N'alcordanza d'Alfonso Camín, el poeta d'Asturies
 |
| Camín del Castañar |
Alfonso Camín Meana (1890-1982) foi un escritor asturianu, natural de Roces (Xixón), que por amor a la tonada y a la poesía algamó a convertise nel <<Poeta d'Asturies>>. Poeta de base y periodista d'oficiu dexónos noveles llaraes d'imáxenes; llevaba la metáfora camuflada embaxo l'ala del sombreru.
Una
d'estes noveles ye l'historia d'una mocina, Petrina, <La Moza del
Castañar>. D'ambiente rural amuesa la vida daquella dómina, entamos
del sieglu XX, cuando reinaba Alfonso XIII y la emigración vieno a
convertise na salvación de munchos mozos. Tamién nos dexa ver la otra
cara de la moneda, esa odisea indiana que tresformare la vida de
tantes families, asturianes y foriates.
Lleímos esta historia con procuru y devoción - siempres lo facemos con Camín - y a cuenta d'ella queremos, n'asturianu, facer un exerciciu d'alcordanza de la memoria, remedar delles xeres daquella dómina que yá coló... Pero'l ser humanu ¡qué pocu cambió!
« LA MOZA del CASTAÑAR»
Abusando d’Alfonso Camín
 |
| El Castañar de La Perdiz. ¿Vamos a la gueta? |
«La Moza del Castañar» ye una novela del escritor de Roces, Alfonso Camín, qu’espublizare nel añu 1923 (Renacimientu), mientres moraba en Madrid (1914-36).
Tamos equí porque pretendemos facer una alcordanza al rodiu la mesma (Fonso, nun mos anatematices, yá sabes l’enfotu que te tenemos). La cacida qu’esperamos algamar va ser partiendo d’esti esquema:
1. DRAMATIS PERSONAE de «La Moza del Castañar»
2. RESUME de la novela: ARGUMENTU
3. CONSTESTUALIZACIÓN HISTÓRICA
3.1. El reináu d'Alfonso XIII. Roces
3.2. El suañu de la República.
3.3. Llugares históricos qu'aprucen na novela.
3.4. Personaxes históricos qu'analayen pela novela.
4. CULTURA ASTURIANA
 |
| Un maizal pel Camín de La Matona |
4.1- La ECONOMÍA de Roces : Agricultura- Ganadería ya Industria (Los Caleros. Les fábriques emerxentes ). La facienda.
4.2 - XERES TRADICIONALES. L’ANDECHA: La Esfoyaza – La sidra y el llagar. - El Magüestu (la gueta). La Yerba.
4.3. Les fiestes de pueblu. Les engarradielles.
4.4 - . Los XUEGOS TRADICIONALES : Bolos – Llave - Cucaña - Les boliches.
4.5.- La tonada
5. CURIOSIDAES:
Los refranes. Frases célebres. Toponimia.
6.- FLORA y FAUNA d’El Castañar.
7.- Un retratu d'Alfonso Camín.
:::::::::::::::::::::::::::::::
1.-DRAMATIS PERSONAE
 |
| <"Escena campasina" en Roces> (Manuel Medina) |
. Petrina, la <Moza del Castañar>. [¿Yera Lupe la de Pepón la musa de Camín?]. Una mocina d’unos venti años que vive xunto al Castañar de La Perdiz na parroquia de Rozales (Roces). Alta, guapa, xentil y modosina nun había otra rosa en Rozales que-y ficiere sombra. Ta comprometida con Celín de la Macorra, aspirante a indianu; ya espera por elli, ya espera ...
. Cecilio de la Macorra (Celín). Un rapaz de Vidiago con parientes en Rozales (Roces) onde pasa muncho tiempu. Ye’l noviu oficial de Petrina, la mocina d'El Castañar. Col envís de llibrar la guerra d’África cola d’emigrante pa L’Habana. Adiós Petrina, si te vi ....
. Nolón de la Cuesta [Pepón de L’Abadía], el pá de Petrina. D’aspirante a indianu vieno convertir en Republicanu románticu, federalista y antimonárquicu. Los sos ídolos yeren Pii y Margal y Castelar. Fuerte, altivu, idealista y noblón paecía ancláu na dómina de Larra o Espronceda .Testerón irreducible tenía hipotecada una granible facienda nel altu de la Braña. Casáu con Ángela yeren pas de Nolo y Alfredón, amás de Petrina.
Amigos: Paulino l’alpinista, Antón, El Cucu, Manín d’Antona, Cerón de la Braña (Rendueles), Pinón el Madreñeru, Pepe Sidro (chigreru). Claudio, el de Pumarín. Raúl de Claudia, (mascarón de proba). Xuacu, El Sinforosu.
. Antón, el criáu de Petrina. Puntu perimportante nel acaecer de la historia.
. Don Paulino, l’alpinista. Un emigrante aventureru, percorriere el mundu enteru, natural de Vidiago que terminó asitiando en Rozales (Roces). Padrín de Petrina y quiciabes dalgo más ....
. Teresina, casada, probe y xornalera. Tien dos fíos ya un maríu, que trabaya na cantera. Vecina de Nolón, vive embaxo la portiella. (¿Na casa de Fernandín, el güelu de Camín? Tien tola pinta. Un pinu que llegó a casa nuna boñica vien a delatala ....). Mira muncho por Petrina y ye la recadera de la casona del Castañar.
................
 |
| Ilesia de San Xulián de Roces |
. Don Ceferino, el cura de Roces. Don Ceferino Plaza Arias, pastor d'un rebañu, foi párrocu de Roces durante unos cincuenta años (¿1890-1939?) coincidiendo plenamente col reináu d'Alfonso XIII [(1886) 1902-1931]. Poro los fechos d'esta novela tán dientro del so pastoriáu. Yera un home integráu nel pueblu participando nos son deleres. Fuere amigu del Maestru col que compartía culete y mantel de tute nel chigre de Pepe Sidro. Cuando había asuntos graves solíen llamar al cura pa terciar ente les partes. Alfonso Camín teníalu en consideranza porque yera de los pocos que se decataba de les sos cualidaes (hasta de les buenes).
................................
 |
| Facienda, nel Altu del Castañar (La Perdiz) |
. Diego’l Mayorazu [Flor de Diego] .. Cacique del pueblu. Vecín de Nolón col que siempres andaba a la tema. Una fondiga estrema les sos finques (Entá se caltién la casa del Mayorazu, al pie los Depósitos). Tien por amigos a Perico, al Ranu, al Rixu y a Bernardón, el del Molín del Ranu. El cura don Ceferino. El conde la Colexata. El Pascualizu.
. El Ranu, el cosíu criáu del Mayorazu. Pequeñu y cuadráu tenía’l cuerpu enllenu puntaes. El mui rapiegu miraba torcío embaxo aquella boina calada hasta les ceyes y amosaba unos colmiellos de xabaril que completaba con dos manes talo cepes d’espín.
. Don Ulpiano, l’hipotecariu, amigu del Conde.
