SUAÑOS de MERINDADES (6)
Misión : PATERNA (6)
<Nos veneros del castellán: VALPUESTA>
..TRACK, llugares pelos que Paterna y Selim van a pasar:
- Trespaderne - Pedrosa de Tobalina (cascada)- San Pantaleón de LLosa - Quincoces de Yuso - Samartín de Flabio (Agospiar).
- Berberana- Valdegobía y Valpuesta (Agospiar).
- San Millán, San Zadornil y Villafría, Escobíu del Ríu Purón (Herrán) y Frías (Agospiar)
-Y pa casina (Medina Pomar).
zzzz ... ZZZ... zzz... SUAÑU Nu (8) ... zzz ZZZ zzz
Suañu Nº (8) < Pela ribera'l Ríu Jerea >
Siempres entamamos los suaños teniendo alcordanza de lo qu'acacío nel anterior. La cabera vegada alcordaivos que salimos - la comitiva d'once - de Medina y siguimos la ruta del Ríu Nela hasta Trespaderne y ensin parar xubimos fasta'l Castiellu de Tedeja, onde agospiamos.
. Al otru día averámonos a Cillaperlata pa visitar la Santina, la orixinal, y darréu fuimos hasta'l Monesteriu de San Xuan (Cillaperlata) onde tol mundu conocía a Paterna, unes por tener estudiao con ella ya otros monxos y monxes d'oyíes. ¿Quién nun sintiere falar de la célebre fía del Conde de Castiella? . Los sos conocimientos, aficiones y esi saber tratar a la xente nos interminables viaxes peles Merindades ficíeronla más conocida qu'al propiu padre. Dos años pasare nesi monesteriu dúplice - 8 y 9 años - onde coincidió con Ermesinda, la fía de Don Pelayo y muyer d'Alfonso I, fíu del duque Pedro de Cantabria, qu'algamó a Rei d'Asturies [693 (739 -757)].
....................::::::::::::.................
- ¿Qué planes tenemos pa güei, Paterna?- entrugó Selim.
- Vamos tirar al nordés y siguir la ribera del Ríu Jerea; hai un par de coses mui interesantes: Pedrosa de Tobalina y San Pantaleón de LLosa. Agospiaremos cerca de Quincoces de Yuso, en Samartín de Flabio (Llosa) y tornaremos a mandrecha pa llegar a Berberana. Entraremos no que se conoz por Álava y pasando per Valdegobía embredaremos dica VALPUESTA, cuna del castellán. Equí tendremos qu'agospiar nel monesteriu del obispu Xuan, l'amigu del Castu. Camín de vuelta echaremos una güeyada al beyu d' Herrán o del Ríu Purón y bien poco depués entraremos na Mesa de Frías, yá cuasi al atapecer, p'anochar no que fuere un castru celta d'una tribu autrigón. Al otru día yá empobinanamos casina, la mio Medina, que nun hai otra igual. Más nun vos pueo ofrecer pero pienso que vos va prestar. El camín ta llaráu de sospreses, yá veréis.
- Si somos a ver tou eso yá podemos danos con un cantu en pechu. ¿De cuántes milles crees que tamos falando, Paterna?
- Vamos a echar les cuentes según los llugares onde camentamos agospiar.... Unes 20 milles a Quincoces, otres 22 a Valpuesta y como 17 p'algamar a Frías, en total cerca 70 milles. Cuido que de Frías val más tirar pa casa, a Medina, y non tornar al castielllu de Tedeja pos la paliza yá va ser pergrande y aquello quedárenos yá bastante bien conocío. Buenu, y de Frías a Medina pon-y otres 20 milles; asina qu'andaremos non menos de 90 milles ente vueltes de p'aquí y p'allá.
- Como cien p'arredondiar. Paezme perbién, mio Neña. Ún yá nun tien venti años y precisa descansu a fartar, si podemos atayar un poco nun mos vendrá nada mal qu'entovía tiennos de quedar enforma por visitar.
- Sí quédennos entá les visites al Valle de Mena, Espinosa los Monteros y Güeyu Guareña, si nun sal daqué cosina más...
..........................
 |
| Tabayón de Pedrosa de Tobalina |
 |
| Ponte sobro'l Ríu Jerea, el paradisu de los gatos, nin una gota d'agua, ¿por qué?.. Sigui lleendo... |
Siguimos caleyando y entramos nun cañón entre peñes, llaráu de vexetación del que nun víemos el final.
Al salir foi como alcontrar la respiración, una llanera semada de cereal hasta qu'acolumbramos nel finxu'l cielu un farallón caliar, coloráu, que rompía dafechu con aquella esplanada. Según nos díbemos averando más impresionante paecía.
 |
| San Pantaleón de LLosa - Escondéivos, que vienen los agarenos. [-¡Ai, Dios! Esto sambla ser "el fundimientu del Titánic"] |
- ¿Prestaríavos xubir ellí?. Hay una capiella mui cenciella pero les vistes del ampliu Valle del Llosa son impresionantes.
Sentamos nunes piedres a contemplar aquella especie de barcu que paecía fundir... (Tresportaos nel "Tunel del tiempu" diríemos qu'asemeyaba'l fundimientu del Titánic).
- Munchu m'estraña qu'ehí nun hubiere un castru ...
- Hebo un castru perantiguu. Alcontraron delles coses de Fierro, según cunten dalgunos espertos. Tamién romanos y árabes ye fácil que tuvieren dalgo equí. Padre tien instaláu un turruxón con cinco soldaos pa xixilar la zona. En casu d'acolumbrar daqué sospechoso ún soldáu queda y los otros salen escopetaos a comunicalo tantu a Medina como a otros puntos importantes pa ver el determín a tomar: escondese nos montes, encovanase en dellos cuévanos kársticos, abellugase en dalgún castiellu o arrexuntase pa facer un frente común; depende de la cantidá d'enemigos que se puean presentar. Yá sabéis que nun hai primavera o branu que nun nos vengan visitar.
- Ye'l mandáu de la yihad.
- Podíeis dir a Marbella, Torremolinos o a la costa d'Al Gadir, carái. Tamos cansos de mantenevos, de que nos arruinéis les colleches o de robanos la xente pa vendelos como esclavos hasta nel mesmísimu Fez . - Arrepostió Paterna con retranca talo tuviere falando col enemigu.
- ¿Qué me vas cuntar a min?. Los mios pas y yo fuimos unos d'esos esclavos que mientes, magar tuviéremos suerte asgaya; en realidá vivíemos meyor como esclavos que cuando yéremos llibres. ¿Un milagru d'Alá?... - retrucó Selim siguiendo la retranca de Paterna.
- ¿Cómo ye eso?... ¿Tienes el síndrome d'Estocolmo, Selim?
- ¡H.a, h.a, h.a!.. Non, ye que nos vendieron a la meyor familia de Córdoba; caimos en casa de Said ben Ibrahim abu Amed al Marwán, el Cadí, como yera conocíu.
- ¿Y tabéis toos xuntos?, la vuesa familia quiero dicir.
- Sí, por raro que paeza asina foi. Precisamente'l Cadí quería una familia. Sabía que toos xuntos díbemos tar más contentos y polo tanto seríemos más serviciales.
- Yera intelixente esi home... El Cadí Said Marwán.
- Sí, mui intelixente y perbona persona. Los emires - Abderramán I, Hixam I, Alhakem I - teníenlu nun altar, apreciaben el so conseyu y encargábenlu de mediar tanto ente los suyos como colos cristianos. A min queríame como un fíu pequeñu, talo un ñetu. Y yo vía polos güeyos de so. Sentábame nes sos rodieyes y cuntábame cuentos; árabes, davezu pero tamién cristianos que conocía perbién. Cuando había reuniones en casa y venía la familia d'Ab al-Karim yera una fiesta pa min. Tenía una fía del mio tiempu - Yasira - y pasábemos tol ratu xuntos; a vegaes faciendo de les nueses (echándo-y agua al vino o sal al arroz con lleche... Mas gordo foi cuando metimos una llagartesa nel pastel de madame Karim...Yá te cuntaré. Al atapecer quedábemos escondíos nun corredor que daba al patiu central escuchando les hestories del momentu: el resquemor de los ulemes col Emir, los planes d'estos gobernantes, les batalles de Karim colos cristianos o la marcha los negocios familiares ...
- La to vida paezme perinteresante y tienes que cuntámela de cabu a rabu en cuantes se presente la ocasión pero agora tenemos que xubir a aquel cuetu, que nos va llevar un cachu; de xuru que depués nun queréis baxar...
