< SUAÑOS de MERINDADES .- MISIÓN:PATERNA (8 A) >
< Una partida de bolos n'Espinosa los Monteros >
Área Recreativa nel Ríu Trueba
::::::::::::::::::::::::::::::::::::::::::::
.... zzz... SUAÑU Nu. ( 9 ) .... zzz ... Continuación.
ENTAMU
 |
| Alfonso II, el Castu. (Semeya: abc.es) |
Seya como fuere tamos en 841. El rei Castu nun pue pa col alma. La traición de Mahamud en Galicia foi la espuela a una vida real llarada de xirpíos, guerres, y enfallos familiares cola compensación d’una obra arquiteutónica perorixinal y bultable. Dexaba un reinu en construición pero con una base mui firme ya unes idegues bien clares: <Reconstruyir n’Uviéu tol orde góticu de Toledo>. Pero escarecía d’un fíu que pudiere continuar con aquella magna obra, ¿cómo alcontrar un heriede dignu d’esa función?… Tenía asociáu a Ramiro al tronu, fíu de la incombustible rama cántabra, pero sabía d’alguién de los suyos que taba dispuestu a too por algamar al tronu …
- < ¿Nin tan siquier pueo morrer tranquilu, Señor?>
Sicasí entovía-y falta un poco pa reunise col Creador. Nesi entrín y non, el Castu unvía a Selim visitar Galicia col envís d’asegurase que’l Gobernador Ramiro ye, ensin dubia alguna, el meyor validor.
Ye entós cuando'l cuciu Ramiro aprovecha’l tantu pa que Selim s’avere hasta Castiella y d'esta miente apareyar el tratu matrimonial que tenía entamanáu si se dieren les condiciones afayadices: que Paterna y la so familia tean tanto d’alcuerdu como al altor.
:::::::::::::::::::::
....... zzzz .....< SUAÑU Nu. (10) : Un vueltu per Santolaya > ....zzzz....
 |
| Ermita- Cueva de San Bernabé. Nel Complexu kársticu de Güeyu Guareña |
Nel últimu suañu de Selim Marwán la comitiva que salió de Medina de Pomar con direición a Güeyu Guareña, col envís de visitar les milenaries cueves soterrañes que se tuvieren formao por mor del agua los ríos, la lluvia y tamién d'un glaciar, arribó por fin al Camplexu Kársticu siguiendo'l calce del ríu Trema. Paterna enseñónos lo más bultable d'aquel mundu pantasmal onde convieron - y entá conviven ocasionalmente - homes y animales dende tiempu inmemorial, hasta fósiles marinos quedaren equí retrataos na piedra. ¿Foron Les Merindades tierra marino cuando aquella del Diluviu Universal?... Eso camienten dellos flaires sabichegos que falaren con xente foriato venío del Mar ...
 |
| Pela Ponte sobro'l Trueba damos pasu a Santolaya |
Foi otra pasada de viax peles Merindades, l'antigua Bardulia, lo qu'anguaño entama nomase la naciente Castiella. Agospiamos nel monesteriu doblu de Santolaya, mismo enriba d'Espinosa los Monteros, namás cruciar el codalosu Ríu Trueba, seique nós nun tuvimos falta d'ello pos garramos enantes el camín de Barcenillas de Zrezos (el barriu de Para queda a manzorga), bien cerquina del cenobiu (escasamente a 2 milles).
Fuimos agasayaos por monxes ya monxos colos que tuviemos de garulla con una sobremesa de lo más candial ya entrugante .... Pensar que taben compartiendo mesa y mantel cola futura Reina dába-yos un cuayu impresionante y sentíense partícipes importantes n'aquella batalla de la Repoblación qu'entamare poco enantes del añu 800 cuando Fruela mandare llevantar el Monesteriu femenín de Samiguel de Pedroso (759) , seique de xuru yá hubiere dalgún repoblador anterior. Siguiere probablemente con Llebato y Muniadona (796) nel Valle de Mena y darréu colos sos fíos, monxos, Vítulo ya Ervixo (dica'l 800), o polo menos ye de los queden referencies, talo que'l monesteriu del obispu Xuan en Valpuesta (804) promovíu pol rei Castu.
 |
| Capiella de Samartín Brañosera |
Dalgo más tarde vino'l Fueru Brañosera (824) col conde Nuño y la so muyer Arxilo pa dexar constancia por escrito de cómo deben facese les coses no que cinca a la xera de repoblación. Santolaya ye otru de los finxos primixenios de la repoblación nesta zona que podía comprender l'Área Patriniani (Paterniani) si bien la so base pudo tar n'Agüera - al llau de la calzada Amaya- Flaviobriga (Castro Uurdiales) - onde Vítulo llevantare la Ilesia Samartín. Por supuesto que faen presures ya escalios, tresnen molinos ... Repueblen, talo tán faciendo los nuesos anfitriones de Santolaya, al llau de lo que pocu tiempu depués terminó siendo Espinosa los Monteros.
(Llueu enteramos que na mesma Espinosa hai un conventín xunto una ilesia que tamién agabita n'esto de la Repoblación. Cuantos más, meyor).
