Camìn Aniciáticu [3]:
El Portazgu - San Salvador d'Uviéu
 |
| Camìn Aniciáticu [3]: EL PORTAZGU - San Salvador d'UVIÉU |
A ellos garrólos l'agua. A nós saliónos el sol; quiciabes pa compensar
Tamién vieno ayudanos un moyón del Camín Xacobéu, cuidao que llevamos al mesmu destín: San Salvador. Enagora coincidimos.
 | |
| Ferregüeyando Manzaneda, embaxo d'una cantera de Caliza Montaña. |
Magar l'enclín del tarrén pa entamar la caminada da gustu caleyar per esti primer tramu de tierra mullío pola foyarasca. Dellos pasos empiedraos, nos sitios con mayor desgaste, faen más llivianu'l camín. Vamos bordeando un castañéu, a la solombra. Asina cualquiera, ¿eh?.
Dende'l tarmudu senderu vamos teniendo vistes, a mandrecha, del cébre pueblu de Manzaneda.
Poco depués un h.aski peludu, col llombu escuru y la parte baxa - focicu, panza, pates y culera candes - sal a saludanos nuna casería.
- Tranquilu, chaval. Venimos en son de paz. Somos pelegrinos nel Camín de Niria.
- ¡Vaya guapu que ye! ¿Paezse al que tuvimos, eh? .- Un día, buenes a primeres, púnxose malu y morrió al día siguiente. Foi un trauma. Esi día decateme que los animales que viven contigo formen parte de la familia de toes, toes. Son una persona más.
- Nunca nun t'escaeceremos, Xana.- Yera fema. Heureuxemente dexó descendencia.
 |
| H.aski siberianu axeitáu a les Asturies. |
N'orixe yera emplegáu pa dellos menesteres polos esquimales de la raza chukchi: tirar de los trineos, curiar el ganáu (ciervos) o calentar los neños, magar que tando bien entrenaos de cachorros faiense mui sociables. L'únicu defeutu que-y conocí a la Xana foi que me comía les pites qu'esnaben del gasllineru a pastiar la yerba. Quiciabes porque de cachorru yo mesmu-y daba les cadarmes de los pitos.
D'una resistencia escomanada cuenten qu'en 1925 salvaron a los habitantes d'Alaska d'una epidemia difteria. El tiempu taba tan perruneru que los aviones nun podíen volar y foron estos santos los qu'aportaren los sueros precisos darréu cinco díes de carrenderes a -30ºC.
Anque vienen del fríu aguanten mui bien el calor (home, non).Pues velos tomando'l sol tan ricamente magar que tienen dos capes de pelo, desprendiendo la interna en époques de calor pa tar más frescos. Equí convién cepillalos davezu. Tengo alcordanza de les capes tan escomasnaes que soltaba la Xana.
Cómo echamos en falta quellos agullíos al claror de la lluna, abellugada n'antoxana. Por muncho fríu que ficiera nun quería caseta nin chabola: A techu, sí; zarrada, enxamás. La fía, Dana, yá tien otru cantar. Entemecía con perru llabrador abelluga na bodega cuando siente volaores: ¡pum!. >>
 |
| << Y pel camìn solombriegu camina llixera talo fueya d'abeduriu, allegre como les campanines de los brazaletes d'una princesa, llena como les cántares que vienen del manancial poderosa y llimpia como la espada del soldáu que s'anicia na batalla>> |
<< Con cántara o con ferrada faen les moces parada>>
Enseguida calamos a la carretera xeneral, la que xunce Manzaneda con Picullanza. Nel moyón del kilometrax una flecha diznos qu'a manzorga. Agora cuestarriba, pelo asfalcao pero con % morrocotudu ¡toma!. Quedamos pensatibles delantre un edificiu pergrande, pintaú en verde llamativo, frente a un Área Recreativa con bancos, meses y palmeres ya un pequeñu campu fúbol arrodiáu de güertinos bien curiaos. Una señora aclaria que ye'l Centru Reto y danos indicaciones so la caleya que debemos tomar:
- Ehí mesmo, a mandrecha, tenèis la siñal.
 |
| Miguel, aprovechando la xubilación per Manzaneda: - Ehí mesmo, onde'l moyón, tiráis a mandrecha. Algamaréis Picullanza pel camín empedriáu. |
Cuatro pasos más arriba vemos baxar un tractor. Echámos-y l'altu.
- Bonos díes. ¿Pa xubir a Picullanza ye tirando a la derecha, non?
- No, señor. De frente.
Quedamos ablucaos amirando ún pa otru. La señora encamentáremos bien que'l Camín de Santiago taba tirando a mandrecha. Pero'l paisanu taba mui seriu... Hasta que nos vio desconcertaos...
- Non, home, non. - Rio'l condenáu -
Vase pelos dos sitios. De frente ye por carrtera pero'l camín de los pelegrinos ye per esa fondigaya. Nun vos esmolecer, lluéu tenéislo empedrao.
- ¡Menos mal!... - Respiramos fondo a la fin -. Nun yera pa comprender l'erru.
 |
| Bordiando'l Monte Arnea (444 m) llegamos a Picullanza |
- Pos a siguir ansí y nun descudase. ¿Qué ye esa especie de tunel qu'acabamos de pasar?
- Ye un polvorín de cuando la guerra. Ehí teníen los nacionales guardao la munición.
- Paez un bunquer... Con tantu formigón...
- Si sigues calando per él algames al Monte Arnea, que me preguntabes antes.
Dexamos al feliz llabriegu - ¿sedría'l so ancestru'l qu'aidare a Rigio? - tras un bon cachu d'alderique familiar y entramos na ruta xacobea.
Otra vegada entramos nuna sienda solombriega, pero esta enforma más llenta y avesía. Tenemos que dir salvando folleros como podemos: Reblagando poles piedres, bordiando'l camín peles orielles o metiéndonos na viesca. Ta enforma enllamuergao por mor de les lluvies recientes magar que güei tea un día soleyeru.
Alcontramos un llavaderu obsoletu. Esto quier dicir que'l pueblu nun ta lloñe. Cerca sí, pero enantes d'arribar a Picullanza alcontramos el célebre camín empedriáu del que yá fala la lleenda:
 |
| Arribando a PicuLLanza pel célebre Camìn empedráu. |
Y neses tamos: Camín del castru Picullanza pel camìn empedréu. Y vien la señaldá, y l'alcordanza... ¿Cuántu pelegrín tien pasao per equí?... Tamos nel camín xacobéu, imaxinái...
<<Picullanza ye una aldega montés (356 m/ s.n.m.) del conceyu la Ribera (d'Arriba) que caltién el candor de l'arquitectura popular asturiana: horros, paneres, cases con corredor o galería, fontes, llavaderu... Ta asitiada nos rimeros d'un cumal nomáu La Corona Fierro, onde hebo un castru qu'hasta va poco taba albentestate. ¡Qué pena!>>
 |
| Per Picullanza |
- Bonos díes, señora. ¿Podría dicime si tien conocencia d'un castru nesta zona?
- Sí, fíu. Ehí mesmo, nesi cuetu.
- Cagondiez, paez terrén privao.
- Y yelo. Ye de mio. ¿Que vos apetez, xubir allarribones?
- Tábemos camentando nello... Si nun ye munchu pidir...
- Pos nun tener problema algún. Xubir si queréis. Meyor baxáis pela carretera y onde alcontréis una portiella tiráis p'arriba, a manzorga. Alcordaivos zarrar otra vuelta, ¿eh?
 |
| Castru imaxinariu asemeyáu al de La Corona Fierro (Mi Geoblog: Geología y algo más) |
Nestes aporta'l so home y empobínase pa nós.
- Asina que queréis ver el castru, ¿eh?. Yá nun vais alcontrar nada. Va unos años sí. Yo, de guah.e, diba xugar ellí colos collacios al salir d'escuela. Un sitiu perguapu pal esconderite.
- Ansí que va poco...
- Va mui poco entá se calteníen les muries de les chaboles en pie y a la vista. Agora ta too anubríu.
- Vaya pena... Prestaríanos dar un vueltu, si nun-y importa... Un amigu encetóme a buscar la puerte entrada al castru. Ta p'hacia'l sur, me tien camentao elli..
- Pa nada. A ver si tenéis suerte.
-Ta lluéu y bona mañana.
Nun podemos desperdiciar esta ocasión y tiramos camín de La Corona Fierro.
( Por cierto, la Señora enxamás sintiere esi nome:
- Nun sé si ye de fierro pero caliza tien a esgaya.
 |
| El sinclinal de Picullanza aprecisase dafechu (Mi Geoblog: Geología y algo más) |
<< El castru La Corona Fierro ta entamilgáu nuna llomba caliza. El llastral (llapiaz) - la caliza erosionao por mor de les agües qu'escuerren pente la roca - failu casi inespugnatible. Alcuéntrase na exa d'una estructura sinclinal d'unos 50 Km que va de NE>SW, dende Siero hasta Quirós. Tamos falando d'un pliegle apretáu col nuedu de materiales carboníferos (F. Barcaliente y Valdeteya) y los lladrales de formaciones devóniques ( F. Rañeces, La Vid y Naranco) magar que tea afectáu pol doblamientu de la "rodilla asturiana">>.
 |
| <<Dende la Corona Fierro chisbes el mundu enteru . La Ribera y L'Aramu al algame de la mano Picullanza, mesmo embaxo d'esta panza Uviéu, a tiru flecha d'una mirada aliella>> |
El práu pasámoslu bien. Saltamos una muria y paseamos pol pandu del antecastru.
- ¡Qué prestoso! ¡Qué vistes! .
- El panorama ye plasmante. Dende equí divisaben tol entornu: La Ribera y L'Aramu (W), Llangréu (E), Uviéu y El Narancu (N) y Mieres y çel Padrún (S).
- Difícil lo tenía l'enemigu pa colase ensin que se decataren...
- ¿Y si xubo a la picalina?.
- Tas llucu. Yá pues dir tu solu. Yo nun voi reblagando per esi calizu corroyíu ...
- Pos a mín los llastrales nun me dan mieu.
Intentélo, pero nun fui a encimar. Taba llevándome munchu tiempu y tenía que tornar. Nun yera'l camín afayaizu.
Asina que desanduvi lo andao y naquel rellanu del castru tomamos la parva: xamón, pan de centenu ya escanda y un vinín... ¡ Va por vosotros, castreños!
 |
| Ilesia San Martín de Pereda |
Tamos teniendo suerte, muncha suerte. Enforma más que los nuesos mocinos. Nós tenemos un sol resplandiente pero ellos....
<< Estrechos xirones alzábense como espades escontra un cielu de vez en vez más escurecíu. Abellugaron nel adriu d'una ermita dedicada a Santolaya. Un presbíteru mui mayor brindó-yos unos tragos de vinu al empar que los aloyaba con histories de pelegrinos. Clodo ya Onirio espatarraben de risa coles ocurrencies del cura pero Melendo,esmolecíu como taba, nun tenía oyíos pa xirigoncies sintiendo a Niria fuxir...>>
Retornamos al pueblu pa siguir camín d'Uviéu. Diznoslo una siñal: ¡A mandrecha!.
Pero col envís de restolar un poco pol pueblu ya entrugar si per ellí había dalguna capiella dedicada a Satolaya, tiramos de frente, dica Ventalaire. Perguapa vista d'Uviéu.
 |
| << Dende la Venta del Aire ferregüeyamos Uviéu al que vamos algamar per Novales y Los Prietos. Cola coral nes Cruces y en Morente dellos sueños Alonso de Quintanilla plania entá sobro'l reinu, na Facienda de Paderne queda alcordanza d'ello. San Salvador ta esperando, precisa los nuesos rezos >>. |
- A Uviéu pa trabayar; pa vivir equí.
- Y que lo diga. Esto ye más sano: Sol, aire, una güertina... Y si quies dir al cine nun te lleva media hora.
- ¡Que va!.Son cinco kilómetros escasos...
- ¿Sabe si hai per equí una ilesia dedicada a Santolaya?
- Non, la de Santolaya ta en Manzaneda. Ehí cerca tenemos la de San Martín de Pereda.
- ¿Pero La Pereda nun ta allabaxo, cerca Baiña?.
- Pero esta ye PE-RE-DA, non La Pereda. Nun hai que confundise. Que la xente tracamundialo too.
- Bueno, vamos fae-y una visita; fálase munchu d'ella.
 |
| San Martín de Pereda tien a tiru La Ribera |
- Ye mui famosa pola so portada románica. Ye lo que te pueo dicir. Vien muncha xente a vela. Ya mui importante, eh. Que Pereda n'otra dómina foi perimportante.
