¡Bon Camín! < ¡ULTREYA! > : Nel Camín Portugués [1]

                                           ¡Bon Camín!

                     Al rodiu'l Camín Primitivu [ III ] : ¡ULTREYA!

                                La cabera estaya del Camín Xacobéu Portugués:

                  <Padrón - Santiago de Compostela>

La meta del pelegrín: < El PÓRTICU de la GLORIA >
CATEDRAL  de  SANTIAGO  de  COMPOSTELA.
(Semeya tomada d'una postal ente limposbilidá del direuto por mor de les obres. Ta al pendiente)

                             Tolos caminos conducen a Santiago, talo qu'a Roma o a Xerusalén, los trés finxos cabezaleros de pelegrinación cristiana nel mundu,. Nós tamos faciendo'l Camín Primitivu, el que va d'Uviéu a Compostela, y yá tamos dándo-y remate (¡!); el Santu ta naguando por venos y nosotros a él.  Los portugueses tamién, solo faltaba, visiten a Xacobu con devoción.
       Por mor de los viaxes del IMSERSO pa xubilaos xurdió la manera de visitar Santiago y d'esta miente fer, al traviés del programa "Turismu de Naturaleza", la cabera estaya del Camín Portugués: <Padrón - Santiago de Compostela>. Paeznos una manera bien digna de "tomar la espuela" no que cinca e esti Camín Primitivu, el primeru que s'estableció pa dir conocer el sepulcru d'aquel Apóstol qu'algamó'l títulu de <Patrón d'España> tres predicar, guapamente, l'Evanxeliu nesta tierra. A nós va aforranos la visita cabera a la ciudá Santa ( o non ...).

       

Caminos Xacobeos portugueses.
(Semeya: wikipedia)

          Como ocurre en tolos sitios nun hai una única manera de llegar a Santiago, los caminos son infinitos, tantos como les persones que los quieran entamar. Sicasí los portugueses tamién tienen dellos caminos oficiales: ún pela costa y dellos pel interior aprovechando a vegaes les  antigues calzades romanes, como la Vía de La Plata Portugesa. Vamos ver:
     . El Camín de la Costa saldría de Setúbal o LLisboa hasta Oporto, tiraría per La Guardia, Bayona, Vigo, Pontevedra, Padrón y yá hasta Compostela.
     . El Camín Central - más al Interior - sal de Llisboa pa Coimbra y tamién s'avera hasta Porto pa llegar a Tuy pasando per Ponte de Lima. De Tuy va a Porriño, Redondela (o Vigo, que nun se nos enfade'l Caballero) y a Pontevedra. Xuntos los caminos de costa ya interior tiren per Caldes de Reis a Padrón y tres fermosu paséu (Ye'l que vamos embredar nós) llegues a la capital espiritual del cristianismu occidental (y del mundu enteru, que equí en Santiago somos toos bien recibíos).
. El Camín de la Plata Portugués (non la Vía de la Plata hispana) que saliendo de Tavira ha pasar per Évora, Castello Blanco, Almeida, Braganza, Verín, Ourense, Lalín y Santiago.

                                                 ********************

PLAZA del  OBRADOIRU, puntu caberu de la RUTA XACOBEA.
Tán n'obres; 2021 ye añu xacobéu y esto tien qu'esllumar. Toi seguru que lo algamaréis y
pa entós nós taremos rematando'l <Camín Primitivu>: ¡El BON CAMÍN!
La  TUMBA  del  APÓSTOL  ye la nuesa META.

       El plan de "Turismu de Naturaleza" pa colos xubilaos por parte del IMSERSO ye facer la cabera estalla oficial del Camín Portugués < Padrón - Santiago> d'unos 25 km, o dalgunos más por mor de les visites optatives, en tres etapines propies pa la edá, que nun tamos pa xatonaes.  Sedrá una cosa aproximativa a esto:

Cabera Etapa del Camín Xacobéu Portugués : <Padrón - Santiago Compostela>
(Semeya: Eroski Konsumer)

   . Día 1º : <PADRÓN-ESCLAVITUDE>, unos 6 km con visita a la ciudá de Padrón ya Iría Flavia,                     antigua capital de la diócesis en tiempos d'Alfonso'l Castu y del obispu Teodomiro.
   . Día 2º : <A ESCLAVITUDE - O MILLADOIRO>, al rodiu los 11 km. Yá en Santiago visita
                  llibre pela ciudá, mui guapo.
   . Día 3º : <O MILLADOIRO- SANTIAGO>, como unos 8 km. Darréu visita guiada pela ciudá                        Santa, Patrimoniu cultural de la Humanidá dende 1985.

P'allá vamos,
dimpuestos a too. 

      Estes tres estayes son les qu'en principiu taben alcordaes pero a la fin foron un pelín tracamundiaes por mor de la bona esperiencia de la nuesa GUÍA: SUSANA. Ye dicir, pa faceles más homoxénees el primer día llégase a "A Picaraña", 2 km más p'allá d'A Escravitude; d'esta miente queden unos 8,5 km de media diaria; bona idea, señora Susana. Les etapes quedaron asina:

        1º .- < Padrón - A Picaraña >
        2º .- < A Picaraña - O Milladoiro >
        3º .- < O Milladoiro - Santiago C. >


             ********************************

                                         << El  VIAXE hasta  Santiago >>


         Xixón, Llunes a 9 de Marzu de 2020.

¡ULTREYA! : La xubilatería asturiano na Estación del ALSA  d'Uviéu camín de Compostela.

       Ye preciso tar na estación del ALSA d'Uviéu a les 8:45 la mañana (yo toi antes) porque l'autobús del IMSERSO embreda a les nueve en puntu (9:30) camín de Santiago Compostela por mor del programa "Turismu de Naturaleza", a la fin de percorrer en tres díes la cabera etapa del Camín Portugués: <Padrón-Santiago>.

Alfonso II , el Castu,
nun requexu de Santiago.
(Tampoco vos matasteis,
xostrones)

       Nós tuvimos la suerte de contar col retueyu que nos dexó a les (8:00) na parada l' ALSA de Xixón y pa les 8:45 yá teníemos les maletes faciendo cola nel Andén nº 39; el de la xubilatería.  Claro, depués tuvimos que tornar ande les oficines pa presentar les credenciales y recoyer los númberos d'asientu permanente pa toes les escursiones de la estancia:
      - Tocáronvos el 45 y 46.
      - Amén.
       Nun día claru y fresquín salimos colos 5' de cortesía que se dan cuando falta daquién, como foi'l casu. A midida que vamos dexando la capital va cubriéndose'l cielu con delles ñubes ablancaes que pa nada menaciaben agua: ¡Coño, tando yo d'escursión cómo va llover! (Claro, qu'esto nun lo sabíen los mios collacios).

( Nota: No que cinca a la semeya la escultura d'Alfons II el Castu dicir que ye d'agradecer pola asturianía pero cuido qu'esti debía tener una sonadía enforma más bultable. ¿Seique nun vos dais cuenta que cuasi too-ylo debéis a elli? ... Xelmírez fizo muncho, pero con trampes, enaltando la figura de Carlomagnu - que pasó de nós dafechu y pa enriba taba muertu - y arrequexando'l valir del Rei astur-vascu, hispanu, gallegu. El día que vea a Alfonso'l Castu na Plaza l'Obradoiru igual vos perdono esti desdexu). 

L'entamu del <¡Bon Camín!>
La Catedral d'Uviéu.

       Amiro pa la torre de la Catedral y faigo alcordanza d'aquel Rei Castu qu'emprimó con tou esto. El foi'l primeru en facer les maletes y tresnar un séquitu que lu llevare hasta'l Campus Stellae porque un emisariu del Obispu d'Iria Flavia, Teodomiro, tuviere-y mandao avisu que n'un vieyu cementeriu romanu, cerca de la diócesis d'Iría, afayóse un sarcófagu mui antiguu col cuerpu incorruptu d'un home decapitáu.