... Tres la cena, y darréu interesanos por cómo diben les coses pel monesteriu, nun pudimos evitar escaecenos de los preguntes al rodiu de la naciente Castiella, na que tantu enfotu taba poniendo don Diego, el pá de Paterna, asina como del Reinu en xeneral pos yá sabíen que Selim trabayaba n'Uviéu al serviciu del Rei Castu. Deseáron-y suerte a Paterna na so nueva aventura Real - lo que daben por asentao - y a min cosiéronme a entrugues pa conocer cómo fuere la mio vida n'Andalus, la d'un ¿mozárabe? que tornare a "casa". Quedaren ablucaos cuando-yos cunté cómo fuere'l nuesu raptu en San Salvador y la suerte que tuvimos ellí, en Córdoba, naquella casa d'omeyes que tan bien nos tuvieren tratao. Costába-yos entender - tres les razies que tuvieren padecío - que los considerare familia de mio.
 |
| Selim, les primeres lleiciones corániques (Del llibru:"Asi se vivía en Al Andalus) |
Yo asistí a la Escuela Primaria con otros neños y neñes de la mio edá ande aprendimos les primeres lletres. Estudiábemos Relixón, Cálculu ya Hestoria, eso sí, partiendo del Corán, cómo non.
-¿Entós ficístite cristianu al venir equí?
- Non, qué va ...El mio padrín, el Cadí, traíame a casa un Maestru Mozárabe, un vecín, que daba lleiciones de catecismu cristianu. Él dicía que debía conocer dambos credos y que dalgún día yera cuenta mía decidir.
- En verdá nun soi pa creyelo... ¿Y yá tomasti'l determín?
- Va munchu tiempu dime cuenta que Dios namás hai ún, tou depende del cristal con que s'amire. Lo importante nesta vida ye respetar al vecín y facer pol próximu tou lo que tea al to algame. Ser bona persona, en fin.
- ¿Y si tienes que lluchar, por quién tomes determín?
- Si tengo que lluchar, llucho, seique nun ye lo que me prui. ¿Prenguntáisme eso a min?... ¿Nun tais vosotros, flaires y monxes, nel mesmu casu que yo?... ¿Por qué fuxís de la espada y del mundu p'abellugavos en Dios?. Yo tamién escoyí'l camín de les pallabres, de los llibros, del perdón. Pretendo ser como mio padre adotivu, un mediador.
- ¿Y más tarde qu'estudiasti?
- Más tarde, cuando tenía 15 años, mandáronme a estudiar a la Mezquita y eso foi un trauma pa min. Taba namoráu y separtáronme enforma de la mocina qu'enllenaba'l mio coral. Siguíemos diendo xuntos a la Mezquita-Universidá pero a distinta clas. Aquellos tiempos cuando nos esmucíemos pelos Sotos d'Albolafia pasaron, cuasi, a meyor vida.
- Cuenta, cuenta ....
- ¡Vaya monxes y flaires que sois vós!... Yasira, se nomaba, y yera fía del home que me raptó, Abd al Karim ben Mugait, ñetu del conquistador de Córdoba. Pero l'ámor nun tien fronteres nin tan siquier pa un cristianu ya una árabe. Magar nun ta nada bien qu'unos relixosos enrieden con estes picardíes ....
¡Vaya alborotu que s'armó!... Si dalgo-yos pruyía a los hermanos ya hermanes yeren les hestories d'amor. Y tuvi que cunta-yos un poco d'aquella inocente rellación infantil que tanto nos xunció a una mora ya un rumí.
 |
| La Noria del Guadalquivir (Córdoba) (S: Fco. Castro C- Pintirest) |
- Pa que nun nagüéis direvos que de neños escapabemos mazcaritaos de casa pa visitar los Sotos de l'Albolafia. El nuesu turbante verde-omeya yera conocíu por toos: Los encargaos de la Noria l'agua, los molineros del aceite y cereal y de los pescadores, que s'enfusaben en barquichueles pa prindar daqué. Teníemos fecha una chabola de rames onde tresnábemos el pescao que nos regalaben o'l que nós mesmos pescábemos a vegaes. L'Albolafia yera la llibertá, el nuesu credo, ellí onde Yhavé y Alá taben hermanaos.
- ¿A qué se dedicaben les vueses families?
¿Cómo entamó esa rellación?
- (Qué importones son estos relisos@s, camenté pa min). Magar qu'un fíu del Cadí - Omar - yera capitán del Exércitu la nuesa familia dedicábase sobre manera a la ilesia-mezquita y a los negocios. Yá sabe Paterna qu'estos affaires vienen dende que'l primer miembru de la mio familia - Amed ben Bishr - llegó a Hispania nel añu 711 de la mano de Mugait el Rumí - llugarteniente de Tariq y güelu d'Abd al Karim - cola fin de conquistar la península; el Califa Al Walid I - tíu d'Amed - foi'l que lo iguó too. Coincidió que dambos - Amed y Mugait - llucharen xuntos pa conquistar la ciudá de Córdoba y d'entós p'acá les vides de les nueses families siempres tuvieren xuníes. Cuando acabó la guerra, por dicilo ansí, asitiamos a vivir en Córdoba; ellos dedicáronse sobre tou a la guerra y nós a la Ilesia y a los negocios.
 |
| Pisando oliva pa sacar aceite (LL: "Así se vivía en Al Andalus") |
- ¿Qué negocios, si se pue dicir?