.........................
 |
| Vecín de Roces, en plena xera. |
Les vecines/os de Nolón y Petrina: Teresina, Cerón de la Braña (Rendueles), Xuan de Valiente, del Foru (l’Alcalde). El Mayorazu. Ramón de Vega. El de la Macorra. Prudencio la Riega. Lin de Pondal. El mélicu de pueblu, Perico Mau. Los Vega. Pinón, el madreñeru. Xuacu, el Sinforosu. Leandro, el Pascualizu. Sidro, el del chigre. Pascualón, el del estanco. Pepe Caleya. Rufo, el de la Portiella, un carlistón enfermizu. La Chocha. El Rixu.
..........................................
2.-ARGUMENTU : «La Moza del Castañar»
.... Ello yera una mocina persalada que vivía alloñada nuna aloyera parroquia del sur de Xixón, Rozales (Roces). Petrina yera la fía de Nolón y Anxela que moraben nun requexu del cielu conocíu como’l Castañar de La Perdiz. Nun vivíen solos, había dos hermanos – Nolo y Alfredón – amás d’Antón, el criáu y hasta l’aventureru Don Paulino podíemos dicir que yera de la casa, magar que fuere vecín. Nun escaezamos al Califa, el mastín; ún más a la hora d’andechar.
 |
| ¿La facienda de Nolón? |
Nos entamos daquella dómina, principios del sieglu XX, España ta gobernada por Alfonso XIII, un Borbón poco apropiáu pal cargu qu’exercía. Andaba más esmolecíu polo que les mines del norte d’África - y d'otros negocios ... - podíen ofrecéi que por caltener l'orde naquel país rural que nun supo aprovechar el momiu de les colonies - qu’andaben a sucu baxeru - pa ser una nación de puxu industrial.
El casu ye que mantener el poder nes colonies del norte d’África precisaba del sangre mozo de la península. A partir de los 15 años los adolescentes entraben en quintes pa sirvir al Rei :
.POEMA DE LA EMIGRACIÓN .......
Con gran dolor les families víense obligaes a dexar que los chavales emigraren haza América, pos entá teníen dalguna oportunidá; y hasta, con suerte a fargataes, podíen algamar a ricos indianos.
 |
| "Emigrantes"(Ventura A. Salas) |
Mentanto en Rozales la vida diba pasando amodo. La xente trabayaba’l campu, si lu teníen, otramiente quedába-yos el recursu de les bayuroses canteres de Roces y dalgún,«rara avis», que buscaba emplegu en dalguna de les fábriques qu’entamaben a xurdir nel conceyu de Xixón.
Nolón de la Cuesta y Diego’l Mayorazu yeren dos vecinos, cabezaleros y rivales, que siempre andaben a la tema por daqué vaca que cruciaba l’alambrada ...
Un día la parca crució pel Castañar y el fíu del Mayorazu, aspirante a la mano de Petrina, apaecío muertu ... ¡Adiós a les poques posibilidaes d’iguar aquel enguedeyu!
El tiempu pasaba. Petrina diba consumiendo la esperanza. Anxela buscó’l consuelu del Señor. Los hermanos escaecieron la casa materna. Nolón terminó perdiendo la facienda y coló d’esta vida esnalando nos sos quiméricos suaños republicanos. Petrina quedó al debalu y siguiendo los conseyos de Paulino, l’Alpinista, foi morar a Vidiagu a casa del so padrín, llevando consigo a Antón, el so fiel criáu. Na Cuesta del Castañar hai un silenciu perraru. Naide retruca al arrullu les palombes y hasta les andarines, qu’añeren nel corredor, anden desnortiaes.
 |
| Ídolu de "Peñatú" (Puertes de Vidiago) |
. Pasaren como unos diez años dende l’adiós del Musel. Petrina pasaba les tardes chisbando’l mar dende l’altu hasta la rocalla; suañaba con un veleru al mandu d’un arrechu pirata que la rescatare d’aquel estierru. Namás los bufones yeren capaces de baxala a l’arena.
Yera la fiesta de Santa Marina de Vidiago. Misa, procesión, pericotes, puya del ramu, bolos y sidra a mamplén. Hasta s’ofrecen corderos a la Virxe de los Mares. Más tarde foxtrots, schotis, habaneres, danzones y tangos.
- « Santa Marina que tienes
los güeyos como dos mares,
que’l mar nun lleve los mozos
que nacen cerca de Llanes»
Antón pierde’l culu en busca de Paulino:
- ¡Cecilio! ¡Cecilio!... ¡Ye él! ¡Ye él!
Petrina cuélgase d’Antón dando glayíos y darréu echa a correr cuesta arriba. La llamada a templanza de Paulino nun sirvió para nada. Yá tenemos a Petrina escolingando del señor de La Macorra:
-¡Cuántos años ensin vete!
- Sí, unos cuantos. – retrucó l’indianu ablucáu dafechu.
- ¿Quién ye esta rapaza? – entruga una moza que lleva una rapacina apegada a les sos faldes.
Don Paulino toma cartes nel asuntu y recomenda al Marrucu qu’abandone la fiesta.
Petrina nun pudo sollevar agraviu talu y volvióse lloca de remate. Perdíu l’aldu pasó a vivir n’estáu vexetativu.
.jpg) |
| "L'indianu" (E. Valle) |
- ¿Crees que Don Paulino, el románticu padrín de la neña, diba soportar aquella atomía?... ¿Y qué me dices del so fiel criáu, Antón, al que tol mundu viere esmucir de la fiesta con una mochila al llombu? ...
Nun pueo dicite más porque quiero que tu tamién participes de la fiesta ... Un abrazu, collaci@s. Hasta siempre.
(La solución pues atopala na Biblioteca “Alfonso Camín” de Roces)
::::::::::::::::::::::::::::::::::::::
3.- CONTESTUALIZACIÓN HISTÓRICA
3.1. LA DÓMINA D'ALFONSO XIII
Los fechos qu'ocurren nesta novela puen asitiase durante'l reináu d'Alfonso XIII [1886 (1902-1931)]. Alfonso de Borbón nació rei nel añu 1886 pero nun entamó a gobernar hasta 1902 cuando cumpliere los 16 años, siendo so madre María Cristina d'Habsburgo la que s'ocupare de les xeres de la Rexencia.
 |
| Alfonso XIII , al abellugu de so Madre |
Los acaecieres más sobresalientes del so reináu, no que cinca a esta novela, podemos resumilos d'esta miente:
1. La falta d'una verdadera clase política que representase a los grupos sociales. 2. El catalanismu. 3. La murnia situación económica de les clases populares. 4. Y sobre manera la guerra d'África.
1. L'alcuerdu tomáu por conservadores y lliberales pa dir turnando nel gobiernu nun algamó'l resultáu adebecíu: una verdadera democracia lliberal, y la cosa terminó na Dictadura de Primo de Rivera, que tampoco consiguió solucionar los problemes sustanciales del país, magar que contó con dellos apoyos de les clases dirixentes, inclusive de los obreros. Ello derivó nunes eleiciones xenerales qu'acarriaron la II República y provocaron la despidida del Rei. ¡Viva la República!.
2. El catalanismu, col so pruyimientu pola independencia, lleva dando guerra dende'l sieglu XVIII; col Borbón nun diba ser d'otra manera. ¡¿Hasta cuando, Cataluña?!.
3. España, nos albores del XX, siguía siendo un país subdesarrolláu tanto agrícola como industrialmente; al desastre del 98 siguió-y la Guerra d'África y caltener aquelles colonies desixó una sangría permanente de mozos qu'obligó emigrar a los rapacinos enantes d'entrar en quintes, a los 14 años.
