Restolando per < L'Aldea perdida >[1] : "Foces del RAIGUSU"

           

Antroxando peles foces del RAIGUSU

¡¡¡ El  RAIGUSUUUUUU !!!
Hailos que nun cren nos mitos; allá ellos.
Nós tuvimos la suerte d'alcontralu al entamu  la sienda:
<< Les foces del Raigusu>>
Esta ruta va por ti, creyente o paganu, y yá me cuntarás si tres caleyar una mañana pente viesques solombriegues y refrescar nos regatos nidios de les foces nun t'avienes a cantar conmigo:
< L'ARCADIA ye un tesoru pola mor del Raigusu>. 
           < Raigusu, raigón afitáu en ríu y montes. Les altes campes y zones montunes d'El Rigusu bones son pal espoxigue del ganáu, allarribón a 1000 metros d'altor y a la vera de la Peña Mea> 
 Collacios, yá tenemos percorrío'l <Camìn aniciáticu de Nitia>. Namás nos queda, pa completar esa entrega, un <Kilómetru cero> onde s'espliquen les causes, la farda que nos llevó a crear esti blog . Pasu ente pasu. Nun nos escaemos d'ello pero enantes ye preciso que delles estrelles confluyan. 
Mentanto los astros igüen la señal vamos enfusanos peles siendes 
de <L'Aldea perdida>, la pequeña patria de nacimientu del nuesu paradigmáticu escritor, el cosmopolita : Don Armando Palacio Valdés. El puntu de partida va ser la célebre novela que tien los sos raigaños n'Arcadia, el Conceyu de Llaviana.  

Caminando en santa inocencia a la cata del Raigusu.

< ¡Sí, yo tamién nací y viví n'Arcadia!. Tamién yo supi lo que yera caminar en santa inocencia del coral pente viesques solombriegues, bañame nos regatos nidios y facer güelgues colos pies coritos nel tapiz sinople de La Chalana >. 
Anguaño, a cuenta de don Armando, quiero dar un pasu más pa conocer la mio patria: el suelu que piso y la historia qu'escribieren los mios antepasaos, club nel que yá tenemos echada la solicitú.     

- ¡¡¡Tata-tata-ti!!!!
Miro'l móvil y veo que tengo un wasap en verde:
- Coimes, Vettel: < ¿Hai ruta esta selmana?. Toi arranáu por dir al monte. Llámame.>
- <A ver.... El domingu anuncia un día espampanante. Tengo una de montaña, acuática y solombriega. ¡Ah!, y per camín de carru. ¿Acuéi?>
- < ¿Ónde ta esa ayalga?>
- < Nun pue ser otro que n'Arcadia....>
- < Siempre barriendo pa casa, ¿eh?, en Llaviana>
- < Pa escontra Ribota, peles Foces del Raigusu >
- < ¿Quién ye esi? >
- < Un pariente del Busgosu >
- < ¡Ah!, esi yá me suena... Mándame'l track de la ruta, please >

Quedamos citaos nesti requexu d'Intraticum

- < Pola Minera hasta la rotonda d' Entrialgo. Na siguiente rotonda tiramos por LV-5 dica Ribota. Pasámoslo y llegamos a Les Mestes. Siguimos como 2'5 km., pela oriella del ríu, hasta l'entamu la ruta. D'ehí a Los Collaos como unos 7 km embaxo l'abellugu del Raigosu.>
- < ¿Ónde quedamos? >
- < A les 9:30 n'Entrialgo; frente la casona de Don Félix. Meyor dir xuntos hasta Les Mestes pa nun perdenos>
- ¿Quién ye don Félix?
- Yá te lo cuntaré pel camín.
- ¿Nun pues echame un tráiler?
- Don Félix ye ún de los personax cabezaleros de la novela < La aldea perdida > de Don Armando Palacio Valdés, nacíu n'Intrialgo, como sabes.
- ¿Pues estirate un poco más?
- El Capitán don Félix sirvió nel exércitu onde algamó a coronel pero pa la xente'l pueblu ser capitán yá yera lo máximo, asina que pa encumalu tuvieron que baxalu un peldañu.
- Guapa paradoxa. ¿Y retiró nel exércitu?
- Non; nun podía escaecer <L'Aldea perdida> ....
- ¡H.a, h.a! Otru aldeanu como tu, vamos. ¿Y yera favoratible al esporpelle industrial que s'avecinaba?.
- ¡Que daquién s'atreviera a furacar les sos tierres!...

     Intrialgo (Intraticum= confluyencia d'agües, entrada, desembocadura...). Entrialgo, dicimos nós. Lleguemos temprano a la cita y, pa matar el tiempu y dir faciendo boca, tomemos el determín d'esperar na placina d'entrada al pueblu y aprovechemos pa sacar unes semeyes. Podemos dicir que'l noxu la novela "L'Aldea perdida" desendólcase nesti pueblu asitiáu na confluyencia los ríos Nalón y Villoria. Equí ta la casa del capitán don Félix (la de la familia de don Armando), les cases de Quino y el so primu Bartolo, el llagar (cola pipa onde se tien escondío l'interfeutu), la bolera, la Fonte María, la ilesia'l Carme y el práu de la romería, el molín,....

["L'aldeina d'Intrialgo respingaba de gociu. Chillaben les gaites, redoblaben los tambores, españaben los voladores, los ixuxús atronaben l'espaciu..."]

La casa del Capitán, la casona natal de don Armando.
Muséu: Centru Interpretación Armando Palacio Valdés 

     Entrín y non remembrábemos un poco la historia de Nolo y Demetria aportaron los nuesos collacios d'Uviéu, ansí que tiremos pa Ribota. Al pasar camentamos en Firmo y al llegar a L'Acebal vemos que la carretera entá estrencha un poco más. Equí tenemos que parar a entrugar. Por suerte vemos una señora en corredor:

- ¿Pal entamu la Ruta'l Raigosu?
- Pal Raigusu, como dicimos per equí, quedávos un cachu. Vais pela oriella'l ríu, travesáis una ponte y, nun cruce, yá veis el cartelu anunciador. Nun tien perda. Güei tais de suerte, tenésis bon día.

        El tramu que nos falta ye bien afayadizu pa facelu andando pero hai qu'embrivir, otramiente la caminada sedría enforma llarga.

[" La casa del Capitán, qu'aquellos candiales aldeanos avezaben a llamar palaciu , yera una casona irregular d'un pisu namás con toa triba d'apertures na fachada: ventanes, puertes, balcones, corredores....
Nel campu la bolera exercitaben los homes nel xuegu de los bolos; seis mozos de La Pola escontra otros tantos d'Intrialgo]

Les Mestres: Entamu la ruta"Foces del Raigusu".
A lo fondero "Picu Mea", otru finxu de l'Arcadia.

     Aparcamos como podemos dao que yá tán casi tolos requexos tomaos; normal, con esti día...

- ¿Tas mirando la ruta nel mapa?
- Non, toi coles noticies del periódicu.
- ¿Yá marchó Cataluña?- Esperemos que non.
- Pos a esti Puigdemón nun paez cuadra-y la Constitución.
- Resúltame incomprensible l'actitú de Cataluña pa con España. Son los que meyor viven del país y entá se quexen.
- Nunca nun tienen bastante.
- Bueno, ¿y si vamos a la cata del Busgosu a ver si nos ayuda él?
- ¡H.a, h.a!. Dixisti'l Busgosu... ¿Nun sedrá'l Raigosu?
- Pa min que son lo mesmo. Lo que notres fasteres llamen Busgosu equí nomámoslu Raigusu ; Raigosu, dicen otros.
- Bueno, ¿por qué nun vamos tirando y si tenemos la suerte d'alcontralu yá-y preguntamos.
- Acuéi. ¿Qué, chaval, sintonices Sweet California?
- Paezme que toi perdiendo la señal....
- Nun t'esmolezas, ho; vas ver coses más interesantes...
- ¡¿¡Más que Rocío!?!.... ¡¡¡ Imposible !!!.
- Ta visto que lo tuyo son les xanes...

          Salimos dica mandrecha pel camín de la barganal. Al fondu, resplandiendo sobre una policromía de verdes y castaños: Picu Mea, otru finxu de L'Aldea Perdida, otra cuenta pendiente. Na pradera unes vaques casines tornen la tiesta pa saludanos.

        [< Tábemos yá como en plenu monte. Delantre, la gran Peña Mea, que tal paecía echásenos enriba; detrás, pindios praos verdes; regueros esplumosos, solombra, frescor, golores prestosos, un silenciu augustu y solemne que namás interrumpen de xemes en cuando les esquiles de les vaques o'l rinchar llonxanu dalgún carru. La brisa, llarada d'arumes, templaba la fuerza del sol. Esparcios pelos montes, nos pandos y nes fanes, delles caseríes arrodiaes de castañales y noceos. >]

<Soi la xata del pastor de Sobrescobiu. 
Una vez perdíme pelos montes del Raigusu 
y pudieron alcontrame
 gracies a Anxelín de Canzana>
- Ta lluéu, collacios. Yá me cuntareis....

< - Hola, caminantes. Vais camín del Raigusu, ¿eh?. Pos tomá-ylo con calma y esfrutar del paisax. ¡Ah!, y si alcontráis al Raigusu da-y saludos de la parte nueso. Gracies a elli podemos pastiar mansamente >

Empencipiamos xubiendo seliquino per una pista ancha y de bon pisu trazada nos rimeros d'una viesca de ribera llarada de castañales. Tamos na seronda y los oricios del suelu invítente a la gueta pero nun ye plan, queda muncho por andar... Igual a la vuelta. 

Los Tornos, al abellugu la  ¿Peña la Felguerina?

      Siguimos andando, casi llano, a la vera del Ríu Raigusu sintiendo de cotino'l ruxerrux del agua y arrodiaos d'una tarmuda vexetación de fresnos, castaños, ablanos, humeros y, de cuando en vez, dalgún carrascu cubiertos de mufu y líques que cola fueya serondiego van pintando un permanente cuadru impresionista que te caltria nel alma produciendo una gayoal indescribible. La Cannon echa fumo y yo nun soi a siguir el ritmu los collacios que se ven obligaos a esperame de cuando en cuando.¡Probes! Pero cuando tengan ocasión de ver estes semeyes espero sían comprensibles y puean dicir:
     - Bueno, anda; mereció la pena.  

