Camín Primitivu [4a]: Tinéu - Campiello
D'espicha n'Oubona
 |
| <Santa María la Real d'Oubona> < Diden que dellos misterios hai nel conventu d'Oubona, voi a ver si los descubro y prebo d'esi <agua bona>. Reis, abaes, pelegrinos, equí buscaren la gloria; si te prui ven conmigo vamos escribir la crónica. Zamplarrampla ta acesmando nel llaberintu la hestoria. > |
Bien sabéis que'l día caberu llegamos a Tinéu y qu'agora vamos camín de La Puela (Pola d'Ayande). Pa ello vamos escaecer - de momentu - la vía alternativa de los Hospitales pero tamién pensamos realizala dao que nos la encamentaren con procuru; amás, creo que ye la primixenia:
- ¡Nun podéis perder eses vistes!.
- Cuido que nun va ser d'esta. Güei queremos intentar llegar a Campiello, a mediu camín
d'Ayande.
Pos bien, pa llevar a cabu toes estes rutes - y dalguna más que saldrá - vamos anochar un día o dos en Tinéu o La Puela (Ayande) y avanzaremos lo que se puea pensando nel puntu caberu d'El Palu, esi puertu míticu asitiáu a 1146 m/snm. A ver qué pasa.... Güei, de momento queremos facer el tramu : Tinéu - Campiello (14 km) pasando per Santa María la Real d' Obona, esi monesteriu románicu-barrocu (XIII-XVIII) que tien los sos oríxenes nos tiempos del Rei Silo (774 -783).
 |
| TINÉU, un espectáculu permanente. |
Camiento neses llexones romanes - a les que tantu-y prestaben les víes pelo alto les montañes a la fin de nun ser atacaes - camín de Tinéu y Navegas a la cata del oru, la xida, el so rixu por Asturies; otra cosa foi colar, yá nun hebo manera d'echalos y ye qu'Asturies ye mui llambiona.
 |
| Monumentu a la Xente'l Campu |
Arribamos a la Cimadevilla de Tinéu per aciu l'Avenida d'Uviéu dexando no fondero, a manzorga, la Cooperativa , el Viso, La Colmena y El Pascón hasta que damos col Monumentu a la Xente del Campu. Darréu entramos na vía del ilustre escritor cuartanu (tineanu) Don J. Evaristo Casariego
[les sos "Cróniques del Reinu d'Asturies" son ún de los llibros más preciaos que tengo, relleo y almiro; ya otros] onde aparcamos un momentu, hasta empatar cola Avenida Campumanes. Xusto nel entronque hai una estatua dedicada al pernomáu
[[ Conde de Campumanes, Pedro Rodríguez Pérez, que ñaciere en Sorriba (1723) nuna familia perprobe de llabradores. De bien chicu aprendió llatín d'oyente na retoral del pueblu mietres llendaba los gochos y el cura ponía escuela a los más pudientes. Cuando'l clérigu s'enteró pasólu pa dientro y púnxolu de cabezaleru na clas. A los 15 años exercía de preceutor en Cangues de Narcea.
 |
| Conde de Campumanes. <Nun creyo nel drechu divinu, los homes somos toos iguales y el Pueblu tien de tar representáu nel gobiernu> <AMÉN> |
Más tarde cursó Lleis n'Uviéu y en Madrid algamando'l títulu de Derechu en 1746. Estudiosu de la historia foi nomáu académicu de l'Academia de la Historia - de la que llegó a ser direutor - asina como miembru de l'Academia de la Llingua (castellana, pos l'Asturiana -ALLA- entá nun esistía; anguaño sí, que lo sepas) y tamién de la de Belles Artes de París, onde xugaba a los bolos de Tinéu con Diderot, Voltaire, Rousseau o Franklin. Claro, con estes compañíes llibrepensantes alquirió idees mui modernes coles que taba d'alcuerdu dafechu:
< Nun hai derechu divinu, los homes somos toos iguales. Mientres la sociedá siga con estes desigualdaes y los bienes tean tan mal repartíos nun habrá manera d'espoxigar. Ye preciso desamortizar los bienes poco productivos de la Ilesia (so tíu tapa los oyíos). Nel gobiernu real, amás de nobles y clérigos, tien d'haber vasayos que representen al pueblu>
 |
| Pedrín, en clase de Llatín. |
- Ehí lu tienes, de llendar gochos a Conde.
- Esti rapazucu yá prometía de bien guaje; yera un importón, too lo quería saber...
- Siempre andaba col cabás enllenu llibros.
Como naide nu ye perfeutu, igual nun tevo al altor col so amigu Xovellanos al que nun quixo aidar pa salvar a Cabarrús, amigu de Gaspar, que cayere en desgracia. Seique vete tu a saber, igual se llibró d'unes vaciones nel exiliu.... Ilustráu, enciclopedista, economista y políticu (talo munchos qu'hai anguaño) tevo siempres y lluchó por ameyorar les condiciones de vida del pueblu.
- ¡Salve, señor Conde! ]]
***********************
 |
| Tinéu y Cabezas de San Juan pueblos hermanaos per aciu del Xeneral Riego. |
Siguimos baxando y tres pasar unos edificios blasonaos entramos na Plaza, centru neurálxicu de la Villa xunto coles places del Ayuntamientu - que vien a ser la mesma - d' El Fontán y Les Campes. Ente lo muncho a resaltar hai dos edificios que nos llamen de mano l'atención: L'Ayuntamientu, a mandrecha, na parte d'arriba, y un palaciu bien remocicáu na parte baxo de la plaza, un poco tendida: El Palaciu Merás.
 |
| Ayuntamientu de Tinéu |
Antiguamente los conceyos municipales celebrábense nel conventu San Francisco pero nel primer cuartu del XIX mercóse una casa con tená pa llevantar l'edificiu actual, más acordies colos tiempos. La primer sesión celebró en 1835. ]]
[[ El Palaciu de Merás:
 |
| Palaciu Merás, a manzorga El Fontán. |
Ye l'edificiu civil más bultable de la Villa al empar que'l so vecín Palaciu de los García Tineo (1520), pocos había nel XVI que lu pudieren asombrar. Debió causar sensación el de Tinéu porque nin cinco años tardaron los Merás en llevantar el suyu.
