PELEGRINOS, pa BERRUBIA [PrOTESTAS - 3]

                                Nel Santuariu Rupestre de PICU BERRUBIA

Xixilante, esconsoña l'ancestru...
" Nun sía casu qu'un día
 por inorancia ya olvidu 
  los iconos de Berrubia 
 caigamos  nel desaniciu"

            De sobra sabía Gonzalo Peláiz que la fuerza opositora los habitantes de Tudela venía-yos de les plegaries qu'arramaren los sos antepasaos, los que moraron nos castros los cordales del Nalón: Berrubia, Picu Llanza, El Padrún, Arnea y hasta na Carisa... por mor lo afayadizo'l tarrén. Bien sabía'l Protestas que toa la redolada taba bendecida poles rogatives d'aquella xente afumao que coles sos fogueres pretendía anubrir les duldes d'un probable cambiu que nun respetare les sos tradiciones. Yera un añiciu protesta escontra'l Rei invasor que, coles sos imperiales idees, podía arrasar cola mocedá de la faza por aciu de guerres llonxanes...
         Lo mesmo-y pasaba a Gonzalo. Taba cansáu. Taba mayor p'andar trotiando tres d'un Rei que nun buscaba más qu'amarraces - con moros o con cristianos - a la fin de ser el putu amu d'aquel proyeutu d'España.
         Güei somos nós los que queremos averanos a esti Santuariu d'esperanza... Tamién andamos necesitaos d'esi espíritu ancestral, d'esi airín de protesta pa siguir n'esta espirica, n'esta guerra diaria na que tamos envolubraos...

La flechina azul diznos onde s'alcuentra'l Santuariu Rupestre: 
A la manzorga'l Cordalín de Toral Mayor ta'l notoriu "Picu Berrubia" .
 (¿Qué sería de nosotros sin el blog de Montes Villa: "Mi Geoblog: Geología y algo más"?)

           Y siguimos el TRACK yá conocíu:
Santurio (Xixón) - Vega - Autovía Minera nos Güertos del Ociu - Valnalón AS-116 - Olloniegu - La Mortera - La Fócara - Sienra y Les Escobadielles. (Aparcamientu afayadizu na base del Picu  Berrubia).
        Si m'almites un conseyu,
        y te pesta andar un poco,
        dexa'l coche na Mortera
        y tira camín del Picu
        per aciu'l pueblín de Sienra.
        En menos que canta gallu
        algames al santuariu
        y te plantes en Berrubia.

          Si te lleva más d'una hora ye porque te parasti na Quintanal, o en Monegro a facer unes semeyes. Dende Les Escobadielles podrás apreciar con gayola por qué dellos ancestros asitiaron nel Picu Castiellu.

Dende Les Escobadielles
 ferregüeyamos Castiellu
onde Gonzalo Peláiz
punxo al Rei nun aprietu.

        Xusto enantes d'aparcar yá nos decatamos que díbemos entrar nun Santuariu. Asina nos lo amuesen los vecinos pa que seamos respetuosos col entornu que vamos a pisar:

Que yá tas nun santuariu
 vas date cuenta enseguida,
los vecinos de Berrubia
 caltienen la llapa viva.

          - Sigui l'Avenida de Berrubia p'algamar al Santuariu Rupestre. Si te petez enantes de percorrelu encamientate a la Virxe. Equí tienes dos pa escoyer: La Virxe de Fátima y la del Carme. Nós, marineros d'agua duce (18 meses ¿sirviendo a la Patria? na Marina) pero marinos al fin y al cabu, ficímos-y un guiñu a la Virxe del Carme, como nun podía ser d'otra miente.

¡Salve, estrella de los mares!

          Aparcamos cómodo énte'l Picu Berrubia, al par d'unos cuantos coches...
          - ¡Dios, cuántos pelegrinos güei!. Tampoco yera d'estrañar. Taba un día calentín, de castañes,  con un sol ente dolcu y media manga . De xemes en cuando una llugaina d'aire fresco venía caricianos les vidayes.
Teníemos lleío en "Mi Geoblog "que los primeros petroglifos taben nel mesmu Picu, al entamar la cresta de Toral Mayor. Xubimos a plombu per un senderu trazáu poles pisaes pelegrines.

Pelegrinando a Berrubia
 fais homenax al ancestru,
fais homenax a la historia
 a la historia d'Olloniegu.