Al endefechu'l nuesu escritor tien escrito un poema faciendo alcordanza d'aquel día qu'embarcó rumbu a Les Amériques.
«EMBARQUE »
Yá ente nube, gaviota y andolina,
quiciás pensáis qu’al tresponer la bardia,
na corrada muxó la vaca parda
y reburdió con pena la pollina.
Apertáis puños escontra la boina,
la salida la nao entarda;
hai que ser homes, el dolor nun tarda
y quier facese lloru na ñublina.
De Santander, Xixón y La Coruña,
embarcaos por tipos de garduña,
en pelotón andáis pel mar errantes.
¡ Ya la Torre d’ Hércules papuxa
viendo que, cada barcu d’emigrantes,
dexa ensin xente mozo a España!»
L'escritor de La Peñuca, Alfonso Camín, foi ún d'ellos asina como'l protagonista d'esta novela, Celín de la Macorra, que tuvo l'habilidá de convertir nun indianu perpotente (y prepotente).
Ye de resaltar qu'Asturies, y sobre manera Xixón, foi una de los provincies más puxantes no que cinca a la industrialización por mor del asoleyamientu de bayura de fábriques de productos estremaos. Y si facemos alcordanza....:
Duro Felguera (Pedro Duro), F. de LLoza (Rosal, Pola y Cía) , Tabacalera, Fierros del Cantábricu, Moreda, La Bohemia, Vidrios la Industria, Gijón Fabril, Talleres de Fundición y Maquinaria del Ferrocarril de Llangréu, Fábrica de Sidra Zarracina, Fábrica de Gas, Fábrica de Toneles Castrillón y Cía, Fábrica de Moreda y Xixón, Astilleros del Cantábrico (A.Cifuentes), Primera Central Llétrica de Xixón, Fábrica de Fariña Zarracina, Fábrica de Cerveza la Estrella, Azucrera Asturiana de Veriña, l’Algodonera de Xixón, Conserves La Gloria, Astilleros Riera y Cía, Astilleros Constructora Xixonesa, Mina La Camocha, La Sombrerera, La Cerillera, La Fábrica de Xabón (Llanu), Chicolateres, Conserves,… Suma y sigui...
 |
| Monumentu a la SIDRA |
Maldá: < A min la que me presta ye la Fábrica de vidriu La Industria (1880) qu'inventó - a partir d'un modelu inglés (black glass) - la célebre botellina de sidra que lleva como un cuartiyu (700 ml) y yá ye Patrimoniu de la Humanidá. ¡Viva la sidra!>
- Anselmo Cifuentes foi un grandísimu entamador: Cristalera, Fundición, Periodismu, Banca, Carbón... Pocos palos nun tocó.
Tamién hai de tener en cuenta les mines de carbón - les Cuenques y muncho más - qu'asiilaron una gran cantidá de xóvenes que nun alcontraben otra manera d'entrar na cadena productiva; el minifundiu del campu nun yera pa sorber más mano d'obra. ¡Viva los mineros!
 |
| <Mines de Figaredo> . Paulino Vicente |
En llugares como Roces el desendolcu de la industria trexo un aumentu pergrande d'una población que necesitaba sustentase; la zona rural yá nun produz namái pal auto-consumu, agora hai de producir p'abastecer a los obreros de los nuevos barrios - talo'l Bº de Nuestra Señora de Cuadonga - amás de los señoritos de la civitas. ¡Viva'l Mercáu del Sur!.
Otru de los barrios diferenciales de Roces foi (ye) el de Los Caleros. Unes viviendes de planta baxa asitiaes ente la carretera del Obispu y La Carbonera bien cerca d'unos afamaos caleros - Alexandrín tendría muncho que cuntanos - qu'abastecíen de piedra y cal a les numberoses obres que taben remaneciendo en Xixón, y en dellos sitios más.
......................
<< CURIOSIDÁ: En 1902 Alfonso XIII cumple 16 años y pasa a tomar les riendes del Gobiernu. Yá ye Rei dafechu, acabóse la rexencia de so madre. De mano lo que fai ye visitar el norte d'España ( somos el Principáu d'Asturies) siendo Xixón el primeru d'esos puntos.
Nel Institutu Xovellanos de Xixón tien llugar una receición onde'l cativu Rei va facer entrega d'unos premios a los guah.es de les 23 parroquies del Conceyu, y Roces va ser una d'elles. Llévanos el Maestru pel ramal carretera Carbonera abaxo hasta algamar el Institutu de la Villa, tres pasar la Cuchera y el célebre horru de Narres.
 |
| - ¡Pan con sardina! |
- Escuela de Roces. ¡Alfonso Camín Meana!. Salude al Rei.
Quedo mirando p'aquel rizosu llarguiletu de mirada inocente (¡qué poco te duró!) qu'ensayando una sorrisa apúrreme una enciclopedia de Naturaleza y Xeografía amás d'una moneda d'un centén. La primera que veo na vida, y ¡qué poco me duró! ... Pasamos a tomar la parva na compañía real. Sardina con pan, o pan con chorizu yera la llacuada que nos teníen preparada.
- A mi me ha tocado'l pan con chorizo, ¿hai alguien que me lo quiera cambiar?. A mi me gusta más la sardina - entruga l'aspirante a "Rei simpáticu".
Como naide nun retruca y yo, que nun cataba chorizu nin pa San Xulián, llevanto la mano ya empobino la mirada dica aquella varina llarada de botones doraos :
- A min préstame más el chorizu, maxestá.
Cola música de la Marcha Real el Rei tira pa Uviéu y nosotros pa La Cuesta del Castañar. Cuido que salimos ganando ...
- ¡ Viva'l Rei! >> ...........................................
3.2 .- LLUGARES HISTÓRICOS
Hai dellos llugares percélebres que s'asoleyen na novela, la mayoría entá esisten n'actualidá magar qu'otros yá son parte del mancomún popular.
 |
| "Les Tiendes del Aire" |
1. « Les tiendes del aire» (Xixón).- 2. La Pescadería (X) .- 3. La Plaza'l Sur (X) .- 4. L’ídolu de Peña Tu (Vidiago).- 5. La Puerta'l Sol (Xixón) .- 6. La Cai Corrida (X) .- 7. La Carretera Carbonera.- 8. Puerta La Villa.- 9. El Llanu .- 10. Ciares .- 11. Playa de San Llorienzu.- 12. La Tabacalera. 13.- La Cuchera del Llanu (Xixón). 14.- L'Horru de Narres (LLanu).-
3.3 - PERSONAXES HISTÓRICOS RELEVANTES
Son numberosos PERSONAXES RELEVANTES – reales o ficticios - qu'aprucen na novela :
Don Alfonso Camín tamién fai referencia na novela a estos reconocíos personaxes, lo que nun fae otro qu'amosar la importante cultura que llogró algamar:
1.Reales: Conde la Colexata (Revillaxixéu).- Republicanos: Castelar (1832-1899). Pii Margall (1824.1901). Salmerón (1837-1908). Juan Prim (1814-1870) -Maura (1853-1925), conservador. Vázquez Mella (1861-1928), carlista. Conde de Benavente. Duque de Rivas. Alfonso XII . Alfonso XIII. El Gran Capitán. Xovellanos. Xulio Verne. Rei Favila. El Cid. Emperador Maximiliano. Coello. Vicente López. Manuel Medina. Larra. Espronceda. Tiziano.
