O cuando'l tiempu apigaza: BANDUXU

                BANDUXU,
                           o cuando'l tiempu apigaza.

<< L'aldeina de Banduxu
 dicen que t'adormilada;
 el tiempu nun tien espera 
 quiciabes solo apigacia.
El sol, nel picu Lluguéi,
tien de marca-yos la pauta >>

          Dicen que Banduxu - Bandujo, pa daquién - ye un pueblu adormiláu nel tiempu... Y deben tener razón porque entá hai munchos asturianos que nun saben d'él. Nun gurguta, nun s'escombuye, nun clamia:
          - ¡Veníi a veme! Soi una ayalga... Un viax nel tiempu... Pero si namás ye un paseín de lo más afayaizo...¡Venga, ho!... Toi aguardando.
          Tampoco l'alministración paez poner munchu enfotu.... Igual había que gastar unes perres pero....  Les necesidaes son tantes... Y la cris, siempre la cris...
          Nós queremos conocelu un poquiñín meyor. Asina que como ye domingu de branu y ta un día de lo más prestoso agarramos el carru - magar  que'l sable San Llorienzu tire enforma - y empobinamos pela carretera "vieya" d'Uviéu (como nun podía ser d'otramiente) dica'l conceyu Proaza. Na capital del Reinu dexamos a mandrecha una mirada señaldosa al Prerrománicu del Narancu y - siguiendo << Toles direiciones >> - entramos, de lo más cómodo, n' A-63 de Gráu - La Espina.

Aparcaeru

          Salimos p'hacia Trubia pela AS-228 y, venga, pa Proaza.
 ( ¡Proaza!.. Facemos alcordanza del Conde rebelde Gonzalo Peláiz, cuando se llevantare escontrta'l Rei de Castiella- Lleón Alfonso'l VII y tevo d'abellugase dos años na torre- castiellu de Proaza. ¿Alcuerdeste cuando una flecha mató'l caballu'l Rei y salió esnalando d'Asturies?.
Si quies remembralo amira la nuesa salida: " PrOTESTAS"  y si quies conocelo llee de Xulio Arbesú "POTESTAS")
 Equí - al par d'una torre asemeyada - axuntamos con otros collacios de ruta que viven n'Uviéu (pero que tienen el coral en Xixón, eh).  Pasamos Villanueva, San Andrés... y aportamos a Caranga d'Abaxu. Siguimos les señales de S.Martín de Teverga y Puertu Ventana  y dos kms más tarde (onde'l km 21)...
     - Mirái, la parada láutobús. Dexáime mirar..: "Banduxu". ¡Llegamos!.
     Aparcamos a la vera la carretera . ¡A la solombra tul día!.

Dexamos la xeneral pa cruciar la Ponte Formigón

        Cruciamos el Ríu Teberga per una ponte formigón caltriando na "Sienda del osu"...
       Al sopasar la ponte  nun podemos otro que reparar na pureza les agües. Facemos alcordanza de la conversación que tuviéremos tiempu atrás con un vecín de Banduxu. Remembraba los tiempos mozos cuando, precisamente pel camín medieval que vamos percorrer, diba trabayar a les mines de carbón de Teberga. Nun había autobús mineru, nin malpenes carretera nueva.
Y ye que Banduxu tuvo escaecíu del tiempu y de l'alministración hasta los años ochenta (80) del sieglu pasáu. Casualidaes de la vida dan  conmigo en Fotocentro (Cai Corrida) mentanto tresno esta salida. Por mor d'una foto que s'amuesa nel escaparate la tienda falamos d'esti pueblu. El dueñu, autor de la semeya - en blanco y negro -, afitó na idea que la carretera actual tien unos 30 años, los mesmos que la foto, pos elli foi ún de los primeros que la estrenaron. Asina que ye del añu 86, plus ou moins. 

<< El Ríu Teberga ñaz un pelín más p'arriba, n'Entrago, de l'amestura d'otros tres riucos que baxen de los valles colindantes: Valdesampedro, Valdecarzana y Valdesantibanes >>.