       Embaxo una peña caliza que resplande más que'l sol veo un pueblín asitiáu na fastera mandrecha. Entrugo a dos señores que tan cebando'l ganao al par de casa:

- Esi puelín tan soleyeru ye Los Tornos. P'aportar allá podéis garrar un ramal que vais alcontrar acuyá.
- Otru día; güei queremos facer la ruta'l Raigusu.
- Entós nel cruce tiráis de frente, ta indicao.
         Al dicime Los Tornos vienme n'alcordanza'l día en que Nolo llegó a esti pueblu buscando combatientes al envís de vengar la humillación que los mozos de Llorío-y ficieren al so pariente Xinto.
- Quedasti mui pensatible....
- Sí, toi remembrando'l día que Nolo llegó a esti pueblu buscando sofitos.
- ¿Pa qué xera precisaba andecha?
- Pa una guerra.
- ¿Pa una qué...?
- Sí, ho. Pa una amarraza de les d'entós. Una tremolina ente pueblos de les que s'iguaben a cayadazos.
- ¿ Y cuala yera la farda?
- La humillacíon que los mozos de Llorío-y ficieren al so primu Xinto.
- Cunta, cunta....
- Xinto bebía los vientos por Flora, una mocina de Llorio. A los rapazos d'esti pueblu nun-yos pruyía un res qu'un rapaz del enemigu viniese mete-yos l'agua en casa asina qu'un día, cuando tiraba pa Fresneo, darréu despidir a Flora, saliéron-y al pasu unos mozos enantes d'entrar en Ribota...           

<Nuna revuelta'l camín
acorralaron a Xinto:
- O nos pagues el portalgu
o cantes ¡Viva Llorío!>
(Semeya:<Viaxe a l'aldea perdida)

[< - O cantes ¡viva Llorío! o ya tas pagando'l portalgu - espéta-y el Toribión.
- Nin glayo "viva LLorío" nin tu yes faceme pagar portalgu algún.
- Eso vamos velo agora >]
         < Y entamóse la engarrada y sonaron los cayaos.
Como Xinto nun podía pa con cuatro de Llorio
decidió, con bon criteriu,
dar les fusties pa Ribota per aciu un senderu del ríu.
L'enemigu, numberosu, nun-y dexó un güesu en sitiu ...
     - Pa qu'escaezas de Flora 
       vamos torgate, esperteyu;
      depués cuéntes-ylo a Nolo,
      esi primu tan arrechu.   

Y cruciaron-y el cayáu
poles espaldes, los brazos
con buyetes amarraos.
Y pa más inri-y cortaron
el botón de los calzones;
col arriar de los pendones
en grilletes camudaron.

La Capiya del Otero, onde la Virxe lloró de rabia.
< Virgen Santa del Otero
Oye, madre, la oración
con que viene un pueblo entero
a ofrecerte el corazón>
(Semeya:<Viaxe a l'aldea perdida>, X.Mª.V.B.)

D'esta traza'l probe Xinto
travesó, gachu, too Intrialgo
y en ca so tiu de Villoria
la vergoña fundió a cachos.
La raxonada de Nolo
tremeció toa l'Arcadia,
nun pensaba n'otra cosa
qu'en sascudir la badana.
Buscó socios pal desquite
per toa la redolada,
una afrenta tan doliosa
naide ye pa perdonala.
     - Vais a saber, faramallos,
       quien ye Nolo'l de la Braña.
       Toribión, esta vegada
       nin la Caridá te salva.
       Y nes fiestes del Otero
       la Virxe lloró de rabia.>>

< Cuando Nolo decató
de Toribión, la faena,
  una bramida españó
per toa l'Arcadia entera.
Buscó collacios del alma,
fizo una bona andecha,
y a la Virxe del Otero
encamentaron l'afrenta. 

  - ¿ Y tevo andecha afayaiza?
- Sí, foi como dir a la garulla; aquella trastada tevo muncha sonadía. Atropó tolo que pudo per Freneo, Les Meloneres, Los Tornos y Navaliegu asina como en Tolivia y Villoria. Unos cincuenta rapazos empobinaron dica la romería del Otero con ánimu de desquite.
- ¿Y cómo acabó aquello?
- Ai, amiguín; eso tendrás qu'averigualo tu....

     El mozu quedó un poco amusgáu pola rempuesta pero nesta sienda nun hai tiempu pal ablayu. Y nun requexu'l camín...

<Y de sutrucu surdió,
como que nun quier la cosa,
un increyible ser
de la viesca misteriosa.
Y quedámonos varaos
talo que la mesma roca>

- ¿Combayando col Raigusu, eh?
- Por algo ye'l Rei de la Viesca.
- Curiao, que lu nomen "el lladrón de muyeres"
- ¡H.a,h.a! Seríen de les de antes....

- ¡Santu Dios!, ¿eso qué ye?
- ¿Cuálo?
- Esa esfinxe, ¿nun la ves?
- ¡Ah!, sí, claro... Ye'l Raigusu.
- ¿El Raigusu?... Nunca nun sentí falar d'elli...
- ¿Y del Busgosu? 
- D'esi, sí. ¿Ye'l mesmu?
 - Si nun ye'l mesmu son primos. Cuéntase del Busgosu que tien aspeutu mediuhumanu:  pelo a esgaya ya enguedellao, oreyes puntiagudes, güeyos profundos y ñaples bien bultables que descansen sobro una escomanada boca.  Si te das cuenta'l nuesu amigu asemeya un primate...
    - L'antecesor.
    - ¡H.a, h.a.! L'Induráin primitivu. Mirándolu bien nun ye feu... ¿Qué más se cuenta del Busgosu?
    - Camiéntase que n'Asturies primitiva nun yera mui conocíu. Paez ser qu'apruciare por estes tierres dende Euzkadi, por mor de los carpinteros que vinieren a instalar mazos y molinos hidráulicos, allá pol XVII... Por eso tien dellos nomes : Mofosu (Piloña), Busgosu o Bordosu per Casu, el Peludu, el Vellosu (Colunga), el Beyosu del Sueve, el Calaviernu...
     - Los que sí lo tienen claro son los cazaores furtivos, ¿non?
     - Eso dicen, creo que los persigue hasta que terminen espeñando per cualisquier escobiu...

-Oi, ne; ¿tu vesme pálida?
- Pa nada, fía; tas como una Rosa. ¿Por qué lo preguntes?
- El to home diz que por cariciar el Raigusu voi carecer d'escrofulismu y 
quedar ruina como un merucu ...
- El que va quedar talo  escalagüerniu ye él... Si nun lleera tantos cuentos...
- 

      Tres despidinos del Busgosu, digo'l Raigusu, siguimos serpentiando a la vera'l ríu  pero la parola col mitu, el ruxerrux del agua, el rellume los rayos de sol que caltriaben al traviés de la vexetación y el xiblíu espaciáu d'algunos paxarinos convirtieron aquel cachu del camín, hasta l'entamu la xubida verdadera, nun canciu del alma. 


     Nun tramu del camín facemos una parada p'abebentar nuna fonte, un cañu que surde na caliza.  La collacia que s'entretuviere en cariciar el Raigusu nun les traía toes consigo... Quedó-y un poco rocea por mor les maldaes que tuviere sentío del Busgosu.      
     - Tranquilia, ne; que'l Raigusu ye una versión más suave, esti namás s'entretién en iguar coses buenes: Curiar la flora y la fauna la viesca; echar una mano a los pastores cuando se ven apuraos col ganao y hasta los andecha tresnar les cabanes de les brañes. 
    - ¿Tu crees que nos agabitará pa llegar a Los Collaos?
    - Si lo precisamos, de xuru. Pero entovía hai muncha paisana, ¿o non?.

¡¡ALBORADA nel  RAIGUSU!!
- ¿Ves nel suelu aquel truébanu mufosu?
- Sí, paez un caxellu surdiendo los raigaños de la faya. 
- Un "setu máxicu" que xurde les entrañes de la foz.
- Igual ye una casina pa Inxanos, que son perpiquiños.
- De xuru, y cadún ocupará ún de los güecos hexagonales que formen la seta. 

         Yá dexamos atrás delles cabañes modernes a la vera del ríu construyíes col enfotu d'abellugar el ganao qu'aprovecha los pastos de los praos axacentes, como la de la casa de la Ejesa. Más tarde una granxa de pites llarada de gatos sueltos y perros ataos.       
        Tamos no que se conoz como . "La Foz de Cobellayo".  Al traviés d'una ponte cenciella formigón camudamos d'oriella del ríu, agora xubimos per mandrecha (la nuesa manzorga). Nun sedrá la única; más tarde otra ponte fecha de madera pero cubierta formigón que t'introduz nuna graxa de cabres conocida como "El Troncu".  Al llegar a una casa colorada de ladrillu saludamos una furgoneta d' "El Trasgu la fronda". 
    - ¡Ta lluéu! 
    - ¿A quien saludes?
    - Nun los conozo personalmente pero creo que son una empresina de turismu activu. Puen contratase pa salides pela naturaleza, tamién con neños, colos que faen campamentos.  
     - ¿D'ónde son? 
     - Creo que tienen la base en Villoria. Lo meyor metese n'internet, a ver... 
     - Tiene un blog:  <www.eltrasgulafronda.com>   
     - ¡Madre, cuantísimes actividaes fai esta xente! Nun dexes de visitar el blog, please. 

¿Raigusu, Busgosu o Venáu?

