 | |
| Con gran dolor del coral colamos de Civitas Episcopal; allarribones espera una ayalga, una quimera, los sueños del Rei Ramiro: Santa María y Samiguel de LLiño. |
Güei tenemos un día soleyeru, de lo más prestoso. Pensamos llegar hasta Ules, unos seis kilómetros. Paez poco pero hai tantu que ver... Nun queremos nos pase como la vez anterior que nun dábemos por finiquitada la ruta. ¡Son tantes les histories qu'alcontramos pel camín!.... Quién nos diba dicir qu'Alonsín de Quintanilla fuere aportar tanto... ¿Y el Duendu?. ¡Vaya hallazgu! Depués de conocelu yá nun somos a escaecenos d'él. Pensamos dir saludalu (ye'l braeru motivu d'entamar d'equí) por si quier venir con nós. A fin de cuentes nun vamos salir d'Uviéu.
¿Dígovos la ruta del día?. Pos venga, echa-y una güeyada al cartelu:
 |
| Ponte n'El Ríu Gafu, que baña la Malatería al so pasu per San Llázaru |
Entramos n'Avenida Armando Collar y en un minutu yá vemos la Malatería al cruciar el ríu Gafu. Ye'l puntu más baxu del camín. Bordeamos el Parque Iviernu pela La Malatería - queríemos ver l'edificiu al completo - hasta alcanzar Gil de Blás. A mandrecha dexamos El Mateín - escultura de San Mateo - y la moderna Ilesia de San Llázaru. Pero nós vamos saludar a Santiago, una escultura n'homenax al pelegrín; a ti, a min...
Esta vez nun vamos baxar a Santu Domingu y xubir a la Catedral pela cai Escura. Cruciamos la Ronda Sur y siguimos per Arzobispu Guisasola. Frente al Kilómetro Cero dexamos un barinos de lo más afayaizo que visitamos de xemes en cuando. El parque d'El Campillín a mandrecha y en seguida'l Monumentu a Campumanes.
 |
| Plaza La Constitución: Ayuntamientu y San Sidoro |
Yá tamos nel Cascu Vieyu; Cai Madalena. Antigües cases modernizaes con prestoses galeríes. Piedra policromao qu'enfila a la Torre del Ayuntamientu, puntu fuga de la perspeutiva. Los antiguos Almacenes Uria trespórtennos a tiempos infantiles, cuando esti tipu de tiendes taba de moda. Bonos recuerdos. Conocí Uviéu por mor de los viaxes a un colexu de flaires, en Navarra, fuxendo de la mina. Amás nun yera un sitiu cualquiera (ningún sitiu ye cualquiera): Puente la Reina.¡Cómo nun diba salir yo un pelegrín!
Los chigrres tan tresnando les terraces; preséntase un día bullandiegu. A manzorga queda'l Mercáu de la Plaza del Fontán. Petez dir a dar una vuelta pero nun ye'l día.
Plaza la Constitución: A mandrecha la Oficina de Turismu. A manzorga la Ilesia de San Sidoro. Al este la Plaza los Güevos que lleva a la Cai Sol, onde ta'l Palaciu Inclán. Si tires pal noroeste das a la Cai del Pesu - onde pues lleer la inscripción que define a la ciudá:
<< A la bien noble, bien lleal, benemérita, invicta, heróica y buena ciudá d'Uviéu >> - y algames a la Plaza Riego. Enfrente l'Edificiu Consistorial sofitáu en arcos de mediu puntu que rematen nuna torre, la Torre'l Reló. El central ye l'Arcu de Cimavilla, antigua Puerta sur de la ciudá.
 |
| El palaciu "La Rúa" |
A min tienme esmolecíu una antigua fonte -¿romana? o ¿altomedieval? - que s'alcontó n'esta cai. Tamos al pendiente de les conclusiones de los espertos. Mui pendientes.
 |
| Hola, Trasgu. ¿Vienes a dar un vueltu? |
Los mocinos del nuesu blog - Melendo, Clodo ya Onirio - entraron na plaza del Castu pela Puerta Rutilante, talo que nós. Taba enfrente la catedral y delantre del imafronte de la Ilesia de Santutisu. Pero esta vegada non. Enantes de llegar a La Rúa tiramos a manzorga pela cai San Antonio. ¿Por qué dar vueltes?. ¿ Nun lo maxináis?. Sí... Llegamos al empalme de Santana con Mon y tiramos a mandrecha a visitar al Duendu.
- Ehí ta, como siempre.- Al venos queda arremelláu y clamia:
- ¡Ixuxú! ¡Volvisteis!
- Equí nos tienes. Vamos camín de Ules y pensamos visitar los monumentos. ¿Petezte dar un vueltu ?
- ¿Tornaréis temprano?
- Como siempre, antes de les cinco equí.
- Entós nun se fale más. Voi con vós; a fin de cuentes d'Uviéu nun salgo. ¿Podéis enseñame'l track ?
MALATERÍA-ULES: Parque San LLázaru - Malatería - Pza. Constitución - Pza. Catedral - Uría - La Llosa - Acueductu - Avenida del Narancu - Los Monumentos - Ules.
 |
| Dende la Plaza Porlier |
- Mui guapo. ¿Tiramos pa Uría?