- ¿Entós?
- Pasa'l Camín de Santiago y tamos cerca d'Uviéu. En Caxigal teníen Cotu los señoritos del Deán y el Cabildu d'Uviéu.
- ¿Habría algún sitiu onde los señoritos eclesiásticos d'Uviéu nun metieren el cazu?
- << Manda más una sotana que'l exércitu d'Aranda >>, dicíen.
(Esti Cotu foi mercáu pol Conceyu d'Uviéu nel sieglu XVI, cuando la desamortización de Felipe II).
- Ta lluéu.
- Adiós, que se me peguen les fabes.
...................................
Darréu preguntar un par de veces algamamos a la ilesia parroquial. Nun taba tan cerca como dicíen, pero bueno. Y ye que Pereda - per onde pasa'l camín xacobéu - ye una parroquia qu'abarca dellos poblaos: Ventalaire, Caxigal, San Miguel, Llamaescuera, Lusiella, El Condao, Les Segaes, Villar, Casielles y L'Atrollu.
 |
| PORTADA de San Martín de Pereda. << Ta la puerta trancada, Nun podemos entrar. Asina que ¡pa Uviéu! Vamos, a caleyar. >> |
<< La Iglesia de San Martín de Pereda pertenez al románicu (XII). L'edificiu, llevantáu con sillares irregulares, tien planta rectangular d'una nave sola ya una cabecera tamién rectangular, dambes cubiertes con bóvedes de crucería. Un pórticu ya una sacristía, a mandrecha, completen la construcción.
La sonadía d'esta ilesia del sieglu XII vien-y sobre manera pola so portada: Tres arquivoltes ya un arcu polilobuláu afitaos sobre dos columnes con capiteles de temática vexetal. Enriba l'arcu descansa un guardapolvu que s'asienta sobro xambes ensin capiteles. Les puertes, de madera tallao en cuartarones, presenten estremaos dibuxos xeométricos>>
Vamos reposar y echar un traguín de vinu enantes de retornar al camín afayaizu. Que somos tamién pelegrinos y tamos nel adriu una ilesia.
<< El sentar al pie d'un adriu
nel entornu Picullanza
fainos remembrar la historia
y caltener la esperanza:
Igual el prócer Cenera
a la so Niria afaya.
- Nun m'entretengas, curín,
que tengo partida l'alma. >>
...............................................................................................
Al llegar a Picullanza envede tirar pa Ventalaire, San Miguel o Caxigal disviamos pela carreterina que nos lleva a Ferrerinos. ¡Por fin llano!. Bueno... Casi.
Equí escaecemos el Camìn Xacobéu y tiramos pel Camìn de Niria hacia San Esteban de les Cruces.
<< Dende ellí empobinámonos dica un llugar al que'l clérigu dio en llamar Cruces de San Estébanu. Siguía lloviendo pero más sele. Salimos de la niebla talo espantayos... >>
 |
| Depósitu Agua en Ferrerinos. Un finxu pal camín. Vese dende cualisquier parte. |
Caminamos lento, asoleyándonos y enantando la mirada. El val d' Uviéu siempre a la vista abellugáu nos rimeros del Narancu. ¡Qué suerte tenemos! Y non como los nuesos protagonistes que nun pudieron almirar les aguyes de la Catedral.
Nun nos lleva media hora en llegar a Ferrerinos (425 m/ snm) y eso que díbemos pisando güevos. Pasu ente pasu vamos averándonos a una especie de torre redonda que nos sirve como faru. Ye un Depósitu d'Agua.
El pasu siguiente: Los Novales. Pero antes, en Monte Friera, vamos alcontrar un desvíu hacia'l pobláu del mesmu nome. Friera.
[Facemos esti comentariu porque tamién pues algamar a Morente ( un finxu de la nuesa ruta) baxando per Friera y Premaña*. Morente ta a tiru flecha. Ye una variante del Camìn de Niria mui, pero que mui afayaiza. De nun ser que los nuesos protagonistes medievales tiraren dica Les Cruces nós tendríemos atayao per Friera...
*En Premaña tengo sentío a un nativu pronunciar la pallabra:MAZANA]
 |
| Animando a Contador xubiendo la Cuesta'l Pandu |
En Novales salimos a la carretera xeneral Olloniegu -Uviéu (AS-242) que tien la cuesta Manzaneda. De momento nun fai falta nin pisala. Pues pasar tres d'un quitamieos pa enfusate camín de Paderni, magar nun sía preciso baxar hasta'l pueblu.
La nuesa sorpresa foi qu'al llegar a Novales, na cuesta'l Pandu, empezamos a ver xente a fargataes.
- Oiga, ¿cómo ye qu'hai equí tanta xente?
- Coño, sois lo únicos que nun sabéis que pasa per equí la Vuelta a España.
- ¡Carayu, ye verdá!. Güei termina la etapa nel Narancu. ¡Vaya suerte! Tenemos tolos santos de cara.
- Tenemos polo menos a San Martín (s.VII), el Papa al que tuvieren faciendo una sufrida vuelta por etapes (Roma-Constantinopla-Crimea...) enantes de da-y el martiriu definitivu.
- Sedrá por eso... San Martín ta cola Vuelta. Igual qu'elli pásase fame, sede, calor, fríu...
La etapa ganóla David de La Cruz, que se punxo de lider. Y la Vuelta del 16 foi pa Nairo Quintana. Froom quedó segundu y Contador cuartu, perdiendo'l tercer puestu del podium en beneficiu de Chaves que fizo un etapón l'ultimu día. Yo esi día vi na cuesta El Pandu a Carlos Sastre, el madrilanu afincáu nel Barracu (Ávila). Como soi tan curtiu nun m'atreví a pidi-y una semeya. ¡Qué guapo sedría tener una foto con elli encabezando esti post:
 |
| Carlos SASTRE, ganador del Tour 2008 |
<<Corriendo la Vuelta a España
Camìn de Niria
gana'l Tour de Francia >>
Tendríalo merecío (yo, claro) polo que sufriere (talo San Martín) el día que Carlos ganó'l Tour de Francia (2008). Tovía te toi viendo, Carlos, saltar xubiendo L'Alpe Huez y a Bjerne Riis amarrando a los Schleck. Yo tamién saltaba; daba cola cabeza en techu. Ganasti porque fuisti'l más llistu: Norabona.
Entemecíos col públicu tiramos p'arriba a salir otra vuelta a la xeneral que vien d'Olloniegu.
Vemos un cartelu que diz:
Paderni nun ye un pueblu cualquiera. Equí ñació l'asturianu más cabezaleru del sieglu XV: Don ALONSO de QUINTANILLA. ¿Sedrá la reencarnación de don Rodrigo Álvarez de les Asturies que viviere nel XIV? . Tan cortaos pel mesmu patrón...
CUENTOS de QUINTANILLA
[ Alonso de Quintanilla o Alfonso Álvarez de Quintanilla foi un políticu ya estadista español del que magar tener desempeñao inestimatibles servicios a La Corona - Xuan II, Enrique IV, Reis Católicos - na segunda mitá del sieglu XV malpenes nos quedó información afayaiza: << noticies vagues, referencies escures, cites remotes, silencios, escaecimientu ...>> . El Contador Mayor del Reinu nen yera mui apreciáu pola nobleza la dómina que se vía obligada a << pasar por caxa >> davezu. Daquella nun había "paraisos fiscales" pa escurrir el bultu...
Alonsín nació nel Cotu Paderni (Caxigal) nel añu 1420 y yera fíu de Lluis Álvarez de Paderni ya Orosia Álvarez de Quintanilla, llabradoes acomodaos. De guah.e , andando como pinche de caza, debió conocer bien al cleru y a la nobleza; enseñances que-y valdríen pa más alantre. Ye de suponer qu'estudiare nel cenobiu San Vicente, l'únicu sitiu posible daquella n'Asturies. Amás teníalu a tiru flecha. Quien vería al rapaz da-y al Triviun y al Quadrivium, Humanidaes y Drechu. Lo de la Economía debió inventalo él seique tevo bonos profes na Universidá d'Uviéu, cabezalera yá d'aquella. Nes vacaciones de branu ye más que posible qu'agabitare en casa coles xeres del campu. ¿Cómo s'esplica sinón lo amañosu que salió p'atropar perres de nun tar avezáu a atropar la yerba?
 | |
| << Salió Alonsín de Paderni pa llevantar a Castiya y facer d'España un día del mundu mundial la figura . Una pena qu'algún Rei nun tuviere a la so altura >> |
Al paecer Alonsín entamó la carrera (¿sedrá ancestru del Nano?) arimándose al marqués de Villena, Xuan Pacheco (¡toma!), al que sirvió como criáu (aprender cuesta, eh). Debió quedar contentu' l marqués porque dellos años más tarde concedió-y un xuru perpetuu nes alcabales d'Uviéu ( una especie de certificáu pol que se-y permite cobrar ciertos impuestos previo la entrega al rei d'una cantidá de perres: Inventóse la Deuda Pública).
Tres d'unos comienzos tan prometeores col marqués pasó como doncel a la corte de Xuan II y encamentóse-y la educación del principe Enrique (¡ondia!). Al llegar esti a Rei (Enrique IV) << ancha ye Castiella>>: Criáu, guarda, vasayu militar del rei y......"Cuntador d'Acostamientos", por fin ente les perres ( los sueldos de funcionarios reales, o ansí).
 |
| LA FARSA D'ÁVILA: ¡Enrique, vete a la M.! ( semeya d'Españafascinante.com) |
Cuando estalló la cris de sucesión en Castiella foi favoratible al infante Alfonso - hermanu de la furtura Xabel I - escontra la Beltraneh.a (¡qué güeyu tenía!) y asistió a la Farsa d'Ávila, escontra'l Rei. N'agradecimientu foi nomáu Cuntador Mayor y más coses... Al morrer l'infante tornó a les files d'Enrique, pero duró poco porque al xurar Xabel nos Toros de Guisando camudó otra vuelta de bandu, abellugándose nes faldes de la futura reina (¿ónde pues tar meyor?). Xabel revalidó-y el títulu - a cambiu de bones perres - y entró con ella en Segovia y Tordesillas, onde quedó como gobernador y formó un mayorazgu que más tarde dexará a una fía: Doña Inés de Quintanilla.
Pero los años doraos d'Alonsín vinieron colos Reis Católicos. Como alcaide del Castiellu de la Mota recuperó la ciudá d'Arévalo (coles perres de la venta del <collar d'esllabones> de la Reina... Y ye que la espada caía-y de la mano).
LA FARSA D'ÁVILA
Taba Enrique (IV) mui contentu
con Mendoza y de La Cueva,
xubía peles paredes
el gafu Señor de Villena.
Al sentise despreciáu
buscó'l Marqués la manera
de camudar aquel rei
que carecía chapeta;
y en comuña colos suyos
depusiéronlu en Plasencia.
Como-yos paecía poco
en Ávila, la peineta;
 |
| La FARSA d'ÁVILA: L'infante Rei de Castiella. - Ven p'acá, Inocente, vamos xugar a la guerra. Nosotros vamos mandar y tu'l Rei de la Comedia. |
a un moñecu madera.
Con un discursu perrunu
pónenlu de vuelta y media,
quíten-y la corona,
la espada-y saquen fuera
y el conde de Benavente:
- ¡El blasón, a la cuneta!.
Y pa rematar la historia
l'hermanu del de Plasencia
d'una patada en culu
mánda'l felpeyu a tierra.
Aprovecha entós l'Obispu:
- ¡Por Alfonso, con Castiella!
Yá l'Inocente robló
de muerte la so sentencia.
 |
| Los REIS CATÓLICOS> (www.cultura andalucía) |
Magar que nun quedare ehí la cosa. Llegó la hora de pasa-yos factura a clérigos y nobles poles correríes de caza en Caxigal, cuando guh.e:
- Maxestá, tengo una idea pa sacar perres. Ensin elles nun podemos ganar la guerra.
- Qué se te ocurre, Quintaniella. A mín nun me queda qué empeñar.
- ¿ Y si les sacamos de la Ilesia?
- A bona vas, parte. Esos ye namás < venga a nós el to reinu >.
- Tienen muncha plata nos preseos relixosos. ¿ Y si nos dieren un prétamu pol valor de la mitá a devolver en tres años?
- ¿Por qué diben arriesgar?
- El cielu de Castiella e caru. Otramiente una reina portuguesa. (La Beltraneh.a ta casada en Portugal).
- Convoca cortes en Medina'l Campu. Y de pasu rásca-yos el bolsu a los fanegueros, nobles o non.
