<< Camìn aniciáticu [1]: CENERA - BAIÑA >>
¿ Qué sedría d'un blog ensin logu?
el nuesu blog <Camìn de Niria > entamó ensin él porque queríemos alcontralu na xera del caleyar, nel mesmu camìn. Esperábemoslu como una revelación. ¡Y un día dimos con esa señal!
Foi camín del Picu Berrubia. Andábesmos percorriendo les redolaes d'Olloniegu por mor del POTESTAS, el conde Gonzalo Peláiz. Axeitada nuna muria, faciendo paré con otres - acorropinaes de signos del pasáu - descubrimos esta ayalga....
- ¡Mira, naquella piedra!
- ¿Ye una cruz?
- O doble cruz.
- O un ancestru clamiando...
- Quedrá escapar de la cruz.
- Igual quier venir con nós.
- ¿Sedrá la consiña esperada?
- ¡¡¡Ye!!!
<< Dende güei sedrá pa nós
el logu, la nuesa guía.
Esta yera la señal
por nosotros debecida
pa empencipiar col "Camìn
aniciáticu, de Niria >>
- Hai que tener en cuenta....
<< Bien cerca d'equí pasaron
rigio y so amada fía
que tuvieron atechaos
nel adriu d'una capiya.
¿Por qué nun pudieron ellos
cargar cola "Cruz de Niria?
 |
| La Capieya del Palaciu Riba, en Cenera |
< Y decidimos, madiós,
facer nuesa esta consiña
tatuándola na piel
talo un ancestru Berrubia:
- Tu vas ser del nuesu blog
el logu, la nuesa Niria;
y xurámoslo énte Dios
n'antoxana esta capiya >
 |
| << - Ánde andes, Niria? ... Nun l'alcuentro en parte alguna...>> |
Presaxo prietos negrones
nel cielu, y na mio tierra;
si tu nun tas a mio vera
¿pa qué sirven relixiones
títulos y-o nobleza?
Yo voi a dir dica ti
pola mor d'una novela
y per aciu del Camín
amorecer
dafechu
en Cenera >>
<< - Non ta. Nun l'alcuentro en parte alguna. ¡Dios! ¿Aú te metisti, Niria?
Dicen que fue dica'l mar, cosa que yo nun conozo. Siento un perllongu camín, acribilláu de pilancos . Pero debo percorrelu porque vame la vida nello.
Nin siendes estreches, nin atayos tapacíos, nin caleyes emprunes van torgar qu'alcuentre la lluz al traviés de la viesca la mio vida.
<< Caleyaré abeyante, ensin fuxir de nada nin de naide >>
Clodo ya Onirio van acompañame n'esti tránsitu de la vida.
Cuando partieron entá'l sol taba por salir. Delladiaron el ríu grande per una viesca ribera hasta'l monesteriu d' Abelania. Sí, ellí onde la reina Adonsinda - nel añu 801 - velare pol rei Alfonso, por mor d' un garapiellu de nobles que s'enfocicaren col elli queriendo apartalu del tronu. Y nun yera la primera vez*...>>
* ( La verdá ye que los nobles - di barones - bien toquen los tolones. Que-ylo pregunten a Pedro Sánchez )
 |
| <<Llegó'l día afaizu, llégo'l día de colar, los romeros tan en forma y nagüen por entamar. Güei empemcipia'l Camìn Aniciáticu, de Niria, dende la cuna, Cenera, pensamos dir a Baiña tou seguidino, en llinia pasando pela Perea. Suañaremos n'Abelania que'l Rei Alfonsus velea: - ¿Vamos xuntos, Rei'l Castu, realgamar la quimera? - Si vais camín d'Ovetao, mios fidelis, ¡encantáu! que yo soi'l Rei Alfonso por Piniolo gasayáu desque m'echare un gabitu y yo-y apurrí'l condáu. - ¿Con quién vamos dir meyor que col REI de les ASTURIES. Xubíi a grupa, Señor. Y venga: ¡ A dar les fusties! >> |
Nun queda otra. Yá sonaron los clarinos. Ta puestu'l pie nel estribu. Yá vamos a percorrer el mesmu camìn que Melendo, Clodo ya Onirio tres los pasos de Niria. Por estayes.
Güei, día primeru, queremos llegar a Baiña. Nel pergamín axuntu tenéis los puntos clave per onde camentamos pasar... Porque nunca nun se sabe... Caminos cortaos, llamargues imprevisibles, atayos afayaizos, visites imprevistes...:
< Cenera - El Llerón - Valdecuna - El Pedrosu - Sienda verde del Caudal hasta Ablaña - Cardeo - Pumardondo - Lloreo y Baiña >.
 |
| Tamos delantre'l Palaciu d'Abaxo, en Cenera. Vettel y Tabo tomen el relevu de Clodo ya Onirio. Entama'l Camìn Aniciáticu! |
<< Equí tamos dambos dos
dimpuestos a caleyar
tres d'una perguapa moza
que vien de casa colar.
De xuru que tien motivos,
de xuru más pa quedar,
de xuru que l'alcontramos
y a Cenera ha d'aportar.
Que son los males d'amores
un bien mui d'apreciar
si los amantes se quieren,
si se sabe perdonar.