< Van en bici por si-yos sal a la escontra  l'osu. 
Nós tiramos pa manzorga y yá caminamos al son del Ríu Valmoru
(Valdecereales), afluyente del Teberga>

         Unos 50 m. más alantre y compartiendo solombra con bayura de ciclistes, damos col cartelu d'aniciu la ruta: << Camín medieval de Banduxu >>
 
        Mientres nos averávemos nel coche al puentín d'aniciu díbemos lleendo n'interné ( blog d'Asturnatura) daqué sobro'l llugar de Banduxu que lluéu camentaríemos pel camín.
Pa dir faciendo boca:
          << Banduxu ye una aldea asturiana que se caltién adormilada nel tiempu de la dómina medieval >>
          - ¡Hostia, qué bien suena esto! Paezme que va ser un día de suerte.

¡Suerte!

          - << Tien un conxuntu patrimonial de construcciones antigües - coles igües afayaices - de primer orde asina como otres más modernes pero toes dominaes por esa Torre defensiva circular, entamilgada nun cuetu, que ye'l petite de cualisquier semeyeru. Y nun te digo ná polos amantes medievalistes... >>
  
     Yo mesmu teo que dicir que, ente cámera y móvil, anduvi al rodiu les 400 semeyes. ¡Ciego!...
     Pero la bayura de soníos, lluces y solombres, colores y arumes que s'esparcen n'estos tres kilómetros llargos de xubida, serpentiando'l Valmoru, son indescribibles.

 

La meta: El poder de la casta medieval . 
 << Talo que falo insolente 
el Turruxón de Banduxu
 amuesa'l so señoríu:
¡ai, los fíos del gradiente ! 
( < Barrios del Palaciu y La Molina > )

         - Oi, ¿ y cuándo entamó too esto?
         - Nun se sabe a ciencia cierta pero hai constancia que nos sieglos VIII y XIX yá yera una villa feudal esporpollada dafechu. Col pasu'l tiempu paeció adormecer...
         - ¿Pero queden muestres de la dómina moderna o contemporanea?
         - Dende lluéu. Banduxu ye un pueblu fetén pa facer un estudio diacrónicu de la hestoria: 
<Ver les güelgues del tiempu nun llugar concretu>.
        CHarra que te charra entramos dafechu na sienda medieval col ruxerrux del Moru (Val-moru) como telón de fondu. Y ye que'l moru paez siempre presente en tola triba de pueblos. En culisquier casu tengo lleío qu'antiguo nomábenlu: Valdecereales, que me presta muncho más.
         - Mamma, mía! . ¡Qué camín mas chungu! Empiedráu y a la solombra.

< Per esti camín avesíu algamarás a Banduxu,
  cuando acolumbres la torre yá tarás embaecíu >  
Estes dos aldeanes van cargaes cuestarriba porque los burros colaron y equí los carros nun xuben

         - ¿Qué queda de l'Alta Edá Media (VIII - IX)?
        - La fastera onde s'asitia  l'aldeina de Vandugio taba dividida en dos partes: La d'abaxo agrícola y residencial  y la d'arriba, na braña d'Atambo, dedicada a la ganadería. Queden traces de caminos de la dómina que lo sofiten. Y sobre tou reseñes históriques que nos falen d'una xererquización feudal tipu onde l'Obispu Gladila * figura como "il cappo" n'esta zona central de les Asturies. Banduxu yera una de les pieces cabezaleres.

Ehí la tienes, la más antigua de Proaza . Santa María de Banduxu. D'orixe prerrománicu.
<< La ilesia rural de Santa María foi yá mencionada nel testamentu de Fruela II (rei d'Asturies dependiente de Lleón) nel añu 912. Ye polo tanto d'orixe prerrománicu pero tevo numberoses igües, de manera tala que pue considerase románica: Tien una sóleda nave separada de la cabecera circular por un arcu trunfal de mediu puntu, y ensin decoración nos capiteles, talo que los toscos canecinos del ábside.
Bien cerca de Banduxu, en Villanueva, hai otra del mesmu corte y taller: San Romano. >>

     * Gladila yera miembru d'una familia de potentaos rurales asturianos que dominaben les tierres centrales de los ríos Nalón y Trubia. Ún d'ellos - polo menos - mètese a cura. Faise abad d'una ilesia- cenobiu fundada por él mesmu (Sta. María y San  Pedru y Pablo de Trubia) y consigue aportar bayura de propiedaes familiares al mesmu algamando a cabezaleru de tola parentela. D'esta miente controla tolos bienes, inclusive cuando Ramiro I (842 - 850) lu noma obispu de Lugo y Braga. 