Anguaño ye un Hotel únicu na so función, lo mesmo agospia a pudientes qu'a pelegrinos - nun Albergue fechu con esi envís- a unos precios mui razonables. Tamién caltién en so interior el " Muséu d'Antigüedaes Valentín Alba"]]
 |
| El Turruxón de Tinéu (Semeya: Web del Ayuntamientu) |
D'El Fontán damos pasu a otra célebre plaza, La Plaza de les Campes. Equí hebo mui antiguo un turruxón defensivu arrodiáu por una muralla que cubría dende la Ilesia del Cementeriu hasta la vecina Plaza del Fontán, por antes yera conocida como la Plaza del Castiellu. Llibrare de milagru cuando Xuan I (1358-1390) mandó esaniciar tolos castiellos d'Asturies por aciu les contínues sublevaciones de los nobles astures, pero nun pudo col tiempu y la inorancia. Foi esbarrumbando pasu ente pasu y desanició dafechu en 1920 por mor del ensanche la ciudá. ¡Quel dommage! ¡Qué llástima!, diría madre. :
- De tenela agora podríeis competir con Salas no que cinca a conxuntu históricu; nun ye que seyáis probes pero un turruxón ya una muralla.... Dan muncha prestancia a una ciudá y tiren enforma del turismu.
Tamién nesta Plaza tevo llugar la cabera execución pública, a "garrote vil", de la historia d'España. Foi percomentao abondo tiempu y tiénense fecho munches xácares al respeutive. Antón García, el gran escritor cuartanu, cuéntanoslo con un realismu ablucante na so novela "Crónica de la lluz y la solombra". A min túvome hasta tres díes refugando la comida; bona manera p'aflacar.
Tamién nes Campes foi fusiláu polos franceses - cuando la Guerra la Independencia - el valerosu Pedro del Tronco en 1809 tres un xuiciu coles cartes marcaes.
 |
| Una mirada aliella dende La Cruz de les Campes onde los franceses fusilaron a Pedro del Tronco. |
Tamién nos asomamos a otra ventana del Fontán onde s'alcuentra la célebre Cruz de les Campes y que da sobro l'antiguu cementeriu onde una araucaria centenaria abelluga la Capiella del que fuere campusantu ya ilesia parroquial hasta 1830: La Ilesia de San Pedro que namás tien una nave ya un ábside abovedáu.
Nun pudimos resistir la tentación de baxar a velo más de cerca y facer les semeyes afayaices. Equí entamen los Fondos de la Villa.
************************************
 |
| Cai Mayor "La Griega", la Casa'l Pelegrín. |
Tres d'aparcar en zona azul na cai González Mayo tenemos que retomar el Camín Xacobéu nel puntu que lo dexáremos, xunto a la Ilesia San Pedro y el Palaciu de los García Tinéu. Asina qu'empobinamos cuestarriba pela Cai Mayor, la exa urbana más bultable de la villa na dómina medieval y renacentista poro delles cases entá caltienen con arguyu la so estructura y los sos blasones pedreses.
Nesta cai tamién queden les güelgues del antiguu Hospital de Pelegrinos, el Mater Christi, (el modernu caltién el mesmu nome) qu'agospiaba méndigos ya enfermos probes. Perteneció a la Orde del Temple y yá se tien conocencia d'elli, a lo menos, dende 1274. Los franceses y depués la Desamortización terminaron con él magar sirvió a primeros del XX p'abellugar una compañía teatral; y ye que los cómicos hasta nos rimos de la guerra (alcuérdate de Gila).
 |
| La Torre de Palaciu |
Xubimos hasta algamar al Palaciu de los García de Tinéu, frente la Ilesia de San Pedro. Doblamos a manzorga pela Travesía de la Torre pa emprimar pela Cai de la Fuente pero enantes vamos echar una güeyada a estos dos edificios, emblemes de Tinéu, como son:
.La Ilesia de San Pedru , antiguu conventu franciscanu y
. El Palaciu de los García de Tinéu, Casa de Cultura.
- Non, si güei nun salimos d'equí. Enantes en Salas y agora en Tinéu. Oi,nin; ¿nun t'apetez siguir y cuando acabemos col Camín tornamos a visitar dellos finxos agospiando "in situ"?.
- Oi, ne; ¿sabes que nun ta mal tirao?. Préstame esa idega. Gárrote pola pallabra. Bueno, anda, estos dos namás y colamos, ¿acuéi?.
 |
| Camín del Conventu |
Frente'l conventu tenemos el Palaciu cola so torre primixenia, un tanto tapecida.
 |
| Pasamos el Palaciu de los Garci de Tinéu. < So la entrada ventana xeminada por alfiz enmarcada, pa la vista una ayalga > |
De primeres, allá polos sieglos XII-XIII, entamó por ser una torre defensiva circular y ye nel XVI cuando se llevanta'l palaciu anexu. La torre foi residencia solariega de la familia y ta construyida a base de mampuestos con sillares nos sos escasos vanos (qué queréis).