......
 |
| Ilesia San Pantaleón de Llosa |
... Averámonos al xerrón coloráu y fuimos ascendiendo pasu ente pasu per una caneya que diba arrodiando'l peñón. Topamos unes casines de llosa, habitaes, que dexamos atrás, sacante la guajería que se xunció a nós. No cimero, na campera, un turruxón de llosines, de planta y pisu, servía a los soldaos pa xixilar tol valle al abellugu l'airón que nalgunos momentos yera imposible soportar. Cerca, na corrada, unos tendeyones a teyavana guardaben cinco caballos llosinos y dos vaques monchines. Tamién había una cabaña rectangular fecha con mampostería de llosa y el techu, a un agua, del mesmu material que yera muncho más habitable que'l turruxón. Nun pandu taba asitiada una minúscula ermita que namás se componía de presbiteru ya un adríu cubiertu. Presidiendo l'altar una figura yerática que representaba a San Pantaleón portaba un tubu roxu na mano; según la xente yera'l sangre del santu que ensin más, cada 27 Xunetu dilíase, milagrosamente, llarando la Peña Colorada de creyentes pelegrinos que-y pidíen al Santu un poco valor pa enfrentar los sarracenos y torgar el saquéu añal de cases y colleches.
 |
| Ilesia de San Pantaleón |
[[ Onde hebo un castru celta autrigón, de la Edá del Fierro, tenemos güei la ilesia románica-gótica de San Pantaleón de LLosa que ta llevantada na fastera de la Peña Colorada, esi peñón caliar qu'asemeta la proba del Titanic remaneciendo ente les foles. Ye un llugar de pelegrinación; cada añu, el 27 de Xunetu miles de romeros acuden al templu a contemplar el milagru de la llicuación del sangre del Santu contenida nun frascu; anguaño ta nun conventu de Madrid. Hai quien lo rellaciona cola lleenda del Santu Grial.
Pantaleón yera un rapaz turcu (Nicodemia=Izmit) d'altu poder alquisitivu pos so padre yera maxistráu en tiempu los romanos (finales III). Alquirió una gran cultura estudiando retórica, filosofía y melicina algamando a ser el mélicu del emperador Maximiano. Per aciu de so madre convirtióse al cristianismu y anque lo dexóretornó con tal puxu qu'hasta facía milagros como'l neñu que revivió tres mordelu una serpiente. Foi bonu, xenerosu y noble repartiendo lo muncho que tenía ente los probes.
 |
| Ferregüeyando'l Valle de LLosa dende'l xerru de S. Pantaleón |
Por envidies foi acusáu de cristianu énte Diocleciano qu'intentó matalo por seis veces de formes estremaes (decapitalu, tiralu al mar, fervelu, echalu a los lleones ...). Al final morrió decapitáu en 305 convirtiendo'l sangre en lleche. Una parte d'ello, recoyío por una muyer presente, llegó a España
La estructura de la ilesia de San Pantaleón ye bastante cenciella: ábside semicircular, presbiteriu y nave. Por embargu ye una ilesia bien orixinal: bóveda de fornu pal ábside, de cañón pal presbiteriu y cúpula de pechines pa la nave. Como la ilesia ta asitiada nel desnivel de la peña hai que salvalo con escaleres internes. Sobro l'arcu toral xurde una espadaña de dos güeyos.
 |
| PORTADA de S. Pantaleón: ¿L'Atlante y El Rayu proteutor? |
Tamién nós pidimos al Santu pa que se cumplieren los oxetivos de la espedición: Que Paterna se casare con Ramiro y dambos agabitaren la repoblación de Les Merindades, que yera un fechu innegable pero merecía más atención real. Darréu fuimos baxando y al llegar al biforcu tornamos a mandrecha camín del norte; la próxima etapa tenía que ser Quincoces de Yuso anque l'agospiu fuere un poco más p'allá, en Samartín de Flabio o de Llosa, como lo queráis nomar.
Pasamos un tramu ampliu ya empiedráu, enllosáu, qu'asemeyaba una calzada romana. Nidio, el pueblín llevaba'l topónimu de Calzada.
- Tamos na calzada romana que xunía Trespaderne con Arceniega (Älava), pasando pel Valle de Mena y antes per Pedrosa de Tobalina, San Pantaleón, la Calzada y Quincoces de Yuso, en fin, per onde vamos. De xuru que la calzada pasaba per un camín de ganao treshumante que fixeren los habitantes de los castros vecinos. Equí hebo ún y en San Pantaleón otru. En cualisquier casu ye parte d'una calzada mayor que xunía Bribiesca, na Meseta, con Castro Urdiales, na costa. Hebo munchos más, como'l que xunía Berberana con El Ribero (onde ta'l Palaciu los Alvarado), mui cerquina d'Espinosa los Monteros. Precisamente se cuciaben al par de la Calzada, en San Llorente, per onde acabamos de pasar.
.............................
 |
| Campos de Cereal |
- Home, ¿semáis arbeyos?
- Nun sé que són pero podemos abrir delles vaines estremaes, a ver qué vos paez.
- Anda, per dientro hai varies qu'asemeyen a les fabes de mayu , quiciabes un pelín más arredondiaes.
- Toles lleguminoses afabaes son mui apreciaes. Cómense tul añu y de veries maneres pero les gaches cuido que son lo más emplegao.
- ¿Cómo les cocináis? Porque yá senti en dellos sitios falar d'elles.
- Cola simiente molida facemos una especie de papiella a la qu'amestamos tocín entrevenao de gochu, ayu, sal, aceite y daqué picante, como pue ser la "Yerba de San Xuan" (Hypericum perforatum). A vegaes la xente tien de conformase cola mitá d'ingredientes porque'l calcetu nun da pa más.
 |
| Fontes o Nacimientu del Ríu Jera (S:tierradeburgos.com) |
- ¿A ónde va esa carreterina que tira pal norte?
- Va pa Quincoces de Suso, onde tán les Cueves del Agua, nel Rellosu. A partir d'aquel turruxón que ves ellí arriba, cosa de mio pá, entres nun mundu cuasi máxicu camín de los Veneros del Jerea (Fontes del Jerea) onde ñaz el Ríu, xusto nos Montes de La Peña que cola Sierra Carbonilla formen una barrera que torga la entrada nel Valle de Mena.
- Sí, pero la barrera tamién ye una pega pa vosotros ....
- ¡H.a, h.a!.
- A ver, ¿qué picardía me quies cuntar?
 |
| Tunel: La Complacera (S:arathosendista.com) |
- To padre ta en tou, ¿eh?. Ramiro tendrá bona cunta d'ello.
*[[ El Tunel de Complacera ta fechu a mano nel sieglu XIX (1891) col envís de tresportar el carbón del Valle de Llosa al de Mena. Mide 66 m de llargor. Al salir acolumbres Villasana y màs al fondu los Montes d'Ordunte. ¿Nun taría'l tunel yá entamanáu dende cuantayá?....]]
.........................
- Buenu, agora, damos un vueltu pel pueblu y yá colamos pa Samartín de Flabio o de LLosa. Son 4 milles namás.
- ¿Qué hai nesi pueblu pa que nos quieras llevar precisamente ehí?.
 |
| Samartín de LLosa,n'actualidá. Paterna y Selim nun tuvieren la suerte de velo asina. (Semeya: JIAlcalde.wordpress.com) |
-Trátase de da-y cuayu al obispu Pablo, que se sienta protexíu pol poder, ¿nun ye asina?.
- Tan cuciu como siempres, Selim. Ye perimportante esti monesteriu, niciu y madre d'otros que puean nacer al abellugu de so.
- Sí, yá me decato, últimamente Aderramán II anda esprecetáu y les noticies que tengo son esmolecientes. Anda arranáu por facese col control de la Bureba, pasu p'Álava y camín de Navarra y Francia y como yá tien el territoriu interior bastante controláu nun va parar coles racies hasta que'l camín de Francia quede espeyáu.
- Nosotros - diz Paterna - vamos ponéi torgues a mamplén y yá veremos qué pasa colos siempres impredecibles Banu Qasí, con Íñiguez de Pamplona y mesmos colos Condaos Catalanes. Cuido que-y va valir más siguir refocilándose nos harenes ....
