con edificios o güelgues de calter relixoso, civil y militar; polo que foi y polo que ye: una AYALGA.
 |
| Pa entrar n'Aguilar tienes que pagar El PORTAZGU Tamién se conoz como la "Puerta l'Hospital" . L'Aigla del escudu d'Aguilar preside la entrada. (Tienes bancos pa esperar cola) |
. Les VISITES n'Aguilar:
 |
| L'Aigla del Escudu d'Aguilar |
. La Plaza Mayor: La Colexata Samiguel (1541), Casa los 7 Llinaxes, Casa-Palaciu los
Marqueses d'Aguilar XVI (galeríes acristalaes), los soportales, les terraces, l'ambiente
chigril ....
. Monesteriu Santa Mª la Real (XII) col so célebre Paséu, el Muséu del Románicu, el
Claustru o la Posada (ehí pensamos agospiar).
. El Monesteriu femenín de Santa Clara (XV), con vida monástica, Hospedería y Dulcería.
 |
| Puerta Palaciu Marqueses deVillatorre |
. El Castiellu Medieval (XI-XII), nel Peñón d'Aguilón.
. La Ermita románica de Santa Cecilia (embaxo'l Castiellu) col so Mirador. MHA.
. La Ilesia San Andrés (treslladu d'un antiguu monesteriu, xunto al Castiellu).
. Parque Islla de San Roque, Islla Cascah.era (M. Sta. Clara).
. Les Puertes de la Villa: De Reinosa, El Portazgu (Hospital, xunto Ponte), San Roque (La
Islla), La Cascajera (y Paséu), Tenerías (Molín de Malla). La Barbacana (Sta. Mª o del
Paséu Real). Puerta La Tobalina (c. Casa Marcos Gutiérrez= BºXudíu).
Puerta Palaciu los Villatorre (Plaza Mayor).
 |
| Ponte La Teya |
Turruntero, Ponte de la Teya, .......
. Les Fábriques de "Galletes Gullón" y "Siro" (al pie Sta. Cecilia).
. La Biblioteca de Bernardo del Carpio (equí piérdome yo, verás).
. La TUMBA del Carpiu, la cabera, onde queremos reflexonar y, per aciu d'un alderique col nuesu protagonista poder cuntar la so hestoria:
- ¿Cómo t'enterasti de quien yeres, Nardo? ... ¿Qué te dixo'l Rei Alfonso cuando-y dexixíste la llibertá de to padre? ... ¿ Cómo te sentó que Carlomagno quixere invadir España...? ... ¿Por qué te nomen Del Carpiu?... ¿Cómo foi la pelea con Roldán ?.... Son munches les entrugues que llevamos nel tinteru ...
 |
| N'Olleros de Pisuerga entres n'otru mundu. |
. El Macizu kársticu de Les Tuerces y el Cañón de la Horadada.
. L'Embalse d'Aguilar.
. L'Eremitoriu de los santos <Justo y Pastor>, n'Olleros de Pisuerga.
. Y non tan lloñe ... ¡¡Peña Amaya!!, l'antigua capital del Ducáu de Cantabria.
¡Madiós, y esto sigue! ...
Visto lo visto lo primero al llegar al pueblu sedrá dir visitar la Oficina de Turismu col envís que nos apurran la información afayaizo pa poder trazar un plan; son demasiaes coses .... ¡qué guai!.
***********************************
El viax Xixón-Aguilar, l'agospiu ...
 |
| <Na celda del Abá tuvimos l'honor d'agospiar> |
Yá acutáremos por internet un cuartu pa los díes 13 y 14 de Febreru na Posada del Monesteriu de Santa María la Real, nel barriu del Carpiu nes afueres de la mesma Aguilar de Campoo. Yera'l nuesu petite y cumplióse dafechu.
Salimos el mesmu día 13, xueves, a les 8 la mañana, de Xixón; tenemos l'autopista A-8 al par de casa. Pel camín del norte embredamos dica de Villaviciosa, LLanes, Unquera, San Vicenten la Barquera, Cabezón y Torrelavega. Equí disviamos hacia'l sur pela l'autovía A-6 camín de Reinosa siguiendo la ruta de Palencia que pasa per Aguilar de Campoo. Una romería de viaye per autopista de casa a casa que nos llevó dos relaxaes hores y cuartu pa unos 230 km = (102 x h); pa min ¡una barbaridá!.
- Alonsín, dedícate a les dunes, fíu, que <la cai ye mía>.
Casi nun tuvi tiempu de falar cola muyer (bueno, la muyer conmigo). La verdá ye que da gustu caleyar per esti país; entá m'alcuerdo cuando dellos fines de selmana echábemos tres hores llargues dende LLanes a Xixón.
********************************
< BRAÑOSERA: TERRITORIU COMANCHE >
 |
| Ayuntamientu Brañosera. |
Nun ficimos que pasar Reinosa y viénonos n'alcordanza la visita qu'ha dos años rindiéremos al célebre municipiu de Brañosera, un pueblín de la Montaña Palentina - que mira pa Cantabria - y que tevo l'honor d'obtener la primer Carta Puebla de la que tenemos noticies.
Foi l'añu 824 cuando reinaba n'Asturies Alfonso II el Castu y Brañosera formaba parte d'esti Reinu. Yeren tiempos mui difíciles pos el rei víase negru pa contener les razies de los caldeos, tantu de Hixam, primero, como d'Alhakem depués. Namái unos pocos valientes s'atrevíen a asitiase nos rimeros del reinu; el conde Munio , cola so muyer Argilo foi ún d'ellos. ¡Chapeau, gallu!.
Foi l'añu 824 cuando reinaba n'Asturies Alfonso II el Castu y Brañosera formaba parte d'esti Reinu. Yeren tiempos mui difíciles pos el rei víase negru pa contener les razies de los caldeos, tantu de Hixam, primero, como d'Alhakem depués. Namái unos pocos valientes s'atrevíen a asitiase nos rimeros del reinu; el conde Munio , cola so muyer Argilo foi ún d'ellos. ¡Chapeau, gallu!.
 |
| - Sabes qué te digo, Munio; qu'esti Fueru de 824 va dar munchu que falar ... |
[[Ente los municipios vecinos d'Aguilar alcuéntrase Brañosera,
un municipiu conocíu pola so carta puebla o Fueru
de Brañosera del añu 824 concedía
a Munio Núñez por Alfonso II el Castu. Equí tenemos otru de
los protagonistes d'esta hestoria de Bernardo del Carpiu, cuando esta
montaña palentina pertenecía al Reinu d'Asturies.
Nesti
pueblín tuviemos nós va dos años (2018) precisamente pa confirmar
la realidá d'esos fueros y pudimos, en fin,charrar con Munio un
ratín, na plaza'l pueblu, onde tien una estatua:
- Hola,
Munio; ¿cómo andes?
-
Bien, magar el tiempu. Equí siguimos p'amosar a les futures
xeneraciones qu'hebo una dómina en que'l Rei taba col pueblu y
animaba a la xente entamadoro a asitiar en "territoriu
comanche".
-
Menester tendría, porque venir a estes brañes llaraes d'osos y tan
averaes al vecín musulmán....
-
Ye lo qu'había, manín. Pero nun taba solu, ¿eh?, yéremos dellos
collacios: Valerio, Félix, Zonio, Cristuévalo y Cervello; y les muyeres ¿eh?, nun convién escaecese d'elles.
 |
| - Quedónos planchada, Munio, la Capiella Samartín |
-
Y la to muyer Argilo, ¿llevábalo bien?
-
Meyor de lo que podía pensase. Ella entretenía muncho coles
obres de la Ilesia Samiguel. Salíemos
davezu pela contorna y prestábanos dir a bañanos a los veneros del
Pisuerga, pasiar pela zona d'Aguilar o dir hasta Herrera ....
Subíemos hasta la Peña Amaya, l'antigua capital del ducáu de
Cantabria, y enredábemos colos nuesos fíos pente les figures caprichoses de Les
Tuerces o pescando nel Pisuerga pela zona del Cañón de la Horadada. Vivíemos bien, magar hubiere munchu que trabayar y sobre too andar
siempre sollertes por si aprucíen los caldeos...
 |
| Pa xintar: <La Cueva del Coble>. |
-
Bueno, pero pa subir equí ... había qu'echa-y cuayu, ¿eh?
-
¿Tu xubisti, ¿non?.
-
¡¡¡...!!!
-
¡Que t'afayes, gallu!