      - ¡¡¡¡Santiago!!! - glayaron al empar les voces d'Iría ya Uviéu que xuníes nos cielos prevocaren una trona escomanada que se sintiere en toa la Europa cristiana (los paganos ficiérense los suecos, pero alpuntaron na llibreta).
       - ¡Teudano, prepáralo too que vamos pa Galicia!
       - ¿Pero qué pasa, Señor; escaecióse-y yá lo d'Ablaña? ... Nun tamos como p'alloñanos de la corte; entá queda munchu zampón qu'allampia pol tronu ...

L'Obispu Teodomiro confirmando l'ARCA MARMÓRICA 
nel Campus Stellae de Santiago Compostela.
- Esti ye Santiago; hai que dar anuncia al Rei Alfonso.

       - El mio fiel Teudano, ¿sabes que cerca de Padrón pue qu'apruciera l'Arca Marmórica?
       - ¿Colos restos de Xacobu?
       - Lo qu'oyes. Tán cumpliéndose los bagagüeyos: Les anuncies del Llibru <Breviarium Apostolorum> (VI-VII) de que Santiago viniere predicar a Hispania y tres tornar a Xerusalén - onde fore decapitáu por Herodes Agripa - los sos discípulos traxeron el so cuerpu a enterrar cerca Iria Flavia, onde predicare; tamién runcien los clamores del
 <O Dei Verbum> (VIII) de Beato proclamándolu como Patrón d'España. Nun podemos quedar quietos,Teudis, hai que confirmar el milagru y aprovechar el so valir  pa la llucha escontra l'infiel. Tenemos menester d'un nuevu líder del cristianismu agora que Carlomagnu yá nun ta. Y esti yá nun pue morrer, ye eternu.
      - Nun ta mal tirao, Señor. Pue sirvir d'aunión ente los nuesos y que tengan daqué más importante polo que lluchar y, de pasu, escaecer un poco la corona. De xuru que francos y navarros van xuncise pa con nós.
      - Ye preciso qu'estudies bien el tarrén pa llevantar una catedralina "in situ". Tien de convertise nel centru de pelegrinación  d'Occidente.
       - ¡¡¡ Trema, Roma !!!.

                                      **************************

La nuesa GUÍA: SUSANA
siempre pendiente del últimu de la fila.
¡¡¡ GRACIES !!!

        Embaecíu como taba nos mios pensamientos ancestrales siento la voz candorosa de la Guía y pienso que ye un ánxel  que me vien a treslladar hasta'l llugar de la inventio:
     - Hola a t@s. Soi Susana, la guía que va acompañavos durante estos cinco díes d'estancia en Santiago. Lo primero que debéis saber ye que diremos siempres nel mesmu autobús coducíu por esti chófer tan modernu que se llama Jaime. Casi la mitá de los asientos, los que veis llibres,  currespuenden a un grupu de madrilanos que llegarán al mesmu hotel que nós n'otru autobús, procedentes del aeropuertu, pero les actividaes fadrémosles xuntos n'esti que tamos. (GRACIES, Jaime; conduces enforma meyor que Fernando Alonso: nin un frenazu, nin un cucurrabucu peles dunes ...Chapeau)
       Agora voi cuntavos p'enriba, a grosso modo, lo que vamos facer estos díes sicasí camiento que yá tenéis una idega:

El Ríu Sar de paséu per Santiago
Parque "Euxenio Granel".

     . Güei, llunes día 9 de Marzu, llegaremos pa la hora de la xinta - sobre la una y media - que sedrá nel propiu hotel, como tolos díes. Fadremos una paradiña a mediu camín pa estirar les pates porque'l viax dura unes 4 hores. Al llegar dexáis les maletes na Sala de Receición hasta depués de comer que será cuando nos dean el númberu d'habitación tres entregar los DNI de cadún.
 La comida a les dos (14:00), sírvesenos na propia mesa, teniendo en cuenta que'l sitiu qu'ocupéis güei va ser el mesmu pa los cinco díes.
 La tarde tendréisla llibre; podéis quedar nel Hotel Congreso o dar un vueltu hasta Santiago, bien andando o n'autobús municipal. La cena, a les nueve (21:00), ye tipu buffet.

Padrón: 
Ríu Sar de Paséu pel Espolón

    . Martes día 10 de Marzu.
Podéis desayunar a partir de les 7 1/2 hasta les 9 pol sistema de buffet. Darréu saldremos dica Padrón pa entamar cola primer estaya : <Padrón - Escravitude- A Picaraña>. En principiu taba previsto finar n'Esclavitude pero vamos fer un par de kms más a la fin de repartir meyor les caminaes; esperiencia.
 La comina nel Hotel Congreso y pela tarde diremos toos xuntos nel autobús hasta Santiago onde tendremos una Visita Guiada pa conocer los finxos de la ciudá: Plaza del Obradoiro y redolada.

Casa-Muséu "Rosalía de Castro"

   . Miércoles día 11 de Marzu.
  Pela mañana 2ª Estaya del Camín: <A Picaraña - O Milladoiro >, unos 8,5 km. Los que cuerran más qu'esperen nel Bar, onde veréis l'autobús de nueso.
      Pela tarde, tres la xinta nel Hotel, diremos toos a Padrón, otra vuelta, pa visitar la Casa de Rosalía de Castro, la Ilesia de Santiago, la Fonte del Carme, el Cai, el Parque y, en fin, conocer un poco meyor la villa onde predicó l'Apóstol.

-¡Santiago Máxicu!

    . Xueves día 12 de Marzu.
          Pela mañana la tercer y cabera estaya pa completar la etapa <Padrón- Santiago>, unos 8 km. La meta ye  na Dársena 23 de Xoan XXIII a les (12:45) onde l'autobús - alcordáivos - nun pue esperar más de 10 minutos.
     Na tarde habrá una visita guiada y voluntaria al <Santiago Máxicu>, esos requexos de la ciudá con hestories interesantes pero que nun suelen apaecer pelos llibros. Remataremos col esconxuru d'una Bruxa ¡auténtica!. La espuela pondrémosla en <Casa Cotón> con una degustación de dulces, quesos, vinos y llicores de la zona.

Pazu "O Faramello"

  . Vienres día 13 de Marzu.
      Pela mañana habrá una visita voluntaria (15 €) al Pazu "O Faramello" que inclúi la cata d'un vinu de la zona.
La xinta a la una menos cuartu (12:45) y darréu viax de torna hasta Uviéu.
     - Espero que lo pasen perbién y naide nun lleve pa casa'l "coronavirus".

                                     ****************************

         Agospiamos nel Hotel Congreso ****, na Rua das Mamoas de Montouto, nº 4, que s'alcuentra nes afueres de Santiago (5 Km), nel Barriu San Saturnino, como a un cuartu d'hora en coche hasta la Plaza del Obradoiru. Tamién se pue dir n'autobúes (nº 6) o en tren. Esto tien bona pinta.

Cuartu nel "Hotel Congreso"

        El cuartu que nos dieron yera una pasada: Cuatro cames repartíes en dos estancies contigües, con mesa individual, que daben a la cai ya un xardín. Un bañu ampliu ya una neverina (na que nun reparé hasta'l segundu día) completen l'ayalga.
      La comida de bienllegada tuvo bien: Fideguá y carne asao regao con viño da terra.
     Tres un siesta reparadora empobinamos carretera Santiago pa pasar la tarde y dir afinando la pata.
      - ¿Hai  muncho d'equí a Santiago, Señora?
      - Qué va, meu neñu; unos 5 km, eso non he nada pa vosotros.
      La señora que taba regando les plantes de la entrada semblaba ser la dueña mayor de la propiedá pero yá dedicada a los deleres propios de la edá.Vese que taba avezada a dir a Santigo, otru tiempu, andando. Ya eso foi lo que nós ficimos; a les 5 y media caleya pa la ciudá. Prisa, cero.
      Casi tol camín había cera o bien un arcén anchu magar que dacuando yera preciso cambiar de mano; eso nun nos prestaba nada. Pasamos la Urbanización Sadurniño, el Parque Montouto, Os Tilos  y l'Outeiro.