- ¡Paterna, qué enterada tás !
 |
| Morciella de Burgos (Semeya: Web municipal) [Nun preguntes que yá nun queda ná] |
A les puertes d'aquel entamu de cenobiu asitiáu nos rimeros del Valle y a les faldes de la Sierrra Salvada fuimos recibíos talo héroes pol obispu, los pocos flaires qu'ellí había, unos cuantos albañiles y dellos repobladores que taben iguando'l tarrén. Imaxinaben que taríemos famientos y cansaos asina que nos tresnaron una cena propia d'una reina: unes morcielles de Burgos d'entrante, unes gaches cencielles pa entonar, unes truches del Jerea salteaes de perrechicos y xamón, cabritu a la estaca a fartar, quesu fresco d'oveya churra y miel; y pa beber vinu de Berberana que compren a los mercaderes que van de la Rioh.a dica Medina de Pomar. Quedamos toos percontentos por una razón ya otra; nós, pol candial agospiu y ellos por sentise importantes y sobre too acompañaos:
- Nun tamos solos nesti esbrexar.
- Y cuando Paterna sía Reina tendréis el gabitu real.
- ¡Ixuxú! ¡ Viva la reina d'Asturies! ¡Como Paterna nun hai otra igual!. - Y como un traguín de vinu tampoco. Hasta los flaires baillaben al final.
..........................................................
 |
| Perrechicos. Seta S. Xurde (S:cantabriaburgalesa.com) |
Ta formáu por sombreru y pie. El sombreru, carnosu, tien de 4 a 15 cm y ye de color blancu o crema cola superficie llisa y mate. De pequeña tien el marxe mui enrolláu abriéndose más tarde. Les llámines, nel interior del sombreru, son blanques y tán bien apretaes. El pie ye gurdu y del mesmu color que les llámines. La carne ye mui trupo y arreciende a fariña. La esporada tamién ye blanca rosada.
Puen comese de mil maneres: Crudos y n'ensalada con aceite y sal. Revueltos con güevu tampoco tan nada mal. Acompañando a carne y pescao dan un aporte especial. Salteaos con ayu y xamón ibérico ye'l nun va más. ]]
.....................................
NOTES:
 |
| Monestriu Samartín del Pedrosu. Fruela (759) |
[[ L'obispu Pablo inauguró'l Monesteriu de Samartín de LLosa el 4 de Xunetu del añu 853, en tiempos de Ramiro I, el maríu de Paterna. Facemos un apañu camentando que lu entamare llevantar dellos años antes. ¿Por que non en 841 pudire tar nello?
L'obispu Xuan llevantó'l Monesteriu de Valpuesta dellos años antes (804) siendo Rei d'Asturies el so amigu Alfonso II el Castu.
Fruela I, el pá del Castu, llevantó'l Monesteriu femenín de Samiguel del Pedrosu a la vera'l Ríu Tirón el 24 - 4- 759 (Belorado-Burgos) siendo obispu Valentín ya abadesa Nona (Nuña) Bella, probable pariente del Rei, que comandaba a 26 monxes. Vese que los reis asturianos tábemos dafechu involubraos na Repoblación de Les Bardulies y Castiella dende munchu tiempu atrás; quiciabes Doña Munia, la muyer del Rei Fruela tevo dalgo que ver. En cualquier casu vese que los asturianos siempres fuimos la H.]].
..........................
Al otru día, bien tempranino, fuimos visitar les güelgues de la villa romana de Casarejos travesando los campos tapizaos del mariellu trigu que namás ruempen l'encantu por mor del pueblu y la villa. Llamáronnos l'atención los cachinos del mosaicu, tan equilibraos, que queden al descubiertu seique los tienen dalgo tapaos - con tendeyones a teyavana - pa torgar l'estrozu total.
 |
| Los racimos d'uva yá tán na copa; ¿quies un traguín? |
- Los que más me gusten son estos qu'amuesen los racimos d'uves. ¡Qué cosa tan orixinal!
- ¿Qué vos paecen les termes?- entrugó l'obispu. Puen estremase perfechamente'l prefurnium, l'apodyterium (vestuariu), el caldarium, el tepidarium, frigidarium .... Son delles les villes que surden al rodiu la calzada que diba de Berberana a Ribero, un ramal de la "Vía Aquitana": Villalva, San Llorente, Ríu, Berberana, Villaventín.... Toa esta zona tuvo de tener un altu poder alquisitivu pos estes villes nun yeren cosa dala.
 |
| Casa Llosina |
Costó trabayu colar. Tábemos a gustu ente aquella xente que tenía una idega y lluchaba por ella con allegría pensando nel más p'allá. Embredamos camín de Villalba de Losa y Berberana. A manzorga quédanos la Sierra Salvada que nos separta d'Álava y que ta afuracada por innumerabes simes d'orixen kársticu, fasta llegaron contase cuarenta y pico km de galeríes soterrañes, lo que nun torga pa que sobresalgan montañes como'l Picu del Fraile (2001 m.) . Estes agües soterrañes xurden pa formar una canal qu'emboca nun tabayón de ¡222 m/d'altor! ( Tabayón del Nervión ), y nun ye l'únicu. Al esterior trátase d'un fayéu pergrande ya una pradera inmensa onde pastia la mayor parte de la cabaña ganadera llosina. Por mor d'ello tamién son mui célebres les lloberes de piedra, onde estos depredadores tiene comida a fartar.
 |
| Monte Txalarzo calando la "chapela" (Semeya: mendikat.net) |
Pasamos delles aldegues de pequeñes construcciones tipu llosín, con piedra llosa de mampostería y sillares nos vanos. Lo que nun pue faltar ye la solana- una especie corredor nel pisu altu - abierta al sur, pa celentar la casa.
- ¡ Mira que sombreru tien aquel picu!
- Ye'l Monte Txalarzo. A esa nube que lluèu desciende y esvanezse en forma de casacada equí nómase txapela. Estes fasteres son perriques en setes perrechico, como les que cenamos ayeri ya otres que nomen níscalos. Hai animales xabaces como xabalinos, foines o rapiegues y dalgún qu'otru llobu. Pero lo que más atrái l'atención son les aves rapaces como la utre lleonada y les choves, qu'añeren nos cantiles de les roques.
 |
| Toros de Lidia (S: Alianzarural.es) |
Cerca de Villano pastiaben unos torucos negros, con munchu arranque y cuernos afilaos que se tiraben a nosotros, sobre manera a Paterna que trayía una chalina colorada (fular) pa protexer el pescuezu y la cabeza del sol , o del fríu. Tuvo qu'espoliar bien el caballu seique un toru diba encerriscáu tres della, como llocu. Cuando al correr perdío'l tapaboques coloráu vio como'l toru s'enraxonaba con él escaeciéndose d'ella mesmamente. Un vecín díxonos qu'esos torinos emplegábenlos los mozos del pueblu'l día la fiesta grande. Soltábenlos peles cais del pueblu produciendo una escorribanda xeneral ente los mozos más avezaos. Na esplanada del valle, ún por ún, cada mozu amosába-y un capote coloráu hasta qu'embestía'l condergáu. Cuando lu tenía enriba apartábase y el toru tirábase al trapu mentanto'l mozu, aclamiáu pola xente, sintíase talo un héroe tres ganar una batalla. L'encierre y la corrida llamáben-y a esta parte de la fiesta que delles veces terminaba con dalgunos más atrevíos na enfermería, pero los torinos yeren respetaos talo d'animaos trasgos se tratare.
- Prestaríame ver una corrida d'estes, tien de ser perdivertío pa la mocedá.
- Nun te creas Selím; delles vegaes suel trayer bonos disgustos. Tán permitíes porque esto obliga a los mozos a tar en bona forma pa cuando tengan que lluchar de verdá.
- ¿Pa ónde embredamos, Paterna?
- Dica Villalba de Losa y Berberana.
Al oeste díbemos columbrando nel finxu del cielu los Montes de Santiago, barrera natural cola llanera alavesa a la qu'algames al encruz del Puertu d'Orduña. Cruciamos una riega cerca del caseríu de Zaballa que, según Paterna, tien formao un escobiu de lo más prestoso.
- Estes tierres qu'arrodien estos montes tán siendo repoblaes por xente venío del norte, sobre manera vascones. Si tuviéremos tiempu podríemos esfrutar d'esa aquiteutura popular endémica d'esta zona: Caserones rectangulares de mampostería de llosa con ventanes pequeñes pa torgar la perda de calor y balcón corríu nel pisu superior, lo que n'otros llugares ye conocío como la solana. Padre tien equí montáu otru pequeñu castiellu, poco más qu'un turruxón, pa defender la zona.