2. Novelescos: Cyrano de Bergerac. Don Xuan Tenoriu. Don Álvaro. Otelo. Pierrot. El Quixote. La Celestina. Sísifo.
3.4 EL SUAÑU de la REPÚBLICA
<< Nolón quedábase atrás lleendo la Prensa, El Noroeste. Castelar y Pii Margal yeren los sos ídolos (Nun tuviere nacío Quini).
<Alegoría de la República: Tomás Pradó>
... En 1868 tres la revolución de la Gloriosa, encabezada polos lliberales Topete, Prim y Serrano, produzse la caída de Sabel II y el país entra no que se conoz como el <Sexeniu Democráticu>:
Seis años dando palos de ciegu: Un gobiernu provisional qu'alcuentra un rei nel italianu Amadeo de Saboya :
- ¡Rei sí, pero Borbón non! - glayen los diputaos.
El probe intentólo pero nun aguantó nin dos años:
- Mirái que vos digo, chatinos; con vosotros nun s'acampa nin el Tato.¡Ciao!.
Y por fin la PRIMERA REPÚBLICA ... Bueno, ¡dos!; primero una República federal (nun tamos preparaos pa ello, yá lo barruntaba l'italianu) y darréu una república unitaria (¡nun fastidies!) más conocida como la "Dictadura de Serrano"...
El golpe 'Estáu de Pavía y el pronunciamientu del xeneral Martínez Campos dio pasu a la restauración borbónica (1874); vamos que quitamos a la Reina pero como nun podemos vivir ensin la proteición divina buscamos otru del mesmu palu:
- Mira qué te digo,chachu; val más lo malo conocío .... ¿Por qué nun traemos un Borbón tienrín y que vaya mamando'l lliberalismu? ....
- Nun sé que te digo, monín; yá lo intentamos cola güela y yá ves cómo acabó ...
- Esti rapaz ta muncho más preparáu, tien estudios y yá vio lo que pasa per Europa ...
- Nun sé... Tien 17 añinos...
En 1874 pónense d'alcuerdu pa nomar rei al fíu de Sabel II; el mocín Alfonso XII.
- Esto que te digo, ne; a so madre que nin se-y ocurra asomar el focicu per equí, ¿eh?. (¿Estos revolucionarios nunca nun tuvieron una madre? ...).
Con Alfonso XII hebo cierta tranquilidá. Educáu en París yera conocedor de los diversos sistemes de gobiernu que había n'Europa ya instauró una monarquía constitucional.. Preparáu, intelixente y xenerosu foi amáu pol pueblu y respetáu polos políticos. Pero'l bragueteru impenitente agarró la tuberculosis y el suañu tien durao poco más qu'un carambelu a la puerte d'un colexu. Once años escasos y volvemos a les andaes...
Toma'l mandu la Rexente Mª Cristina Habsburgo-Lorena, so madre, que nun lo fai del too mal no que cinca al desendolcu de les polítiques lliberales que frenen los pronunciamientos militares. Sicasí qu'esos 16 años d'espera (1885-1902) pol so fíu Alfonso XIII foron una dómina bien alloriante pa España:
Perdemos les colonies americanes (turnu de Sagasta), aprucen los esmolecientes rexonalismos y nacionalismos y xurde un movimientu obreru bien organizáu que va acarriar munches revueltes, amás d'aporfiar tanto'l carlismu como'l REPUBLICANISMU, que nun taba muertu, namás dormíu ....
 |
| Cánovas y Sagasta compartiendo'l pastel. |
Magar el Pautu del Pardo pol que van turnando nel poder conservadores (Cánovas) y Lliberales (Sagasta) , per aciu d'unes eleiciones "amañaes". Durante un tiempu esti sistema consiguió contener, bueno ..., los graves problemes que se taben cociendo: La independencia de les colonies americanes y el despertar de les tribes marroquines, l'independentismu internu y l'asociacionismu de la emerxente clas obrera. Y hasta'l carlismu siguía dando guerra. En fin, que lo de "quita, qu'agora tócame a min" nun ye una verdadera democracia, tien d'haber llibertá de partíos políticos que recueyan toles opciones posibles.
En 1902 al cumplir Alfonso los 16, tómase'l determín de que sía él mesmu'l que s'asuma les xeres de Xefe d'Estáu. Otru cativín, malpenes preparáu. ¡Probe España!. A la tema con Francia por mor del protectoráu de Marruecos y driblando con Inglaterra y Alemania:
. 1904 , Conveniu hispano-francés por mor de Marruecos. 1905, el Kaiser desembarca en Tánger. 1906, Conferencia d'Algeciras. 1907, follones en Casablanca. 1909, añu tráxicu por mor de la Guerra de Melilla que produxo la escabichina del Barrancu del Llobu y la Selmana Tráxica de Barcelona (-Los reservistes nun queremos dir a la guerra: ¡Güelga xeneral!).
En 1912-13 róblase'l Tratáu creando'l Protectoráu de Marruecos con capital en Tánger. ¿Pacificao?... Les tribes rifeñes (del Rif) comandaes por Abd el-Krim nun taben d'alcuerdu, queríen la independencia, y diéronnos como "panzorro" nel "Desastre d'Annual" (1921).
 | |
| < Protectoráu español en Marruecos> (Wp) |
Tuvo de llegar Primo de Rivera pa poner aquello n'orde. ( Volvemos a les andaes, nun sabemos vivir ensin el llátigu). El xeneral, d'alcuerdu col Rei Alfonso, da un Güelpe d'Estáu (1923) ya impón una Dictadura que llega hasta 1930. Hai dellos avances pero a los inadomables españoles la tuérdiga nun mos presta un res .
Dictadura. Dictablanda. Eleiciones Xenerales. 2ª REPÚBLICA (¡Por fin! Adiós, don Alfonso. Cámbiote'l chorizu pola sardina....). Revolución d'Asturies (1934). . . Guerra Civil (1936-39). Dictadura franquista, 40 años... Y siguimos vivos.
. Ye de reseñar que'l Rei ta dafechu envolubráu nos negocios del Protectoráu. Si hai que mandar guah.es o reservistes a Marruecos ¿cuálu ye'l problema?.. Escribe Alfonso Camín en La Moza del Castañar :
<< Los trés hermanos varones corrieron peor suerte que don Paulo. El primeru tuviere muerto sirviendo al Rei nos campos de Cuba. Nun quixo que los otros corrieren la mesma suerte. Entamaba la Guerra de Marruecos (1909). La mocedá española diba camín del "Barrancu del Llobu", que dalgo más tarde tendría l'epílogu del "Desastre d'Annual" (1921) . Y el remate de "Tizzi-Assa" (1923). >>
Bueno, yá sabemos que la espuela púnxola Primo, bueno ... Lo que ye seguro que munchos de los nuesos rapazos emigraron p'América cola fin de recatiar una muerte casi segura. Celín de la Macorra, ún d'ellos. ¡Qué mal-y asentaron les perres! . Bueno, esto ye cosa de novela... NEGRA.
