Camìn de Niria: Ruta Clariniana [1] : << VIAXE REDONDU >>

Rutes Clarinianes

Por xente d' Aldea


Hola, Clarín. ¿Llévesme dar un vueltu?

                  ¡¡¡¡¡ Clarííííín !!!!!
      Cinco. Cinco son les rutes que vamos entamar al rodiu la vida ya obra de Don Lepoldo.
Nada nun inventamos; yá ta too trazao. Nós nun pretendemos otro que siguiles, pasalo bien y daprender. Como siempre: andar y lleer.
   La familia Alas "Clarín" - xente de "porqué" - veraneaba nel conceyu de Carreño, onde tenía facienda. Poldo atopaba ellí esi requexu afayadizu pol que tou escritor nagua: independencia, soledá compartida, sosiegu... Delles noveles van alcontrar, nos paraxes d'esi conceyu, el sofitu material y la fonte d'inspiración na que ha desendolcase la aición. Les siendes turístico-culturales que'l conceyu Carreño propón acordies coles noveles son:
   1. " Viaxe Redondu"
   2. " Boroña"
   3. " Doña Berta"
                   Por principiu, por necesidá intelectual y ... - ¡babayes! - por ciñu a la OBRA de Clarín tenemos que incluyir la visita-ruta a la capital, a la ciudá qu'él inmortalizó y la que lu inmortalizó a elli: VETUSTA.
                     4. " LA REXENTA : TRES LES PISAES D'ANA OZORES" ( Apasionante, eh.)
                      ¿ Y qué tal si facemos una cenciella incursión pela vida de Leopoldo E. G-Alas "Clarín?. Va tiampu que m'apetez xurgar un pelín na so dómina, na so vida y na de dellos contemporáneos.
                     5. " Sienda de la VIDA: "El camín de Clarín". (Pali-pali, ¿eh?...)

                           Ruta Clariniana [ 1 ] : << VIAXE REDONDU >>

<< VIAX REDONDU >>

¡Guau!.
¡ Nun llueve ! Menos mal... Atapeció'l sábadu orbayando con gracia y andábemos un poco roceanos. Bien temprano esclucamos el riscar del alba, a ver cómo se presentaba la cosa..... Pero non, nun yera día de perros....
¡Miau!

¡Hola, collacios! ¿Vais de ruta? ¡Bon viax !

Como tolos domingos empobinamos dica la Tahona Vega onde facemos acopiu d'hidratos de carbonu. Darréu pasamos pel Coto a recoyer unos collacios. Pola mor del fiebre y los exámenes vamos dir curtios de caminantes. Nada nun nos detién y un cuartu d'hora más tarde tábemos aparcando en Prendes, delantre casa Gerardo. Miramos los menús del restaurant y concluyimos que daqué día más porgüeyosu tendremos el gustu de catar d'esos manxares.

Casa Gerardo: aparcamientu.

Enseguidina vemos un cartelu que nos indica ónde tamos - Bº La Rebollada, en Prendes - y pa ónde tenemos qu'empobinar: A mandrecha >>>

Pa mandrecha >>>

           Cruciamos la riega y tiramos - a manzorga - pela carreterina comarcal, CE-3, paralela a la xeneral.
Ellí mesmo, nel cruce, alcontramos esti cartelu que nos amuesa la ruta:
           . Tipu de ruta: Sienda circular (0 )
   . Caminada: 8,5 km. (Sedrá un pelín más,¡ná!)
   . Dificultá: Rien de rien.
   . Tiempu: Nós tuvimos caleyando 3,5 h. (Pero sacamos más de 300 semeyes)
           . Llugares y puntos d'interés: Siguiendo esti track vais dir atopándolos ...

             "Viaxe Redondu" ye'l viax de la existencia simbolizáu nel adriu d'una ilesia que yera al empar escuela pa neños ya estragal del cementeriu. Faciendo esti percorríu podrás observar los testimonios del rellatu que nos permitirán acolumbrar la esmolición relixosa de Clarín.