Echamos una güeyada a la Catedral enantes de tirar camín d'Uría.
- ¿Sabes, Trasgu, cómo saldríen de la ciudá los nuesos protagonoistes?
- Na dómina los vuesos mocinos - Alfonso III el Magnu - pasaríen delantre'l Palaciu'l Rei (no que güei ye'l Palaciu Campusagráu o Audiencia) y bordiando La Fortaleza d'Alfonso saldríen pela Puerta'l Campu y embocaríen na Cai Uría, dando col Carbayón. Yá too siguío camín de los Monumentos del Naranco, que dexaríen a mandrecha, pa tirar hacia Ules per aciu del Parque Purificación Tomás. Más tarde algamaríen a Brañes bordiando l'oeste del cordal tres d'un xubi-baxa de lo más vistoso.
- Para, para... Nun cuerras tanto. ¿Y no que cinca a nós? Porque podemos dicir qu'equí entama la Ruta.
- En tiempos del Castu saldríemos pela Puerta Santa María, pero yá s'esanició.
- Claro, El Magnu echó p'atrás la muralla. ¿Veis esti palaciu? Ye'l Palaciu Valdecarzana.
- Suéname. Na dómina de Clarín ¿nun taba equí'l Casinu ?.
- Sí, señor. Mui bien. Anguaño ye'l Tribunal Superior de Xusticia d'Asturies.
- Ye que tuvi un día, pel branu, faciendo con "Pelegrinando Uviéu", la Ruta la Rexenta. Tuvo perbién. Una mocina - Ana León - diba interpretando pasaxes delantre los edifios singulares que describe Clarín na novela. Pienso facela otra vuelta.
- A ver, sabichegos, yá tamos na Plaza Porlier ¿qué palaciu ye esi ?
- El Palaciu del Marqués de Campusagráu. Angüaño ye la Real Audiencia Provincial.
- Y cómo se llamaba esta plaza cuantayá?
- ¿La de Alfonso'l Magnu, quiciabes?
- Non, pero nun ta mal tirao.Nesta plaza tenía'l Magnu'l Palaciu y la Fortaleza. El Palaciu, más o menos onde ta l'Audiencia y la Fortaleza allí, faciendo esquina con Xovellanos.
- ¿Ónde ta l'edificiu Telefónica?.
- Más o menos.
- ¡Meca, vaya musiquina que toi sintiendo!
- ¡Y vaya xaréu! . Tira p'allá; vamos golifar un poco.
Al averanos vimos la xente facer corru a un grupu floclóricu asturianu. Sacamos unes cuantes fotos (Pero nun alcuentro una col nome del grupu. ¿Sábelo usté? Prestaríame ponelu).
Baile rexonal na Plaza La ESCANDELERA
A mandrecha dexamos la plaza'l Teatro Campuamor. Quiximos sintir la voz de Pavarotti: "O sole, o sole mio..." pero una música de gaita tornónos a la relidá. Un grupu folcóricu asturianu taba blandiendo l'aire al son del tambor y la gaita na Plaza la Escandelera. Paramos un ratín pa escuchalos:
" Baila xiringüelu, xiringüelu, xiringüelu..
Baila xiringüelu, xiringüelu y nada más"
- ¿Pues cuntanos daqué al rodiu'l tetru Campuamor, Trasgu?
- Un par de detalles:
[El Teatru Campuamor o Teatru de la Ópera foi inauguráu nel añu 1892. Quedaba pequeñu'l teatru de la Plaza'l Fontán (Biblioteca actual) pa les necesidaes d' aquella bulguesía que biltaba a finales del XIX. Tien delles igües tres la so fundación; la mayor darréu la Guerra Civil del 36.
Amás d'Opera n'esti teatru faise entrega de los premios Princesa Sofía y la Sala Polivalente del sótanu tresformóse nel CAMCO (Centu Arte Moderno Ciudá Uviéu ]
Xusto al entamar la Cai Uría, la cai de la espansión decimonínica onde los indianos y xente de porqué asitiaron les sos mansiones.
- ¿Veis esta placa nel suelu? Lleeila.
-¡Ah! La placa na cera que recuerda'l llugar ¿exautu? onde taba asitiáu el CARBAYÓN, l'árbol que define'l xentiliciu los uvieinos: carbayones.
- Esatamente. Equí taba'l Carbayón.
- ¿Quién yera el Carbayón?
 |
| El nuevu CARBAYÓN al par del Teatru Campuamor |
- ¿Vamos frenar el desendolcu la capital por mor d'un simple carbayu?.
- El simple carbayu tenía 9 m. de circunferencia básica, medía 30 d'altor y el ramax daba 36 m de circunferencia máxima. El tueru presentaba una bifurcación faciendo una "V" de victoria (¿tandríalu plantao'l Rei Magnu?).