Nolón de La Braña, el de la Cueta del Castañar, yera un home cenciellu que tuviere emigrao a Cuba y magar nun algamare a indianu forráu vio'l mundu suficiente pa comprender que los homes tienen la capacidá de poder gobernase por si mesmos ensin depender de mesíes dalu, nómese Rei o Ilesia. Yera un republicanu románticu convencíu, la guerra nun diba pa con él. Los sos tótem yeren los políticos cabezaleros de la 1ª República (la 2ª R nun llegó a vela), sobre manera Pii Margal y Castelar.
 |
| ¡¡ Viva la República !! (La 1ª R) |
. Francisco Pii y Margall , republicanu federalista y antimonárquicu dafechu, foi'l segundu Presidente del Executivu durante la 1ª República, tres Figueras. Como nun hai peor cuña que la de mesma madera viose obligáu a dimitir por mor de los federalistes intransixentes del Cantón de Cartaxena:
- ¡Equí nun va nin Dios pela so cuenta. Primero la Constitución y darréu les nacionalidaes! .
. Emilio Castelar, foi un republicanu unitariu - antifederalista - y conservador que col "picu d'oru" que lu carauterizaba yera capaz de convencer hasta el mesmísimu Nolón del Castañar. Priorizaba l'orde, polo civil o criminal, a les reformes sociales. Los sensibles españoles mónten-y la barrila y ... A lo de siempre, Xeneral Martínez Campos (esti dormía abrazáu al sable) ya otra cosa, mariposa: El Borbón de turnu, Alfonso XII.
.............
 |
| Polo menos son ¡GUAP@S! |
NOTA D'ACTUALIDÁ: L'Eméritu nun ye que lo ficiere del too mal como Rei, trexo la democracia que nun ye poca cosa. Pero la vida privada y la peseta exiliada nun son del preste de los españoles. Meyor cartel tien l'actual Xefe del Estáu, Felipe VI, qu'asemeya al taragüelu neso d'arimar al pueblu.
Vamos tener qu'esperar un poco pola TERCERA REPÚBLICA, esa fardela onde cabe casi too ... Mentanto vamos siguir suañando ... Si a Trump y Cía nun se-yos ocurre otra cosa ... ¿Tornamos dica los imperialismos? ....¡¡¡NON !!!
:::::::::::::::::::::::::::::::::::::::
4.- CULTURA ASTURIANA
4.1- ECONOMÍA
Na dómina na que se desendolca esta novela, primer terciu del sieglu XX, la economía de Roces podíemos encaxala nesti cativu esquema:
 |
| <- Nun recibieron los lladríos del Califa amarráu a la panera > |
. La facienda : La casona llabradora. El llagar . Horru y panera. La corrada. La cuadra: Ganáu. La Yerba
. La Pumarada... El güertu. Los aperios del campu. El Carru.
. Caleros y Canteres de Roces. Les principales fábriques de Xixón.
. El menú diariu: Díes de fiesta. Na urbe. La gueta.
Nos entamos del sieglu XX la Agricultura y la Ganadería yeren los mediu económicos más importantes de la población rural de Xixón. Otru de los recursos cabezaleros de la xente aldeano yeren les canteres y los caleros que, por suerte, abondaben en Roces. La industria, en xeneral, diba espoxigando y taba a piques d'algamar un desendolcu bien floreciente nel conceyu de Xixón.
 |
| <Taba la vaca pinta mamando'l xatu> |
La Agricultura y Ganadería taben basaes en la Facienda. Alfonso Camín descríbenos bien lo que yera una facienda tipu bien bayurosa. Una casona pergrande de planta y pisu onde nun pue faltar el corredor al que s'algama al traviés d'un salón. Horru y/o panera onde se guarda la collecha y se seca'l granu, básicamente'l maíz, tamién algo trigu ya escanda. El llagar onde se tresna la sidra de la mazana que se recueye nuna pimpanuda pumarada na que ta asitiada la casona. << Casona, panera, cuadra y llagar son los heraldos rurales que nos falen del bienestar nes aldees d'Asturies>>. Quien tien estos finxos de xuru que nun-y falten ocho o diez vaques, una pareya toros, dos o trés nuvielles, dellos xatos ya una yegua col so potru. Embaxo l'horru llucen un par de carros pa les xeres agrícoles como carriar la yerba y arar los campos y quiciabes una xarré pa baxar a la Villa, munches veces pa dir vender al Mercáu del Sur los productos de la güerta. El complementu suel ser una castañéu yá una mata p'algamar rozu con qué mullir les vaques o cotolles pa prender el fornu.
 |
| Paciendo al pie la Fonte La Braña |
La fauna de la facienda, amás del vacunu, completábase sobre too cola matanza del gochu; daqué absolutamente imprescindible: xamones, llacones, chorizos, vísceres, ... < Un gochu nun tien desperdiciu>. [Los gochos d'El Carniceru bañábense nel charcón de La Braña] .
Nun podíen faltar les pites, los güevos valen pa too... El que podía tenía un rebañín d'oveyes, merines o xaldes, que dan lleche y llana pa los colchones ... Los xergones de fueya de panoya meten munchu ruíu ... Los coneyos dan una carne bien dixestivo (díxolo Zapatero). Pa muncha xente la caza, sobre tou d'aves, nun dexaba de ser tamién un complementu, amás d'una añacea. Les perdices y falpayares (parpayueles) taben mui apreciaes. La roblera del llanu La Braña y los castañares de La Perdiz yeren un paraísu avícola, onde veníen en manaes los babayos de la Villa a fardar d'escopeta y traxe de lluces ... Los probes aldeanos nun gorgutiaben, nunca nun se sabía los maleficios que podíen venir de la villa ...
Yera bien frecuente que nes tardes los domingos los señorones de Xixón visitaren los llagares de les faciendes de Roces (y d'otres parroquies tamién, qu'estos nun tienen tarrata); igual pensaben que tou aquel maná venía del cielu ensin pasar peles manes del home. Y si los brindabes con truches del Ríu La Braña o percebes del roqueru nun sabes lo que podíen llegar a prometete ...
- ¡Quita la espita a esti tonel, Cerón, qu'esta pipa yá nun gotia ... !
4.2- ANDECHES TRADICIONALES
Había delles xeres tradicionales n’Asturies que yera preciso trabayales n’andecha, ye dicir el pueblu en comuña, porque son mui abegoses pa poder faceles, en tiempu, una familia sola. La << sestaferia>> ye una d'eses xeres que precisa del trabayu en comuña, por exemplu, pa iguar una caleya ye necesario que ca casa aporte un miembru, polo menos.
Una de les xeres más célebre na que se precisa el trabayu en comuña ye la «esfoyaza» que consiste en esfoyar les panoyes y facer riestres pa dexales secar albentestate colgaes nos corredores de los horros.
4.2.1 .- < La esfoyaza >
¿Qué vos paez si pa entrar en farina siguimos tres los pasos del autor?
 |
| < La esfoyaza> (www.turismoasturias.es) |
«Había esfoyaza en casa Cerón. La cabera. La del Ramu. Aquella na que dan castañes cocíes ya en “corbata”, afumiando naquel paxu de blimes asitiáu metanes la esfoyaza, darréu de terminar la xera de esfoyar ya enrestrar les panoyes y colgales nunos clavos que s’afayen nel horru; yera’l momentu d’amosar el puxu de los mozos col gabitu dalgún guaḥe asemeyando esi instante (la imaxe) al ritu de la misa cuando’l cura llevanta’l cáliz y el molacín la casulla del ufiertante, un ritu sagráu.