- Eso queda de cuenta mío, señora. Van agradeceme les corripandes de caza nel Cotu Paderni.
 |
| SOLAR DE QUINTANILLA en Asrturies |
< En campu de gules una curz llana con dos órdenes de veros en plata y azur . La bordura llisa de plata >>
El reinu, por mor de tantes guerres, taba fechu una cadarma. El campu abandonáu, el comerciu... ¿de qué?. Nun había qué comer y el bandolerismu taba al cabu la cai. Munchos nobles son los peores.
Los reis, esmolecíos, llamentaben énte Quintanilla:
- Fernando, la xente nun tien ná qu'echar a la boca... El lladroniciu y el crime son < el pan nueso de cada día > . Y Dellos nobles son los peores
- Sí, quieren caltener el so ritmu de vida. Pero nun pueo tremar l'exércitu sacándolu a la cai. Toos son pocos pa les batalles qu'alleguen.
- Tengo una idea, maxestá.
- ¿Qué se te ocurre esta vuelta, Quintanilla?
- L'exércitu que quede como ta, pero podemos facer otru dafechu pa ello. Una Santa Hermandá, pero con toles de la lei.
- Yá hai daqué paecío...
- Pero ye una merienda prietos. Caduna va a la so bola...
- ¿D'ónde sacamos los homes y les perres, alma de dios?
- De los Conceyos. Que lo pongan ellos. Nosotros ponemos la cadarma organizativa: un presidente, un obispu, un capitán xenereal y...
- ¿Un Cuntable ? - entruga retórico la Reina.
- ¿Que serás tu, Quintanilla?- pescuda'l Rei.
- ¿Conoz otru más afechiscu, don Fernando?...
- Bueno, habrá que facer un censu, pa reclutar, digo...
- Ta fechu, Maxestá.
- ¡Cómo!...
- ¿Cuándo?..
- Púnxime a ello por mor de la cata d'impuestos. Pa eso soi Cuntador.
- ¡H.oder, col Quintanilla!
- Nun mientes eso, Fernando. Que cada vez que siento esa pallabra quedo preñada.
- Ablucante, financieru. Serás famosu por aciu del <Censu de Quintanilla> (¿ónde tará ?)
 |
| Caxigal: La Venta. Al par de la Riega Morente. Pasa'l Camín de Santiago pasa'l Camín de Niria. << De La Venta'l Caxigal salió Alonso Quintanilla camìn de fama y de gloria que namás daba Castiya. Equí aprendió a cazar colos nobles, en cuadrilla, y na Riega de Morente pescó la sabiduría qu'un humanista asturianu precisaba pa la vida. "¡Cómo una Asturies tan prieta pue dar mente tan divina!" - Por már vueltes que se-y daba nun lo entendía Nebrih.a. Yá na corte, colos Reis, tramó una España d'altura >> |
Finu como otru pocu sabía camelar a la Reina como naide (bueno, como Colón). Por mor de les quites que se-y debíen y non devengaes - la Corona llegó a debe-y más de tres millones de maravedinos - féxose col collar de la Reina que dexare empeñaú por mor de la toma d'Arévalo.
- ¡ Qué guapa tas, Sabelita! ¡Cómo t'asienta esi collar!
- Esperemos nun tenga qu'empeñalu otra vuelta...
 |
| La REINA <acostinando> a Colón per aciu de Quintanilla. Hai qu'esperar termine la guerra Granada enantes d'emprimar cola Aventura Americana |
Pero onde demostrare que yera un aigla (non en vanu taba avezáu a trepar con aves de cetrería dende neñu) foi col casu de Cristobal Colón. Pocos creyíen nél: Don Hernando de Talavera, Rodrigo de Maldonado, quiciabes Lluis de Santángel y... ¿la Reina?. Pero'l de Paderni tenía güeyu pa los negocios. Sabía arriesgar y d'otramiente taba bien cubiertu. ¿Descubrir otru mundu delantre les sos propies ñarices y amirar pa otru llau? . Eso nun va pa col Cuntador Mayor del Reinu.
- ¡Avante coles faroles!
Como Colón nun tenía un rial y yera preciso mantenelu - pa siguir buscando sofitos ya esperar el fin de la guerra de Granada - concertó cola reina una < paguina d'acostamientu>, pa dir tirando:
- Cristobal, ehí tienes un adelantu. Son trenta dobles d'oru. Tienes que conformate, mira por elles. La cosa ta chunga por mor de la guerra.
 |
| El castiellu de la Mota, onde Quintanilla iguó un Mayoralgu en favor del so fíu Lluís. |
El <Caxigalín>, el guah.e qu'aprendió a cazar nel Cotu Paderni (Caxigal) y que s'educó en San Vicente, nunca nun quixo títulos de nobleza.
- Lo mío ye fabricar perres. (Dirixó la Fábrica de Moneda)
<< Manda más una peseta
que d'una noble la teta >>
(Eso había que velo)
Retiró a finales del noventa y cuatro (1494) en Medina'l Campu onde creó un mayorazgu que textó en favor del so fíu Lluís, el Comendador. Nun debió ser tan ardigoteru como so padre magar que s'alpuntó al bandu perdedor: Los Comuneros. De nun ser pol títulu (mira, yá valen pa daqué) de Trece de la Orde de Santiago,y dalgún enchufucu más, tendría pasao pol cadalsu a rapar la cabeza ( de qué mili te salvasti, compañeru). ]
CAMÍN DE LA MANXOYA
 |
| Ye cosa de visitar "La Parrilla d' El Parráu " cuando tas yá h.artu andar. |
Con una señaldá pergrande por dexar el suañu de Quintanilla escaecíu en Paderni tornamos otra vuelta a la ruta.
¡Qué vida la d'esti home! ¡Qué tiempos!. D'una fidalgüía humilde algamó a los puestos de más alta sonadía nel gobiernu. Foi talo un ministru plenipotenciable d'una España naciente: Contador Mayor, catalizador de la "Fábrica de la moneda", de la "Santa Hermandá", del "Descubrimientu d'América", la "Conquista les Canaries"....
Salimos a la xeneral y enseguida pasamos per delantre " El Parráu". Yá tenemos comío nesti restaurante y esfrutar de les vistes dende'l afayadizu aparcamientu. Abarcamos una bona parte del "Camín de Niria".
Nun sedrá la última vez, espero, que lo faigamos: Bona cocina y tratu amable. Les costielles pa echar de comer a parte.
 |
| La Pelegrina voltia la mirada pa contemplar "La Casona'l Pirulí" |
Al alzar la mirada vemos que destaca nuna llomba otru fitu asemeyáu al de Ferrerinos: un pirulí de formigón, como una seta con sombreru...
-¿Una "Lepiota formigón" ? ...
-Non, ye otru Depósutu d'Agua, pero con paragües, claro. A les faldes d'elli, al pie la carretera, una casona perguapa y antigua que tan iguando. ¡Bien! Tamos hacia Casa Balsera.
 |
| Cola Sidrina "El Torneru" en media hora n'Uviéu |
-¡Cagondiez! ¿Viviría equí Alonsín? . Otru tiempu debió ser una casa de fidalgos fanegueros que controlaben la zona. ¿Echámos-y una güeyada?
De sospresa en sospresa, y afiando la mirada, columbramos nel valle d'amandrecha un edificiu singular. Prismáticos...
- ¡Santa María de Bendones!
- ¿Esa nun ye la ilesia Prerrománica que tuvieren a puntu de desaniciar cuando la guerra'l 36?
- La mesma. De nun ser por Xuaquín Manzaneda güei día nun podríemos esfrutar d'esta ayalga.
Elli, el Cronista Oficial d'Uviéu, descubrióla y consiguió financiación pa iguala cola impagable ayuda de Lluis Menéndez Pidal.
- Oi, tu. ¿Nun pensarás llevame güei hasta ellí, eh?
- Non, voi llibrate d'ella. Pero mientres garramos esa carreterina que diz Luxido, y nos lleva hasta Morente, vamos camentando pel camín lo que alcontremos per internet. ¿Paezte?
- ¿Tu nun tuvisti ellí?
- Sí, pero nun pudi entrar.
- Y güei tampoco.Yá ta. Mírala per equí. ¿Paezte la Wikipedia?
- Pa entamar, sí. Llueu...
SANTA MARÍA DE BENDONES
 |
| <<Ellí embaxo s'acolumbra la Capiella de Bendones al par d'una torre esenta de non poques illusiones. Gracies a Manzanares caltenemos los fervores del prerrománicu astur, ún de los nuesos amores>>. |
Esta ayalga del prerrománicu tuvo a puntu de quedar desaniciada por mor de los bombardeos durante la Guerra Civil del 36. Menos mal qu'aprució Xoaquín Manzanares - cronista oficial d'Asturies - y la rescató. Cola ayuda del arquitectu LLuís Menéndez Pidal llogró iguar lo que se pudo y ser declarada Monumentu Nacional nel añu 1958.
 |
| <La testera tripartía> coles tres capielles y l'alfiz sobro ventana trífora. |
Los estudios demuestren que foi edificada ente los años 792 y 842. Tamos falando del reinú d'Alfonso II, el Castu ( 791-842). Nun queden documentos escritos que lo afiten dafechu pero l'estilu.... Ye mui asemeyada a l'alfonsina de Santullano (San Xulián de los Praos) y a San Pedro de Nora. Otramiente sabemos que ye anterior a 905, data na que Alfonsu III donó esta ile
sia a....
- ¿A quién?.... A ver si lo averigües...
- A la catedral de San Salvador d'Uviéu. Faltaría más.
 |
| ¡Qué orixinalidá de Planta! Lleva l'alcuñu la casa |
ESTRUCTURA:
D'una sóleda planta rectangular de cabecera tripartía atravesada por otra nave o transeptu con sendos cortiles nos llaterales. A los sos pies un pórticu (adriu) complementáu por dos lladrales.
La orixinalidá de la estructura ta en qu'al entrar pola puerta o vestíbulu nun das de frente a una nave llonxitudinal sicasí a una enforma alta, atravesada perpendicularmente (transeptu), y que forma'l travesañu de la cruz vista dende'l cielu (que pa eso tan fehes estes ilesines celestiales).
Nel testeru hai tres capielles: La central, o mayor, abovedada por mediu cañón en lladriyu cara vista y con un ventanal afatáu por alfiz sobro ventanal tríforu. Les capielles llaterales con cubierta adintela por madera ya una aguada.
 |
| Santa Mª de Bendones: Pórticu d'Entrada y Turruxón desimíu (esentu) |
- ¿Había enriba la Capiella Mayor un cuartu secretu como en Santullano?....
- Sigue siendo un secretu. El casu ye qu'un aximez tríforu, orniáu dcon alfiz, qu'andaba al debalu (¡ hai que h.odese!) darréu l'estropiciu bélicu foi asitiáu na cámara'l secretu.
- ¿Queden retos de pintures?
- La pintura anda escoso pero una espiga en roxo y mariello con fondos negros recuerden el clasicismu romanu talo qu'en Los Praos. Tienen la mesma escuela, o mayestru.
Al par de la fachada oeste un turruxón cuadráu, y desimíu, fai remembranza de los campaniles medievales italianos.
- ¿Y los capiteles de la ventana del ábside?.
- Los cestos cónicos con aniellos y el collarín son de lo más llamativo.
- ¿Y les cancielles llabraes con motivos vexetales?
- Unes son del tipu visigóticu ya otres del típicu asturiano.
.........................................................
Pasamos una casa-galería mui vistosa, el "Bar Montes" y llegamos - yá per una cera salvadora - a "Les Cruces", les Cruces de San Esteban. Talo los nuesos protagonistes:
< Dende ellí ( Picullanza) empobinamos dica un llugar que'l clérigu dio en llamar "Les Cruces de San Estébanu". Entá orbayaba y salimos dente la nublina como espantayos. Depués d'atravesar un robledal acolumbramos la ciudá d'Uviéu. Arreamos los caballos.... >
Efetivamente, caltiense'l entá'l nome: El Bosque (yá verás como enseguida-ylu cambiamos pola Viesca). Queden nicios abondantes de la viesca y hai anguaño un llugarín con esi nome. Pero faise perllongu'l camín y nun ye recomendable pal pelegrín, anque pue pasase. Yá sabes, caleyes cortaes pol pocu trasiegu al campu, algún vecín repunante...
Lo ¿más? bultable qu'alcontramos anguaño nesa viesca Viesca escomanada de carbayu (y castañales, bidules, pláganos, fayes...) que dominaba'l conceyu d'Uviéu pue ser l'Hotel-Palaciu:
"Bosque de la Zoreda"o Palaciu de los Sela.