      - Falando del trasgu.... Mira p'aquella faya.... 
     - Paez una tresformación del Raigusu. 
     - Sí, yá sabemos que'l Busgosu preséntase con cuernos de ciervu y pates de cabra.
     - Talo qu'esti; asemeya un venáu (Cervus elaphus). Les pates trendráles metíes nel agua; güei nun precisa echar a correr...
    - ¿Creo que cuerren muncho, non?
    - Magar les sos pates flacuques puen andar hasta 40 milles/hora (>60 km/h). En cualisquier casu tienen unes caces o pezuñes mui orixinales qu'amás de la so durez p'adautause a tou terrén caltienen unes glándules golioses coles que marquen el territoriu y atraen  al amante. 
    - ¿Y esi color pardu?
   - Ye pa pasar desapercibíu nel entornu; mimetismu.
     - ¿Oi, nun los sentisti berrar anantes, ho? 
     - Sí, sentí daqué pero pensé que yera una nuviella. Sacóme de duldes un caminante que venía arremente a la berrea.
     -  Claro, tamos na época. Vi que charrabeis un ratu, ¿de que falabeis?
     - De los venaos precisamente. Camentaba que son los machos los que traen cornamenta, que renueven cada añu. Que tienen perdesarrolláu'l sentíu del olfatu; inclusive puen detectar daqué enantes de sentilo y eso que tienen unes "oreyes-radar" que puen mover en cualisquier direición.
          

¡Pillín!... El Diañu Burllón curiando les xanes. ¿Veslu?

         Mentantu nós camentábemos al roduiu la berréa - aquel día que'l nuesu fíu nos fizo cargar col trípode polos montes de LLagos, en Sobrescobio - el caminante mozu d'esta salida nun facía otro que mirar pal ríu por si vía aprucir daguna xana, que pa él nun hai otres que les neñes de Sweet California o Paula Rojo. Hebo un momentu que quedó clisáu nun requexu del ríu...
    - Oi, Neñu, ¿y si ehí p'allá, onde la La Riega del Gatu se mez col Ríu Raigusu, t'alcuentres con una xana mazcaritada de Paula Rojo?
    - Yo llevo viéndola dende qu'entramos la foz de Cobellayo.
    - Pues igual te sal ehí; mira pa esa cascadina... Algo tien qu'haber ehí... ¿Nun ves un Busgosu curiando'l xerrón?...
    - Veo un payasu.
    - Oi, chaval; ¿nun lo dirás por min, eh?
    - Por ti tamién, que vaya día que me tas dando...
    - Bueno, yo lo que veo ye un diañu...
    - ¿El Diañu Burllón ?
    - Pudiera ser, daquién lu confunde col Busgosu; pero esti tien pinta de venir espiar les xanes.
    - Les xanes namás salen la mañana de San Xuan. 
    - Y delles veces de nueche... 
    - ¿Y pa qué va salir un bellezón a peinar la melota roxa en plena escuridá?
    - Por que salen a bañase... Esperen al principe que les desencante...  ¿Nun te petecerá esperanos equí?
    - Tu rite... Yá veremos cuando s'empine la cuesta... 
    

- Agora entama lo bueno.... ¡H.a, h.a!
- Paezme que toi viendo unes xanes...
- ¿Nun escomenzó la xubida y yá tienes allucinaciones, carcamal?

     - Bueno, agora empencipia la xubida de verdá - camienta una xana.
     - Vamos tomalo con calma, queda muncho... - respuende la compañera.
     - Esperáime, xanes, que quiero preguntavos una cosa - entruga'l mozu averándose a elles. ¿Por qué nun me contáis un poco la historia de "L'Aldea perdida"? Cualquier día tengo que facer un trabayu pal Institutu.
     - Pos...  Ello yera una vegada un mozu que se nomaba Nolo ya una moza llamada Demetria. Taben enamoraos y queríen casar pero....
     - Meyor entamar pel principiu. La historia ocurriere nesta zona onde nos alcontramos, el conceyu de Llaviana, sobremanera: Entrialgo, La Pola, Canzana, Villoria, Tolivia, Ribota, El Condao, Tiraña... De fechu tolos pueblos de la comarca tán representaos nesta obra, nesta Arcadia. Masque tamién n'Uviéu se desendolquen fechos trescendentales de la trama.
     - ¡Qué bona pinta tien ésto! . Oi, ne, ¿por qué dices l'Arcadia?
     - L'Arcadia ye un país que sale del maxín de los artistes y poetes renacentistes y románticos onde la felicidá ye la nota dominante: Vida bucólica y tranquila onde la xente vive en consonancia cola naturaleza.
     - Entós Nolo y Demetria foron bien felices, ¿non?.
     - Pudieron selo pero naquel entós empezaron a esplotase les mines de carbón nos valles d'Asturies y l'Arcadia de la Cuenca del Nalón entró en peligru desaniciu: tierres afuracaes, parves de cisca prieto, homes d'azevache, chigres onde los mineros busquen la llibertá perdida nes galeríes ... Problemes nuevos a los que, pasu ente pasu, habrá buscáse-yos solución . Nesti tiempu onde, entrín y non, s'alcuentra l'acomodu los amores de Nolo y Demetria analayen pela Arcadia... ¿Alcontrarán l'asunción?

¡El Meque !

     - ¿Qué ye, que nun me lo vas cuntar?
     - Eso tienes que qu'averigualo tu; una historia nun tien gracia si se conoz el final. Yo namás pueo asitiate, pa que t'encerrisques
    - ¡Yá toi encerriscáu!
    - Bueno, en cualisquier casu diremos dándote ... pincelaes...
    - Val, val. A ver, ¿ónde vivía Nolo?
    - Nolo vivía na Braña de Fresneo, de onde yera tamién el so primu Xinto, cerca de San Pedro de Tolivia.
    - ¿Demetria yera vecina?
    - Vecina de Canzana, un pueblu preciosu engarabitáu nuna llomba, a tiru piedra d'Intrialgo.
    - Son munchos nomes pa un día...
    - Sí, hai bayura de personax na novela. Faiste meyor con ellos cuando los vas asitiando dientro de l'aición.

       Nestes, apruz daqué que nos llama l'atención:
     - ¡Mira! ¡El Coneyu Burllón!
     - Tien cara trastu; sedrá'l Meque. 
     - ¿Quién ye esi?
     - Un trasgu traviesu. En Llaviana cuando un guah.e ye mui revolvín dícen-y:
              - ¡Yes mas malu que'l Meque!

             
                      - ¡Talínnnn!... Digo... !Caneloooo! ¿Ónde andes?
                      - ¿Qué vos pasa, collacios?. Toi dando un vueltu. 
                        Yo tamién quiero dexar güelga la mio presencia n'Arcadia.
                         ¡Guau, guau!
     - ¿Por qué lu llamasti Talín?- entruga Vettel.
     - Porque evoqué'l  perru famosu de L'Aldea Perdida.
     - ¿Yera canelu, acasu?
     - Sí, yera'l perru del Capitán, el que lu acompañaba a tolos sitios; por exemplu aquella vez na que visitaren a don César de les Mates d'Arbín, "ún de los pocos sabios que nel mundu fueren".

Canelo, ¿descendiente de Talín, el perru'l Capitán?

[Talín yera un perracu de color canela; pa nada grande, pa nada guapu, pa nada intelixente pero entá más briosu y cuasi tan magnánimu que'l so amu]

     - Pero'l mio Canelo ye guapu, intelixente y dócil.
          Vamos xubiendo la cuesta seliquino per una sierpe de zahorra semada de fueya serondiego que camina paralela al regatu y siempre al abellugu la viesca onde la presencia de la faya va faciéndose más frecuente. Hai momentos que resembla tar colándose pel tunel del tiempu por mor de la tarmuda vexetación . De cuando en cuando pequeños tabayones contribúin al espectáculu poniendo la música de fondu.  Agora travesamos un pasu tayáu na caliza y depués unos pequeños charcos, los únicos qu'alcontramos en tola ruta, por cierto.
       

Un requexu del camín onde se mecen trasgos, xanes y busgosos

         El casu ye que pali-pali, per esta sienda amplia y solombriega onde, de cuando en vez,  somos pasaos por dalgún 4x4 algamamos a unes ruines...
      - Voi mirar qué ye eso...  Son como unes casetes de bloque formigón... Dende lluéu fines ganaderos nun tien.
      - Un poco raro, ¿eh?
      - Igual nun ye tan raro... ¿Nun te dacatasti de la pista tan enantada y bien curiada pola que xubimos? ... Y precisamente acaba equí.
     - ¿En qué tas pensando?
     - Per ehí vese una tierra un poco negro...
     - ¿Una mina?¿Ónde ta'l castillete?
     - O un chamizu. Nun se ve traza d'una esplotación mui grande... 
     - Mira, hai una casina ehí arriba. ¿Vamos preguntar?
    - Acuéi. Tira.

La Minona Casimiro. 
[D'equí a poco nun va quedar nesti valle
sitiu ningún ensin afuracar]

         Una neña mui guapa ta xugando n'antoxana. Siente la voz del padre y acude a la llamada.
     - Oiga, bonos díes.
     - Y tan buenos. Vaya día que pillásteis, ¿eh?.
     - Esto que-y digo, ¿eses chaboles derrangaes de qué son?
     - La Casa obreros de la mina.
     - Asina qu'hebo una mina...
     - Un chamizu, perteneció a Casimiro. Ya tien cerrao va años.
      - ¿Por eso se fizo la pista?
     - Claro, pa baxar el carbón.
     - Víno Dios a visitalos, ¿eh?
     - Vieno. Disfrazáu de Casimiro y per aciu la Virxe del Obeyayo, que tien ilesia en Ribota, ¿conoceisla? . - Ye una señora algo mayor (¡qué digo!, si ye más moza que yo..) la qu'acaba d'aportar entrando dafechu nel alderique.
    - Suénamos pero nunca nun tuviemos nesa romería magar que tengo sentío a mio madre falar d'ella, de cuando moza.
    - ¿D'ónde sois?
    - De La Pola (Llaviana), pero nacíos na Rebollá.
    - Igual somos familia, mio padre tamién yera de La Rebollá...
       Bueno, tuvimos falucando un bon ratu y ..... Tamién tenemos en común familia conocío en Tiraña, d'onde yera mio padre.
     - El mundu ye un pañuelu...
         Y asina falando y andando en grupu  fuimos averándonos a un cantu d'una campa. Yo quedé un poco pensatible con alcordances de la novela por mor de la mina...