Cuasi que toes les families de Rozaes (Roces) taben presentes na esfoyaza d’aquel socarrón de Cerón, un home qu’aconceyaba. Vieyes mexapiles. Beates candiales. Cincuentones bilordieres. Moces guapes y casaderes. Fuertes y revolvines. Mozos arrechos de boina terciada, pitu na oreya y recia cayada de roble o texu. Homes yá fechos, cuadraos y zorramplones, arteros y amables, qu’espetaben a les moces epigrames bien picantes. Cuentos nos que l’amor solía terminar en cortexu y salir en camisa pela ventana colos calzones en puñu:
«Fuime cortexar a Fanu,
a casa de La Temprana.
 |
| <La esfoyaza>. Oleu d' Emilio Buergo |
Por munchu que madrugué
amanecióme na cama»
. Bilordios a mamplén mentanto agoniza la lluz del candil.
Les vieyes qu’aconceyen, les moces que tomen asientu en mediu’l montón de panoyes y los mozos detrás pa esfoyar panoyes y madrigales. Los vieyos en tayueles forrando los pies con escarpinos; homes d’una pieza, tipos de raza a los que’l reuma nun pudo allivialos de la retranca:
- Nun soi pa quitar la fueya a esta panoya .
- Peor ye lo de Nolón. Dicen que quien quita-y la facienda.
- Sí. Pa dá-yla al fíu del Mayorazu qu’anda buscando moza.
- Mordedura d'escorpión, nun espera confesión.
- Mordedura sacavera nun espera prender la vela.
- ¡Rei! ¡Rei! ¡Rei! ...
- Y vaya barbes que tien...
- Y los granos bien coloraos ...
- Esti añu vas casate, mocina.
Siéntese un cantarín que vien de la cai...
«En casa del señor cura
nun se vio mas qu’una cama,
si na cama duerme’l cura
¿ónde, coime, duerme l’ama ?»
- ¿Llego a tiempu pal ramu?
- ¿A eso vienes, llambión! ¿Por qué nun vinisti a esfoyar?
- Pero llego a tiempu pa la sidra, ¿eh, Cerón? ¿Ta bueno?
- Ta de viciu, yá lo sabes.
. La fiesta terminó a eso del alba. Los mozos colgaron les riestres que quedaben. Hebo castañes a mamplén. Sidra a pastu. Xugóse al zurrón ente la fueya de la esbilla chiscando de gritos de moces, carcaxaes de zorramplones, sorrises de vieyos y plasmu de vieyes hipócrites qu’olivaben por tiempos pasaos ...
Yera eso del amanecerín cuando la xente diba esparciendo, pasu ente pasu, peles caleyes de Roces ..... Na Cuesta del Castañar sonó un tiru...
...........................................
4.2.2 .- LA GUETA. El magüestu
Naquella dómina decimonónica la castaña podía considerase un alimentu básicu pa muncha xente. Cocíes o asaes al fornu, o meyor na cocina lleña, yeren una cena mui corriente na zona rural d'Asturies; eso sí, casi siempre acompangaes con lleche. Si había muncha collecha podíes dexales secar hasta faceles <mayuques>, asina durábente más tiempu.
Los castañeos yeren un bien mui preciáu naquellos y ¿nestos? tiempos. En Roces había daquella unos cuantos castañeos; munchos yeren los vecinos que teníen más d'unu: Nolón, El Mayorazu, Pin de Pondal, Xuan de Valiente, Cerón de La Braña, los Vega, Manín d'Antona .... Tamién los había comunales, como'l del campu La Perdiz . Vamos acercanos al poeta La Peñuca:
Soplaba un vientu suave y calientín, yera "l'aire les castañes".
<< Lo primero en que cavilgó foi dir <a la gueta> al campu La Perdiz. Lo mesmo pensaren otres muyerines que, dende'l centru de Rozales, empobinaren per caleyes y caminos travesando la esmeralda pradería de La Braña hasta algamar el castañéu de La Perdiz. Llevaben recoyíos los mandiles a la cintura talo una faltriquera o bien una fardela blanca na mano.
 |
| <Tresnando'l magüestu> |
Mañana de gueta nos iviernos d'Asturies.Gayola nes families probes que nun teníen la suerte d'haber un castañéu propiu. Los castaños que crecen en campu común son del dueñu de la facienda vecina, dalgún bisagüelu que lu tuviere plantao. Cuando tán nel so apoxéu ye l'amu'l que les prinda. Pero ... Les castañes que caen enantes por mor de la lluvia o'l vientu pertenecen al dominiu públicu. ¡Ye la hora de los probes que tamién aprovechen les que caen nos caminos!. Los propietarios guárdenles en cuerries - zarros circulares de piedra - pa dir más tarde esbillando los oricios. Magostar al fueu les castañes en cantimplores llaraes de furacos, o a "pelu gochu", ye un preste propiu de los dioses . >>
- ¿Facemos un magüestu agora que hai sidra a esgaya ? ....
- ¡Quieto parao! ... ¡ Los neños con lleche!
NOTA: Los castaños plantaos en tarrén comunal yeren consideraos como un inmueble, pozonera, poles poces que se facíen pa plantar.
-¡ Esti ye de mio! . Y de los mios fíos ...
..........................
.jpg) |
| < Atropando > N. Piñole |
4.2.3 .- La llaboración de la SIDRA y la recoyida de la YERBA son dos de les actividaes que tien de facese n'ANDECHA.
L'arreglu de los CAMINOS yera otra de les xeres comunitaries que precisaben d'una SESTAFERIA; ún o dos vecinos por ca casa.
...............................
4.3 - LES FIESTES
Les FIESTES de Roces: Les engarradielles. L’Asunción (La Sacramental) que vien celebrase n'Agostu... San Xulián de Roces, el patronu, en Xineru. Nuestra Señora del Rosariu, la patrona, n' Ochobre.
<Díes de llacuada a base de fabada con llacón de casa yá un insuperable arroz con llechi, requemao y con sabor a canela.>
 |
| Procesión en Roces |
<Yera'l día de la Patrona, Nuestra Señora del Rosariu. Tronaben les vieyes campanes de la ilesia. Cuatro mozos con la virxe en procesión alredor de la ilesia. Don Ceferino, impolutu, repartiendo inciensu ente los himnos del xentíu y precedíu por dellos candes molacinos . Los voladores de Pinón que rescamplaben desafiantes nes parroquies vecines.
El campu romeru de La Carbayera taba nel so apoxéu. Sonaba la gaita al fondu les barraques. Repicaba'l tambor al son de la Danza Prima. La sidra espalmaba nos vasos tres un xeométricu percorríu, anunciu de bonos bebedores. Sonaba la tonada na garganta de los xóvenes romeros. Los mozos boina calada, botes de puntera, pantalón abotináu, chaquetina curtia y camisa endomingada remanecen sofitaos en fuertes bordones d'arguma o carrascu faciendo corru, altaneros, alredor del baille de les moces.
- ¡Ixuxú!