Y
colé, sintiendo cómo Munio dexaba una sorrisa tres de min. Esi día xintamos na Cueva
Del Coble una
carne potru que nun tenía oldéu, al endefechu la granible y caldia charra que tuviéremos col dueñu'l Restaurante]]
*******************************
L'arribada
L'arribada
 |
| < Namás entrar n'Aguilar pela Puerta de Reinosa dante unes galletes, comes, y a otra cosa > |
- Vamos ver, rapazos; enantes d'atacar les muralles de la ciudá , como pretendéis, ye presiso trazar un PLAN, andar al debalu ye pa volvese llocos. Yá sabéis lo que dícía aquel xeneral francés: <Pa derrotar al enemigu hai que conocelu>.
- Tampoco va ser mui difícil, ¿eh?, porque esta cuestión yá la tenemos estudiada dende va tiempu.
Lo meyor pa conocer y visitar la villa, que foi de realengu con Carta Puebla (1255) d'Alfonso X el Sabiu , ye siguir el siguiente planing. Mirái, consta de tres rutes estremaes y al empar interrellacionaes pos tou ensambla harmonioso.
Ehí va esti croquis pa visitar AGUILAR y conocer bien la villa :
1. Ruta los Monumentos.
2. Ruta la Muralla (Puertes de la villa).
3. Ruta los Palacios.
4. La redolada del municipiu: Embalse, Cañón de la Horadada, Ilesia Rupestre ...
1. RUTA de los MONUMENTOS.
 |
| < Toi caleyando pel Paséu de LLocu un home cabal, qu'esfrutaba del Pisuerga como pocos. Adoro esta ciudá, ye la hestoria viva d'unos "llocos " de la era medieval. Yo, aguileños, soi como vosotros, tórnome un chaval cuando piso onde pisaron los Alfonsos. En Santa Mª la Real voi echátela, Peridis, a los bolos> |
Más tarde, pol Paséu del Monesteriu, vamos dir a Santa Clara, na Islla del LLocu, pasando les Puertes del Paséu Real y San Roque asina como la Ponte Mayor.
Agora vamos visitar el Centru de la Villa pasando antes pela Ilesia San Andrés, asitiada cerca la Ciudá Deportiva. Salimos de Santa Clara pel Paséu del LLocu dexando a manzorga el Parque Infantil. Una pasarela sobro'l Pisuerga - la Ponte la Teya - déxanos n'Avenida del Soto, yá cerquina la Ilesia.
 |
| Ponte La Teya |
- (Madiós, salimos del Paséu del Llocu pa entrar nel Puente La Teya. Nun-y dixi ná a la muyer pero pensé en cambiar de barriu).
¿Por qué llamen a eso el Paséu del LLocu?
- Más pola maldá de la xente que por otra cosa. En realidá ye un homenax a un paisanín que nun dexaba día del añu ensin visitar esta zona magar el tiempu que ficiere. Tenía una ruta y nun se salía d'ella: Entamaba na Plaza Mayor, tomaba'l Paséu la Cascah.y cruciando la Islla del Parque averaba a Les Clarises pa cruciar el Pisuerga pela Ponte la Teya entrando nel Paséu del Sotu que lu llevaba hasta'l Portazgu pa entrar na Plaza Mayor, onde escomencipiare'l percorríu. Más guapo nun pue ser, esti taba llocu pero de contentu. En realidá yera un home tranquilu, amable y charraba con cualisquiera que-y prestare atención. ¡Viva la llocura!.
- Munches gracies pola información, Señor. (Y yá m'empobino enforma más tranquilu dica la Plaza Mayor)
 |
| Escudu de ZORRILLA Casa Marcos Gutiérrez (Pel Barriu Xudíu) |
Perdémonos ... La Plaza, la Colexata Samiguel, el Muséu Sacru, El Palaciu los Marqueses de Villatorre, el Palaciu los Manrique (¡yá te digo, compañeru!), la Casa de los VII Llinaxes, la Fundación Calderón Ruíz, l'Arcu Portada del Palaciu los Villatorre que quedó ensin rematar porque los caporales, los Marqueses d'Aguilar, nun queríen que nada nin naide-yos ficiere sombra. ¡La envidia!.
Tornamos a casa, fechos polvu cruciando la Puerta la Cascajera y Paséu Real del Monesteriu tres tomar antes un daqué nuna terraza de la Plaza España. Pa la Muralla la barbacana casi nun ficimos nin casu (¡!) porque tábemos mataos; pa mañana.
1.1. El CASTIELLU d'AGUILAR
 |
| El Castiellu d'Aguilar Asitiáu a 970 m/snm y a unos 100 m del nivel del pueblu. Tien Santa Ceccilia a los sos pies. |
Esti edificiu medieval d'arte románico y forma trapezoidal, con cubos nes esquines y otru nel centru de la cara sur, la más llarga, tenía dos entraes: una,apuntada, al este, qu'entá se caltién ya otra al sur-oeste, tapiada dafechu por mor del so mal estáu. De cerca pue comprobase que les muries, de sillarexu (40 - 38 - 31 y 20 m/ll ), dexen enforma que deseyar por mor de delles regalles.
Entamó esti castiellu por un turruxón defensivu - más tarde torre del homenX - en tiempos de la Reconquista (IX), ¿sedría Munio, quiciabes, el primeru en llevantar una torre vixía?... Lo que ye'l castiellu actual tien data del XII, con igües nel XIV y tamién nel XX, cuando yá nun tenía usu poliorcéticu, claro.
 |
| ¿Entramos nel castiellu? |
El castiellu taba protexíu alredor por sendos recintos tamién fortificaos:
.Una portiella xunto la esquina sur-este daba pasu a un recintu esterior, más baxu, del que se caltienen una torre y dos llenzos de la muria.
. Otra portiella al norte daba pasu a otru recintu que s'estiende pol oeste-sur-este-note con tramos de 58 y 68 m/ll del que se caltienen la portiella, dos cubos ya un fosu.
Por mor de la donación del castiellu por parte de Fernando II a la so 3ª muyer el so fíu Alfonso IX
(1171-1230 ) viose obligáu a asitialu al corresponde-y como herencia so madre. L'alcaide Marcos Rodríguez defendiólu de manera tala que'l mesmu Alfonso-ylu devolvió.
En 1517 foi visitáu por Carlos I al que-y llamaron l'atención tanto la so magnífica situación como la so mala loxística armamentística. Durante la Guerra Civil del 36 foi bombardeáu reparándose nos años 60. Les escavaciones de 1986-89 dataron el turruxón primitivu nel X y dieron con un barcal (alxibe) a los pies del mesmu
***
 |
| El Castiellu domina la ciudá d'Aguilar del Campoo y tola redolada. |
La primer tenencia conocida del castiellu túvola Rodrigo González de Lara en 1125, siendo reina de Castiella-Lleón doña Urraca I, fía d'Alfonso VI y ma del emperador Alfonso VII.
En 1183 domina Aguilar y tola redolada don Fernando Núñez de Lara, protexíu d'Alfonso VIII
(1158-1214). Al añu siguiente (4-8-1184) tien llugar n'Aguilar la Xunta Xeneral del Reinu con asistencia del conseyu Real y tolos obispos de Castiella.
 |
| Marquesáu d'Aguilar de Campoo (Semeya: Paliano - Wp) |
<Cuarteláu en sotuer (aspa)> .
L'escudu de los marqueses d'Aguilar - mui guapu, por cierto - tien la forma del típicu español : rectangular, arredondiáu en punta y cuarteláu, nesti casu en sotuer:
1º Cuartel : En campu de gules un castiellu d'oru aclaráu d'azur (Reinu de Castiella).
2º Cuartel: En campu de plata un lleón de gules (Reinu de Lleón).
3º Cuartel: En campu de plata un aigla esplayada de sable (Por Aguilar).
4º Cuartel: En campu de gules dos calderes xaquelaes d'oru y sable, gringolaes de siete cabeces de sierpe en sinople en ca asa (Señoríu de Lara).
La bordura de plata engalanada con siete armiños de sinople.
En timbre la corona del marquesáu.
 |
| Dende'l Castiellu. |
El primer Señor d'Aguilar de Campoo (amu del castiellu) foi don Tello de Castiella (hermanu de Pedro'l Cruel), fíu natural d'Alfonso XI y Leonor de Guzmán, que tamién llevaba los señoríos de Castañeda, Berlanga, Monteagudo, Lara y Vizcaya. En tiempos de los Reis Católicos el castiellu yera heride de Don Garci V Fernández Manrique de Lara, canciller Mayor de Castiella, al que los reis nomaron primer Marqués d'Aguilar de Campoo.
El castiellu foi reformáu nos siglos XII y XIV abellugando n'él al entós arzobispu de Sigüenza, cardenal don Pedro Gómez Barroso (1322-1374), por orde del rei don Pedro'l Cruel (1334-1369); polo visto al clérigu nun-y llevaba'l bazu ver presa a la reina doña Blanca de Borbón (pero home, señor cura, si fuere otra ...)