- Instalamos una noria nel Ríu Guadalquivir para llevar l'agua a l'Alcázar y a tola ciudá. Punximos una panadería per aciu de la fariña que molíemos nel Molín de l'Albolafia, xunto al Guadalquivir. Tresnábemos aceite n'otru molín del ríu y díbemos mercando tierres y quintanes (alqueríes) estramuros la Medina onde teníemos plantaciones de productos estremaos: cerales, olivares y frutos varios, carnosos (naranxes, llimones, pomares, zrezales... ) o secos, talo los almendros. Tamién semábemos arroz aprovechando que teníemos agua a esgaya que nos mesmo sacábemos del Guadalquivir.
- ¿Y qué estudiabes na Mezquita?
- Los estudios de la Mezquita yeren fondamente relixosos con conocimientos del Corán, la Sharia y la Umma pero l'alumnu podía escoyer les materies a estudiar. Yo, siguiendo los conseyos de mio padrín, el Cadí, fui alquiriendo sabencies mui variaes:
- <Tienes qu'estudiar de too pero pensando que nel futuru te pueas dedicar a l'Alministración, el Diwán, y d'esta miente algamar a un cargu principal. Hai que tar cerca del poder y de la información que caminen de la mano.>
- Asina qu'estudié Dialéctica, Retórica, Gramática, Lliteratura, Poesía y Filoloxía árabe pero tamién m'instruyí nes <Cuatro Artes lliberales> : Aritmética, Xeometría, Astronomía y Música. Seique lo que más me prestaba yeren la Hestoria y la Xeografía. Tampoco me faltaron dalgunos conocimientos de Melicina ya Arquiteutura. Lo más prestoso yera cuando l'Emir contrataba Mayestros consagraos pa danos clase ocasional sobro algún tema. Esos díes la Mezquita-Universidá yera un ferviellu, había un ambiente especial. Teníeis que venos, sentaos nes alfombres, tomando notes.
- Bueno, los mios queridos relixosos, yá ta bien pa güei - intervién Paterna. Hai que descansar; si queréis mañana siguimos otru poco. Enantes de visitar Espinosa prestárianos conocer l'entornu del monesteriu col envís de sacar un planu pa que'l Conde Diego sepa, en casu d'apuru, a qué atenese. ¿Paezvos bien mañana pela mañana?.
Los homes agospiamos nel monesteriu masculín - ellí mesmo, detrás - y Paterna y les criaes quedaron coles monxes nel femenín.
.................................
 |
| Capiella de Santolaya, onde hebo un Monesteriu |
Al riscar l'alba del siguiente día xuntámonos toos na Ilesia de Santolaya pa oyer la misa. L'Abá nun coyía en sí de gayola a ver tanta xente pos arriendes de los once de la comitiva taben toles monxes y monxos amás del pueblu enteru que vieno a conocer a la futura Reina. Yera tal el xentíu que dalgún rapaz tiense xubío a la castañal qu'hai delantre la ilesia col enfotu de poder golifalo too a gustu; gracies a Santolaya nun rompió denguna caña, o quiciabes fueron los rezos de les vieyines que nun daben créitu a lo que taben viendo. La misa mozárabe, de tradición gótica, y comunión foi un éxitu escomanáu nel que participó tola población y hasta xente del populosu barriu d'Espinosa que llegó a enterase de la presencia de la condesina. Tres la misa hebo, espontánemente, una procesión peles cais del pueblu n'honor de la Santa; nunca se tuviere visto devoción tala nel pueblín de Santolaya de Castañeda.
Darréu l'actu litúrxicu dimos una vuelta pel pueblu y la redolada a propuesta de los relixosos que queríen amosar a la condesa tolos trebeyos y xeres a los que taben dedicándose con tantu enfotu: Visitamos les dependencies de dambos monesterios (cocines, refectoriu, sollaos, scriptorios, sala capitular y claustros, asina como les cuadres, pozos, almacenes y güertos d'alredor.
 |
| TARANCO: Equí taba'l Monesteriu S. Emeteriu Homenaxeando a Castiella. |
- Los monesterios tán como veis asitiaos na fastera d'esti monte conocíu como Monte Herbosa que daquién noma "Cantu Blancu" - camentó l'Abá. Foi llevantáu, por recomendación del Abá Vítulo y el so hermanu Ervixo, dica l'añu 800, cuando andaben enfotaos en repoblar lo que fuere la romana Área Patriniani. En Taranco (Valle de Mena) llevantaron el Monesteriu de San Emeteriu (hacia 800) onde por vez primera apaez la pallabra Castiella.
Y siguimos caleyando pel pueblu. Como veis ehí cerca hai un pequeñu palaciu que pertenez a una familia importante, los Villasante, montañeses que tienen los sos raigaños nel Valle de Mena. Vosotros vinisteis de Sotoscueva pol oeste y pasásteis pol barriu que conocemos como Tasugueras, que ye ansí como equí nomamos a los teh.ones (tasugos).
- N'Asturies nomámolos melandros - intervién Selim.
- Bono, pos ehí pudisteis ver la Ilesia de San Pedro, mui almiráu per equí. Casi al mesmu tiempu,
enantes d'entrar nel pueblu, acolumbrareis de xuru'l turruxón que don Diego tien llevantao pa controlar el valle d'Espinosa. Si siguimos escontra l'este, camín d'una pequeña presa que ficimos nel Riu Trueba p'alimentar el molín, llegamos al barriu d'El Pandu, que queda enriba d'Espinosa.