                                    < Tas sintiendo lo mesmo que l'obispu Gladila
                                       cuando camín de Banduxu, pali-pali, xubía >

         Esti ardigoteru monxu foi'l promotor de la ilesia prerrománica de San Pedro de Nora. nes Regueres (840), nos caberos años del reináu d'Alfonso II, el Castu. Yá prometía.  Namás - y na menos - que por esto ye merecedor del nuesu aplausu. ¡Puxa Gladila!
       Debió colar pa Galicia col enfotu d'alquirir méritos, pos nel reináu d' Ordoño I (850 - 866) taba d'Obispu n'Uviéu compartiendo'l triunviratu col Obispu Serrano ya otru nomáu Oveco. Y ye que la curia d'Uviéu daba pa muncho.... Siempre lo dio. Hasta Tarancón hebo de pasar per equí.

Travesando una de les cinco (?) pontes: 
 << Hala, Sporting; nós PODEMOS >>

Bono, el casu ye que falando d'ilesies, obispos y reis vamos xubiendo pasu ente pasu y dexando atrás delles rústiques pontes de madera a cada cuala más cuca. Cinco, a lo menos, tenemos que travesar.


Da gustu andar per equí ente esta vexetación de ribera y montaña. Vemos fresnos, abedurios, carbayos, pláganos, ablanos y delles variedaes de salguera... y hasta fayes. De xemes en cuando, alguna bilortera colingando nel camín qu' qu'apartamos cola mano. Pero l'árbol dominante ye la castañal que surde , a dios gracies, per tolos requexos. Son más raros los texos o los tilos, que non los borrachinos. Lo que xurde peruquier son los felechos, tanto'l felechu común como la felechariella más cerca del regatu. Dellos brezos salteaos resalten sobro'l verdor apabullante de la fueya. Una pena que nun sea'l tiempu los brunos, porque ta acorropinao d'esos pequeños arbustos.

Sabes qué te digo, ne....

    - SABES QUÉ TE DIGO, NE...
- Si nun me lo dices...
- Qu'esti camín empieza a pasame factura... Y encima acabo de pinchame con esta cotoya.
- ¿Creyes que ye a ti sola?. Si polo menos fuere tiempu de los borrachinos...
- Ta enlleno borrachinales.
- Y los de Banduxu son mui, pero que mui célebres. Imaxino que los tomaben pa xubir esta cuesta enllena curves; asina nun se notaba qu'amoriaben...
- ¡H.a, h.a, h.a!... Sí ye too perprestoso: les cascaes, l'arume, la solombra pero... Esta mochila pesa.
- Talo que la mía. Bien podía llevala'l mio home.
- Yá te digo, ne. Nun mos valen pa ná. En cuantes que ven una cuesta echen  a correr y escaécense de nosotres.
- Nin s'ocupen. Envede tar al pendiente por si hai qu'echar una manuca pónense a esguilar como cabritos y ¡hala!,  apáñate. Deben pensar que son olímpicos...
- Sí, como la cabra l'escudu los Tuñon. Sabes qué te digo, ne... La selmana que vien va facer él la comida.
- Y cargar con ello...
- Ye mui guapo tar repanchigáu nel sofá viendo los XX.OO. - Que son cada cuatro años, dicen -  ensin faer llabor mandáu y ....
- Eso mesmo voi facer yo; que'l miu nun prepara nin el vinu... La selmana pasada que-ylo eché en cara ¿sabes que me me retrucó?
- Cualisquier maldá... Qu'echándolu tu sabía meyor...
- ¡Qué va! . Díxome que qué suerte tenía que la sacaba al monte. ¡H.oite! Qu'otros diben pa colos amigos en bicicleta y hasta pela tarde "en casina".  Asina que yá podía tar contenta.
- ¡La madre que los... añó!
- Pos sabes qué te digo, ne...

       El borrachinal
 

Semeya de la "Guía de los árboles d'Asturies"

 El madroñu (Arbutus unedo) o albornial,esi arbolín plani-perenni-foliu que tanto adebecen les nueses collacies, pue llegar a alcanzar hasta 10 m. anque lo normal ye que nun algame los cuatro. (Arbustus = ásperu, tocante a los frutos. Y Un=unu + edo=comer).
La fueya - brillante lo nuevo - ye simple, alterno, coriaceo, llanceolao y doblemente aserrao. Con pelinos pol marxe, pol curtiu peciolu colloráu y hasta peles cañes. 