- Ai, don Pedro; cómo nun-y van llamar el cruel ... Mete presa a la muyer, encierra a so madre, cepilla un hermanu, inténtalo con otru ... ¡Usté ye la virxe!
 |
| Muerte de Pedro'l Cruel B. Duguesclín agabita a Enrique II (Semeya:blogspot.com) |
que matasti ensin xusticia
los meyores del to reinu.
Cepillasti al propiu hermanu
al Mestre, ensin Conceyu,
y a to madre desterrasti
darás-y a Dios cuenta d'ello.
Tienes presa a Doña Blanca
ya anoxasti a Dios por ello
mas si tornes a querella
date podría herederu;
otramiente pue que sepas
has pagar caru'l recelu.
¿Qué salen males les fíes?
farda tuya y mal gobiernu,
y el to hermanu, don Enrique
fairáse cargu del Reinu.
Morrerás a puñalaes
y verás ceo l'infiernu >>
*******************************
1.2. La ILESIA de SANTA CECILIA
 |
| Santa Cecilia |
Santa Cecilia , monumentu históricu-artísticu dende 1963, ye una ilesia románica en sillería del XII, enantada nel XIII y remocicada nos sieglos XVII y XVIII. Tien planta rectangular de tres naves con techume de madera que terminen n'ábsides tamién rectangulares pero con bóveda de crucería mientres el presbiteriu tien forma d'arcu apuntáu.
Pero si dalgo llama l'atención del visitante ye la torre cuadrada de tres palantes con ventanes bífores na segunda que paecen abrise al mundu:
- Quiero que vengáis a visitame pa contemplar los apóstoles tallaos por Ursi y los capiteles decoraos: unos con motivos vexetales ya otros, más llamatibles, con pasaxes de la Biblia talo que "La matanza de los inocentes".
La portada, na fachada sur, cubierta por texaroz con canecinos ye apuntada con cuatro arquivoltes que descansen sobro ocho columnes de bases bien simples, ye pa engañar y lleves el sustu cuando pases al interior pa contemplar el realismu de la so iconofrafía grupal, un luxu asiáticu namás propiu de maestros de postín: El sacrificiu d'Isaaac, La venta de Xosé, lluches de guerreros, animales diabólicos y "la xoya la corona" con <La matanza los Inocentes>: Herodes arrodiáu polos soldaos a degüellu, madres berrando colos oyíos tapaos pa nun sentir los llamentos ... La verdá, Herodes foi bien gochu.
1.3. COLEXATA de SAMIGUEL
"De torre a torre y tiro porque me toca ".
 |
| Los dos finxos de la ciudá: La Peña Aguillón y la Colexata Samiguel |
 |
| La Colexata Samiguel, Plaza España. |
En 1541 accedió a la categoria de Colexata por mor de Xuan Fernández Manrique de Lara, III Marqués d'Aguilar, que-y comió'l tarru al Papa Paulo III cuando taba en Roma d'embaxador de Carlos I. Tan bien lo fizo que la sonadía d'esta nueva colexata anubrió la d'otres de la redolada talo: Samartín de la Escalada ( un abá d'esta llevantó Santa Mª la Real d'Aguilar), Samartín d'Elines (¡Eh, esto nun me gusta nada!; equí tuvimos nós de visita y cantando nun chigre colos parroquianos) y la Sta. Cruz de Castañeda.
 |
| El Cristu xacente. (A min dame mieu) |
Na segunda mitá del XVI dáse-y un pisu más a la torre - nun aguantaba la competencia de Santa Cecilia - y tamién se coloquen el Retablu Mayor, la capiella del Santu Cristu y dellos sepulcros embaxo arcusoliu, talo los de los Marqueses d'Aguilar. La Sala Capitular y la Sacristía son yá obres del XVIII.
DESCRIPCIÓN:
 |
| El Retablu la Colexata |
Apreciense n'esta ayalga dellos estilos perfechamente conxugaos: prerrománicu, románicu, góticu, renacentista, barrocu ya herrerianu. ¿Hai quién dea más?.
De planta rectangular con tres naves cubiertes por bóvedes de crucería más transeptu, cruceru ya un ábside pentagonal de tres pisos y ventanes bífores ya oxivales.
El retablu Mayor caltién una escultura del Patrón: Samiguel Arcánxel y otra de la Virxe de l'Asunción. Na nave de la Epístola puen apreciase la Capiella de los Probes y otra, mui sonada, del Cristu xacente d'Aguilar. Dellos sepulcros de personaxes bien celebraos n'Aguilar complementen esta ayalga arquiteutónica.
1.4. MONESTERIU de Santa Mª la REAL
 |
| Monestriu Santa Mª la Real (Maqueta) (Semeya: Fundación Sta. Mª Real) |
Faru cultural na Edá Media tevo Santa María llarga vida mercé a los flaires premostratenses que nun fueron a aguantar el tirón de la desamortización de Mendizabal en 1835. Anguaño, remocicáu dafechu, abelluga la Fundación Santa María la Real, el Muséu ROM: Románico y Territorio, ye tamién Centru d'Enseñanza (IES, Escuela Idiomes,UNED ) y hasta alberga un Hotel de **** estrelles (onde pienso agospiar , DM, a nun tardar) a pocos metros del edificiu principal.
Gracies a esta fundación podemos contemplar la ilesia primixenia , el claustru cola sala capitular y llocutoriu asina como'l refectoriu y la sala los monxos:
 |
| Planta de la Ilesia y Capiella ROM (Semeya: arteguías.com) |
La ilesia comunica col claustru per aciu de tres puertes nel lladral meridional ya una cuarta asitiada al occidente, na fachada principal, Sobro ella una ventana cisterciense coronada pola célebre espadaña - dos cuerpos y (4+1) güeyos o troneres, - iconu de la Fundación Sta. Mª la Real qu'amuesa nesta ilesia la esposición del ROM, con delles maquetes del románicu palentín.
 |
| Claustru Santa María la Real |
. El Claustru yel prototipu del arte cisterciense magar que los flaires fueren premostratenses. De planta cuadrangular y dos pisos presenta cuatro galeríes o pandes - con bóvedes de crucería - que s'abren al xardín central por arcos oxivales de ventanes trífores separaos por contrafuertes. Los antiguos capiteles hestoriaos foron en so tiempu treslladaos al Muséu Nacional pa evitar el desaniciu.
. Una puerta na panda occidental da pasu a la Sala Capitular, de planta rectangular y bóveda de crucería que s'afita en dos nerviaos pilares centrales.
. El claustru tamién da pasu a otres dependencies monacales como'l llocutoriu abovedáu o'l refectoriu , cola típica arquería ciego. La cilla, la cocina o los dormitorios tán mui iguaos o tresformaos.
HESTORIA del Conventu
 |
| La célebre espadaña de Santa María la Real, ICONU de la Fundación. |
Les visites foron aumentando cola devoción de la xente que decidió quedar a vivir na redolada, orixe de la villa. Hai un documentu de 822 - falsu, por desgracia - que cuenta cómo un sobrín d'Opila llevantó un Monesteriu a San Pedro y Pablo d'Aguilar y que 30 años más tarde (852) recibió una donación familiar del conde Osorio. Yá en 950 Osorio Almírez procedió a una refundación embaxo l'advocación de Samartín d'Aguilar siguiendo, seguramente, la Regla Beneditina.
 |
| Alfonso VIII , el de les <Naves de Tolosa 1212> Llevó los premostratenses a Aguilar |
L' añu 1169 ye fundamental pa la hestoria del monesteriu pos el Rei Alfonso VIII (1158-1214) - el de Les Naves de Tolosa (1212) dónalu a los premostratenses de Sta. María la Retuerta (Valladolid) pasando a nomase Santa María la Real pos el Rei tóma-y munchu apegu y ye entós cuando s'entama col gran edificiu protogóticu. A partir d'esi momentu foron sucediéndose les donaciones, heredaes y privilexos reales algamando a ser un iconu tanto agropecuariu como artísticu y cultural magar que tampoco-y faltaron los pleitos. En 1222 foi consagrada la so ilesia.
Nel XIV enantaron los problemes pa Santa María:
. En 1233 hai una rebelión de monxos escontra l'ába (hai que h.odese).
. Depués vien la Peste Negra y les guerres civiles de los Trastámara (XIV) a toca-yos los pinrreles.