- Lo que me paeció ver cerca de Tasugueras foi una cantera ...
- Sí, y mui granible; toa la piedra la sacamos d'ehí: el conventu, la casona-palaciu, el turruxón, les cases del pueblu, la ilesia ... Hasta d'Espinosa ya otros barrios vienen sacar piedra d'equí.
 |
| Per Santolaya |
Siguíemos andando pel pueblu. Pasamos una Fonte-abebentaderu qu'esquitaba agua restorcer. Salimos xubiendo del pueblu cruciando la Riega de la Fonte Toba hasta qu'algamamos a una devesa llarada de carbayos.
- Esta devesa pertenez al monesteriu y d'equí sacamos lleña pa calentanos y madera pa construyir.
- Pequí tien d'haber bona caza, señor abá.
- Abonden les llebres, perdices, xabalinos, corcios ... Pero curiao, tamién hai osos y llobos.
- ¿Y de ganao doméstico?
- Lo de siempres per estes llatitúes: vaques, caballos, oveyes, cabres y gochos.
- ¿Y tierres pa cultivar?
- En cualisquier parte, ellí onde queda un requexu aprovechamos pa plantar pero sobremanera embaxo la devesa aprovecemos pa semar un poco de too: cereal (trigu, cebada) y legumes (titos o garbanzos, arbeyos, fabes de mayu...) y por supuesto verdures (berces, repollos, calabacinos, rábanos, cebolles, ayos, cenahories, ...).
Pali-pali, como que nun quier la cosa llegamos a un puntu onde les vistes del valle y los montes que lu arrodien conformen una panorámica impresionante.
- Esti llugar ye conocíu como <El Mirador d'Espinosa> . Pa finar la visita quiero vos recreéis na visión de tola Depresión d'Espinosa y de Bárcena. Hasta Sotoscueva y Montih.a pue acolumbrase.
Foi un día bucólicu, candial y afayaizu por mor del recibimientu de la xente. La comida casero, a base de productos de la tierra resultó de lo más agradable y dixestiva (por si acasu daquién traxere unes cantimplores enllenes d'un agua ferrial que xurde na dev
esa):
<Entrantes de setes con xamón, titos con tocín y galletes feches col trigu de casa, cola fariña molío nun molín del Trueba cercanu al Pandu y membrillu de mazana. El platu principal taba compuestu de "Llebre con frutos secos tostaos y vinu blanco"> .
- ¡Vaya llacuada, Señor! - clamia l'Abá. Espero nos perdones porque una Reina nun apruz tolos díes pel conventu.
Nun podían faltar les entrugues al rodiu la nuesa vida; aquellos relixosos (monxes y flaires yeren igual d'importones) y nun perdieron la ocasión de siguir pescudando sobro les hestories que tuviéremos vivió y qu'en ciertu mou nos llevaren ellí. Tantu Paterna como yo yéremos pa ellos unos personaxes únicos; l'ensame de la hestoria pasada, presente y futura. ¿Tendríen otra ocasión como aquella na vida?.
..............................................
 |
| Turruxón de los Velasco, el ferregüeyu d'Espinosa |
- ¡Salve a la Condesa! ¡Viva la futura Reina! - clamiron los tres soldaos cuadros en formación.
- Munches gracies, caballeros. Espero que los vuesos deyeos se vean cumplíos pos va ser un bien perbonu pa toos. Mio padre mándavos saludos y agradezvos el trabayu tan importante que facéis controlando los valles d'alredor.
La cara los tres soldaos amosaba una gran satisfaición. Nós siguimos baxando hasta dar cola ponte'l Trueba. Nun yera gran cosa pero aquella ponte de madera cumplía de sobres la so misión. Igual en casu de peligru yera preciso esbarrumbala pa que la xente los pueblos tuviere tiempu d'esmucise. A midida que que s'averaben diba aumentando'l buiciu ...
- Como yá debéis saber l'últimu fin de selmana de Xunetu - camienta Paterna - celébrense n'Espinosa unes fiestes perimportantes que continúen hasta la mañana del miércoles siguiente como remate a la tradicional FERIA del martes.
- ¿Cuatro díes de romandela?- entruga ablucáu Selim.
- Bueno, en realidá yá entamen'l día antes - güei vienres - pos tol mundu vien con tiempu a esgaya pa instalar los tenderetes nel sitiu más afayadizu. Amás ye difícil topar onde dormir pos nun hai posaes suficientes nel pueblu nin tan siquier nos barrios parroquiales d'alredor (Berrueza, Para, Quintanilla, Bárcenas ...). Nun sé si vos decatasteis que la mesma Santolaya taba enllena de foriatos a la hora de misa.
- Pensábemos que veníen a vete a ti.
-Tamién, pero otros munchos vienen a esta feria tolos años. Dellos queden en cases de familiares o d'amistaes, pero la mayoría tien qu'arregláseles nos propios stand pos ye imposible agospiar tanta xente. Tamién vienen de toles merindades atiestantes : Sotoscueva, Montih.a, Villarcayo, Medina de Pomar, Valdeporres .... Y nu puen faltar los xugadores de bolos de Frías, inclusive los de San Zadornil y Llosa.
- A ver cómo te defendes, mio Reina - camienta sorrisón Selim.