- ¡Viva la Soberana!
 |
| "A garrotazos".Goya yera sabedor de lo qu'asocedía n'Asturies |
Queda rota <La Praviana> col ruíu de les ablaneres y el chirriar de les <albaceteñes>. Saltos p'alantre y p'atrás. Mozos encrespaos talo gallos d'engarrada. Ye un gallardón llevar un repulgu na cara fechu por una de siete muelles. De sópitu resplandecen los sables mientres s'esmuz el brillu les navayes. Dos pareyes de tricornios fáense los amos de la fiesta. Saquen a Alfredón d'ente les pates d'un caballu ... El Ranu nun anda meyor paráu ...
Nun hai romería bona si nun acaba a navayazos. ¿Y la farda? ... La sorrisa d'una moza. El refugu d'un vasu sidra. Los rancores de los pueblos. Indireutes socarrones .... Un cayáu que se ximielga ... El chirríu d'unos muelles y ... ¡Yá ta armada la Soberana!. Menos mal que los cuarteles tienen cabida a esgaya...
................................................
. 4.5 - LA TONADA
La tonada ye ún de los enfotos na vida de Camín. De mozacu siempre diba cantando pelos caminos; yera como un reclamu pa les moces de la contorna que yá lu conocíen y aprovechaben pa picar un poco aquel naciente galán. Nesta novela amuésalo bien a les clares aprovechando cualesquier coxuntura afayadiza p'asonsañar una calandria.
 |
| "La tonada" (Manuel Medina, el pintor de Roces) |
1. «Carretera Carbonera ...
¡ Cuántu te tengo pasiáu;
pero más te pasiaría
si nun fuere de saldáu!»
2. «Madurinos y azules,
nel mio güertu,
toos enllenos d’orbayu,
vi dos cirigüelos
y amosé-ylos a mio madre
pa que viera
los güeyinos la so nuera»
3. « Anda diciendo to madre
que tu la reina mereces,
Yo la reina nun lo soi ...
Nun quiero que me cortexes»
4. « Anda neña y compónte:
voime mañana ,
nun barcu de vela
haza l’Habana.
¡ Nun barcu de vela
fechu de tabla!
5.- « Gloriosa Santa Marina,
que tas al pie de Mañanga,
onde acuden los pastores
cuando baxen de La Braña»
6.- « Yá va cayendo la tarde,
yá dan sombra los macones.
Yá s’atristayen los amos
Yá aloyen los coyerones>>
7.- <<¡Tanto esperar y esperar,
y que s'avere la nueche
sin ver la so vela nel mar! >>
.......................
4.5 - XUEGOS TRADICIONALES
 |
| "La cuatreada" |
.. Les caniques (les boliches) . Los bolos. La cucaña. La llave.
A) < Sentada nel prau, xugaba a les caniques. Petrina, mocina a piques de ser muyer, más que nes boliches pensaba nel rapaz >
B) << Los mozos tirando les sos chaquetes en prau pónense a xugar a los bolos (Bolu Palma nel oriente d'Asturies).
- ¿Raya en palu?
- Val. ¿Y qué se xuega?
- La cerveza.
- D'eso nada. Si nun hai sidra yo nun xuego.
- Acuéi. Venga, un par de botelles.
- Dame la risa. Somos venti; asina que venti botelles.
- ¡Emboque!
Y asina toles tardes, hasta que llegaba'l tren. >>
C) << Depués tendríemos fiesta, baille y música na bolera d'arriba.... Tamién diba haber grandes partíes de bolos. Palu ensebáu (cucaña). Fueos artificiales. >>
5.- CURIOSIDAES:
5.1 - LOS REFRANES de la novela
1. «Mordedura d’escorpión,
nun espera confesión»
2. «Mordedura sacavera, nun espera prender la vela »
3. «A bolsa ensin dineru, llámola yo pelleyu»
4. «Refranes verdaderos, tocín nos pucheros»
5. «El que poco sabe, llueu reza»
.jpg) |
| Evaristo Valle: "Escena campesina" |
6. « En tierra moyada, nun des fesoriada»
7. « Cuando’l pan críe pelos onde hai rapazos»
8. «Güe avezáu, güelve al prau »
9 .«Cuando’l carru canta, el güe rabia»
10 .«El sol de nublu, saca al güe del xugu»
11. «Molín ensin maquila, ye talo un güei sin esquila»
12. «Güe vieyu, riegu derechu»
13. «A güe en tierra ayena, la vaca lu acorneya»
14 .«Dexa’l güe mexar, y fártalu de llabrar»
15 .«Güe sueltu, bien se rellambe»
16. « Nun ta l’alcacer pa zamploñes»
17. « Depués de vieyu, gaiteru»
18. « El que quiera nabos, que vaya arrancalos»
19. « Onde lletres falen, barbes callen»
20. << Munchu ruíu y poques ñueces >>
21. << El fíu del burru, María; dos veces reburdia al día >>
5.2- FRASES CÉLEBRES
 | |
| "La sidra ye'l meyor remediu pa matar l'espín" |
2.- << La República ye lo contrario del caudiellismu>> (Nolón de La Cuesta)
3. << Casona, horru, cuadra y llagar son los heraldos rurales que nos falen del bienestar nes aldees d'Asturies>>
4.- <<La sidra ye'l meyor remediu pa matar l’espín >> [Semeya: <Nel Chigre> Celso Granda]
5. 3.- TOPONIMIA (Topónimos. Hidrónimos. Orónimos. Epónimos):
. El Castañar . Roces. La Carbayera. La Villa. Xixón. La Cuesta de La Perdiz . La Cuesta del Castañar. La Cuesta. La Marruca. El Musel. La Puerta del Sol. Puerta la Villa. Cai Corrida. La Playa de San Llorienzu. La Braña. Granda. Fano. Castiellu. Granda. Llavandera. Samartín. Cagüeñes. Tabacalera.
.Vidiago. La Peñona. Purón. La Nogalera. La Reguera. Cue. Posada. Nueva. Colombres. Pinzales. Pindueles. Ajusco. Belmonte. Llanes. La Macorra. Unquera. El Peñón del Flaire. Peñamellera. Santa Marina. Uviéu. Puertas. Riego. Avilés. Cabrales. Ribesella. Arenas de Cabrales. Carreña de Cabrales. Picos d'Europa. San Xuan de Nieva. Salines. Parque San Franciscu. Payares. Calahorra. La Barrera. El Cotarón.
 |
| < Xixón, dende L'Altu'l Castañar (Roces) > |
América. California. Popocatepl. Nueva York. Canada. Cruz del Sur. Brasil. Río Janeiro. Cuba. Veracruz. Ajusco. México. Paraguay. Chapultepec. Tepeyac. Chalma.
. Ríu Cabra. Playa de San Llorienzu.
. Torrelavega. . Castiella. Asturies. Bustio. Villamanín. Ventosilla. Rodiezmo. Poladura. Cuba. Roma. Valladolid. Troya. Abisinia. Baracoa. La Puerta del Sol (Madrid).
5.4 .- Fala Camín d'un Club de foot-ball , el Pachuca , que casualmente son tamién los propietarios actuales del Real Uviéu. Camienta Camín por boca de Celín de la Macorra:
Club de Fútbol PACHUCA : Ye un club asitiáu na ciudá de Pachuca, Hidalgo, México. Foi fundáu el 1-11-1892. Ye'l club más antiguu de México y compite na 1ª División.
NOTA: Na revista satírica "Gedeón", vemos a los políticos de la dómina pasándose la pelota (Romanones-Almodóvar-Maura- Silvela-Práxedes...) y el balonazu pa España.