Tienen un repique nel XV pero'l meticón de Felipe II torna colos problemes nel XVI. Otra vuelta vuelve resurdir nos sieglos XVII y XVIII aumentando les sos dependencies pero cola Guerra la Independencia los flaires vense abocaos a tomar unes vacaciones. Cuando tornen l'abá, un lliberal convencíu (yá tien méritu), tien qu'esclaustrar por mor de los carlistes (1833); cola Desamortización de Mendizabal vien-y la puntiella pos nun foi alcontrar comprador pal Monesteriu (sí pa tierres y posaes ya otres dependencies) y foi esbarrumbando pasu ente pasu cuando non saqueáu a conciencia (algunos capiteles consiguieron salvase y tán al abellugu nel Mu. Arqueolóxicu Nal.).
 |
| Dª Berenguela maquinia pa que'l so fíu, Fernando, algame a Rei. (Semeya: Fundacion SMªR) |
 |
| Gracies a Peridis y dellos collacios Doña Josefa de Babia ta pasándolo de vicíu nesti Monesteriu. (Igual la dexó ellí) |
* El llebaniegu José Mª Pérez González "Peridis" - namoráu d'Aguilar y del Románicu - foi, ye, un esclavu-amante del trabayu: arquiteutu, hestoriador, dibuxante, humorista, escritor y sobremanera entamador como lo demuestra cola creación de la "Fundación Santa María la Real del Patrimoniu Históricu":
- <Una ruina pue ser una esperanza>, o'l surdimientu del "ave fénix".
(Espero qu'esti seya'l mio casu. De momentos toi lleendo los tos llibros que me tan prestando un cachu. Doña Berenguela ye'l mio petite, ¡menuda fema!).
1.5. CONVENTU Santa CLARA
 |
| Conventu les Clarises ¡Chisssss!... Nun convién cafiar a les monxines, tán a lo suyo:<Ora et labora> |
 |
| Cerquina del Conventu cuerre en Pisuerga ente la gayola los neños nel Parque Infantil, al lláu del Paséu del Llocu. (Pa que les monxines nun s'aburran encerraes. ¡Vaya supliciu!) |
La ilesia ye d'una nave con cuatro bóvedes de crucería y presbiteriu rectangular.
* Franciscanos y clarises son relixos@s hermanaos n'una Orde fundada por San Francisco d'Asís y Santa Clara d'Asís en 1212 qu'hasta tuvieron una Orde Seglar.
1.6. La ILESIA San ANDRÉS
 |
| San Andrés |
La cabecera del templu consta de tres ábsides, circular el del centru siendo los de los lladrales de cabecera plana.
El transeptu cúbrese con bóveda de crucería.
Los capiteles tán decoraos con motivos bucólicos, tanto animales o vexetales.
2. RUTA de la MURALLA: De puerta en puerta.
Paseando pela villa d'Aguilar
 |
| ¡¡¡ Vamos pal Mercáu !!! Pela PUERTA L'HOSPITAL , si tu pagues el PORTAZGU, entres nel migollu la ciudá al traviés del BARRIU XUDÍU. |
 |
| Planu de la villa d'Aguillar de Campoo (Si ves esto yá nun fai falta que la visites) |
< Monesteriu Santa Mª Real - Paséu del Monesteriu - Puerta Real (P. Barbacana ó Sta María) - Puerta de San Roque (Pª Molín de Malla) - Parque de S. Roque - Ponte Mayor - Paséu la Cascah.era - Parque Infantil (ferregüeyamos Sta. Clara) - Puerta la Cascah.era - Plaza d'España (Colexata, Palacios, Muséu) - Puerta l'Hospital (P. del Portazgu ó P. les Teneríes ó P. Sª Trinidá) - Paséu de Les Teneríes (Ponte) - Puerta de Tobalina (Bu. Xudíu) - Puerta de Reinosa - Avenida Ronda - Santa Cecilia - Castiellu - Paséu de la Barbacana ( MURALLA).
Puerta del Paséu Real onde aprovechamos pa sacar unes semeyes de la puerta y la contorna porque hai un paisase idílicu cola puerta, el Ríu Pisuerga, la Islla de S. Roque, la Ponte Mayor o'l Paséu la Barbacana con restos nidios de la muralla. ¿Lo más candial del pueblu? ...
 |
| Embocando na Puerta del Paséu Real. Vas derechu a la Posada del Conventu. |
***************************
 |
| Puerta de San Roque o Molín de Malla |
La Puerta de San Roque ta al entamu del Paséu La Cascah.era y enfrente la capiella qu'esi santu tien dedicada na islla; pero ye quiciás más conocía como Puerta del Molín del Capitán Malla. seique ye probable qu'antaño fuere conocía la Puerta de Pabones. En cualquier casu trátase d'una puerta bien chula de doble arcu, de mediu puntu la superior ya apuntada la inferior.
********************************
 |
| Puerta La Cascah.era |
La puerta de la Cascah.era, ta asitiada al este del paséu del mesmu nome, al sur de villa.
Nun ye otro qu'un portiellu del XVII del que namás queda un arcu de mediu puntu de sillería arenisca que pudo ser la entrada d'una casona-palaciu cola fachada amirando pal Pisuerga. Ye probable qu'ehí tuviere'l porticu d'entrada.
Apellídase de la Cascah.era pola cantidá de cascayu qu'había nesa zona averada al ríu; nós nomaríemoslo cascayal, como'l prau de güelu.
******************
... Namás pasar la Puerta La Cascah.era entramos nel migollu la ciudá, na Plaza España, lo más ¿guapo?, turístico de la villa seique esta nun fuera la xida del nuesu viaxe; yá sabéis que nós vinimos por mor del astur Bernardo del Carpio, el sobrín "natural" d'Alfonso'l Castu y del conde de Saldaña qu'engatusó a la infanta Ximena col so bronceáu castellanu y aires de trovador. Pue suponese que desendolcare'l cargu de comes palati n'Uviéu durante algún tiempu, qu'aprovechó dafechu. Salió-y torda, al condesu lleonés pero <París bien val una misa>
 |
| Recreación arqueolóxica de la Foncalada (Miravilia Ovetensia) Anguaño atribúyese a Alfonso II, por mor de la epigrafía. |
- el condesu de Carrión -
a da-y al agua al so caballu
de la castra d'asturcón.
Mientres el caballu bebe
siéntese guapa canción,
les aigles, que van suañando,
danse, ¡ai! de capitón.
- Bebi santu, bebi, ho,
que l'agua la Foncalada
ta bendita d'ilusión
y si bebes con procuru
dicen, que vien con perdón.
Mientres el caballu bebe
echa Sancho una canción:
- Bebi, mio caballu, bebi
y encamiéntate al Señor,
que como s'entere'l Rei
va armase la de dios.
El Rei, que lo ta sintiendo,
a la so hermana llamó:
- ¿Sabes, fía, porque clamia
el palafreneru Mayor?
- Nun ye'l mozu , Rei Alfonso,
nun yel mozu , mio señor,
ye'l mayordomu palaciu,
el condesu de Carrión.
- Véolu a sucu baxeru
pa tener cargu d'honor.
Debía de tar glayando,
pos vive equí como Dios.
- Ta mui contentu n'Uviéu,
ta percontentu, Señor,
pero cometió un erru
y nun ye p'abrir el corazón.
- ¿Sabes tu de qué se trata
y nun la sabe'l Señor?
Pues cuntámelo, Ximena ,
por si alcuentro solución.
- Ye que la cosa ye sería,
mui gorda, diría yo;
fuimos xuntos, a caballu
y guañó lo qu'entamó.
- Tas metiéndome medrana
y yá pienso no peor.
- Perdónamos Rei, hemanu,
perdónamos, por favor,
pecamos, somos humanos
seique pecamos d'AMOR.
- Si ye lo que toi pensando
vais pagalo a mogollón,
pos los asuntos d'estáu
nunca nun tienen perdón.
- ¿Y el guaje que yá tuviemos
va pagales polos dos?
- Del guaje, ai, Dios, qué espantu,
voi faceme cargu yo,
pero tu méteste a monxa
y el condesu, pal cuartón;
esi nun ve na vida
otru día más el sol
por abusar de confianza
y metela de tacón.
La política ye serio,
cuando se trata d'honor.
- Bebi mio caballu, bebi,
bebi acibre polos dos
que cuando s'entere'l Rei
va desterrame a Xixón.
El conde Sanz de Saldaña
yá nun pisó el Molinón
y los amantes quedaron
en Segunda División:
ella pa les Clarises
y elli pal Requexón;
hai que ser fatos del culu
pa nun ver la solución. >>
*************************
 |
| La Plaza España, la Mayor Centru neurálxicu de la villa de realengu. |
Un poco apartada, como queriendo pasar desapercibida, la Portada renacentista del Palaciu los Villatorre (llegaron al 1º pisu pero tuvieron que tiralu porque daba solombra a los Marqueses).
Portales de cases-galería acristalaes, l'arrecha Colexata Samiguel col Muséu Sacru, la Fundación Calderón Ruíz, la Casa los VII LLinaxes .... Nun pue menos pa una villa de Realengu concedíu por Alfonso X el Sabiu el 14 de Mayu de 1255.