- A la xente prestaría-y que tu tamién t'involubrares; nun t'esmolezas, son mui amables coles novedaes - rempuesta que prevoca una carcaxada xeneral.
- Por tirar que nun quede, tou sía por dexate bien a ti.
Malpenes podíemos dar un pasu tranquilos magar que la xente yera bien afable con nós abriéndonos pasu a midida que circulábemos peles cais. Entá nun sabíen quien yéremos pero albidraben daqué importante.
 |
| Espinosa de los Monteros (Semeya: Pinterest) |
- Espinosa ye una ciudá en construición - diz Paterna. Tien munches posibilidaes dao la so situación. Ta asitiada nun valle mui granible, xunto al ríu Trueba y separtada como en dos barrios: el baxu o de Quintanilla y el más altu o de Berrueza. Al norte llenda con Cantabria y la mar magar que separada por unes grandes montañes con viesques y praeres pal ganáu, dígase picón Blancu o Les Machorres. Tamién tán a tiru flecha los Montes de Somo y de Valnera, onde queden les güelgues d'un castru que debió trayer en xaque a los romanos. Al sur tenemos la gran meseta castellana con Villarcayo, Medina de Pomar y Trespaderne, que yá conocéis. Al este tien un accesu fácil colos valles de Mena, LLosa y Tobalina. Y al oeste cola que va munchímos años debió ser una zona pantanosa, Valdebezana, que tien una variedá paisaxística impresionante: la Depresión del Virga llarada de viesques y praderíes pal ganao vacuno y caballar; los Montes de Carrales con viesques de fayes y carbayos y dalgún alcinar; y por último los valles d'Arreba, Manzanedo y Valdebezana con viesques caducifolies y un alcinar propiu del clima mediterránéu. En toa esta zona son munchos los vascones que vienen pa quedase. Alfolso'l Castu, que ye vascu por madre, dalgo tendrá que ver en tou esto.
 |
| Reinu d'Asturies (Alfonso I, el Católicu) Embaxo <tierra quemada> (Semeya: mezquitacordobesa.com) |
- ¿Y qué torgues podemos ponéi? - entruga Selim.
- Ye mui petecible pa los árabes pos tien una tierra rico y non mui difícil de conquistar. De fechu ente 712 y 14 anduvieron per equí <talo Pedru per so casa>. Alfonso I, el Cántabru, el xenru Pelayo, dio-yos bona pandorga pero llevó la xente tres les montañes cantábriques porque nun yera pa controlar tola zona con garantíes.
- Pero agora, pasao dalgo más d'un sieglu, ye'l so ñetu Alfonso II el que torna repoblar lo que se nomare daquella <tierra quemada>- arrepostia Selim.
- Y esperemos que Ramiro siga con esa idega repobladora y de conquista. Yo taré siempres con él.
- Nun sedrá fácil, Paterna; na corte d'Uviéu hai intereses estremaos col enfotu qu'apare la guerra. Hailos que prefieren ser ricos que reconquistar lo que foron tierres cristianes colos godos. Ramiro va tener munchos frentes abiertos, tienes que sabelo p'agabitalu no que pueas. Rezo por ti tolos díes.
 |
| Palaciu <Cueves de velasco> apegaú a La Capiella de Santiago (mandrecha) |
- Bono, ¿y agora por qué nun vamos visitar una capiellina dedicada a Santiago. - camienta Paterna. A Alfonso'l Castu prestó-y nel alma cuando s'enteró que la-y dedicábemos al Apóstol.
- Nun ye d'estrañar. Alfonso quier convertir al pescador galiléu nel Guía de la Reconquista. Foi Beato de Llébana'l que lu reconoció como Patrón de la Reconquista na so obra <O Dei verbum>. Yá sabéis que tuvimos ellí visitando la so tumba; y precisamente yo fui a ver, por encargu d'Alfonso cómo diba la construición de la Ilesia Santiago y el Camín Xacobéu Primitivu palos pelegrinos que salíen o s'averaben a San Salvador d'Uviéu.
- Nun se fale más, vamos dir per esti humeral, xunto al ríu, y lluéu torcemos a mandrecha onde hai unes güertes. Tán llevantando una casona al par d'ella, de xuru que la capiella ye de los mesmos*.
* (Más tarde los Marqueses de Cuevas de Velasco llevantaron un Palaciu manierista apegáu a la Ilesia de Santiago).
A midida que díbemos andando pela llanera fuimos decatándonos qu'había como dos barrios separtaos por una sienda, toa recta, que los estremaba.
- Oiga, bon señor, ¿cómo se llama esti esti barriu de la parte acá de la estrada?
- Esti ye'l Barriu de Quintanilla y aquel otru más grande no alto ye'l Barríu de Berrueza. Nun dexen de visitalu porque tán llevantando munches casones. La xente de perres y poder quier instalase equí porque'l pueblu ta espoxigando muncho. ¿Vienen ustedes a mercar p'asitiase equí?
- Non, namás tamos de visita, gracies.
- Con esa pinta que tienen pensé ....
L'home nun sabía con quien taba falando pero al ratín vímoslu entrugando a dalguién y darréu facer esparabanes ...