El casu ye qu'en setiembre de 1879 reunió la corporación municipal pa ver qué determín tomaben con aquel solitariu que quedare alloñáu del Parque San Francisco y enriba taba "estorbando" na cai. El discutiniu mandólu al mataderu por 14-9.Talo si fuere un toru salió a la venta: 192 pesetes dio'l sobreru. Polo visto ganaren los progresistes].
 |
| Ciudadanos y guerreros de Playmóbil llevantando'l Palaciu Santa María |
[ Esta foto que tenéis delantre ye una semeya trampa. Ta desubicada, fuera bolos; nada tien que ver col carbayu - sacante los que tuvieron de talar los playmobianos p'alzar esta ayalga - pero sí tien que ver col Prerrománicu. Tomóse nel "Centru d'Interpretacíon del Prerrománicu" con motivu d'una exposición que Playmobil presentó nesti Centru. Bona idea pa motivar los neños a descubrir los caminos del arte, entamando polo propio.]
- La ficha téunica buscáila na Wikipedia:
<< El Carbayu (Quercus robur) ye un árbol plani-caduci-foliu de madera duro y durable de la familia de les fagacees. De groma globoso pue alcanzar hasta 40 m. d'altor.
De fueya simple, alterno, lobulao y sésil ( malpenes tien ráu o peciolu).
Ye monóicu: tien flores unisexuales estremaes nel mesmu pie. Les masculines presenten n'amentos allargaos y les femenines, n'amentos globosos, solitaries o na base de los amentos machu.
El frutu ye una llande o abellota protexida na base por una cacina . Rica n'hidratos de carbonu foi, en tiempos, la base alimentaria de munchos pueblos. Anguaño preferimos tomales sintetizaes per aciu del gochu ibéricu.
La madera foi y ye perapreciao pa infinidá de preseos; a min, como más me presta ye tresformada n'hórreos >>
 |
| El braeru << El CARBAYÓN >> |
<< Comimos unos garullos de pan d'escanda y carne seco nuna posada afitada a la muralla y empobinamos camín del Ríu Nora. Al cruciar embaxo l'arcu la puerta un carbayu xigantestu y coritu, acorropináu de curuxes y malvises, atraxo la nuesa atención pola grosura'l so tueru, talo una catedral, y tamién pol llargor de les sos rames, estendíes a dambos llaos de la muralla entellazando l'aire nun abrazu irreal.
Trapos de cielu verde pingaben dende l' altu y procesiones d'esguiles percorríen buicioses el dédalu' l ramax. Ensames d'inseutos abeyaben pente mofu y l'arfueyu de los druides, colingando de les cañes, asemeyaba a unos recientes aforcaos . Detuvimos los caballos y quedamos clisaos al contemplar aquel cielu ramificáu. Entá orbayaba y aquelles gotines suspendíes nes rames del roblón formaben como un velu proteutor pa que pudiéremos siguir antroxando d' aquel embelecu.
Transitaben los llabrigos que tornaben de les güertes, criaos con cargues de lleña o paxos cola collecha, homes a caballu qu'entraben y salíen de la ciudá o muyeres arretando la llei del equilibriu con cestes o ferraes na cabeza . Al pasar al par del carbayón unos santiguaben, otros fincaben la rodiya ya otros pronunciaben esconxuros p'apellidar a la suerte y espantar les desgracies.
- Equí tuvieren colgaes les cabeces de los mios antepasaos- dixo Melendo..
 |
| La Estación del Tren |
Si Melendo, Clodo ya Onirio sintieron un respigu al lleer la placa del suelu al entamu la Cai Uría a nós pasónos lo mesmo.
- ¿Qué vos pasa? Nun alendáis...
- Pensar qu'equí pudieren tal colgaes les cabeces d'ocho paisanos pa escarmientu públicu....
- Ramiro paecía nun tener términos medios: O colgaba la familia del Comes Palatii Piniolo o llevantaba monumentos como los que veremos ceo. Seríen los tiempos...
- Bueno, vamos siguir camín del norte bordiando'l Monte Naranco.
El paséu pela Cai Uría, la cai de la burguesía decimonónica, ye bien agradable: tiendes, Bancos, oficines, pisos de luxu... Y cantidá de xente abeyando en cualisquier direición...
- Entrar na Cai Uría siempre me paez una fiesta, dende'l primer día que la pisé; y entá me pasa. Debo ser de pueblu...
 |
| La LLOSA: Avda. Fundación P.A. |
Ensin danos cuenta algamamos a la Estación del TREN (adif), conocía pola ESTACIÓN del NORTE. El Duendu tomas la pallabra:
- Les nueves víes (13 víes y cuatro andenes) ocupen un espaciu pergrande y, pa evitar que la ciudá quedare partía, llevantóse en 1998 una plataforma enriba : La LLOSA (38.000 m/2 en 700 m. de llargor) , que fai de ponte y avenida peatonal (Avda. Fundación Principe d'Asturies) y ta sofitada en 220 pilares. Ye una pasada.
- Antiguo, pero non tanto, n'esta zona había unos folleros de "quítate p'allá". Agora, escalera automática. Alcuérdome bien, cuando venía visitar un collacviu de cursu.
- Nun podía ser menos pa la Capital del Reinu.
- ¡Si Ramiro llevantare la cabeza!