Al lláu d'esta ilustre Plaza llucen tamién les Places de Torreh.ona, Marmoleh.o, San LLorienzu y Xuan Martín, ente otres ....
************************************
. Salimos de la Plaza bordiando la ilesia Samiguel pa buscar la célebre
 |
| Puerta del Hospital (Semeya: A.Andrés) |
La Puerta por embagu ye del XVIII talo que la Ponte l'Hospital, con bancos corríos en piedra pa esfrute paseantes como nós, pelegrinos llaceriaos o comerciantes que vienen del sur.
Esta Puerta Les Teneríes - d'arcu mediu puntu - ye d'estilu renacentista y va rematada por un coronamientu neoclásicu onde s'amuesa l'aigla esplayada del escudu d'Aguilar.
Les Teneríes yera'l barriu averáu al Ríu Pisuerga onde gremiu los curtidores trabayaben los pelleyos de los animales. Taba a les fueres porque golía permal, como se pue suponer.
Nesta puerta cobrábase tamién el Portazgu, nome col que ye conocía pola xente.
 |
| Xurgando en bolsu. - ¿Fáente falta perres pa pagar el Portazgu? Nun les tener gastao toes en galletes ... |
* Francisco de Soto yera Arcipreste de Fresnu y, amás del Hospital de la Trinidá, tamién mandó construyir na Colexata Samiguel una capiella funeraria, a los pies de la nave de La Epístola, onde él mesmu ta enterráu. Esta ponte presenta una singularidá qu'enxamás viere en dengún otru; los tornamieos tienen unos bancos corríos de piedra, supongo que col envís d'aselar mientres te toca la vez pa pagar.
- ¿Qué faes, ne; ¿tas buscando la moneda pa paga-y a Caronte?.
- Calla, xostrón; voi sentame nesti bancu a la espera que me curen nel Hospital de la Santísima Trinidá; que de tola corte celestial preciso yo, p'alicar d'esta afogaera.
- Pa eso anda menos y paga más.
************************
Pel Paséu de Les Teneríes alcanzamos la Ponte del mesmu nome, que debemos cruciar p'algamar a la Plaza URSI onde alcontramos un Muséu de Talles de Madera.
 |
| Puerta de Tobalina (Les Teneríes) - Entramos al Barríu Xudíu |
La Puerta de Tobalina (fecha con piedra llixero de toba) ta asitiada al sur-este de la muralla la villa (queden güelgues), mesmo al par del Barríu Xudíu, onde pasa un tanto desapercibida al tar enllastrada ente les llamatibles cases adosaes del barriu al que se podía entrar viniendo pel camín de Villallano siguiendo'l marxe esquierdu del Ríu Pisuerga, onde teníen los talleres los curtidores, d'ehí vien el nome de Les Teneríes. Les pieles güelen enforma mal y el ríu, estramuros de la villa, yera un sitiu bien afayaizu pa ello. Tamién a la Puerta del Hospital se la conoció como Les Teneríes porque dambes counicaben cola zona los curtidores. El nome de Tobalina vien de la toba, piedra cola que tán llevantaes la mayoría les cases del barriu.
Asemeya a la Puerta de Reinosa pero ye daqué más simple. Construyida nel sieglu XIV en piedra arenisca y de planta cuadrada caltién un arcu alpuntáu de sillarexu mentanto'l restu del pañu ta fechu de mampuestos.
******************************
Tres l'esfrute pente les cais del Barríu Xudíu salimos de la Plaza Ursi pela Cai Tobalina p'almirar les cases de toba hasta empatar cola antigua Cai Matías Barrio y Mier, onde probablemente entremos a xintar nún de los románticos mesones qu'abelluga; eso sí, tres visitar la cabera puerta del pueblu que nos queda pendiente, la primera y más notable que conocimos al entrar na villa:
 |
| Puerta de Reinosa Entrada n'Aguilar de Campoo |
La Puerta de Reinosa tamién cobraba portazgu a los productos que veníen de Burgos o de la costa. Presenta un arcu oxival dientro d'un llenzu la muralla de sillares d'arenisca y rematada con mampuestos de piedra caliar. Al esterior l'aigla del escudu d'Aguilar saluda a los ¡Bienllag@s!
El xudíu que la fizo en 1381 debió queda mui satisfechu y quixo que'l so nome quedare n'alcordanza de manera tala que nos dexó una llábana epigráfica nos dos idiomes oficiales: castellán ya hebréu alh.amiáu: <Isaac Zamelek. 1381>, ehí queda eso.
Les puertes de la ciudá, afayaes nun segundu arcu de mediu puntu, taben protexíes por un rastrillu del que se caltienen les güelgues; entá queden los güecos de la tranca. La Puerta de Reinosa ta declarada MNH-A dende 1925.
 |
| ¿Sinagoga? |
 |
| La Villa d'Aguilar de Campoo debe muncho a los xudíos, ente otros. |
En 1492 los Reis Católicos dicten la espulsión de los xudíos d'España - magar lo qu'agabitaren pa terminar la reconquista - y los d'Aguilar nun son la esceición magar tolo que ficieren por Aguilar: - ¡Hala, a la puta cai!....
Llucísteisvos, Católicos. Salieron pela Puerta de Reinosa, la que se llevantó a cuenta d'Isaac Zamelek, d'orixe xudíu.
Moralexa: <Nesta vida nun convién abusar
pue cayete, fatu, una morrá>; yá lo sabes Messi, dexa daqué pa Djurdjevic.
*****
 |
| Muralla y Paséu La Barbacana. Empicoretáu nel fondu: El Castiellu |
Bien cerquina la Puerta Tobalina afaya'l Palaciu de Velarde, al que vamos echar una güeyada tres la xinta, o quiciás pela tardiquina, tres una siesta reparadora nel Albergue la Real; esta Ruta de les Puertes de la Muralla ye bien prestosa, pero fraya.
¡Dios, entovía nun acabamos! .... Si nos queda la muralla del Paséu La Barbacana y el tramu de muralla de l'Avenida Ronda.
- Esi dámoslu por vistu que yá pasemos delles veces per delantre.
- Acuéi; vamos descansar un poco que llevamos al llombu media ciudá medieval ....
***************************
¡Quédanos la muralla ... del Paséu la BARBACANA!. Ansí que de la Puerta de Reinosa vamos tirar pela Avenida Ronda dica la plaza Xuan Martín; ehí tenemos precisamente la Cai la Muralla
y serpentiando pel Pozu, Pesquera y la Caleya vamos algamar la Plaza'l Mercáu. Pela Cai del Puente pretendemos alcanzar la muralla del Paséu la Barbacana pero enantes vamos detenenos un momentín pa fotografiar el
 |
| Palaciu Villalobos-Solórzano, propiedá de <Caja España>. (Semeya: Yoli ChamBa) |
Palaciu de los Villalobos-Solórzano que prácticamente ta asitiáu nuna esquina de la Plaza España. Ye un gran edificiu de sillares con llamatibles portones de mediu puntu na fachada principal, amás d'otra puerta más pequeña. El principal lleva guardapolvu ya un gran escudu enriba. A min traime n'alcordanza el neolásicu Palaciu Xovellanos de Xixón, colos sos nobles balcones abiertos al pueblu.
Durante sieglos foi l'abellugu residencial de los miembros del Cabildru la Colexata Samiguel qu'esfrutaben como verderones del clásicu y trabayáu patiu interior.
Anguaño pertenez a <Caja España> , por eso ta como nuevu. (¿Ánde andabeis cuando s'intentó vender el Monesteriu SªMªR ?).
 |
| Muralla nel Paséu la Barbacana (Semeya: Castillos del Olvido) |
El trazáu de la muralla diba de < La Barbacana (W) a l'Avenida Ronda (N) siguiendo pela Cai Constitución (E) y bordiando pela oriella'l Pisuerga (S) hasta zarrar el círculu na Puerta Real, al pie de la Barbacana >.
Magar qu'en tiempos de Pedro I el Cruel sufriera munchos estropicios la muralla entá se caltienen interesantes trozos de la mesma, como vamos a ver:
. Nel Paséu la Barbacana queden 200 m con tres turruxones. El primer tramu, xunto la Puerta Santa María ta mui iguáu con güecos abiertos y altura rebaxada.
 |
| Turruxón-Vivienda (Semeya: A.Andrés) |
. N'Avenida de Ronda hai unos 100 m dividíos en dos tramos de 1,70 m/a; amosando un cubu'l más llargu y pudiendo comprobar el tipu de construcción nel que da a la cai Xuan Martín.
. N'Avenida Constitución caltiense un turruxón (XIV-XVI) defensivu, semicircular y de tres plantes que foi utilizáu como vivienda.