Charrando con José Martí, 
l'héroe independentista cubanu.
-¿Independencia?... ¡Vas arreglada!
A aguantar pol carcamal, monina.

       Poco antes d'entrar, nos rimeros de la ciudá bañaos por ríu Sar, vimos una indicación a mandrecha que t'empobinaba a la "Ciudá de la Cultura" de Santiago pero pasaben yá de les seis y media (>6:30) y nun quedaba tiempu pa saborguiala como Dios manda pos la torna yera empruna y metíasenos la nueche enriba nun tramu desconocíu pa nós; <otra vuelta>.
      Lo más que ficimos foi sacar unes semeyes nel Parque Euxenio Granel, una zona bien allegada por mayores, deportistes  y pas/mas con rapacinos.
      Llegamos poco antes de la cena, xusto pa tomar una ducha y baxar fer buffet. Enantes de dir pala cama nun podía faltar el carih.illu de coñac, tan propiu d'estes vacaciones ensin volante.

                                 
                                      *************************
Martes, 10 de Marzu de 2020.    
                                      Día segundu. Primeru caminada:  Estaya 1ª
                
    <Padrón - A Esclavitude - A Picaraña (8,5 km)>

¡Equí entamó too! PADRÓN (aniciu de la Ruta): Vista dende l'antoxana'l  Monesteriu del Carme. 
Cerca d'esta ponte, qu'enllaza L'Espolón cola Ilesia de Santiago, foi onde varó la "barca da pedra" col cuerpu de Santiago.

          Llevantamos a eso de les ocho y tres la oportuna ducha baxamos a desayunar. Un buffett abondosu con zusmiu, macedonia, café, tostaes, panes y dulces estremaos amás d'algunes frutes de la época. Ponémonos como quicos; nun ye que haya qu'andar muncho pero pa nós esto de cañeyar en grupu va faciéndose avegoso, los años y sobremanera'l baltu son los que marquen el ritmu y non los compañeros de fatigues.
        Tenemos l'autobús preparáu pa llevanos hasta Padrón, na redolada la ponte sobro'l Ríu Sar d'onde vamos entamar.

Salimos dende la Plaza d'Abastos
onde quedáremos aparcaos. 

        A les 9 y media tábemos camín de Padrón y a les diez (10:00) aparcaos frente  la Plaza d'Abastos de la capital de los pimientos.
      Equí tamos dispuestos a emprentar cola primer caminada que tien de pasar pelos municipios de Padrón, Teo, Ames y Santiago. Fai un día perguapu p'andar: claru y frescu.
      De Padrón y tolo que significa vamos falar depués pos vamos volver pela tarde a conocelo meyor: La so Ilesia, la Ponte, la Fonte del Carme, la casa Rosalía, la villa y el Xardín Botánicu.

                                         ***********************************

Ilesia de Santiago de Padrón, al cabu l'Espolón: 
Entamu la 1ª Estaya 
Rosalía delantre <el templu que quixi tanto>

     Vamos entamar la caminada dende un puntu emblemáticu de Padrón, al pie la Ilesia de Santiago, nun cabu del Paséu del Espolón, a la vera de la  Ponte sobro'l Sar, mesmo onde l'Obispu Xelmírez determinó construyir un Puertu que comunicara la ciudá cola mar per aciu de la Ría del Ulla, onde emboca'l nuesu Ríu. Anguaño yá nun ye posible pasear pel Cai dao que nel sieglu XVII les riaes y ábanos de sable camudaron el cursu de la Ría faciendo inservible'l  puertu. Debía ser de siempres un puntu conflictivu porque precisamente equí foi onde encalló la <barca da pedra> na que los discípulos tresportaben el cuerpu de Santiago. El piedrón onde se vieron obligaos a amarrar la barca entá se caltién al abellugu na Ilesia de Santiago que tenemos delantre nós y que namás vamos ferregüeyar per fuera pos güei pela tarde pasaremos el día en Padrón pa conocelo meyor..... ¿O .... cuido que te petez un trailer daqué yá ? .... Pos venga, nun nagües. ¡Ehí va un avance de la tarde!                                                               

                              ********************************

Baxu paliu. Nel Paséu del Espolón
Ana y Pepita encamentándose a Rosalía "En las orillas del Sar"
y rezando a Santiago - tán mirando pa la Ilesia -
 pa que'l "coronavirus" nun nos faiga tornar pa casa antes de tiempu.
(Entá nun yéremos conscientes de lo que s'avecinaba. El Gobiernu tampoco, pero tuvimos suerte; gracies a Xacobu.)

               Pela tardiquina del Miércoles 11 de Marzu daremos daremos una vuelta per Padrón pa conocer esta ciudá romana que tevo l'honor de recibir el cuerpu xacente (los restos) de Santiago procedente de Xerusalén (Jaffa=Tel Aviv).

PADRÓN
      

PADRÓN: La ciudá Flavia onde avaró'l cuerpu de Santiago procedente de Jaffa.  Siempre anubierta por mor d'ábanos y riaes
construyó una canal pa disviar les agües crecides del Sar al Ríu Ulla. ¡Salvaos!

       Padrón ye un conceyu d'A Coruña, na Comarca del Sar, que pertenez a la Comunidá de la nuesa vecina y amada Galicia.
Tien una superficie de casi 50 km2 ya una población d'unos 8700 habitantes, casi 180 h/km2.
Compónenla cinco parroquies : San Pedro de Carcacia, Santa Mª de Cruces, Santa Mª d'Herbón, Santa Mª d'Iría Flavia y el Padrón de Santiago Apóstol.
        Padrón < pedrón = piedra o altar dedicáu al dios Neptuno que s'alcontraba a la oriella del Ríu Sar y anguaño ta abellugada na Ilesia parroquial del pueblu, Santiago de Padrón.

Hestoria de Padrón:

            P'averanos a la primer rellación colos padroneses tenemos qu'alluganos a les mámoes (túmulos) de la Paradegua o a los petroglifos de Bouza Abadín, nel vecín ayuntamientu de Dobro; o al castru de Picadizo (Rois), o al castru Valente (Herbón) , ¿y por qué non al míticu y llexendariu Castru Lupario?

Ríu Sar. 
Non mui lloñe taba'l célebre Puertu
navegable pela Ría d'Arousa hasta'l Mar.

      Ye la llegada de los romanos, nel 26 e.X., lo que pon a los pedroneses nel mapa creando la ciudá d'Iría que los Flavios (69-96 d.X.) convirtieron n'Iría-Flavia.
Anguaño Iría ye una parroquia que nun dista  2 km de la capital, Padrón. Naquella dómina la xente dedicaba a l'agricultura  y a la pesca, teniendo en cuenta qu'esta comarca ta bañada polos ríos Sar y Ulla y yera navegable pola Ría dende'l Puertu de Padrón hasta la mar, a menos de diez kilómetros (<10 km).
      Precisamente'l Puertu marcó la hestoria d'esta villa pola so importancia pesquera y comercial pero algamó'l cume cuando ente los años 820 ya 830 - non 813* - apruz el sepulcru de Santiago na viesca de Llibredón, a 25 km de Padrón. Daquella yá tenía Iría Flavia sede arzobispal siendo'l so obispu' l cuciu  Teodomiro (819-847) que nun tardó cinco minutos ponelo en conocimientu del Rei Alfonso II el Castu que tenía la capital n'Uviéu. Sí l'Apóstol Santiago morrió nel 44 d.X. en Xerusalén ¿cómo llegó'l so cuerpu a Compostela? ....
      Dende'l puertu de Jaffa (Tel Aviv - Israel) - tres ser decapitáu por Herodes Agripa - foi treslladáu per mar hasta la bocana del Ulla y  darréu xubiérenlu < nuna barca da pedra **> pela Ría hasta llancar onde más tarde s'instalare'l Puertu del Padrón.  Pa más seguridá llevaríase'l cuerpu per tierra hasta la viesca LLibredón (Compostela) guardándolu nun mausoléu romanu xunto colos dos collacios de prédica,Teodoro y Anastasio, que fueren los encargaos de la traslatio. Esti camín <Padrón-Santiago> ye'l que vamos siguir nós - ¿hai quién dea más?- y dir descubriendo al tiempu dalgún de los misterios qu'arrodien esti fechu milagrosu.