El palaciu ye otra cosa; edificáu en 1520 (cinco años anterior al de Merás) foron añediéndose-y otros elementos renacentistes y barrocos. Destaquen los dos escudos nobiliarios de Tinéu y Maldonado so'l portón oxival d'entrada asina como una ventana xeminada enmarcada por un alfiz de boles (estos de Tinéu...) de calter renacentista. Una ayalga pa la vista. ]]
************************************
 |
| ¡Vamos pa SANTIAGO! |
Con un subidón moral considerable - y nun lo digo pola cuesta - al percorrer el barriu antiguu de la Villa colamos pela estrecha Travesía de la Torre pa embredar Cai de la Fonte pente casines d'otru tiempu, con corredores engalanaos, quiciabes pa despidir al pelegrín que bien ceo se va alcontrar precisamente cola Fonte de Tinéu. Mira tu qué casualidá equí mesmo vemos departiendo con unos vecinos al ilustre pelegrín, J. Miguel Hernández, que yá tuviéremos a bien alcontrar nel tramu anterior de La Espina. (Recuerda:www.guiavisualdelcaminoprimitivo.es)
- Bon día, señores. ¿Cómo-ys va?
- ¡Home, qué casualidá, vós otra vez!
- Queremos llegar a Campiello, si podemos...
- Talo que yo.
 |
| Fonte de San Xuan |
- Mirái allalantrones, aquel picu a mandrecha ye El Palu y el so vecín El Panchón.
- ¡Mon Dieu; y tenemos que llegar allí!...
- Igual esi tramu ye'l más duru pero llegaréis, nun vos esmolecer por ello. Esta fonte de San Xuan ye una de les siete qu'abastecién d'agua a Tinéu, cuando nun había traida, xunto con: La de Tinéu, qu'acabamos de pasar, la de Los Flaires, la de La Peña, la de Los Fondos de la Villa, la de Les Muses y la de Cimavilla.
- Ta lluéu, pelegrín; nós nun podemos parar tanto, queremos xintar en Campiello.
- ¡Bon Camín!
< Comprobando les célebres cualidaes del AGUA DE TINÉU >
 |
| Sidra de Tinéu |
[ Nota: Más tarde enteré que l'agua de Tinéu tien fama a esgaya de ser perbona, y nun digo que non qu'hasta Padre Feijoo rogaba que-ylo unviaren hasta Uviéu en carretes . Sicasí , nel Monesteriu d'Oubona (agua bona) onde esti home braniaba, tenemos alcontrao la primer referencia escrita no que cinca al usu de la sidra... perapreciada pola servidume que malpenes la cataba... Probes, <un culín ... si alcanzaba>.]
< < Col agua de la Oubona nun hai quien puea
sacante, alón, la sidra de Tinéu;
si esto nun ye cierto, don Benito,
diré a reclamá-ylo un día a Uviéu,
que pipes-y llevaba camuflaes
de sícere por agua un carreteru.
Si daquién lu critica por tal cosa
yo pienso, en so descargu, convencelu:
- ¿Que te pasa, mazcayu, por qué esbravies?
¿Nun yes tu nes espiches el más gallu
y te tienes pol más sobriu'l gallineru?.
¿Nun pue un flaire tomar unos culetes
y ser santu y nes lletres el primeru?.
Yá lo dixo el celote, ¿nun t'alcuerdes
lo que sentenció aquel día, tan certeru? :
- <El que nun toma sidra ye difícil
que pase pol buracu y entre en cielu>.
- Anda, pelegrín, nun sías fatu,
escancia esi culín, que tendrás un día xacobéu. >>
 |
| Los trasgos tamién xueguen a los bolos. |
Na fastera soleyera de los Montes de Tinéu, onde nos alcontramos, vemos bayura de casiellos - truébanos - pa elaborar esa miel tan célebre como ye la Miel de Tinéu. Ensiguida pasamos el Regueiru del Robléu y nun satiamén tamos nel Mirador de Leticia onde alcontramos la Piedra Llaberíntica al par d'un barganal con: < Portiechu - Tarriechu y Canciecha > (Portiel.u - Tarriel.u - Canciel.a)
Bueno... un poco enrevesao, ¿eh? .... Nun te faigo sufrir más...¿Alcuerdes d'aquel dichu tan repetíu de
< El que va a Santiago
y non al Salvador
visita al criáu
seique non al Señor >
pero en castellán, casi igual.
¡ A por ello! ]
 |
| ¿Será esti Zamplarrampla mazcaritáu d'arbolón? ¡Qué venga Dios y lo vea, ta zampando un regodón! |
El camín, anchu, afayaizu y dondu de pisar por mor de la fueya serondiego, ta nos rimeros del monte Bañugas llaráu de robles y dalguna faya qu'otra. De cuando en vez una flecha mariella nun árbol o una piedra diznos que vamos pel Bon Camín y nós agradecémoslo enforma porque nos tranquiliza abondo. Una rieguina ya un pequeñu Depósitu d'agua dan pasu a un estrechamientu del camín pero ensiguida torna a la so dimensión natural de carru.
Agora, al xubir esti repechu, ye la roca escarnada la que domina'l suelu. Algamamos el meudía (12:00) y l'altímetru marca 875 m/a (altor). Debemos tar nel Colláu de La Guardia, porque amiré'l Google Maps y veo que bien cerca d'equí pasa la Riega d'esi nome, pero nun nos decatamos de pueblu algún de referencia, tamos montunos.
 |
| < Pelos Altos de La Guardia vien runciando sele un quad, una moda mui prestosa pal que-y pete andoliar peles caleyes d'Asturies ensin tener que sudar > |
- Vense munchos valtaos, deben querer tornar al autóctonu.
Salimos del camín pa cruciar la carretera pero inmediato tornamos a la caleya. Paramos a echar un tragu d'agua embaxo un pinu, xunto una cabana.
- Esto ye precioso, los montes suaves, les campes, les vaques pastiando...
- Hasta los molinos de vientu queden bien equí, nestes brañes llaraes de cabañes.