[Delantre d'ella, bien cerca, taba Plutón, negru como un carbonizu, y cola lámpara prendida colgada del brazu, como si acabase de salir de la mina. 
Detrás d'ella, a dos pasos namás, había una chimenea o boca de respiración de la mina qu'él mesmu venía d'abrir esti día y que naide nun conocía"]

          < Vieno a sacalu de la so tristura la llegada d'esmenu ya inesperada del ganáu que tenía paciendo pelos montes del Raigusu > 

Pelos montes del Raigusu.

- Toi sintiéndote falar en voz alto.... A ver, ¿quien ye Plutón y quien ye ella?
     - Pillástime, eh. Poco a poco voi cuntate to la novela y depués yá nun te presta. Ella ye Demetria, la moza de Nolo, la de Canzana. Elli, Plutón, un mineru famosu...
    - ¿Polos goles que metía?
    - Polos xareos qu'armaba. Yera mui dau, talo que'l so amigu Joyana, por andar siempre en baturicios... Hasta llegó a tar presu. Yá trabayere n'otres mines d'España y foi un fichax del inxenieru pola so esperiencia. 
    - Coimes, un galácticu n'aquella dómina.... 
    - Sí, lo mesmo que Joyana; Florentino nun inventó nada. 
    - ¿Asina que'l Joyana debía ser otra joya?
    - Del mesmu palu, tamién tuviere na cárcel. 
    - Pero nun me vas cuntar lo que pasare esi día que t'acaba de venir n'alcordanza...
    - Yá sabes que yo namás caliento al personal...

Celebrando per "L'Aldea Perdida" l'alcuentru col Raigusu.
Gracies por prestanos la mesa, vecinos. 

          Andamos un poco escasos de tiempu, como siempre, y tenemos duldes de  poder llegar a la cume asina qu'entrugamos:
     - Señora, queríemos llegar hasta los Collaos, ¿faltará muncho?
     - En menos d'una hora tais ellí - respuende Araceli. Pero merez la pena, tien unes vistes... Bueno, si vos asomáis a aquel cantu tamién podéis ver mediu conceyu. Mirái, ellí al fondu tenéis Los Tornos, más p'allá La Pumarada y aquello otro son Les Bories.
     - Esto que-y digo, ¿cree que podíemos comer n'aquella mesina que ta n'antoxana d'esa casa d'allarriba?.
     - Nun creo que l'amu tenga dengún reparu. Eso sí, alcordaivos zarrar la puerte y dexalo too como taba.
     - Bueno, vamos xubir otru poco y según como lo veamos ....
         Y sí, xubimos un bon tramu pero echábasenos la hora enriba y tuviemos que dar la vuelta  a comer naquella mesina que dexáremos atrás.
         

Camín de Los Collaos
-Cuayu, collacios, yá falta poco...

      << Acostumamos, señor@s,
        a pesllar cada salida
        con una puerta zarrada
        o, entrín y non, yá dormida,
        mas esta vegada nun pueo
      porque nun algamé hasta arriba;
      queda pendiente, collacios,
      visitar la picalina;
      cualquier disculpa ye bona
      pa perdese n'Aldea Perdida >>

       Asina que VOI TERMINAR con unos versos - diría yo - del poeta de Llaviana que rescato de <L'Aldea perdida> (torna Xosé Mª Vega Blanco):

< VOI TERMINAR. Escurez, y la mio mano cansada niégase a tener más pola pluma. 
¡Oh valle de Llaviana! ¡Oh ríos cristalinos! ¡Oh verdes praos y mestos castañeos!, ¡cuánto vos amé!.
Que'l  vuestru airiquín arumosu caricie un segundu la MIO frente, que l'ecu misteriosu de la vuestra voz suene tovía nos mios oyíos, que vuelva ver delantre los mios güeyos les figures rellumantes de los seres que compartieron les allegríes de la mio infancia. Voi davos un besu de despidida y tiravos al torbolín del mundu. Una voz secreta dizme qu'enxamás tendríeis que salir de les llendes del mio corazón. >

Semeya:<Los nuesos collacios>, de Neto.

AGABITOS:
. Sofitamos en dellos llibros:
 Como ye de suponer "La aldea perdida" de don Armando Palacio Valdés asina como la torna - "L'aldea perdida"- de Sixto Cortina, d'onde copiamos delles cites. 
"Viaxe a l'aldea perdida" (Una revolada pel país d'A.P.V.") de Xosé Mª Vega Blanco.
" La aldea perdida" (en décimes), d' Efraín Canella Gutiérrez. 
"Novela de un novelista", del propiu PalacioValdés.
El capítulu afayaizu de "Los nuesos collacios", de Neto.
. Anduviemos restolando per dellos blogs al rodiu la ruta <Foces del Raigosu>: "Wikiloc", "Asturnatura", "Ayuntamientu de Llaviana", "Caleyandoconcienfuegos", "Montaña en libertad"...

. www.venadopedia.com , "Trabajando por un sueño".
. Ye bien de xusticia, pola falta que nos fai y lo que nos presta rebuscar, que faigamos alcordanza : del <Diccionariu Llingua Asturiana (DALLA)>, del <DAGLA>, de Xosé Lluis García Arias y del traductor <ESLEMA>, gracies. Y gracies a Luis Alberto Prieto G. por prestanos los Diccionarios de Sinónimos, ¡qué sedría de nós ensin ti, collaciu!. Tamién consultamos el de Xuan Xosé S.V., del que somos almiradores. 

Nolo y Demetria, símbolos de <L'Aldea perdida>,
amores qu'analayen per L'Arcadia.
(Semeya: <Viaxe a l'aldea perdida>, X.Mª V.B.)

                            EPÍLOGU
        Pa inmortalizar L'Arcadia
 vamos a rematar
  - un aniciu del final -
  esta primera salida
 sobro  L'aldea perdida,
 y aclarar, con una décima,
 el final d'esta traxedia.
  (Que nun s'entere, yo espero
  que conoza antes de tiempu
 la triste historia de Nolo y Demetria).
     - Vettel, va por Efraín Canella.
             ..................................
          << Este fin inesperado
              que el novelista nos deja
               encierra una moraleja
               para el lector avispado.
               La puñalada que ha dado
              ** con mano asesina
              y que a *** elimina
              es teatro que recrea
              lo que hizo la chimenea
              con la Arcadia campesina >> 
                            Asina robla Efraín Canella
                         
      - ¿Y tu tamién pienses que les mines foron la "mano asesina" de L'Arcadia? - m'espeta'l mozu a bocaxarru.
      - Pa nada, son los signos de los tiempos. N'esta vida por too se paga un preciu. La vida bucólica campesina dio pasu a la vida industrial. Nin la primera yera tan buena nin la segunda tan mala. Mio güelu yera campesín y foi feliz magar aquella precariedá y mio padre , asina como tolos tíos de mio, llibraron de la emigración por mor de la mina. ¿Qué facer con una pila fíos y ensin tierres pa trabayar?

N'alcordanza d'Eladio, aquel afable sabiu
 autodidacta y llibrepensador.
(Semaya:<Viaxe a l'aldea perdida> X.Mª.V.B.)

     - Bueno, ¿tampoco nos quedó tan mal, eh? Mira qué ruta ficimos güei....
    - Teníes que ver la cuenca na dómina l'esporpolle del carbón. Agora casi nun queda nada, nun tien comparanza... Trenes acorropinaos, La Campurra... Fumo, cisca y mineros tatuaos polos güelpes del carbón... Y les muyeres llavando'l sangre, el sudor y les llárimes naquel escomanáu llavaderu públicu... 
    - Paez que se t'enchipa'l coral al remembrar aquellos díes, pero nun veo tristura.
    - Non, nun fueren díes murnios. Había trabayu, mui duru, pero trabayu. Y los fí@s de los obreros pudimos dir al Institutu, que yera'l so máximu pruyimientu.
      - Estudia, fíu; tienes que llibrar de la mina...
         <  Pero'l que vivió nes Cuenques siempre caltendrá'l coral con un barniz d'acebache, como les madreñes >

          
               R'EPÍLOGU
     Ta al pendiente. Siempre te queda daqué nesi tinteru blancu, de porcelana, del color que nosotros víemos la vida n'aquella dómina.

y Camìn Aniciáticu [8]:Vioño - Viodo

                    y CAMÌN ANICIÁTICU [8]: VIOÑO - VIODO

   Y llegamos a lo cabero'l Camìn.... El Camìn Aniciáticu de Niria algama'l final que nun ye otro que'l principiu de daqué.

     <<  Andábemos escasos de lluz y la fueya les plantes del camín, tovía moyao, y les rames de los árboles coritos adoptaben énte min figures diverses  y los primeros rayos del sol dáben-yos vida nuevo y les gotes d'agua, qu'entá se calteníen, de mano brillaben y darréu desapovisaben nun vapor trémbole y yera talo si l'agua fuere tresformando en lluz >>

             Tamos cerca. Yá tenemos noticies de que l'alfareru Rigio y la so fía Niria teníen parientes en Viodo.    

El final del Camìn. Un llugar onde'l cielu ensama cola tierra.
Cuido que te petez venir.... 

         << - El mio tíu Gelado, el ferreru, tien un pariente que de mui neñu tevo al serviciu d'un alfareru portugués-
               - ¡Ixuxú, son ellos!
          Punxéronse toos tan contentos y montaron tal algaravía que bien paecía los tuviéremos alcontrao. Yo nun les traía toes conmigo...
              - Nun vos esmolezcáis, señor Melendo. En cuantes que risque l'alba colamos darréu; en cuatro galmiaes tamos en Viodo >>

La triba preparando la cabera caminada.
Salimos dende < Bar Peláez > (Vioño)

        Los nuesos mocinos ven el final del tunel  tres trés díes d'agua, d'angusties  y d'esperanza. Una vida nueva amuesa pa ellos. La felicidá de los habitantes del señoríu de Cenera va depender enforma de la dicha  del señor Melendo: <EL QUE LO ABANDONÓ TOO PA TENELO TOO>.