El sosias de Xelmírez contemplando les obres

     .. El Puertu algamó sonadía tala por mor del Apóstol que'l pueblu d'Iría (Padrón) terminó por ser un reclamu universal tanto pa pelegrinos como pa wikingos o árabes polo que nos sieglos vinientes IX, X y XI foi tan visitáu qu'Alfonso V (999-1028) viose obligáu a iguar les Torres del Oeste (antiguu castellum romanu, onde naciere Xelmírez). Esto dio llugar a unos sieglos XII y XIII mui granibles gracies, ente otros, al citáu Obispu de Santiago Diego Xelmírez; elli foi'l que construyó un cai (3***) a la vera del Sar, onde anguaño s'asoleya la Ilesia de Santiago. Equí llegaron de les Indies los "pimientos del Padrón", qu'en realidá son d'Hebrón. (¿Será cosa de los flaires d'esi monesteriu, camiento yo?). .......................
    Yá pueo contestate esta pregunta afirmativamente pos foron los flaires los que traxeron la grana los pimientos d'América pa plantalo nos güertos del Monesteriu d'Herbón, que ta a nada de Padrón.

* 813 non foi l'añu del afayu del sepulcru porque Teodomiro entá nun yera obispu D'Iria Flavia neses feches. Eso fuere un inventu de los promotores del Códiz Calistinus pa fer parte a Carlomagnu - que morrió nel 814 - de la "inventio", dao que yera'l Rei (Emperador ) más importante de la dómina.     Na Ilesia de Santiago de Padrón camienten que la fecha pudo ser 820, un añu depués que Teodomiro fuere consagráu como obispu d'Iria (819-847); ye como si tuviere esperándolo, naguando por ello. 

** <Barca da pedra> ye una barca que tresportaba "pedra" pel entornu de la Ría del Ulla, non que fuere la barca de piedra, que'l "Ribeiru" nun da pa tanto. 

*** El Cai o muelle que construyó Xelmirez esanició nel XVII  por mor de les riaes del Sar que camudaron l'entornu de la Ría. D'estos astilleros salieren les primeres galeres que tuvo l'Armada Española, ¡toma esa!.
                                                                                   

                                           ***************************

La Ilesia de Santiago ta a manzorga, namás cruciar la célebre Ponte de Santiago y a mandrecha L'Espolón

            La Ilesia de Santiago de Padrón tien la so hestoria. Lo que vemos, del XIX, nada tien que ver con aquella ilesina primitiva - prerrománica - que mandare llevantar l'obispu Gundesindo enantes de 924 (X).
Cuando en 1095 se tresllada la sede obispal d' Iria a Compostela  esta ilesia prerrománica va perdiendo importancia, non asina la villa de Padrón que por mor del Cai que tresnare Xelmírez va algamando más sonadía al convertise nel puertu del espoxigante burgu de Santiago. Sicasí al consiguir Xelmírez l' Obispáu (1100) entama una serie de reformes nes ilesies qu'afeuten a la ilesia de Padrón:
              - ¡Pero esto que va ser, carayu!. 
             ¡¡¿La primer ilesia del cultu xacobéu fecha una triste llaceria ?!!
             ¡¡¡ Manes a la obra !!!

Portada de la Ilesia "Santiago de Padrón".

        En 1133 llevántase una ilesia nueva de planta basilical < trés naves con trés ábsides colos sos respeutivos altares> - calteniendo'l primitivu de la dómina Rudesindo - mentanto toles collacies de la redolada, promocionaes por Xelmírez, namás teníen una nave. Por si fuere poco, al llau, llevantóse un Palaciu Episcopal, onde los prelaos compostelanos veníen aselar davezu (y a tastiar la "llamprea", que me lo tienen cuntao "sotto você", a la oreya, vamos)
     Tres del Añu Santu de 1456 la Ilesia de Padrón algamó delles ya importantes reformes gótiques siguiendo les instruiciones del Obispu Rodrigo de Lluna (1449-1600): añédense-y dos torres ya un Hospital de pelegrinos nuevu ( que tevo en funcinamientu hasta'l XIX) y los dos ábsides de los lladrales refáense otra vuelta, magar la techume sigue siendo de madera. Lo que nun se desanicia ye la llábana epigráfica de Xelmírez qu'entá podemos contemplar anguaño (el propagandista mayor del Reinu).
En 1852 visitaron esta ilesia los duques d'Orleans, Lluis de Montpensier y María Luisa, la hermana de Sabel II. Queden litografíes importantes d'aquella visita (Qué poques d'Asturies).

La Traslatio pel Mediterraneu.

     Cuando en 1858  Sabel II visita Galicia, tres de pasar un mes inolvible n'Asturies, los xacobeos (que non xacobinos) algamen de la Reina un compromisu pa iguar el templu que llevaba cuatro años peslláu; nun corríen bonos tiempos pa la ilesia por mor de la Desamortización de Mendizabal (1845). Les obres neoclásiques finaron en 1867 (taba la Reina  Sabel iguando les maletes pal exiliu parisín) tres elevar el templu pa torgar les riaes del Sar  camudando-y la orientación: Cabecera pal ríu, pal Oeste. Tamién se caltuvo un púlpitu góticu ya una imax de "Santiago pelegrín".
       Nesti llugar onde tuvo l'hospital llevantáronse unes escueles qu'anguaño son oficines municipales, ¡yá nun hai guajes!.
      Dos llenzos ornen esta ilesia: Ún de < l'Apaición de la Virxe a Santiago > ya otru al rodiu la < traslatio>.
       
                                       < Equí entamó too, pelegrín >

   

  L'iconu d'esta ilesia, el símbolu por escelencia, ye'l piedrón, l'ara votiva (quiciabes antes un menhir) d'un templu romanu dedicáu a Neptuno, el Dios de les Agües, onde según la tradición tevo amarrada la <barca da pedra> col cuerpu de Santiago que venía de Xerusalén. Les agües nesta zona son perimportantes como vinimos camentando; nun hai más que ver que la propia villa de Padrón ye una islla metanes del Ríu Sar. Caltién el "Piedrón" una inscripción que nos amuesa la dedicatoria pola parte d'un pueblu celta romanizáu:     < los orieses al Dios Neptunu>

   Tien polo tanto'l Piedrón una hestoria perllarga: Menhir neolíticu, Ara votiva romana, finxu Xacobéu, bita del cai (hasta los fenicios atracaron equí) .... Arriendes d'ello hai tamién una hestoria xacobea:

La translatio per Padrón (Wp)

      [[ Cuando los discípulos de Santiago arribaron a la Ría col so cuerpu pidieron permisu a la Reina Lupa (xefa nel castru de Teo) pa desembarcar pero esta, que nun conocía'l pañu, andaba roceana y nun-yos lu concedió porque al posar el cuerpu nuna llábana, esta foi derritiendo hasta quedar l'apóstol enxeitáu na mesma:
         - ¡Maxa, esto ye maxa! ¡Encerrá-ylos, son peligrosos!
       Lliberaos por unos ánxeles píden-y a la Reina Lupa namás los dexe sapozar el cuerpu dignamente. Hebo que negociar muncho con ella pa que los dexaxe enterralu. A la fin hasta-yos dexó unos gües pa tresportalu, nun yera tan mala:
       - ¡Enterrá-ylu bien lloñe! .
     Tres varios intentos d'entierru terminaron alcontrando un cementeriu romanu nel Monte Llibredón, en Compostela:
    - Esti <Arca Marmòrica > ye'l llugar afayadizu- arrespotiaron los discípulos. ]]

                                      
                                        ***************************
¿Qué podemos fer en Padrón amás de visitar la Ilesia de Santiago?

     . Pasear a la vera del Sar pel Paséu  del Espolón  talo facía Rosalía de Castro y visitar la so Casa-Muséu.