- ¿Y vosotros, los llectores,
tais dispuestos a aguantar
los díes que faiga falta
hasta podela alcontrar?
Si vos h.artáis de paciencia,
si vos presta caminar,
siguíi'l Camín de Niria,
gayola de llibertá >>
Melendo diba con Clodo ya Onirio. Yo emprimé con Vettel y Tabo. Salimos dende'l Palaciu d'Arriba magar qu'aparcamos el carru delantre'l Palaciu d'Abaxu, al abeyugu l'escudu los Miranda y Cachero de Riosa, emparentaos dende mediaos del XVI (1664).
 |
| ARMES de CENERA |
<< Cuenta la lleenda qu'antiguo había otra Casona-Palaciu un poco más p'abaxo, al otru lláu de la ponte. Nel frontispiciu amosaba l'escudu la Casa de Cenera (la lluna esllumante sobre los abedurios). Tenía la Casona doce cuartos, ocho balcones y treinta y dos ventanos >>.
El palaciu que nós contemplamos ye un sobriu edificiu rectangular de dos plantes y cubierta a cuatro aguaes de teya árabe. La fachada ye de mampostería, revocao, y con sillares nos güecos. Lo más llamativo ye la fachada principal que da al meudía: Presenta cuatro ventanes cuadraes na parte baxa velando por un guapu portón d'entrada. Si lu trespases das a un estragal que te conduz al pisu d'arriba; curiao nun te pierdas nel salón...
 |
| El BLASÓN de los Cachero de Riosa |
Dende la cai apréciense cuatro ventanales simétricos, dando accesu los dos centrales a un prestosu balcón colingando sobro cencielles ménsules ya pies drechos. Ente balcón y aleru, amosando'l poderíu, el blasón de los Cachero de Riosa, propietarios primixenios d'esta ayalga.
Güei día l'amu ye Cecilio, un mineru xubiláu qu'andaba en tratos pa vende-ylu a Serondaya. Oxalá lo roblen y asina podamos aprecialu en tol so esllendor.
 |
| <La lluna rellumante sobre los abedurios> |
<< Cuando por mor de les foces y h.achos bien afilaos esaniciaron de les parés y balcones la yedra y les mariselves ( quel dommage!) aprució, recamplante, el blasón de los Piniolo de Cenera: la lluna rellumante sobre los abedurios>>
EL BLASÓN DE LOS PINIOLO DE CENERA:
<< En campu de gules la lluna n'honor, abellugada poles palmes del martiriu, arrama'l so esllendor sobre una viesca d'abedurios nos rimeros del imponente Llosoriu.
En punta'l Ríu Cuna bañando'l Val de Cenera y
en xefe'l yelmu de Piniolo sobro la bordura del escudu >>
Ta un día prestosu. Un solín feble y afalagador, pa nada cargante, invita a caminar. Tiramos p'abaxo siguiendo'l cursu del ríu Cuna que baña los pies del palaciu.
Echamos una güeyada a la casa'l maestru, l'escritor que concibió la novela niciu del Camîn de Niria y camentamos, una vegada más, que más bien ceo que sero debemos falar con elli. Ye lo qu'adebecemos de va muncho tiempu.
Salimos del pueblu al traviés d'una ponte pero xusto a mandrecha, al achisbar la Casa'l Molín, quedamos ablucaos. ¡Qué pasada!. entós viennos n'alcordanza aquel día...
<< .... nel que Melendo alcontró xunto al molín a Niria falando con Celaida. L'amiga, al decatase la mio presencia, coló dica la ponte.
- ¿Qué faes revolviendo l'agua?. Tas espantando los guxarapos.
- Los guxarapos son seres sobronaturales qu'encanten a les doncelles cuando s'amiren nes agües onde moren.
- ¿Y por qué los cafies?
- Si enturbio l'agua yá nun puen veme.
- ¿Qué misteriosos fechizos escuendes?
- Agüeyamientos que s'apoderen d'una ensin que puea evitalos.
- ¿Y qué ves nel mio?
- Veo los tos güeyos talo que guxarapos que m'embruxen...
Cuesta colar del embruxu pero depués de plasmar l'imax na retina la cámera adientrámonos na carretera xeneral (MI-4). Caminamos al sen del agua dexando'l ríu Cuna a manzorga. Al poco alcontramos l'Área Recreativa d' El Cantu (que siempre ta cerrada, por ciertu. Colo bien que nos vendría p'aparcar) y un molín. Un poco más p'alantre tenemos el Restaurante-Sidrería La Viña, a mandrecha.
Baxamos sele per una, al ritmu de les agües, ya un cartelu diznos que tamos en Casaviedra. Nun tarrén llanu y cascallosu a la oriella la riega - El Llerón - alcontramos una casa perguapa en mamposteria visto. En realidá, dende Cenera al Pedrosu, ye tou una llerá con diferentes nomes.
 |
| Acolumbramos Inxertu colos Los Mártires San Cosme y San Damián dende'l Restaurante "La Viña" |
- Ye la Ilesia de los Mártires, San Cosme y San Damián - arrepostia so padre. Esi pueblín tan guapu ye Insiertu.- Sí talo paez tar inxertáu nuna llomba del valle.
 |
| INXERTU, del Cielu cola Tierra |
- Cuenta la lleenda que << nesa llomba del valle había un texu xigante que fundiendo los raigaños nes entrañes de la tierra paecía inxertar el cielu cola tierra>>.