- Lo que m'aparra son estos pandos tan abiertos y tan altos que te permiten acolumbrar tantu espaciu d'una güeyada; síentome como llibre...
 |
| La Venta de Piedratecha (Venta de Villereh.o) Per onde terminaba'l Cotu d'Oubona pero non la influyencia clerical. |
Nun vemos señales clares pa siguir. Depués d'un ratu alcontramos dos, pero contradictories, asina que tuvimos que preguntar a un vecín:
- Bon día, señor, ¿pa dir a Campiello pol Camín Xacobéu?...
- Depende, si queréis dir direutos a Campiello siguís esta que tamos, la TI-3, pero pa visitar el Monesteriu d' Obona, como maxino, tenéis que siguir la AS-350 , dica Bárcena, y depués , per un camín señaláu, vais baxando hasta Oubona.
- Pa dici-y la verdá la Obona yá lo visitemos l'otru día, asina que preferimos tirar a Campiello.
- Entós carretera alantre, ensin perda, quédenvos unos 6 km.
- A ver si llegamos pa comer.
- "Casa Ricardo" o "Casa Herminia", a gustu de cada cual.
*******************
Güei escaecimos la Obona pero yá-y dedicáremos una mañana entera l'otru día. Sí, la selmana pasada vinimos col enfotu de facer el tramu La Espina-Tinéu pero'l tiempu féxonos recualar asina que echamos la mañana en pasear per Tinéu ya Oubona y la tarde en Merillés. El Camín Xacobéu foi siempres un camín d'enseñances y nós nun pretendemos otra cosa qu'aprender asina, qu'aparte del Camín, vamos otros díes a visitar dellos llugares d'interés del conceyu que teamos trevesando. ¿Queréis que vos cuente cómo fue'l día d'Oubona?
Visita a Santa María la Real d'Oubona:
[[ Sí, yera xueves y había mercáu en Tinéu, talo qu'en Llaviana. Había xente abondo peles cais y daba gustu perdese ente la xente, los escudos, les cases solariegues ya otres sin blasones pero con corredores que camienten la mesma historia compartida qu'esos de más ringu-rango.
Ye guapo pasear peles cais empinaes de Tinéu, per Les Campes, al igual que lo fuere andoliar per Les Campes de Salas, qué casualidá que'l centru neurálxicu d'ambes lleve'l mesmu nome:
<Les Campes>.
Entramos a pidir información na Oficina de Turismu:
- Pa dir a Oubona siguís defrente per esta cai, González Mayo, y tres pasar la gasolinera vais alcontrar una rotonda na que veréis la indicación afayaiza. Si queréis visitar l'interior de la ilesia podéis pidir la llave nel Bar qu'hai a la entrada del pueblu.
Dicho y fecho. Una llave a cambiu d'un DNI facilitónos la entrada nel templu de la Oubona, el petite d'Alfonso IX, el Rei que dio la Carta Puebla a Tinéu allá por 1222 y el que tanto esfrutaba per estos paraxes.
- < Qu'a naide se-y ocurra visitar a Santiago ensin pasar per Tinéu ya Oubona, otramiente va véseles conmigo>.
- < Si vas a Santiagu y nun caes per Oubona
igual don Alfonso te corta la moña>, camentaba la xente'l pueblu.
 |
| Alfonso IX de Lleón y Berenguela de Castiella. El so fíu Fernando III, el Santu, xunció pa siempres Castiella y Lleón. (Semeya de Wikipedia) |
- < Populationem mean de Tinéu >, dexó por escritu, por si daquién nun se tuviere enterao. Cuartanu dafechu pasaba grandes temporaes nes Asturies de Tinéu; Santa María d' Oubona yera'l so descansu predileutu. Talo ye ansí qu'en 1222 concedió-yos a estes tierres la Carta Puebla y arriendes d'ello <privilexu de pasu> lo que trexo pa Tinéu un espoxigue económicu de primer orde.
Santa Mª d'Oubona algamó sonadía tala que pasó a ser un centru cultural onde s'impartíen clases de Teoloxía, Filosofía, Retórica... Los flaires convirtieren tamién el monesteriu nun finxu teunolóxicu cabezaleru onde s'aplicaben los conocimientos más modernos pal desendolcu de l'agricultura y la ganadería. Un emporiu comercial yera la Oubona que tenía emplegaos a tolos habitantes de la zona, y más. Equí nun había paru. ¿Paru en Tineú? Equí trabaya hasta'l sobreru.
Doña I.S.Sebastián cuéntanos na "Pelegrina" como foi'l recibimientu del Rei Alfonso (namás qu'ella refierse al Castu, pero sería asemeyao, ¿non?):
 |
| Alfonso IX , Rei de Lleón y d'Asturies. (Semya: WikiPedia. Tumbo A Catedral Santiago) < Si vas a Santiago y nun pares na Oubona más te valiere quedate na Pola; el Rei, don alfonso, eso nun lo perdona > |
< Corriérase la voz de la so presencia na redolada de Santa María d'Oubona ya una llexón de campesinos taba ellí, movilizada de boca a boca pa poder velu de cerca...
Los habitantes d'estes tierres de la Oubona nun daben créitu a los sos güeyos al ver aprucir énte elles na menos qu'a don Alfonso. Un rei convertíu en lleenda per aciu les sos batalles nel campu de batalla. Un Rei que pusiere fin a l'afrenta de los impuestos....
Yera emocionante ver les muestres de respetu y veneración al pasu del cortexu real.... Había muncha guajería, ancianos y muyeres humildes, vestíes col traxe rexonal bordáu de flores...