Mandáu construyir polos Figaredo en 1930 foi reinauguráu en 2009. Tien 25 habitaciones de luxu asiáticu y dos restaurantes. Caben más de 1200 persones. Si nun sabes onde casar la fía... Cuida nun se te pierda nos 13 mil/m2 de viesca que lu arrodia. Fízose famosu poles "tertulies polítiques" conocíes como < pautu del duernu>: A la hora de xintar pierde los colores la bandera....
Pero nosotros tamos felices cuando llegamos a la Ilesia San Estébanu, asitiada nun pandu, tres de la parada l'autobús Olloniegu-Uviéu. Averámonos a ella pa roga-y al santu. Nunca nun sobra una plegaria, colos tiempos que cuerren.
 |
| Ilesia de San Esteban de Les Cruces (Uviéu) |
< San Estébanu ye'l primer santu de la relixón católica. Xudíu griegu convertíu al cristinismu fore escoyíu polos Apóstoles pa llevar a cabu un repartu más xustu de los recursos de los probes y sobre too de les viudes de la comunidá seique les griegues considerábense peor trataes que les xudíes natives. En fin...
Amigu confianza los Apóstoles falaba bien de Xesús y de la so relixón. Nes sinagogues andaba a la tema colos sacerdotes que terminaron denunciándolu énte'l Sanedrín por flasfemu. Y como talu foi apedriáu.
Un rapaz , que guardó les ropes de los asesinos durante l'atropellu, terminó convirtiéndose al cristianismu: Convirtióse en San Pablo>.
Yá imploramos en Bendones y rezamos en San Esteban, agora toca siguir. Frente la parada l'autobús unes señeles indiquenos que Luxido ta ellí mesmo y Morente bien cerca, unos dos kilómetros, P'allá vamos. Ye gracioso. El cartelu diz Llosio, pero un vecín de nacimientu diz que naide nun lo llama asina. Que tola vida foi Luxido. (Del dios Lug, ¿alcordaisvos?... Tamos en tierres de llugones).
 |
| < Nel COTU del CAXIGAL dexó Alonsín les so güelgues. "Camìn de Niria" anda a la cata d'elles >. |
 |
| Un descansu nos Prietos. Momentu pa escuchar histories--- |
Algamar a un entronque de caminos nuna minúscula Área Recreativa ye una bendición. Hai que sentar y echar un tragu d'agua: ¡Vaya calor!
Preguntamos a una señora mayor pola ilesía de Santiago la Manxoya.
- Tirái per ehí abaxo y llegáis al "Caserón". Lluéu siguíi baxando. Nun tenéis perda.
Nun mos quedó clara la historia de l'imax de Santiago que quixeren tracamundiar d'ilesia. Gracies a un capitán de la Guardia Civil que nun permitió mover la verdadera del sitiu. ((Cuando lo tenga claro, cuéntovoslo. Toi peor que vosotros. Nun fui arreglame cola vieyina)).
Y en cuatro pasos llegamos al bar "El Caserón", porque yá tamos nel barríu del mesmu nome.
Ta abarrotáu. Ye la hora la xinta y ... ¿Qué podemos facer a eses hores?. Facemos sitiu nuna mesina del interior tres colanos ente bayura montañeros y ciclistes. Paez sitiu obligáu. Un platu combináu de güevos y patates frites - eso que nun se pue comer en casa, porque engora (¡!) - con chorizu y xamón frito... Vamos dexalo...
"EL CASERÓN"
 |
| << Bayura de pelegrinos pasen pel "Caserón" a recargar les mochiles, a caltener la illusión que Xacobu sía bonu, que'l Camín sía meyor >> |
<< Tres xeneraciones lleven sirviendo a pelegrinos - pasa'l Camín Xacobéu - , montañeros, ciclistes y vecinos esti bar-merenderu nel barriu del mesmu nome. Esti bar-tienda emprimó nel célebre añu de 1898, el que dio orixe a la Xeneración Lliteraria del 98. El bar taba separáu de la tienda por un arcu, tenía'l pisu de madera ya un mostraor pergrande. Pa completar el negociu organizaba bailes los domingos y tenía una bolera enfrente.
La so primera propietaria foi doña Engracia y al morrer siguió rexentáu pol so fíu Pepe, casáu cola llonxeva Chelo Muñiz . Esta institución desendolcó estes actividaes hasta la Gurra Civil, cuando quedó convertida en Comandancia, dende la que s'organizó'l cercu d'Uviéu. Del Caserón yera'l famosu socialista Mateo, l'hombrón seriu de gafes y boina >>.
...............................................
¡La boooooombaaaaaaaaa medieval!.(Paezme que toi suañando)
Cuando na Edá Media l'home taba xuncíu a un Señor per aciu del tarrén que trabayaba resulta qu'alcontramos unos llabriegos que tienen la capacidá d'elexir al so amu. Como suena, puen escoyer al señor que meyor-yos convenga. Ellos tienen que trabayar y pagar les rentes,sí -a cambiu de proteicíon ya organizacion- pero esbillando d'ente los posibles candidatos al qu'ufiertare meyores condiciones. Podía ser cualisquier señor (bonfetría de Mar a mar) o dalgún noble de la comarca (bonfetría de llinax).
Col tiempu, los de la pasta, fueron atornillando y pasaron a ser como les otres : De Realengu (del Rei), d'Abadengu (d'un monestriu) o Solariegu ( d'algún noblucu feudal, casi siempre perruneru).
 |
| A Pontedey (Merindá de Valdeporres) llegó Camìn de Niria por una comanda'l Rei que ta buscando una Reina. |
Les bonfetríes foron propies de Les Merindaes.Sí, eses tierres al norte de la provincia de Burgos que descubrimos esti branu por aciu del chivatazu d'un collaciu busca-piedres (miGeoblog y algo más). Les Merindaes foron tierres d'espansión del Reinu d'Asturies, tiempos lonxanos. Voi dexavos una semeyuca de p'ellí...
Habéis saber qu'hasta Les Merindaes llegamos pel Camìn de Niria tres les güelgues de Paterna. Pero esto ye otra hestoria que pienso cuntavos daqué día... ¿Podréis aguantar? . Ye qu'agora tamos arranaos por dar con Niria. Sí, esa chavalina Cenera, de pelo prieto y rizao que coló de casa por amor...Ya eso nun pue quedar ansí.Nunca un caballeru medieval -nin tan siquier un quixote- tien dexao una dama al aldu... >>
.....................................................
Del Caserón, repuestes les fuercies, vamos tirar pela carretera la Bolgachina hasta San Lázaro pasando per delantre - y per dientro - la nueva Ilesia de Santiago de La Manxoya. Les ruines de l'antigua ilesia tán enfrente y pasen más bien desapercibíes.
De Santiago al Salvador nun nos queda qu'un fervor. Y pa enriba cuestabaxo. Tamos nel Barriu San Llázaru. Al arribar a la fondigaya vemos que pasa una riega. Trai poco agua pero ye'l Ríu Gafu. Sí, esi que conocemos tan bien na so desembocadura. Ye afluyente del Nalón y queda sumíu nél nes Caldes, al par del Palaciu petite del Obispáu d'Uviéu n'otres dómines. Tenémoslo camentao nel post: <Gayola nes Caldes>
Ehí mesmo entama El Parque d'Iviernu que siguiendo'l Gafu llévanos a Les Caldes. Una ruta perguapa que yá tenemos fecho.
 |
| Camín de la Malatería pela ribera del Gafu. |
Tenémosla a manzorga. Anguaño, l'albergue Cano Mata, ye un Centru de Día pa persones ensin techu. Tal paez que la so andadura entamó nel añu 1146 (XII), col nome de Malatería de Cervielles o d'Entecaminos, y yá en 1235 ta embaxo l'advocación de San Llázaru. Esta malatería tien más de setecientos años d'andadura. Aguantó inclusive la refundición de toes elles cuando en 1751 el Rexente Gil de Jaz propón centralizales nun gran hospiciu que sedría llevantáu en 1754, no que güei ye L'Hotel Reconquista.
 |
| Colando de la Malatería. Ponte sobre'l Ríu Gafu. |
Algamamos a la Malateria pela ribera del Ríu Gafu. Ye lo más prestoso. Facemos la semeya afayadiza, con permisu los residentes, y salimos a la carreterona de varios carriles: Muñoz Degraín (Ronda Sur-N 630) .
Depués de tanta paz pelos montes d'Uviéu alcontrase casi de sópitu con esa esplosión circulatoria, con esa cantidá de xente que va y vien, fainos salir del túnel del tiempu pa entrar nel presente cotidianu. Miramos en toles direiciones, como pa situanos; nun acabamos d'aterrizar por mor del ruidu atronicante.
A mandrecha vemos una escultura mui actual en fierro policromao: San Mateo, el patrón d'Uviéu. Foi l'autor del Primer Evanxeliu. Rafael Rodríguez Urrusti foi l'escultor. Tres d'ella hai una ilesia mui moderna. La Ilesia de San Llázaru. Yo pensé que yera una discoteca pa pelegrinos...
......................................
 | |
| ¡Míralos!... Estos fatos ceyen que ser pelegrín ye cualquier cosa.. ¡Anda! Como si valiere too... Xacobu debe tar ablucando... |
que por votu o devoción
visita llugares santos
pola mor del Salvador.
¿ Y vosotros? ¿Ánde vais, ho?...
¿A tomar una sidrina
allarriba, en Caserón?
Pal domingu vos espero...
Voi arreglavos yo.
Vais venime con montera,
el cabás y el bordón;
cola vieira nun costazu
y guaraches de pasión.
Y si casu nun facéis...
Pue cayevos el mantón.
¿ El cayaú?... Póngolu yo]
Tenemos que cruciar la gran cai pero enantes falta rindir homenax al patrón de los pelegrinos. Aprovechamos pa sacar la semeya conmemorativa delantre la estatua en granito del Apóstol Santiago (Monumentu al pelegrín).
Adientrámonos nel Campillín. Tenemos dos - o más - alternatives: O siguir de frente y llegar a la Plaza la Constitución pela cai Madalena, onde ta l'Ayuntamientu, o baxar dica la Ilesia-Colexu de Santu Domingu - talo fizo'l Pelegrín Valiente - pa llegar a la Catedral per aciu les Cais Escura, Mon y Santa Ana.
 |
| Colexu Santu Domingu. Ilesia. Antiguu cenobiu. |
[ La Ilesia Santu Domingu de Guzmán perteneció en principiu al conventu del mesmu nome. Falamos de 1518 y ye d'estilu góticu. Foi reformada nel XVIII cuando se-y adxuntó l'adriu de la entrada. Por mor de los bombardeos la Guerra del 36 quedó pal desguace. Namás se caltuvo en pie la ilesia, precisamente, y parte del claustru'l conventu. Pero surdió talo l'ave fénix convertida nun Colexu Segunda Enseñanza: Los Dominicos.Impresiona pasar delantre d'ella y sobremanera cuando t'averes al pórticu.Yá que tas tan cerca pues entrar a contemplar el retablu barrocu del XVIII].
 |
<< Al baxar de La Manxoya pela cuesta'l Campillín acolumbres les aguyes de la Torre, onde Fermín enantaba la mirada: - Uviéu ye'l mio xardín. Sacante la mio Rexenta - ¡Esa nun ye pa tí! >> |
Tomamos la segunda opción. Y sentimos abondo nun pasar baxo'l paliu del arcu de trunfu del ayuntamientu que peles Cais Cimadevilla y La Rua nos planten en Alfonso II (Plaza la Catedral). Nun podremos echar una mirada aliella al balcón de La Rexenta... Pero tiempu habrá. Ye fariña d'otru costal: de les Rutes Clarinianes.
Mas nun ye tiempu de llamentos y menos cuando al baxar pel Campillín - cai Padre Suárez - y llevantar la vista, acolumbramos les aguyes de la torre la Catedral : EUREKA! Pasónos como a los nuesos protagonistes...
<< Salimos de la niebla talo espantayos y darréu atravesar una carbayera aldovinamos la ciudá d'Uviéu . Afalamos los caballos y, al galope tendíu , algamamos la puerta la muralla.
- ¡ Rellumante! .
Pasamos al trote pembaxo del Arcu de Trunfu de la Puerta Rutilante (talo fexo'l Pelegrín valiente) y arribamos a una plaza cola ilesia más grande qu'enxamás tuviere visto.
Clodo cuntó que so padre faláre-y abondo al rodiu la construcción de San Salvador. Milenta y mil veces Társulo tien remedao al Rei Alfonso
( el Castu) glayando dende la golupa'l caballu:
- ¡ Que les torres alcancen el cielu!