. Xunto a la Puerta Tobalina - al final de Cai Constitución - queda otru llenzu de muralla que foi aprovecháu p'adosar una vivienda na que s'abrieron una puerta y dos ventanes.
. A la vera del Ríu, na Cai del Puente, continúa'l el llenzu que foi tamién aprovecháu pa construyir delles viviendes encastraes na muralla. Nesta zona tamién hai abiertes delles portielles que dan salida al ríu.
 |
| Viviendes adosaes a la muralla (Semeya: A.Andrés) |
. En 2014 los arqueólogos alcontraron, onde tuviere la fábrica de Galletes Fontaneda, un tramu de (16 x 1,6 m/a).
Y la gran pregunta: ¿Llegaba la muralla hasta'l castiellu? .... Nun queden güelgues nidies d'ello pero ... Yo tengo lleío que nos baxos del castillu había una puerta que comunicaba cola villa ... ¿Será verdá? ... Polo menos queda guapo, ¿eh?.
************************
PELA REDOLADA D'AGUILAR
 |
| <EL CAÑÓN de la HORADADA > < Mientres vós coméis fabada viendo xugar al Sporting nós tamos pela Horadada faciendo un pelín de footing. Los dos salimos ganando: vós la panza y nós el jogging> |
Tres un desayunu buffet na Posa Real emprentamos camín d'Olleros de Pisuerga pela carretera Palencia:
- Siempre carretera Palencia - insiste la recepcionista del Hotel, que nos lo esplica nun mapa.
Siempres pela N-611. Queda cerquina, unos 8 km.
 |
| Turruxón-Campanariu d'Olleros de Pisuerga |
Lo primero que queríemos visitar yera la Ilesia rupestre de Justo y Pastor asitiada n'Olleros de Pisuerga (908 m/snm), llocalidá perteneciente a la Ruta del Beseya, nel Camín Xacobéu.
Per una carretera escelente pasamos Valoria d'Aguilar y en menos d'un cuartu d'hora yá tábemos aparcando na plaza'l pueblu, xunto una capiella enllastrada nel cogollu la aldea, por cierto, bien pavimentada. Nun fizo falta preguntar ónde quedaba la ermita porque son dellos los lletreros que te lo indiquen. Entramos por sur nun parque o Área Recreativa a la vera del Pisuerga, al abellugu d'un pinal y frente a un granible pandu; sitiu más afayaizu ye difícil d'alcontrar.
 |
| <San Xusto y Pastor>, Ilesia Rupestre n'Olleros de Pisuerga. |
Ensiguida columbramos una especie de torre-escalera de bultables dimensiones que nos llamó l'atención. Lo que sambla ser un turruxón defensivu o vixía ye en realidá una torre-campanariu, desimía de la ilesia, a la que s'accede per un escalerón esterior Dimos una vuelta alredor y la cristiana, faciendo de Naomí Cambel, subió hasta onde'l vértigu-y permitió, dao que carez de barandiella tornamieos:
- Monina, son les torgues de ser guapa. Yo nun amueso cualquier cosa nel mio blog. ¡P'arriba!
Asitiada sobro un montículu caliar, afuracáu na base talo fuere una cripta, esti campanariu del XVIII entamó por ser la espadaña exenta de la ilesia rupestre que s'encuentra a pocos metros.
 |
| Eremitoriu n'Olleros de Pisuerga (Monte Cildá) |
Turruxón ya Ilesia tán asitiaes na base d'una montaña de roca blanco arenisco, con betes tipo Liesegang (por mor del óxido de fierro), afuracada per uquier y conocida como Monte Cildá onde queden les güelgues d'un castru celta ocupáu más tarde por romanos y visigodos.
La Ermita Rupestre, l'exemplu hispanu más bultable d'esti tipu de ilesia-eremitoriu, ta dedicada a los Santos Xusto y Pastor. Magar un tantu inciertos los sos oríxenes vienen del sieglu VIII cuando los monxox dedicaos al "ora et labora" teníen qu'escondese por mor de les racies mores tres la invasión del 711, pero quiciabes los oríxenes puean ser anteriores.
Damos vueltes, recreándonos nel entornu enantes d'acceder per una rampla-escalera al adriu esterior de la ilesia, una especie de mirador, de forma cúbica, sofitáu en poderoses columnes toscanes capitelaes. Presta contemplar la redolada dende equí: el campanariu desimíu, la viesca de ribera acompasada pol ruxerrux del Pisuerga, la granible vega o la necrópolis furacada na montaña.
 |
| <San Justo y Pastor>, naves y presbiteriu. <Arteguías>, esta semeyina tengo que robávosla porque ta xenial. Gracies y perdón. |
***********************************
 |
| Salimos d'Olleros del Pisuerga al traviésdel túnel de tiempu |
 |
| Santa María de Mave |
Siguimos el lletreru del <Hotel Conventu> y vimos que tenía Restaurante.
- El conventu de Santa María ta reconvertíu n'Hotel, y tien restaurente.
- ¿Tas diciéndome que ye la hora'l vermú?
- Non, né; ye que toi arranáu por dir al bañu ....
- Esto ye grandioso pero nun veo actividá; ta to pates arriba y xente trabayando ...
- Bonos díes, señores; ¿tará'l Bar abiertu?
- Sentímoslo abondo pero'l Complexu hoteleru entovía ta zarráu, tamos remocicándolu.
Dimos una vueltuca pela antoxana y salimos ente los xardinos.
- Cuando se remate la obra cuido va tener mui bona pinta; amás tien el Ríu al lláu y cerca tán Les Tuerces, La Horadada, el Castru de Cildá, la Ermita Rupestre ....
 |
| Monsteriu de Mave convertíu n'Hotel |
Hestoria: Nun se sabe a ciencia cierta l'entamu del monesteriu pero si sabemos que Mave, en poder de los árabes tres la invasión de 711, foi reconquistada (754) pol xenru don Pelayo, Alfonso I el Católicu, cuando taba tresnando aquello que se conoció como < tierra quemada>: llegaba, reconquistaba y aconseyaba a la xente que colare pal norte col envís de facese fuertes ellí. Toos nun-y facíen casu y preferíen quedase pa repoblar eses zones, tremendamente espuestes a la barbarie, echándo-y munchu cuayu, eso sí. Mave pue que fuera una d'elles y tenemos antecedentes que nos lo amuesen. ¿Nun vos alcordáis que'l cántabru Alfonso I taba casáu con Ermesinda, la fía Pelayo, que tuviere "estudiando" nel conventu benitu de la Foz en, Cillaperlata, onde ta verdadera escultura de la Santina? ... ¿Y nun sabemos tamién - fálase bien d'ello - qu'Alfonso creó un monesteriu benitu na propia Cuadonga? ... Les repoblaciones entamaben per una ilesia, un conventu ya un abá con dellos monxos.
Lo que tamién sabemos ye que Mave yera célebre dende que los romanos crearen ellí una ceca y tamién foi mui conocida en tiempos visigóticos. Y ye que Mave suena a perres ...
Cuando en 1011 Sancho García funda'l Monesteriu d'Oña pa la so fía Tigridia aríma-y como dote dellos monesterios de la zona, unu d'ellos foi Mave. Por cierto, namás morrer l'abadesa oñense (1030) camudóse la regla benita, pol "llibretu del Cluny.
Durante un tiempu debió pasar a manes de los premostratenses de Santa Mª la Real d'Aguilar de Campoo pero en 1121, Doña Urraca - la fía d'Alfonso VI y ma d'Alfonso VII - tornólu otra vuelta a los oñenses. P'acá y p'allá anduvo (Oña-Aguilar) en tiempos d'Alfonso VIII y siguientes llegando a pertenecer a Sancha Ximénez de los Cameros que tres una igua importante na Ilesia dexólu pa Oña.
 |
| Sta Mª la Real de Mave (Semeya: Wp) |
Foi otra señora, doña Xuana Gómez, la qu'al morrer dexa perres pa tresnar dos naves a la ilesia.
Les grandes reformes vinieren a partir del XVII col claustru neoclásicu asina como bayura de dependencies.
La ilesia de Sª Mª de Mave , d'influyencia borgoñona (cisterciense), ye d'estilu románicu transición siendo llevantada ente los años 1200 y 1208. Llevantada sobro sillares d'arenica blanco tien tres naves de tres tramos caduna con cruceru y triple cabecera semicircular. La nave central lleva bóveda de cañón apuntáu sobro arcos faxones y el cruceru remata nuna cúpula octogonal semiesférica. Nes columnes y capiteles los cistercienses yeren bastante sobrios.