Flores

        Tien flores machu y flores fema estremaes y nel mesmu pie, por eso ye monóicu. Vense colingando en racimos globosos  d'un colorín blancu-verdosu apegaos a cinco pétalos soldaos.  Florez al final de la seronda coincidiendo cola maduración de los borrachinos del añu anterior. 

       El frutu, alborniu o borrachín, ye una baya globosa, verde- mari ella de moza y coloradina na madurez, que sabe dulcino pero pue producite amoriamientos y dolor de cabeza por mor d'un alcochol, l'arbutina. Antiguo emplegábase pa tresnar un llicor que la tala indiscriminada  y la inorancia llevaron al desaniciu per aciu del cubalibre.

 

Cuarcíticu refuxu a teyavana nel camín del tiempu

          - ¿ Y qué pasa na Baxa Edá Media?
          - No que va del siegl XII al XV produzse un esporpolle del pueblu que va enantando con nuevos barrios como'l de la Toral. Llevanta ilesia nueva que ta baxo la proteición de San Salvador d'Uviéu, como non. que-y dio a Banduxu la encomienda la Xuguería de La Trigal. Nel XIV adquier grande impotancia la casta de los Álvarez de Banduxu  que simbolicen el so poderíu na torre circular que predomina nel nuevu Barriu del Palaciu.
      Nel sieglu XVIII Banduxu ye una aldea de planta polinuclear onde yá tan configuraes toles barriades actuales: El Campal, La Molina, El Taranu, El Conventu (cerca del Palaciu, onde ta la escuela)
      El vieyu llinax de los Álvarez tien el control absolutu de la producción y la xusticia. Ye entós cuando se tresnen casones-palaciu como les de Muñiz, La Pandiella o La Miranda... Grandes horros y paneres, amás de los yá esistentes, son precisos pa ensilar la bayura les colleches. N'actualidá hai 25 d'esos muebles: 13 horros y 12 paneres - camentónos Marina (afitámoslo nun informe oficial).

< Esti peñón ye un lluceru pa illumiar el senderu >

         - Nun paez qu'esti pueblu tuviere adormiláu...
         - Ye a partir del XVIII cuando entama a pigaciar y queda fosilizáu. Podremos contemplalo güei nes barriaes que vos voi a repetir: El Palaciu, Entelailesia, El Táranu, La Molina, La Campa y El Campal, El Real, El Toral y el Barreiru.

         - Asina que la industrialización nun fexo güelga nesta aldea?
         - Non y sí. Lo que fexo foi arramplar cola mano d'obra mozo propiciando l'amorroniar de l'aldea. que que se convirtió nun pueblu segunda vivienda de los fíos de los inmigrantes. Pero foi l'adiós de la tradición oral, de los eros y los praos y de les pequeñes infraestrucutures: molinos, ferreríes, batanes... 
 

<La Sierpe curia de los caminantes camín de la "changa">

    
      Y camentando sobro esta "changa" medieval, dexando atrás tabayones y rumores, pedreros y solombres, trasgos ya hestories terminamos aportando'l pueblu pel Barriu La Molina.
     Recíbennos unes cases medio abandonaes unes ya iguaes otres. Y enseguida, pente los pegoyos d'un horru, acolumbramos l'ayalga: El Turruxón circular. Yá nun somos perdela de vista.

     Al pie vese una casona-palaciu pero  nun dexa de ser un adornu. L'imán ye la torre circular. Tamos arranaos por llegar a ella: vela, palpala, poner la oreya nuna piedra ya esperar nos cuente una historia... Pero ta entamilgada nuna poliorcética llomba.
     - Sí queréis conquistame tenéis que dar la vuelta al pueblu.
Nun yeren tontos los Álvarez, los sos constructores; nin los Banduxu, nin los Tuñón. Asina que....

< Palaciu y Torre, simbolos del poder feudal> 

          Adulces, vamos faciendo sierpes pelos caminos formigonaos del pueblu. Algamamos a elli pel Barriu La Molina; topónimu del molín que molía'l maíz y la escasnda que se collechaba na fastera del Toral.
         - Y a fesoria. Equí semábase tou a fesoria. A min tocóme a fartucar - camienta doña Marina, dende'l corredor. Agora yá nun pueo nin allegame allá. Estes piernes... Tamién había muncha patata. Siempre se semaba nel mesmu sitiu.

(Per aquel entós nun paez qu'hubiere "rotación de cultivos". Un amigu mui apreciáu, José Manuel, que nos abandonó va unos meses, tamién lo facía asina, y tenía unes colleches de la hostia). 