               Al poco d'entamar yá albidramos que nos esperaba un día de suerte. Sabiendo del enfotu que- yos tenemos, ¡ hala !, esta casa mariñana. De planta rectangular, cuasi cuadrada, teyáu a dos agüaes y portalón central que distribúi los espacios: cuartos, cocina, cuadra y tenada enriba ... Taba, por cierto, bien iguadina por fuera...


"Mariñana" bien iguada **

A cargu d'ella un amigu que nun mos quitaba güeyu... Y nós a ti tampoco, ¡ perillán!.

Dir tranquilos, yo curio de vós.
¡Gracies!

Caminando contemplábamos el valle de Guimarán dende la nuesa atalaya: ¡Qué cases!. ¡Qué praderíes!. Retrocedemos nel tiempu y vemos la xente trabayando neses granibles tierres: maíz, fabes, pomares, güertos atarraquinaos....

Mirada aliella....

                    Malpenes teníemos andao un kilómetru y la bayura de coses que va rexistrando la mirada, ¡cómo disfruta!...
Enseguida llegamos a Sebades onde s'alcuentra la Quinta Clarín: Una preciosa casa asturiana - azul- de dos plantes, con horru, capiella particular y un belvedere o talaya, onde Clarín tenía l'estudiu.
<< Dende una llomba, onde teo una güerta, y metanes d'ella un cenciellu velvedere , suelo yo contemplar nel finxu'l cielu, mediu esborronáu pola borrina, los picos y crestes de los cordales que son la espina dorsal del Pirinéu per esta fastera cantábrica. Cuando'l cielu ta escampláu pelos cuatro puntos cardinales acolumbro, dende'l mio güertu, los Picos d'Europa; qu'asemeyen xirones de nubes que d'avezu dora'l sol, pa min yá ausente >>

               Sicasí malpenes pudimos tastiar l'ayalga por alcontrase la finca xenerosamente cercada. ¡ Pas de quoi !

Quinta Clarín

Edén: Velvedere o talaya

Finu carru pa pañar mazanes

Al cabu la finca los Alas alcontramos la Fonte'l Cellero, llugar d'alcuentru de la vecindá - equí s' iguaben munchos desalcuentros - y de xuegos pa mozos y neños.

N. Piñole sabía de la importancia les fontes nes rellaciones sociales

Tamos saliendo de Sebades; un cruce y a la derecha. Reparamos na vexetación : A mandrecha bayura d'ocalitos y a manzorga, más llento, tarmudos cañaverales. Nós quedámonos con ....

Un trasgu xixilando'l camín... ¿Veislu?

¿Qué ye una muria ensin fresuelos ?
Nada. Los fresuelos o embeligru de Venus (Umbilicus rupestris) ye una planta perenne, glabra - ensin pelu - y yerbácea que nagua por sentase nes muries y peñeos; vamos que nun-y presta nada tar enllamargada. Afáyese más col calor que col fríu, asina que nun la busques mui alto. Planta fanerógama - sopelexa contenta les partes sexuales (normal, ¿non?) - de fueya carnoso que s'emplega, talo que la cirigoña, pa curar les firides: Macháqueslo nun morteru y apliques direutamente.

La cirigüeña

La cirigüeña ( Chelidonium majus) ye un cicatrizante pistonudu; nada meyor pa curar les firides, les verrugues o callosidaes. Antiguo - non tanto, que me lo entruguen a min - emplegábase pa caltrizar les úlceres d'estómadu. Doi fe d'ello. Tomando - nueve díes sí, nueve dies non y nueve díes sí - el zusmiu mariellu-verdosu que se saca d'estruxar fueya y tallu repulguen les llagues en tiempu prudente.
Eso sí, pa tomalo hai qu'echa-y.... ¡cuayu!.

Camelia japónica

La camelia ye un arbustu o árbol perguapu ( hasta 15 m de altor) qu'entró n'Europa al traviés de Portugal procedente de CHina. Ye fácil que Clarín nun la conociera porque aprució n' España nos entamos del XIX. ¡ Quel dommage ! . Llama l'atención pola so fueya perennifolio, glabro (ensin pelu) y coriáceo de color verde escuro ente lo qu'escampla bayura de flor - colorao, rosa o blanco - que fai la nuesa gayola. ¿Sabes que de la especie Camelia sinensis sácase'l té ?.