La Escalera Mecánica nel <<Camìn de Niria>>
El nuesu amigu carbayón aprovecha pa quedar bien col personal:
- [ La primitiva Estación foi inaugurada'l 23 de Xunetu de 1874 formando parte del tramu: Xixón-Pola L.lena-Lleón. Foi ampliada en 1883 por mor del nuevu tramu: Uviéu-Trubia, pa recoyer el carbón procedente les mines de Quirós, Proaza y Teverga. Dañada durante la Guerra Civil del 36 hebo de ser iguada siendo reinaugurada n'Ochobre del 46 ( fuimos xestaos al empar ) pol Ministru d'Industria asturianu Fdez. Ladereda.
La Estación actual dispón de trenes de LLargu Percorríu, Medianu , Rexonales y Cercaníes, unos de vía ancha y otros de vía estrencha. Tamién tien trenes turísticos. Bien cerca alcuéntrase la Nueva Estación d'Autobuses].
 |
| Acueductu "Los PILARES" |
P'ascender a La Llosa podemos emplegar una escalerona de piedra o por una escalerina automática de lo más prestoso. Yá quixeren los nuesos protagonistes poder disponer d'algo asina... Pero'l modernu "Camín de Niria" sí pue facelo. ¿Queréis velo?
- ¿Prestóvos?
Percorrimos la Llosa hasta alcontrar una escalera descendente que nos dexó xusto delantre l' ACUEDUCTU LOS PILARES, bueno, un tramín pequeñu de lo que foi aquella megalítica construcción qu'aportaba l'agua a la ciudá d'Uviéu.
 |
| ¡Qué guapo si lu tuviéremos! ¡Venga turistes! |
- [L'Acueductu los Pilares taba asitiáu nel barriu Ciudá Narancu d'Uviéu. Los sos constructores foron Xuan Carcedo'l Mozu y Gonzalo de la Bárzana. De mano tenía 43 pilares (42 arcos), con un altor de 10 metros y un llargor de 390 m. Güei namás podemos esfrutar de cinco arcos (¡qué putada!)
Foi construyíu a finales del sieglu XVI p'averar l'agua del Monte Narancu ( Boo, Ules, Fitoria ) a la ciudá, llegando a La Puerta Nueva (Cimavilla). Costó 15500 ducados recaudaos sobro impuestos al vinu y la sidra (¡ pagamos los viciosos, como siempre!
Tuvo funcionando hasta 1875 pero les nueves téuniques (Depósitos y tuberíes de presión) pero sobremanera'l puxu de la ciudá y ¡el tren! acabaron con él.
Si Clarín apellidó la ciudá como Vetusta Pérez de Ayala renombróla como PILARES]
- Nun hai que tracamundiar esti acueductu col que llevantó Alfonso II, el Castu; esti venía de la parte la Manxoya.
Camentando nos pilares, l'agua y l'acueductu entamamos a xubir camín del Monte Naranco talo ficieren los nuesos mocinos; seique ellos nun teníen escalera mecánica y llegaríen a L'Argañosa pa dir pali-pali hasta Ules.
Nós entamamos la xubida pela cai R. Velázque Riera buscando'l camín màs afayaizu pal Narancu. A mandrecha tenemos el Colexu Auseva, de los Maristes. Cruciamos Peña Santa d'Enol y entramos n'Avenida San Pedro de los Arcos, onde s'alcuentra la ilesia.
 |
| San Pedro de Los Arcos. Parque con escultura n' Homenax Aida Lafuente |
- [La Ilesia Parroquial de S. Pedro, mui guapa. Asitiada na llomba d'un Parque foi edificada en 1910 pol arquiteutu Lluis Bellido, n'estilu neogóticu.
- Muncho s'asemeya a una que vimos nel centru l'otru día.
- Sí. Ye del mesmu arquiteutu que trazó la ilesia de San Xuan el Real.
Si tiramos p'atrás na historia veremos qu'enantes d'esta moderna ilesia hebo capiella dende los tiempos visigóticos ( s. V y VII ) seique foi sufriendo delles igües. Durante la Revolución del 34 salió mui dañada esta ilesia neogótica perdiendo los sos archivos (esto nunca, ho)
Equí morrió la militante comunista Aida Lafuente. Nos muros qu'arrodien la ilesia entá se puen apreciar los obuses que nun algamaren españar. Xunto la muria del cementeriu hebo una fosa común de cuando la represión franquista. Más de mil cuerpos foron treslladaos al Valle los Caidos.
- Deben tar a gusto..]
 |
| Residencia Nuestra Señora del Rosariu. |
Vamos siguir xubiendo... Per Peñaubiña hasta desembocar n' Avenida del Narancu per aciu la Residencia Nuestra Señora del Rosariu asitiada nun xardín perguapu. Mui curiao.
Y p'arriba... A mandrecha'l Colexu Santa María del Narancu Alter Vía, l'antiguu de les Ursulines (el Narancu ye la zona los colexos). Ye un colexu d'integración, apropiáu p'alumnos con discapacidá funcional, onde s'imparten clases dende Infantil de 3 años hasta Bachiller. Nun hai otru n'Asturies con tanta capacidá.
- Munchos colexos privaos nel área del Narancu pero... ¿Nun hai un Colexu Públicu?...