- ¿D' ónde saques esos cuentos?
- Del cancioneru que nos trai equí: "A la solombra de los abedurios",
- ¡Ah!.. El llibru de Fulgencio Argüelles, niciu del Camín de Niria. ¿ Y qué más cuenta la lleeenda?
- << Que nueve gües tuvieren pastiando durante nueve díes pela redolada'l texu. Pasaos los cualos sacrificóse'l más fuerte y, col so sangre, trazóse un círculu primero y darréu una muria que foi l'orixe del pueblu>>
 |
| S. Cosme y S. Damián repartiendo los milagros de la fe. |
- Perguapo, manín. Oi, y los mártires esos ¿quien yeren?
- Dos hermanos ximielgos que vivieren na provincia romana d'Arabia Pétrea allá pel sieglu III d.X Exercieren como mélicos y curaben a la xente per aciu la palabra de Xesucritu. El gobernador romanu, temerosu, mando tiralos al mar pero una fola xixante aportólos a la oriella sanos y salvos. Entós mando quemalos pero los que morrieren amburaos foron los verdugos.
- ¡Taya-yos la cabeza, leches!
Bona la fizo... El sangre santo espardió pel imperiu la pallabra de Xesús de Nazaret. Les consecuencies yá les conocemos...
 |
| De la Plazoletina Cuna parten caminos y romeros. |
Llevábemos media hora caleyando cuando aportamos a Cuna. Al rodiu una plazoletina pudimos esfrutar del núcleu del pueblu: La escuela antigua en mamposteria visto, la Ilesia bañada pol ríu Cuna, un bar con una pinta estupenda y delles policromíes en cases antigües, de corredor o galería.
Salimos mecíos del pueblu poles lleendes qu'acunen esti cachín de cielu. ¡ Cuántes histories s'inxerten nun valle tan pequeñu!
 |
| Con PEDALAES SOLIDARIES nel Molín de Valdés |
Cuatro pasos ya otru molín. El Molín de Valdés ta convertíu nun modernu bar-restaurante-sidrería de lo más afayaizo; sobre too pa los guah.es (¿y los pas?) que tienen bayura d'aperios pa divertise. Nos mesmos ficimos una fiesta de la Asociación d'Asperger per aciu de PEDALES SOLIDARIES col envís de danos a conocer y atropar unes perres, que tanta falta nos faen.
 |
| El Palaciu de los Vázquez Prada nel Valletu |
Al tornar la cabeza pa echar la cabera mirada a la intrahistoria acolumbramos una casona pergrande y solariega: El Palaciu del Valletu.
- ¿Alcuérdeste d'esi palaciu?. Yá camentamos al rodiu d'elli na entrada "Caldiando motores".
- Nun m'alcuerdo mui bien... ¿Pues faceme un recordatoriu?
- Sí, ho. Esti palaciu ye conocíu como'l de los Vázquez Prada. Ye un palaciu barrocu del XVIII. Amás de la casona lleva apareyao: panera, cuadra, llagar, casa pa los caseros, fonte y un vistosu palombar. Como ves ye cuasi rectangular y tien dos pisos. La fachada principal tien tres arcos carpanel que sostinenen cinco ventanes abalconaes que rematen col escudu d'armes embaxo l'aleru. La fachada norte caltién un adriu de madera y la sur cola trasera una galería acristalada que reflexa los rayos del sol a tola redolada.
 |
| El Palaciu de Viade o de los García Tuñón (XVII) |
Ensin danos tiempu a recuperar de la visión del Valletu acolumbramos, ente la tarmuda vexetación, otra casona de piedra.
- ¡Pero qué passa equí! ¿Otru palaciu?
- Otra ayalga. El Palaciu de Viade, de la familia García Tuñón. Una preciosidá del XVII que tevo delles igües d'entós p'acá. Nótase; ta percuriáu.
Y aportamos al Pedrosu. Una hora escasa nos llevó. De nun ser poles semeyes.... Pero nun tamos equí p'andar, seique pa esfrutar porque :
<<Lo importante nun ye'l destín, seique'l camín>>
Esto díxomelo V.G. Oliva per aciu de Manolín. Y tien razón. El destín nun ye otro qu'una sida pa percorrer les caleyes d'Asturies y comprender les coses que pasaron...
 |
| Ärea Recreativa del Pedrosu |
Nel Pedrosu dexamos la carretera xeneral y adientramonos na Sienda Verde del Caudal talo que'l Ríu Cuna, que da equí por finiquitáu'l curtiu camín de la so vida, pasando a agües mayores. Hai que reconoce-y el so granible trabayu pel Val de Cuna y Cenera.
Y entós viennos n`'alcordanza les pallabres que'l vagamundu Magilo y dixere va poco:
<< Y equí cerca, el ríu Lena (Caudal) enanta nun llugar de poles agües nomáu Mieres onde s'asentaren los nuesos antepasaos provinientes de los montes pa entemecer colos romanos, godos y mozárabes. Camudaron los texos por salgueros, llararon los cementerios de cruces - ensin escaecer de los vieyos dioses a los qu'entá temíen y respetaben - y aprendieron a trabayar el cueru, el vidriu y el fierro >>
Entramos na sienda'l colesterol de los vecinos de Mieres. Va del Pedrosu hasta Ablaña, o más... Nós algamaremos a Baiña, que ye'l nuesu destín pa güei.
