¡Bon Camín! [3 b] : La Espina - Tinéu

                                           ¡Bon Camín!
                                                       Camín Primitivu [3ª b]:
                      << De La Espina a Tinéu,  dexando'l coral en Salas >>

< Ai, Eternu pelegrín qu'a Santiago vas con  gracia
por cumplir una promesa que te prui, que te ta fendiendo l'alma.
Sigui, sigui'l to camín ensin prisa, ensin pausa.
Algamarás un día, a la fin, recompensa a to fazaña.>

       ¡Puf!... Qué ganes teníemos de retomar el Camín. Desque llegamos a La Espina nun fizo otro que llover, ventar y ñevar: Argayos, cortes de carreteres y paseinos alredor de casa; porque eso sí, d'andar yá nun pue ún escaecer.
       Llevamos pasaos munchos díes dende qu'espublizamos la cabera estaya: <Salas - La Espina> (hasta ficimos un safari fotográficu per Tinéu pa caltener "l'espíritu xacobéu") pero ye que'l tiempu que tuvimos n'Asturies nos entamos d'esti añu 19 nun pudo ser más esmoleciente pa salir a caleyar; l'agua nun fizo otro que poner pilancos a les nuese ilusiones pero como diz Isabel S.S. en "La Peregrina" :
        [[ < Asina ye Asturies, el nuesu llar, esta afayadiza mestura que de xemes en cuando amuesa los sos dientes > ]]

La Espina
 <Asina ye Asturies, el nuesu llar, esa afayadiza mestura que 
de xemes en cuandu amuesa los sos dientes >

       Yá camentáremos nel post pasáu la bayura de viaxeros ilustres que pasaren pela Espina: Almanzor, Riego, Espartero, ...... pero tamién nos enteramos, lleendo la novela "Octubre rojo en Asturias" , de José Díaz Fernández de que'l comprometíu médicu marxista y socialista Ramón Tol pasó pela Espina camín de Galicia pa exiliase en Portugal dao que la Revolución (34) venía de dar la culada. Polo que calletro na llectura creyo qu'anochó en Salas y llegó a La Espina al traviés de la Sienda del Nonaya (torno a mio manera):

      [[ Había lluna y esto agabitaba a la hora de caleyar (pa nun ser descubiertos). Nos charcos del camín brillaben dacuando les estrelles talo qu'oxetos estraviaos. La mestura del arbolíu enantaba les solombres que paecíen veníse-yos enriba. Dalgún perru lladraba, esgañitáu, dende una aldea llonxana cuando otru s'entellazaba col aquelli pa percorrer xuntos el silenciu de la nueche. 
       Al alborciar llegaron al puertu  La Espina. N'aquella altura (690 m) había un silenciu calmu, el de les cumes solitaries. L'alba fendía la cabera tela de la nueche serondiega y les campes entamaben a amosar les sos formes irregulares, los sos matices, les manches de les quintanes.  Los gallos frañíen el cristal del aire colos sos kikirikís metálicos. Pa los que veníen del baturiciu de la llucha, del españíu de les bombes, del estrueldu los cañones y de la dinamita, aquel sosiegu yera daqué chocante y nuevo. 
        A Don Ramón viéno-y n'alcordanza Riego. Pero'l  xeneral nun pasó per equí abangáu, venía argutu y trunfante, col so uniforme nuevu de subteniente. ]]
                                           ¡Viva'l xeneral Riego!

La Espina

       La Espina, onde pensamos aparcar, nun queda mui  allonao de Xixón, si lo vas a mirar,
 pero como nun sabemos lo que nos podemos alcontrar pel camín decimos salir ceo de casa. De Santurio ( Xixón) a La Espina hai 90 km y lo normal - pa nós - ye echar una ora bien llarga  pela Autopista hasta Uviéu  > Grao> Curniana y depués N-634 hasta la mìtica braña vaqueira.
Aparcamos na cai tras, ente la Escuela y la Ilesia San Vicente, a la vuelta la esquina de Casa Vane. En fin, yá pasaben de les diez (10:00) cuando emprentamos camín de la rotonda.

Capiella de los Aflixíos

          Como nun teníemos claro del too per onde entamar entrugamos al carteru que venía repartiendo'l corréu:
   - Bonos díes, señor, ¿diremos bien pel Camín Primitivu?
   - Perbién, llegáis a la rotanda del fondu y bordiáisla per mandrecha, per un caminucu estrechu, al par d'una muriuca de piedra vais picando hasta la Pereda que ta a cuatro pasos. 
   - ¿Tará mui enfollerao?
   - Creo que non, polo que tengo oyío estos díes ameyoró enforma; si llegáis venir la selmana pasada.... Sicasí dalgún charcu vais alcontrar. 
   - Gracies y a rezar.
   - ¡Bon Camín, pelegrinos!

            Nós nun entramos nella, bordiámosla y tomamos un ramalín a mandrecha per una caleyuna estrecha ya embarrada a más nun poder.
    - Empezamos bien, sabíemos del barru pero yo nun lo esperaba tan temprano. 
    - Y eso que lleva varios díes ensin cayer una gota y faciendo sol. ¡La que nos espera!. 
    - Mira, nun vamos dir solos, esti señor tamién debe dir p'allá. 

Dos pelegrinos ilustres del
inmortal "Camín Xacobéu"

       Un señor, mozu entá, bien apertrecháu de ropa y calzao, tocáu  con un sombreru qu'hasta'l mesmu xacobu lu tuviere firmao, dirixóse dica nós:
    - Bonos díes, pelegrinos. Non, güei nun voi dir mui lloñe, namás pienso tomar unes semeyes d'algunes partes del Camín. Tengo una páxina web onde camiento al rodiu'l Camín Primitivu, ya otros, y reviso los llugares nos que nun me pudi parar a gustu.
      Tuvimos charrando más de media hora con J. Miguel Hernández. Cuando s'embala nun tien frenu, ta namoráu del Camín y del so trabayu. Pa dicir verdá nós tamién sentimos tener que cortar la charra pero quédanos la so páxina, ¿por qué nun entramos en:     
                                          <www.guiavisualdelcaminoprimitivo.es>

La Preda (Pereda)
Al fondu La Sierra de Bodenaya.

                              Ensiguida aportamos a la Preda (Pereda) , la cabera parroquia de Tinéu dica l'oriente, onde alcontramos una capiellina de mampuestos del sieglu XV : La Capiella del Cristu de los Aflixíos. Hebo un tiempu qu'esta ermita tevo emplegada como gallineru, pero gracíes al bon xacíu d'alguna xente recuperóse pal so usu primixeníu. Anda que nun  debió tar aflixíu'l probe Paisanu.
        Siguimos subiendo per un soleyeru camín de formigón. Una casa de ladrillu , de la mitá p'arriba, fai rotonda talo si fuere un turruxón aprovechando lo qu'había de la construcción anterior. La xente aprovecha pa tresnar les güertes, unos  arando ya otros cuchando; la tierra ta pa ello. Yo alcuérdome de la mía, medio escaecida estos díes por mor de la renaz, o vete tu a saber. Siento un poco envidia pero a lo menos pueo caleyar.
    - Bonos díes, qué guapo ta tierra, ¿eh?
    -Sí, sí; ta mui dondo. Hai qu'aprovechar enantantes de que cambie. ¡Bon Camín!

Fonte del Reconco

       Y damos cola Fonte del  Reconco (1809), a la salida del pueblu, embaxo un tendeyón a teyavana.
Güel a cuchu nun tramu de cuadres bien grandes. Tres pasar un chalé de planta baxa coles paredes llaraes de grafitis arribamos a una esplanada onde aprovechamps pa sacar unes semeyes de La Espina y del Polígonu Industrial cercanu. ¡Qué vistes de los montes y del pandu inacabable de La Espina!, y eso que ta a 690 m/snm. Los vaqueiros equí teníen que gozala, estes brañes son mui granibles.

Tolos caminos conducen a Santiago.
Arriendes d'ello esti llévanos a Pedregal.

       Entramos nun camín de zahorra siempre ganando altura pero en continuos toboganes. Agora un camín empiedráu  (siempre hai un camín empiedráu), depués encharcáu, más tarde secu pero siempre candial por mor del sol y l'espectáculu de montes y pandos. El altímetro marca 770 m cuando camentamos tar no más alto pa güei.
    El senderu llévanos al Espín onde ta'l "Rincón del Pelegrín" y ensiguida una Fonte-Abebentaderu un poco descuidá.  En Berdures hai un antiguu molín bien iguáu aprovechando una riega mui curiosa que cuerre pela pendiente. Enantes d'aportar al Pedregal per aciu d'un camín de carru pasamos per La Miariega (La Millariega) onde quitamos la sede nuna fonte d'agua potable. Son les doce y cuartu (12:15) cuando topamos con dos muyeres ya un home que tán charrando.