¡ Que les campanes estornen a los infieles ! ¡ Que la contemplación del templu sirva d'alliviu a les almes espantibles!>>
 |
| Perspeutiva de la Cai Escura per Mon. <<Ta sonando la campana na torre la Catedral; los romeros van pa misa pos echa'l sermón De Pas y si nun pases per caxa seique te pues condergar. Mientres Mexía duerme, riendo de Quintanar, siento a Santos Barinaga al par de casa clamiar: - ¡ Malditu sías, lladrón! ¡Malditu, tu, Maxistral! Por to cobicia infinita vengo yo de m'arruinar. Espero que dalgún día Dios te les faiga pagar y te ponga una Cruz Roxa na puerta la Catedral. ¡Enxamás sedrás Obispu! Munchos sapos vas tragar. Los romeros van a misa al Salvador visitar >> |
Pasamos Santu Domingu y entramos na Cai Escura, estrecha y medieval. Caminamos per ella seliquino y al cruciar col Postigu Altu entramos na Cai Mon. Yá vemos les aguyes la catedral al fondu la pespeutiva... ¿Qué imax más candial!.
Per esta cai estrechina ya empiedrada de vetustes fachades paeznos tar na Edá Media. Pesllamos los güeyos y sentimos el martillar so les yuncles.... Antiguo esta yera la cai de La Ferrería. Más tarde pasó a llamase Mon, n'honor d'Alexandro Mon, el fadiendista qu'iguó la Facienda española moderna siguiendo los pasos d'Alonso de Quintanilla. Hasta foi Presidente de Gobiernu... Enxamás camudó de xaqueta, foi lliberal de cabu a rabu. Pienso tomar una por ti en "Casa Chicote" (téngolo cerca).
Tamos encantexaos.... Un trasgu, inmortalizáu nel imafronte del Pub El Duende, fáinoslo saber:
- ¡Hola!... Toi chisbando... Andái con procuru y abiertos al saber. Nun tais solos. Yo voi acompañavos hasta que salgáis de la ciudá... Delles vegaes faise peligroso andoliar pela Encimada. Los lladrones quieren aprovechar del pelegrín...
- Gracies, Trasgu. ye una suerte ya un honor facer esti tránsitu abellugaos por un sabichegu como tu. ¿Podemos entrugate daqué?
- Faltaría más. ¿Entós pa qué tamos equí?. Contestarevos a too lo que sepa. Toi arranáu por ello.
La xente pregunta poco y munchos yá vienen +acompañaos por guíes sabelotoo. Asina que yo quedo pa práu.
- Chócala tíu. Dambos precisamos ún del otru.
- ¡Chócala, tío!
- <<Unus pro omnibus, omnes pro uno >>
- < Un pour tous, tous pour un >
- < Uno per tutti, tutti per uno >
- << Yo por ti, tu por min>>
- Esto sí que ye un comienzu intereseante. Entamamos l'amistá pela PUERTA RUTILANTE
- ¿Taba per equí la PUERTA RUTILANTE? .
 |
| Soi un trasgu, soi "El DUENDE"; soi l'amigu que tienes pa nun perdete n'Uviéu per estes bendites caleyes. |
- Bueno, per equí cerca taba la Puerta de Sansón, la que da pal este. Igual vos tracamundiasteis d'entrada. Pero nun pasa nada.... Ocurrei a munchos pelegrinos. En cuantes dexen la Malatería San Llázaru salen esvoquiaos Campillín abaxo al aldu les aguyes de la catedral...
- Ye lo que nos pasó a nós. Seique'l cenobiu Santu Domingu tamién nos atraxo talo un imán...
- Tranqui, too tien igua. Pa eso toi equí. ¿Por qué nun aprovechamos pa dar un vueltu pel noyu la ciudá?.
- Prestaríanos algamar a la catedral pela Puerta Rutilante.
- Nun vos esmolecer... Yá me decaté d'ello... Fiái de min.
- Fiar, fiamos; pero nun dexes de ser un trasgu...
- ¡Ja, ja, ja! ... Dalguna vos armaré pero curiar la casa y los amigos ye lo nueso.
- Pero la puerta esa... ¿Per ónde andaba?
- Mira que sois testerones, eh....Igual taba na plaza Alfonso II, delantre la entrada principal de la catedral y enfrente l'imafronte de SanTirso. Yera la puerta principal de la ciudá, seique tenía unes cuantes más. Hai quien diz que se paecía a esta... Pero yo creyo que debió ser más ablucante entá. ¿Préstavos?
 |
| Pela PUERTA RUTILANTE entramos na puerta del cielu: UVIÉU |
- Bueno, pos prometo - zarra los güeyos y echa la mano al pechu - que nun ratu vamos entrar per ella... Pero enantes pueo dir camentandovos per alto lo que dexamos nos lladrales. Vosotros esfrutái...
-Tamos vien seguro d'ello.
-Mirái que vos digo... Yá que tuvisteis la cortesía de venir a min... ¿Qué vos paez si damos una vueltina per barriu la Encimada enantes d'aportar a la Puerta Rutilante?
- ¿ La Encimada?
 |
| Pela Encimada |
- Asina se llamaba al Cascu Antiguu la ciudá. Clarín inmortalizáralu na Rexenta. ¿Queréis que vos lo refresque?
- Bueno. De les Rutes Clarinianes yá falaremos a parte... Tenemos dos feches pero fálten
nos "Doña Berta" y " Tres los pasos d'Ana Ozores", per Uviéu... En cualisquier casu déxanos una pinceladina, anda, que tas arranú por ello...
- <<La Encimada ye'l barriu noble y al empar probe de Vetusta. Los más llinaxudos y los más xostrones viven equí, nesti barriu al rodiu la Catedral orixe la ciudá... Unos a los sos deleres ya otros atarraquinaos...>>
- ¿Qué te paez si venimos a buscate'l día faigamos la <Cuarta ruta clariniana>?
- A ver si ye verdá... Bueno, y ¿qué tal si llegamos hasta San Tirso y damos la vuelta p'aportar a la Catedral per otra ruta?
- Tiramos tres de ti...
- Lo primero que voi enseñavos ye una plazoletina mui cuca, equí, a manzorga:
 |
| Trescorrales . La Llechera: ¿Socorro la de Canzana? Autor: Manuel Linares. |
La Plaza Trescorrales ye una placina que caltién el topónimu por asitiase tres los corrales de les cases del núcleu la ciudá. Nella faise un homenax a "La Llechera". Nun va tanto, yo alcuérdome perbién, la lleche repartíenlo peles cases unes muyerines que veníen cargaes talo "burres"cola lleche qu'aportaben dende les aldees cercanes. Equí tenemos l'exemplu.
- Traime n'alcordanza a Socorro, la de Canzana, y a Sabel la d'Iguanzo.
- ¡Qué bona pinta tienen estos chigres!.
- Cómese perbién. si tenéis ocasión...
- ¿Qué ye esi edifciu ovaláu?
- Lo que vos llama l'atención ye l'Antigua Pescadería. Pero anguaño l'Ayuntamientu da-y usos múltiples: Llugar de receiciones oficiales (ta cerca la Catedral y l'Ayuntamientu), esposiciones varies...
- (Un día presento equí'l mio "Camìn de Niria", verás).
....................................
 |
| Caminamos dica'l "Muséu de belles Artes" |
Tornamos a Mon y siguimos per Santa Ana.
- ¿ Y aquel palaciu barrocu d'a manzorga?
- Ye'l Palaciu Velarde, del XVIII. Obra del candasu Manuel Reguera ....
- ¡Meca, esi suéname!
- Claro. ¿Nun pasateis pel Portazgu?
- El de la ponte moderna, la del fielatu...
- Y munches más... Esti edificiu foi llevantáu col enfotu d'abellugar al Rexidor d'Uviéu Pedro Velarde. Tenéis que ver esi patiu cuadráu con dos arcos per cada lláu sofitaes sobro columnes toscanes... Y xubir pela escalera imperial que da pasu a la galería...
- Debe ser ablucante.
- Y si vos digo qu'anguaño ta refundíu en Muséu de Belles Artes....
 |
| Torre Vieya, dende'l Tránsitu de Santa Bárbara |
Pero nun da tiempu p'asorase. Xiramos la vista a mandrecha:
- ¡ Mira que torre más guai! Nun se paez en nada a les aguyes de la catedral. Ye cuadrada.
- Nidio. Ye mui anterior. ¿Nun oyistis falar de la Torre Vieya la catedral?
- Paez románica.
- Prerrománica. Ye del tiempu d'Alfonso III (852-910) , de finales del IX, anque como veis tien dos partes estremaes. Lo d'abaxo ye más vieyo que'l campanariu d'arriba. En principiu paecía tener una planta cuadrada de 7x7 y 20 m. d'altor.
- ¿Cola que fin se llevantó?
- Proteición. Al pie d'ella ta la Cámara Santa.
- ¿La de les santes reliquies?
- La mesma. Les célebres reliquies, conocíes yá nel ámbetu cristianu y non cristianu...
- Vamos, que yeren cobiciáes hasta polos vikingos...
- Darréu'l descubrimientu la tumba l'Apostol en Santiago Compostela nel reináu d'Alfonso II l'afluyencia de pelegrinos foi escomanada. Veníen de la península y d'Europa. Siguiendo'l Camìn del Norte pasaben enantes pel Salvador...
- "El que va a santiago
ensin pasar pel Salvador
visita al criáu
y escaezse del Señor"
- Eso ye. Uviéu, el Salvador y les Santes Reliquies convirtiéronse en daqué perimportante.
- Nun finxu la cristiandá... Los vikingos naguaben poles reliquies y los árabes por esaniciar esti fitu.
- Y había que protexelo...
- ¿Y nun había un palaciu cerca?
- Claro. Claro, el palaciu que'l Rei Castu mandó llevantar sobro'l que tenía Fruela, so padre. De fechu la Cámara Santa nun dexa de ser otro que la capiella'l palaciu: La Capiella de San Miguel.
- Á Trasgu, tengo una dubia....
- ¿Una namás?. Los aqueólogos tienen un montón....
- A ver.... ¿ La Capiella San Miguel ye la mesma que La Capiella del Rei Castu?
- ¡Non!. Alfonso mandó llevantar, al pie de San Salvador, otra ilesia n'honor de Nuestra Señora cola fin d'albergar el Panteón Real, que se fizo nel nártex (adriu) de lo que pasó a llamase Nuestra Señora del Rei Castu.
- ¡Acabemos!
- En cualisquier casu nin de la ilesia nin del panteón primitivu queda niciu. El panteón actual ye del XVII, nuevu dafechu.
- Polo menos caltuvieren la tradición y respetaren la historia.
 |
| Caxa de les Ágates |
- Alfonso II ya trazare una murallina pero Alfonso III fizo otra un poco mayor. Los nórdicos yá nos visitaren en 844, al entamu del reináu de Ramiro I.
- Pero abultába-y poco...
- Asina ye. Amás de les muralles y l'Alcazar - onde la Plaza Porlier - mandó llevantar esta Torre al par de la Cámara Santa, que yá construyera'l so tocayu'l Castu. Defender les Santes Reliquies yera prioritario.
- Á Trasgu... ¿Qué son les Santes Reliquies?
 |
| Cruz de los Änxeles |
- Cuéntovoslo per enriba, que nun vamos tener tiempu pa too...
Les Santísimes Reliquies son el símbolu máxicu de la fe pa los asturianos: La Cruz de Vitoria, la Cruz de los Ánxeles, la Caxa de les Ägates y l'Arca Santa, onde ta'l Santu Sudariu de Xesús.
- ¡Ondia!... Tarán zarraes nun bunker...
- Pos non. Nuna capiellina de dos pisos: la d'embaxo nómase la Cripta de Santa Leocadia y la d'enriba la Capiella de San Miguel, dambes adosaes a l'antigua torre de San Miguel.
 |
| Ayalga escultórica del Románicu |
- ¿Y eses columnes tan célebres de los apóstoles?
- La Torre de San Miguel foi reformada delles veces pasando de cubierta adintela de madera a bóveda de cañón en piedra.
- Y pa sostener la pesada bóveda...
- Unes columnes bien fortes afates con escultures de los apóstoles.
- Tengo una muestra d'escayoala en casa. Cuando vaya mándote una semeya per interné.
- Yo toi fecha polvu, Trasgu. ¿Por qué nun vamos tomar una sidrina?
- Yo tengo la casa pesllada. Yá sabéis que nel DUENDE námas abrimos de nueche, somos trasgos. Pero ¿qué tal si enantes, y pa terminar con esta cai, nos averamos a San Tirso?
- San Tirso'l Real. ¿Nun tien la entrada pela Plaza'l Castu?