.........................................
 |
| Casa castreña circular de madera y barru |
Pasamos per Berberana como si tal camentando nes belleces naturales que dexáremos atrás magar que dalgunes nun les llegáremos a ver sacante na mente de Paterna, pero viendo lo que víemos yera fácil aldovinalo. Entramos en tarrén de vizcainos a los nun yéremos compender cuando falaben entre ellos. Entendíense nun idioma estremáu dafechu a los derivaos del llatín. Nun ye d'estrañar, tamos n'Uxama Barca (Osma pa los amigos) una aldega de la la tribu los autrigones d'orixe célticu o precélticu.
 |
| Valle del Ríu Tumecillo, dende'l castru. Tamos en tierres d'autrigones (alvaentubotas.com) |
- Mui cerquina d'equí , en Caranca, queden les güelgues d'un castru celta, el Castru de Lastra, un pobláu amuralláu con una emplalizada y cases circulares de madera y barru que nun debió ser nada pequeñu. Tiénense atopao cacíes, aguyes y fíbules de bronce y delles pieces de fierro, precisamente la dómina de más puxu polo que dicen los restos alcontraos .
Tevo abandonáu durante un tiempu a partir del sieglu I pos fuere una menaza pa los romanos que los preferíen asitiaos nel valle; otramiente muncho más granible pa trabayar l'agricultura. Agora, por mor de la invasión árabe, tamos repoblándolu nós pos ta perbién asitiáu na fastera sur d'esta pandiella que tamién tenía terraces pal ganáu y pa una agricultura biltante. Nós yá llevantamos la capiella, la necrópolis y delles cases circulares ya otres rectangulares. Tamién semamos nel valle del ríu Tumecillo seique si vinieren los moros podemos refuxamos nel castru onde tamos llevantando muralles con piedra.
........................
 |
| Valdegovía: Castiellu d'Astúlez (Semeya: valdegovía.org) |
Siguimos pel camín romanu que venía d'Orduña . Pasu ente pasu pola verde y arbolada vega del Ríu Omecillo llegamos a Valdegovía, onde entá falaben muncho esa llingua ancestral que nomen euskera.
- Mirái onde Padre entamilgó un turruxón; como veis ye práuticamente inconquistable, tien cuasi too controlao.
Pasamos Villafañe y Gurende y entramos en San Zadornil, mui cerca de Valpuesta, onde pensamos pasar el restu'l día y anochar.
- Aquella cordillera del sur ye la Sierra d'Árcena que separa San Zadornil del célebre Valle de Tobalina, onde ta Frías, sin dir más p'allá. Pero nós vamos de momentu al norte, camín de Valpuesta, xurisdición que foi del obispu Xuan, amigu del Rei Castu.
Pasamos pela aldega San Millán onde l'Omecillo, más llibre, toma la llibertá d'ensanchar.
- Esti pueblín fuere un finxu visigodu otru tiempu como amuesa una canciella qu'atopamos na ilesina que presenta un adríu mui singular. Tamién ye célebre porque los vecinos - pelotaris, los nomen -tienen el vezu d'entretenese golpiando un pelotu escontra una muria siguiendo ciertes normes. ¡Menudu alborotu armen cada vez que faen un tantu! Cuido que ye una disculpa pa tomar un tragu vino per una bota que samba ser un pelleyu. Pero nun-yos cai la chapela, non ... ¡Tiesos como un garrote!.
- Paterna, ye raro que nesi Picu nun hubiere un castru.
 |
| El pobláu d'un castru (Semeya: Wp) |
- Nel Picu San Pedro tiénense alcontrao güegues d'ún pobláu y restos de trabayar el fierro. Tamién tuvieren viviendo los romanos pero abandonóse y agora, talo en Lastra, tamos repoblando con xente bárdulo dao que los sarracenos esmuciéronse en tiempos d'Alfonso I.
- La repoblación nesta zona ye un fechu esencial.
- Dafechu. Agora vamos pa Valpuesta, que foi'l centru principal mercé a los desvelos del Obispu Xuan allá polos entamos del siegu (IX). En 804 fundó'l Monesteriu, guía pa tola zona pero entá punxo en marcha otros: Yá conocemos el de LLosa, llueu Valdegovía, Ayala, Tobalina, valle de Miranda o Santa Gadea. Son la continuación del repoblamientu del Valle de Mena por Lebato y Muniadona asina como los del Área Patriniani, hacia Espinosa los Monteros, polos sos fíos Vítulo ya Ervixo. Anguaño va tirándose hacia'l sur: Villarcayo y Medina de Pomar hasta llegar a Tedeja, en Trespaderne.
- ¿Ye la Ilesia la dueña de les tierres que tán embaxo la so xurisdición?
- Non exautamente. La Ilesia controla, ye l'autoridá pa que nun heba desmanes ente los repobladores y que presures ya escalios se faigan ensin abusos y queden les tierres rexistraes. Ye un fueru lo que firma Alfonso coles ventaxes ya obligaciones que lleva pa consigo:
. <Que los pobladores puean pastiar llibre nos mios montes y cortar la madera que precisen pa cases o ilesies. Y qu'usen les campes, fontes y ríos ensin pagar portazgos nin montazgos>.
<Que los pobladores nun paguen castillería, anubda o fosadera y tean desimíos de la entrada de sayón>
. Fuimos recibíos nel pequeñu Monesteriu de Valpuesta pol obispu Xuan. Taba mui mayorín talo que so amigu'l Rei Castu. Púnxose tan contentu al venos - sobre too a Paterna - que tuvimos mieu-y diere daqué. Yo, Selim, dixi-y que vivía n'Uviéu y tenía munchu tratu con él, pos manteníame d'asesor dao los mios conocimientos del mundu árabe. Saber que Paterna podía ser la muyer del futuru Rei púnxolu entá más afatáu pos dábase cuenta les ventaxes qu'eso podía trayer pa toa Castiella y pal cristianismu en xeneral.
- Tres de la cena tienes que cuntame munches coses, Selim; y tu, Paterna, tamién. Equí lleguen poques noticies y menos de primer mano como les que vosotros trayéis. - Y salío como unes castañueles hacia la cocina pa tresmitir delles órdenes a los cocineros.
Mentanto tresnaben la cena ya iguaben los cuartos pa dormir, dao que pa nada cuntaben con nós, los mozos de cuadra ficíerénse cargu los caballos y tres llevalos a abebentar al Regueru de Mioma pasáronlos a les caballerices pa da-yos una bona peselbera y darréu a descansar, que bien lo teníen ganao. Nós, tres tomar un bocáu con una xarra vinu, fuimos dar una vuelta pel aquel pueblu que nun dexaba ser la capital espiritual de San Zadornil y los valles de LLosa, Valdegovía y Tobalina, vamos, del sureste de Castiella (Les Bardulies o Merindades).
....VALPUESTA .
 |
| El cabezaleru Monesteriu de VALPUESTA (804) , obra del Obispu Xuan |
Cenamos tempranino. L'abá ya obispu Xuan quería charrar con nós pero nun podía quedase hasta mui tarde pos yera bien mayor. Brilláben-y los güeyos de gayola pero les engurries de la cara , aquel pelo cande y el gabitu del cayáu amosaben a les clares qu'a aquel lluchador nun-y quedaba munchu tiempu p'alcontrase col Señor. Esmeróse lo que pudo pa que tuviéremos una yacuada al altor de los personaxes: Embutíos y morciella d'entrante, corderu al fornu detrás, unes truches del Mioma con xamón y de postre - esto foi la rebomba- ¡arroz con llechi!; sí, como lo oyís.
 |
| Arroz con lleche, requemao |
- ¿Préstavos l'arroz con lleche?. Ye una receta d'un fraile mozárabe. Yá sabéis que los árabes traxeron l'arroz a la península. Elli añedió-y la lleche de les vaques y l'azucre. Un día calentó más de la cuenta y quedó-y requemao; d'entós p'aca yá lo facemos aremente calentando con un firerru penriba, pos sabe enforma meyor, ¿o non?.
- Gracíes pola cena, señor abá; quedamos como obispos, meyor, como Reis. Taba tou a cual meyor. - Esti comentariu prebocó una carcaxada xeneral.
- Gracies a vosotros por alcordase de nós. Pero agora cuntáime daqué. ¿Cómo ye qu'Alfonso manda un embaxador a Les Merindedes? .
- Nun vengo equí por mandáu d'Alfonso, seique soi conseyueru se so. Mándame'l Gobernador de Galicia, Ramiro, que ceo sedrá rei y quier emparentar en Castiella, dao que ta vilbu d'un tiempu acá.
Xuan miró con retranca a Paterna ya entrugó-y derecho:
- ¿ Asina que vas ser Reina, Paterna? .- ¡H.a, h.a, h.a! , rieron toos.
- Tamos en tratos obispu, nun ye too "coser y cantar". - arrepostió Paterna - y tornó la carcaxada xeneral.
- Selim, esi Ramiro nun pue facer meyor eleición. Paterna ye la muyer más duce y preparada de tola rexón. Si yo nun fuere obispu .... - ¡H.a, h.a, h.a ....! .- La carcaxada produxo otra vuelta la gayola los presentes que taben pasando una velada de lo más candial.