Molín de Berdures

   - Bon día, señores, ¿podríen dicime cómo se llama esti pueblu?
   - El Pedregal, ye'l últimu qu'alcontráis hasta Tinéu. Lo que acabàis de pasar foi La Millariega.
   - ¿Cuántu queda pa Tinéu?
   - A Tinéu siete kilómetros. 
   - ¿Saben onde podríemos comer, en Tinéu?
   - Nós solemos dir a la Pensión Tinéu; tien restaurant y cómese bien y arreglao. 
   - Eso tenemos entendío. Que pasen un bon día, señores.Ta lluéu. 
   - ¡Bon Camín, rapazos!. 

¿Un bañín? ... ¡Al práu!
Menos mal que llevamos el perru de San Roque.

      Pedregal ye un pueblu grande que ta al par de la carretera (AS-216) onde tenemos qu'entrar. Ye lo que menos nos gusta porque hai bastante tráficu pero carez de cera pal peatón.
  Con más de 170 habitantes ye l'unicu del entornu que sigue aumentando la población. Una peluquería - Innova - asitiada nun horru llámanos l'atención pola so orixinalidá. Dexamos atrás, en plena carretera, la "Mantequería Tinéu" y la Casa del Coxu hasta qu'al final del repechu alcontramos, abellugada embaxo un carbyu, la ilesia parroquial:

El Pedregal:
 Ilesia Santos Justo y Pastor (XVI)

         La Ilesia de los santos Justo y Pastor: Una nave que remata nun presbiteriu rectangular con un adríu porticáu de tres arcos. Posiblemente del XVI tien un alfiz del XV so la portada, un sepulcru del XVI y dos capielles del XVII : una pa sacristía y la otra particular, de la familia Fernández Colao (¿sedría de la familia de Güela?) con un interesante retablu d'Antonio Borja.

L'ancestral roblón que l'abelluga ye célebre ente los romeros del Camín Xacobéu que suelen sentar a tomar la parva aprovechando la so solombra braniega. 

Palaciu Begega (Casa del Llanu).
Xubíi per delantre del Cruceru.

   
   Bien ceo vemos la señal que nos empobina a mandrecha, xusto al pie d'un cruceru, y que pasa delantre'l Palaciu de Begega, conocíu como "La casa del LLano" y qu'antaño fuere Hospital de Pelegrinos.
     Y otra vuelta a manzorga per un camín enllamuergáu dafechu que nos fizo saltar dos o tres veces a los praos porque la folla llegábanos a la rodiella. Son 4 km solitarios que se vieron acompañaos por un perru que debió romper el ganchu la cadena que llevaba atada al cuellu. Vaya murga que nos dio alantre y atrás, salta que te salta pelos champanes poniéndonos perdíos. De mano andábemos roceanos pero terminamos por aceutalu como compañeru de viax, nun mos dexó hasta Tinéu cuando una señora llamó a los municipales pa que se ficieren cargu d'elli.

       Dendel'l Pedregal a Santolaya - onde se caltién el monesteriu o Casa Peláez - foi un continuu xube y baxa per un camín solombriegu y abegosu, llaráu de champanes, de barru, alguna cabana y de riegues más o menos caudaloses que serpenteaben  fastera abaxo pente l'arbolíu. Yo fici alcordanza de la "Pelegrina":

                                       

Embolubrada nel <Tunel del Tiempu> Alana
 fai alcordanza d'histories llonxanes. 

      [[ A midida qu'avanzábemos per una sienda estrecha, ente castañales cuayaes d'oricios, fayes y abedurios recién biltaos, la mio mente , < abriendo les ventanes de la memoria> , retrocedió nel tiempu  hasta la brutal azeifa del branu'l 795 comandá por Abd al-Karim .]]

    Nesti puntu, tamién yo, < abriendo les ventanes de la memoria lliteraria> doi un saltu nel vacíu y retrocedo a esi instante per aciu del tunel del tiempu y veo al mio alter ego - Selim Marwán - de rodiyes énte'l Salvador naquel biltu de <Civitas Episcopal> na corolla d'Ovetao. Pero eso ye otra hestoria que quiciabes daqué día tenga tiempu y ganes de cuntar.... De momento escaezo del Señor y voi presentar los mios cumplíos al Vasayu, al controvertíu Xacobu, allacuyá, nos rimeros de la Tierra, nel finis terrae, o cerca.
                           
                             ***************************

Semeya de la Web Municipal.

      Tres pasar per Santolaya y l'aldea Zarracín per un sele xube y baxa - onde yá acolumbramos Tinéu y el Polígono d'El Cruceru - vamos cruciar el Riucu Ferroiro pa entrar, por fin, na capital de Les Asturies de Tinéu.
   La Villa d'Alfonso IX - el Rei que-y dio la Carta Puebla - ta llabrada nuna fastera del monte de la Sierra de Tinéu y va desendolcándose como por bancales estremaos por llongues cais tresversales.       Arribamos pola parte superior (mira'l planu la ciudá), al lláu del Campu Fútbol y entramos nel Paséu de los Flaires per aciu  la Fonte de les Muses, nun pue ser más candial el recibimientu.
      Frente'l Campu hai una Escuela de Selvicultura pegao a la Bolera; equí practícase una modalidá orixinaria d'esta zona (¿xugaríen yá los ancestros nos rimeros de Merillés?):

Partía de bolos (cuatriada) en Villamayor 1915
(Semeya de Montoto nel blog d'Acebedo)

      [[ Los BOLOS son un xuegu tradicional que se prautica n'Asturies dende tiempos inmemoriales. Antiguo yera como una preparación pa la guerra prauticando la fuerza y la habilidá asina como un divertimentu nos tiempos "muertos" (¡qué contradicción!).
Dicen que les xanes yá xugaben a los bolos sicasí Estrabón cuenta que los astures entreteníen ¡llanzando tueros!. Exipcios, griegos y romanos tamién lo prauticaben.  Sabemos que los pelegrinos xacobeos aportaron ente otres munches coses el "Xuegu de los Bolos" (equí en Tinéu la Bolera alcuéntrase a la vera del Camín).
En 1495 Alonso de Quintanilla (Contador Mayor de los Reis Católicos) presentó una denuncia escontra los Bernaldo de Quirós por arruina-y l'escudu d'armes por aciu d'una partida de bolos...
Nos sieglos XIX y XX los bolos yeren el deporte nacional; les partíes de bolos llevantaben un encerriscamientu propiu d'un Sporting-Uviéu. ¿Cuántos autor asturianos se ficieren ecu d'esti entusiasmu?: Palaciu Valdés, Clarín, A.Camín, Casona, Pachín de Melás, Glez. Prieto....

Bolos celtes (Tinéu): Terrenu de xuegu.

      [[ Pa prauticar la modalidá de Bolos de Tinéu... o Bolu Celta precísase un terrenu de xuegu o bolera de 35x10 m, unes boles que nun pasen de 35 cm de diámetru y 20 bolos exagonales de 3 cm de diámetro y hasta 18 cm d'altor. 
       Nella hai qu'estremar los elementos siguientes:
. El tiru o poyu eleváu del suelu (hasta pue valir una piedrona grande).
. La cueva o zanxa, un boquete nel suelu, xusto delantre del tiru; de fechu hai que tirar cayendo na cueva.
. La llosa, una llábana como d'un metro asitiada a 5 m del tiru (poya) onde se coloquen los 20 bolos
  en ringlera, mirando - desafiando - al tirador (non en fila).
. La raya del 10 , una raya pintada nel césped o un destapináu del práu asitiada a 25 m de la llosa que caltién los bolos   .
. El acabáu , una muria (rede, cordel, ...) de 4 ó 5 m d'altor y asitiada a 4 m de la raya'l 10.

¿Bolos de Tinéu o danza guerrera?
Camienten qu'abenayá los Bolos nun 
yeren otro qu'un entrenu pa la guerra. 
(Semeya d'Internet)

. ¿En qué consiste el xuegu?
En valtiar, induvidual o por equipos (2, 3, 4,..), el mayor númberu posible de bolos; el primeru que llegue a los 50 puntos gana'l xuegu (la partía entá non).
. ¿De  cuántes maneres se tira?
   De dos, una baxar, cuando tires - pel aire - dende la poya dica'l acabáu ya otra xubir, si tires dende la "raya del 10" hacia'l poyu (poya).
. ¿Cómo se faen los puntos?
   - Al baxar, cada bolu val un puntu a nun ser que lu
 sapies p'allá de la llinia del 10, entós cadún val 10
 puntosy si yes tan gallu que lu mandes penriba l'acabáu ¡50 puntos! y ganasti'l xuegu porque  acabasti col enemigu, algamasti'l primeru a la meta (los 50 puntos). Pa que los puntos tengan valir ye preciso que la bola trespase siempres la raya del 10, otramiente la bola queixó; vamos, que la h.odisti manín.
   - Al xubir tires dende la raya'l 10 faciendo rodar la bola escontra los bolos, claro. Cada bolu val ún puntu; si nun tirares dengún pierdes la mano, y si hai empate pierdes la xugada.
   . El campeonatu componse de delles partíes alcordaes d'antemano. ]]

   Bueno, manín; pa entamanar yá tienes bastante; ¡agora a prauticar! (dígolo por min).