Asina-y quedó la cara a Rosalía
cuando vio la torna que-y fice al so poema.
(Pondré tol procuru n'igualo con otru, fía)

   < Al traviés la xamasca perenne                          qu'oyir dexa rumores perraros,
      y énte un mar d'ondulante verdor,
      amorosa mansión de los páxaros,
     de les mios ventanes veo
      el templu que quixi tanto. 
     El templu que tantu quixi ...
     Mas nun sé dicir yá si lu quiero
     Que nel rudu vaivén qu'ensin tregua
     Ximielguen los mios pensamientos,
     Duldo si'l rancor cativu 
     vive xuníu a l'amor nel mio pechu.>
         (Imitando a Rosalía, a la manera de mio)

Fonte del Carme (Padrón)
"El Bautismo de la Raiña Lupa".
"La Traslatio"

   . La <Fonte do Carme> afáyase namás pasar la ponte, al par de "Catedralina de Santiago" de Padrón, na Rua do Carme. L'agua milagroso d'esta fonte ye tamién farda del Santu que cuando tuvo predicando per equí tocó tres veces la roca col bordón (cayáu) y surdió agua a mogollón, bueno, entá mana xeneroso; qué mano tenía'l Santu, igual hai que volver llamalu.
      De sillería granítica, ta ornada con boles y rematada con un frontón. Tien un fornicu onde s'amuesa la figura del Santu bautizando a la Reina Lupa ya otru cola Virxe de los Dolores, mui visitada poles embarazaes col envís de tener un partu feliz.

Santiago  faciendo vela pel Sar
cola Reina Lupa.
(Anda, al final yeren collacios)

      Lo que sí sabemos ye que foi iguada a finales del XVIII, tiempos de Carlos IV.  (Lo que nun sé yo ye por qué se llama <Del Carme>, ¿quiciabes porque taba al par de Cai d'onde salíen los marineros a faenar pela ría?.  La Virxe del Carme ye la Patrona la Marina, la mía, "Cabu 2ª Amanuense", del 3º del 68, tres facer la instrucción nel Ferrol a les órdenes del Sarxentu Antón y el cursu de cabu en San Fernando (Cádiz) onde mandaba'l Capitán Pavón (ceo algamó a Comandante).
      Cuido que n'esta fonte foi bautizada la Reina Lupa tres convertise al cristianismu por mor de los milagros de Santiago. Qué lleenda más guapa pa camudar paganos en cristianos; estos cures .... sábenles toes (claro que los romanos facíen lo mesmo, pero al aviesu) .

Ponte de Santiago- Conventu del Carme

           La Ponte de Santiago ye d'orixe medieval - siempre se diz lo mesmo - pero tuvo munches igües a lo llargo del tiempu. Lo que sí sabemos ye que foi perimportante, esencial pal comerciu ente los pueblos de dambes orielles del Sar. En 1790 tevo una igua pergrande y yá en 1845 (Sabel II) una enriá esboroñó dos de los cuatro güeyos tardándose enforma n'axeitalu (1852). Tamién se la conoz como la <Ponte del Carme>, seguramente polo dicho anantes; d'equí salíen los barquinos pal mar y porque comunica'l Convento del Carme
 ( A Trabanca) col cascu vieyu la ciudá, onde tán la Ilesia y la Fonte.

Ponte sobro'l Ulla - Pontecesures
(Semeya: Pintirest)

La Ponte Romana de Padrón-Pontecesures. 
Si quies entrar en Padrón viniendo del sur, de Pontecesures, tienes que facelo al traviés d'una ponte romana sobro'l Ríu Ulla. Seique anguaño nun queden güelgues de la traza romana caltiense n'alcordanza'l topónimu pos quedare rexistrao que vien de la dómina d'Augusto, ente 27 e.X. y 14 d.X.
 Sicasí la reforma más importante foi la llevada a cabu pol Mayestru Mateo*- ehí queda eso- , ún de los grandes constructores de la Catedral de Santiago. Tien la ponte trece (13) güeyos unos con bóveda oxival ya otros de mediu puntu.
En Catoira, a 10 km d'esta ponte y 12 de Padrón,  foi onde l'Obispu Cresconio mandó tresnar les nueves Torres del Oeste col enfotu de poder controlar meyor les razies vikingues que simpre entraben dica Santiago per aciu la Ría d'Arousa, vía Ríos Ulla y Sar.

Santu dos Croques (el de los cabezazos)
(Semeya:hostelocastelo.com)

* El  Mayestru Mateo (1150-1200/1217) ye ún de los finxos de la Catedral de Santiago. Esti célebre Arquiteutu y Escultor tien la robla nel "Pórticu de la Gloria" y dexó la firma nel "Santu dos Croques" (col que pienso chocar la tiesa, a ver si m'ablandia ) y nel Coru pedrés de la Catedral , yá esaniciáu.

[Yera tradición ente los estudiantes - y dalgunos pelegrinos - arrodiyase énte'l Santu y chocar cabeza con cabeza a la fin de buscar una tresferencia intelectual. Como algunos queríen aprobar pasando los díes de "ribeiros" pel barriu antiguu, los cabezazos yeran talos que'l propiu Santu viose obligáu a pidir clemencia al Cabildru; anguño ye preciso estudiar pa poder aprobar,<os viños, the weekend>] 

                                                      ***********************************
   PERSONAXES   ILUSTRES  de PADRÓN

Camilo José CELA, nel Espolón.

  Ente los Personaxex ilustres de Padrón tenemos a : Macías l'Enamoráu, Rosalía de Castro, Camilo José Cela, Pepe Domingo Castaño y más ....

   . Macías yera un poeta y trovador que namorare d'una dama de l'alta castra y .... pagólo caro (Yá vos lo cuntaré cuando teáis más tranquilos).

   . Rosalía de Castro (1837-1885) foi una poetisa de gran valir representante del Rexurdimientu gallegu y precursora de la poesía moderna española , al empar que Bécquer. Los sos "Cantares gallegos" son un iconu pal pueblu galáicu.

     . Don Camilo José Cela (1916-2002), marqués d'Iría Flavia, foi un escritor cabezaleru de la Post-Guerra con obres como: "Viaxe a l'Alcarria", "La familia de Pascual Duarte" o "La Colmena"(El Casiellu). Llogró ser miembru de l'Academia Española de las Letras" y algamó'l Premiu Nobel ( 1989) y el Cervantes en (1995).

     . Pepe Domingo Castaño ye un trovador, presentador de TV y llocutor de radio qu'entá sigue n'activo na Cadena Cope: <Hola, hola, hola .... Pepe ! >; yes un gallu , un trabayador, exemplu pa la mocedá. Nun te retires nunca. 

                                    *****************************************
      ENTÁ siguimos cola PRIMER ESTAYA, yá salimos de Padrón, eh:

                   << PADRÓN - O ESCLAVITUDE - A PICARAÑA [8,5 km.]>>

      Puntos d'interés: [ Padrón (Colexata) - Iría Flavia - Pazos - Romarís - Rueiro - 

Anteportas - Tarrío - Villar - Esclavitude (Sta María de Cruces) - A Picaraña].

