Por xente d'Aldea
 | |
| "La monstrua desnuda" de Carreño Miranda |
¡Comer boroña otra vegada!
¡Comer boroña en Priendes, xunto al llar,na cocina de casa! >>
¡ ARRIBA'L TELÓN!
.jpg) |
| - ¡Hola, Alas! ¿Ánde vais? - Vamos Camín d'Amandi a por fariña maíz pa facer una boroña. - ¿Torga alguna alcontráis en llevar acompañante? - Pa nada, xube.. ¡Adelante! |
¿Entamamos otra?
Pela mesma fastera, pero esta vegada tirando pa occidente (el mapa taría al revés), vamos siguir la Ruta la "BOROÑA?. ¡Qué suerte! Güei podemos dir charrando con Clarín al rodiu'l cuentu. (Si facemos estes rutes ye porque tamos naguando por perdenos nel tunel del tiempu, esa ablucante cabera mitá del decimonónicu ¿cómo lo veis?). Un día, non mui llonxanu, tenemos que visitar al so amigu Armando na "Aldea Perdida"... ¿Vendrás conmigo?.
 |
| Track "oficial"de la ruta que siguimos...:"Boroña" |
 |
| Síguinos.... |
 |
| ¿Aú tas, Xulieta? |
<< Añu de muncha trona, añu de muncha boroña >>
Nesti momentu remembrámonos del corréu que nos unviare un amigu. Entamó chispiar ñeve, o aguañeve, y tuvimos que poner el capote d'agua que yá nun abandonamos en tol camín: Que si llueve, que si para, que si chispia... Hasta nos salió'l sol... Sol de matarrocinos...
 |
| Sol de matarrocinos |
<< En febreru, un día malu y otru buenu >> porque...
<< En febreru, un ratín malu y otru buenu >>
 |
| Corréu esmedrantador... Nin casu, campeón. |
Nosotros p'alantre...Hai que da-y exemplu al mozu Vettel, el nuesu collaciu de rutes.
Facemos una paradina pa ferregüeyar el valle. Acolumbramos, acullá la carretera xeneral (A-239), el Turruxón de los Priendes. ¿Albídrieslu?
 |
| Modernu Turruxón de los Priendes. |
 |
| Aniciu oficial de "Ruta Boroña" |
¿Prebasteis la boroña daqué vez? .... De xuru que sí. Por si acasu, y darréu consultar con madre (¡cómo-y salíen!), vamos dexavos la receta. Pero a lo cabero, ¿eh?... Que fartucu nun yes p'andar.... Mentanto camentái nel cuentu de Clarín lleendo'l cartelu afayadizu:
 |
| "La boroña sabe qu'escoña" |
< "BOROÑA" ye un cuentu que fala del retornu d'un indianu a la so tierra de nacencia. Pepe Francisca apaez trunfante a los güeyos de vecinos y coldiciosos parientes... Sicasí, elli nun lo ve d'esa manera: Ye mayor, ta solu - so madre morrió y carez de muyer y fíos-, enfermu... Mui enfermu ... Poro piensa sanar por aciu la boroña y l'aire la mariña... Creye en gamusinos... >
 |
| << Los suaños de Pepe Francisca >> |
En frente mesmo preséntasenos una riega estrada de salgueres y cañaveros.
 |
| Salix Viminalis : Blimal |
¡ Nivel!...
 |
| Toi, Neto, nel moisés |
 |
| Piñole: "Recoyendo la mazana" |
 |
| Oíime, voi a cuntavos daqué. Sabéi que'l Turruxón.... |
 |
| Soi fuerte, pero non tanto... ¡Curiáime! |
 |
| Puerta oxival : Entrada |
A min dexóme plasmáu el boquete fechu na esquina, nuna mesma piedra..... ¡Qué nivel!