Pa entamar esta ruta ribereña enantes podemos cañicanos un poco nel Área Recreativa demientres tomamos la parva.
Equí pasamos a compartir el camín Xacobéu hasta llegar a Mieres. Los pelegrinos compostelanos tomararán el camín del Padrún xubiendo pela Rebollada , Copián y Aguilar.
 |
| Clodo ya Onirio talo Alonso per so casa: Yá podemos dar la bata. |
Vettel y Tabo ya buena la vieren. Tamos nel Pedrosu. Al compás del ríu y de los afanaos caminantes mierenses pónense a dar la bata como <Pedro per so casa>. L'arbolada de ribera brinda a ello.
Asina que pali-pali vamos percorriendo'l Paséu . Na otra oriella, a mandrecha del ríu, avistamos el Polígonu Industrial de Vega d'Arriba. Enfrente'l Requexao vemos el Campus Universitariu y el barriu de Santa Marina al tiempu qu'entrasmos nel Polígonu I. de Gonzalín. Esti polígonu da abellugu a 23 empreses.d'intereses estremaos: Muebles, carpintería, cristalería, cerrajeros, electricidad, mármoles, imprenta...
 |
| <<Ríu Caudal, ríu Caudal .... Tu qu'a Mieres vienes a bañar bendiz coles tos agües el Camìn per onde nós tenemos que pasar >> |
Tu qu'a Mieres bañes, y te vas,
bendiz coles tos agües el Camín
per onde Niria hebo de colar.
Que somos pelegrinos del Camín
del amor y de histories qu'esplicar.
¿Quién lleva nes alforxes del caudal
más LLEENDES y pueblos que cuntar? >>
< Mieres del Camín ye la capital d'un conceyu qu'abeyuga más de 40.000 almes. Seique la historia moderna de Mieres ye más conocida dende la industrialización del XIX tamién caltien güelgues del pasáu llonxanu.
¿Alcordaisvos cuando camentábemos al rodiu los túmulos del Picu Llosoriu?
Na Fayosa había un dolme, el dolme de la Mesona. Yera de tamañu talu que Celestónel Porretu pasaba pembaxo col carru les vaques. y cerca d'elli tamién había un túmulu ya una estela funeraria.
Pero lo más ablucante ye'l cromlech de Viscarrionda, nos rimeros del Llosoriu. Pue que tea sapozáu embaxo la escombrera plana que vemos anguaño.
N'Uxu alcontróse una inscripción romana, una estela funeraria i l'ara de Nimmedo.
Bueno, Mieres ta nel camín que teníen los romanos pa venir d'Astorga y Lleón hasta Xixón pasando pel Pontazgu d'Olloniegu, Lugo Llanera (Lucus Asturum) ya Uviéu. Mieres del Camín xacobéu que travesaben los pelgrinos qu'aportaben de la Meseta a visitar el Salvador enantes de dir a Santiago:
<<El que va a Santiago y pasa del Salvador
visita al criáu ya escaezse del Señor >>
Nos tiempos medievales, nel 857, Ordoño I fai donación de la ilesia de San Xuan, cerca del Ríu Aller, a la ilesia de San Salvador d'Uviéu. (¡Ai, maminina; lo qu'atropaba esta santa!) . En 860 Santolaya d'Uxu va pal Obispu de Lleón (hai que repartir). Nel 1266 Alfonso X da-y fueru (Carta puebla) a L.lena, coles tierres de Mieres.
Durante la guerra la Independencia Fernando Cosío empencipió coles primeres guerrilles, que xuncíes coles del brigadier Manglano ficieren recular al exércitu napoleónicu hasta Lleón. >>
 |
| El Blasón de Mieres |
<< L'ESCUDU DE MIERES
El blasón de Mieres ye un escudu terciáu coles faxes estremaes, desiguales. La primera, en xefe, tien un altor de la mitá del anchor del escudu. Les otres dos - central y en punta - ocupen la cuarta parte del anchor del escudu (y tamién de la bandera).
En xefe, el primer terciu de plata presenta les armes de los Bernaldo de Quirós: dos llaves en palu y azur entellazaes poles anielles. Amás seis lluneles de gules - tres en cada lladral - caltienen 24 medies llunes que faen alcordanza de les batalles ganaes a los moros. Y tamién tres flores de lliriu, n'oru, distribuyíes heráldicamente: dos embaxo ya una en xefe.
La franxa en oru del corazón lleva a mandrecha una rueda dentada n'azur y a manzorga maza y martiellu n'azur y plata. Dambos aperios representen el conceyu industrial nel que se tien convertío Mieres a partir del XIX: minería ya industria.
En punta, la tercera franxa n'azur y plata que representen el Ríu Caudal, l'arteria vital de la comarca >>.