          Tamos al final del Paséu de Espolón, xunto la Ponte sobro'l Sar . Salimos bordiando la Ilesia de Santiago do Padrón y empobinamos pela cai Murgadán; torcemos a mandrecha na rua Corredoira da Barca y darréu a manzorga, Cai Dolores, dica Iría Flavia, antigua sede arzobispal y anguaño parroquia del conceyu de Padrón. 

Colexata de Santa María d'Iria Flavia 
(Semeya:bing.com)

        Ensiguida damos cola Colexata de Santa Mª la Mayor d'Adina, al par del cementeriu onde ta enterráu Camilo José Cela (dende que dixisti aquello de la Santina quitéte'l Don). Los primeros nicios d'esta ilesia hai dir buscalos a la dómina romana, al sieglu I d.X, tiempos de Vespasiano* que convirtió Iria Flavia nun "municipium". 

*[Vespasiano foi ún de los trés emperadores de lo que se conoz como "Dinastía Flavia" (69-96 d.X.). Los otros fueron Tito y Domiciano.]

Santa Mª d'Adina,  n'Iría Flavia

          La construcción actual entamó del XII y acabó nel XIII , seique tien munches igües, y debémos-yla a Xelmírez (1068-1140), como non, que se punxo manes a la obra tres el desaniciu d'Almanzor nel añu 999. 
Nun ta Santa María nel asentamientu de la primitiva, demasiao averada al puertu y espuesta a les razies vikingues que xubiendo pela Ría d'Arousa atracaben n'Iria pa tirar camín de Compostela. Otramiente ta perbién asitiada cerquina la vía romana "Brácara (Braga)-Astúrica Augusta (Astorga)", per onde vieno Almanzor, que precisamente desanició la primitiva ilesia visigótica-prerrománica. Trabayu pal obispu d'Iria, Cresconio (1037-1066), que foi'l que la camudó de llugar. 

Ancestral Cementeriu d'Adina (Iria Flavia)
- Mira, la tumba embaxo l'árbol ye la de Camilo.

      - ¡Cómo vamos dexar pa prau  el desaniciu d'un finxu del cristinismu xacobéu! -  buenu yera Cresconio pa consentilo, otru tanto que l'obispu Xelmírez que sofitó la so carrera eclesial nel mitu de Santiago. 

 Por ello Xelmírez dio l'emburrión definitivu al burgu Compostela (que Cresconio yá enantare enforma) y sobremanera a la so catedral, ameyorando los caminos xacobeos, sobre too'l "francés",  y poniendo a Santiago nel cumal eclesiásticu sofitándose pa ello na propaganda del <Códiz Calistinus>, el primer panfletu turísticu que se conoz. 

      Cresconio foi' l'obispu qu'enaltó la sede Iria-Compostela ya intentó facela sede apostólica - Episcopus iriensis et Apostolicae Sedis, prestaba-y que lu nomases -  seique el Papa León IX nun-ylo consintió ya al endefechu escomulgólu por atrevíu.  Sedría Xelmírez el que lo algamó cola venia d'otru Papa, Calisto II , yeren otros tiempos, dómina del Cluny. 

        Lo que va ganando Compostela va amiyándolo Iría Flavia, pero Padrón (con Santa María) ye un dignu segundón, quedando la nuesa Santa col títulu de Colexata. 

Tímpanu de la GLORIA: < LES CINCO PELEGRINES XACOBEES >
Santiago anda esprecetáu por saludales.
Los obispos anden roceanos .....: 
- ¿ Vendrán pidi-y el sacerdociu y poder alministrar los Sacramentos?
- Convién teneles vixilaes, Señor Arzobispu; semblen ser d'armes tomar.

        Los cristianos aprovecharon el llugar de cultu del templu romanu pa colocar el suyu (namás que ye camudar el ritu) como ficieren más tarde suevos y visigodos. Del XIII son la portada y les torres oxivales protogótiques. Nel XVII/ XVII  l'obispu Monroi fexo importantes reformes barroques sofitáu pol arquiteutu Pedro G. Cotobate. 

       Santa María d'Adina ye un eduficiu de planta rectangular con tres naves, cruceru, presbiteriu y bóveda d'arista. La portada, d'arcos apuntaos percontiaos sobro columnes, presenta un célebre tímpanu de tradición románica que cuenta cola representación de l'Adoración de los Reis Magos onde María lleva la voz cantante. Nel interior alcontramos dellos retablos, el mayor de Miguel de Romay asina como una talla en granitu de la Virxe María. Tamién tien delles capielles como "La capiella del obispu de Quito" y "La capiella del Sagrariu". Formando parte del adríu la ilesia ta l'actual Cementeriu, onde antes Rosalía (foi treslladada a Compostela) y agora Camilo (quítote'l Don polo que dixisti de la Santina) entretienen a los antiguos vecinos coles sos poesíes ya hestories eteres.  

                                                         ******************************

Camín de Santiago
Entrando n'otru mundu.

     Salimos d'Iria Flavia tres cruciar les víes del tren embredando pela N-550 camín de Pazos. Tres d'un xiru a manzorga vamos enredándonos peles rues Romarís, Ruerio y Anteportas colo que llevamos andaos unos 4 km; falta dalgo más de la mitá pa finar la ruta de güei. 

- ¿Échovos un gabitu?
Soi un gallu cola llavadora.

       Per una recta asfalcada vamos aportar al Tarrio, que pertenez a la parroquia de Sta. María de les Cruces onde podemos contemplar los típicos horros gallegos . Palipali empalmamos con Villar y tres tornar a la N-550 vamos aportar A Esclavitude, lo que diba ser el fin de la estapa, pero siguimos un pelín más, hasta A Picaraña, pa facer más curtia la caminada de mañana.   

         [ L'horru de Galicia ....... ye una construcción singular, un ¿inmueble? destináu a guardar la collecha añal con unes condiciones de ventilación imprescindibles asina como un prácticu aisllamientu de roedores - llambiones a más nun poder - pal granu que s'ensucha col envís de caltenelu nel tiempu. El maíz ye'l preferíu pero fabes y arbeyos son un complementu ideal pa una dieta equilibada. 

Horru gallegu
(Semeya:blogspot.com -Wp)

      L'horru suel tener tar constituyíu por una cámara de planta rectangular de piedra o madera y cubierta  a dos agües por llousa o teya árabe y que va sofitada nunos pilares o pegollos (esteos) de piedra  - o madera - más o menos altos col envís d'aisllala de la humedá del suelu y qu'al empar tenga la meyor ventilación posible per aciu les rendixes que queden ente les colondres o cureñes verticales que conformen l'armazón de la cámara onde se guarda'l granu o cualisquier otra collecha. 

Pequeños, guapo y práuticos
Nun hai casa que nun tenga ún.

Pa poder acceder a ella ye preciso una escalera esterior, bien de piedra firme o de madera tipu escala, que nun llegue a la cruxía (¿trabe?) de la nave pa torgar la entrada de los mures. Tamién los pegollos tán separaos de la cruxía (dintel baxu) por unes lloses o mueles - moas, dicen ellos - cola mesma finalidá. A vegaes la cámara va sofitada nuna base zarrada, de piedra, qu'en Galicia nomen como celeiros; nesti casu la cruxía ye un voladizu completu de pizarra.
     Cualquier horru que se preste tien de tener dalguna representación simbólica que faiga referencia a los llares de la casa col envís de que les meigues abelluguen les colleches: trisqueles, cruces, figures de santos, cálices, .. Ye difícil alcontrar una casería por pequeña que sea que nun tenga un horru, ¡son tan pequeños y guapos de facer ...]]
                                                           
                                                        ************************
                   

Santuariu d'Esclavitude, cruceiru.