Baxamos un poco y al pasar delantre Ca Manín charramos un ratu col dueñu: el tiempu, l'eternu tema qu'anicia daqué conversación ente dos desconocíos. Nesti casu al rodiu la nevaduca que cayere pela nueche.
 | ||||
| Casa Manín. |
 |
| Casona na Pesgana |
 |
| Vas entrar nel Barriu d' El Cantu |
 | ||||||||
| << Amanez y yá toquen na capiella ....>> ¿Apetezvos dir a misa? El primeru de Marzu tengo fiesta: procesión, tambor y gaita. |
Esta capiella fízose entá más célebre arriendes les conocíes visites de la familia'l pintor Piñole pero... El so pedigrí vien-y dende abenayá. Nel sieglu XVII, el principe de los poetes asturianos, el primeru, el más grande, el que nun cococía la diglosia - ANTÓN de MARIRREGUERA - falare d'ella n'ún de los sos poemes: "La esfoyaza". Mas yá qu' habemos la suerte de tener el carterlu esplicativu n'asturianu vamos face-y los honores:
 |
| ¡ Oficialidá ! |
 |
| Supermariñana |
¡Quién te vio y quién te ve!. Cuantayá, cuando Pepe Francisca tornó d'América, entá yera la Viesca de la Voz. ¡Menos mal pa elli!...
 |
| Fffffff... Falmuria. Al fondu, Aboño. Fffffff... |
 |
| Ilesia Santa María de Priendes |
 |
| Tranquilu, rapaz; vengo en son de paz. |
 |
| Tarmuda riega: <<Agua que nun has beber, déxala correr>> |
Pasu ente pasu vamos algamando a la Quinta Chor, un puntu señaláu de la ruta porque ye - ¿por qué non? - << la casa Pepe Francisca, el protagonista de Boroña>>. Güei día anda a xucu baxeru - a primera vista - pero daquella fora quintana faneguera. Como diz el caballeru de la Mancha : "Les coses humanes siempres van n'escayencia".
 |
| Asina lo viemos nós esti día: "Quinta Chor o ... ¿Casa Pepe Francisca? |
<< Na carretera la costa, nel tramu Xixón-Avilés, casi a metá de camín entre dambes espoxigantes villes, detúvose'l el coche carrera xusto al dexar la viesca La Voz , na estrechura d'una prestosa vega, estrada pola xamasca de roble y castañu, pinu y nocéu y tapizada pola verde escura pradería qu' amiya hasta les fresques orielles d'un apuráu regueru que busca saltarín el calce l'Aboñu . Yera una tarde d'Agostu, per calurosa p' Asturies...>>.
Asina lo vio'l Maestru Piñole esi día:
.jpg) | |||
| "Doña Manuela regando les plantes" |
[ Una imax vibrante na que se dilíen les formes trespasaes pola lluz ya envolucraes nuna atmósfera pesada d'un calurosu atapecer a lo cabero del branu: pequeños toques verdes dientro d'una gama d'ocres, sienes y pardos].
Clarín ta na so salsa... Elli cuenta ... Nós tratamos de recordalo...:
<< Del cupé saltó como pudo un home flacu, cetrín, colos güesos desiguaos, de barba ralo, a la que'l polvu-y daba un aspeutu canosu, vestíu con un traxe claru de branu... Astráu de perres y el fégadu desfechu.
Quedó solu, l'indianu, arrodiáu de baules, en medio la carretera daquel ferial nel que tantes veces suañare...>>
 |
| "Asina lo vía en suaños Pepe Francisca" |
<< Yá sabía él que la carretera cortaba'l Suqueru, el prau nel que llindiare les cuatro vaques .... Miraba a tolos llaos... Too taba igual sacante dellos árboles... Allá enfrente, na otra fastera'l valle, la humilde casería que llevaben dende siempre los suyos ...
Tardó en llamalos ... Pretába-y aquella soledá del valle que lu recibía pacetible, silenciosu pero amigu...
- ¡Ah, Rita! - glayó dende'l Suqueru, como cuando naguaba pola merienda que-y apurría la so hermana.
Más roceanu andaba colos homes... qu'amosaben la coldicia ente los dobleces d'una afalagadora sorrisa >>
¡Entra per esti portón! ........ Bueno, maxina...
 |
| Portón de Falmurias |
 |
| La entrada a la Quinta Chor |
.jpg) |
| Quinta Chor: ¡ Cómo Canor nun diba vivir cien años! |
 |
| Un pá pa Piñole, so tíu "Don Manuel Prendes" |
Un rapaz bien mozu entá, semianalfabetu, de familia numberosa ya escasos recursos, qu'escapa enantes d'entrar al serviciu militar pa esmucise de la guerra - África, Cuba...- y de la fame segura. Va trabayar como un güe - delles vegaes con familiares o amigos que lu precedieren - n'aquelles tierres de Dios y, si hebo suerte, cabeza y agayes, tornará trunfante a saborguiar dellos años de paz, reconocencia, y una cama moza y ferviente".