- Ehí cerquina, nesi solarón, támos camentando si llevantar una ilesia a San Nicolás, l'obispu turcu que participó nel Conciliu de Nicea condenando a los arrianos (nieguen la divinidá de Cristo). ¿Por qué nun xubimos hasta'l barriu altu pa ver cómo van les coses?- entruga Paterna.
 |
| Espinosa los Monteros: Plaza de Sancho García |
Llegamos a un espaciu abiertu, especie de Plaza, onde realmente va celebrase'l Mercáu. El centru déxase llibre porque ye'l llugar onde faen los torneos y tien llugar la celebérrima Partida de Bolos Tres Tablones. Na contorna hai una casona onde vive un merín, una especie de xuez nomáu polos mesmos vecinos, que s'encarga d'impartir xusticia, rexistrar les presures repobladores pa que nun haya abusos ya interviniendo en toa mena de conflictos vecinales sancionando a los infractores. Tien el gabitu d'un garapiellu soldaos avalaos por don Diego.
Trátase d' una guapa plaza enllena de cases montañeses con soportales, güei acorropinada de tenderetes colos productos a mercar: quesos, miel, embutíos (xamones, llonganices, morcielles, cecina). Otros con panes estremaos y empanaes asina como sobaos pasiegos, duces o mermelaes. Tampoco nun puen faltar toa mena de frutes y productos de la güerta.
 |
| Mercáu n'Espinosa los Monteros (Semeya: Todocolección) |
Pa ver el mercáu del ganao hai qu'averase hasta l'humeral del Ríu Trueba, cerca la Ponte'l Cantu, onde vaques, oveyes y caballos tán enforma más frescos. Paterna ye una gran aficionada a los caballos, sobre manera a los llosinos que so padre nun para d'afalar tratando d'ameyorar la raza a base de dir alquiriendo los sementales de más puxu y troníu. Tamién de vaques entiende la condesina estremando les diverses races merindenses: terreñes, monchines o tudanques. Estos díes baxen a Espinosa los ganaderos de los pueblos colos meyores exemplares de caballos habiendo un premiu especial a la meyor pareya de llosinos, seique por separtao.
El sábadu enantes de meudía los mozos de les parroquies d'Espinosa asina como los de Les Machorres, LLunada y Picón Blancu fain un pasacái pela Plaza de la villa con manaes de vaques, caballos ya oveyes p'amosar el puxu de la ganadería espinosiego.
 |
| Bufón medieval (S: Pinterest) |
Nun falten toa clas músicos - siempres acompasaos d'una raciella de guah.es - tocando instrumentos estremaos: unos con xiblates, otros con salterios, zanfoníes, tambores o panderetes y hasta un órganu tenemos visto nun soportal pa los más avisaos.
En cualisquier placina o requexu alcuentres dalgún malabaristra faciendo equilibrios que caltienen l'aliendu del públicu que nun para d'aplaudir a midida que van finando los diversos númberos. Los BUFONES, aniciu xuglarecu, son la gayola de los guah.es y de los más vieyos. Lo mesmo canten que baillen o que cuenten les hestories d'esotros pueblos; pa cuntar les del propiu hai que ser mui arteru ...
 |
| Traxe rexonal pasiegu (S:De Pinterest.es) |
Nunca nun puen escarecer los bailles populares con mozos y moces vistíos colos traxes típicos que los estrema de los otros pueblos. Cadún tien el suyu propiu que sopelexa gayoleru al son d'una música qu'acompasa con dellos instrumentos.
Otros años vien a la feria el propiu conde don Diego pero esta vegada quier dexa-y tol protagonismu a Paterna, la futura Reina del pueblu. Cómo sinón diba faltar el Conde al tornéu de caballeros que xueguen a espetar les llances a una diana asitiada nun tableru pa d'esta miente amosar la so habilidá y el puxu de los caballos más arteros.
El domingu ye'l Día Grande. Celébrase una Misa solemne nuna ilesia asitiada nel barriu de Berrueza, no más alto del pueblu. Darréu hai una procesión alredor de la ilesia y del ¡Monesteriu!. La ilesia ye más bien cenciella; fecha de mampostería sacante nos vanos y na cabecera o ábside abovedáu que van a "soga y tizón" de tosca sillería. La puerta principal y dellos ventanos presenten arcos de ferradura, tipu visigodu. Preside l'altar una imax de la Virxe asitiada nuna fornacina. Ye la que se va sacar en procesión pela parte alta la villa.
 |
| Santa Mª de Berrueza |
- Sí, promovíu por mio padre. Ye piquiñín, namás tien trés flaires benitos ( de la Orde de San Benito) pero ye importante pa la xente que vien a asitiase per esta zona del valle. Ayúdenlos a facer presures ya escalios asina como a iguar los papeles ente'l xuez o merín de La Plaza. La xente, colos monesterios, siéntese bien afalao.
- Veo que to padre ta mui enfotáu en repoblar toa la zona con merindaes.
- Sí; con ilesies, monesterios y pequeños castiellos. Ye perimportante pa torgar les razies sarracenes. Equí tuvieren asitiaos los árabes; hebo un momentu que la xente algamó a sublevase pero los moros pidieron ayuda a los sos collacios de Medina de Pomar y tuvimos qu'achantar hasta que-yos dio por colar. Nun queremos que pase ésto otra vegada.
- Bueno, ¿y qué más coses facéis neste FERIA?