Palmera datilera ( Phoenix dactylifera)

Y como que nun quier la cosa vamos algamando a otru de los puntos señalaos de la ruta: El Palaciu los Carreño.


Palaciu de los Carreño: Puerta oxival del s. XIII

Corredor ferregüeyando'l Valle

Escudu d'armes: Carreño, Alas, Quirós y Casamayor.

Diz madre que : " Cirigüeyos y brunos, toos son unos". Los nobles xuncíense ente ellos pa ser cada vez más fuertes. Nel XVII , tando mecíos los Carreño - Miranda, dieron en tener un retueyu qu'algamó a pintor de cámara de Carlos II el Fechizáu. ¡Vaya marrón!...


Cola capiella: "Santa María de la O"

Per aciu d'un empedráu camín - que se caltién talo qu'en dómines llonxanes - dexamos señaldosos l'ayalga.
Camentando nel pasáu.... Cuasi ensin danos cuenta.... Damos con un biforcu que nos permite continuar per dambos llaos. Tiramos cuesta arriba - la cabra tira al Monte... Al llevantar la vista acolumbramos ¿el mayuelu d'una campana?:

Ni mayuelu ni taladru, flor de plátanu.

¿ Acasu nun sientes el campanéu d'una Ilesia?... De mano vemos una cenciella casona pintada de blanco. Pero llamónos más l'atención esta bananera en plena producción, ¡qué pasada! :

El plátanu (Musa paradisiaca) ye una planta tropical que llegó a Canaries dende Guinea Ecuatorial anque l'orixe primixeniu ta na India... Llevóse a América darréu'l descubrimientu de Colón. ¡Y cómo s'adautó!. Masque sía bien grandón nun ye un árbol verdaderu, sinon una yerba xigante. ¡Quién lo diría!.
Les cualidaes del plátanu son bayuroses, atiendi:
. Grases : 0/0 , ¿qué te paez? . Y llueu dicen qu'engorda...
. Caloríes: Aproximao qu' una mazana. ¡Toma!
. Hidratos de carbonu: Abondo. Dan muncha enexía. ¿ Nun veis a Nadal comer plátanos nos partidos?
Claro, ye buenu pa los calambres...
. ¿Qué más tien el plátanu? : Pos minerales y vitamines. Pola mor del fósforu y les bones cantidaes de vitamina C y A que contién va facer que teas siempre mozu , ¡ qué piel!, ¡qué memoria!.
Tien algo d'azucre ( ¿a quién-y amarga un dulce?) pero queda contrarrestao pola fibra, agua y potásiu qu'ayuden a eliminar... ¿Asina qu'engorda, eh?. Gracies al potasiu y magnesiu ye buenu pa los nervios (¡ai, dichosa ansiedá!) y pal corazón. Y tamién por aciu del sodiu controla la hipertensión y hasta'l reuma (¡h.oder, nun paso un día más ensin tomar un plátanu!). ¡Ah!, toi lleendo que fai buenes migues cola llechi (batíos)... Siempre oyí en casa lo contrario, ¡hala!. Eso sí, si yes favoratible al esporpolle de la economía nacional pon tol procuru que sía ¡ plátanu de Canaries !.

Ilesia de Sta. María de Llorgozana

La perrestaurada ilesia de Santa María de Logrezana o LLorgozana tien una nave sola y caltién del románicu asturianu la puerta principal, ¿ el campanariu ? y una ventana de la Capiella Mayor, mui célebrada ésta por aciu del mitolóxicu capitel de manzarga: dos cuélebres entellazaos que signifiquen el "retueye" , el retornu al aniciu de la tradición.


Capitel románicu: "El retueye"

Equí venía la familia Clarín dende

siempre, como queda reflexao nos sos escritos.