Durante más d'una milla xente venío d'alluendi asitiábase al borde, rodieya en tierra, del camín pa rindir homenax al so soberanu glayando'l so nome y rogándo-y bendixera a la so criatura talo si fuere un obispu.... >
- ¡Viva'l Rei! >
 |
| ¡Sícere, SÍ, por favor! |
<SICERE SI POTEST ESSE>,
reza nun documentu, en referencia a los siervos :<sidra si pue ser>, vamos, si alcanza. ¿Yera esto una táutica del abá pa que los siervos, campesinos y emplegaos en xeneral s'esmeraren nel so trabayu?.... Si les pumaraes tán curiaes y producen a esgaya < la sidra alcanza pa tol mundu>; anda que nun sabién ná estos flaires de la Obona, menudu prenda taba fechu l'abá...
 |
| Semeya : Muséu de la Sidra (Nava) |
[[Sicasí, camienten les lleendes de la "llingua de trapu" - poro cuido que nun se-y pue facer casu del too, seique ye tan guapo... - qu'una vegada, teniendo conocencia la xente de la visita del Monarca a la Oubona tresnáren-y un recibimientu como nunca nun se viere. Taben percontentos por mor de la Carta Puebla y por enaltar a Tinéu como <visita obligada> del Camín Xacobéu lo que significaba trabayu abondo y reconocencia de la voluntá popular, irreconocible pa la ingratitú de los señores de los Cotos, foren clérigos o seglares. L'abá tenía colocáu, de siempres, un cartelu a la entrada del conventu:
<SICERE SI POTEST ESSE >, pero don qu'Alfonso, que se viniere arriba con aquel recibimientu, agarró una lláscara de pizarra del suelu ya iguó aquella frase con dos rayines, un acentu ya una coma:
< SICERE SÍ, POTEST ESSE >........ (Sidra sí, pue ser)
L'abá decatóse del "toque" y apurrió al serviciu dalgo más "qu'una llibra y cuartu de pan ya una ración de fabes", aquel día hebo ESPICHA a lo grande na Oubona
- Abre bien, dicía'l Rei al quitar la espita a la pipa y escanciar nel vasu. Que traigan de comer pa toa este xente, otramiente va subíse-yos el "sicere" a la cabeza.
- A min gústame - afitaba l'abá, tres prebar el culín con que lu brindó'l mesmu Rei.
- Ta cantarino - glayaba ún del Fontán, famosu confiteru.
- ¡Cómo espalma! - gutió otru de Tuña, mientres cataba un chorizu.
- ¡Fai revulguinos! - camentaben los poco avezaos de la que daben cuenta de'una maca de güevos cocíos.
- Esto nun fila - osó espeta-y ún de Merillés al abá.
- ¡Esto ta de micu! - esclamó'l rei énte la gayola popular.
Una kupela (3000 ll.) debieron de tomar esa tarde los siervos de la Oubona, el día que cataron al empar lo que yera un braeru "choscu de Tinéu". Alguna moña hebo que confesar al día siguiente que tevo por penitencia doblar daqué domingu pa recuperar el "desperdiciu":
- <Por sacar los pies del cestu
vais a currar a magüeyu> -
camentaba l'abá descontentu.]]
 |
| Oubona: La Fonte del Matoxu alcuéntresla tirando a mandrecha. El sícere pues tomalo nos bares del pueblu. En primer términu vese esbarrumbáu el Molín del conventu. |
Pero esto que te digo... Toi camentando... ¿De xuru que toles pipes yeren d'agua?... ¿Nun habría alguna de sicere?... En fin, ¿tantu trebolgu por un xarru d'agua?....
- A min nun m'engañes, Benito, que'l sicere ta perbono y n'Uviéu ta perfrío...
Sicasí, a ver si el Padre Feijoo foi l'inventor del <agua mineral embotellao>.... Otra que-y debemos al gallegu.
Arriendes d'ello hai quien piensa que l'agua santo del Matoxu pudo ser l'orixe del primer cenobiu por tratase d'un nemeton, o llugar sagráu precristianu. Los flaires teníen canalizao esti agua hasta'l cenobiu, claro víen xanes .... Y eso que teníen <drechu de pernada>, según cuenten...
El Monesteriu de Santa María la Real d'Oubona.
 |
| Monesteriu de Santa María la Real d'Oubona (Tinéu), fundáu, de mano, pol Príncipe Adelgaster y la so muyer Brunilde en 781, tiempos del Rei Silo. Lo que vemos ya va de los sieglos XIII al XVIII, del Románicu al Barrocu. |
 |
| Altar Mayor, embaxo l'advocación de Nuestra Señora. A la izquierda'l Sepulcru y el Retratu d'Adelgaster. |
[Silo, enantes de ser rei, tenía'l vezu de venir a cazar osos a les tierres de Tinéu y nuna ocasión, por meter el cuezu onde nun debía, el cazáu foi elli. Doña Leo, nel cercanu Villatriz de Francos, consiguió llevalu al güertu pola mor d'unos potingues que-y apurrió nos tres vasos de Salomón allá na Fonte de la Dueña: ardiente, paciente ya irremediable. Por impaciente ya ardiente la cosa nun tuvo remediu y del alcuentru ñació Adelgaster. ¡Menudu paquete!. Pa Silo nun yera plan de reconocelu porque pertenecía a l'alta alcurnia y tenía otres aspiraciones. Pero la señora tamién yera una dama asina qu'hebo de tomase un determín:
- Tú cúideslu, chatina, y yo nómolu Conde de Xixón.
- Conde ye poco, Princeps.
- Acuéi, Princeps de Xixón. Y nun t'esmolezas, déxovos el reñón cubiertu.
 |
| Nave central y presbiteriu d'Oubona. |
 |
| Cristu románicu a puntu de convertise nun ecce homo. |
< Cuéntase d'ellos qu'un vegada, pa facese con unes tierres llinderes que nun-yos pertenecíen, xuraron y perxuraron:
- La tierra que tamos pisando ye de nueso.