- Nun s'esmoleza Don Xuan - dixi con retranca. Va cuatro díes que la conozo y yá la tengo nun altar. Por min nun tien de quedar. Paterna sedrá la reina d'Asturies, a nun tardar. Amás, so padre ye amigu de Ramiro y son del mesmu palu no que cinca a repoblar. La cosa pinta xenial. - Otra vuelta les rises por esi intentu de rimar.
- ¿Y tu que me cuentes, Selim Marwán?- otra vuelta la risotada xeneral pos diéronse cuenta que'l Obispu Xuan terminó la frase cola rima en "á" que venía repitiéndose dende que s'entamó a falar.
- Yo soi'l mozárabe Selim ben Said iban Ibrahim al Marwán. Llevo diez años n'Asturies pero fui criáu na Córdoba de Hixam, Alhakem y del segundu Abderramán. Agora vivo n'Uviéu al amparu del rei Alfonso que me tien talo un asesor más por mor de los mios conocimientos del mundu árabe seique me llama pa cualisquier decisión que tenga de tomar; tenemos una rellación de lo más afayaiza y trátame como un amigu o un familiar. Ye un home mui intelixente, ta perbién preparáu y tien les coses perclares no que cinca al nuevu orde góticu que quier instalar. Uviéu, la <Civitas episcopal>, tien de ser la cabeza del reinu que Toledo nun supo llevar. Hispania precisa una Roconquista y el rei d'Asturies ye por agora'l cabezaleru principal.
- ¿Ónde nacisti? ¿Cómo terminasti en Córdoba?
 |
| La Rebollá (Llaviana) |
- Esto precisa de munchos obreros y nalgún sitiu tienen d'agospiar - camentaron estos cucios parientes que mercaren una casuca con cuadra tres vender tolo que teníen nel pueblu. Yeren mui decidíos, gracies a Dios.
- ¿Dísteis con Maxilo? ¿Hebo remediu pa lo tuyo?
- Sí, dimos con elli de casualidá dao qu'esti home andaba siempres d'equí p'allá, estudiando les plantes, la naturaleza, les persones ... Yo nun m'alcuerdo, dende llueu, porque entá nun cumpliere l'añu pero tenemos falao d'ello en casa munches veces. Creyo que me me dio dellos yerbatos, unos p'aposentar el cuerpu ya otros pa la gana de comer pero sobremanera encamentó a los mios pas que nun s'esmolecieren tanto que col tiempu llegaría onde los demás.
- ¿Y foi realmente asina? ¿ Valióte pa dalgo'l tratamientu?
- Cuando salimos de San Vicente fuimos a la posada los parientes que nos llevaren a ver les obres de la capital aprovechando qu'había poca xente agospiada aquellos díes n'Uviéu. Viendo les obres creyo que yá qu'entamé a alicar.
- ¿Por qué taba mediu vacía la <Civitas episcopal>?
 |
| ¿Les güestes d'Abd al Karim? |
- ¿Y qué pasó con vosotros?
- Cuando mos dimos cuenta yá nun yera plan d'escapar pos el ruxerrux del exércitu enemigu yera bestial. L'árabe pensaba qu'Alfonso taría na ciudá y diba esmigallando tolo que se-y ponía per delantre: San Salvador, Santa María, San Tirso, el Palaciu de Fruela, San Vicente y hasta l'entamu d'acueductu ... Nosotros trés tábemos abrazaos a los pies de la estatua del Salvador cuando los soldaos entraron a saquear la catedralina que llevantare Fruela y qu'Alfonso taba enantando. El mesmu Abd al Karim entró en San Salvador y eso foi pa nós la salvación. Un bereber tomare a padre pa vendelu como esclavu mientres otros dos intentaben separame de mio madre - qué glayíos daba - y cuando taba a piques de tayame la cabeza sintióse una voz atronadora que paró de sópitu la execución: -¡Alto, a esos tres non!. Ponéilos aparte y tratáilos bien; tengo un encargu que cumplir. - Yera'l mesmísimu Abd al Karim el que diere la orde.
- ¿ Y qué pasó con vosotros?
 |
| Córdoba nel sieglu IX |
- Fuimos tresportaos hasta la capital del Emiratu nuna carreta talo si fuéremos un artículu de luxu; nin les saqalives diben tan bien como nós. Los homes, encadenaos, formaben una filera humana per aciu d'una soga, y pensái que fueren dende Uviéu hasta Córdoba y d'ellí pue qu'hasta Fez, onde yeren vendíos como esclavos. Les muyeres tamién pero con elles teníen un poco más de miramientu porque munches d'elles diben servi-yos como diversión. Otres vendíes como esclaves de tribes estremaes, según la edá y el color del pelo o de los güeyos (¡hai que h.odese). Nosotros trés fuimos derechos a una casona-palaciu - más guapa nun podía ser - que taba asitiada al este les afueres de la ciudá, cerca de la Puerta "Bab al Yadid" . Enfrente víase'l célebre Arrabal de la Sacunda al que llegábamos faciendo equilibrios travesando la vieya Ponte Romana del Ríu Guadalquivir que ta bien cerca de casa. Yera un pequeñu barriu de ricos, y non tan ricos, el Shubullar lu nomaben.
- ¿Y los amos yeren bonos o teníenvos talamente esclavizaos?- entrugó Paterna.
- Yéremos esclavos, sabíemoslo, pero'l tratu yera tan beninu y tan candial que malpenes notábemos que tábemos aprisionaos; yéremos talo unos parientes llonxanos , a xucu baxeru, qu'acoyeren en casa pola primera vez. Padre trabayaba nes tierres que teníen n'Axarquía, nos arrabales la ciudá, xusto al noreste del Barriu Mozárabe. Cuando-y sobraba tiempu curiaba de los xardinos del patiu casa, nel Shubullar; yera un apasionáu de les flores y taba namoráu d'quel patiu cordobés. Col tiempu quedó namás pa mimar aquel Paradisu Terrenal. ¡Anda que nun presmía l'amu cuando veníen a casa los poderosos amigos de la ciudá!. Madre entamó de molinera porque yera un oficiu que conocía bien. De mocina trabayare con un tíu nel Molín de la Chalana, que lu separaba de Llaviana (Flaviana, la villa de Flavio) el ríu Nalón. Como yera mui artera na cocina cuando había fiestes en casa - cosa bastante corriente - llamábenla pa echar un gabitu y al final terminó quedándose dafechu na cocina; naide como ella pa da-y gustu al arroz árabe con gustos estremaos según el visitante que tuvieren: con maricos, con pitu caleya, con pescaos del mar o del mesmu Guadalquivir ... ¡Ai del "arroz con llechi"!, que-ylo pregunten a Abd al Karim, un visitante habitual cuando nun andaba en guerres. Paecía imposible qu'aquel temible guerreru-y prestare tantu cantar y recitar poesíes.... Les contradiciones de les persones. Col tiempu foi pa min como un padrín: cuntábame cuentos, facíame rimar poemes de guerra y de cuando en vez trayíame regalinos que compartía cola so fía, el meyor regalu de toos . Lo qu'enxamás facía delantre mío yera falar mal de los cristianos, al aviesu, siempres emponderaba'l so valor; nun sé porqué, igual yera pa da-y más batafuste a les sos fazañes.
- ¿Y vosotros, los guajes? ¿Cómo foi lo vuestro?
- A min curiábenme les criaes de la casa. Como nun pesaba nada y nunca nun lloraba andaba de mano en mano talo fuere un muñecu, asina me teníen d'estrozáu... Nunca dengún cristianu tuviere tan bien tratáu n'Al Andalus. La pena - daquella - ye qu'al añu y mediu de llegar a la capital del Emiratu ñació la mio hermana ..... Entós los mimos yá taben más repartíos y yo tomé'l determín de facer migues con Yasira, la fía de Karim, que yera más o menos del mio tiempu y teníemos gustos - y disgustos- asemeyaos. Xuntos xugábemos al esconderite pela casa, xuntos xugábemos al cascallu (aprendiónos madre), xuntos xugábemos al rei y la reina, a moros y cristianos (davezu yo yera'l moru y ella la cristiana; seique fore roxa preferíala de mora, yera más candial), xuntos colábemos de casa pa perdenos nos Sotos de l'Albolafia, el nuesu "territoriu comanche" (¡Chisss! ... Nun digáis nada, baxái la voz, ye'l nuesu secretu...) Tamién tábemos xuntos nes rodiyes del Cadí o la muyer de Karim cuando cuntaben les hestories de les guerres, de la marcha los negocios o les coñes de la jet cordobesa; total, como nun nos enterábemos de nada ... O eso creyíen ellos... ¡H.a, h.a!.