          Tamos na picalina. A más de seiscientos metros  s.n.m. damos colos estratos d'un macizu areniscu - un finxu inseríu en fermoses pudingues de la Formación Mieres del Carboníferu Superior - que sobresal d'ente les escobadielles de brezu y felechu. Colos nervios nun somos a ver nada. Nin tan siquier reparamos nel espectacular paisax que nos arrodia. ¡Hai que tar ciegu!. Aselamos un poco, calma...Una vueltina alredor y paeznos sentir la llamada del ancestru :
      

<< ¡ Eh, que toi equí!... Na cara oeste... ¿Nun me veis?...
 Vamos, tranquilizái y alcontraime ; toi llocu por dar la plepa>>

          - ¡Eureka! . ¡L'ANTROPOMORFU! . Empezamos bien. Güei ye un día de suerte... Los lares tan pa con nós. (Nun podíemos ... Nun podéis imaxinar la suerte que díbemos tener... Pero tendréis qu'aguardar... Esperar a lo cabero... )
          -¡Ei! ¡Veníi equí, di con ello!
          - Carái, ¿qué fai esti rapaz de rodiyes coles manes llevantaes? ¿A quién clamia?
           - A nós, a l'Alministración, a la xente intelixente y de bona voluntá... A daqué dios natural ... Al sol, a la lluna....
        - ¿Y eso?
        - ¿Nun ves que ta güérfanu? Mira, equí al llau taba'l so hermanu; pero malpenes s'aprecia, fíxate bien... ¿Nun te decates ?
        - ¡Ai, sí! . Ties razón.... Nòtense les llinies del ximielgu ... Pero ta práuticamente esaniciáu...

Va un tiempu yéremos dos
 los ximielgos de Berrubia;
tenía a manzorga un hermanu
siempre na compaña mía.
Güei son llínies pal recuerdu
  poesía
n'esti llenzu d'arenisca.

          Semeyes y más semeyes van dar constancia de la presencia d'estos pelegrinos playos que tienen fe nos humanos magar qu'esti mesmu santuariu tea abandonáu a tope...
          - ¡Ai, Asturies! . Cuánta grandeza encierres nos tos paraxes, nes tos coraes... ¡Qué inorantes somos que nun somos comprendete!. ¡Cuántos finxos de cultura se nos pierden! ¡Dios, qué mierdu somos! Vamos quedar ensin señes, vamos quedar sin pasaú... Tamos quedando ensin futuru... Ánde vamos cuando nin tan siquier somos capaces de reconocer, de desendolcar, d'abellugar, d'acariñar, d'amorosar la propia llingua?... Esto llévame a camentar qu'Asturies ye un país piquiñin pero col mayor númberu de fatos por metro cuadráu del mundu. Cuando en cualisquier llugar de la tierra anden a la cata vestixos p'alcontrar la so identidá y sopelexala al mundu enteru equí dexamos esaniciar el pasáu, dexamos que muerra el presente (que la LLINGUA ASTURIANA entá ta viva, h.oder) y campamos tranquilamente peles cais del olvidu, del desdexu, de la inorancia...
        - ¡Echa un culín, Rubén!
         Preguntáben-y al presidente Cantabria, al nuesu vecín Revilla, que si oficializare una llingua vernácula, si la tuviere...
- ¡Por supuestísimo que sí!. Yo creo qu'hasta-y molestó la entruga.

             <<QUOSQUE TANDEN, CATILINA >>

- ¡Asturianos!... Tenemos los díes cuntaos. 
O nos echáis un gabitu o nos desaniciamos. 
En 1974 los Ximielgos de Berrubia podíen apreciase perfeutamente.
 Güei - 2015 - l'hermanu fitu a mandrecha (la nuesa) o xuega al esconderite o ta llistu pal desgüace.
 (Semeya del profesor M.A. de Blas Cortina)

          Echamos un vistazu al entornu... Queremos ver lo que vieren.... Queremos ser como ellos... y remembrar a Magilo col so amor a la natura:
           - << Tou aquello que los nuesos sentíos perciben como cercanu a la perfeición allóñanos de la idea de la muerte>>
           ¡Qué a gustu tamos! ... Dende'l brezal-toxal del cordal, énte los líquen y crocus, acolumbramos les Asturies d'Uviéu: Llangreu y el valle Tudela a mandrecha, el Padrún y el Camín de la Meseta pal sur; la capital, siguiendo'l Camín de Niria pela Manzaneda, al norte. Tamién vemos Olloniegu, el Polígonu Industrial, les cantreres de Tudela.... Pel camín de Vegalencia algamamos a la Térmica (Sotorrei). Esi fumu nos recuerda les fogueres del PrOTESTA. ¿Y la sierra del Aramo rematando' l fondu'l cuadru? . ¡Dios, cuánta hestoria!