        Nós tamos percontentos por algamar a la mar - ponte máxica de la esperanza -  depués de tantos díes de caminada y de tantos díes d'enquiz p'alcontrar los caminos afayaizos.              Atrás dexamos palacios, ilesies, casones perguapes, horros y paneres... Travesamos ríos, pontes y pantanos y chisbamos per cueves kárstiques p'apreciar el pasu inapellable del tiempu.  Caleyamos per pandos, siendes emprunes y  tierres enllamuérgaes tres degolar delles collaes que nos salieron al pasu ... Salvamos la capital del Reinu per aciu d'una xubidoria mecánica darréu facer un amigu duendu que se caltien nel tiempu y fuimos testigos nel Partenón del Narancius del glamour prerrománicu ramirense. Caminamos, en fin, coles alforxes siempres llaraes de pallabres qu'arramar o d'histories que cargar porque el Camìn de Niria 'l ye'l camín aniciáticu del amor y de la sabiduría < qu'entre dambes hai un camín mui curtiu d'ida y vuelta>. 

-¡Eh,eh! ¿En qué tas pensando, ne?
¿Quies llargate en caballu?
¡Nin se t'ocurra!
Los pelegrinos vamos a pata.

         Pa que la nuesa gayola sía más grande esta vegada - la cabera - llevamos compañía. Ensiguida lo veréis. Bien ceo amosarán les barbes, digo los Berbes.
        El casu ye que'l últimu día los nuesos mocinos quedaren a dormir nel monesteriu y nós apalancamos delantre la ilesia de Sanestébanu de Vioño. Lo normar sedría que güei entamáremos dende equí pero preferimos dexar el coche delantre'l <Bar Peláez>, queda más protexíu y amás ye un sitiu afayaizu  pa venir celebrar el FINAL del CAMÍN. La verdá ye que fuimos con dos coches y dexamos ún en Viodo, pa la vuelta, y l'otru en Vioño. Son unos once kilómetros p'algamar a Viodo y trés más si nos averamos al Cabu Peñes. En plan de broma yá tenemos fechos unos  < 92 kilómetros > dende que salimos de Cenera. Con estos once sedrán 103, plus ou moins.

Entamamos la caminada per aciu d'un ponticu del Ríu Vioño.
Somos una banda con dos mascotes.
 Rei y Canelo nun quieren perder el final de fiesta:
- ¡Queremos ver la mar! ¡Guau!¡Guau!

      Ta un día caldiu y soleyeru, preciosu. Pa tomar la espuela nun alcuentres otru asemeyáu, paez que lu buscamos col candil. Tres afatanos pa la ocasión y revisar les mochiles, por si faltaba daqué, echamos a andar doblando la esquina del bar per una caleyina engalanada d'azur. Unos coríos, ayenos al nuesu destín, antroxaben embaxo la cucia ponte que cruciaba'l Regatu de Vioño. Ésto  nun podía entamar meyor.

Guapa Casería nel Barriu La Pedrera.

       Per aciu'l ponticu de madera cruciamos la pradera que llenda cola carretera xeneral (GO-10) nel barriu La Pedrera y que pue llevanos a Manzaneda, pero nun ye'l casu. Al curtu d'hora, tres una sele xubida, tornamos a baxar otra vuelta en busca del Ríu. De sutrucu, a la otra oriella, y fuera l'algame les riaes, acolumbramos  una casona: el Palaciu de la Ponte.  Yá falamos d'elli na estaya anterior pero vamos refrescalo:

Averando al Palaciu La Ponte.
Estos son capaces de pidir agospiu. 

     [  La Casona-Palaciu de La Ponte pertenez a la célebre familia García-Pumarino, que tamién edificaron la casa Llano-Ponte d'Avilés, tres facer fortuna nel Perú. Una quintana con tierres importantes, casona-palaciu, panera, cuadres y una capiya del XVIII dedicada a Santa Rosa de Lima, como nun podía ser d'otra miente.
       Don Rodrigo García-Pumarino, natural del pueblu vecín de Manzaneda,  embarcó pal Perú con quince años. Dedicóse a los negocios navales onde fexo perres abondo. Tornó pa la tierrina y  mercó tierres en Vioño onde edificó esta Casa de La Ponte, amás del citáu palaciu de Llano-Ponte na capital del alfoz: Avilés (tiempu depués abellugó'l Cine "Marta y María"].          

       Abandonamos la carretera que va al románicu de San Xurde de Manzaneda y tiramos a mandrecha, camín de La Ponte. Tomamos semeyes de la casona, la ponte, el ríu y del remocicáu llavaderu y fuimos ascendiendo hasta la ilesia parroquial; si, esa que quiximos  altrucar  con un monesteriu (yo ye que nun soi ver otra cosa), cola badía onde anueitaren los nuesos mocinos.

Pelegrinando tres les buelgues d'Alfonso'l Castu.
¡Nun sois naide!

           [La Ilesia de Sanestébanu de Vioño ta documentada nel sieglu XV . Nel añu 905 - mandaba Alfonso III - apruz la primera vez como donación d'Alfonso el Castu a la Ilesia de San Salvador d'Uviéu. Más tardeXIV,  apaez nel censu parroquial de Gutierre de Toledo: Sancto Estevan de Bionno.
         Tien  planta en forma de cruz llatina y un pórticu cubiertu, a dos agües, sobro arcos de mediu puntu. L'ábside ye cuadrangular y mui bultable asina como la espadaña de dos güeyos. ]

- ¿Y si entramos nel Tunel del tiempu?
- ¿Creyéis que nesi tunel podré sintonizar 
a Sweet California? 

         Salimos de l'antoxana la ilesia y , al llegar al cruce, tiramos a manzorga per una carreterina asfalcada (GO-9), con tráficu escasu, pa dir ascendiendo a Susacasa. Too va ser hasta'l final, por embargu, un xube y baxa, un tobogán d'asfaltu, una sierpe buxa retorcigañándose  ente praos, pinos, ocalitos, toxos, felechos y bayura d'árboles llariegos que llenden dellos barrios diseminaos per aquella pradera verde que nos ha llevar dica'l mar.


         Tamos pasando pel Barriu <L'Escayal>  onde la carretera pica un poco. Vamos ferregüeyando l'entornu. Llámanos l'atención una casona grana con ampliu aparcaeru y una palmera pergrande que ta cerca la carretera Luanco: <La Casa'l Molín> , un restaurante mui célebre. Y bien cerca, na fondiega, una quintana con casa-corredor mui llamativa.
         Enseguida entramos na zona d'El Ruego onde predomina l'ocalital no qu'antes yera una viesca autóctona de castaños, robles y lloreos, de los que podemos apreciar exemplares per doquier. De xuru los nuesos mocinos lo tuvieren visto; ellos fueren más afortunaos masque nós nun podemos - nin queremos - quexanos, ¿de qué?.

Averándonos a Susacasa

       Pa entrar en Susacasa - parroquia de Nembro-  recíbenos una casona modernizada al traviés d'un arcu trunfal. Como tien de ser. Granible tierra ésta que permitió tan escomanaes cases. A esfrutalo.
En Nembro alcuéntrase la Ilesia de Santa Eulalia (Santolaya), mui asemeyada - sobre todo nos pórticos -  a Sanestébanu de Vioño, a Nuestra Señora de la 0 , San Martín del Cardu y otres de la zona. ¿Tenemos un Estilu Gauzón pa ilesies? . Un día avérome hasta ehí y cuéntovos daqué nun Anexu, ¿val?. Camiéntase que Susacasa foi la primera capital del conceyu Gozón cuando s'emancipó d'Avilés en (1606) y entá se dedicaba la vecindá a la caza de ballenes. Cuando s'acabó'l cetáceu entamóse cola industria conservera. ¿Ónde tan aquelles tantes industries que teníemos n'Asturies? ¿Qué yeremos? ¿Qué somos?... ¿Ónde ta flota de pequeñes y medianes embarcaciones qu'atopábemos en cada puertín d'Asturies?... Tiempos del cai ¿ánde andáis?

Surfeando
(Imax de Wp)

          Al llegar al cruce tiramos a manzorga, camín de Fombona. Yá tenía ganes, la verdá, porque esti nome asoma per cualisquier sitiu de la redolada.
 Un cartelu llámanos l'atención: <Escuela de Surf "Baluverxa">. igual esta afición-yos vien de cuando se facía surf en Bañugues teniendo como tabla una ballena...
     - Coimes, pero si la playa ta a dos kilómetros...
     - Bueno, equí tendrán una base loxística, pa guardar aperios...
     - Amira n'Internet, güei yá nun podemos para más.
     - <www.baluverxa.com>   ye la escuela de suf del Cabu Peñes. Dan clases en Bañugues, Lluanco, Verdiciu y Xagó. (verdiciu@baluverxa.com).Yá investigaremos más.
El casu ye que presta a esgaya contemplar cómo un garapiellu neños intentar salvar les foles deslizando sobro una cenciella tabla.

       Ensiguida vemos una casona solariega importante enantes d'acolumbrar la "Casa rural El Encanto", sitiu mui guapu pa pasar un fin de selmana o unes vaciones tranquiles y cerca de Bañugues, Lluanco y Cabu Peñes, a les que nun tardes cinco minutos llegar  en coche o un cuartu d'hora en bicicleta. Mira si ye guapo esto que vemos otres dos cases-hoteles dedicaes al turismu rural: "Casa'l Gaiteru" y "Funte buena de la Llosa" . Yá sabes...
       Distrayíos aportamos a un cruce de caminos; nel mediu ta el Bar "Les Faraguyes". Paramos a tomar daqué y entrugamos pol camín afayaizu p'algamar a Viodo, bueno pa Bañugues.
        - Ye y nun ye lo mesmo... Vase pelos dos sitios, per Verdiciu y Ferrero si tires de frente pela (GO-9) y si garres a mandrecha das con Cabañes, pases per Xelaz y llegues a Bañugues; depués carretera nacional a Viodo pela (GO-1).
     - Prestábanos pasar por Llumeres.

"Coprinus comatus"

     - Entós a mandrecha pola GO-6. Mui importante: Pa escaecevos de la xeneral al Cabu Peñes, que ye la vuesa direición, en Llumeres baxáis a la playa y per una carreterina ente praos, bordiando los cantiles del mar, llegáis hasta Viodo de la manera más tranquila y prestosa.
     - ¿La famosa mina de Llumeres quédanos de pasu?
     - Si baxáis a la playa, como vos dixi, tenéisla ellí mesmo.
     - Gracies, ye lo que buscábemos. Hasta otru día.