- Sí. Pero n'esta cai tien.... Vamos velo. Sobren les pallabres.
 |
| TESTERU de Santutisu (San Tirso): Aximez con alfiz y ventana trífora |
<< San Tirso o Santutisu foi ún de los petites qu'edificó'l Rei Castu darréu treslladar la capital de Pravia a Uviéu.
D'aquella ilesia prerrománica namás queda'l testeru de la capiya central, onde se caltién un aximez alfizáu sobro ventana trífora, más que superfamosu. ¿Nun vos recuerda a Sta. Mª de Bendones?.
La ilesia debía tener una nave rectangular con cruceru o travesal, que conformaba la cruz llatina, y capiyes nos lladrales. Anguaño tien tres naves con bóveda de crucería gótico.
Nel interior tenemos la capiya de Santa Ana, la tumba de la Balesquida (Velasquita Xiraldez) y un retablu que caltién la estatua de Santutisu >>
..................................................
Darréu la parva - ? - tenemos que siguir camín. Esto nun fizo qu'entamar. La Capital del Reinu da muncho de sí.
Al volver al puntu onde lo dexamos, el Tránsitu de Santa Bárbara, camentamos nos nuesos protagonistes: Melendo, Clodo ya Onirio. Ellos taben embaecíos poles histories que-yos cuntaron en Cenera. Los hermanos recitaben como una lletanía les pallabres de so padre Társulo, que trabayare nestes obres:
" Atroparon peones del reinu enteru: carpinteros d'Alsacia, albañiles de Baviera y Aquitania, vidrieros de Córdoba, pintores de Lombardía, picapedreros de Galicia y ferreros de Lisboa. Aquella multitú trabayó a les órdenes d'un arquiteutu nomáu Tioda"
 |
| Palaciu del Deán PaYARINOS, güei CONSERVATORIU de MÚSICA |
Pel Tránsitu de Santa Bárbara llegamos a la Corrada del Obispu.
- Ellí tenéis el Palaciu Episcopal (L'Arzobispáu). Ye'l que tien el balconín, sobre aquella puerta adintelada tan grande. Esta otra fachada barroca, con cinco ventanes y un balcón sobro portón de columnes toscanes, da pasu al claustru catedraliciu.
- Oi, Trasgu... ¿Nun ta equí la Puerta la Llimosna?
- Dende lluéu. Tais mirando pa ella. La d'entrada al Claustru góticu de la Catedral.
- ¿ Por qué la nomen asina?
- Porque n'esta puerta, una vez al añu, repartíase llimosna entre los probes de la ciudá.
- Aquel edificiu modernista paez que canta un poco equí, ¿eh?.
- Ye'l Palaciu del Deán Payarinos, de primeros del XX. Anguaño ta reconvertíu nel Conservatoriu de Música.
- Mui guapo.
- ¿Nun foi n'esta plaza onde se declaró'l llevantamientu la Guerra la Independencia escontra los franceses?
- Bien sûr!. Vamos sentar un poco a la solombra. Toi pasando un calor...
 |
| L'Arzobispáu al fondu. A mandrecha La PUERTA la LLIMOSNA col BALCÓN de la INDEPENDENCIA. |
Esti árbol singular qu'evolucionó enantes qu'aprucieren les abeyes yera polinizáu por escarabayos, ¡toma!, por eso desendolcó unos carpelos enforma duros, p'aguantar el tratu. Tampoco tien sépalos nin pétalos (lo que oyes) seique una cosa intermedia nomada tépalu.]
 |
| De la flor el frutu. Fueya del Magnoliu |
La flor ye grande y de color blanco y goloroso, por eso s'emplega como árbol ornamental.
Florez a finales de la primavera o al entamar el branu. L'androcéu tien bayura d'estames purpurinos n'espiral. El xinecéu tamién tien numberosos carpelos llibres ya helicoidales. Emplégase pa los padecimientos del corazón (¡ coño!, tengo que preguntar...) tomándolo talo si fuere un té; delles veces amestao cola corteya. Tamién val pa cortar la colitis y aposentar l'estómadu.
El frutu preséntase en forma de piña cónico de color roxo intenso].
Y a la solombra d'un magnoliu Duende dio un repasu a la historia:
- Foi na primavera de 1808. Napoleón, sobeyosu y sedientu poder, plania conquistar España col mínimu esfuerciu posible. Engaña a Carlos IV y al so fíu Fernando (¡qu'en gloria tea!) faciéndolos adicar en favor del so hermanu Xosé I Bonaparte. Igual nun fuere mal Rei pero metiólu d'encomalo y el pueblu llevantó escontra l'arramplador.
El 9 de Mayu la Xunta'l Principáu toma'l determín de sublevar escontra'l gobiernu de Madrid y proclama l'armamentu xeneral col envís de formar un exércitu de 20.000 hommes.
Yá tamos a 25 de Mayu.
Los asturianos, ensin Rei y ensin aldu reunen na Xunta Xeneral del Principáu que se proclama soberana y declara la guerra a Francia. Son cabezaleros LLano, Argüelles y Cifuentes, ente otros.
- ¡Sí, señor! ¡Con dos cuyons!
Y dende'l Balcón de la Puerta la Llimosna, na Plaza de la Corrada del Obispu (yo pretendo ver a Pepe Isbert aixando'l pueblu dende'l balcón del Plan Marsall) . . :
- ¡Guerra al tiranu!
¡El pueblu soberanu!
¡Pepe ta borrachu!
¡El Príncipe asturianu!.
- Asina que declaramos, pola nuesa cuenta, la guerra a Francia.
- Y metimos presos a los mandamases franceses que taben n'Asturies. Y firmamos la paz con Suecia ( les sueques siempre tuvieron buenes). Y mandamos representantes a Xurde III de la Gran Bretaña....
- Nun cambiamos nada...
- Vamos cambiar de barriu, que va atapecer y tengo que colar pal trabayu.
- ¿ Pero los Trasgos trabayáis?
- Más de lo que se camienta.... Yo soi Rellaciones Públiques.
- Y yo pueo dar fe d'ello...
........................................................
Y col sangre alborotao pola aréngula entramos na cai San Vicente. Tamos nel barriu vieyu, pervieyu d'Ovetao. Onde Máximo y Fromestano fundaron un cenobiu embaxo l'abellugu d'esti santu. Foi ¿ lo primero? que se llevantó nesta llomba, l'orixe medieval de la ciudá.
Y facemos alcordanza de les salmodies de Clodo:
" De primeres foron los palacios reales y casi al empar San Salvador y les muralles, depués Santa María y Santutisu, el monesteriu de San Xuan, l'hospital de San Nicolás, l'acueductu pa trayer les agües y la Capiella de San Miguel p'abellugar l'Arca Santa de les milenta reliquies".
........................................................
Dexamos el Palaciu Payarinos y entramos en San Vicente. Un arcu perguapu na mesma cai xunce dos ales d'un mesmu edificiu; ye la Puerta San Vicente. A manzorga tenemos el Muséu Arqueolóxicu. Yá lu conocíemos pos visitámoslu davezu; vamos, siempre que podemos. Pero facémosnos los suecos, présta-y tanto a esti cativín cuntanos les histories...
 | |
| < Visitaron los señores la Plaza de Trescorrales, pela Porta San Vicente algamen a Les Pelayes. ¡Alto ehí, amiguinos, el Muséu vese enantes! Que ye la historia d'Asturies, histories d'aigles reales >> |
- Esto yera un antiguu conventu, el de San Vicente. Tamién tuvo embaxo l'advocación de San Benito.
- ¿Esti conventu ye'l primitivu?
- ¡Que va! . Esti que veis ye del XVI, y tuvo delles reformes. El primixeniu fundárase nos tiempos de Fruela , en 781; venti años depués que Máximo y Fromestano se punxeren a la obra..
- Asina que ye de lo primeros edificios d'Uviéu.
- El primeru, seguramente.
- ¿ Queda algo d'aquella?
- Per aciu les reformes del XX salió a rellucir una parte l'antigua muralla de la ciudá, la d' Alfonso II, que podéis almirar si pasáis a visitalu. Sobro ella constuyóse'l Claustru del Conventu, que ye precisamente la esposición del actual Muséu.
- ¿Sabes que tenemos un amigu qu'estudió equí?
- Coño, nun vos echaba tantos años.... Seique nun m'estraña, porque esti conventu foi 'l cabezaleru d'Asturies y tevo protexíu hasta polos reis... ¿Conoceré yo esi amigu vuestru, ho?
- ¿Suénate Alonso de Quintanilla?
- ¡Home, por favor!... Ún de los finxos de la ñaciente España. Gracies a elli los Reis Católicos pudieron financiar les sos fazañes: Finar cola Reconquista, América, Canaries, l'orde públicu...
Solía venir per casa (Chigre'l Trasgu) de xemes en cuando a tomar daqué... Paecía un maestru... Los sos collacios respetábenlu pol so saber... Yá prometía enforma daquella. ¿y cómo ye que sois amigos?
- Cuando salimos d'Olloniegu camìn d' Uviéu pasamos per Picullanza, Ferrerinos y Novales. Ellí cerca ta Paderni, onde nació esti gallu. Falamos cola xente, restolamos per internet y.... Al patiar lo que patió y conocer lo que fizo terminamos queriéndolu talo un amigu cercanu.
- Pos yá sabéis que la cai onde vivo lleva'l nome d'otru asemeyáu: MON.
- " Los ministros asturianos,
pa les perres, unos gallos"
........................................................
 |
| Plaza Feijoo y Puerta San Vicente abellugando'l Muséu Arqueolóxicu |
Salimos de San Vicente y damos defrente con una plaza.
- Esi señor - diz Trasgu apuntando la estatua del centru - ye'l benediztín Padre Feijoo.
L'home que convirtiere Uviéu nel centru de la racionalidá filosófica d'Europa. Nel Muséu caltiense, tal cual, el so cuartu d'estudiu. Yá sabéis que vivió ellí una pila d'años (55) onde algamó a abá.
- Si te pidiere, tragu, un slogan pa definilu... ( vaya morru que tengo).
- Estes pallabres podríen definir a esta figura de la Illustración :
" Yo soi ciudanu llibre de la República de les Lletres: nin esclavu d'Aristóteles nin collaciu de los sos enemigos. Escucharé con procuru a cualisquier autoridá privada lo que me dictaren la conciencia y la razón".
- Qué edificiu ye esti amestáu en forma de "L"?
- Yeren dos naves del Monesteriu S. Vicente. Anguaño ye la Facultá de Sicoloxía, y antes de Filosofía.
- ¿Afeutóles la Desamortización de Mendizabal?
- Dafechu. Colos monxos esclaustraos el monesteriu pasó a manes de la Diputación d'Uviéu y estes naves a oficines estatales, y a Cuartel depués... Y darréu la Guerra Civil a Delegación de Facienda...
- Agora ta n'otru conventu...
- Sí, Facienda ta nel conventu de Santa Clara.
- Vese qu'esto de los tributos ye !sagrao!.
- Sí, ho... Hasta que s'inventaren "paraisos fiscales".
......................................
 |
| Sta. MARÌA la REAL de la CORTE (na Plaza Feijoo) Medianil col Muséu Arqueolóxicu |
Nun mos da tiempu a salir de la Illustración barroca cundo yá tenemos otra ayalga delantre nós.
- Esti ríxidu edificiu paez ...
- Una Ilesia; la de Santa María la Real de La Corte.
- Fai medianil col conventu.
- Claro, yera la so ilesia. Tres la Desamortización (1836) pasó a ser ilesia de parroquia, quedando desimía dafechu del conventu en 1859.
- Salvó de la quema...
- Yá te digo... Pudo ser oficina, cuartel o... polvorín.
- ¿ Ta guapa per dientro?
- Austera, pero guapa; tipo monásticu: Una úneda nave, amplia y con capielles-fornarines nos lladrales.
- Equí de cruceru nada, ¿eh?
- Tas nun erru. Travesal cuadráu con dos brazos. Pel de manzorga calábase al claustru (Muséu) pero ta ciegu. Oi, ¿por qué nun echáis una güeyada per dientro?
........................................................
- Tenemos un cenobiu pa homes, San Vicente , ¿ y pa muyeres, nun hai conventos?
- Faltaría más... Equí lu tienes: El conventu les Pelayes, que siguen la Regla de San Benito. Pegaú a la ilesia (Santa María) pel otru lladral.
- Pero esto que se ve nun ye prerrománico...
- Non; tevo munches reformes. De fechu, coles caberes, terminó iguándose sobre les antigües muralles, qu'entá se ven asina como los cubos basales.
 |
| Monesteriu de San Pelayo (Les Pelayes) |
- Separaos.... o amestaos; según se mire... Porque dambos tan comunicaos cola ilesia que ye'l puntu de xuntura.