San Roque: Parque, Ilesia, Bar-Restaurante y ..... Campu verde.

      Pero nun queda equí la cosa, entá tenenemos n'esti núcleu conocíu como'l Campu de San Roque  unes Piscines veraniegues, un Polidepotivu y el Parque del mesmu nome qu'alberga la célebre Capiella de San Roque. Esta capiellina foi llevantada nel sieglu XIV cuando los pelegrinos franceses se ficieren presentes nesta ruta xacobea y representaben al santu ¡acompañáu d'un perru!.... ¿Decataisvos, amiguinos?... San Roque con un perru... ¿Sedrá'l mesmu que por arte de maxa nos acompañó a nós?... ¿Trátase d'algún badagüeyu? ... Ta visto que tamos bendecíos. 
     ¿Sabes esa tonada que se cancia nos chigres al rodiu la fiesta de San Roque, el 16 d'Agostu, y que tantu preocupó al cleru de la dómina?
            < Nel Campu de San Roque
               yo perdí una lliga verde.
                ¡Ai, del Campu de San Roque
               onde les lligues se pierden!>
     Son les tres menos cuartu cuando reparamos na hora.
Darréu colocar el peru en manes afayaices empobinamos dica'l Bar que ta al entamu del parque.
    - Güei'l Tinéu ta zarráu, pero podéis comer equí, amás a estes hores.... 
Una construcción cenciella de madera, que casa col entornu , conocida como La Casina de San Roque ye'l restaurante que nos va sirvir la xinta, un menú de llenteyes y carne asao que remató con  un arroz con llechi como diba tiempu nun tastiábemos. Chapeau.

<Viator horam aspice et abi viam tuam>
(Caminante amira la hora y sigui'l to camín>

     Cuatro pasos más alantre un Reló de Sol marca'l tiempu al pelegrín, a él ta dedicáu:

    < VIATOR HORAM ASPICE
          ET ABI VIAM TUAM > 
  (Caminante mira la hora y prosigui'l to camín)
        < Nel Paséu de los Flaires
           ta la estatua'l pelegrín
           animándote a que sigas
           de Xacobu'l so Camín.
              Mas esfruta de Tinéu
           ye un conceyu de postín.
         Dellos son sos grandes homes
         y d'ellos, obres en sin fin. >

     Y siguimos caminando pel tarmudu  Paséu de los Flaires ente pinos y árboles centenarios. Onde s'abre una entena tenemos unes vistes maravioses: embaxo'l pueblu de Tinéu, aterrazáu na fastera del monte y allacuyá les sierres entemecíes nes nubes: Armayán, La Cogocha, Miranda o la mesma Curiscada, ye increyible la distancia que podemos alcanzar. Una gozada.

TINÉU: L'amor d'Alfonso IX abellugáu por San Roque. Lo vieyo y lo nuevo xuncío.
Un conceyu centenariu con presente y futuru. 

      Baxamos el Paséu de los Flaires pasu ente pasu, tastiando les vistes gayoleres que nos ofrez.
   - Oiga, ¿esti barriu que tenemos a los pies ye lo que llamen el Fondu de la Villa?
   - Non, home, non. Esti barriu tan modernu ye El Viso. Va trenta años rquí nun había namás qu'unes casuques perantigües, por embargu agora mira que modernismu. El Fondu de la Villa ye aquello, embaxo lo que ye la Villa, el Tinéu de siempres. 
   - ¿Y allálantrones?
   - El Cruceru y más alloñao vese bien el Polígonu Industrial de la Curiscada. La torre que destaca ye la del envasáu del café.

El Cruceru, antoxana de la Villa de Tinéu, a mandrecha.
Polígonu Industrial de La Curiscada a manzorga.

     [[ Nun ye d'estrañar que les emprese más punteres busquen acomodu nel Polígonu Industrial de la Curiscada ( a 65.000 m2, quien llegar). Ehí tán asitiaes empreses cárniques, llecheres, de carpintería, de material d'oficina, maquinaria agrícola, desguaces, Reciclaxe de vehículos, componentes mecánicos, de construcción y venta de viviendes, productos alimenticios varios, muebles, xestión de biomasa, limpieza, llétriques, tratamientu de ferralla, proyeutos industriales, talleres mecánicos, ..... 
     Esti polígonu ye mui especial pos tien una xestión compartía ente les empreses y l'Ayuntamientu cola novedosa fórmula d'Entidá de Conservación ("Comunidá de propietarios"). Entamó nel añu 92 la primer fase y yá van pola tercera. Tán tramitando un Centru d'Investigació d'enerxíes renobables y l'ampliación del Centru d'Empreses. Nagüen porque l'autovía llegué equí - tán nello - y qu'un día llegue a Ponferrada. Tamién de La Espina a Valdés (Autovía del Cantábricu) ta previsto comunicase per autovía; esto va ser Holywood.
L'Asociación d'Empresarios del Polígonu I La Curiscada ta comandada por Adolfo Fernández. 
(Bueno, dicir qu'al día siguiente fer la ruta alcontramos nel Super el "Café Areces" , procedente de La Curiscada, y metimos el paquete nel carru la compra; yá vos cuntaré.... ....... Cuéntotelo, suave y arumoso, lo que preciso). ]]

Nel Picu la Villa, Cimavilla. 
El cascu vieyu la ciudá. 

       Pasu a pasu vamos acercándonos a la parte vieya, al Picu de la Villla, casines antigües, polo xeneral bien iguaes, con corredor o galería y alguna con horru n'antoxana; yá tamos na Cai Sánchez Campomanes qu'empalma cola Cai Mayor. Enseguidina vemos que'l Camín Xacobéu disvia a mandrecha, hacia arriba, pero nós nun vamos tirar per él seique siguimos cai abaxo hasta La Plaza, el centru neurálxicu de la villa, yá que damos por finada la ruta de güei: <La Espina-Tinéu>. De pasu vamos enseñate algunos edificios del cogollu la ciudá.
       Xusto onde se cueye la Cai de la Fuente pa siguir el Camín hai dos construcciones que nos llamen l'atención:

Conventu San Francisco.

     Un edificiu pergrande destaca a manzorga, ye fácil pescanciar que se trata d'una ilesia:
     [[ Llevantada nel XII, seguramente pola Orde del Temple,nel Camín Primitivu  esta Ilesia de San Pedro pertenecía al antiguu monesteriu de los PP. Franciscanos - tan presentes siempre en Tinéu - que supongo sedría l'edificiu anexu, una mole pergrande con pinta de conventu qu'anguaño ye empleada como Residencia pa la tercera edá (carái, cómo nos llamen...), Palciu de Xusticia y delles coses más; l'edificiu da pa ello. 

Portada conventu S. Francisco
- 

 Entá conserva esta ilesia la torre primixenia, la portalada  románica y el portón principal, que ye una pasada, con tres arquivoltes axedrezaes y sofitaes en tres columnes en cada lladral y tres arcos apuntaos nel centru qu'abelluguen un portón de madera, a dos fueyes, y con llamatibles ferraxes y bisagres.
 L'interior  d'una nave con arcu de trunfu - caltién una capiella, la de Merás (xente de porqué),un retablu nel altar mayor y el Muséu d'Arte Sacro con pieces d'orfebrería, adornos sagraos y abondante bibliografía.
El qu'antaño fuere un modelu de cultura humanística onde s'impartíen clases de llatín, filosofía y teoloxía en tiempos de Xovellanos- qu'agospió nel Palaciu de Merás - yera, polo visto, una ruina pal pueblu:
   < Conventu ruín y probe que mantién 30 flaires q'arruinen al pueblu> ]]

Palaciu García Tinéu. 
Anguaño Casa de Cultura.

            Enfrente, xusto onde'l Camín Xacobéu torna y pica otra vuelta p'arriba,  hai otru edificiu importante, perimportante pa Tinéu, camiento yo; trátase del
Palaciu de los García de Tinéu , anguaño Casa de Cultura. Del poco frecuente estilu góticu ye l'edificiu civil más bultable de la Villa. Entamó siendo, allacuyá pol XII-XIII, una Torre circular (XIV) de calter defensivu  hasta qu'en 1520 se llevantó'l palaciu actual.  Esta torre foi residencia solariega de la familia y ta fecha de mampuestos con sillares nos escasos vanos que caltién. La Torre sigue en pie, arguta y sobeyosa, indicándonos la ruta talo un finxu del Camín Xacobéu, xusto equí onde he preciso disviar hacia arriba, camín d'Obona. Pa otru día, güei vamos a tastiar la Villa. 
El palaciu ye más chungu. Tres la so edificación foron añediéndose-y otros elementos renacentistes y barrocos. Llamen l'atención los escudos de Tinéu y Maldonado so l'arcu oxival del portón d'entrada asina como les moldures de los vanos, los balcones y esa ventana xeminada, renacentista, enmarcada por un alfiz de boles (estos de Tinéu...).  Préstame, ¿y a ti? 