5.5.- FONTE LA BRAÑA: Fuere una fonte percélebre na dómina na que se desendolquen los fechos de la novela. Asitiada na Cuesta del Castañar entá existe n'actualidá magar un pelín camudada de sitiu; anguaño tiénenla afayada nel camín de San Xuan. Cuenta l'autor:
 |
| La Fonte (N. Piñole) |
 |
| Nacimientu del Ríu La Braña |
... Na Fonte de La Braña ñaz el ríu del mesmu nome, tamién conocíu como Ríu Cerón porque-y pasaba delantre casa, aprovechando pa pescar les truches sentáu nuna tayuela; tamién Pinón el Madreñeru yera aficionáu a los salmónidos. ¿Y quién no? ... Les que nun se pescaben llegaben hasta la sablera del Molín Vieyu (Molino Viejo) asitiáu nel tarrén conocíu anguaño como Parque de Sabel La Católica.
5.6.- La Güelga Xeneral de Xixón cuando too aparó, hasta la construición de los Depósitos del Agua de Roces, pensamos que fuere la de 1901, aquella na que tuvieren dos meses penitenciando por una xornada d'ocho hores (8 h/d) y delles meyores salariales. Los Depósitos de Roces tien de referise al nº 3, el que taben llevantando los hermanos Aguirre (1901-1908), vascos d'orixe y asturianos de chigre.
FAUNA: Los animales que alcontramos vagando peles páxines d'esta novela y que yá nomamos d'alguna manera son: Les vaques colos xatos y nuvielles. Los toros y gües. Los caballos y yegües colos sos potros asina como los mestizaxes con burros: burreños, garañones (macho - mula). Les pites. Los coneyos. ...
 |
| < Dellos exemplos de FAUNA Caminiana al rodiu'l Castañar > |
Ente la fauna avícola qu'analaya per Rozales alcontramos: La curuxa . El avión. Les andarines. El gurrión. Los estorninos. El ferre. El malvís. La cigoreya. Les gaviotes. La Palomba. El picutorneru. Los tordos. El glayu. El gallu montés (urogallu). La calandria, ...
7.- RETAZOS: RETRATU d'un POETA.
<< Alfonso Camín: El poeta errante >>
 |
| <Alfonso Camín se coña de min> |
« LA CASA LA PEÑUCA »
 |
| La Peñuca: Casa de nacencia del Poeta |
<Equí onde hai cantera y hai camín
que cuerre hasta la villa marinera,
antes de ser camín y ser cantera,
foi cuna y pedestal del mio destín.
Ellí ñací talo en la roca’l pinu
y, como si ellí ñacer delitu fuera
la casa humilde, ente nozal y figuera
foi firida pol pie y embaxo vieno.
Magar de la casa destruyida,
talo ta nel aire la mio fortuna,
la mio cuna ta nel aire suspendida .
 |
| La Peñuca, modernizada |
Que naide nun espere’l mio feroz reproche.
Suspendida nel aire ta lluna
y ye la qu'enllena d’esplendor la nueche.>
3) . AUTORRETRATU
« Yo soi como eses viesques que'l sol esplora;
y a fuercia de ser bonu, siento’l placer del mal;
la mio vida talo un chozu que’l mio optimismu enfloria,
mios mandes, unes gotes del sangre nel puñal.
Vime nel horizonte, crucié la mar sonora,
la rosa de los vientos marcóme un ideal,
y retornié, trayendo, talo una flor, l’aurora
y l’oru los mios versos por únicu caudal.
Nada importa que güei la Patria, talo una madre ciega,
xulgue foriatu al fíu cuando a los sos brazos llega,
si’l sellu del so fonduxe nun ye fácil d’esaniciar.
Y l’aigla d’oru y fueu, el mio coral románticu,
pa cantar dos mundos, lo mesmo que l’Atlánticu
tiende, talo dos veles, les sos ales sobro’l mar»
............................................
< FLORA que xurde nos rimeros de la Cuesta'l Castañar>
4) «Esti Alfonso Camín, de flor y aceru,
poeta pola gracia de l’aurora;
nietzscheana la neñina esclucadora,
bordón de toxu astur, capa y sombreru.
Independiente y llibre como elli solu,
Marte nes lluches y nel versu Apolu»
< Rozales: Exemplos típicos de FAUNA autóctono >
5) <Enantes quiero ser Lluzbel que l’Ánxel Buenu;
yo nun m’avengo a soportar el pinu
fechu una cruz, talo que’l Nazarenu.
Y por mor del mio perfil lluciferín,
repica roncu’l so tambor el truenu
y el rayu va allumándome’l camín.>
............
6) < Dicen que la vida ye mala.
¡ A quién-y lo vas cuntar, amigu,
que siempres llevé conmigo
l’infortuniu y la bala ! >.
.......................
7) Satíricu y sogón daqué día arrepostió-y a ún que lu refugaba por nun ser un lliteratu de fábrica universitaria:
< Sopla un vientu, ciertamente,
sobro la faz conocida
que, señores, pa nada nun ye frecuente
qu’a manotazos s’intente
desanicialu la vida ...>
......................
8) << Crecíu ente guerres civiles y mundiales
cómo queréis que sía yo un corderu pascual.
Soi la foguera y la pólvora sobro los vendavales
ya un reflexu dramáticu del duelgu universal >>
...............................
< FLORA na Cuesta del Castañar >
9) < Si soi’l roble col vientu en guerra,
¿cómo viví cola raíz ausente?
¿Cómo se pue florecer sin tierra?
............................
10) Y pa poner la espuela sentímoslu cantar:
< Voi de palu y de cortexu.
Voi de Roces hasta Granda,
voi de Granda hasta Mareo,
voi de Roces a Porceyo.
¡Soi de San Xulián de Roces
yo’l mio pueblu
nun lu niego! >>
CUMPLIMIENTOS:
 |
| <PUEBLOS TPA, na Cuesta del Castañar > |
. La primer atención tien de ser hacia Alfonso Camín, l'escritor de Roces, y autor de < La Moza del Castañar>, que nos llevare al reináu d’Alfonsu XIII con tolo qu'implica: Guerra d'África, emigración, República, Dictadura, vida rural y desendolcu de la minería y les industries.
. La Wikipedia siempres ye un sofitu cabezaleru pa buscar información al empar que les semeyes afayadices complementaries. GRACIES.
. Presta restolar pente los marcos de los pintores asturianos: Manuel Medina, N. Piñole, E. Valle, Ventura A. Salas, Celso Granda, Emilio Buergo, Paulino Vicente ....
. De la TPA robamos delles semeyes el día que'l programa PUEBLOS tuvo a Roces n'alcordanza. Son de l'auténtica casa de La Moza del Castañar. Gracies, Sonia; mui BELLO.
... Namás, collaci@s, davos les GRACIES, pola paciencia que tenéis conmigo. Si dalguna falta tengo - yá te digo - espero que perdonéis el mio estremáu celu apostólicu. Siempres dispuestu a aprender de ti siguidor ya amigu. Un ABRAZU y yá nos vemos nel CAMÍN.
:::::::::::::::::::::: FIN ::::::::::::::::::::::.
No hay comentarios:
Los comentarios nuevos no están permitidos.