          Y empobinamos pela calmosa carreterina de Cabañes (GO-6). Ensiguida un cruce, pa les Cabañes a manzorga. Qué calma, qué sosiegu, qué verde.... Y de sutrucu...
                                                                 
                                                     ¡¡¡ El  MAR !!!

<El mar. La mar.
El mar. ¡Namás la mar!>  

        Y viennos n'alcordanza aquel cantarín d'Alberti:

< En suaños la marexada
tírame del coral;
cuido que lu quier llevar>

<  El mar. La mar.
      El mar.  Sólo la mar.  
      ¿Por qué me trajiste, padre, 
       a la ciudad?
       ¿Por qué me desenterraste
       del mar?
       En sueños la marejada
       me tira del corazón; 
       se lo quisiera llevar.
       Padre, ¿por qué me trajiste
      acá?  Gimiendo por ver el mar,
      un marinerito en tierra
      iza al aire este lamento:
      ¡Ay mi blusa marinera;
      siempre me la inflaba el viento
      al divisar la escollera!.
                                                 
         Sentíesmola, arrecendíesmola, suañávesmola..... Pero ye la primera vez que la vemos dende que salimos de Cenera. La mar. El mar.
Y foi asina, de reflundiu, d'escamplía, en seco. Al doblar una llomba y dende la solombra d'una abertura la viesca acolumbramos na llexura  una mancha azur sobro'l tapiz sinople del valle. Una ayalga pa la vista, un baltu pal corazón, una imax pa la retina imposible d'olvidar. El mar.

      " Énte nós estendíen unes praderes amplies, tierres nes que tuvo semao y recoyío la escanda".

 

         Y vamos baxando un poco. Y amira per onde, nuna casina perguapa aculumbramos nel xardín el blasón del Sporting de Xixón... Sí, esti cursu vamos xugar nel arrabal de la Sequnda; qué vamos facer... Ye namás p'acompañar a los nuesos vecinos d'Uviéu mientres nos recomponemos un poco. Va tiempu que nun esfrutamos d'un derby y yá toca. Nun hai partidu como esti... Nun hai nada, deportivo, que te ponga'l rixu más altu que'l visitar la capital remedando a Abd al Karim:
     - Güei quiero merendar carbayones en <De Blas>.
        << El Sporting de Xixón ye un club de fútbol inventáu al alborecer del sieglu pasáu, por 1905, siendo'l primer Presidente'l mio tocayu don Anselmo López Sánchez, que tamién valía pa entrenador; seique'l primer profesional foi l'austriacu Karl Orth. Anguaño'l presiedente ye'l discutíu Javier Fernández y el capitán el chalaneru Roberto Canella.

Encamentándonos a la Virxe de Peñafrancía (Deva)
col envís que nos dea suerte.
Mañana, güei, xugamos escontra l'Uviéu.
¡PUXA SPORTING!

                Tábemos col envís de buscar una semeya del Sporting, d'abenayá (¿pues apurrime tu una?) cuando.....
          Entrín y non d'espublizar esti post resulta que'l Sporting tien que xugar col Uviéu. ¡Ai, mamina!.
     Como la SANTINA ye de toos fuimos encamentanos a Nuestra Señora de Peñafrancia, que ye nuesa namás.
     Magar el ciñu que-y tenemos a la <Civitax episcopal >:" la mui noble, mui lleal, benemérita, invencible (esto tien arreglu), heróica y buena" ciudá  d'Uviéu....
       <<  Que Dios reparta suerte
        pero que los puntos pa en casa,
               con tol enfotu-ylo pido  
               a la Virxe Peñafrancia >>

                     
          L'Sporting ye un equipu que fai poesía nel tapiz sinople del Molinón - el más antiguu d'España - asitiáu nel Parque Sabel la Católica llevando un uniforme roh.iblancu con pantalón y medies azules.
La historia del Sporting tien un percorríu asemeyáu al paséu que tamos faciendo güei: xube y baxa, xube y baxa... Xugamos en Primera 42 temporaes y en Segunda 44; esta estadística hai qu'iguala darréu, esti cursu. Más p'abaxo enxamás tuviemos.
Yo tuvi la suerte d'acompañar l'equipu nes dos finales de Copa'l Rei que xugamos. Aquellos díes Quini y Xuanito sacaren lo peor de mí. Tamién facía piña cuando ganemos al Milán o al Torino na Copa la UEFA y cuando Ferrero volvía llucu a  Migueli... Y cuando-y metimos 4 al Madrid...  >>

<< -Voi pel <Camìn de Niria>
voi baxando pa Xelaz
al fondu veo  Baniuques
al pie mesmo de la mar.
¿Qué tendrá esta contorna
que m'atrae talo un imán?
¿Sedrá San Xurde d'Eres?
¿Sedrá acasu esti paisax?
¿Podrá'l fierro de Llumeres
 talamente ansí atrapar?
¿ O sedrá la historia d'amor
que ta a puntu d'acabar?
- Igual la rempuesta tienes
si llegues hasta'l final >>

   
   Y ente caseríos, tres salvar una Riega, aportamos al barriu de Cabañes, ún de los cuatro que conformen la parroquia d'Eres (Cabañes, Xelaz, Villanueva y Eres).  Lo normal ye siguir de frente pela GO-6 pa llegar a Xelaz pero sentímonos atrayíos por unes torres asitiaes metanes la llanera.
       Asina que disviamos a mandrecha camín de les atractives torres.
     - ¿Por qué nun vamos golifar un poco? Lluéu tornamos a la xeneral per aquella carreterina.
     - ¿Y por qué non?
     - Mira, esta otra carreterina va pa Nembro, onde...
     - ¡Eh!... Éso pa otru día. Yá veremos l'Albergue y la famosa ilesia.
   
         Dos de los turruxones tan xuntos, son ximielgos; l'otru, blancu, ta mui cerca pero nun fai xuegu con ellos y ye inclusive más bultable.

San Xurde d'Eres

 


        [ San Xurde d'Eres (San Jorge de Heres) ye una parroquia del conceyu de Gozón - Carta Puebla d'Alfonso X - con capital en Lluanco, a tres kilómetros. Ta embaxo la influyencia l'alfoz d'Avilés y el términu municipal del Cabu Peñes ya n'otros tiempos, cuando los nuesos mocinos percorrieren estes tierres, pol Castiellu de Gauzón. ¡Qué ganes tengo que lleguen a conclusiones los espertos n'eses escavaciones! ¡Cuánta historia tien de tener Raices!. Más p'allá d'Alfonso III...Yo toi convencíu que los romanos yá tuvieren ehí un belvedere.
        Tien Eres una ilesia moderna, d'estilu historicista y d'una nave con dos torres ximielgues nel frontispiciu de piedra qu'identifiquen el pueblu dende la llexura. De mano tenía la impresión de tar delantre l'alminar de Hixam invocando a la oración por mor los casquetes con que rematen. Pero tranquilos entá somos cristianos, dos cruces mui fines presiden dambes cúpules. Foi nesta ilesia cuando por mor d'unes igües nel XVIII se diere con una llápida romana que s'esmució misteriosamente, eso sí, darréu ser pintada pol canónigu Carlos González de Posada. ¿Sabes tu ónde ta?...

Ermita de La Lluz

       Quiciabes, falando pelegrinamente, sía más interesante una ermita mui cucia que ta cien metros  más p'allá: La Ermita de la Lluz, asitiada nuna cotariella a la vera la carretera. Una verxa de fierro permite facer un ruegu a la virxe, patrona de la capiella. Equí celébrase un desfile de carroces n'Abril].


    La torre blanca ye una Depuradora que pertenez a la empresa d'agües xestionada por Aquagest.  Al lláu ta l'Asociación del <Club Xuvenil Apolo> y bien cerca la escuelina del pueblu onde impartió maxisteriu la nuesa amiga Lola.
    Tres dar una vuelta al pueblu d'Eiras, como-y llamaben los romanos, comprobamos que yera tamién ricu n'horros y cases rurales, como en tola redolada.  N'Abril, tres la Pascua, celebren los vecinos una Selmana cultural, con teatru, conferencies, conciertos musicales, procesión, desfile de carroces... Son célebres les llectures del Quixote faciendo consonancia con Día del Llibru.
N'Eiras alcontóse una llápida romana nel XVIII qu'esapaecio tiempu depués. Quel dommage! 

< De Cabañes a Xelaz
cuatro pasos nada más >

        Pa esaniciar la señaldá fuimos tomar un vermú a "Casa Ferino", que pa eso ye tocayu de padre. Mira tu per onde vimos pela tele xugar al Sporting. Tábemos perdiendo. Nun ficimos que llegar y ¡gol!, empatamos. ¡Bien! Más contentos tiramos dica Xelaz, per Villanueva.
       Xelaz ye probable venga d'Agelaci.
Félix d'Agelaci yera un noble de la zona que s'enfocicó col Rei - haber hailos...- y foi desterráu teniendo qu'abellugase en tierres vikingues, pa que digan... Yá ves, aquellos bederres ficieren amigos cuando tuvieren per equí... Hailos buenos y malos en tolos llaos. Cuando'l rei lu condonó estableció n'Eiras -Eres - (¿ónde diba dir que meyor tuviera?) y yá d'equí pal cielu.

La ensenada de Bañugues
onde Pedro Picapiedra
venía bañar los bueyes.
(¿Primer poblamientu d'Asturies
yá nel Paleolíticu Antiguu?

       El cielu azul de Bañugues (baniucas= piletes onde fermentaben el pescao los romanos) ye como un imán, atrapa. Pasamos pel llugar de Cerín y tenemos cerca la cruz del campanariu la ilesia, ¿o ye un belvedere? . Yá nos llamare l'atención dende la llenxura, desque enfoquemos el mar, y ye que ta nuna llomba mui bien asitiada. La verdá ye que prometía muncho pero deceicionómos enforma cuando lu tuvimos delantre. La idea paez bona pero queda un poco sosu'l campanariu, como a mediu camín. Una pena porque foi un finxu nel que nos sofitamos desque amosamos la mar. Quitamos la pena nel "Bar Restaurante Peléz" (nun ye'l de Vioño) a ver si l'Sporting ameyoraba aquello... Ye que facía munchu calor, ho...