- Y apegaos a la gran seo, a San Salvador. Oi, Trasgu, ¿cómo ye qu'esti monesteriu entá se caltién activu col mesmu enclín que cuando se fundare? . Sigue teniendo monxes.
- Enxamáas se desaniciaron. Ye un puntu favorartible no que cinca al xéneru femenín; les coses como son.
Tevo esti monesteriu - de mano baxo l'abellugu de S. Xuan Bautista- mui protexíu pol poder.
- ¿ Y eso?
- Nelli tomaron los hábitos muyeres de munchu valir y d' influyencia política reconocío. Talo ye'l casu de Teresa Ansúrez, muyer de Sanchu I de Lleón (y de Castiella, Ricardo) y ma de Ramiru III.
- Para, para.... ¿Esa Teresa nun tien daqué que ver con Velasquita Ramírez, la señora de Deva?
- Sí, bueno... ¿Por qué t'interesa eso?
- Vivo cerca del cenobiu que tenía en Deva la Ramírez, magar nun quede d'elli namái que la perguapa ilesia, mui remocicada...
- Hai ehí una hestoria de muyeres famoses mui interesante... Si la pillaren güei día los de la prensa rosa... ¿Por qué nun la estudiamos xuntos un día?
- Tómote pola palllabra. Un día vengo buscate y facemos una ruta sobro < El poder femenín na Edá Media >
- ¡ Eso tien mui bona pinta ! Y yo toi arranáu por dar un vueltu de xemes en cuando. ¡Préstaríame tantu conocer paisaxex d'Asturies!.. Toi mui solu magar tea arrodiáu siempre de xente.
- Paeceste al "Principín".
- Y siguiendo coles monxes, ¿por qué se llamen Pelayes?
- Alfonso II llevantóla baxo l'advocación de San Xuan pero pasó so l'abellugu de San Pelayu darréu'l martiriu d'esti neñu.
- ¿Quién foi exatamente?
- Un rapacín, sobrín l'obispu de Tuy (Hermenexildo ), que prindáu como rehén, tevo presu unos años. Yá mocín ye tentáu pol emir de Córdoba -Abderramán III - pa que s'aviniere a les sos porcayaes ...... Les consecuencies de la negativa pagóles cola vida (925). Les sos reliquies foron treslladaes a Uviéu al traviés de Lleón. Les beneditines acuéyenles y pasen a ser Les Pelayes (994). Tiénenles guardaes nuna caxa gótica embaxo l'altar de la so propia ilesia.
- Cadún d'estos monumentos que venimos de ver tien una historia perllarga... Necesitaría un post pa caduna
- Sí, vamos ver el Monumentu a Xovellanos y la Plaza la Noceda...
- Onde taría la célebre Puerta de la Noceda, supongo.
- Claro. Y de pasu facéis una semeya a un trozu de la Muralla medieval. Y como asturianistas dicivos que la parte trasera del monesteriu da a la cai del Aigla, onde s'alcuentra l' ACADEMIA DE LA LLINGUA ASTURIANA.
.................................................
 |
| Les PELAYES. Monumentu a Xovellanos y MURALLA Medieval |
- De la Cai l'Aigla podíemos llegar de frente a la Plaza d'Alfonso II, onde ta la Catedral, puntu final d'esta ruta pero....
- ... Quies facenos sufrir un poco, eh?. Tenemos qu'entrar pela Puerta Rutilante.
- C'est Ça. Asina que vamos tirar pela Cai Paraisu pa ver otru cachu de Muralla. Y al llegar al Postigu buscamos la Plaza la Constitución al traviés de la Plaza'l Sol. ¿Paezvos?
- Lo que tu digas, duendu; somos unos mandaos.
Y asina lo ficimos; cai Paraisu abaxo onde contemplamos otru cachu Muralla.
- Á Trasgu, ¿ les muralles que se caltienen de qué época son?
- Son Alto Medievales, claro, pero tan mui arreglaes n'époques posteriores.
- ¿El primeru que tresnó una muralla foi Alfonso II, non?
- Claro. Treslladó la capital a Uviéu darréu andar peregrinando d'acá p'allá - Cangues, S.M.Rei Aurelio, Pravia - y entamó a construyir una verdadera ciudá, capital d'un Reinu qu'él acolumbraba mui grande: Palacios, Ilesies, fontes, acueductos.....
 |
| Cubu de la Muralla Medieval, cai Xovellanos. La pelegrina, Tres la Cerca camina. |
- Pero to esto había que protexelo....
- Con una muralla.
- ¿Sábese esatamete per onde diba esta muralla ?
- Vós sabéis qu'hai munchu alderique al rodiu les muralles: que si la d'Alfonsu II, que si la del Terceru, que si les diverses igües posteriores nos sieglos XIII y XIV....
- Pero una aproximación....
- Mirái, el profesor Uría Ríu camentó que la
MURALLA d'ALFONSO II
podría faer el siguiente percorríu (cais actuales):
. Puerta La Noceda (final Cai SanVicente )
. Cai S. Vicente ( Les Pelayes, Sta. María, S. Vicente (Muséu Arquelóxicu)
. Cai Canóniga (Corrada l'Obispu)
. Cai San Antonio ( al par de casa, afita Duendu)
. La Rúa.
. Plaza d'Alfonso II el Castu ( la Catedral, Santutisu y Pta. Rutilante)
. Cai San Xuan ( Puerta de Santiago)
. Cai Xovellanos ( La Cerca, y llamaben ¡toma!)
. Puerta La Gascona (entamu Cai l'Aigla, ¡onde se desanició una TORRE en 1963!)
. Puerta La Noceda, otra vuelta (Caltiense la Plaza la Noceda)
- Yera una muralllina pequeña pero qu'abellugaba lo esencial d'aquella capital biltante.
- Les Santes Reliquies taben a bon recaudu...
- Taríen de nun ser poles rafies de los emires árabes: Los Abderramanes, los Hixanes,.....
- Creo que foi faer un mapa coles suxerencies, pa que nun se m'escaeza.
- Bueno, entós tendrás que faer otru cola enantación d'Alfonso III, que pue ser la mesma que la del S. XIII y posteriores, magar que mui reformaes.
- Toi llocu por escuchate. ¿Coincidía n'algo cola primera?
- Sí, pela parte norte. Pel nordeste yá s'amplió un poco.
- Ye dicir...
 |
| Palaciu Inclán, na Plaza'l Sol. |
- Si salimos de la inalteriable Puerta de La Noceda envede siguir por S. Vicente baxamos pela cai del Paradisu....
- Lo qu'acabamo de facer...
- Exatamente. Pero nun torcemos per Canóniga, seique arrodiamos la Muralla en Paradisu hasta'l Postigu Altu. Y cruciamos pela puerta de la Viña ( o La Ferrería) a la Plaza'l Sol, enfrente Trescorrales.
- ¡Meca, mira qué Paraguón! . Voi atechame un poco, tengo munchu calor.
- Venga, ho; que nun ye pa tanto... Y curiaó qu'al tornar la esquina nun vos dean un güevazu...
- Asina que vamos entrar agachaos na Plaza la Constitución per aciu la Plaza los Güevos.
- Meyor. Pero llevantaivos pa contemplar otra puerta, la Puerta Cimavilla, que da pasu a La Rúa y a la P. Rutilante.
- ¿ Y esa torre?
- La Torre l'Ayuntamientu. Antes hebo equí otra torre defensiva.
- Normal, pa protexer el Sur. ¿ Y esa ilesia que tan reformando?
- La Ilesia de San Sidoru.
 |
| Nesta Plaza del Paragües s'asitiaron les llecheres, Trescorrales yera poco pa tal bayura muyeres. La xente la capital tira abondo de les tetes... |
- Bueno, vamos siguir el percorríu de la Muralla. Tiramos pela Cai del Pesu dica la Plaza Riego
- Nesa placina triangular tenemos visto otru cachu muralla...
- Sí. Nun lletreru pue lleese:
<< Trozu de la Muralla llevantada por Alfonso X nel sieglu XIII >>
- Pero que mui probable ye la qu'alzase Alfonso III...
- Seguramente... ¿Sabéis qu'otros nomes tevo esta Plaza?
- Suéname la de Les Escueles.
- Y la de Los Pozos, y d'El Cuetu, la Picota....
- ¡Ai, diosín! ¿Ónde s'ataba a los presos pa escarniu públicu?
- Y se colgaben les cabeces de los axusticiaos...
- ¡H.oder....! Y nesi momentu, al ver la estatua del xeneral al pie d'un árbol, vienme n'alcordanza la historia de Piniolo y los sos fíos...
"Equí tuvieren colgaes les cabeces de los mios antepasaos"
Trasgu viome tan compunxíu que pa sacame d'aquella tiró de min dica la cai Ramón y Caxal ya entrugóme:
- Cuántame daqué de Riego , anda.
- Bueno, foi un xeneral lliberal que por defender la Constitución de 1812 cayó en desgracia col rei Fernando VII que terminó mandándolu a la forca.
<< Ñació en Tuña (Tinéu) y estudió lleis n'Uviéu. Treslladó a Madrid pa enrolase na guardia de Corps. Tres la invasión francesa foi aprisonáu, pero escapó. Ascendió a capitán na Guerra la Independencia y, prisioneru otra vuelta, depórtenlu a Francia onde se fai masón. Viaxa per Inglaterra y Alemania y torna al exércitu español col gráu de teniente coronel. Xura la Constitución pero ye abolía pol mísere Fernando VII. Consideráu peligrosu polos absolutistes destínenlu a les revueltes colonies d'América, pero envede embarcar subleva l'exércitu escontra'l Rei, que nun xura la Constitución:
 |
| ¡FALSU! ¡GOCHU! ¡FELÓN! |
- < España vive embaxo'l poder absolutu d'un monarca que rixe arbitrariamente mercé al pueblu que regó col so sangre los campos d'España pa qu'él pudiere gobernar d'alcuerdu cola Constitución. Pero nun quier xurar esta llei que debe respetar como'l primeru y hasta l'últimu llabraor.
- ¡Sí, sí; la constitución! ¡Viva la Constitución!>
 |
| < Los CIENMIL FIOS de ... ¿San LLuis? > ("Los nuesos paisanos", por NETO) |
Cuando paecía que la sublevación diba esboroñase nel sur bilta con más fuercia en Galicia estendiéndose al restu d'España. El rei tien que tragar:
- < Marcharemos francamente, y yo'l primeru, pela sienda constitucional >
- ¡ Gochu! .
Foi namás un apañu pa ganar tiempu mientres aportaben de Francia los < cienmil fíos de San Lluís >, por nun dicir otra cosa. Mentanto, el Capitán Xeneral Riego ya otros fatos como Argüelles xugaben a la democracia nel Congresu.
Riego, tres d'un xuiciu vergoñosu foi colgáu primero y decapitáu darréu, na Plaza la Cebá de Madrid, pa escarniu públicu. El rei más impresentable que dio España comía cocido madrilano mientres mexaba enriba la Constitución .
- Y ye que ser español... cuesta, eh.
- Mira, eso ye l'antigua Univesidá. Ehí impartieron clases Feijoo, Clarín, el marqués de Valero y Urria,... Riego graduóse en <Lleis y Cánones> nesta Universidá. Foi ideada por Valdés Salas y abrió les puertes del saber en 1608.
- Hai que ver la de mentes preclares que tien dao la Universidá d'Uviéu. Munchu pedigrí, sí señor.
- Si sigues per Ramón y Caxal algames a la Plaza Porlier. Tiempu atrás tendríes que cruciar la Puerta del Campu ( Santa María o Socastiello) y enseguida daríes cola Fortaleza d'Alfonso III; agora hai un edificiu de Telefónica.
- ¡Ai, madre; toi galdíu!
- Venga, que ya queda poco. Sienta al pie la Picota , bueno'l monumentu a Riego, mientres te camiento lo que falta pa dar la vuelta a la muralla. Otru día pátiesla tu.
- D'alcuerdu. Tábemos per Argüelles...
- Y pela cai Argüelles siguimos hasta dar cola Puerta Santiago, na esquina de la cai San Xuan.
- Esto yá ye antiguo, ¿eh?. Sigo yo... Bordies la Cai la Cerca ( Xovellanos) y llegues a la Puerta Gascona, en frente Cai del Aigla. Sigues la cai al pie de la Muralla y das col Monumentu a Xovellanos. Les Pelayes tán agüeyándote.... pero con una caxina de pastes na mano. Si quies probales vete a Misa'l domingu.