********************
 |
| Central Llétrica del Cañón de la Horadada |
- Tiráis derecho y namás cruciar la xeneral yá ves la indicación pal Cañón de la Horadada. Podéis dir andando dende equí o aparcar al entamu de la ruta. Ye una sienda ancha y llevadera qu'amás tán iguando los empleaos. Ensiguida vais alcontrar una casona al pie del Ríu (Pisuerga, como non) . Trátase d'una antigua Central Hidroeléctrica yá abandonada.
 |
| Neandertal a la cata les so güelgues ancestrales. ¡SUERTE! |
- Y gordu, tenía munchos emplegaos. Munchos vivíen elli mesmo, entá veréis les cases. La cosa del trabayu anda bastante chunga per equí; la GALLETA ye la que nos salva.
- Nes afueres d'Aguilar vese un polígono industrial.
- De Galletes GULLÓN* y Fontaneda, agora nel Grupu SIRO**.
Un poco atristayaos pola murnia situación económica del país salimos camín de La Horadada col enfotu de llegar a Les Tuerces si'l tiempu lo permitía. N'Información y Turismu dixéronnos que podíemos dir hasta Villaescusa de le Torres pa ver primero'l complexu kársticu de Les Tuerces pero la cosa pintó al aviesu: Primero'l Cañón y depués .... En cualquier casu les formaciones rocoses son asemeyaes.
*Con GALLETES GULLÓN, Alberto Fernández campeón:
 |
| Surtíu de GALLETES GULLÓN, unes mercaes ya otres de baldre; ansí son los vecinos de la Peña Aguillón. |
Ye la única fábrica de tipu familiar que se caltién n'Aguilar de les cinco qu'hubiere nun momentu: Gullón, Fontaneda, Fontibre, Tefe y Ruvil.
La familia Gullón entamó en 1892 con un fornu panaderu, el trigu de les tierrres de Campoo y l'azúcar de les colonies españoles, tou de casa. Tuvo esta galleta la suerte (hai que ganala) de tener d'abanderada a la infanta Isabel de Borbón que un quería ver otres en casa (tampoco hai que pasase, monina, que mira cómo te punxisti. De lo que nun hai dubia ye de la energía que dan ....)
La empresa GULLÓN ye un iconu de la resistencia pos foi capaz a soportar los avantares de la Guerra, la guerra del sector y la reciente crisis industrial. Anguaño ye la mayor d'España ocupando la fábrica una estensión de 120.000 m2. y siendo al empar la más moderna d'Europa. (Por eso les galletes tán tan buenes, agora me lo esplico, yo).
** ¡Qué buenes son les GALLETES FONTANEDA!:
 |
| Homenax a la familia FONTANEDA, ellí onde entamó la producción galletera. Que nunca nun s'acabe. |
El so fíu Rafael Fontaneda pegó-y a la empresa un emburrión morrocotudu entamando cola producción en cadena (1923) tres contratar a los meyores galleteros vascos y catalanes.
La tercera xeneración con Euxenio (ñetu) tevo mui implicada nel desendolcu turísticu del pueblu. Vinieron crisis y llevóse mal pero tres costoses negociaciones pudo salvase Fontaneda (y Aguilar) gracies a la so inclusión nel grupu SIRO, qu'amás de les galletes ellabora otros productos alimentarios talo pan de molde o especial celíacos (bona idega, hai que tar al día y esperimentar:
"O anovar o finar ").
*** ALBERTO FERNÁNDEZ, el "Galleta": Como amante de la caravana ciclista dende los tiempos de Bahamontes (ganó'l Tour del 59, eh, Peridis) siéntome en deuda con esti campeón que morrió'l mesmu añu que nació'l mio fíu (1984), precisamente cuando venía de recoyer el premiu al meyor deportista español del añu.
 |
| Alberto Fernández, ciclista. Gracies, Galleteru, entá m'alcuerdo de les tos fazañes. |
Nacíu en Cantabria y criáu n'Aguilar foi ciclista profesional ente los años 1978-84 corriendo nos equipos : Novostil, Moliner, Teca y Zor. Yera escalador puru pero tamién rodaba bien algamando'l top 10 nel Tour del 82, siendo 3º nel Giro y Vuelta del 83 y quedando segundu al añu siguiente, 1984. ¡Menuda Vuelta esa del 84!. Dengún de los grandes (Perico, Lejarreta, Gorospe, Chozas, Belda, Juan Fdez, Saronni o Moser ) pudo col descocíu Éric Caritoux que-y sacó ¡6 segundos! al nuesu mocín, (¡Faltóte namás una GALLETA, rapacín!).
Otramiente Alberto tien munchos trunfos en carreres de menos barafuste, talo: Volta Cataluña, Selmana Catalana, Vuelta a Asturies, Valles Mineros, Trofeo Masferrer, Vuelta al País Vascu y Vuelta a Castiella.
Dexó un gran recuerdu ente los aficionaos al ciclismu de la dómina pos yera bon chaval y compañeru d'equipu.
Tienes el consuelu de tar sapozáu xunto a Bernardo del Carpio viendo planiar eternamente les aigles que vienen de la Peña Aguillón hasta'l Castiellu; les mesmes a les que tu imitabes peles montañes d'Europa. D.E., gallu.
EL CAÑÓN de la HORADADA
 |
| Si t'encueñes nel < CAÑÓN de la HORADADA> entres n'otra dómina |
Nómase "Cañón de la Horadada" a un beyu que'l Ríu Pisuerga dibuxó nun tarrén caliar ente los municipios d'Aguilar de Campoo (Olleros de Pisuerga) y Pomar de Valdivia (Villaescusa de les Torres) pela zona de Les Lores y Les Tuernes.
La marxe isquierda de la montaña tayada bríndanos un ablucante paisax cubista-impresionista grabáu na roca con Cueves (polo menos 20) habitaes anguaño por bayura de colonies d'esperteyos y aves rupícules onde antaño ¿malvivieren? grupos neolíticos humanos que se sosteníen de la pesca, la caza y d'aquelles primeres semes que los ficieren sedentarios. Viendo esti cañón y les praeríes de los pandos que lu bordien nun ye d'estrañar nun punxieren munchu enfotu en colar d'ellí. De fechu aprucieren güelgues del Paleolíticu, Calcolíticu (ente Neolíticu y Edá de Bronce) , del tiempu los romanos y hasta altomedievales. Ferramienta musteriense C.Corazón y Los Espinos), enterramientos, vasos cerámicos, y una punta de flecha calcolítica .... LLares, cuartos y silos del Bonce demuestren estos asentamientos históricos.
 |
| El Ríu Pisuerga tresnando'l Cañón de la Horadada |
Presta caleyar per esta sienda, sierpe caliar que va ascendiendo hasta nivelate a l'altura de les aigles, símbolu de la comarca d'Aguilar y tol Campoo. Van y vienen , segures de si mesmes, aportando ramines pa dir tresnando'l nial.
A vegaes la roca ta completamente afuracada y tenemos que colar pente cueves rupestres, posibles viviendes de los nuesos ancestros neolíticos.
Embebíos, ascendiendo per esta sierpe caliar, nun reparamos na hora.
- Esto ye más llargo de lo que paez. Si tiramos pa Les Tuerces nun vamos poder dir al Pantanu enantes de xintar; ¿qué facemos?
 |
| Ni neandertales, nin moros, nin romanos, equí namás aigles y peces ..... |
- Les formes informales de Les Tuerces nun serán mui estremaes de lo que veos equí. Meyor será dir dando la vuelta que nos queda l'Embalse y un buen trote pela villa.
- Sí, nun podemos echar munchu tiempu porque los díes son entá pequeños, a les siete (7) yá atapez.
Tornamos pendientes de les aigles que debíen tar iguando'l nial pa poner un poco más palante
re 2 ó 3 güevos de los que namás saldrá ún palantre faciéndose la pareya cargu de criar la "criatura". Suelen ser monógames y nunca nun cambien de pareya o menos sía por viudedá. Carnívores, présta-yos pola vida'l pescao y equí tiénenlo a güevu.
****************
El PANTANU d'AGUILAR
De Mave fuimos derechos al Pantanu y anque pasamos per delantre casa - Posada Santa María - nin tan siquier paramos y continuamos derechos al aparcamientu qu'hai no que se conoz como "Playa d'Aguilar". Dimos una vueltuca y sentamos a comer nuna mesa puesta a costa fecha por Ayuntamientu: Tortilla, filetes empanaos, quesu, xamón y galletes formen la dieta caleyera d'esta pareya d'aigles que suel analayar per territoriu astur, seique seya comanche.
 |
| Al fondu la presa del Pantanu. En primer términu el Barriu d'El Carpiu y La Peña LLonga cola tumba de Bernardo frente al Conventu. |
 |
| Ferregüeyando'l Pantanu dende l'entamu la Playa |
... Esta presa construyóse col envís d'acutar el calce del Ríu Pisuerga qu'añagaba a vegaes les cais de la villa d'Aguilar controlando les enriaes; abastecer d'agua corriente a los pueblos de la contorna, almacenar agua pal riegu agrícola en tola provincia asina como tamién en Valladolid, Burgos y Zamora. Tamién produz enerxía llétrico y sirve d'esparcimientu per aciu d'actividaes acuátiques completándolo con una playa ¿artificial? ya un Área Recreativa con aparcamientu. Bien cerquina tines el Bar-Restaurante "El CHili", por si te quies poner como un quicu; equí comes cola vista ...