 |
| << La Candelera brota l'iviernu fuera >> La Virxe de la Candelaria: 2 de Febreru |
 |
| La "PRIMAVERA" que nos dexó'l Maestru. |
 |
| ¡ Hola, collacios ! ¿Faivos falta maíz? Tenemos a esgaya nel horru. |
 |
| Granible horru |
Y Clarín aprovechó:
<< - Efeutivamente, fainos falta un pocu maíz, queremos tresnar unes boroñes. Los guah.es tán arranaos por llamber les "migues". Y yá vemos qu'entá vos queda daqué.
- Dengún problema. ¿Cuántes fanegues queréis?
- ¡H.a! ¡H.a!.Fanegues... Bueno,mira; vamos llevar una fanega y asina tenemos pa la maquila y pa llevar a Uviéu. Nun sabéis como lo aprecien. Molío, eso sí.
- ¿Ánde vais molelo, equí nun tenemos molín ?
- Al par de casa. Nel Molín d' El Cabu >>.
 |
| L'Hotel del Amor, güei Restaurante Torrontegui |
<< - Préstame falar con elli porque ta mui preparáu - camenta Clarín - anque tenemos unos alderiques morrocotudos nel casinu d'Uviéu.
- ¿Por aciu de qué? - entrugué-y.
- Pola mor de lo chauvinista qu'aparenta delles veces; pásase colos galiscismos y a min eso nun me lo lleva'l bazu... Seique, el que ta pasándose de formientu soi yo, que tampoco ye pa tanto. Amás yo mesmu nun fui ñacíu n'Asturies; pero dambos somos asturianos de corazón y de tradición.
- ¡Ui!.. ¿Nun tarás chauvinizándote tu un poquíñín ?.
- ¡ Qué va, ho!. Yá sabes que yo doi caña...
- Nun sé; tengo entendío que te tira muncho'l Naturalismu de Zola.... Igual tenéis más coses que vos xuncen que vos separten...
 |
| Dientro casa'l Marqués |
- Vamos dexalo, vamos dexalo... Yo quiero falar con ellos, pero por otru asuntu.
- ¿Con ellos?
- Sí cola muyer tamién. Preciso d'unos datos...
- Dende llueu, dalgún motivu importante ties que tener...
- Sí. A ti pueo cuntátelo porque sé que nun va salir d'equí... de momento. Yá sabes que la muyer ye fía d'un arrechu carlista, personax interesante pa daqué novela que toi fraguando... Hasta'l Marqués tien xeitos que m'interesen...
Pero qué xida-y vas dar, porque dir de frente a eso...
- Bueno, traigo un encargu la Universidá. Quieren qu'imparta algunes clases; de música sobre too.
- ¿Tan buenu ye?
- Un fenómenu. Tien dao dellos recitales en places importantes. Amás, yo tengo enfotu en que m'ayude a tornar al castellanu una obra de Zola: "Trabayu".
- Pos qu'haya suerte; si tenéis tantos alderiques.... ¡Ta llueu! >>
 |
| La casina del Marqués |
Tamién supi polos veceros del llagar que don Rafael Zamora y Pérez d'Urria (1861-1908) yera el tercer marqués de Valero y Urria, títulu concedíu a so güela pola reina Isabel II. Home mui cultu, pelegrín escritor y amante de la música, impartió cursos na Universidá d'Uviéu. Talo ye que foi ún de los fundadores de la Sociedá Filarmónica d'Uviéu, siendo nomáu primer presidente; masque nun disfrutó un perru del cargu por aciu la ciugua, que vieno a visitalu camuflada nuna pipa sidra. La xente falaba de lo muncho que-y pruyía'l coñac - como bon francés, que lo yera de nacencia- masque malpenes se-y notara por muncho qu'empinare. Estos aristócrates ...
 |
| La cigua qu'aguarde. Enantes... |
Falando los illustres socios al rodiu les guerres carlistes, mentanto xugaben una partida al dominó, ún de los oponentes entrugó-y al Marqués, con mui mal aquél, que cómo un isabelinu como elli - el títulu concediéra-ylu a so güela Isabel II - casare cola fía d'un carlista ( A los del palu chocába-yos cómo un dandy arístócrasta como elli casare con una plebeya ).