- El llunes, al endefechu'l mercáu habitual, tenemos carreres de cintes a caballu tantu pa mozos como pa guah.es pero estos faenlo con ponis. Yá sabes como ye; hai unes cintes colgaes n'horizontal nun cordel qu'escolga de dos abarganes. Debes agarrales con un palín que lleves na mano faciéndolu pasar per una aniella. El que más cintes prinde ye'l ganador.
- Esto nun ye pa min ....
- Tu pues correr na carrera caballos llosinos. Son trés vueltes a un percorríu pel pueblu marcáu d'antemano. Esta carrera espierta una emoción ablucante dao que los corredores son mozos que vienen dende los llugares más estremaos de Castiella. Tamién les moces faen la so carrera pero elles dan una vuelta namás. L'honor de los ganadores va ser escomanáu y sedrán los que abrán el baille la verbena del martes que peslla la FERIA.
 |
| Bolera 3 Tablones Campu de xuegu |
- ¿Y cuando ye'l célebre CAMPEONATU de BOLOS "TRES TABLONES?
- El martes. Ye tanto la xente que s'alpunta que'l concursu yá entama pela mañana y los meyores clasificaos tienen la final pela tarde. Xuégase na modalida de "TRES TABLONES" con dos tiraes por xugador, una de xubida, dende'l cas ya otra de baxada o birle. Voi pintavos el campu nel suelu.... Yá veis que ye un rectángulu d'unos 26 x 6 metros que dispón de tres tablones o cureñes onde s'asitien tres bolos en caduna. Detrás, nuna especie de trapeciu, colócase un bolín más pequeñu o micu que pue tar asitiáu a mandrecha (pal pulgar) o a manzorga (pa la mano), como escueya'l xugador.
- ¿Y cómo puntúa esto?
- Cada xugador intenta tirar el mayor númberu de bolos con una bola d'unos (28 cm de diámetru) qu'agarres per unos furacos. Cada bolu val un tantu sacante'l del mediu que si cae solu cunta como dos. Si, amás d'ún o varios bolos, tires tamién el micu entós son 4 más (el micu val 4 pero si va acompañáu).
- Les boles son pergrandes, ¿puen tirase rodando?
- Non, han de dir pel aire porque'l primer bote tien de dar pasada la cureña, si non llega queda mocha y val cero puntos seique tires tolos bolos.
- La verdá - camienta Selim - paezse enforma a la cuatriada asturiana, magar que la forma de cuntar ye bien estremada. ¿Y la zona de cas o tiru ta a la mesma distancia pa toos?
- Non, les muyeres y los neños tienen handicap y tiren dende más cerca, ¿nun facéis lo mesmo vós?.
- Por supuesto, somos mui consideraos. Si te digo la verdá yá tengo gana vete xugar.
- Y tu nun te m'esmuzas, Selim Marwán, que tamién tas alpuntáu. Vas ser l'atracción. ¡H.a., h.a, h.a!.
Dimos un vueltu pel pueblu almirando cómo la xente tresnaba los últimos preparativos de la FERIA. Enantes de colar pal monesteriu de Santolaya paramos na Plaza a tomar unes zapiques de sidra, bebía que se lleva muncho equí dao la bayura y variedá de mazanes d'esta zona, piensa en Medina de Pomar.
.....-----------------......
 |
| Perdida pola FERIA d'Espinosa |
Espinosa los Monteros ye’l
municipiu más septentrional de Les Merindades. Llenda al norte con
Cantabria lo mesmo qu’al oeste onde s’alcuentra cola barrera los
Montes de Somo y Vanera (onde s'añcuentra'l célebre castru). Si tires al
sur-este entres na merindá de Montih.a (Villasante)
y hacia’l sur-oeste vas
camín de Sotoscueva (Güeyu Guareña).Tien
una estensión d’unos 138 km² pa una población cercana a los
1.700 habitantes distribuyíos
en seis barrios: Santolaya, Berrueza, Quintanilla, Para, Bárcenas y Quintanilla de los Praos.
Xunto coles llocalidaes cántabres de Vega del Pas y San Pedro del Romeral forma’l conxuntu de Les Trés Villes Pasiegues.
Espinosa y el so entornu tevo habitada dende tiempu inmemorial como amuesen les güelgues de Güeyu Guareña ya otres de les Edaes del Bronce y del Fierro. La villa – Vegulia - foi formada por pueblos celtes, cántabros-conisios, unos 800 años e.X.C. Los romanos asentaron equí tres cruentes batalles colos nativos, qu’obligaron al mesmu Octavio César a tomar cartes nel asuntu y dexar construyida una barrutha - muralla - al radiu de Velliga. Más tarde – 600 / 700 – foron los visigodos los qu’asitiaron nel Val d’Espinosa (tala yera la bayura d’espinos qu’había). Quiciabes el más célebre personax d’Espinosa sía’l Conde Sancho García (c. 1006) que-y dio’l nome a la villa al crear el Cuerpu de los Monteros de Cámara; hestórica-lleenda que yá vos cunté.
Otros celebérrimos personaxes d'Espinosa foron: Xuan de Salazar y Espinosa los Monteros que fundó Asunción - capital de Paraguay - en 1537. Gonzalo Gómez d'Espinosa foi'l segundu navegante que circunvaló la tierra (1527) tres de Xuan Sebastián el El Cano (1522).