- Pos sí, un poco más arriba; na mesma cai de San Pedro, dando a la otra cara del Parque "San Pedro de los Arcos": Colexu Públicu San Pedro de los Arcos, como nun podía ser d'otra miente. Ye d'Infantil y Primaria, hasta 5º.
Y a modo vamos avanzando pela Avenida los Monumentos. Anticipu de la belleza alcontramos estes florines que tán de moda últimamente.
- Hasta nes Merindaes les vimos. Y munches.
 | |
| Bignonia ó Trompeta china ¡Tararííí... Tamos llegando a los monumentos! |
Tien el tallu leñosu con poques raizuques; seique trepa pola firmeza de los tallos.
De fueya compuesto (pinnao) por 7/9 foliolos, ovalaos col marxe en forma serruchu.
Les flores (inflorescencies en panícula) tienen el cáliz acampanáu y la corola infundibuliforme (forma d'embudu) de color roxo-anaranxao per fuera y mariello per dientro. El frutu ye una cápsula col ápiz obtusu.
Mui desixente ella quier el suelu rico, fresco y bien drenao: que nun-y falte'l riegu pero ensin encharcar, eh. Lo que nun-y fai puñetera gracia ye'l fríu..
Pódense los tallos que yá dieren flor al final del iviernu pero... Curiáu col lates que rezuma, ye tóxico pa la piel. Pue multiplicase per aciu d'un morgón (acoldu) o d'una pundera (frada o espetu)].
 |
| A tiru!. El prerrománicu a tiru. |
De xemes en cuando enantamos la mirada pa contemplar la ciudá. A midida que xubimos más nos presta. Nestes vemos un cartelu:
- ¡Bar Lobato!. Y facemos alcordanza.... A primeros de los 70... Una boda d'un collaciu.... Sabía lo que facía.
Estos d'Uviéu tienen munchu pedigrí, ho. Casare na ilesia prerrománica de San Xulián de los Praos y xintare la boda equí. Tevo perbién. Amás esi día estrenó'l mio Seiscientos (600) la gran ciudá. ¡Y vaya estrenu!. Nun esistía la rotonda qu'enllaza la Ronda Sur cola autopista,Victor Chávarri y Xeneral Elorza. Paecíamos tar nel Carlos Tartiere; enxamás sintí tantos pitíos... Pero a Casa Lobato lleguemos.
Entá alcontramos otru cartelu anunciando un colexu: Colexu "Santa Teresa" (Les Teresianes). Tan asitiaes bien cerca del Parque "Purificación Tomás", per onde vamos pasar darréu. El casu ye que termina'l cascu d'Uviéu y entramos na parroquia de Lliño (Lillo).
- ¡Yá les tenemos a tiru!.
 |
| Per Samiguel de Lliñu a la cata les güelgues del pasáu. |
Llegamos a una casería que quedare ensin funciones, pero presta vela, y tiramos a manzorga dica'l Parking. Nun precisamos d'elli pero, na parte riba, hai un senderu solombriegu que nos lleva al Centru d'Interpretación. Tenemos dos opciones: o tomar a mandrecha, pente unes cases, o xubir pela caleya hasta Samiguel de LLiñu. Primero vamos visitar la Ilesia. Damos unes vueltes alredor...
 |
| Planta basilical de Samiguel de Lliñu |
- [ Samiguel de Lliñu foi mandada edificar, segun la Crónica Albeldense, pol Rei Ramiro I al pie de los palacios (ilesia palatina). Ta fecha en sillarexu sacante les esquines y contrafuertes que son de sillar.
De mano tenía planta basilical con tres naves. La cubierta ye abovedada - con bóvedes de mediu cañón - y les naves tan separaes por arcos afitaos sobre columnes y non sobre pilares, como yera lo habitual per aquel entós. La basa d'estes columnes taba decorada.
Les ventanes tan afataes por dolosíes tallaes en piedra rebuxao. Son una pasada.
La decoración escultórica en relieve - xambes, bases y capiteles - ye mui bultable, asemeyando a la bizantina del s. VI.
La decoración pictórica de los muros ye (yera) de dos tipos: unes qu'asemeyen a les de San Xulián de los Praos (Alfonso II) y otres con figures humanes como tema cabezaleru]
******************
 |
| Mirín, el trasgu de Santa María, vive nun capitel corintiu sobro fuste n'espiga. |
Col coral baltando pola mor del ramirense
baxamos pela carretera dica la segunda ayalga: Santa María. Mirámosla d'arriba abaxo, darréu d'abaxo arriba, pel este, pel oeste... Xubimos les escaleres, semeyes y más semeyes... Algo tarde, nun yera día pa entrar. En cualisquier casu tenemos pendiente una visita guiada pa finales de mes con un superespertu. Entós igual facemos un post específicu al rodiu'l ramirense del Narancu.
Camentando nesa visita afitamos l'atención nuna columna del norte esterior. Nun ye lisa.
- Echái una gueyada a les columnes.
- Tán tallaes. ¡Qué guapo!
- Aquella paez una espiga xigante.
- Cucái'l capitel.
- Ta decoráu con motivos vexetales.
- ¿Y aquellos dos güeyinos?
- ¡Meca, ye verdá! ¡¡¡Un trasgu!!!