- ¿ A propósitu, quién ye'l Cadí?
- L'Amu. La persona que nos mercó (¡Non!, fuimos un regalu d'Abd al Karim). Said ben Ibrahim ibn Amed ben Bisrh al Marwán, conocíu como'l Cadí, yera un ulema de carrera reconocíu poles sos dotes de tratu, d'impartir xusticia, d'algamar acuerdos imposibles... De negociador. Empleáu polos emires como embaxador n'asuntos esternos, y daqué vez internos, algamó a ser un xuez al que toos queríen pa sigo mas naide quería tenelu al aviesu. Tampoco nun-y faltaben dotes de mandu. Aidáu polos hermanos llevaba los negocios familiares que yeren daqué importantes pos so güelu fuere ún de los principales conquistadores de la ciudá de Córdoba: Amed ben Bisrh, suboficial del Comandante Mugait Al Rumí (el romanu), que terminare ascendiéndolu a oficial. Participó con elli dafechu na invasión d'España, primero a les órdenes del xeneral Tariq ibn Yazid - que nun pisa Córdoba pos tira encetáu a por la capital ,Toledo - y más tarde con Muza ibn Nusayr na incursión qu'esti fizo hasta Galicia. Cuando en 714 Muza y Tariq tornen a Damasco, por orde del califa Al Walid, Mugait ya Amed van con ellos pero más tarde Amed ben Birsh vuelve a Córdoba pa quedar dafechu estableciíu ellí.
 |
| Noria del Guadalquivir p'abastecer l'Alcázar. (S: artelista.com) |
Na capital exerce d'oficial nel palaciu del Emir al tiempu que va mercando terrenos n'Axarquía que dedica a l'agricultura per aciu d'unos esclavos que merca a bon preciu. Na quintana (alquería) produz cítricos, arroz, berenxenes, piescos, azafrán, figos y caña d'azucre. Vende nel zocu y emplega parte del dineru en poner una panadería. Les coses marchen bien y merca unos terrrenos nel Shubullar, al pie mesmo del Guadalquivir. Yá taba casáu y tenía dellos fíos cuando asciende a Comandante en Xefe del Alcázar. Daquella va tresnando una casina cerca la Puerta Bab al Yadid. Pero tenía otres idegues, vía mui llargo'l primu pequeñu del califa Al Walid*... Seique va ser el so fíu Ibrahim el que les lleve a cabu: Consigue la concesión pa establecer , más bien reparar, una noria romana nel Ríu Guadaquivir cola fin d'abastecer d'agua los xardinos del Alcázar y a la mesma población civil. Aquello fízolos ricos dafechu pero la cosa nun quedare ehí. Instaló dellos molinos nel Ríu, unos pa tresnar fariña ya otros pa estrayer aceite de les olivares que cultivaba n'Axarquía y que lluéu vendía nel mercáu del Zocu y n'otres munches ciudaes d'Hispania (la zona árabe).
 |
| Al Walid I (705-715) |
*[ Al Walid (668 -715) ibn Abd al Malik ben Marwán foi un califa omeya, el terceru de los marwánides, que gobernó ente (705-715). Mui bon dirixente amplió'l califatu dica Oriente (Indo y Tranxoniana) ya Occidente (ordenó la toma de la P. Ibérica). Reforzó l'exércitu y creó una Marina de Guerra perpoderosa. Completó la organización del Diván (Alministración). Foi un benefactor de l'arquiteutura (Construyó la mezquita de Damasco y reparó la del Profeta en Medina) y de les artes en xeneral. Esmolecíu pol binestar común construyó dellos hospitales ya instituciones educatives. (Yera pariente de mio nos "Suaños de Merindades").]]
- Da gustu falar contigo, Selim - arrepostió Xuan. ¿Por qué nun vos quedáis un poco más? Podíemos falar de la to vida en Córdoba y tamién de les bones obres del mio collaciu Alfonso n'Uviéu, ¿qué vos paez?
- Tamos encantaos con to recibimientu, Xuan - diz Paterna. Sedría prestoso quedar dellos díes más pero quédennos munches Merindades por visitar y Selím tien qu'andar con priesa pos Ramiro anda apuráu ...
- ¡H.a, h.a, h.a.....! - Hebo risotada xeneral.
- Yá me faigo cargu - camienta Xuan, ensin perder la sorrisa.
- Bueno - intervién Selim-, ye qu'Alfonso tien alifaces cada pocu, yá ta mui gastáu y a Ramiro convenía-y tener iguáu l'asuntu del casoriu enantes de que pase ná....grave. Si Alfonso asistiese a la boda en Salvador, por exemplu, daría-y al candidatu al tronu l'emburrión definitivu, pos siempres hai dalgún na solombra que se quier colar.
- Bien, tendré que conformar. Y tu, Paterna, ¿cómo lo lleves?.
- Tocántenes al casoriu toi bien tranquila pos ye Ramiro'l que tien de falar. Yo sé lo que m'espera y toi dispuesta a ello seique la vida ta enllena de sorpreses. No que cinca a Castiella la cosa pinta bien. Padre ta llarando de castiellos el sur de Les Bardulies y dellos sitios más. La Repoblación ye un fechu pa nós trescendental, como bien sabéis, obispu Xuan. Yo agabito lo que pueo visitando y dando cuayu a los valientes que s'atreven a asitiar en Castiella.
 |
| ¡Dios! : La verdá. |
- ¿Ände ta pa ti la verdá, Selim Marwán?
- La verdá alcontréla nun prisma de cristal piramidal. Si faes pasar un rayu de sol al traviés del cristal la lluz disvia refractada en dellos colores diferenciaos. Asina ye Dios, un únicu rayu de lluz blanco pero que la xente ve de colores estremaos, talo Cristu, Yavé, Alá, Xúpiter, Odín, Dagda, Lugh, Manitú ... Cumple col to Dios al empar que col to coral; yo fíome más d'esti que me dicta: << Nunca nun matarás y ayuda a los demás siempre que pueas >>.
:::::::::::::::::::::::
... [[VALPUESTA , nos veneros del castellán:
 |
| Arribando a Valpuesta, antiguamente amurallada. |
VALPUESTA ye una llocalidá de Burgos, llindando con Álava, llancada nel Valle de Valdegovía y dientro del parque natural de los Montes Obarenes - San Zadornil . Tamién ta encladava na comarca de Les Merindades dependiendo del Ayuntamientu de Berberana y al Partíu Xudicial de Villarcayo. Tien dellos mananciales o veneros importantes talo: Fuente la Salu, Los Canónigos y Terreros pero'l veneru más importante, según el mio sentir, ye ser la cuna del castellán.
 |
| RETABLU Sta Mª Valpuesta |
 |
| Del Cartulariu de Valpuesta |
...........
¿Qué más coses podemos apreciar en Valpuesta?
Valpuesta algamó a ser un pueblu importante al correr de los siglos como amuesen los edificios tan importantes que se tienen llevantao dientro d'unes muralles defensives .
1. LA COLEXATA DE SANTA MARÍA .
 |
| Retablu y vidrieres |
La colexata pudo partir d'una ilesia visigótica qu'aprovecharía l'obispu Xuan, amigu del Castu, en 804 como aniciu y gabitu a una seríe de monestrios que se fundaren na redolada embaxo la so xurisdición. Foi enantándose col pasu los sieglos: mozárabe, románica y gótica, que ye los que quedó.
Ye un edificiu pergrande tanto la nave como'l Calaustru y son dignos de mención el Retablu y les vidrieres seique tol edificiu causa almiración. La pena ye que ta <cuasi> abandonáu a la mano de Dios, de nun ser polos vecinos yá nun quedaba nin... ¿Cómo pudieron marchar los <Cartularios> ensin dexar unos <facsimil> palos iñorantes como yo?....
Amás de la Colexata alcontramos:
 |
| Turruxón de los Velasco |
2.- EL TURRUXÓN de los VELASCO o Torre de los Condestables (9,74x6.s6 m) ye una torre l'homenax llancada nel sureste d'un complexu defensivu del XV, en sillares, que mide (20,65x17,20 m.) y de puerta apunta.