TINÉU, antiguamente.
Entá s'aprecia'l Turruxón. 

                        Siguimos baxando pela Cai Mayor ente edificios blasonaos hasta qu'aportamos  a La Plaza, el centru neurálxicu de la ciudá xunto cola vecina plaza d'El Fontán y l'anexa  Plaza les Campes. Nesti cogollu de places onde tenemos anguaño'l Palaciu de Merás y L'Ayuntamientu llevantó abenayá una Torre poderosa pa defensa de la Villa. La poca empatía de la dómina terminó por esbarrumbala dafechu en 1912 pa permitir l'ensanche la ciudá. ¡Cuántu prestixu-y daría anguaño a esta plaza!. Podría comparase a la Plaza de La Campa de Salas, que tanta sonadía-y da a la villa Valdés-Salas. Tamíen n'esta plaza de Les Campes ocurrieron fechos imborrables na memoria coleutiva de les xentes: En 1809 Pedro del Tronco foi pasáu poles armes franceses tres pone-yos bien de pilancos pa facese cola villa y años más tarde tuvo llugar la cabera execución pública d'España cuando Rafael Gónzalez pasó pol "garrote vil", manda güevos. 
 Pero nun vamos a llorar, tenemos otres coses más prestoses  pa chisbar: El Palaciu de Merás, L'Ayuntamientu o la Casa de Caballero, bien cerca.        
    [[ < Metanes de la villa de Tinéu, al entamu de la Cai Píu Cuervu, álzense les elevaes torres d'un edifiu sobeyosu  que dende época inmemorial desafía y aguanta l'envite del tiempu y la carga de los sieglos...> , escribía Xovellanos nel so
< Diaru de viaxe >, per Asturies al rodiu d'esti ilustre palaciu:

Palaciu de Merás: Hotel,  Restaurant y Albergue pelegrinos. 

       Construyíu en 1525 (cinco años depués del Palaciu de los García de Tinéu) ye'l
Palaciu de Merás ún de los edificios cabezaleros de l'arquiteutura civil palaciana de l'Asturies del XVI.  Mui iguáu pero calteniendo'l sabor renacentista ye anguaño Restaurante, Hotel de luxu (non caru) y Albergue pal Pelegrín y tamién caltién el Muséu d'Antigüedaes Valentín Alba.

     L'historiador Germán A. Ramallo A. dicía d'elli algo ansí como.... < Ofrez esti edificiu de Merás una fachada monumental y un patiu d'arqueríes de calter renacentista.... Portada acostazada por pilastres y rematada con un portón clásicu... Los balcones que ciñen la puerta son daqué importao a la cabera moda de la dómina... El patiu, d'arqueríes escarzaes a los cuatro frentes tán sosteníes por columnes protoscanes igual que les del pisu con antepechu corríu.  
La so planta ye un cuadráu cuasi perfeutu al rodiu del patiu y reforzáu na parte frontal por dos solemnes torres siguiendo la moda asturiana.> 

"Miloh.a al choscu"
Receta Palaciu de Merás

         Lo que llamentaba G.Ramallo yeren les reformes hecce homo que se-y ficieren d'aquella. Anguaño esto ta superao, como sabemos, y esta ayalga torna resplandir otra vuelta. Pasa a velu y si te prui pidi pa comer <miloxa al choscu>* , o lo que te peteza; mira na páxina Web: <www.alberguepalaciodemerás.com>

* Yá sabéis que'l platu típicu de Tinéu - ún d'ellos- ye'l chocu pero esto p'algunos ye daqué prohibitivo por eso del colesterol pero... Igual d'esta forma se fai màs llevadero. Hai que prebar. 

        La familia de Merás provién del conceyu de Valdés, L.luarca. El primer caballeru del que se tien conocencia foi Lope Suárez de Merás allá por 1450 (alcordaivos que se fundó en 1225) y tevo a Pedro Suárez de Merás que casó nes Paniciegues de Tinéu y tevo a Sancho García de Merás. Esti casó con doña Aldonza Martínez de la Plaza, hermana del célebre Garci Fernández de la Plaza, el qu'en tiempos de Carlos I (V d'Alemania) conquistó Orán tres cepillar al pirata Barbarroxa ya unos cuantos más, fazaña que más tarde pasó a formar parte del escudu nobiliariu de la familia Merás y tamién de Tinéu, como camentaremos a ringlón siguíu. 

Armes de Merás.
<OMNIA VINCIT VIRTUS>
(La virtú pue con too)

        [[ L'escudu de la casa de Merás ye un blasón cuadrillongu arredondiáu na base (que pue tar apuntáu) y col campu manteláu (terciáu) en punta (llinax francés) que caltién una mestura ente les armes propies de Merás y de Tinéu, por quedar emparentaos, amás de les armes de Solís. 
        <Nel mantel diestru, el xenuinu de Merás,  sostenío pol aigla de San Xuan - pasmada (coles ales pegaes al cuerpu), de sable y col picu y les garres de gules - una cruz trebolada de gules y cuatro manes apalmiaes una en cadún de los ángulos de la cruz. Too ello vien orlao col cordón de San Francisco . Un escudu nel frontón del palaciu lleva embaxo esta lleenda: "SANCHO GARCÍA DE MERÁS ME REEDIFICÓ 1525" (que foi l'añu en que se llevantó'l Palaciu de La Plaza). 
            El mantel de siniestra toma les armes de los García de Tinéu , nomaos equí como García Fdez. de la Plaza, por aquel entós alférez, que mató al pirata Barbarroxa - rei de Túnez -  y a cuatro compinches más na toma de Orán en tiempos de Carlos I (1518) polo qu'esti Rei-y concediere les armes:
< Alfanxe, bandera y cabeza Barbarroxa>. Les otres cinco cabeces - colocaes una en punta y cuatro en palos (2 y 2) - tán orlando tol escudu. 
      El tercer mantel, en punta, lleva l'emblema los Solís: <En campu de gules un sol n'oru > . Hai quien lu pinta en campu d'azur y con esta lleenda na bordura: "Con sol fueron y volvieron y la batalla vencieron", pero nun ye'l casu. 
     El blasón ta sosteníu por un aigla de San Xuan, pasmada (ales pegaes al cuerpu) y orlada cola lleenda: "OMNIA VINCIT VIRTUS" (La virtú pue con too). ]] 
  

Escudu de Tinéu
Lleva armes de Garci Fdez.

Garci Fernández de la Plaza.
        Tuña ye un país - Les Asturies de Tinéu - ricu n'homes ya muyeres d'altor (ensin muyeres esos homes fueren nada), a min viénenme algunos: Riego, Del Tronco, Maldonado, Campumanes, Gontrodo Petri, E. Casariego,  los "Tres mosqueteros" de la LLingua: Antón, Rojo y Bello, Eugenia Astur, Zoilo Méndez, o los ancestros de Merillés pero sí ahi ún que sobresal porque sos fazanes queden reflexaes nun escudu nobiliariu esi foi: Garcí Fernández de la Plaza  que yera de la Casa de Tinéu ya entronca cola Casa de Merás. 

          Lope Suárez de Merás
                                     I
       Pedro Súarez de Merás <> Aldonza Martíz de la Plaza < hermana> Garci Fdez de la Plaza. 
        (Garci de Tinéu y Pedro de Merás : cuñaos)

            Sirviendo n'Orán como alférez, na compañía de don Diego d'Andrade, Juan García de Tinéu tevo la ¿suerte? d'alcontrase col rei-pirata Barbarroxa al que derrotó en pelea cuerpu a cuerpu magar el mesmu resultare firíu nuna mano de por vida (anda, que nun lo presumía). Ocurría esto en 1518 pero enantes, en 1512, Garci yá se casare con doña Catalina Bernaldo de Quirós y Prado (¡vaya braguetazu!). 
      Esti bravu cuartanu (tinetense) supo saca-y reitu a la so fazaña tunecina y en 1523 algama de Carlos I (Valladolid) la facultá de fundar un mayoralgu que se robla en 1539 en Tinéu. Nun ye una caxigalina pos tien cases y güertes en Tinéu ya Uviéu, Cotu nes Morteres, patronatu na ilesia de Cerredo, castiellu na Santa Cruz, brañes en Rebollo y Bustellán, montazgu de Calleras, patronazgos en Zardáin y Trevías.... Y tamién nomaba xueces ya  escribanos en Tinéu, Bárzana y les Morteres, l'amu del corral, vamos. (Oi, pirata, nun te quedará per ehí una fía... )  
      Enrique II Trastámara concede-y al so fíu Diego García de Tinéu les alcabales* del conceyu de Tinéu y más tarde Felipe II (1583) da-y el títulu d'Alferez Mayor de Tinéu. Taben bien abrochaos los García de Tinéu. 
    * Alcabala (Les alcabales): Impuestu Real sobro'l comerciu - hasta un 10% de los productos ayenaos - que daba más reitu que'l "diezmu", del que s'afanaba mayormente la Ilesia.]]