Les Cases de la Mina
El proteicionismu de Duro Felguera 

       Tamos nel barriu del Monte, na zona La Quintana. Un vecín que nos vio d'aquelles maneres salió a saludanos:.
     - ¿D'ónde venís?
     - De Xixón. Aparquemos en Susacasa y vamos camín de Viodo.
     - Pos mira, caláis a la xeneral y tornáis a manzorga. Al baxar veréis una Área recreativa, enriba la playa Llumeres. Lluéu baxar y xubir hasta Viodo.
     - ¿Hai manera d'escaecer la carretera xeneral del Cabu Peñes?
    - Podéis dir per Ferrero. Per equí detrás.
    - Ye que queremos pasar pela mina fierro.
    - ¡Ah!, entós xeneral, nun vos queda otra. Tien munchu tráficu y hai un cachu ensin cera, pero nun ye muncho.
    - Gracies, tendremos curiao. Esto que-y digo, ho... Les Cases de Mina ¿pue dicinos ónde tán?
    - Ehí mesmo, al par de la xeneral. Si vos asomáis pente la ilesia veisles perbién.
    - Gracies otra vuelta. Vamos echar una güeyada.
    - Esto que vos digo... Si baxáis al puertu la mina podéis xubir per una caleyina ensel  hasta algamar a Viodo. Pa vosotros ideal, con esa pinta pelegrinos que tenéis...
    - Gracies, señor, ye lo que somos, pelegrinos nel <Camìn de Niria>.
    - Por eso me caíeis bien, nun veis que yo trabayé trenta años en Xixón, d'eletricista nel Musel. Tenía un xefe, Xuaquín, de lo meyor...
          [ Les Cases de la Mina son un bloque de 64 viviendes construyíes por Duro Felguera pa los obreros de la Mina LLumeres mientres la dómina del Proteicionismu. Había que curiar los mineros; Llumeres llegó a producir el 40 % del fierro asturiano. Peslló en 1967. Lo que fuimos y lo que somos. ¿Sedremos quién a reinventanos?]

<ANAMORFOSIS>, monumentu a la mina y el mar;
 engalanando los "Apartamentos de Bañugues"
(  Maneiro Paredes )

          Tres compartir con nós tola vida llaboral arreamos a la cata la mina. Dexamos el Pueblo y llegamos a una plazoleta delantre los "Apartamentos de Bañugues" que tien un monumentu a "la Mina y el Mar" . Aprovechamos pa facer unes semeyes.
      Pasamos dellos bares restaurantes: "Casa Roces", "El Ponderoso" y "Casa Máximo"  y perdemos la cera cuando vemos una casona perguapa que tan iguando onde casa Pepe Varisto.
     Dexamos a mandrecha, un poco solitaria, "La Panadería" y damos una vuelta pela zona por si alcontramos una caleya pa baxar a la playa. Maxinamos que pa baxar a la mina dende les "Cases de la Mina" emplegaríen dalgún atayu. El casu ye que metiéndonos per detrás d'un petril, ente ocalitos y felechos, aportamos a un belvedere cuasi natural ....

<Salve, estrella de los mares.
De tu pueblo a los pesares
tu clemencia de consuelo>

    - ¡¿Qué ye ésto?!
    - ¡Qué panorámica!
        Les vistes dende esta atalaya son impresioantes. Al endefechu'l día préstase a ello. Quedamos ablucaos al contemplar cómo se mecen los azules del cielu y del mar...
    - Mira, un altarín...
    - Ye la Virxe del Carme, patrona los marineros.

     - El mirador, nun hai nome más apropiau, ye un monumentu a los marineros de Bañugues muertos na mar. Una fornina cola Virxe del Carme nel interior preside l'atalaya. Hai una placa colos nomes de los que nos abandonaren. Bancos y faroles tresnen un idílicu requexu d'amor. Nós tamién queremos formar parte d'esti homenax y fartucamos de tomar semeyes a cuala más prestosa.
          << Salve, estrella de los mares >>

Belvedere : Contorna del Cabu Peñes .
- Vamos, hai qu'arrancar.
- ¿Nun podemos quedar un cachín?

    - Vamos colar per equí, ésto tien bona pinta. Si pudiéremos calar a la mina per esta caleya... ¡Pero hai tal bayura vexetación!...

       De toes maneres intentámoslo. El camín de baxada ye ampliu pero a los pocos metros faise intransitable. Vese que l'abandonu llaró l'antigua sienda minera d'arbustos y d'artos. Con un pesar grande tenemos que tornar al tráficu de la carretera xeneral, camín del "Área Recreativa de Llumeres". Esta vegada nun tuvimos suerte pero'l tramu ye curtiu y, a vegaes, colamos pel arcén. Parada pa ferregüeyar. Allugamos col mapa topográficu delantre y facemos unes semeyes. Salen unes fotos de viciu. Unes mocines estranxeres pídennos que les inmortalicemos énte l'azul y verde que llinda los roqueros.

    - ¡Quedasteis planchaes!
    - ¡H.a, h.a, ha.!... - Y tanto que quedaron; cuido que nun s'enteraren de nada.

Llumeres: < La Mina y el Mar >, Bañugues.

     Descendemos pela sinuosa carretera hasta'l puertu de la mina. Ta mui abandonao; una pena, como tantes veces. Nos charquinos del suelu y hasta nes agües del mar brilla'l carmín del mineral - limonita, siderita o chamosita - que destaca sobro'l negru dominante.

[ La Mina de Llumeres asitada na parroquia de Bañugues del conceyu de Gozón foi, na primera mitá del sieglu XX, cabezalera d'Asturies no que cinca a la estraición de mineral de fierro. La esistencia d'esti mineral conocíenla perbién los romanos que yá lo llevaben pa Xixón, a la Campa Torres, onde había un castru cilúrnigu que se dedicó tola vida a la siderurxa: Los caldereros.
    - Sí, óyeslo bien. Los primeros siderúrxicos de la Villa Xovellanos nun fueren los de Morea, nin los d'Ensidesa, foron los caldereros de la Campa Torres qu'entamaron trabayando'l bronce (meceura de cobre ya estañu) y polo visto ficieren una reconversión cuando romanos pasando a trabayar el fierro. Yo creo que yá teníen conocimientos pa ello, asina como pa trabayar l'oru. Y ye que'l que val, val. Siéntome argullosu de ser un cilúrnigu adotivu al tener trabayao trenta años xusto nos rimeros del Cabu Torres. Alcordaránse bien los mios escolinos que se mazcaritaren de cilúnig@s n'Antroxu y tresnaren un belén remedando'l pobláu xiderúrxicu de La Campa. Pero esto ye otra historia que quiciabes daqué día m'atreva cuntar.

Mina de Llumeres hacia los entamos del XX. 
(Semaya tomada en MTI)

      - ¿Y cómo empencipió la cosa nos tiempos modernos?
      -  Nel sieglu XIX los llugareños entamaren sacar el mineral de forma rudimentaria llegando a comuñar en 1859 nuna compañía : "Sociedá Compañía Minera de Gozón" qu'esplotaba delles mines de la redolada.  Con poques perres pa invertir quedaren desfasos y terminó ancloyada por Duro Felguera que la remocicó dividiendo la fastera'l criaderu en cuatro estayes y construyendo un puertu pa llevar el mineral hasta Xixón, d'onde s'esportaba a Inglaterra o Alemania, y tamién a La Felguera, yá que nun había ferrocarril. En 1919 tamién construyó un cable aéreu pa llevar el carbón hasta la estación d' El Regueral - a 7 Km - que lo mandaba a los Fornos Altos de La Felguera.
     Tamién se puen apreciar los restos del castillete o sala d'estración d'un pozu vertical asina como de les oficines, almacenes y talleres, cases d'obreros y la boca mina a ras de playa. Del puertu queda la cadarma, les piqueres del cargaderu, que son quiciabes lo más llamatible, y a manzorga l'edificiu de clasificación ].
 

Caparina, gayola pala vista.

      Pos col alma na mina - padre trabayó tola vida en Pozu Carrio - abandonamos el fierro de Llumeres pa xubir ensel per una carreteina semada con tramos de formigón. Un par de caseríes y el ruxerrux d'una segadora llévennos a la cume, a la rasa. Paramos pa ferregüeyar l'entornu: Al sur quédanos el pueblu de Viodo, con cases bastante esperdigaes; al norte el Cantábricu dende la Punta Narvata (E) hasta El Castru o Pinfanero (W) y al este Llumeres, col puertu y la mina.

La rasa de Peñes.
Enfrente vemos la fana de la cala de Viodo.
- Curiao, nun cuerras, que pues 
degolar pelos cantiles.

     "Pasamos al galope al par d'una enguedeyada  fronda d'espinos y Onirio fizo seña pa que nos detuviéramos.
       - Nun podemos correr tanto. 
 Según les indicaciones del últimu llabriegu al qu'entrugare la mar taba bien cerca, a ringlón siguío de la tierra,  ensin barganales nin muries nin avisos.
       - Si siguimos a esta marcha podemos cayer pelos cantiles.
      Clodo espatarraba de risa pero Melendo afitó  nun-y faltar razón y que más valía ponese al trote, por si acasu..."

     Pa dir a la playa hai que baxar, claro. Una carreterina pindia y policroma por mor del verde'l felechu, el mariello les flores del toxu y el malva de los brezos déxanos nun rellanu cercanu a la Playa d'Arnielles. Paez increyible pero cásique tol brezu crez nes fasteres que dan pal oeste, a manzorga según baxamos.
     Llega un puntu nel que'l camín se biforca, hai que tomar determín. Miramos pel Topográficu y tamién el Maps, per internet.Vemos dos playes: A mandrecha  Arnielles y a manzorga Viodo. Tenemos alcontrao  informaciones estremaes, que les tracamundien o vienen a dicir que ye la mesma;  nós vamos comprobalo.