Componse la torre de planta baxa y tres pisos y ta llarada d'aspilleres y saeteres defensives. Les almenes pasaron a ser un teyáu a 4 agües pa que tuviere más protexíu.
 |
| Palaciu de los Zaldivar |
3.- La CASA-PALACIO de los Zaldivar - ún d'ellos algamó a Inquisidor - qu'antiguo taba xunida a torre los Velasco seique tenía una puerta d'entrada a l'amurallada ciudá. tardo-renacentista lleva una inscrita na fachada una frase barroca propia del <Carpe Diem>:
<Vive bien que has de morir>. Tomamos nota, inquisidor. ]]
:::::::::::::::::::::::::::::::::
Al otru día nun pudiemos madrugar. Llevantamos tardiquino, cuando l'alba yá colare cuantayá. Tomamos, eso sí, un bon desayunu p'allargar la hora del almuerzu: Una frutes pa entonar, pan tostao con mantega arremoyao nuna escudiella de barru ya unos frutos secos, ñueces y ablanes, p'agarrar enerxía.
 |
| Ruta d'a caballu |
- ¿Qué camín vais tomar?- entruga l'obispu Xuan.
- Queremos agospiar en Frías pasando per San Millán de San Zodornil, San Zadornil, Villafría de S.Z., (Colláu de Santana, Cascada Ríu Purón, Ermita San Felices, Desfiladeru Ríu Purón,) Herrán , Ranedo, Quintana de M.G. y Frías [25 km= 15,6 milles)]
- La ruta ye perguapa pero un poco abegosa. Travesaréis montes, viesques ya escobios; veréis tabayones impresionantes y alcontraréis daqué ermita. Pero to merez la pena y más cuando algaméis a la meseta de Frías y contempléis el Valle de Tobalina. Que Dios vos bendiga como vosotros fuisteis una bendición pa min. Yo rezaré cada día pa que los vuesos deseyos se cumplan tanto dende la tierra como dende'l cielu, onde espero tar ceo. Daime un abrazu, el postreru d'una reina ya un servidor de Dios per aciu de los homes, talo que yo.
Nun foi fácil colar colos güeyos esllarimaos. Sabíemos de la obra del obispu Xuan; del so caráuter bondadosu y la so llealtá. Sabíemos qu'aquella despidida yera un adiós definitivu, sabíemos que que siempre quedare un rescaldu nes nuesu coral. Pero la vida sigue y salimos de Valpuesta dica'l sur per aciu de la puerta principal siguiendo'l camín de la breda'l Ríu Mioma hasta empalmar con otru senderu mayor que venía de Valdegovía. Nel biforcu tornamos a mandrecha; nun ficimos otro que camudar de breda, esta vegada la del Ríu Omecillo, llaráu de molinos por mor del abondante ceral de tola redolada.
 |
| San Millán de San Zadornil |
Llegamos ceo a San Millán de S. Zadornil pos fuere tou terrenu cuasi planu. Ta azotáu polos cuatro vientos ya n'iviernu tien de ser bien frío magar tea arrodíáu polos montes de La Llosa y de La Xunta onde predomina'l pinu, la faya, les alcines y los robles onde se puen cazar perdices, llebres y falpayares (cogornices). El pueblín tien una ermita dedicada a San Millán ya una escuelina onde'l Mayestru gana lo que-y apurre la xente de bona voluntá. Na llanera vese semao trigu, cebá y delles variedaes de legumes. Na fastera los montes pastien vaques ya oveyes y más arriba, nel peñéu, acolumbramos algunes cabres. Paramos p'abebentar los caballos aprovechando una fonte nel medio'l pueblu. Y colamos ensin más dica San Zadornil, que ta a un pasu, non sin antes cruciar la Riega de Paúles.
 |
| San Zadornil |
San Zodornil ye un pueblu de postal asitiáu nos rimeros de la Sierra d'Árcena (658 m/snm) y non mui lloñe de los Montes Obarenes. Una tarmuda viesca de castañales arrodia'l migollu urbanu de cais estreches y cases de piedra en mampostería con entramaos de madera. Un potru pa ferrar el ganáu danos la bienllegada.
Al cruzalu vimos cómo unes cabres esguilaben pel cantil d'una montaña conocía como la Peña Carrias. Cuala sedría la nuesa sospresa cuando al entrugar a la xente camentáronnos, risonos, que de cabres nada, en tal casu cabritos; yeren los mozos del pueblu que taben faciendo una apuesta, como tolos años, a ver quien llegaba'l primeru a a la picalina per aciu una cuerda, dellos fierros, un martiellu y la propia habilidá. Escalar, dicen ellos. Lloquera, pensamos nós. Otros, más comedíos, taben xugando entusiasmaos al "Pasabolu tablón". La ilesina, bien cucia y llamatible, ta dedicada a San Saturnino.
...............
. De San Zadornil embredamos pa Herrán pel "Camín d'Herrán" - una antigua y cenciella calzada romana -pasando per Villafría de S. Z. asitiada na falda septemtrional de la Sierra d'Árcena llarada de pinos y fayes. Nestes viesques acovécense multitú d'animales xabaces: gatos monteses, raposos, foines, corcios, esguiles, xabalinos, azores, falcones abeyeros, aigles culebreres, pitos reales, o picatueros.
 |
| Pel escobiu'l Ríu Purón |
Al pasar pel pueblu vimos dellos mozos y moces xugando a los bolos na modalidá "Tres Tablones" mientres otros taben faciendo una andecha pa sacar a mano truches nuna olla de la riega:
- Tapái bien los furacos mientres yo agarro la trucha peles agayes. - ¡Menuda habilidá!. Yá teníen media goxa enllena.
Tapeciendo los niales nos cantiles de los altos picos de la redolada ( Revillanos, Valdelamediana o Santa Ana, al llaú del cualu vamos pasar) pudimos apreciar delles aves rupícules: utre lleonada, utre exipcia (alimoche), uxu real, l'avión roqueru (asemeyáu a l'andarina), la chova o el colirroxu tizón . Al pasar a los pies del Picu Santana:
- Mirái que setes tenemos equí. Esta yá la conocemos, ye'l perrechicu (Seta de San Xurde) que xintamos en Valpuesta , ¿y les otres dos?
Un pastor que pasaba per ellí díxonos que se traba de setes comestibles: el níscalu y el coprinus, y que nun perdiéremos la ocasión de llevar unes poque pa cenar . Él mesmu nos les cortó teniendo curiao de dexar los raigaños sapozaos.
- Si quitamos les raíces pa otru añu yá nun da. Metéiles nuna cesta, llimpiailes con un trapu pero nun les llavéis. - Les dos criaes de Paterna, aidaes polos mio soldaos, que nun-yos quitaben güeyu, iguaron un cestín con vares d'ablanu de lo má afayaizo.
Vueltes y más vueltes pel estrechu y francíu camín d'Herrán hasta empalmar col Ríu Purón. Nesi momentu acolumbramos hacia'l norte una estrueldosa casacada de lo más llamatible. Quedamos varaos énte aquella estampa de la naturaleza: "La Cascada del ríu Purón" .
Agora baxamás hasta'l pueblu al compás de les poles agües del ríu que se retuerce y salta formando pequeños ya incontables tabayones. Enantes d'entrar n'Herrán entá fuimos bendecíos pola pequeña "Ermita de San Felices".
....................
 |
| Casona-Palaciu blasonada (Herrán) |
- Llegamos a Herrán. - diz Paterna. Nesti pueblu l'abá Pablo quier construyir una ilesia - monesteriu dedicada a Samartín.* Va ser el primer pasu pa una repoblación duradera dao que yá se ven cencielles casines de piedra con entramaos de barru y madera nel interior. Padre tien-y prometío ayuda pa echala andar y yá tien falao con dellos cabezaleros de la zona como son don Nuño y el mesmísimu obispu Xuan. Anden promoviendo lo que llamen "Les Arques de la Misericordia" dando granu de veldre a la xente probe pa que seme les tierres. Eso sí, lo prestao hai que devolvelo, nun vaya ser ....
 |
| Ilesia de Santa Águeda (Herrán) |
[ Nel añu 852 , siendo yá Rodrigo, ¿hermanu de Paterna?, conde oficial de toa Castiella - l'abá Pablo llevantó n'Herrán una Ilesia-Monesteriu dedicada a Samartín col gabitu d'un garapiellu d'istinguíos varones de la redolada. Col tiempu foi un un pueblu importante como amuesen les cais empiedraes, les pontes, les ilesies y les casones blasones qu'anguaño podemos almirar, non en vanu Alfonso VIII - el de Les Naves de Tolosa, 1212 - agabitó lo suyo no que cinca a la repoblación. Hasta una comunidá xudía asentó equí. La primitina Ilesia - Monesteriu namás queda nel recuerdu]
...............