( Claro qu' < el cuchu pue más que Dios >)

   La señora Marina foi la que me punxo al oru sobro los barrios del pueblu:

< Agua que nun has beber, déxala correr>

     - Tamos nel Campal, y tu vienes d' Entelailesia que, supongo, yá la veríes. Aportasti a la aldea pela Molina y pasasti al Palaciu. Si agora tires p'abaxo llegues a La Riega.

    - ¿Ónde ta'l llavaderu?
     - Sí.  ¿Ves aquella casona de les cuatro ventanes?
     - ¿Aquella tan guapa?
     - Sí. Eso ye la Pandiella. Y si sigues la fastera llegues al Toral. La carretera estrémalu en Toral Cimeru y Toral Fonderu (Otros dicen d'Arriba y d'Abaxo).
     - ¿ Y La Campa?
     - Eso ta allalantrones; mui apartao del pueblu, onde'l Depósitu d'Agua.
    - ¿Quédamos dalgún barriu por sopelexar?
    - Mira, pos sí. Unes cases que tán no fondero'l pueblu, a manzorga  la Torre, pertenecen al Táranu. Bueno, y equí, penriba La Campa, onde visteis una casa antigua, mui modernizada (mercada por unos felices madrilanos) llamámos-y el Ventorrillu; yá te pues imaxinar por qué.

<L'arribada a la "changa">

- ¡Toma, mira que torre tan guapa!
- La célebre Torre de Banduxu.
- ¿Qué se camienta al rodiu la mesma?
- Bueno, como ves, t'afitada nun roqueru calizu.  Sabemos que tien 12 m. d'altor X 7 m. d'anchor. Ta dividida en cuatro pisos: el suétanu, la cocina nel primeru, una habitación nel segundu y el sobráu, casi a teyavana, enriba del too. Como ves tien saeteres y ventanos cortexadores.

Armes de Banduxu (Tirso d'Avilés)
Caballu sobro sinople en campu azur. 
(Podía ser rampante nun pinu)

- Veo que tien dos puertes...
- Sí. La orixinal ye la que da al primeru, con arcu de mediu puntu. En principui, pa entrar en casa, había que poner una escalera. Yera una turruxón defensivu, se supón. La puerta adintelada ye posterior.
- Ta fecha en mampostería.
- Sí, y tamién lleva sillarexos y sillares nos vanos. 
- ¿Quién la fizo?
- Camiéntase que los Álvarez de Banduxu. Dende'l sieglu XII, col esporpolle del pueblu, entama formase'l llinax de los Álvarez que quieren amosar el poderíu amestando una torre circular al palaciu. Sábese que nel XIV yá taba llevantada. Esti llinax foi enantando colos Miranda y los Tuñón, nome col que tamién se la conoz: la Torre de los Tuñón. De fechu'l caberu conde yera Tuñón ( el buenu de don Fabián) 

- Foi esta torre cárcel?
- Nun lo paez. El cuartón taba na casona-palaciu que ta'l pie. N'otra dómina foi la sede l'Ayuntamientu.
- Talo que la casona de la Torre, en Cuaya.
- Y dotres.

L'escudu d'armes de la Torre de Banduxu. Amuesa les armes de:
Los Tuñón, los Miranda y los Álvarez de Banduxu.

- ¿ Y aquel escudu?
- La guinda del pastel. ¿Sabes que tuvu a puntu de vendese por 25.000 pesetes?
- ¿Y éso?
- Nel añu 1965 quixo mercalu un americanu, eso se camentaba. Y la torre tamién, esa por 50.000 ptes.
- Menos mal que sigui ehí... Pero esplícame un poco lo que trai l'escudu.
- Esti escudu d'armes ye una amestura de tres llinax: Los Tuñón, los Miranda  y los Banduxu.