Aselando. Un sorbiatu na Riega de Barreo. 

     De momento tiramos a mandrecha siguiendo'l calce la Riega de Barreo. Ta un día buxu pero escomencipia abrir. L'agua baxa sele y claro asina que paramos a refrescanos nun remanse cristalín del regatu.
 Per un camín de tierra llegamos fácil a la Playa d'Arnielles. Tien un sable escuro y con xial abondo de tamañu mediu tirando pa grande. Del agua xurden roques per dayures, afilaes unes y arredondiaes otres ente les qu'apreciamos una boya colorá. Qué sitiu más afayaizu pa la pesca submarina;¡tien qu'haber unes chopes!... Hubo un tiempu en que nós tamién enredamos un poco embaxo l'agua. Enxamás pescamos nada pero descubrimos l'ablucante fermosura del mundu submarín. Si volviéremos a ñacer... ¿O tamos a tiempu?...
Arnielles paez una playa tranquila d'unos 160 m. de llargor y ente 10 y 15 m. d'anchor pero cuando-y da'l batiente val más que te pille viéndola dende l'altu los cantiles.
     Retornamos al puntu de cruce y tiramos dica la otra playa, al NW. Esti camín tien otru cantar, o meyor, otru pisar. La parienta empieza a reburdiar.

- Bueno, ¿baxex o qué?
- Si me traes una escalera...

     - ¿A qué nun pueo baxar? .
 Pa-su-en-te-pa-su damos con otru regatu. Mapa: Riega de la Cueva. Vamos tener suerte, cueva y too. L'agua cuerre pente la roca prieto  y...
    - ¡Yo d'equí nun paso!. Baxa tu si quies.
    - Bueno, vamos facer unes semeyes mientres camudes de paicer...
    - Como otra nun veas...
    - Mira, ¿ves aquella roca grande, aisllada, afuracada nun cabu?. Ye L'Asa. 
    - ¡ Les piedres tienen nome! . ¿Y aquelles otres un poco más alloñaes, tamién lu tienen?

L'Asa 

    - Diz equí que son Les Arriondes.
    - Mui guapo. ¿Dalgún nome más pal recuerdu?
    - Sí. El Picu que zarra la playa pel este ye "El Serréu" y allalantrones, pel oeste, ta El Castru.
    - Mira, yá tienes otra sida pa volver....
    - Nun me deas idees... Yo baxo, ¿y tu?.
          Baxé solu, claro.
         Ta pindio y resbarioso pero con-mun-chu-pro-cu-ru algamo a la Playa de Viodo. Ye más pequeña qu'Arnielles pero de regodón y sable enforma prieto con daqué llunar mariellu que recuerda'l color primixeniu.  Nun faigo que pisar el sable cuando se siente'l gazníu d'unes gaviotes.
    - ¡Eh!. ¿Nun dicíes que queríes retratar unes gaviotes?
    - ¿Vesles?
    - Non, siéntoles.  Pero tienes una nel roqueru; aquel que surde nel Serréu. Aprovecha.
        Mientres saco les semeyes vienme n'alcordanza aquel momentu nel que los nuesos mocinos arribaron al mar y vieron aquel páxuru desconocíu...

Gaviota patimariella, ferregüeyando l'entornu.
- Petezme pescao fresco.
- Toi viendo un pexe platiáu pela barriga...
- Pos gúei toca llubina.

        " Un estropel de páxaros blancos y buxos talo palombes y tan grandes como coríos esnaben p'enriba nueso. Enxamás tuviéremos visto gaviotes y paeciéronnos páxaros que se tuvieren vuelto llocos". 

         [ La gaviota patimariella ( Larus michahellis) ye una de les aves, xunto col algaraván (Numenius arquata) , el mazcatu* (Morus bassanus), el Pucagón  (Phalacrocorax carbo) o la Mavea (Falacrocorax aristotelis) dominantes nel Cabu Peñes. De les críes de toes elles alimenta'l Falcón pelegrín ( falco peregrinus), un carniceru depredador que cría nos requexos de la cuarcita armoricana onde pon los güevos ensin llegar a nialar. Esti nun pierde'l tiempu, ¿quién va come-y los güevos a él?. 
     La patimariella ye un ave charadiiforme qu'asienta sobremanera nes islles de la Herbosa y el Sabín, del Cabu Torres.  Tienen les palmípedes pates y el picu mariellos; la nuca, el papu, el pechu y la panza blancos siendo'l llombu gris y la cola enforma prieta. Come hasta los englayos ( "a dios per una pata"); lo mesmos pesca nel mar que na tierra pos ye omnívora: predadora, carroñera, detritívora y hasta basurera; qu'en cualisquier parte la ves comiendo'l garitu.

Pucagón acicalando.

     Ye un ave fiel, siempres cola mesma pareya. Ente los meses de marzo a Setiembre fai un nial grande con materiales diversos onde pon tres güevos de los que saldrán tres gaviotinos un mes más tarde. Al rodiu los cuarenta díes yá entamen a volar, pasu ente pasu].
* Al Mazcatu hai quien lu llama Alcatraz. 


        Sía como fuere a min prestóme a esgaya sentir los sos gazníos cuando nos averamos a la rasa Peñes y agora, ente los cantiles y el ruxerrux de les foles, entá más. Di un paséu pela playa. Dábame la xarabia na cara por mor de la brisa. Ferregüeyábalo too: cantiles, roquéu, xial,  páxaros y la ocla espardía pel sable. Buscaba la cueva. Alcontréla incrustada nel cantil que miraba la playa. Empobiné dica aquella llóbrega cueva... Un güinche ferrruñosu tráinos n'alcordanza los tiempos nos que se cargaba'l mineral en barcu pa llevalo hasta'l Musel d'onde se repartía per Asturies ya Europa.
         Torné a la playa. Senté nel sable y tuvi un cachu embebecíu nel ambiente. Quedé tresveláu recordando cómo foi l'alcuentru los nuesos mocinos.
            Dexáremos a Melendo, Clodo ya Onirio arribando al pueblu de Viodo, nel Cabu Peñes, nos rimeros del mundu...

¡APOTEOSIS!
Atapecía y el mar tornábase tresparente.
- Si fuese neñu prestábame pone-y Magilo.
- Nun sé... Nun me paez un home real...
- Tampoco'l mar lo paez, nin les gaviotes, 
nin tan siquier esti instante...
Entós besóme, achucó enriba mío ...

   

       "Alcontramos a Rigio y ensin mediar pallabra fundimos nun abrazu.
     - Ta nos cantiles, foi ver el mar... 
          Aquel llugar yera'l final de la tierra y nosotros los caberos humanos. 
     - ¡Niria!... ¡Niriaaaa!.... ¡Niriaaaaaa!
            Tornó la cabeza y foi aquél el meyor momentu la mio vida. Fuimos l'unu escontra l'otru. Abrazamos, y al abrazanos abrazamos el mundu col so mar y col so cielu; cola so tierra de roques y tapices verdes.
     - .....
     - Nun quería ser una estorbisa pa ti.    
     - ¿Esperes un fíu?
     - ¿Por eso vinisti?
     - Enteréme pel camín.  
     - ¿Y qué vamos facer?
     - Colar xuntos pa casa. 
          Tábemos sentaos nos rimeros del mundu viendo'l batir de les foles y siguiendo'l vuelu d'aquellos páxaros alloquecíos..."

<<Un ramín de mariselva
col que vos quiero brindar
por siguime nesta historia
dende'l principiu al final>>

       La historia d'amor nun fina, que va, acaba d'entamar... 
Los nuesos mocinos tornen pa Cenera y nós pa Xixón. 
Al ascender a la rasa, y movíu por aquel candial ambiente, avérome a un setu del camín y recueyo un ramín de mariselva que vos quiero dedicar a toos. Un abrazu y hasta siempre. 

      << Esta historia bien acaba
           y nun fizo qu'empezar
           que les histories d'amor
           prendíes van nel coral
          y caltiénense nel tiempu
          peronia y siempre, verás...>>

                                                  ************************

Hola, collacios. Soi Vettel.
Acabo de terminar el <Camìn Aniciáticu> y
 voi retornar al añiciu pela ventana del tiempu,
Cuido qu'a vosotros tamién vos apetez
¿a que sí?
Pos venga, nun lo allancièis más
¡Vamos recordar esta historia d'AMOR 
percorriendo otra vuelta'l <Camín de Niria>. 

       
    GRACIES A TOOS POR TAR EHÍ
. Al llibru " A la sombra de los abedules", autor, personax , llugares y pensamientos savia y cadarma del Camìn de Niria.
. A caduna de les persones que nos aidaren alcontrar el camín afayaizu.
. A la wikipedia y a tantos blogs como tenemos lleío.
. A les biblioteques onde consultemos", sobre manera "La Camocha".
. A los Ayuntamientos de los conceyos qu'atravesamos que nos iguaren les caleyes pa nun tener que pasar les penuries de los nuesos mocinos. A saber: Mieres, Uviéu, Llanera, Corvera y Gauzón.
. A <Asturnatura>, como siempre, onde consultamos davezu.
. A Bertu Ordiales y Guillermo C. Ruíz polos sos llibos de naturaleza, sobremanera: "Guía d'Árboles d'Asturies"; que llevamos siempre na mochila.
. A Chema: <Mi geoblog y algo más>, por facenos falar coles piedres.
. Al blog MTI, pola Mina de Llumeres y tantes otres, pos ye raru'l post nel que nun entramos.
. Hai un llibru que pretendo dar con él: "Criaderos de hierro de España", de L. Adaro y G. Junquera.
. Si daguién tien de tar nun llugar d'honor son los que m'acompañaron, m'aguantaron soportando la tortura les semeyes: Vettel, Rosa y Tabo y nun digamos la parienta, pilar visible d'esti blog.
. Espero agradecer daqué día a la xente de la A. Asperger A. colos que naguo por facer el <Camìn de Niria> en tres o cuatro díes siguíos. A fin de cuentes son la farda d'esti blog.

                          Si llegasti hasta equí bien pues adormecer col ruxerrux de les foles del mar, les mesmes qu'estremecieron a los nuesos mocinos...