- Un collaciu tuyu. Coño, Duendu, tienes parientes peruquier...
- Los trasgos somos asina. Tamos nos sitios guapos, los que merecen la pena. Seique sían de natura vegetal o dándo-y vida a un edificiu, talo qu'equí.
- Charra con elli un poco, anda. Igual nos echa un gabitu...
- ¿Cómo te llames, collaciu?
- Llámome Mirín.
- Nidio. Con esos güeyinos saltones que nun paren d'amiranos...
- Non. Ye por mor de Ra-Mirín. Somos de la dómina Ramiro.
- ¿Somos?
- Sí, somos unos cuantos. Tamos equí dende'l pricipiu, ñacimos col palaciu. Yá nos dirás acontrando.
- ¿Qué palaciu? Nun vimos dengún.
- Esta Ilesia antes yera un palaciu. Equí'l Rei sentía como un Dios: Llevaba les coses del reinu dende l'Aula Rexa, cazaba y tomaba baños de vapores, qu'andaba matáu de la rema.
 |
| ¿La cripta de Santolaya? Non, pero casi. La planta baxa del palaciu. Dicen que p'equí hebo una sauna. |
- Sauna y yakusi, dígotelo yo.
- ¡Qué morru! Claro, pa eso yera'l Rei. Bueno, ¿por qué nun vas tu desplicándonos daqué al rodiu esti palaciu y dexamos al to primu aselar un poco?
- Dengún problema. Que más quiero yo que tratar col visitante. Y si ye con pelegrinos, meyor.
- ¿Cómo sabes que somos pelegrinos?
- Pola pinta. y esi pañuelu... ¿Sois del Camín de Santiago? Pasa cerca d'equí, per Lloriana.
- Somos pelegrinos nel Camìn de Niria.
- Enxamás oyere eso....
- Siempre hai una primera. Vamos a la cata de Niria, una mocina que tien pasao per equí va cuantayá...
- ¿Diba sola?
- Non, con so padre. Veníen nun carru...
- En fin... Llevo equí unos XII sieglos... Vi pasar muncha xente... Pero nun soi remembrar...
- Igual nun s'averaron hasta equí; diben apuraos...
- Por mor de...
- Por mor del amor. Delles vegaes p'axuntar hai que separar...
- ¿Con quién debía axuntar?
- Con un mocín que pasó unos díes después. Venía con un par de collacios.
- Igual los vi pasar pero son tantos.... Recuerdo unos que pasaron a galope, cuasi de nueche, y glayaron:
- ¡Tornaremos con tiempu! ¡Sabemos sois una ayalga!. ¡Fasta ceo!
 |
| SANTA MARÍA del NARANCU abellugada pola "V" de victoria. Fachaes Sur - onde había otra escalera - ya Oeste. |
- [ Santa María del Narancu nun foi diseñada como ilesia, seique yera l'Aula Rexa del conxuntu palaciegu que Ramiro I mandó construyir nos rimeros del Monte Narancu, a cuatro pasos del centru históricu. Alto, soleyero y metanes la viesca yera imposible alcontrar sitiu más afayadizu pa escaecer la rema. Falamos del añu 842. La Vara de la Xusticia acababa d'arribar. El coral de los homes ye incomprensible: capaz d'arramar cabeces peruquier o d'alzar l'espíritu con monumentos como los del Narancu.
 |
| Planta de Santa María |
- Santa María escarez d'ábside. ¿Cúando se teníen visto daquella ilesies ensin ábside? Ye lo que fai suponer que nun foi concebida como ilesia sinón como palaciu veraniegu. Nel sieglu XII Samiguel de LLiñu sufre un derrabe y pierde'l testeru y parte de les naves, entós treslládase la ilesia al palaciu.
- Nótase. Tien una planta mui rara pa ilesia.
- Santa María tien una planta rectangular de 21 m. de llargor por 6 m. d'anchor y dos pisos d'altor. P'algamar al pisu d'arriba hai una escalera al norte de doble tiru.
- ¿ Y qué nos dices de la planta baxa?
La planta baxa tien un cuerpu central cubiertu por una bóveda de mediu cañón percorríu por arcos faxones que s'afiten direutamente a la muria, talo que la Cámara Santa. Esti cuerpu remata nos lladrales con dambes cámares cubiertes de madera. La del este comunica col cuerpu central pero la del oeste ye estanca y namás tien accesu dende fuera. Nun se sabe mui bien qué función teníen; la del este pue que fueren unos baños... ¿A quién-y sienta mal un yakusi o una sauna?
- ¿Cómo yera la distribución del pisu, Mirín ?
 |
| Santa María: Sur y Este |
Tán en tolos llaos. Sobremanera cuando hai daqué a protexer. ¿Sabéis de quién falo, eh?.... De los trasgos.
Nel cascu históricu, na cai Mon, alcontramos al Duendu; güei un amigu que mos acompaña nesta salida. Pero mira per ónde llegamos al Narancu y alcontramos dellos más. El que más nos llamó l'atención foi Mirín, un trasgu abellugáu nun capitel, sobre columna n'espiga, na fachada esterior norte. El nome vien-y polo de Ra-mirín non porque tea amirando intensamente con esos güeyos de curuxa... A nós préstanos a esgaya esti capitel vexetal. El casu ye que Mirín igual nun pue venir con nós; hai tantos turistes ....
 |
| Son precisos dellos Trasgos p'abellugar esta ayalga |
- ¡Eh,eh...! ¿Qué ye eso que nun pueo acompañavos?