LA TORNA
 |
| <Torno a la Patria que me vio nacer, quédame l'alma nun pueblu, SEÑOR sé qu'algún día voi a volver a remembrar les cais del'Aguilar de Campoo> |
Pasamos la mañana del sábadu ... paseando pela villa del Sabiu, un percorríu a conciencia tres dexar La Posada en bona hora. Lo primero aparcar nel solar de Fontaneda pa xubir hasta'l castiellu y ferregüeyar la histórica ciudá por cabera vez. Depués los encargos de Galletes Gullón pa tola vasca y al traviés del Barríu xudíu entrar na Plaza España pa inmortalizar palacios, galeríes acristalaes y el Muséu Sacru na Colexata. Un últimu paséu a la vera del Pisuerga inmortalizando na Tableta Samsum agües, pontes, parques, monesterios y casones semimedievales iguaes con tol procuru.
Fuimos a tomar un platu combináu - hai que conducir llixero - al bar de la Estación d'Autobuses pasando embaxo la Puerta de Reinosa. Darréu colamos carretera Santander tres despidinos de Santa Cecilia col noxu de nun poder cariciar el capitel de '' La matanza los inocentes".
En menos de dos hores y media tábemos entrando pela puerte casa; asina da gustu viaxar. ¡Cómo cambió esta España!.
ANEXU 1º : La Primer Vuelta al Mundu
 |
| La Primer vuelta al mundu diose gracies a ún d'Aguilar de Campoo: Xuan Martín |
Cuando Magallanes salió del Puertu de San Lucar de Barrameda el 20 de Setiembre de 1519 con 5 naves y 239 navegantes col envís d'alcontrar una ruta marítima a les islles de Les Especies tirando dica occidente naide nun pendaba qu'a a fin diba a completase la primer vuelta al mundu en barcu.
 |
| Homenax al aguileñu Xuan Martín, el primer marín que dio la vuelta al mundu. - ¡A la orden de Vuecencia, mio Almirante! |
Yera'l 6 de Setiembre de 1522, el Rei yá s'afeitaba.
Nota: Carlos I lleva al cintu la espada qu'arrampló a Bernardo del Carpiu na tumba de la Peña LLonga, frente al Monesteriu. (Dicen les males llingües qu'a vegaes dormía con ella; suañaba colos hugonotes )
ANEXU II : Renembrando la Hestoria de Bernardo del Carpio
 |
| (freepik.es) |
<¡Bon Camín! [2b] Bernardo del Carpio, la lleenda> pero nun ta demás que faiga equí un pequeñu resume por si daquién nun s'averó al anterior. Nun vos canso, namás cuatro pallabrines.
Cunta la lleenda - daquién afita que la hestoria pue cuadrar dafechu - que Bernardo del Carpio foi un caballeru de la corte d'Alfonso II el Castu que ñaciere de los amores, naturales, de Doña Ximena Froilaz - fía del rei Fruela y la Reina Munia, ya hermana d'Alfonso II - y del conde Sancho (San) de Saldaña, sobrín polo tanto del Rei.
 |
| La Ponte Mayor |
Nada podemos afitar a ciencia cierta que dengún de los tres personax esistiren de verdá, nin Ximena, nin Sancho y muncho menos Bernardo; magar d'ello creóse una lleenda al rodiu d'esti fechu que se caltuvo pelos siglos. Alfonso, solteru, castu y ensin descendencia podía, bien sûr, asociar esti neñu a la corona y nombralu herederu, asina que l'esliz de los amantes creaba un problema seriu d'Estaú. ¿Taben los eternos enemigos familiares d'Alfonso dimpuestos a ello? ... ¿Taba'l Rei pol tal llabor ?.... ¿Dábense otres circunstancies paraleles y favoratibles a la inventio de Bernardo del Carpiu? .... Vamos ver....
 |
| Pel Paséu del Monesteriu |
El casu ye que - según la lleenda y los cantares de xesta - el guaje ñació ensin que'l Rei se decatare. Pero "lo que nun se pue esconder, queda a pública subasta" y el Rei terminó enterando. Púnxose como un basiliscu y magar el matrimoniu a furto de los pas nun los perdonó; a ella metióla nun conventu y a elli nel cuartón de por vida. El que tuvo más suerte foi Bernardo que se crió na corte d'Uviéu talo un caballeru medieval ensin saber quienes yeren los sos pas. Pero ... Un día enteró y foi reclamar al Rei la llibertá de los pas dao la bayura de servicios que-y tenía prestao.
-¿Soltólu el Rei? ... ¡Non!
 |
| Un requexu del cascu vieyu |
Los cantares de xesta atribúin a Bernardo incuntables fechos memorables pero'l de más sonadía, el que lu pon en "candelabru" ye <La batalla de Roncesvalles> na que foi'l paladín que dio muerte al héroe francés por antonomasía, Roldán. Yá nun fueren los vascos o los árabes, il capo yera Bernardo, al que los cantares encumaren p'enriba del francu.
 |
| Fundación Sta Mª la Real |
¿Cuála ye la farda pa qu'esto fuere asina? .... Tres el descubrimientu de la tumba del Apóstol Santiago en Compostela (gracies, según el "Códiz Calistinus" al francu Carlomagno) entamóse una riada de pelegrinaciones al Arca Marmórica como nun se conociera otra; la mayoría yeren francos que favorecíos polos reis hispanos (Alfonso VI lleva la palma) non solo s'asitiaben en territoriu hispanu sinón que diben ocupando los altos cargos de gobiernu y sobremanera les obispalíes. La nobleza hispana nun podía consentilo, taben quedando ensin les canonxíes eclesiástiques y ensin el control del pueblu y de munchos señoríos. Esta nobleza foi la que "catalizó" la lleenda: Enaltar a Bernardo y ablayar a Roldán y a Carlomagno que tenía pretensiones al tronu d'Asturies, l'abanderáu d'aquella dómina pa los cristianos. Esta lleenda afitóse tamién nos fechos d'otros "Bernardos" reales, como Bernardo de Ribagorza, por exemplu.
 |
| Plaza España |
Verdá o non, la Parienta y esti que vos entretién fuimos a Aquilar de Campoo estos díes pasaos, agospiamos nun Monesteriu premostratense (dormimos na celda del Abá, como nun podía ser d'otra miente) y pasámoslo de viciu caleyando pola Primer ciudá castellana que tevo CARTA PUEBLA gracies a un Rei Sabiu, Alfonso X; cuasi ná. La redolada d'Aguilar tampoco nun tien desperdiciu; la capiella eremitoriu de "Xusto y Pastor", el Pantanu y el Cañón de la Horadada quedaron pa siempres nel nuesu coral. Entá siguimos adulzándonos coles GALLETES GULLÓN.
Un ABRAZU, COLLACIOS, y fasta ceo; mañana pela mañana (9-3-20) vamos camín de Compòstela cola IMSERSO. Si damos col Apóstol yá vos lo cuntaré; yo caltengo esperances, ¿y tu?...
Si nun tienes fe polos menos fartúcate de galletes, ye los que lleves per delantre.
ESTIMANCES:
. Páxina Web del Ayuntamientu d'Aguilar de Campoo.
. Asociación d'Amigos "Bernardo del Carpio" del Carpio-Bernardo, pueblu de Salamanca.
. A la "Fundación Santa María la Real" pol so valir y el so trabayu entamador.
. A la Asociación ARCO, Amigos del Patrimoniu d'Aguilar de Campoo, que yá somos collacios.
. Blog's: <castillosdepalencia.es>, <asturnatura>, <arteguias.com>, <castillosdelolvido.com>, <románicoaragones@ono.com>. <FRIKIPIEDRAS.blogspot.com>
. Pido prestaes unes semeyes mentanto visito Aguilar a : <A. Andrés>. (Dalgunes voi dexales, Andrés, porque paezme un honor y mereces que se te reconoza'l trabayu).
. A la Wikipedia, onde abebento de contino, como siempres,
. Al blog de Rebeca Gavilán Yela <recuerdosdemimochila>, una visita per Aguilar.
No hay comentarios:
Publicar un comentario