La xente, ablucao al ver los flaires xurar daquella manera tan firme, terminaron por cedé-yosles a la remolera. ¿Por qué s'atrevíen a tan grande bilordiu?... Porque dientro les madreñes llevaben tierra d'esa zona... y taben pisándola, claro. >.
Si eches una güeyada a un documentu - copia - que se conserva nel Muséu Diocesanu al rodiu'l <Monesteriu medieval de S.Mª.d'O.> vemos la cantidá de donaciones que tenía... Vamos, qu'en cuantes dalgún facendáu taba a puntu de colar pal cielu yá andaben ellos oriscos pa camudá-ylu por culisquier cosuca terrena... Bueno, esto son coses míes y nol del documentu que nos amuesa doña Xosefa S. F.
 |
| Escudu Lleón y Castiella. Lleón nel primer cuartel pa destacar la so preponderancia. |
El Cristu románicu, del XII seguramente,ta pa poco. Llama l'atención pola so actitú serena, pacetible... Magar la so corona d'espines nun amuesa sufrimientu: ¡Venció a la muerte!
La famosa Ara románica ta nel presbiteriu sofitando un retablu; d'encontu, vamos.
- Peteme dir a resucitar a Alfonso IX. S'il h.odío nun tuviere tul día a la cata damiseles... El muyeriegu-y llamaben. Tomábalo too como patrimoniu personal.
 |
| Claustro barrocu, ensin rematar y fechu una llaceria. ¡Qué llástima! |
Si pasamos per esta puerta o polos arcos de les Audiencies llegamos al Claustru y a les dependencies de los flaires. Esti claustru barrocu, que pudo ser una pasada, quedó ensin acabar y agora ta pa llorar.
Acolumbro qu'hai munches más coses que cuntar, de la Oubona, de Tinéu, del Conceyu.... Pero ¿y si les dexamos pa otru día?... A midida que les vaya descubriendo yá te les diré contando, ¿acuéi?.
*****************************************
Un pelín d'hestoria nos primeros tiempos del Monesteriu d'Oubona:
< La profesión d'Adosinda >.
 |
| El Monesteriu d'Oubona llevantóse nuna vega, al par del Riu Oubona o Regueiru d'Ardeyna , rellacionáu cola Deva. ¿Yera un llugar míticu de la divinidá femenina celta que' aprovechare'l cristianismu? |
El día 26 de Payares del añu 785 la ex-Reina Adosinda, la que fuere muyer de Silo hasta diba dos años (793), taba nel Monesteriu de San Xuan de Pravia tomando los hábitos. Como Testigos del actu (cómo me tuviere prestao tar ellí ) alcontrábense: Adosinda, Mauregato, Beato, Eterio, Fidel, Félix d'Oubona ya una carta....
 |
| El CONCEYU de Santianes: Beato, Adosinda, Eterio y Mauregato, Fidel y Félix chisbando. (Dibuxu d'Andy nel llibru "Beato de Liébana" R.Lavín Bedía) |
Nun se llevó mal colos muslimes de Córdoba quiciabes porque so madre yera mora, dicen. Bastante-y importaba a Abderramán que la muyer del enemigu fore de los suyos; de nun ser qu'estos -qu'andaben a la tema ente ellos y al tiempu con Carlomagnu que quixo meter el cuezu na península y salió escaldáu en Roncesvalles (778) - otru gallu-y diba cantar al asturianu. Tevo suerte, Mauregato.
 |
| Beato de Llébana |
En Llébana escribiere les <Apoloxíes> escontra la herexía adopcionista d'Elipando, obispu de Toledo y de Félix d'Urxel*. Tamién ye l'autor de los <Comentarios al Apocalipsis de San Xuan> en 776 que corrixere diez años depués (786) ya onde fai referencia al apostoláu de Santiago n'España. Esta idega remátala nel <O Dei verbum> , himnu n'honor del nuevu Rei Mauregato** onde s'afita dafechu nesi patronazgu de Santiago :
< Oh, Apóstol (San Yago) santísimu y dignu d'allabanza
cabeza rellumante y dorada d'España
defensor nuesu y Patronu nacional
sei la nuesa salvación escontra la peste (l'Islam)
y alloña de nosotros toa enfermedá, llaceria y maldá >.
 |
| San Roque na Oubona. < Va mazcaritáu de pelegrín del que ye patronu: Bordón, capa y sombreru y con una pierna firía. Tamién ye Patrón de los enfermos de peste>. Nació en XIII ó XIV cuando yá España tenía a Santiago. |
** [Nel acrósticu del himnu, formáu por la primer lletra de cada versu, pue lleese:
< Oh, Rei de Reis, escucha al Rei Mauregato y sei xenerosu con él como nun cabe otro de la to bondá>.
Beato disimuló asina la dedicatoria pa nun cafiar a la Reina Adosinda, so pupila, a la que'l nuevu rei obligó a profesar, nin tampoco a Alfonso, por si acasu... Beatu sí, tontu non.]
. Eterio, obispu d'Osma, el collaciu inseparable de Beato, tamién yera de la partida nesa "profesión" d'Adosinda. Dambos taben ellí énte la reina, como garantes de la vida d'Alfonsín, abellugáu per aquel entós colos parientes vascones de so madre, n' Álava.
. La Ex, Adosinda, fía d'Alfonso I ya Ermesinda yera ñeta de don Pelayo, hermana de Fruela y Vimarano, tía d'Alfonso II y medio hermana de Mauregato. Casó con el magnate Silo qu'algamó a rei (774-783) y treslladó la corte a Pravia dende la Cuenca. Silo tampoco nun se llevó mal con Córdoba , ¿tamién so madre yera mora?... ¡Qué tendrán!.