Ayuntamientu de Tinéu

     Otra construcción notoria d'esta Plaza ye un edificiu verde y balconáu: l'Ayuntamientu. 


     [[ L'Ayuntamientu de Tinéu ye un edificiu del XIX, mui reformáu del XX cuando s'añedió'l pórticu y dellos detalles decorativos de la fachada. Los escudos cuartanos foron obra de l'artista llocal Pilar Fernández. 
         Antiguamente los conceyos municipales celebraben nel conventu San Francisco pero nel primer cuartu del XIX mercóse una casa con tená pa llevantar l'edificiu  actual, más acordies colos tiempos. La primer sesión celebró en 1835 durante la rexencia na nación de la Ex María Cristina mentanto Mendizábal andaba afilando los cuchiellos y Sabel II xugaba a les muñeques.]]

Capiella del antiguu cementeriu
Primitiva Ilesia  parroquial de San Pedro

        Pasando'l Palaciu de Merás, cuestabaxu pela cai Aurelio Flauta alcuentra la parada Taxis-Tinéu. Si tires a manzorga llegues al Parquink Públicu d'Alimerka y a la Capiella del Antiguu Cementeriu, el primitivu templu de San Pedro, que dexó ser sede parroquial en 1880 cuando se treslladó a la ilesia conventu de San Francisco, al final de la Cai Mayor. Namás queda d'ella una nave, un ábside abovedáu, unes bufardes de risa ya un retablu del XVIII; yera prioritario enantar el cementeriu. Una araucaria xigante da-y más misteriu al entornu y a esa capiella mampuestos recostada na vistosa fastera.

Dende esti balcón encabezó
riego la rebelión.
(Semeya d'Internet)

       Si sigues defrente alcuéntreste col eduficiu del ALSA y de la Policía LLocal que tien un balcón onde'l xeneral Riego dio un célebre discursu'l cuatro d'ochobre de 1820, acabante d'entamar el Trieniu Lliberal (1820-1823) durante'l reináu del vil Fernando VII, "el Deseyáu" (¡manda güevos!) al qu'obligaren xurar la Constitución (vengaríase bien, el xostrón): 
         < L'amor a la patria empobinóme a encabezar a los dignos españoles que despreciando los cadalsos xuraron "llibertá o muerte"..... > 

      Col coral nun puñu y al gritu de : ¡Puxa'l xeneral Riego! num mos queda otro qu'emprimar pela cai Mayor arriba pa tomar la espuela na Griega.  Sentaos na terraza del café sintimos camentar a un parroquianu: 

       << Si vas a Tinéu y t'olvides de Tuña 
           visites el Cielu nun día de gruma >>
         Un cafetín edulcoráu con una llambiotada de Tinéu darános les fuercies precises  p'algamar en coche hasta Xixón pero sabiendo que tenemos que tornar a facer delles visites pel conceyu de Tinéu: A buscar oru en Navelgas, a facer un dolmen en Merillés, a la cata D'Artagnan...

ESTIMANCES:

< Con un pinchu de La Griega
quién dixo qu'había cuesta >

. Isabel S. Sebastián por mor de "La Peregrina". Cuido qu'Alana pue llevanos a Santiago.
. Ramón Avello, nel Comerciu (18-9-2010): "Polas entre puertos".
. Senén González Ramírez :"Tineo. Palacios, Casonas, Heráldica y Cotos Señoriales del Concejo"

. Páxina Web del Ayuntamientu Tinéu ya Oficina de Turismu.

. A Neto, al que tornamos otra vuelta por mor de "Los nuesos paisanos", esta vegada col Conde de  Campumanes, don Pedro Rodríguez Pérez y al Xeneral Riego. 
. Al Bar "La Griega" que nos trató como a unos pelegrinos de postín. 

¡Bon Camín! [3 a] : Salas - La Espina

                     ¡ Bon Camín!   [3ª Etapa]

                                       De Salas a Tinéu pasando La Espina

                          Salas - La Espina ( estaya 1ª)
       

Tunel del tiempu.
 En Salas pues viaxar hasta la Edá Media per aciu d'esti Arcu-Ponte.
¡Qué esperes!

      << Si t'acerques, amig@ , hasta Salas
col alma allegre y sorrisa franca 
algamarás a conocer, de los nobles, la ñata,
una granible familia qu'Asturies pon en mapa.
    Al andoliar peles cais espardiendo to ardiente mirada 
podrás lleer en cada piedra, grabao:Valdés-Salas. 
     Nun faes qu'entrar, pelegrín, na amplia plaza
cuando tienes énte ti la ilustre Colexata,
Mausoléu, de postín, qu'Asturies-y da fama
y au don Fernando reposa enaltando so cadarma. 
Un día aciagu d'esos, en fin, de torba mirada
foi polos vientos de la guerra mutilada,
seique pol xacíu incorrexible de la xente d'esta Patria
güei día l'alcontramos restaurada.
     Al traviés d'un Arcu-Ponte tamos yá na Campa:
La Torre, almenada, al cielu se llevanta 
y a sos pies el Palaciu, rindíu, vasallu d'estimanza.
     A la so vera, llimpiu y raudu, degola'l ríu Nonaya
testigu, altaneru, d'histories d'allabanza
y d'otres, que'l mui cuciu, recuerda, llora y calla.
¿Quién nun tien una Espina clavada na so alma?. 
Yo mesmu cuando xubo, camín d'esta montaña 
soplo, sudo y glayo naguando  pola  Arcadia
y encamiéntome a Xacobu  por mor de las  mios  fallas:
¡Perdóname Señor, que soi de La Chalana.!
- Que'l Camín te sía leve, pelegrín@
       torna ceo a Salas. >>

¿Entramos?

             Cuesta dexar la candial villa de Salas. Nun la conocía (perdóname, Señor) y dexóme impresionáu: La Colexata o Ilesia de Santa María, el Mausoléu de don Fernando (asina nun daba más morrer, teniendo en cuenta onde quedare asitiáu... Magar nun fuere encargu propiu, el mausoléu), el Palaciu Valdés-Salas - col so xardín trapezoidal y la baranda'l primer pisu - xuncíu al Turruxón per aciu d'una llamatible Ponte d'Arcu que más qu'a la Plaza de la Campa métete dafechu en dómines pasaes: Medievu, góticu, barrocu, renacentista ... Tamién tenemos el Palaciu de los condes de Casares, la Casa del Rexente, la Casa de Malleza,... Y la Sienda del Nonaya. ¡I love you, Salas!. 
        Güei queremos xubir La Espina, primer estaya (9 km) de les dos en que dividimos la tercer etapa  del <¡Bon Camín!> , Salas-Tinéu. Yá nos punxeron sobre avisu: p'arriba y p'arriba. Tienes que pasar de los 225 m/snm a los 658 metros; más de 400 de desnivel pa 9 km, aproximao. 
¡Cuayu, rapazos!. 
       

Andoliando per Salas, ¿damos un vueltu?

           Ayeri había una bona xelada y esperábemos un tiempu asemeyáu. Pero nun foi asina, taba nuble y tuviere llovío pela nueche; en cualisquier casu convendría circular con procuru tanto pela autovía A-8  como pela la N-634. Bordiamos  Xixón ya Uviéu y empobinamos dica Grao-La Espina. Salimos de l'autovía pa entrar en Curniana y  algamamos a Salas nun santiamén. 
         Casi lo primero que vemos ye la Fábrica de Danone. que recueye la lleche de la comarca. Yá sabemos que'l vacunu ye perimportante na zona, sobremanera'l llecheru. El Sector Primariu nel conceyu representa'l 50% mientres el Secundariu o industrial significa'l 20%. 
        Vamos ascendiendo pela Avenida Chamberí y alcontramos a mandrecha'l Parque de Carmen Zulueta y darrréu, a manzorga, tenemos el Palaciu de los Casares:

Palaciu de los Condes de Casares (XVII)

        . El Palaciu de la Condesa de Casares (XVII): 
     Un llamatible edificiu, acolorazáu, de forma cuadrada que presenta dos plantes na fachada principal y un patiu central en "U" del que s'organicen les sos dependencies qu'inclúin capiella, llagar y galería sobro 12 columnes dóriques de fuste llisu.
 La fachada del lladral derechu tien tres cuerpos d'époques estremaes, a manzorga ún de dos plantes, el central de tres y a mandrecha un llagar.
 La fachada izquierda ye de dos plantes mientres la posterior ye una tapia con portón. Como se ve ye un edificiu con bayura dependencies onde nun falta la capiella nin una finca arimada. 