Y col coral a manzorga siguimos caleyando al ritmu de los prexubilaos mierenses. Alcontramos una nueva ponte, la tercera pa nós, paezme recordar: PUENTE-MIERES. Una ponte amplia que crucia'l Caudal y nos mete de lleno na ciudá. Un cartelu col logu del Camín Xacobéu invítanos a siguilu pero...
 |
| <Quiciabes deamos con Niria nel Monesteriu d'Abelania...> |
<< Los nuesos protagonistes - Melendo, Clodo ya Onirio - nun tiraren pal Padrún pela Peña seique siguieron el calce del ríu hasta algamar a Abelania (Ablaña). Buscaben un sitiu más llevaderu pa crucialu. Amás, Abelania yera un puntu de referencia pa ellos. Sabíen, cuntára-yoslo Magilo, que'l Rei Alfonsu tuviere recoyíu - a instancies de la reina Adosinda - una bona temporada nun monesteriu qu'había na zona por mor d'una revuelta palaciana>>
Asina que siguimos caminando pela moderna sienda'l Caudal. A manzorga la estación del tren de Seana y a mandrecha'l campu fúbol "Hermanos Antuña". Una escomanada tubería crucia'l ríu y la sienda...
- Bonos díes, señor. ¿Podía dicime pa qué ye esa cinta ?
- Ye del llavaderu'l Batán. Too lo que ves, a dambes orielles del ríu, pertenez al llavaderu.
- Oiga, ¿ y cómo ye que l'agua vese llimpio?
- Porque pasa pela depuradora.
- Nidio...
 | |
| Llavaderu del Batán dende'l Camìn de Niria |
<< Ónde tabes cuando guah.e
llavaderu del Batán?
Arrepostiaben les truches
de la Comarca Central.
Menos mal que na CHalana
entá pudimos bañar
y de pexes saborgosos
xintamos a fartucar.
Que lo cuente Manolín
que pal Condao va >>
- Desplícote. El llavaderu ta dividíu en dos estayes, una a cada oriella del ríu. En dambes hai depuradora. Una trata les agües de la Mina Nicolasa y dotra les del procesu darréu pasar pela tolva, les balses decantadores, filtros... Tamién podemos contar, como parte del llavaderu, la Escombrera de Pumardongo, edmbaxo'l Padrún y con carretera privada.
- Quel dommage, camienta Vettel, colo bien que-y venía al Camìn de Niria....
-Nun t'entiendo, retruca la Wiki, y mira que lo sé too...
- ¡H.a, h.a! Igual un día t'enteres. De momentu ye un camín personal en procesu de creación...
- Taré al pendiente, nun vos esmolecer.
- ¿ Y de cuántos emplegaos podemos falar - entruga Onirio?
- D'unos 126, ente'l llavaderu escombrera y les mines del Monsacru y Nicolasa.
- ¡ Vaya pocos !, llamenta Vettel.- Y que lo digas. Si vieres el ferviellu mineros nos años cincuenta... Y los camiones, y los trenes y los carreteros...
 |
| Llavaderu del Batán dende l'autopista A-66 |
Les agües del Caudal veníen turbies dende que s'abrieron les numberoses mines de la cuenca. Pero de magar insatalase el Llavaderu del Batán nel añu 1959 por Fábrica Mieres y les igües consiguientes - sobre tou a partir del 67,cuando pasó a HUNOSA - vuelven a tar llimpies y repoblaes de truches. Da gustu ver tantos pescadores afanaos.
Unes 7000 Tm/día vienen tratándose anguaño y van derechines a les centrales de Sotorribera, Aboño y La Pera (enseguida tamos contigo, chatina).
<< El Ríu Caudal ñaz en Sovilla de la meceura d'otros dos: El L.lena y l'Aller. Desemboca nel Nalón, a l'altura Sotorribera, darréu percorrer 18 km. Pasa per: Uxu, Santullano, Mieres, Satolaya, Argame y Sotorribera . Tien munchos regueros afluyentes como: El Cuna, Roiles, Cardeo, Nicolasa, Galián, Lloréu (Loredo)...>>
 |
| El Regueru Nicolasa llava le penes d'Ablaña. |
Merez la pena camentar que cerca del Batán, nel barriu de La Peña - xusto onde entama la xubida al Padrún pela xeneral AS-242 - caltiénse un castillete de pocu porte pero de muncha importancia: Ye'l PRIMER castillete que se llevantó pa una mina anque.... La mina nun yera de carbón, seique de CINABRIU. Esto díxomelo Amador, que-ylo cuntare Ernesto Burgos; asina qu'a misa.
<< El cinabriu o bermeyón, de fórmula SHg, ye un mineral de la clase los sulfuros que caltién el 85% d'azogue (mercuriu) y el 15% de zufre (azufre).
 |
| Na Peña: "Castillete de la mina de cinabriu" |
Bien cerquina, en frente la Rebollá, taba - ta - Fábrica Mieres. Imposible pasar al par
y nun tener una alcordanza...
 |
| Semeya robada nel <blog d'Acebedo> |
<< L'asturiana Fábrica Mieres, o Mining Company, foi fundada em 1844 por un grupu financieru inglés encabezáu por Jhon Mauby. Col enfotu d'esplotar, per aciu les mines, el carbón de los valles del Caudal, Riosa y Tudela fundaron los consiguientes establecimientos siderúrxicos. La manera de da-y salida al carbón trabayando'l fierro. Entamó a la vera'l Caudal con Fábrica Mieres, per onde tamos pasando.