         A Escravitude ye un llugar de la parroquia Les Cruces, conceyu de Padrón y comarca del Sar , que nun llega a los 100 habitantes. Lo más bultable d'esti pueblu ye'l Santuariu d'Escravitude seique ye del (XVIII) tien la so farda en dos fechos que camienta la tradición: 
    (1). Cuando en en 1582 el cura de la parroquia de Cruces tuvo a piques de morrer pola mor d'un árbol que cayó al pie d'él quixo da-y les gracies a Dios mandando esculpir una imax de la <Virxe col Neñu> qu'asitió xunto a una fonte perantigua que la xente entamó a nomar la Fonte Santa. 
     (2) . En 1732 un vecín de Salnés que carecía d'hidropesía empobinó dica l'Hospital de Compostela pa tratar d'ameyorar la so enfermedá pola mediación del Santu Patrón. Al pasar per Esclavitude foi hasta la célebre Fonte Santa y de pasu encamentase a la Virxe. ¡Milagru!. A los tres días taba sanu como un coral y camentó al altu la lleva aquel milagru que l'agua y la Vixe ficieren nél curándolu de la esclavitú d'aquella malura. 

SANTUARIU d'ESCLAVITUDE
Si tomes d'esti agua y se te pon el pelo colorao
¡adiós a tolos males !

     Asomó muncho la xente dende aquella a curar la so escravitude na Fonte Santa.  Nun yera plan tener aquella Virxe al bentestate y foi preciso abellugala nuna capiella yá finada en 1743. Nel XIX (1885) un indianu de la zona arriquecíu n'América financió la construcción d'una segunda torre simétrica a l'anterior, presentando la facha que se caltién anguaño.  

       Tres visitar Santa María Cruces vamos salir d'A Esclavitude per un tramu con dellos cambios de direición hasta dar con un pasu a nivel sin barreres que nos mete n' Angueira de Suso. Per aciu d'un emparráu inacabable vamos algamar a Arenal, de primeres, y darréu A Picaraña, fin de la PRIMER ESTAYA. Anduvimos 2,5 km más de lo previsto nel llibru de ruta; pero qué ye eso pa un@s gall@s asturia@s. 

                                           ***************************

                La tarde del Miércoles, 11 de Marzu de 2020, fuimos pasala en Padrón pa completar el conocimientu d'esta vílla xacobea tan interesante. Yá camentamos al rodiu la so Hestoria, de la Ilesia de Santiago, de la Ponte y el Cai, de la Virxe del Carme y dimos unes pincelaes sobro dalgún personax cabezaleru pero quiero enaltalo cola Casa-Muséu Rosalía, el Xardín Botánicu o'l celebérrimu poeta Macías, asina como una visita virtual a Santiaguiño do Monte, dao que nun hebo tiempu material p'algamar hasta'l requexu.   

 La   Casa-Muséu Rosalía de 

Castro ta asitiada nel barriu d'A Matanaza, nes afueres de Padrón y pa llegar hasta ella tenemos que cruciar el Canal del ríu Sar y darréu les víes de la Estación del tren.
Trátase d'una antigua casa - planta rectangular - de ciertu bienestar, tipu pazu cenciellu y de calter agrícola. Tien planta y pisu y ta arrodiada d'un xardín mui curiáu que na dómina Rosalía yera'l güertu casa. Anguaño florecen una bayurosa varidá de camelies de les que tantu s'afaten en Galicia.

Casa-Muséu "Rosalía de Castro"

       La finca - ? m2 -  tien cierta forma trapezoidal con dellos edificios onde'l más bultable ye la Casa-Muséu de dos pisos ya un adríu porticáu (portalón) embaxo'l candial corredor. La planta baxa o "El Perfil d'una solombra" amuesa la obra lliteraria de la escritora y el pisu con "O Seu (Lo de so)" que nun ye otro qu'una casa rural de la dómina.  L'antoxana cúbrese con un emparráu asemeyando un adríu al bentestate, mui afayadizu.

      El Muséu caltién además un Auditoriu, una sala pa Centru d'Estudios, otra nomada como Fundación Rosalía y completando la casería rural un llagar pa facer vino y "aqua vitae"(oruxu), qu'hai iviernos mui duros de cuando en vez ya otramiente ye preciso pa facer los esconxuros per aciu la queimada.

1884. A cabera semeya de Rosalía: FAMILIA

      Rosalía de Castro ñació nel Barriu de Conxo (Compostela)  en 1837 y yera fía d'una fidalga ya un cura espabiláu de los que tantu florecen en Santiago; magar d'ello la so familia féxose cargu de la ñeña durante los primeros tiempos, y quiciabes más tarde tamién. (¡Que nun tenís vocación, rapaz! Pero daquella o te metíen en seminariu col calcetu o p'algunos yera la única forma de facer dalgún estudiu. Tas perdonáu, la guah.a salióte una Rosa). Cuando Rosiña anda a cumplir los seis años yá ta viviendo con so madre ya una criada en Padrón, la verdadera patria de Rosa, que se siente pedronesa dafechu, seique viviere más tarde  en dellos llugares, como A Coruña, Madrid o Valladolid, por mor del trabayu del so home, l'historiador y escritor Manuel Murguía, col que casó en 1858 cuando tenía 21 años. Algamaron a tener siete (7) fíos pero dengún d'ellos los fizo güelos.

      Cuido que Rosalía nun tevo unos estudios reglaos pero sabemos qu'aprendió Dibuxu y Música en Santiago algamando a tocar siete (7) instrumentos. Tamién conocemos el so amor pol Teatru llegando a actuar de moza en delles obres. Foi seguramente n'esta época onde alquirió una conciencia social de clases - que llueu amosó nes sos obres -  en rellación con otros collacios del LLicéu de la Mocedá, talo Manuel Murguía, Eduardo Pondal y Aurelio Aguirre, los capos del <Banquete de Conxo>, del que falaremos enantes d'entrar en Santiago. Tamién vivió en Madrid nun ambiente lliterariu de postín  en casa de Carmen Lugín de la que yeren habituales los hermanos Bécquer, Nombela o Avendaño.

                                            < El qu'a bona solombra arima
                                                bona sombra lu acovez>

LA OBRA DE ROSALÍA

        María Rosalía Rita de Castro foi - ye - una escritora gallega del XIX mui reconocida como precursora del Xurdimientu Gallegu, llingua na qu'escribió fundamentamente magar l'escasu valir que se-y daba a esta llingua naquella dómina ( como pasaba y pasa entá col ASTURIANU). Seique escribiere en prosa la so reconocencia débese a la so obra poética siendo lo más bultable:

- Corréi, corréi; que Rosalía va echanos
unos "Cantarinos gallegos"

."Cantares gallegos" (1863): Un canciu a la dignidá de la LLingua Gallega, al paisax y a les costumes y tradiciones de Galicia. L'impautu popular foi tan grande que foi considerada como l'entamu de Xurdimientu Gallegu. Íntima, amorosa y social-patriotica remueve les conciencies de la sociedá gallega esplotada y emigrante.

. "Follas novas" (1880): Onde se mez la señaldá de la vida col ansia de llucha social por mor de la emigración forzosa y la inxusticia social reflexada nel abandonu de la infancia y la marxinación de la muyer, nominándose como una verdadera feminista.

     La tercer gran obra de Rosalía ye "En las orillas del Sar", poemariu escritu en castellán poco anantes de morrer, moza entá (48 años), enferma de cáncer, llarada de fíos y con un maríu que l'agabitó sinceramente p'algamar lo que foi seique la tenía escaecía naquellos momentos caberos.

      Pero Rosalía escribió muncho más, en prosa y en versu, en gallegu y castellán por ello nun podemos dexar de llau que se la considera, xunto a Bécquer la creadora de la Poesía Moderna. 

                                        *************************************

Saludando a Macías,
daprendiendo d'Amor.