Colos que si tuvieren problemes foi colos sos vecinos gallegos, que se-y tiraron al monte y tres derrotalos na batalla de Montecupeiro agacharon les oreyes y tornaren al riegu.
 |
| La Reina Adosinda abellugando a Alfonsín. (Ilust. Gaspar G. Meana "Crónicas de Leodegundo") |
- Espera otra oportunidá, Fonsi; la vida da munches vueltes. Prepérate, fai amigos, conoz a los tos enemigos y traza un plan pa cuando te llegue la oportunidá. Presaxo que seràs un gran rei, tienes madera pa ello, guaje.
En cualisquier casu el nuevu rei ¿golpista? nun podía permitise'l texe-manexe de la Ex - conocíala bien, yeren mediu hermanos - y decidió metela a monxa, bien cerquina d'él, ellí mesmo, nel conventu de Santianes (Pravia).
Nun tuvieren fíos propios Silo y ella (Él tuvo ún d'estraperlo - Adelgaster - que fundó'l monesteriu d'Oubona ) y punxeren tol enfotu n'Alfonsín, el bisnietu de Pelayo, al que nomaren Mayordomu de Palaciu al envís qu'aprendiere a remanase pela corte.
Muertu Silo, Adosinda reunió l'aula rexa que nomó rei al so sobrín pero'l so hermascu Mauregato, que controlaba la fracción ¿anti-goda?, ¿anti-bélica?..., asaltó'l poder teniendo'l mozu que colar p'Álava y ella metese nun conventu.
 |
| Adelgastro, fíu de Don Silo, reza nesti cartelu, fundó'l el Monesteriu d'Oubona en 781. AMÉN. ¿Cómo que ye un cuentu? < Munchos nun quieren creyer que soi'l fíu de don Silo y fundé esti monesteriu en setecientos ochenta y unu. Fui príncipe de Xixón y a Rei nun presenté'l títulu, un pautu con Adosinda pa que reinare el so h.illu.* Pero mientres pensáis y non si soi braeru o un embullu por qué nun me dais una mano** de Dios, quand meme, soi fíu.> |
** "Una mano" de pintura.
. Pel bandu contrariu taben presentes, nel pensamientu, los obispos Félix d'Urxel y sobremanera L'Obispu Elipando [717 - (783-807)] per aciu d'una carta qu'esti unviare a un tal Fidel - abá d'un monestriu entá desconocíu - onde aprovecha la coxuntura pa plantar los sos reales como primáu de la ilesia visigoda de Toledo y s'afita al endefechu na so herexía adpcionista poniendo "a parir" a Beato ya Eterio:
- < ¡Ai, d'aquel que nun tea d'alcuerdu con que Xesús, como home, nun ye otro que fíu adoptivu de Dios!>.
 |
| Beatu: ¿Anticristu o... Carta d'Elipando a Fidel? (Semeya de "Ruta Vadiniense") |
Tampoco nesta reunión faltaba l'abá d'Oubona, que tamién se llama Félix pero nun pensamos sía "Félix d'Urgel" que yá taba d'aquella como obispu nel condáu catalán de Girona (783-792 y 798-799). Lo que confirma la presencia d'esti abá en San Xuan de Pravia ye la < donación > d'Adelgastro del Monesteriu d'Oubona al abá Félix en 781. ¿Veis cómo lo d'Adelgaster nun ye un cuentu?... Lo que sí son cuentos d'Oubona son esos del llaberintu soterrañu, pero eso vèmoslo darréu, ¿paezte?.
. El caberu elementu que forma parte de la profesión d'Adosinda ye Fidel o Fidelio, el receutor de la célebre carta na que Elipando - el gallu la quintana de la Ilesia toledana, la única - mantiénse nes sos trece como adopcionista y pon a cayer d'un burru a Eterio y Beato que se llancen dafechu al pescuezu del herexe.
***************************
Yá que tamos cola hestoria de la Oubona camentar que per equí tien pasao Alfonso V en 1022 por mor del Camín Xacobéu, doscientos años antes que'l so tocayu Alfonso IX-ys concediera (1222) a Tinéu ya Oubona <privilexu de pasu> ; sí o sí. Dambos, nesos años, confirmaren el Cotu al monesteriu d'Oubona.
****************************************
 |
| El valle d' Oubona , baxando pa Piedratecha. |
Escaecemos el camín oficial, una estrecha sienda que de mano va paralela a la carretera AS-218, direición Bárcena, y depués baxa silenciosa, empruna y solombriega pente castañales y carbayos hasta la Oubona, magar nesta época ivernal nun sea la más gayolera al tar esnuda la tarmuda viesca caducifolia. Antaño pasaba per equí una calzada romana; les llábanes del camín pasaron a formar parte de les muries qu'entá s'aprecien de cuando en cuando separando les finques.
 |
| Villaluz , y tanto. Casa Manolín, una ayalga. |
Un vecín, asomáu a un balcón, mándanos el saludu afayaizu:
- ¡Bon Camín! - presta. Namás vos queden 3 km a Campiello.
- ¡Bon día tenga, Señor!
 |
| Salimos de Villaluz pa entrar en Vega del Rei. |
Enantes d'aportar a Vega de Rei - siempre pela carretra xeneral (TI-3) - vemos un cartelu que diz <Sempronia> , y suénamos a romano, como casi toles que terminen en "ana": Mardana, Canzana, Llaviana, Seana, Villallana, Tiñana, Memorana, Curniana y.... SEMPRONIANA (Tinéu), la villa de Sempronius. Vinieron a Tinéu pol oru pero depués quedárense pa siempres, qu'Asturies ye mui llambiona.