        . Bien cerquina, seique malpenes reparamos nella, alcuéntrase la Casa de Malleza, del XVII,  que foi antiguo parada de postas y fonda. Caltién namás, en sillarexu y mampostería, la parte delantera, la trasera foi esaniciada. Tien planta y pisu con vanos enrexaos nos antepechos y un aleru con canecinos de madera.  En llinia cola fachada, onde s'amuesen l'escudu y tres saeteres, ta'l muru de la fincona a la que s'accede per aciu d'un enorme portón adinteláu. 

       . Tamos avistando la Colexata, que yá conocemos de la estaya anterior; tres d'ella hai una capiellina de frontón triangular, la de San Roque, del XVII,  qu'entemez la sillería en vanos, esquines ya espadaña cola mampostería. Presenta una sóleda nave rectangular con bóveda de cañón. 
 Pertenecía al antiguu Hospital de Pelegrinos, nel Camín Xacobéu. 

Navidá, permanente, en Salas.
<< Salas ye un Belén viviente:
palacios, castillos y Casa del Rexente.
Un ríu que vien de la montaña,
la Sienda del Nonaya. 
Falta Herodes,
 los condes son meyores.
El peselbe 
pasó a ser Albergue;
Xosé, María y el Neñu , agospien
 nel coral d'esta caldia xente.>>

      Al avanzar hacia a la Plaza de la Ilesia per un camín empiedráu va aumentando la gayola porque ye cuando de verdá t'asemeyes a un pelegrín xacobéu, vas entrando nel Tunel del Tiempu: La Colexata Santa María col Mausoléu del Inquisidor, la Capiella de Palaciu (Palaciu Congresos), l'Arcu-Ponte que xunce la Torre col mesmu Palaciu.... Siénteste tresportáu a otra dómina: al románicu, al góticu, al barrocu... Al pasáu. 
  

Ansí ve a Salas ¿Jeny Vega?.

  
      Aparcamos na Plaza la Campa tres pasar embaxo paliu per aciu'l Arcu-Ponte y entamamos a facer histériques semeyes a mamplén, y ye que'l pueblu del Universitariu tiennos esprecetaos. Entramos en Palaciu - na Oficina Información y Turismu - por saber la hora d'apertura del Muséu San Martín, pero taba pesllao y naide nun había pa entrugar; a ver si hai más suerte de tarde, pero tábemos gafaos.
 (Al día siguiente informáronnos amablemente dende l'Ayuntamientu qu'entá nun salió la plaza anual del Receicionista; perres). 

Andoliando a la vera del Nonaya

         ANDOLIANDO 
 << Paseante, pelegrín,
 qu' andolies a la vera del Nonaya 
recuerda, cuando troties pel camín
y alces, cariciosa, to mirada 
qu'eses cases y palacios que te pruin 
son la hestoria de la villa d'esta plaza.
    ¿Ves les agües que degolen ensin fin ?
Acompáñeles, anda,
son les mesmes que pasaren per equí
abenayá, tiempos del Obispu Valdés-Salas;
elles, tampoco son a vivir
 munchu tiempu alloñaes de la so casa.
De cuando en cuando, cumplíu yá'l so destín,
tornen de la mar purificadas. 
    Don Fernando, tu que celebraste en Samartín
tres cumplir tos deleres con España
pídote, como a home de postín, 
que nunca nun escaezas del Nonaya. 
   Y tu... 
Qué quies que te diga, amiguín, 
¿nun ves qu'ensin hestoria somos nada?. >>

                                                  *********************


[[ Tornamos llibremente un párrafu del llibru "La Peregrina " de I.SS. :    

<< Entamamos la marcha al albanciar, a la lluz enfermizo d'un día buxu, embaxo d'un orbayu testerón que caltria hasta los güesos]]  

Equí tamos, Mingo y Teresa dimpuestos a entamar la xubida
a La Espina pero enantes hai que cargar les piles. 

    Cuando queremos entamar cola caminada son les ¡10:50!; esto ye madrugar, sí, señor. Buscamos la Cai Ondinas p'averanos al ríu pos la xubida a La Espina faise escontra forga al discurrir del Nonaya. Hai que reconocer que lo tienen perguapo; ficieren una sienda-parque a la vera del ríu de lo más candial. Nun cartelu xunto a una ponte que comunica'l cascu hestóricu col barriu del Ponteo comprobamos que tamos nel entamu d'una ruta < Sienda de la cascada del Nonaya>.  Dexamos la visita al candial barriu pa la vuelta, d'haber tiempu. Meyor nun se pue entamar.
        Embredamos a xubir la caleya - al llau d'un tendeyón de madera afumiao - cola esperanza qu'esnalare la borrina; daquién nos dixo que podríemos dexar na retina de la cámera unos lienzos de Salas impresionantes. Pero nun yera'l día, el tiempu nun diba cambiar, ¿¡Y qué?¡. 

Sienda'l  Ríu Nonaya al so pasu per Salas.

      Alcontramos un caminante que baxaba del paseín mañaneru pa dir compartir el vinín colos collacios, camiento pa min:
   - Bonos díes, señor; ¿vamos bien pel <Camín primitivu?>
   - Perbién. Cuando lleguéis a un cuce tiráis defrente, a mandrecha hai una cascada perchula,la del Nonaya. 
   - ¿ Nun hai un par de pontes bien cerca?
   - Sí, una antes ya otra xusto onde'l tabayón. Después alcontraréis un par de curves mui pindies  que vos embocarán na carretera xeneral. Ta perbién señalizao. 
¡Bon Camín!
  - Gracies, señor, que tenga un bon día. 
 

Abebentando na Fonte de Paín. 

        Abandonamos el pueblu y entramos nuna caleya zahorra un poco enllamuergada, astrada de fueya castañu, sobremanera. Ceo dimos cola Fonte de Paín y ensiguida con una especie de tolva que nos fizo pensar nun depósitu pa cargar el carbón, magar nun se viere carbón per llau alguún. Deben ser suaños, estos díes nun faigo otro qu'alcordame de les mines de carbón de les Cuenques ( y les otres) que tán ...esapaecíes. Lloro. Acabaron aquellos tiempos de guaje onde too yera negro sacante la esperanza d'una vida meyor, magar que tol mundu trabayara como un negru, homes y muyeres;  too diba al rodiu'l carbón, hasta l@s rapazos, qu'entámabemos a estudiar p'apartamos del polvu. 
Lluéu enteré que se trata del cargaderu d'una mina caolín. Y qu'estes mines son mui abundantes nel conceyu de Salas: Bodenaya, La Espina, ....

         [[ La Mina Consuelo de "Caolines Merillés" taba asitiada en Salas, anguaño ta pesllada pero hai delles mines d'esta arcilla nel conceyu y alguna más n'Asturies. Na Sierra de Bodenaya recién acaben de dar lluz verde a la esplotación del caolín a cielu abiertu. 
        El caolín o Arcilla china ye un mineral de fórmula Al2 Si2 O5 (OH)4, ye dicir un silicatu d'aluminiu hidratao que provién de la descomposición de roques feldespátiques per aciu del agua y del dióxidu de carbono. Ye llixeru, 2,6 densidá y blandiu, 2 na Escala Mosh y de color blanco; escama bien y tien una quebra astillosa. 

Cargaderu de la mina caolín (Salas)

    
   El caolín mécese cola chamota, un material granulao rico en alúmina (40%), sílice (30 %) y óxido de fierro (4%) que s'usa en alfarería  ya escultura porque ameyora la testura de l'arcilla, torgando que s'agriete o llamine. Esta chamota sácase del ladrillu cocíu, de piedres refractaries ya otros productos cocíos y depués sirve pa facer cementu ya formigón refractario.
     N'Asturies hai 5 empreses SL - namás la supera Valencia con 7 - que se dediquen al caolín:
       . Caolines de Merillés, Caolines La Espina, Caolines del Narcea, Caolines Ibéricos y Estracciones del Carbón y Caolín.