           Na mesma tarde del Miércoles 11 de Marzu fuimos visitar el célebre

 XARDÍN BOTÁNICU de Padrón 

(BIC 1946) mui averáu a la tradición xacobea por tar cerquina del llugar onde llegó'l cuerpu xacente del Apóstol a mediaos del sieglu I d.X. seique nun s'afayare hasta IX.

          La tradición, como na Verxa xacobea; la lliteratura con Rosalía, l'amor con Macías o la política con Castelao danse cita nesta mancha verde y fusia qu'engalana la ciudá. Más de 300 especies viven en perfeuta harmonía nos 10.000 m2 de parque onde les dos Secuoyes Xigantes (una pa Macías ya otra pa Rosalía), la Palmera Senegal, la Corona de Cristo, el Roble Fastigiáu o'l Castañu d'Indies son les xoyes de la corona, pero hai  muncho más ....

Con Castelao,
ehí queda eso.

Porque los enamoraos suelen sentar a confesar confidencies nel "Bancu de los enamoraos" mientres suspiren coles gotes de la Fonte Ornamental .
        Nun pue faltar nesti xardín del XIX - en 1869 yá taba consideráu ún de los cabezaleros d'España - una escultura a un Maestru como Don Ernesto Gende asina como otra al políticu nacionalista Castelao, ¿con quién sinón diba charrar Rosalía?.

Corona d'Espìnes de Cristu

 
   Esti xardín da pa escribir un llibru más gordu que'l de Petete pero namás voi ponete na pista d'un piedronés mui célebre por mor del AMOR:

 <El Romeo pedronés >

         MACÍAS NAMORADO yera un trovador y escritor gallegu del XIV (1340-1370) que dedicaba les sos canciones - en galego y castellán-  a una dama d'alta castra - fía del Marqués de Villena - cola que llegó a intimar  y por aciu d'ello terminó..... El so maríu tenía muncha puntería.
 La so obra recuéyese nel Cancioneru de Baena.

             Afondando un pelín más na hestoria d'O NAMORADO camentar que Macías yera, probablemente, un fidalgu de familia venía < a sucu baxeru> con oríxenes na parroquia padronesa de Carcacía, nos rimeros del Monte Meda.
         Educáu como un caballeru de la dómina pero con ciertos estudios entró al serviciu d'Enrique d'Aragón, Marqués de Villena, onde namoró de Doña Elvira, dama d'alta cuna - y baxa cama - que pudiere ser la mesmísima fía del Marqués. Nun tenía'l pedronés clase suficiente pa casar cola dama pol que'l pá debió remanar l'asuntu pa que'l namoráu teminare  na guerra de Granada aprovechando Don Enrique l'interludiu pá pa casar la fía col Marqués de Porcuna.
      ¿Pensaba'l de Villena qu'un pedronés que lluchó escontra los moros diba asustase énte un matrimoniu conveniencia? .... Más namoraos que nunca siguieren viéndose a escondíes polo que'l de Villena viose obligáu a encerralu nel cuartón.
       ¿Aseló Macías? .... ¡NON!. Dende la talaya de la torre siguió'l trovador desafinando colos sos trinos primaverales hasta qu'un día'l maríu, escarniu de corte y cuadra, entró nel cuartón y dio-y capirote al ruiseñor.
       Esta hestoria d'amor dio muncho que falar, cantar, trovar y escribir nos sieglos venideros pero namás son copies y remedos, Romeos galegos ún: MACÍAS NAMORADO.


                                        *************************************

SANTIAGUIÑO DO MONTE

                      < Quien va a Santiago y nun va a Padrón
                                    o fai la romería o non >
          

Certificao:
PEDRONÍA roblada

      . Hai un llugar en Padrón, un iconu xacobéu de postín, que nun pudimos visitar, y bien que lo sentimos, por mor del tiempu y del coral: Santiaguiño do Monte. Intentámoslo; xubimos hasta'l Monesteriu del Carme, paramos a tomar aliendu y de pasu unes semeyes úniques ya inolvidables, pero los valtos del coral y l'escasu tiempu que nos quedaba torgónos la visita a esti SANTUARIU xacobéu (Hai un Vía Crucis de 136 peldaños; namás me falta poner la "Corona d'Espines" del Xardín Botánicu).  En cualisquier casu disponemos de daqué información y algo vamos a cuntavos ....

       Dicen, camiéntase  yá dende finales del VI nel  Breviarium Apostolorum :<“Hic [Santiago] Hispaniae occidentalia loca predicat”> que Santiago tuviere predicando n'España tres del repartu que fixeren los Apóstoles en reunión darréu l'Ascensión del Señor Xesús. Los pedroneses afiten dafechu que tuviere predicando - primeros de los 40 d.X - na zona de Padrón . Y precisamente nun cuetu qu'había - hai - un poco p'arriba del Monesteriu del Carme, un llugarín bien afayaizu  polo que cuenten que ye onde Santiago y los sos discípulos se reuníen pa tresmitir la <Bona Nueva> y convertir al cristianismu a los gallegos mentanto Roma s'apropiaba de los castros celtes ( la Reina Lupa vivió nún - C. Lupario - pero bautizó equí ) p'arramplar col oru y tolo que pillaba. 

"O Parrandeiro"
(El Parranderu)

       Anguaño equí reune la chavalería'l pueblu (hailos > 70) al rodiu'l Santuariu: el Roqueru nuna viesca, la Ermita, la Casa del Ermitañu y la Fonte Milagrosa, la qu'un día fexo xurdir l'Apóstol pa matar la sede del pueblu. 

      Precisamente'l día 25 de Xunetu la mocedá del pueblu fai una romería en Santiaguiño tresportando a llombu al Parrandeiru - una estatua de Santiago Pelegrín - dende la Ilesia de Santiago hasta la Ermita do Santiaguiño del Monte. Gaita, procesión, misa y comida campera faen una xira en toa regla que se complementa con una "sardinada" por cuenta l'Ayuntamientu (¡chapeau!). 

PEDRONÍA sellada.

        Yo déxovos una semeya del llugar col sellu de la PEDRONÍA, ye dicir el Diploma que condece'l Conceyu de Padrón a los pelegrinos que visiten los santos llugares xacobeos d'esta villa y redolada. Porque yá sabéis el dichu:
< El que va a Santigo y nun ve Padrón o fai romería o non >.
        Los asturianos del IMSERSO amás de pelegrinos tamién somos romeros.
   La Traslatio que vemos a manzorga lleva'l sellu de la PEDRONÍA  lo mesmo que semeya superior de "Santiaguiño do Monte". Vamos, que tamos EM-PADRONAOS. 

                           ***********************************************

ESTIMANCES:
. Gracies al Estáu Español, y al IMSERSO en particular, por financiar en bona parte estos viaxes tan prestosos, otramiente munchos de los xubilaos nu podríemos facelos.
. Gracies al Hotel Congreso por agospianos y pol candial tratu recibíu. SUERTE.
. A la nuesa Guía, Susana, pola so paciencia y el tratu tan candial que tien pa los "mayores" asina como al chófer Jaime, que conduz como los ánxeles. MILENTA MIL GRACIES.
. A los Guías Gabriel y Ana asina como a la Meiga que me salvó del "coronavirus" por mor de la queimada.
. A los allegres compañeros de viax - madrilanos y asturianos - que tuvieron un comportamientu de primera.
. A Wikipedia, pola bayurosa información que nos apurre. Gracies.
. ¿Y la Xacopedia, de la que toi tul día tirando de la teta? ... GRACIES.
. A Eroski Consumer, que nos guía pel <Bon Camín> y nesti casu nel <Camín Portugués>.
. A don  Manuel Garrido pola so <Guía de Padrón> que foi lo primero que merqué al atracar nel Puertu del Sar y que tantu me ta ayudando. Gracies, Don Manuel, ta prestándome a esgaya.
. A dellos blogs, talo: <arteguías.com>,