A les 14:22 tábemos en Berrugoso y un cuartu hora depués en Les Tiendes. Tres xubir un repechu yá vemos Campiello, son les tres menos cuartu (14:45), anduvimos 14 km en
cuatro hores y media (V= 3,1 km/hora), somos la H.
 |
| Campiello, la meta; a mediu camín ente Tinéu y La Puela (Ayande) |
****************************
L'escudu de Tinéu
 |
| Escudu d'armes de Tinéu ( De los artist@s del CEPA de Tinéu na Cai Venera de la Conda) |
El primer cuartel, el superior a la diestra, lleva un castiellu en referencia al Reinu de Castiella, onde pertenecieren les Asturies de Tinéu.
El segundu cuartel, superior sinestra, lleva les armes de Garci de Tinéu, n'alcordanza d'aquella célebre batalla onde'l cuartanu acabó con Barbarroxa ya otros cuatro pirates que se-y punxeren delantre.
El tercer cuartel, diestra inferior, lleva'l blasón del Monesteriu d'Oubona, a saber, la tiara papal, el báculu arzobispal, les flores de Lis, la Cruz y la Banda.
El cuartu cuartel, sinestra inferior, fai referencia a la Orde Franciscana que tevo afitada en Tinéu: la cruz y los dos brazos en souter (aspa ), ún esnudu ya otru vestíu.
CUENTOS DE LA OUBONA
 |
| <Voi meteme per equí a buscar a Zamplarrampla que me cuente, si-y prúi, coses de la colexata.> |
Pero lo que la xente'l pueblu camentaba sobremanera son les histories de miéu por mor del llaberintu soterrañu qu'hai embaxo'l cenobiu.... Cuéntanoslo Xuan Bello, que vivía cerca y seguramente oyó daqué vez les voces....
< Ello yera una vegada un caballeru nomáu don Pedro y conocíu como Don Per d'Omaña. Siendo entá bien mozu yá yera ricu a esgaya: tierres, castiellos, viesques .... Mediu mundu trabayabas pa él sicasí... nun yera feliz, nun cabía en sí, nun dormía y tresvelaba nueche tres nueche dando glayíos y axorizanzo a siervos y vasayos.
- Tengo a Zamplarrampla metíu nel cuerpu.
- ¿Y quién ye Zamplarrampla?
- Entá nun lo sé; sé que despierta tolos díes. Pienso dir a buscalu.
 |
| ¡Pam, pam, pam! - A la paz de Dios, hermanu. Soi don Per, ando a la cata de la felicidá. - Pasa, vas echame un gabitu pa iguar esti conventu. Cuando acabemos, serás feliz. |
- A la paz de Dios, hermanu pelegrín, ¿deseya agospiar esta nueche?
- En realidá, hermanu, vengo buscando la felicidá.
- Pase y mañana fala col abá, él lu aidará.
Sintió los maitines, les preces de laudes, los trebeyos d'hora prima y yá entraos na hora sesta foi recibiu por abá:
- Diz l'hermanu legu que venís a la cata la felicidá; nun podía alcontrar sitiu más afayaizu. Tenemos un llaberintu soterrañu, más grande que'l mundu, llaráu de tolos bienes qu'un home pueda deseyar: perres a baruyu, muyeres esllumantes, manxares delicatessen, xoyes pervalioses, valles tarmudos ya una biblioteca que caltién tol saber del mundu, la felicidá. Si usté quier....
- ¿Y cuála ye la torga?
- Qu'ehí dientro ta Zamplarrampla.
Cuando don Per sintió'l nome dio un blincu , ablucáu, poniéndose arrechu como un palu :
- Xusto lo que buscaba, ¿y quién ye Zamplarrampla?
- La to muerte, y el to destín. Nun se sabe cuando, nin como, pero sufrirás... Mentato esfrutarás de gozos a mamplén.
Tampoco ye que-y cambiare muncho la situación, que yá la tenía privilexada, pero necesitaba conocer a Zamplarrampla. Y entró.... Entá se sienten de cuando en vez, nes nueches calmes y prietes, los clamíos frayantes de Don Per; vese que Zamplarrampla ta de vacaciones, nun debe ser tan malu esi inframundu de la Oubona. En cualisquier casu nós siguimos caleyando Camín Xacobéu alantre, cuido que'l Ribeiru y el Pulpu a la gallega puen ser más estimulantes que'l llaberintu d'Oubona.
- ¡Bon Camín, pelegrín!
CUMPLIMIENTOS:
 |
| Platu del Pelegrín. < Al platu vendrás, arbeyu> (Esta vegada en Casa Herminia) |
. A la Oficina Turismu de Tinéu, que nos aportó mapes ya información bayurosa y que tan bien nos vieno.
. A don Germán Ramallo y don Julio A. Fez. Lamuño: "Tineo: Palacios,Casonas, Heráldica y Cotos señoriales del Concejo"; igual algo torné bien.
. Al impagable Xurde Morán, pol so blog sol "Camín Primitivu", ya otros.
. A Xuan Bello y la so "Historia universal de Paniceiros".
. A Gaspar García Meana, pol retratu d'Adosinda y sobre too pola "Crónica de Leodegundo" que lleo y relleo de cuando en vez. Un trabayu ablucante. Gracies.
 |
| Homenax al Maestru Pío Cuervo |
. Art. "El Comerciu" (3-5-18) de L.A. Arias : <Palacio de Merás> . A Neto, siempre, coLos nuesos Paisanos, esta vegada El conde de Capumanes, Pedro Rodríguez y Pérez.
. "Historia de Tineo".<celtiberia.net>.
. Manuel de la F. Merás "Feijoo en Obona".
. Covadonga Cañas: "Guía digital del arte románico".
. Elipando de Toledo. (Ramón Gonsalves R.)
. Docum. Medieval Monasterio Oubona (Josefa Sanz F.)
<Adversus Elipandum, Oviedo y Santiago>, Adeline Rucquoi.
. Al Platu del Pelegrín, esta vez en Casa Herminia.
No hay comentarios:
Publicar un comentario