- Sí, señor. Y yá tamos na Puerta la Noceda, onde entamamos.
- Pero nós vamos dar la vuelta a la Plaza la Constitución...
- ¡¡¡ Queremos entrar pela Puerta Rutilante!!!
 |
| < A la mui noble ciudá d'Uviéu > |
<< A la bien noble, bien lleal, benemérita , invicta , heróica ciudá d'Uviéu >>
Ye una placina bastante grande en comparanzas con otres de La Encimada. Pero tien vida a esgaya: Los arcos l'Ayuntamientu cola so Torre central, la Ilesia de San Sidoru (nesti momuntu tán afatándola), el trasiegu na Oficina de Turismu, xente que va y vien del Fontán o de la Plaza Riego.... Dalgún pelegrín entemecíu colos transeuntes que vienen del Sur pela cai Madalena ya otros que colen al traviés del Arcu que pela cai Cimavilla algamará a la Catedral... ¿Hai quién dea más?... Bueno, entá hai xente que vien de tomar daqué na Plaza'l Sol o en Trescorrales per aciu la Cai Los Güevos.
 |
| Cai Madalena |
- ¿Qué sabemos del edificiu Consistorial, Trasgu?
- Ye un edificiu d'estilu barrocu. Foi proyeutáu por Xuan de Naveda en 1622, finando les obres en 1622. Paco Pruneda fai una igua en 1780.
- Pero esa puerta d'arcu tan chula nun ye más antigua?
- Sí. Naveda aprovechó la muralla vieya asina como la Puerta de Cimavilla.
- ¿Y el Reló ?
- Ye mui modernu. Cuando la Guerra Civil l'Ayuntamientu quedó fechu una llaceria ya hebo de reconstruyise dafechu. Entós aprovecharon pa pone-y la torre col reló.
- Yá que tamos na Plaza'l Consistoriu ¿que nos camientes al rodiu'l Fueru d'Uviéu?
- Foi concedíu por Alfonso VI con motivu de la so visita a la ciudá. Sí, cuando aprovechó pa echa-y una güeyada al Arca Santa.
- Por cierto, el Cid taba con elli, ¿non?
- Eso tengo entendío.
- ¿ Consevase'l documentu ?
- Non. Queda referencia d'esta Carta-Puebla por un escritu (1295) de Fernando IV onde ta inscritu' l Fueru d'Alfonso VII (1145 ) confirmando'l d'Alfonso VI.
- ¿Qué te paez lo más importante d'esta Carta?
- Que los habitantes d'Uviéu pasaben a ser vasayos del Rey.
- Y que se-yos reconocíen unos drechos por escritu. Talo una constitución, masque sía piquiñina...
.........................................................................
 |
| << Pa mio San Sidoru voi que soi un cofrade vieyu, estudié en San Matíes, pos daquella había un colexu. Cola Desamortización pasamos al Santu Entierru >> |
- ¿ Y al rodiu de San Isidoro ?
- Esta ilesia barroca (XVII), qu'anguaño ye parroquial, pertenecía al Colexu San Matíes que los Xesuites edificaren no que güei ye'l Mercáu del Fontán (¿ nun podríen tenelu fechu un poquiñín más p'allá, ho?).
- Toi decatándome que namás tien una torre...
- Taben previstes dos, como na Catedral, pero yá vos daréis cuenta qu'esti ye'l xeitu d'Uviéu...
- Qué vamos faer... Les perres nun estiren.
- Tien forma de cruz llatina con una sóleda nave central. Ye bastante célebre por mor de la Cofradía del Santu Entierru y los numberosos actos que se celebren.
- Sí, la Cofradía del Santu Entierru y la Virxe de los Siete Dolores. Selo pola Rexenta. Too mui murnio. Dicía Clarín que venía muncha xente a la novena y a ver los paños negros qu'ensamaben per dayuri.
- Namás brillaben unos cirios que taben como llambiendo los pies del Cristu....
- Nun t'esmolezas en prendelos que yo ehí nun entro...
.........................................................
 |
| Casa de La Rúa, dando a Cimavilla. |
- Esta cai, Cimavilla nesti tramu y la Rúa pal otru, foi'l centru comercial de Vetusta. Bancos y comercios dábense cita nesta parte La Encimada. Tamién foi llugar d'alcuentru y paséu de la xente. Dellos años más tarde la Cai Uría pasó a facer estes funciones.
Tamos percontentos. Pasu ente pasu entramos na Cai de La Rúa. Ya queda poco. Na Edá Media les cases de la cai Tenderos, como-y llamaben, yeren de madera. Col incendiu de 1521 esaniciaron toes sacante la Casa La Rúa, por ser la única de piedra. D'esta miente convirtióse na construcción civil más antigua de La Encimada. Esta casa foi construida nel XV por Rodrigo de la Rúa, Contador de los Reis Católicos (¡otru asturianu pa les perres!), a partir d'una torre anterior masque nunos muros alcontráronse marques de canteru del XIII. Nel XVII perteneció al Marqués de Santa Cruz , el célebre cangués Älvaro Navia-Osorio, qu'algamó a Ministru Facienda (¡¡¡ OTRU!!!) y enseguida a Presidente Gobiernu.
[La Rúa considérase un edificiu d'estilu eclécticu pola bayura d'ellos que confluín: románicu, góticu, barrocu... Lo más singular ye la entrada medieval con vanos desordenaos, el so portón de mediu puntu con doveles pergrandes, asina como ventanos pequeños y gateres. Tamién destaca la ventana en cruz del XVII y dos blasones de los Calatrava. Nel XVIII amiéstase-y un cuerpu barrocu de tres pisos. Tres la cabera reforma en 2008 dedícase RUAQUINCE a eventos múltiples: bodes, bautizos, reuniones culturales o d'empresa... ]
Esta cai tien entrada al Muséu de Belles Artes (Palaciu Velarde). Coles obres d'ampliación del Muséu alcontraron los restos d'una fonte del sieglu III, la Fonte la Rúa. (Esto quier dicir que ye d'época romana y yá lo camentaren Máximo y Fromistano, al rodiu les columnes romanes alcontraes al echar los cimientos del monesteriu; tien lóxica) . Na dómina de Clarín entá taba en funcionamientu, como se pue apreciar nel planu que sacaren d'Uviéu (Vetusta) por mor de la Rexenta.
- Bueno, amiguinos, tamos llegando... San Salvador ta esperando...
- Vaya ripiu que te salió, Trasgu. ¿Nun tarás tamién tu un poco emocionáu?
- Toi contentu por vosotros, depués de les que lleváis pasao...
- Yá te lo tenemos cuntao... Salimos del Garapiellu Históricu d'Olloniegu, El Portazgu, Manzaneda, Picullanza pel camín empiedráu, Ferrerinos, Novales cola Vuelta España, la Paderni d'Alonso de Quintanilla, Santa María de Bendones, San Estébanu, Luxido, Morente, El Caserón, Ilesia de Santiago, La Malatería, Santu Domingu y...
 |
| MURALLES: Una posobilidá |
- Tol Cascu Antigüu de la capital del Reinu que ficisteis conmigo ¿Nun vos quexaréis, eh?
- Pa nada, Trasgu. Esti tramu del Camìn de Miria foi ablucante. Támoste agradecíos de por vida.
- Pos namás queda'l remate...
- La espuela.
- Santiago per aciu de la PUERTA RUTILANTE. Pa vela tenéis que pesllar los güeyos, atalantala, sentila, tocala colos deos del maxín... Escaeceivos de too... De la Capiella la Balesquida, de los palacios Valdecarzana y Camposagráu...
- ¡Toi viendo la puerta!... ¡Cómo eslluma!
- Abríi los güeyos...
- ¡¡¡¡¡ IXUXXÚÚÚÚÚÚÚúúúú´!!!!!
<<Y Clodo tirando de la brida fizo al alazán xirar adulces hasta zarrar un círculu na tierra >>
 |
| << Llegamos al SALVADOR, como tantos pelegrinos, a pidíi con tol fervor que nos abra los caminos y que pel " CAMÌN DE NIRIA" alcontremos los destinos que caún lleva nel alma dende'l día en que ñacimos >> |
<< El suañu la eternidá de los poderosos reflexáu na piedra indestruyible >>
<< Cuando'l de Cenera abrió
los güeyos a les aguyes
d'aquel ensame de piedra
de suaños indestruyibles
echóse a tierra, ¡madiós!
arremelláu, de rodiyes:
- ¡ Namás ye cosa de Dios
facer tales maraviyes!
- Per aciu de don Alfonso
el Castu Rei les Asturies >>
 |
| SAN SALVADOR |
- ¿Qué vos paez la Catedral? ¿Pensáis que-y falta daqué?
- Ablucante.
- Plasmante.Nun tenemos pallabres.
- ¿Falta-y? Yo creyo que'l Salvador debe tar bien contentu.
- ¿Por qué nun pasamos dientro pa pregunta-ylo a elli mesmu?
- D'alcuerdu. Queremos velu, falar con elli y que mos cuente coses... Cuánto nun sabrá él...
- Sí, lo que tendrá visto... Y sentío...
- ¿ Y si volvemos otru día pa tratar namás de la Plaza la Catedral, y d'Alfonso?
- Paezme perbién. Ponemos fin a esti post, buscamos una pensión y mañana vamos buscate pa tresnar esti ANEXU: << Alfonso, el Rei >>. ¿Qué dices?
- Igual mañana nun pueo. Esta nueche voi tener trabayu a esgaya. Podéis siguir col Camìn y quedamos pa otru día. ¿Paezvos?
- Por nòs d'alcuerdu total. ¿ Pasamos a pregunta-ylo al Salvador?
Y pasamos. Y vimos la catedral. Y el retablu l'altar Mayor. Y la xirola. Y el travesal (cruceru). Y.. Y.. Y... Y la farda y destín d'esta y de milentas mil caminaes: El Salvador. Como quedamos con Trasgu en tornar otru día pa tratar al rodiu d'Alfonso 'l Castu camentámoslo con elli:
 |
| ¡Fasta ceo, collaciu! |
- Val. Yá sé que tais cansaos y precisáis descansar. Güei percorrimos les dos muralles d'Uviéu.
- Bueno, Duendu, tenemos que dexate. Vaya trabayu que nos cuesta...
- Tamos tan a gusto contigo..... ¿Quies que t'acompañemos a casa?
- Encantáu. Sí vais pa la Cai Mon caivos de pasu. Mirái, enfrente casa tenéis una casona antigua - del XVII - de los Bernaldo de Quirós, marqués de Campusagráu.
- Nun creo nos den posada...
- ¿ Pero esos señores nun tienen otru palaciu ehí cerca, na plaza la Catedral?
- Sí, agora ye'l Palaciu l'Audiencia y ta n'axunta Plaza Porlier ?
- ¿Ánde taba la Fortaleza d' Alfonso III ?
- Sí, y bien cerca del so Palaciu.
- ¡ Madre, qué empolle!. Vamos reposar, esto nun tien fin....
Y pela cai Santa Ana empobinamos dica Mon cola señaldá nel alma por tener que separanos d'un amigu, del Duendu...
AGASAYOS:
. A Miguel de Manzaneda, a David de Ventalaire asina como toles persones anónimes que nos apurren información y nos cuenten les sos coses. A la xente préstanos falar y descargar les histories que llevamos na mochila.
. A "ASTURNATURA". Raru ye'l día que nun l'alcuentre al buscar información. Asina como Wikipedia, Google maps y a la "Enciclopedia d'Uviéu".
. A "MiGeoblog; Geología y algo más". Per aciu y por mor de Chema Montes percorrimos el castru La Corna Fierro y esfrutamos d'una panorámica ablucante. De pasu robámos-y delles semeyes.
. A Fulgencio Argüelles, toos sabéis por qué.. Al <blog d'Acebedo>, como siempre. Esta vegada pol post sobre Alonso de Quintanilla.
. A NETO, pol so llibru: <Los nuesos paisanos>, y por too. Él tien de perdonar que lu asonsañe - nel buen sen de la pallabra - colos nuesos dibuxos manga.
. Al blog de <ignaciogracianoriega.net>, que nos apurrió información al rodiu'l Caserón. Y más; que lu alcuentro davezu per Uviéu.
. Al blog: <mirabiliaovetensis>, que nos tuvo de paséu díes y díes pel cogollu la ciudá.
. Al blog: <galeón.com>, pola historia d'Alfonso II, el Castu.
. Al blog: <el.tesorodeoviedo.es>.
. A F.F. Conde ya I. Torrente F. : <Los orígenes del Monasterio de San Pelayo>
No hay comentarios:
Publicar un comentario