- ¿Nun t'echarán en falta?
- Pa nada. ¿Tu nun visti que somos un montón, toos iguales?
- Sí, yá nos decatamos. Tais repetíos en montones de capiteles. ¿Cómo ye eso? ¿Yes el mismu o sois diferentes?
- ¿El mismu?... ¿Paéztelo, eh?. Mira, pa que m'entendáis los humanos.... Ñacimos toos al empar per aciu d'una especie de partenoxénesis; fíos de la creatividá d'un artista. Estremaos ya iguales al empar y tamién interconesionaos: lo que camienta ún, sabémoslo toos.
- ¿Quies dicir que'l to trabayu pue facelu cualisquier de los partenotes ?
- Dafechu; pa eso somos collacios.
- Entós hasta Ules. Dexámoste a la vuelta.
- Venga, y de pasu yá me cuntaréis daqué al rodiu Niria, toi naguando.
 |
| Parque Purificación Tomás |
Baxamos hasta l'Aparcamientu de los Monumentos y vemos una carretera asfalcada que nos empobina pa Ules, pero nun la siguimos. Tenemos oyío qu'esta xeneral tien munchu tráficu por mor del Centru Asturianu. Pero hai un camín paralelu, debaxo, de lo más afayaizo. Agárrase al pie del Parque Purificación Tomás. Asina que tiramos p'allá.
- ¿Oyisti falar d'ella, Mirín?
- Algo tengo sintío, pero nun ye lo mío. ¿Queréis que-y entruguemos a aquella señora?
- Oiga, señora , ¿sintió falar de Purificación Tomás?
- Sí, ho; claro. Pa eso soi la señora Wiki; la sabelotoo.
[ Foi la fía de Belarmino Tomás, el sindicalista cabezaleru na Revolución del 34 y tamién na Guerra del 36. Llevaba la política nel ADN y foi a lo que dedicó. Durante la Guerra Civil tuvo se secretaria na executiva de les Mocedaes Socialistes.
Casó con otru políticu de pro, Rafael Fernández, col que tuvo cinco fíos. Por mor de la guerra exiliaren en México y tornaren en 1976. Dambos siguieron na política activa como miembros del PSOE: Ellí algamó a Presidente del Principáu y Purificación a coneyala del ayuntamientu d'Uviéu hasta payares del 90, cuando finó]
- Gracies, señora, fasta ceo.
 |
| Tornando pel camìn d'Ules acolumbramos el Parque P. Tomás |
- Mirái, tenéis un croquis n'esti cartelu. Echái una güeyada; yá volveréis otru día. Venís a buscame y y comemos unes costielles a la brasa. ¿Fai?
- Perbona idega. Vamos ver qué tien esti parque...
- Tien frontón, canches polideportives, pistes pa voleibol, pa bicicletes...
- !Y Campu de Golf!
- ¡Toma, con 18 fuexos!
- Ellí hai un horru.
- Gallegu.
- ¡Mira qué bien!
- Pa la parte Vegadeo hailos asina.
- ¿Qué especies vexetales hai?
- Muncho autóctono: Mazanos, ablanares, figares, zrezos, bidulios, carbayos, castaños...
- ¿ Y foriatos?
- Chopos, pinos, cedros, ocalitos, picea...
- Como esi tenía yo ún en casa....
 |
| Ferregüeyando Vetusta dende Ules. |
Ules ye un pueblu pequeñu asitiáu nos rimeros del Narancu, a 340 m/snm . Cases antigües, pero iguaes y dalguna supermoderna. Hai una carretera bien pindia que te xube al Centru Asturianu.
 |
| Centru Asturianu d'Uviéu |
- < Sé que ye una organizació privada ensin ánimu d'enriquecimientu que tien como finalidá promocionar los valires intelectuales y deportivos y aponderar l'asturianía
- Mui guapo. ¿Y sabes de cuándo data y con que farda foi fechu?
- El C. A. d'Uvieú creóse en 1928 como una delegación del centru Asturianu de La Habana (1886) que fundaren los indianos en Cuba. Pasó por delles vicisitúes - a puntu tevo d'esaniciase - pero'l puxu los carbayones evitólo. Tenéi en cuenta que ún de cada ocho ovetenses ye sociu del Centru.
- ¿ Y qué puen faer ellí?
- Nel edificiu hai Biblioeta, Sales d'Esposiciones, Ludoteca, Cafeterría, Salón d'Actos, Sales de xuegos... Y fuera hai varies piscines, polideportivu, canches de tenis, campu de fúbol... De too. >
El pueblu tien un parquín mui afayaizu pa los neños; nun deben ser munchos los que lu visiten. Cerca vemos un Bar y entramos a refrescar. Dan unos pinchos bárbaros. Ponémonos como quicos. Una pena que Mirín y Duende nun puean participar de la fiesta.