 << L'escudu presenta un campu ensin divisiones  marcaes pero con tres partes nidies na so composición. A mandrecha ( la to izquierda) el blasón de los Tuñón: Dos cabres al rodiu un pinu; una sentada, rumiando ya otra, n'actitú rampante, intentando algamar la picalina. ( En dellos escudos - como esti - la sentada descansó y anda a la tema cola otra). Embaxo l'escudu de los Banduxu: Un caballu esguilando pel tueru d'un pinu.( Tamién se presenta con un caballu sobre sinople en campu d'azur; como pue vese na imax de Tirso d'Avilés)
Nel centru una torre (¿esta torre?) protexida por dos llances inclinaes faciendo guardia y coronada pola Cruz ¿ de los Anxeles?:

         <<  ¡Esta torre ye sagrada, amiguinos! 
           Y tan sagrada quedare
           que col pasu de los sieglos
           entá se caltién bultable. >>

- ¿ Y a manzorga? ¿ Sedrán cinco guerreros?
- Pas du tou. Son cinco dames.
- ¿Dames? Yo tengo visto nel escudu los Tuñón cinco aros en metal sobro un campu azur...
- Sí, o tamién cinco veneres o conches de pelegrín, distribuyíes a conveniencia. Anque suelen tar en sotuer, ye dicir n'aspa o cruz de San Andrés: dos enriba, dos debaxu ya una en mediu, talo qu'equí. Pero resulta que'l más cálebre de los escudos los Miranda ye precisamente cinco doncelles en sotuer, una en cada venera, o concha de vieira ( por aquello del Camín Xacobéu) sobro un campu de gules (coloráu).
- Pero tienesme intrigáu coles dames...
- Nun m'estraña. Tienen muncha miga...
-¿Entós?
- ¿Sabes lo que camienta'l pueblu?
- ¿...?
- Que les cinco dames son el tributu del pueblu al conde... ¿Cómo te quedól cuerpu?
- Y tenía que ponelo nel escudu, pa que quedare nidio, pa que nun s'escaecieren, pa que lo tuvieren asimilao dende la nacencia... (¡ Cómo pille a la Condesa!....) >>

Armes de los Tuñón en Tinéu

 

Los Tuñón, siempre al pie del Turruxón

- Pos yo d'equí nun me muevo hasta qu'entame la escuela

          Asina que colos escudos a llombu y darréu dar una vuelta pel pueblu tornamos camín de Caranga con una sorrisona d'oreya a oreya . Vettel - al fin decatóse que les clases entamen en setiembre -  baxaba canciando una coplina que sintiere :

                         " En Banduxu canta'l uxu,
                           en Trespeña la rapiega
                           y en baxando pa Caranga
                           la miseria puñetera"
          Bueno, al averanos a la vega yo camudé-y l'ultimu versu porque tengo oyío que nel valle nun-yos fasi nin "puñeflera" gracia y nun sía'l casu que nos suelten a Petra y Perico, digo, a Paca y Tola, que nun anden lloñe:
                        " En baxando pa Caranga
                          la bendita Madalena"

<< Si ñacisti pa martillu cáente los clavos del cielu seique ñacisti pa yuncla...

                      AL  CÉSAR  LO QUE  YE  DE  SO 

. Dar les gracies a Marina, polos coses que nos cuntó y por dar vida propia a esta caminada.
. A ASTURNATURA, que nos aportó'l filu de la historia. ( Siempre rebuscamos nel so cabás).
. Prestó abondo lleer na Biblioteca Xovellanos dos artículos de prensa:
    Ún del añu 65, na Región : "Quier Vd. mercar un castiellu medieval por 50.000 ptes?" y robláu por Luis José Ávila.
    Otru del añu 74 na Nueva España robláu por C. Peyroux, cronista oficial de Teberga: "Ochenta años de soledá nuna torre medieval", al rodiu Xuaquina Tuñón,  que naguaba por una carretera nueva. Y por agua corriente de gifu, y por una pera pa prender una bombilla... Yá taba cansada d'amirar pal Picu Lluguéi, na sierra qu'abeyuga'l pueblu, pa saber na hora taben. Sí, esti picu yera'l  reló de sol pa los llugareños banduxos.
 . La Wikipedia ye una enciclopedia que consultamos de cotino, esta vegada tamién. Gracies.
.  Tamién golifamos n'otros blogs de senderismu, per Wikiloc. 
.  El llicor del borrachín sacámoslu de  "Guía de los árboles d'Asturies" (Bertu Ordiales y Guillermo C. Ruíz).
. Tamos al pendiente de lleer la tesis sobre Banduxu del arqueólogu Iván Muñiz López; a ver si se nos arregla y podemos añedir daqué.

<<Chapeau, collacios>>

 < Y finamos, como siempre,
 pesllando de casa la puerte;                                                  
   si te prestó lo que viste                                                     
  pues tornar cuando te pete.
   - Pos dexa la tarabica 
   con media vueltina, diz Vettel >>