L'home que llevó alantre esta idea foi'l francés Numa Guilhou qu'en 1870 mercó la Compañía Minera y Metalúrxica d'Asturies - taba al borde la quiebra - integrándola na so Sociedá Hullera y Metalúrxica d'Asturies.
Ametióla coles mines de carbón del duque de Riansares (consorte la Reina) y del Marqués de les marismes del Guadalquivir y con aiciones del ferrocarril de Llangréu y los aceros de La Bàrcena (Vi.llal.lana y L.lena ). Tres dellos altibaxos pasó a ser l'únicu dueñu enantando'l patrimoniu con mines d'hulla en Llangréu, Mieres y Santufirme (Llanera) [per onde ha pasar el Camìn de Niria, por cierto] y tamién fábriques siderúrxiques en Mieres y Villallana y el total de les aiciones del ferrocarril Llangréu- Xixón . L'amu d'Asturies, vamos.
Ye de xusticia dicir qu'había n'Asturies otres dos Companys - ¿entá con más puxu ?- que conformaben el triángulu máxicu- siderúrxicu del Principáu: La Fábrica Duro Felguera y la de Xixón, Morea >>
 |
| (Atopelos revolviendo nel <blog d'Acebedo>) |
<< Col fierro'l Narancu y Quirós
y la hulla Nicolasa
- y de tola redolada -
fizo de Fábrica Mieres
- darréu del setenta y nueve (1879) -
empresa cabezalera
- permisu de Duro y Morea -
d'Asturies y toa España.
Y fuimos los asturianos
¡la de Dios!,
los putos amos.
Agora, triste llaceria,
naguamos,¡benditos años!
por una Asturies d'aquella
onde'l fierro y el carbón
yeren la nuesa bandera >>
Numa morrió en Baiña - per onde pasa'l Camìn de Niria - en 1890 y ta enterráu nel "Cementeriu los franceses", embaxo la Rebollada, y amirando pa la Fábrica, nun vaya ser que se-y escape de les manes...
Fábrica Mieres dexó de tener puxu cuando darréu 1961 vien a crease Uninsa (Ensidesa> Arcelor-Mitral ). P'aquí foron colando los sos emplegaos talo que los mineros diben integrándose n'HUNOSA.
Yo tamién viví nel tiempu l'esporpolle les mines. El carbón, el fumu y la cisca yeren l'alimentu básicu de la dómina. Teníemos los suaños anubríos pol fumu... pero foi guapo. Yo siento agredecimientu por tíos como'l francés Numa Guilhou >>
Anguaño nel tarrén de Fábrica Mieres ta instaláu'l Polígonu Industrial de Fábrica Mieres qu'acueye a 14 empreses.
 |
| Central Térmica de La Perea |
Pos nada, esto ta mui cerca. Vemos Ablaña, a manzorga, pero sobresal más un tubu pergrandón que s'estira buscando'l cielu...
- ¿Qué ye aquella chimenea?
- Tas enfrente La Central Térmica de La Perea. El procedente del llavaderu va sirvir pa producir lletricidá con una potencia de 50 Megawatios.
- ¡ Hala, más contaminación!
- Bueno, ye una central permoderna. De fechu construyóse en 1995 y ye de les que llamen de < llechu fluyíu circulante >.
- Cuéntame otra de miéu...
- Mira, per ehí pasa Wikipedia. A ver si nos lo desplica ella.
- Oi, Wiki, ¿tu sabes qué ye eso del fluyíu circulane?
- <Que'l amiestu de la caldera caltiense en suspensión per aciu d'unos ventiladores, dando un rendimientu mui altu >
- ¡ A más rendimientu más contaminación !
- Non. Esta central emplega carbón mui ruino, hasta la cisca les escombreres y los restos de madera , amenorgando enforma les emisiones contaminantes.
- Entós, si va eliminando escombreres, tamién va ameyorando l'entornu...
- C'est ça!
 |
| El recate de los 14 de Nicolasa (Rescatéla nel <blog. d'Acebedo>) |
N'estes llegamos a un regatu que conflúi nel Caudal. Vien dÁblaña, de la parte riba. Ye'l Regueru Nicolasa, el del valle y mina del mesmu nome. La mina de Nicolasa ye de les poques que se caltienen. Esta mina ye un símbolu. Un finxu de la llucha obrera y tamién de la traxedia.
- ¿ De la teraxedia por qué?
- Porque'l 13 d'agostu de 1995 una esplosión de grisú, a 400 m. baxo tierra, acabó cola vida de 14 mineros. Diez españoles y cuatro checos.
- foi mui gorda, ¿eh?
- Y que lo digas. Por aciu la traxedia'l pozu tuvo paráu 12 años, hasta'l 2007 nun echó andar...
- ¿ Y qué me pues cuntar no que cinca a les reivindicaciones?
- De siempre tuvieren mui comprometíos. Pero hai un fechu que se convirtire nun fitu reivindicativu de la llucha obrera.
- Cunta, cunta....
- Allá pel añu 82 del sieglu pasáu, nos entamos de la democracia, tres mineros retuvieren - con tratu amable - a cuatro inxenieros nes oficines de la empresa.