    El caolín tien munches plicaciones, por eso ta bien demandao:
. En la construcción, pa tresnar cementos, yeso, escayola, ladrillos cerámicos, materiales refractarios.
. N'alfarería, pa iguar obxetos de loza, gres  y porcelana.
. En medicina, como antidiarréicu pol so poder absorvente. Pa la psoriasis y dermatitis. Como dentríficu y pa tratar les estríes de les embarazaes. Reguala l'acidez gástrica y calma les úlceres. Tamién s'emplega como dentríficu.
. En cosmética , al ser suave y absorbente ye pintáu pales mascarilles escontra la grasa y l'acné.
. N'agricultura ecolóxica, pa tratar la Mosca los cítricos, olivos o pomares, ye un insecticida repelente (Surround, caolín 95%) seique val pa cualisquier planta.
. Tamién s'emplega pa facer aprestos d'almidonar, na fabricación de medicamentos, pintures y papel. ]]
     
                                          ********************

        Entesacamos un párrafu de "La Peregrina" (torna llibre) que nos pue dicir un poco cómo nos sentimos al caleyar per esta sienda:

Ponte Borra, nel Camín Real de La Espina

      [[ << Durante un bon ratu siguimos el cursu del Ríu Nonaya que ruxe caudalosu pola mor del desnieve. Cruzámoslu en delles ocasiones obligaos pola traza del senderu, unes por vaos naturales poco profundos ya otres al traviés de rústiques pasareles feches de maderos entallazaos con cuerdes bien poco fiables. La sienda yera tan candial como abegosa; tan llarada de pilancos como armoniosa a los güeyos del que sabe mirar. A los de mio, máxica >> ]]

Pelegrín@ xacobéu@
a la cata la so remisión
en Santiago Compostela

   
  Una casa esbarrumbada cerca del ríu quier recordanos un antiguu molín, paezme ver una ñora cerca. Pero taba enquivocáu, otra vuelta suaño, esta vegada con molinos, ta visto que soi un quixote. Más tarde eneré que se trata d'un curtideru de pieles , abandonáu, claro.
        El camín ye anchu y tien bon pisu; hai munchos tramos bien tresnaos pa salvar el tremendu desnivel, una fana en toa regla, que tienen algunos tramos d'esti ¿Camín Real?... Tengo que buscar, ye lo que ta paeciendo... ¿había un Camín Real ente Salas y Tinéu pasado pela Espina? ...
     Pos sí, yera un Camín Real, por eso tien eses pontes tan importantes, sobre too la del Carcabón, que ta namas salir del Tabayón del Nonaya, de fechu llamónos poderósamente l'atención al ver los tremendos pilares nos que s'afitaba.

Pelegrina xacobea
escaecida nel tiempu
¿por mor
 de les güestes d'Almanzor?.

      De La Espina'l camín real siguía hasta la costa, a Valdés. Cuenten les lleendes qu'Almanzor utilizó esti camín cuando volvía de saquear Santiago de Compostela en 997; asina que per equí pasaron les campanes de la catedral xacobea camín de Córdoba y que foron rescataes en so tiempu por Fernando III, el Santu (1236).
    Nosotros a lo nuestro, vamos siguir pel Camín Primitivu tres los pasos d'Alfonso'l Castu envede dir empalmar na Espina col Camín del Norte, esi pa otra vez.

    Y damos cola Ponte Borra, del sieglu XVII-XVIII como reza un cartelu. ¿Del tiempu los palacios de Salas?.... La riega que debe discurrir la ponte vien seca pero yo pienso que ye más pa salvar el desnivel de la fana que pol agua que pue trayer, seique dalguna vez lo lleve.
  Van ser doce menos cuartu (11.45) aportamos al famosu cruce. Defrente, Camín Xacobéu; a mandrecha <Cascada del Nonaya> a 250 m.
   - ¿Qué faes?
   - Tirar p'arriba, hai que reservar fuercies, queda muncho.
   - Ye mediu km ida y vuelya, deùés nun me martirices por perder esta ocasión:
        - "Que qué fatu soi", "que llegamos sobraos", "que siempre me pasa lo mesmo", que si patatín, que si patatán... ¡Venga, andando pa baxo que nun quiero aguantate tola selmana!
    - (Esta muyer ye una santa, ¡ónde alcuentro otra fatacomo ella?)

     Foi verdá que mereció la pena. El Tabayón del Nonaya ye pequeñu pero prestosu; ta metíu nuna fana metanes una entena la viesca. Embaxo hai un ponticu que salva la riega que forma la cascada. De fechu, l'Ayuntamientu de Salas promociona una <Sienda'l Ríu Nonaya> de 6 km. ida-vuelta. Nun día guapu creyo que tien unes vistes perprestoses; pa otru día.

                 [[ Tamién los protagonistes de "La Peregrina" s'alcontraron col tabayón. Escucha a Alana:
< Al llegar la hora tercia - pasando les nueve la mañana - ficimos una una paradina al par d'una cascada pa que los clérigos pudieren entonar les sos preces mientres los caballos abebentaben na poza iguada pol tabayón . Tamién nós aprovechamos pa tomar la parba con agua fresco, cuidao que les farapes del almuerzu quedaren yá escaecíes > ]]

Ponte del Carcabón,
tamos nel Camín Real

        Son les doce del meudía. Namás salir, la Ponte de Carcabón de los sieglos XVII y XVIII, como la otra. ¿Nel Camín Real?... El camín sigue astráu de fueya de castañal pero los lladrales tan llaraos d'arguma y espineres, tamién vemos dalgún pinu. Llegamos al curvón y a la recurva cuando'l camín , empiedráu, s'oricia dafechu. Sentimos el ruíu sordu los coches. Y empatamos cola carretera N-634, que nos busca de contino. Meyor, por si falla la pata...
     A Salas queden 3 km per carretera, la que nós tenemos que siguir como 500 m.... Y tornamos a la caleya de zahorra, a les escobes y árgumes hasta que damos con una ponte azul, moderna, que traviesa la N-634, cuál diba ser... 

     [[ Sigo cola "Pelegrina" mientres percorre la sienda del Nonaya:

¡¡¡ VIDA !!!

      <<Más d'un troncu cayíu tuvieren d'apartar los siervos a la fin d'espeyar el camín, mientres les ñubes componíen so danza incadigable coles cumes de les montañes que s'acolumbren na llonxanza. 
En puntos estremaos, equí ya acuyá, les corones de los árboles formaben una ablucante bóveda natural , de fermosura superior a cualisquiera que yo tuviere visto, fecha poles manes del home.
Por toles partes la vida s'alimentaba de vida, surdiendo nuna tarmuda vexetación que bien ceo nos tien de brindar los sos frutos >>]]

¡Vaques!. Humanizando.
La célebre borrina
de la Sierra Bodenaya.

     - ¡Vaques!. por fin vemos un par de vaques. Esto empieza a humanizar... como diría Ruth Beitia.
Y entramos otra vuelta nel asfaltu per una carreterina estrecha.
     - Debemos dir pa un pueblu. Mira a ver el google Maps.
     - Tamos cerca de Porciles. Yá atalantamos un pueblu asitiáu na llomba; embaxo, unos praos onde pastien delles vaques, pintes -frisones - nel prau d'abaxo y nel d'enriba otres , pero estes paecen ratines, deben ser pa carne. Tamos nel pueblu de Porciles, barriu de Bodenaya, onde se creye qu'hebo un castru, de fechu hai una llugar conocíu con esi topónimu.  Hai una ermita dedicada a San Roque.
    Nel Conceyu de Salas el Sector Primariu representa representa'l 50% siendo la ganadería del vacunu la que tira del carru. Tamién l'agricultura con fabas y los clásicos prductos de la güerta.

El Cruceru de Bodenaya,
tamos nel ¡Bon Camín!

Un texu xigante y otra ponte y salimos del pueblu per un tramu asfalcáu  hasta que llegamos a Bodenaya; vaya pueblu tan grande y buiciosu, tractores furrulando, coches que van y vienen, xente... Por fin, xente. Unos 140 habitantes - pensé que podríen ser más - pa 7,7 km2.  Un nave pergrande col cartelu d'ASA arrodiada de tractores y de ruedes d'autos...


     Pasamos un cruceru al par del cementeriu que nos lleva hasta la ilesia, embaxo la encomienda de la Virxe de la Marina, abogada del agua.

Bodenaya:<La Parada'l Pelegrín>

     -Yá te digo.... Güei tará contenta.
Bodenaya ye famoso poles mines de caolín y caltener na Sierra del so nome - Sierra de Bodenaya - una gran cantidá de molinos eólicos pa producir lletrecidá, el célebre Picu de las Penonas (810 m) da fe d'ello. La verdá yeque nun pudimos velos por mor de la borrina, famosa nestes dómines al rodiu La Espina.
Tierra vaqueira entá caltién delles brañes, anguaño caseríes, como son: Brañameana, La Cuerva y El Couz. Tamién tien Bodenaya Tanatoriu.
       Per una caleyina empobinámonos dica la carretera pero damos con una casona-albergue de lo más guai. Ye La Parada'l pelegrín pero ta zarrao hasta que Carricondo, el relevu d'Alex, nun lu abra en Febreru; una pena pos ye la hora'l vermú (13:30).