... D'Herrán, pasando per Renedo, tiramos camín de Quintana de Martín Galindez, nel Valle de Tobalina, el de la roca poroso que tantu s'emplegaba na construcción, sobre manera nes bóvedes, por mor de so poco pesu y que ta asitiáu ente medies de la Sierra d'Árcena, al norte, y la de Pancorbo al sur. Son poco más de tres milles, asina que ye un paseín.
 |
| Ranedo, debe'l so nome a la bayura de ranes. |
- Ranedo, un célebre pueblu por mor de l'abondancia les ranes - lo que dio orixe al nome del mesmu- tien en marcha dos conventos; ún de monxes ya otru de flaires que se comuniquen ente sigo per aciu del célebre "Camín Moxoneru". Vamos pasar per Promediano que pue considerase un barriu de Ranedo.
- ¿Tán llevantándose munchos conventos pe esta zona del Valle Tobalina?- entruga Selim.
- Sí, hai dellos n'espectativa; ten en cuenta que per equí pretendemos poner un tapón a los islamistes y los conventos son el niciu de la repoblación. Que yo me decate tenemos previsto, amás de Samiguel de Pedroso y Valpuesta, que son los pioneros, en Monteh.o de Samiguel, San Torcuaz en Garoña, na fastera del Picu Humión n'Orbabaños, Samiguel en Samartín de Don con clarises de Nofuentes, San Cosme y San Damián nel Plágaru, dos n'Herrán: San Román de Donside y Samartín ; San Xuan de Tobalina, cerca de La Prada; San Torcuaz en Parayuelo y San Mamés en Lomana; y dalgún tien de quedame nel tinteru pero yá pues decatate de la importancia los cenobios na repoblación.
Travesamos delles riegues pente los viescos d'alcines y quexigos. Al rodiu'l migollu del pueblín llucíen los campos llaraos de cereal. Una bendición esperando nunca nun llegaren les güestes bereberes d'escursión.
- Equí, en Quintana, ta formándose un pueblu con xente venío de la zona navarra, como indica'l nome de Martín Galindez, ún de los primeros en llegar.
................
 |
| Molín col banzáu y la ñora (Valle Tobalina) |
. Siguimos na sienda del ríu Purón. En Gabanes el ríu parte'l pueblu en dos pero lo más llamatible son los molinos farineros qu'aprovechen l'agua del ríu peru aciu d'unes ñores feches pa la ocasión. Dos son privaos pero el terceru ye propiedá del pueblu, dalgo que nos prestó.
. Enantes de llegar a Barcina del Barco alcontramos un bifornu nel camín y tornamos a mandrecha camín de Quintana.
- Menos mal que nun fai falta algamar a Barcina - camienta Paterna- otramiente tendríemos que cruciar el Ríu Ebru nuna balsa y a veces los caballos ponen torgues pa xubir. El ríu tien un ensanche pergrande y ye la manera más afayadiza pa cruciar. Tengo que dicite, Selim, que un poco más abaxo de Barcina, en Garoña, tiénense alcontrao güelgues d'un castru de la dómina del Fierro.
...............
 |
| Quintana de Martín Galindez -Al fondu La Torre-Palaciu los Salazar |
- Ellí, arriba, los repobladores tán llevantando l'aldea de Comenzana con una ermita dedicada a San Antón.
[Esta villa tevo un escomanáu despeque demográficu ya urbanu a mediaos del sieglu XX conviviendo les cases de ladrillu y formigón coles casones d'antaño, munches d'elles reformaes.]
[[Col tiempu Quinta de Martín Galíndez tiense convertío na capital alministrativa del Valle de Tobalina con Ayuntamientu propiu que pertenez al Partíu Xudial de Villarcayo.
L'edificiu más bultable ye'l Turruxón góticu de los García Salazar (XV) - enemigos íntimos de los Velasco - asitiáu na llomba que domina'l pueblu y qu'amuesa l'orixinal l'escudu familiar coles 13 estrelles. Diametralmente opuesta atópase la ermtita de San Roque entamilgada nun roqueru.]]
:::::::::::::::::
 |
| La Muela de FRÍAS |
.. De Quintana M.G. hasta Frías hai poco más de 3 milles que percorrimos nun santiamén pela antigua calzada romana. Cabalgamos un ratu a la vera de la Riega de lo Praos hasta qu'acolumbramos la Muela de Frías nel horizonte. El pandu la redolada foi una pasada colos campos semaos de cereal hasta que dimos col Ríu Ebro que yera preciso cruciar. Nun taba fácil pos la ponte de madera, un tantu primaria, ximielgáse al andar y los caballos piafaben y bramiaben porque nun se sentíen seguros. A la fin cruciamos y xubimos hasta la meseta onde Don Diego tenía instaláu un pequeñu campamentu pa controlar el Valle de Tobalina. Un turruxón circular, una cómada cabaña de piedra llosa, madera y barru p'albergar, unos tendeyones a teyavana onde atechaben los caballos, un potru pa ferrar ya un abebentaderu componíen aquel garapiellu militar xunto a tres soldaos en servicio d'anubda.
 |
| Paterna, equí vas dormir talo una Reina. |
- Si Paterna algama a reina nós vamos tar muncho meyor porque les razies de los moros son, de vez en vez, daqué pior. Si'l Rei d'Asturies agabita podremos face-yos frente d'una vez envede esmucinos pelos montes y dexa-yos qu'esanicien tol trabayu que tantu esfuerciu nos costó.
....................
Al riscar l'alba del siguiente día embredamos hacia casa, en Medina, pel camín yá conocíu: Cillaperlata, Trespaderne - onde tomamos la parva - Mih.angos, Nofuentes, Moneo, Villacomparada y Medina de Pomar. Nun ye plan de repetir lo que yá conocío, únicamente en Mih.angos paramos un poco más pa visitar la Ilesia de Santamaría.
 |
| Santa Mª de Mih.angos (601) |
- Vamos visitar una ilesia de la dómina visigoda (20 x 8,5). Por suerte alcontróse la llápida fundacional. Foi inaugurada nel 601 en tiempos de Recaredo. Foi l'obispu Asterio , d'Oña, l´home que la emburrió seique lo dexare diba 4 años, pos yera mui mayor. Ye d'agradecíos reconocer el so llabor.
- Tamién hai una necrópolis.- arrepostia Selím.
- Yá una estructurra soterraña que nun se ve. Nun tamos mui seguros si foi una cisterna o una cripa (8 m), que ye lo que yo creyo, pos ta cubieta por bóveda de cañón con piedra toba. Lo de les criptes ye mui visigodo y pasó al arte asturiano: La Cámara Santa (Cripta de Sta Leocadia) , por exemplu.
- Qué bien informada tas; vese que conoces bien la obra del Castu. - Toi al tantu de tolo que pasa nel reinu y sobremanera na capital.
- Si Ramiro nunta ciegu tien Reina pa temporá. Bueno, veo qu'esta ilesia consta de tres naves separtaes y tien planta basilical.
- Talo la de Santullano de los Praos, si nun toi mal informada, Selim Marwán.
- Tas no cierto, mio Reina, y tres naves tien la Catedral de San Salvador.
- Mih.angos tamién tien cabecera tripartita, caduna col so altar. A Padre présta-y muncho esta ilesia y mandó construyir un contra-ábside semicircular. Bueno, ¿y si comemos un bocáu al lláu d'estes casines que tán al par de la ilesia?. Ensiguida llegamos a casa (Medina) y madre tendrámos preparada una cena como nunca se vio otru tal.
 |
| ¿Cripta? |
- ¿Tará enteráu to padre que llegamos?
- De xuru, munchu antes de Medina yá mos tienen controlaos, ¿nun vos alcordáis cuando llegastéis vós?.
Un poco de cecina xabaril, el quesu que nunca nun falta ya unes ñueces y ablanes conformaron la merienda d'aquel garapiellu castellanos que lo pasaren xenial. Madre y padre teníen preparada una yacuada como pa tar tola nueche de palique . Ye lo qu'esperaben pero'l suañu y el cansanciu pudieron más.
ESTIMANCES:
 |
| Valpuesta, l'espeyu del castellán. |
. A Mariano Cano Gordo, autor de "Las Merindades de Burgos" que se tien convetío dafechu nel nuesu "Guía" pa percorrer los caminos de la primer repoblación tres la invasión árabe.
. A la Wikipedia, como siempres, que m'aporta bayurosa información.
. A dellos blogs y páxines web talo: "elcondadodecastilla.es", que consultamos de cotino. - "Senditur.com". -"valledetobalina.burgos.es". -"castillosdeespaña.es.- "zaleza.blogspot.com".- "piedrolos.com". Otros munchos onde alcontramos semeyes qu'esplayampos "a pie de páxina".
No hay comentarios:
Publicar un comentario