El casu ye que, pasu ente pasu, yá llevamos cuatro etapes que faen.... [12+12+14+6]= 44 km
Bueno, siempre ye daqué aproximao....
PIESLLE:
 |
| Romeros pa Samiguel |
Sí, tornamos el sábadu pa ponéi'l pieslle a esti post. Visitamos Santa María y Samiguel con un profesor de postín especilista nel tema. Al arrivar a lo que fuere'l palaciu buscamos a Mirín.
- Hola, trasgu. ¿Cómo andes?
- Perbién. Vaya día que tenéis, ¿eh?. Si lu buscáis col candil nun alcontráis otru meyor; y tamos en febreru...
- Y que lo digas: soleyeru y caletín.
- Mirái que vos digo... Yo nun pienso abrir la boca; cuando fala'l Profesor De Castro namás procede escuchar, ¿d'acuerdu?. Llevo munchos años viéndolu trabayar.
- Sí tu lo dices...
Escuchemos, anotemos, retratamos... Tres dos hores d'enseñances avérase Mirín y sóplanos nel llombu...
- ¿Qué vos paez? Paecéis un poco ablucaos...
- Ties razón. Nun ye plan repetir equí tolo qu'aprendimos ( y los deberes que nos queden por facer) pero...
- Pero alguna consideración...
- Mira, de mano...Nós pensábemos que'l palaciu fuere daqué importante y mui funcional. Pero igual nun foi pa tanto y la importancia, que la tuvo, foi más de tipu propagándístico. A territoriu seguru y bien allendáu venía'l Rei pa quedar bien colos invitaos puesto que'l palaciu yera daqué único. La so construcción nun sigue les regles del estilu del Castu nin los siguientes van siguir con esti. ¿De ónde sacaría l'arquiteutu?
- Un xeniu al que malpenes conocí y que s'esmuició como les xanes. ¿Vistéis dalguna pieza o parte antigua que tuviere aprovechada?
- Non, pillín. Nesta nun nos va pillar. Tu sabes qu'esti perfeutu edificiu ta fechu ex-profeso d'una pieza. Nada hai qu'hubiere, nada aprovechao: Virxe. Ven por otra.
 |
| L'altar nel Belvedere Este |
- Que ye una copia; que l'orixinal ta nel Arqueolóxicu. Y tien una inscripción en llatín...
- Que...
- Que sirve pa lexitimar a Ramiro de pasu que pide perdón polos sos pecaos...
- ¿Qué pecaos?
- Bueno, xubió al tronu a deu -pol deu d'El Castu - pero nun foi aceutáu por unos cuantos magnates (siempre pasaba lo mesmo ) y tevo que cepillar a Nepociano, que se colare de rondón, mientres buscaba muyer (taba viudu). Con esti altar pidía perdón y con esti palaciu lexitimaba'l reináu. y de pasu tamién lexitimaba la sucesión nel soi fíu Ordoño.
- Estós tas diciéndome que'l palaciu yera daqué importante....
- Dende lléu, Mirín. Como la to casa nun hai otra, ho. ¡H.a, h.a, h.a!
- ¿Dalguna cosa más que vos llamare l'atención?
- Sí, que tuviere adosaos, este ya oeste, notra dómina (¡vaya chapuza!). Cuando pasó a ilesia parroquial el cura aprovechó pa poner casa rectoral y sacristía nos lladrales. Esti sí que quedó lexitimáu; sí, Señor.
 |
| Ventana orixinal Sur triforiada |
- Yá veo que nun acabáis de falar al rodiu'l palaciu. Dexái daqué pa otru día y contáime de Samiguel.
- Que ye una triste llaceria construciva. Ná que ver col palaciu, nun tienen el mesmu patrón. Pa empezar ta llevantáu nun tarrén alluvial y cerca d'una faya. Claro, nun tardó muncho n'esbarrumbase.
De manera tala qu'al reedificalu quedare más pequeñu. La mesma puerta d'entrada (orientada al W.) nun taba ehí sinon dientro del pórticu.
La espuela foi nel "Restaurante Buenos Aires". Ye probable que nel mesmu sitiu onde Ramiro y Corte comíen les costielles a la brasa provinientes de la caza. Nós cazamos direutamente en platu. Talo que reis, o meyor.
 |
| Güei echamos el Pieslle a esta prestosa ruta. Quédavos la lluz encesa, trasgos de Santa María. |
CUMPLIMIENTOS:
. A Fulgencio Argüelles, impulsor ensin sabelo, d'esta odisea sentáu "A la sombra de los abedules" (daqué día pienso vela tornada al asturianu). A nós pillónos relleendo "Los clamores de la tierra", pa saborgiar el ramirense.
. A J.J. Esparza por tenenos entreteníos con "La gran aventura del reino de Asturias", ya otros. Esti home ye una enciclopedia y les sos noveles el petite d'esti amante de la historia, sobremanera de la nuesa. Pero tamos tan globalizaos que...Toles histories me paecen la nuesa.
. A los blogs: <mirabiliaovetensia>,<el.tesorodeoviedo.es>, <artehistoria.com> , <historia.uniovi.es>....
. A la Wikipedia, garganta profunda, d'esti blog.
No hay comentarios:
Publicar un comentario