       Cruciamos  la carretera xeneral y embredamos per un camín que nos va llevar derechinos a braña vaqueira de La Espina, a esi cruce de caminos ( Venta les Cruces) per onde pasó Almanzor en 997.  El camín xacobéu va paralelu a la carretera xeneral y, tres dexanos contemplar la Escuela, encamínamos al Albergue  y a la Ilesia.

Ilesia de San Vicente

      La ilesia de la Espina ta embaxo l'advocación de San Vicente y tenía compartimientos estremaos pa vecinosy foriatos (Equí vos pasasteis, vaqueriros, anque a lo meyor nun taba mal fecho... ¿alcordaisvos cuando n'Asturies toles romeríes terminaben a palos?.. ¡Qué burros somos!).
Celebren la Festona'l primer domingu xunetu, en Setiembre Cuadonga y al domingo siguiente la Feria les Oveyes.

     Na Espina (658 m /snm) hebo abenayá dos hospitales de pelegrinos; ún fundáu en 883 colos donaciones qu'Alfonso III el Magnu fexo al santuariu de Compostela ya otru sufragáu pol nuesu amigu l'Inquisidor, don Fernando Valdes-Salas. Taben desimíos de pagar impuestos como sabemos poles donaciones concedíes por Alfonso IX en 1224 y tuvieren n'activo hasta'l XVIII dependientes de la Malatería.

La ESCUELA de  La Espina.

      En 1277 La Espina firmó un Pautu d'Hermandá con otros ayuntamientos llinderos: Avilés, Pravia, Grao, Salas, Somiedo, Valdés, Tinéu, Cangues y Allande pa tener más fuerza nel Principáu y defendese escontra'l poderíu de la nobleza ya otros menenesteres. Asina que na Espina tevo llugar la primer confederación de conceyos asturianos. Esti ayuntamientu vaqueiru perteneció a Tinéu hasta'l sieglu XVI y yá nel XIX pasó a formar unu propiu xunto con Bodenaya, Idarga y Brañalonga.
     La Espina foi siempre mui transitada, por exemplu, durante les guerres carlistes pasaron per equí los xenerales Gómez ya Espartero, ganador a la fin, qu'algamaría a Rexente con Sabel II.

     Pero nós  damos la xornada por terminada y cola mente puesta en tantos caminantes ilustres que pela Espina pasaren empobinamos a un chigrín pa tomar daqué  pos yá yeren les dos de la tarde; salió  meyor de lo que contábemos.
     - Señorita, ¿ónde podriémos comer algo na Espina?
     - En Casa Vane, fíu; lo más amañoso que tienes. 
Nun fizo falta andar muncho; namás dar la vuelta a la esquina, na carretera xeneral, ta Casa Vane; un menú superabondante por 10 € ya una camarera peratenta que nos indicó la parada l'autobús, a puntu de pasar de vuelta a Salas; nun fexo falta llamar al taxi. Volveremos a sacanos La Espina.
       Llegamos a Salas nun santiamén. Yera temprano, entá, y atrapaos pol embruxu magnéticu d'esta villa decidimos dar un vueltu pel barriu afondáu na marxe izquierda del ríu Nonaya. Tien sabor a antiguo y permítenos ver con otra perspeutiva'l Turruxón de los Valdés, arrechu, argullosu y  dominante sobro esta parte de la villa onde s'alcuentren: La Casa del Rexente y la Casa de Miranda como símbolos más sobresalientes del pasáu.

La Casa del Rexente (XVII)
Anguaño Casa d'alquiler
(Semeya Aytu. Salas)

        . La Casa del Rexente, como tantes coses en Salas, foi llevantada nel sieglu XVIII. Ye un edificiu de planta rectangular con un cuerpu saliente en cada lladral.
Cargada y pintada de blanco pa cubrir la mampostería amuesa los sillares en vanos, zócalo, esquines ya impostes. La cubierta a cuatro agües lluz con delles bufardes ya un aleru sofitáu en caceninos de madera.
De les cuatro fachaes dos dan a sendes places y les otres dos al interior de la finca a la que s'accede per aciu d'un arcu rebaxáu (unos 60º).

Casa del Rexente.
(Semeya del Currante)

        La fachada principal tien cinco exas tando la primer planta separada tamién por cinco llínies d'impostes con balcones d'antepechu de fierro siendo volaos los tres del mediu y presentando una entrada de portón adinteláu.
Anguaño La Casa del Rexente - 400 m2 - ye una casa de vacaciones mui apropiá pa grupos pos dispón de cinco habitaciones onde pueden agospiar hasta 14 persones. Con vistes a la Torre, les montañes y el Nonaya tien un xardín mui afayaizu pa calechar y hasta pa xugar los guajes. Sobra dicir que dispón d'una cocina equipada d'afechu asina como Wifi y TV.

La Casa de María Veiga o Casa de Miranda.
(Semeya Ayuntatu. Salas)

      . La Casa de Miranda o Casa de María Veiga foi llevantada tamién nel XVII (dende lluéu nel xvii nun hebo paru en Salas) no que güei conocemos como la Veiga del Rei. Trátase d'un casa de dos plantes - rectangular - con dos fachaes al esterior ya otres dos al interior de la finca, como la del Rexente. De la mesma manera ta llevantada en mampostería son sillares a soga y tizón nos vanos, dinteles ya esquines.
La fachada principal ye una pasada, una especie de palaciu típicu asturianu con un cuerpu central engalanáu con corredor-galería d'antepechu de madera ya escudu sobro l'estragal abiertu y cubiertu con vistosu texaroz de madera.
 Los cuerpos llaterales tan abiertos a la cai per aciu de sendos balcones con antepechos llabraos y cubierta a cuatro agües rematada con esa doble filera, tan vistosa, de teya superpuesto. La fachada trasera y les de los lladrales yá tienen menos vanos.
Anguaño tamién esta casona-palaciu ta decicada al turismu rural.

                                                     *******************

HERÁLDICA:

          L'escudu oficial de Salas tien forma cuadrillonga cola punta en picu, tipu francés, y el timbre ornáu cola corona'l Príncipe d'Asturies.

      Presenta un campu cuarteláu - cuatro partes - en cruz.

    N'oru, el cuartu superior de la diestra amuesa una torre de piedra de la que sal un lleón y tres veneres de plata, dos nos lladrales ya una en punta. Falamos del llinax de Salas.

    En campu de gules el cuartu superior de la sinestra onde un lleón, en posición d'adiestramientu d'un castiellu, afita un balcón; la punta de sinople con dos columnes d'oru formando un aspa. Referencia a la congregación pucelana de los benitos.

   En campu de gules cinco veneres  en souter  (aspa) arrodiaes por dos cordones anudaos en sinople (referencia a les armes los Miranda) conformen el cuartu inferior diestru.

   Cuido que'l cuartu inferior sinestru ye'l más propiu, identificativu, pos fai referencia  a los Valdés. En campu de plata cuatro faxes d'azur y diez roeles de gules cola cruz n'oru y distribuyíos (3-2-2-3).

       En timbre la Corona del Principe d'Asturies que ye un círculu d'oru y piedres precioses decoráu con ocho florones d'oru perllaos n'azur qu'asemeyen a la fueya d'acantu y al empar van alternaos con otres ocho puntes d'oru perllaes en plata.

   Salas, Valdés, los benitos y Miranda tán equí representaos ya ornaos colo Corona'l Principe. 

       

<< La parienta anda y calla
per del Nonaya, la sienda.
 La mui cucia, roceana,
manda un wasap a la Tierra:
- ¿Toi en Salas
o ando pela Edá Media?
- Nun t'esmolezas, cristiana,
la ruta paga la pena.
Nun queda otro qu'andar
y dar les: GRACIES, Parienta.>>

ESTIMANCES:
. A la Parienta, que que ye capaz d'aguantar - estoicamente - díes como'l de güei, casi, ensin reburdiar.
. A Isabel San Sebastián que nos prestó (seique ella nun lo sepa) a "La Pelegrina" Alana pa que se nos ficiere más dondu'l camín. Gracies. A ver si na próxima presentación d'un llibru podemos da-yles personalmente.
. A la Wikipedia, como siempres, onde paso media vida restolando.
. Páxina web del Ayuntamientu de Salas. Bien-y tiramos del tetu esta vegada.
. www. senditur.com.
.  www.bookin.com
. A la camarera de Casa Vane, que foi bien amble con nós asina como a los vecinos qu'alcontramos    pel  camín y nos apurrieron información o cenciellamente cambiaren impresiones con "estos   desconocíos".
. Y a Xuan del Baltu, un collaciu de facebook, que tien el sangre mecío coles agües del Nonaya, pásen-y per delantre casa.