Nin curtiu nin galvaniegu, y ensin esmolecese un perru, con esi aire coñón albandiegu ( que pa too valía esti home), arrespostió-y:
- << Qué quies, ho... Nun hai cosa que más me preste que h.oder al enemigu >>
(¿Imaxinaivos la cara
d'Uviéu la flor y ñata?)
¿Y agora, qué ?. Toi solu. ¿ Torno pel mesmu camín? . Al entamar la ruta yá diximos que yera favoratible pa delles "fechoríes". Voi cuntavos lo que fici....
Salí a la carretera xeneral [As-239] y empobinéme a manzorga, como pa Candás. Ná nun tenía pensao pero arrastróme l'arrecendor de la sidra. ¡Qué quies! A aquelles hores...Amás precisaba conocer les anuncies que vos acabo facer no que cinca al célebre Marqués.
 | |||
| Sidra Peñón - si lo escancia Xosé Manuel - sabe meyor |
 | |
| Oi, ho... ¿Nun pues escancianos un culín? |
Depués xubí a fisgar a lo cimero'l cantu, siguiendo l'indicador del Centru d'Iniciativa Rural, al que nun llegué esta vez. Pero vi coses perguapes:
Quedaron rellambiéndose, como veis, na barandiella'l portalón d'esta casa singular:
 |
| Mariñana d'orixinal portalón. Y morada... |
Tevo delles tresformaciones al cabu la hestoria; la cabera tres la guerra civil al ser bombardeada al entamu de la mesma.
 |
| Ilesia de Santiago d'Albandi |
Menos mal que vieno Canor a igualo un poco faciéndo-y esta semeya :
 | |||
| - "Gracies, Canor, soi muncho más celebrada desque ficisti l'honor" |
 |
| Casa Rosina: Restaurente |
 | |
| La Casa Azul: "La Peruyal" |
 |
| La Fonte de Caicorrida |
Nun me petecía llegar al Empalme y teer qu'algamar a El Cabu pela carretera xeneral d'Avilés. Asina que desfici lo andao, xubi a Calera y torné per onde vini.....
Bueno... Nun tenía yo un día normal, d'esos de dir al dictáu (tanto falar del francés - el Marqués- que me solivió'l sangre xacobino ) . Llegué a Falmuria, pasé la Ilesia y darréu torné a manzorga envede tirar pal Cantu- Capiella L'Anxelín - y siguir per ca Manín, na Pesgana.
Por un momentu pensé que me perdiera - suel pasame - pero enseguidina me tornó la gayola cuando aprució delante mio esta panorámica del valle.
Dexé imáxenes perguapes na retina la cámara - tengo díes de sacar trescientes- y yá no llano tomé esta semeya pa vosotros.
 |
| Nial de pega. Vecinos de la quintana. |
 |
| Doña Urraca encamentándose a los badagüeyos de la lluna |
Esta passeriforme que nos llama l'atención polos reflexos verdes, azules y púrpura na llarga cola y ales arredondiaes, ye vecina mala fama, pero cuesta escaecese d'ella; nin pel iviernu nos dexa... ¿Quién me espierta a mín -¡chak, chak!- cuando sal escopetada pola mor del perru que ta viendo como-y prinden la comida? . ¿Y qué?. Tien fame. Pero nun ye escoyida, eh; come de too: la comida'l perru, la comida'l gatu, la comida les pites....
 | |||
| Na distancia curtia doi'l pegu ¿eh? |
A min caeme bien polo presumía que ye... Esi volar posao que convida al parapente... Esa cola brillante n'escalera... Esi batir contino de les ales, talo qu'una caparina y.... ¡lo que-y presta lo brillante! ... Y moderna ye la tía, que lo colinga del picu... ¿Sabes que son quien a reconocese nun espeyu?. Eso ye chulería.. Pero cómo nun va caeme bien si tien nome de reina asturiana: Doña Urraca, que dicen per Castiella.
 |
| Gontrodo Petri, la Rexenta medieval. |
 |
| Doña Urraca, la Pega medieval, dándo-y caña a so padre... |
*** Si queréis saber de Doña Gontrodo lleéi, d'Azucena Álvarez García: " Aproximación a la figura de Gontro Petri" y pa ponese al día so les des-aventures de Gonzalo Peláez nada como :"Potestas", de Xulio Arbesú.