La Guerra la Independencia (11-12 Payares de 1808) dexó un mal recuerdu na villa al perder colos gavachos una batalla decisiva nesta sangrina ya estúpida guerra. La venganza gala foi de lo más ….. DESPRECIATIBLE. (Espinosa nun s'escaez d'ello magar nun tornen en son de paz a visitar Les Merindades con abondes perres en bulsu).
zzzzz..... FIN del SUAÑU Nu. (10) ..... zzzzz
:::::::::::::::::::::::::::::::::::::::::::::
ANEXU .I.
RUTA HERÁLDICA d'ESPINOSA los MONTEROS
 |
| Torre de los Azulexos |
Pa facer una visita a esta ciudá que recibe'l nome d'Espinosa pola bayura d'espines qu'había abenayá y "De los Monteros" por ser Sancho Espinosa el criáu qu'acompañaba siempres al Rei-Conde nes "monteríes cinexétiques" a la que yera tan aficionáu y al que-y debía'l reinu y la vida; sí la vida ...
Cunta la lleenda qu'en tiempos del conde castellán Sancho García esti fizo un pautu d'amistá col árabe Mohamed Al-Mohadí que roblaron con una bona espicha. Aprovechando'l saborín del sidre'l moru echo-y el picáu a reina-madre que taba vilba y ....
 |
| La lleenda de los Monteros d'Espinosa : Sancho García descubre la conxura. |
<Siendo Sancho huérfanu de pá ocurrió pos aquel día
que la vilba madre namoró d'Al Mohadí a primer vista.
El moru yera finu y pensó'l llaín, con tola picardía:
- Si te cases conmigo, Aba de mio vida,
tuya sedrá toa Hispania, l'arábiga y Castiya.
.. Póneslo perguapo, Al Mohadí, pero'l conde de Castiya
nun dexa de ser el fiyín de la mio vida.
- Si me quies con tol amor, Aba mía,
pues mándalu pal Edén, a esotra vida.
.. Munchu pides, cariñín, p'acabar de conoceme l'otru día.
- A vegaes l'amor pide grandes sacrificios, cristianina.
Una pócima a don Sancho, afayadiza,
y pasará coles huríes el restu de la esotra vida.
El boicó yera perguapu, ¡ai mamina!,
mas cucól una criada, al acesmu, tres d'una cortina
y punxo sobre avisu al so maríu, l'espinosiegu compañeru del conde en montería.
Y el brebaxe, por tomalu'l Rei, apurrió-ylo con tol ciñu a l'asesina:
-- Tómalu tu, madre, que yes de les muyeres la más digna
y nun hai cosa que más quiera'l to fiyín nesta vida.
Plan nun yera d'achuase, ¡por Castiya!, y apuró doña Aba la copina:
Quedó'l moru al bentestate y la so cómpliz talamente vendida.
Gracies al monteru salvó vida y corona'l conde Sancho García
y d'entós p'acá los Monteros d'Espinosa curien de los Reis la vida.>
...........................
 |
| Espinosa de los Monteros |
Conocida un poco la hestoria de los Monteros d'Espinosa vamos dar un vueltu per esta villa siguiendo, más o menos, una ruta conocida como <RUTA HERÁLDICA>, a ver qué sal .... Los finxos cabezaleros a agüeyar puen dar algo parecío a esto:
<Torre de los Azulexos, Casones Blasonaes, Torre de Pumareh.o (Casa de los Cubos), Casa del Últimu Monteru, Torre de Cantimplor, Torre de los Monteros, Cases d'arquitectura popular, Palaciu de los Fernández-Villa, Casa de los Sainz de Baranda, Ilesia de Ntra. Sra. de Berrueza, Torre de les Ferradores, Edificiu del Aytu., Ilesia de Sta. Cecilia, Palaciu del Marqués de Chiloeches, La Casona, Quinta México, Ilesia de S. Nicolás, Palaciu de los Cuevas de Velasco, Palaciu del Xeneral Marcide y Torre de los Velasco>.
De xuru que nos queda daqué o apaez algo nuevo al dar el paséu. Pero esto, collacios, si vos paez vamos dexalo pa esotru día, porque toi fechu polvo d'andar per Espinosa de romería.
:::::::::::::::::::::::
ESTIMANCES a los gabitos que me permiten sobrovolar pelos tiempos de Maricastaña.
 |
| Sancho García, plaza. |
. A Mariano Cano Gordo, pol so llibru que nos guía per <Las Merindades de Burgos> . Gracies.
. Al <condadodecastilla>, onde agabitamos de cotino. Munches gracies.
. A la wikipedia, como siempre, pola bayurosa información que nos apurre.
. A les páxines Web de: "Ayuntamientu d' Espinosa los Monteros"(y a la so Oficina de Turismu), de "Sotoscueva" y "Montija".
. Al Muséu de los Monteros y la chica tan amable que nos atendió. (Entá queda que so padre cuando acabe la pandemia - m'enseñe xugar a los bolos).
. A los blogs: <castellavetula.wordpress.com>. <las merindades.com> . A Lebato deMena pol so blog: <www.lassietemerindades>.
. Nin que dicir tien que pasamos la vida rebuscando pol DALLA, l'ESLEMA y el DGLA del doctor Arias asina como polos diccionarios de sinónimos de : L.A. Prieto, X. X Sánchez Vicente y Ramón d'Andrés.
No hay comentarios:
Publicar un comentario