<< La madre y el fíu entraron na ilesia. Taba nel campu metanes la fastera d'una verde llomba - coronada por pinos ya ancines - d'ende la que s'apreciaba' l Cantábricu al algame la mano. El templu descansaba nun cuetu, talo qu'una talaya, abellugáu nel castañéu. El vetustu campanariu de tres boqueres - pa otres tantes vetustes campanes, ataes al so destín, yá venerables pola mor de la pàtina del óxidu místicu del tiempu - acolumbrábase ente la florida xamasca del frutu venidero >>

           Salimos del adriu, que ye'l ñuedu d'esti <<Viaxe Redondu>>, y tiramos Monte arriba. Nun dimos coles famoses escueles de Logrezana, allugaes pola mor del indianu Manuel González Martínez.

   Darréu d'un repechín algamamos a la enllanada; un pandu de lo más afayadizo. Decatase qu'esi puntu ye'l cabu la ruta; dende ehí yá se trata de dar la vuelta anque per otru camín. (Yá sabes que la ruta ye oval). Alcuérdate; al enllanar siempre a mandrecha. Aperrillo con esto porque, anque la ruta ta perbién señalizada, ehí xusto fálta-y un indicador, l'únicu. P' aidate, espero, pongo estes señales:

A mandrecha >>>

Vas ver unos cartelos que traen <<Casa Jesusa>> y <<Casa Los Gamonales>> . Son dambes cases d'aldea acomodaes pal turismu rural. Entramos n'interné pa veles y quedamos plasmaos de lo guapes que son y los bonos comentarios que tienen. Nós, tuviemos la suerte dar con una d'elles:

Sigui esti camín....

Preciosa quintana: "Los Gamonales" (pues quedate)

<< Son les doce la nueche. Toos duermen na casa. Les pites suañen... al mio entender. Too duerme nel valle. Los perros, espardíos peles quintanes y pel monticu d'enfrente (Monte Areo) y pela llomba de roble y castañu que tengo a la espalda (Llomba Cortina), nun deben compartir tal optimismu.. Siéntome enllaráu pola paz y el silenciu, llentu y tebiu, d'esta dulce nueche de xunu de la mio tierra... >>

Agora yá pues ....

¿ Volar .... o ... esnalar?

¿Los amigos de Parapentalia?. Raru ye'l día que nun mos saluden dende'l cielu. Saben del nuesu enfotu polos obxetos volantes y que nos presta andar acompañaos. ¡Gracies! Y que tengáis suerte cola Escuela de vuelu.

<< Los camientos de la madre, mentanto, volaben a so manera per rexiones bien estremaes, pero al empar siniestres, escures. El fíu esmucíase-y, apartábase della y perdíase-y. Bien lloñe ella sentíalu, vivía blasfemiando, escaecíu del amor de Dios, enemigu la so gloria. Yera talo tuviere llocu, pero nun taba, porque Dios pidía-y cuentes. >>

Volar, caleyar aina y sacar poques semeyes.... Bueno.... Ye Xineru y agüeyamos esta salguera yá florecía...

Salix atrocinera : Salguera prieta

Siguimos camín alantre pel barríu del Monte, na parroquia de Logrezana, y siguimos recreándonos con coses perguapes como esta quintana :

Quintana: casona, cuadra, horru, panera...

O esta pareya d'amigos que ficimos pel camín... Yá sabéis del nuesu pruyimientu por faer bonos amigos per eses tierres de Dios ...

Equinos saludando: ¡Ta llueu!

Andando, andando alcontramos bayura d'invernaderos.... Bona tierra y terrenu afayadizo pa trabayar.

Invernaderu

Cruce de siendes: "Viax redondu" y "Boroña"

Al poco, y yá baxando dafechu, acolumbramos la Central Térmica d'Aboño. Topámosla rara seique tamos avezaos a vela siempre dende La Campa Torres. Ye una pena qu'estropie la ría, ye una pena que contamine pero... ¿ Podemos desaniciamos d'ella?...

Central Térmica d'Aboño

Un poco más alantre agüeyamos el Turruxón de los Prendes, del que falaremos na ruta de "Boroña". Equí lu tenemos a vista de proboscideu.... ¿decatáisvos?