AGASAYOS:
Nun lo pasaría yo tan bien escribiendo estes babayaes si nun fuere por Neto o Isacc del Rivero.
¿ Y les facilidaes que nos diere doña Llucía Peláez Tremols, direutora del Muséu Piñole, asina como los subalternos?. Gracies a ellos anduvi en zapatilles per so casa.
 | |||||
| ¿Conoces a Neto? |
 |
| La próxima Ruta |
 |
| Molín d'El Cabu |
 |
| "Nun vais fastidiame'l rodédanu..." |
<< - Mui buenes. Nun esperaba alcontrate equí pero viénesme al pelu. Tráigote un regalu del Marqués. Ye una semeya . A ti que te presten tanto estes coses... Ten.
 |
| Andromancia : Escudu d'armes de los Valero d'Urria |
- Non. Ta dientro. Nel cielu d'una escalera, la capiella sistina de so casa.
- ¿ Y ye pa min? ¿Pueo amosala a tol mundu?
- Dafechu. Cortesía la casa.
- Tomo nota. En cuantes acabe esti pequeñu trabayu pienso face-y una visita. Esto nun pue quedar asina. Ta lluéu, Mayestru. Yá toi arranáu por sopelexar esta alhaxa.>>
Y ensin más vueltes que dar doi la ruta por finada. Pesllo la puerta y.... ¡ pa casa !.
A fin de cuentes....
<< Madreñes, boroña y muyer
al par de casa tan bien >>
(Y yo tamién )
 |
| ¡¡¡ Zarraaaa !!!!... ¡¡¡ Que vienen los vikingos!!!.... |
ANEXU - I : ¿Prebamos la boroña?
 |
| Ingredientes |
. Mediu kg fariña maíz . Un puñau de fariña pan, opcional (endulza muncho la boroña)
. Un plizcu sal . Agua p'amasar . Levadura opcional (si la faes ensin formientu)
. Tamién se precisen unes fueyes de berza y una bandexa pa cocela nel fornu.
. Y el formientu.
Xurgando n'interné alcontré la boroña de Rosa: <<www.recetasanasblogspot.com>> (las recetas de mi abuela), qu'introduz una particularidá, el formientu, y eso ye lo que ficimos.
La nueche enantes de tresnar la boroña prepárase esti Formientu:
 |
| Formientu |
. Una taza fariña maíz
. Media taza d'agua tebio
Écheslo nuna escudiella, revuelves un poco y déxeslo tapao tola nueche con un rodiellu (llimpiu, eh).
Desendolcu de l'aición:
Pues entamar por echar la sal nel agua, pa que se vaya diliendo.
Darréu metes nuna pota el formientu col mediu kg fariña (cuntando lo de trigu) y amestes un poco d'agua.
Revuelves y vas amasando. Si te queda seco vas ablandiándolo col agua.
 |
| Esta boroña tien muncha miga... |
Cubres el fondu y llaterales de la pota, o la bandexa del fornu, coles fueyes de berza - bien llavaes, seques y espolvoreaes con fariña - y pones la masa enriba. Tápesla con más berces.
(Les berces van torgar que se te queme... Tampoco te pongas a ver el partido del Madrid, o del Barça, porque eso nun hai berza que lo aguante. Tu pon el del Sporting, pero cuando la teas comiendo... ¡Ummm!..)
¡Al fornu!. Si ye de carbón o lleña, tantu meyor; sinón, al que tengas . Pero... si ye de los modernos que tea calentín d'antemano, la boroña hai que mimala, nun-y presten los cambeos bruscos (Messi sedría insoportale pa la boroña)...Algo menos d'una hora a 180º pa que quede doradina penriba. Y per dientro blandia, qu'hai que facer migues.
Si quies facer MIGUES con daquién apúrre-y esta escudiella:
 |
| << Lleche frío y boroña caliente, faen bon diente >> |
<< Naide ye más que naide si nun fai más que naide >> .
¡ Ponte a ello!
P.S.: Mentanto se fragua la Ruta Clariniana [ 3 ] : "Doña Berta", voi amestavos - enseguidina - dellos Anexos sobro N. Piñole, C . Miranda .....
No hay comentarios:
Publicar un comentario