- ¿Con qué motivu? .
- Pa presionar a los patronos. Nun-yos concedieren denguna de les sos peticiones.
- ¿ Y cómo lo tomó'l gobiernu?
- Pesllansdo'l pozu: <Cierre patronal >
- Mui guapo; muertu'l perru ....
- El perru nun muerre tan fácil. Amás el carbón facía falta y tantos obreeeros paraos...Asina que terminaron abriendo pero colos < tres de Nicolasa> en casa...
- ¡¡¡....!!!
- Bueno, terminaron almitiéndolos nel 83, cuando Felipe González ganó les eleiciones xenerales.
- Menos mal. Venga, yá podemos siguir caleyando.
 |
| ¿Taría´l Monesteriu onde ta anguaño'l Palaciu los Muñiz-Quirós? |
Pero nun llegamos mui lloñe. Namás entrar nel pueblu vemos una casona perguapa en manpostería.
- ¡Vaya grande! ¿Y visti que corredor? ...
- ¡Toma, si hasta tien un escudu!
- Mira naquel cartelu. Trai'l nome de la Plaza.
- ¡Alfonso II, el Castu! ¿Nun taría equí'l monesteriu d' Abelania (Ablaña)?
- Y quién diz que non. anque pol escudu.... Paez pertenecer a la Casa de los Muñiz., emparentaos colos Bernaldo de Quirós.
- Sí, yá me decato. Mira, les dos llaves de los Quiròs. asina que tien de ser del medievu tardíu.
- Tola plazoleta debió formar parte d'un conxuntu.
- De xuru. Y tamién la capiella.
- Sí, ye la capiella de san Xosé, diz equí. Güei voi suañar que'l bonu del rei Castu tuvo atecháu equí mentanto los sos fidelis vinieren a rescatalu de les cadenes de la oligarquí nobiliaria.
 |
| Les PONTES de La Perea.- Nun ye d'estrañar que los nuesos protagonistes cruciaren el Gran Ríu per equí. Cuatro pontes siguíes alcontramos ente cardeo y La Perea. Per equí crucia hasata maríasantísima: La FEVE. la RENFE, l'utopista, la Nacional, los vecinos, los romeros... Y cómo non, Camìn de Niria. |
- Pero ¿ qué diz la novela?
<< El calce del ríu estrencha y ruxe al chocar escontra les piedres. Cruciamos a la otra oriella per una ponte madera fecha de recién y agarramos el camín más oriental de la Sierra de Llagos >>
- Hai que tomar determín.
- Güei tiramos pel camín más curtiu, diz Vettel, toi un poco cansáu.
- Falta entrenu, campeón. Hai que caleyar más.
- Entós dexamos Cardeo pa otru día. Vamos tirar per esta tranquila carreterina (Cai Gervasio FFdez.) que nos ha llevar a Baiña pasando pel pueblín de La Perea.
Pasamos pembaxo una ponte de la carretera AS-230. Asina que sentimos el continuu circular de los motores que se pierden camín d'Uviéu o Mieres.
 |
| <<Per una ponte madera cruciaron Niria y pá Rigio; per una ponte de Fierro cruciamos agora mismo >> |
Na Perea'l ríu fai una ferradura. Tiramos a manzorga, faciendo la cuerda del arcu, pa crucialu pela otra pata de la mesma.
- ¡Mira, una ponte peatonal!
- Igual per una asemeyada cruciaron los nuesos protagonistes.
- Toi viendo a Niria rezando, sentada na xarret, mientres la salpicaben les foles de la corriente.
Da un poco resquildu cruciar el Gran Ríu per una ponte tan cenciella onde los automóviles pesaos nun puen circular. Pa nós una delicia que nos empobina a la Edá Media.
Pero'l Polígonu Industrial de Lloréo (Loredo) devuélvenos a la actualidá. Esti Parque ye ún de los 26 qu'alcontramos nel Principáu d'Asturies y abelluga 19 empreses.
 |
| Polígonu Industrial Lloreo-Baiña |
- ¡Meca, la Thyyssen!
- Sí, nesti Parque empresarial hai varies empreses asitiaes; una d'elles ye la Thyssen.
A mandrecha vemos una carretera asfalcada.
- ¿ Esta carretera tn guai nun podría llevanos fácil al Padrún? - camienta Vettel.
- Sí, pero ye privada. Pertenez a HUNOSA y tienla pa echar na Escombrera de Pumardongo los sobrantes del llavaderu del Batán, ente otros. Asina que good by , y p'alantre.
Tamos llegando a Baiña, una de les 15 parroquies de Mieres .Na vega acolumbramos el polígonu industrial del mesmu nome ( P.I.Baiña) onde tan asitiaes otres 34 empreses.
- Oi, Melendo,¿ qué referencies históriques tenemos de Baiña?
- Mira, Onirio, sábese que nel añu 1103 Alfonso VI da-y la villa de Baiña a San Salvador d'Uviéu col encamientu qu'edifique una alberguería en Copián, ehí cerca, pela carretera de Mieres al Padrún.
- ¿Por qué nesi montucu?
- Col enfotu d'abellugar los pelegrinos que transitabennel Camín Xacobéu.
- ¡Ah, el Camín de Santiago!. Yá me decato... Nós tamién vinimos per esi camín dende'l Pedrosu hasta Puente-Mieres, ¿non?.
- Sí, ellos van pola Peña, La Rebollá y Copián dica'l Padrún; mentantu nós siguimos hasta Baiña pasando per Ablaña.
 |
| ROMÁNICU: Santa Mª Madalena, na Rebollá (Mieres) |
- Bueno, ¿y fízose l'alberguería?
- Dende lluéu. Pero poco depués Alfonso VII, el fíu d'Urraca la cazurra y pá d'Urraquina l'asturiana, cedió-yla al conde Lluna. Pero enantes de morrer tórna-ylo too al señoríu de la Catedral d'Uviéu: Baiña, Lloreo y Aguilar (Copián).
¡Qué fina foi la Ilesia
pa facese cola herencia!
ANEXU:
[La Ilesia de la <Rovellá> ta asitiada nos rimeros del Picu La Gua, a 260m/snm, nel "Camín francés" (xacobéu) ente Mieres y Olloniegu. L'edificiu actual - mui reformáu - ye del sieglu XX . Cerquina taba l'hospital o antigua malatería. Tanto la ilesia primixenia como l'hospital debieron llevantase a primeros del XIII. María Madalena ye la patrona de los leprosos. ]
- ¡ Vaya día industriosu que llevamos!. Son les dos de la tarde y toi reventáu de tantu trabayar. ¿Por qué nun tomamos un respiru?. Yá anduviemos 12 kilómetros...
- Mirái, ellí hai un bar: Casa Seva.
- Podríemos tomar daqué...
- Tomar algo a este hores pue resultar peligroso...
- ¿Peligroso?
- Agora verás...
Ye un chigrín mui antiguu llevantáu en piedra visto. Manpostería cenciello rematao por llamativos vanos coloraos, mesmo que les sielles de la terraza. Entramos de frente a la barra que cubre tamién el lladral de mandrecha.
- Hai menú del día, a 8 €.
- ¿Ves onde ta'l peligru? Entrar nun bar a la hora de la xinta...
Sentamos nuna mesa del fondu. Nun hai muncho pa escoyer, pero too tien bona pinta: Lenteyes con chorizu, carne guisao, ensalada... Lo meyor del día: Vettel entendió que por comer lechuga naide nun muerre... ¡Y acabólo!
< Pa la fame nun hai pan duro >
 |
| BAIÑA: El chigrín de SEVA . Parada fonda. |
Y como nun yera plan de xubir hasta'l Padrún, remota posibilidá, salimos a la xeneral AS-230 y esperamos nos vinieren a rescatar pa llevanos a Cenera, onde dexáremos el coche. La primer estaya ta fecha: Unos 12 km en 4 hores [12:4=3]
¡ A 3 km/hora!.
Somos la lleche; vamos a la velocidá del McLaren-Honda.
Al salir de chigre:
- Arima la puerta,
nun zarres del too,
qu'equí entamaremos
el prósimu post:
BAIÑA - OLLONIEGU,
¡va ser la de Dios!.
Xubiremos al Padrún pela parte oriental de la sierra de Llagos per una pindia caleya y , pel Camín Xacobéu, descenderemos hasta'l Garapiellu Históricu: Palciu, ponte ya Ilesia.
 |
| ¡Ehhhhh! ¡Quieto parao! Nun zarres del too, qu'enseguida aportamos. |
- ¡Fasta ceo, collacios!
Qu'en Baiña nun se cierra;
pal que sigue nel Camìn
siempre ta la puerta abierta.
Xubiremos al Padrún,
Olloniegu ye la meta.
Y na Ponte medieval
echaremos una siesta.
Suaños de Torre Muñiz,
rezos na triste capiella.
<< Y pa cellebrar l'entamu
d'esta gayola, el Camìn,
que meyor cosa qu'echavos
de la meyor sidre, un culín >>
 |
| ARROGANCIA ASTUR: Nos Mártires de Cuna y Cenera. < Por vosotros esti brinde si venís dende Cenera mas si xubís per Inxertu escánciovos la botella> |
los más allegaos al cleru
qu'ansí curaben los santos
a la xente d'estos pueblos .
Como la sidre nun hai
pa caltener esti cuerpu.
Per San Cosme y San Damián
van aportando romeros >>
ANDROMANCIES , xustificaes:
. A Fulgencio Argüelles, sentáu "A la solombra los abedurios" - maquinando daqué historia - mentanto nós percorremos el Camìn.
. A Roberto Cotina Mieres pol so "blog d'Acebedo", onde llibamos d'abezu.
. A la Wikipedia, por apurrinos bayurosa información.
. A Clodo ya Onirio (Vettel y Tabo) por acompañanos nesti tránsitu y sometese a la tortura les semeyes.
. Andivi restolando en dellos blogs, como siempre, pa poneme un poco al día; por exemplu :
< www.MTI blog>, onde tuvi arrincando'l cinabriu. Acabao con él, pasé al carbón na mina San Xosé (Olloniegu).
. A Maximino Pando Macías pol so llibru: "El románicu en L.lena y Mieres", estilu al que pertenez la Ilesia La Robellá.
.
No hay comentarios:
Publicar un comentario