Pisamos ande pisaren 
los iconos de Berrubia
 si pa nós  ye santuariu
 pa ellos mediu de vida .
Dende'l llique acolumbramos
  Asturies, patria querida.
 Allá al fondu vese Uviéu,
  metanes Camín de Niria . 
 Nin  canteres de Tudela,
 nin tan siquier tola industria, 
son capaces d'acabar
 con esta pola Natura.

Los liquen:
          
Estes plantes resistentes - mitá ocle, mitá fungu- son les encargaes de pintar la naturaleza de colores. Suaves, aparentes y delicaes tan diciéndonos a voces qu'onde s'alcuentren elles nun caltrió entá la contaminación. Son un símbolu, un iconu d'esta zona rebelde que nun quier desaniciase por aciu'l vientu invasor.
         Son estes criptógames plantes d'apariencia mui simple, d'estructura mui cenciella (en realidá mui complexa) que surden d'un conceyu, d'una andecha simbiótica - tu dasme, yo doite - ente un fungu y una ocla, un micobionte y un fotobionte qu'orixinen el talu. El fungu, qu'escaez de clorofia, apurre-y a la ocla l'agua que precisa pa facer la fotosíntesis. Y la clorofílica ocla aporta-y al parásitu fungu los nutrientes orgánicos que precisa, obteníos pola tresformación de les sustancies inorgániques. ¡Y a vivir que son dos díes!.
          * Los liquen son unos indicadores bárbaros de la calidá ambiental. Al nun tener fueya nin raíces propiamente el so aparatu vexetativu - un cenciellu talu ensin cutícula proteutora- ta mui espuestu al mediu atmosféricu d'onde tomen agua y alimentos, amás tamién del sustratu. Son poro los primeros en sentir los efectos perxudiciales de los gases contaminantes, sobro manera´l  SO2 (Dióxidu d'azufre) qu'acidifica los sustratos al aminorgar el PH. 

                  << Talo que llique na roca
                       los ancestros de Berrubia 
                       tan aferraos a la vida
                       poles hifes la memoria >>

          Entamilgámonos enriba la roca y enantando la mirada emulamos los nuesos ancestros, los protorrupícoles de Picu Berrubia. Y reparamos nel Picu Castiellu ande teníen el castru y la vida se facía más llevadera...

Pel camín de la Meseta
aporta un vientu invasor;
dende Castiellu y Berrubia
ferregüeyámoslo too. 
Nun creyas tu, rei Alfonsu,
que per aciu d'una espada
vas a consiguir qu'Asturies
vuelva ser l'alma d'España.
Si daqué quies tu de min
baxa del burru, y fala.

          Namás alcontrar l' antropomorfu unviamos una señal a los supercicutes. Una semeya wasap a un amigu que conoz esto como si tuviere vivío equí. Entós entama a danos instrucciones:
          - Mui bien. Perbones les imax. ¿Cómo nun m'avisasti? Toi estos díes en Xixón.
          - Vaya, nun lo sabía. Más lo toi sintiendo yo...  Mira lo qu'alcontré... Hasta la mesma natura rinde homenax a los nuesos antepasaos. ¿Ves esta figura?

<<Soi Natura, tamién pinto. Bueno, asonsaño a los ancestros>>

           - Mui guapo, pero nun ye lo que tais buscando.
           - Non, pero presta... ¿Ánde tan les ferraures UUUUU?
           - Tirái p'alantre. Tenéis unos 200 m. p'alcontrar los petroglifos.Siguiendo la cresta'l Cordalín de Toral Mayor [de los Montes de Tudela pela sierra  del Monte Fayéu] daréis coles ferraures. Y no más alto, nuna parede arenisca que ta mirando hacia'l norte, cayendo a Tudela Agüeria, tan los petroxeroglifos.
           Siguimos caleyando pelos cuetos a la cata del roqueru. Leyéremos qu'en doscientos y picu metros, polo menos, podemos alcontrar daqué.
          - ¡ Tomaaaaaa! . Por ferraura que nun quede...

Agárrate a la vida 
aférrate bien fuerte  
qu'esta gran ferraura
 tien de traete la suerte.

            - Disti cola gran ferradura. Per esa roca hai parés enllenes de pequeñes ferraures. Los petro-xero-gliflos* tán escondíos bien cerca, como a unos tres metros, ente la vexetación; pela fastera más pindia.

*Lo de "xero" ye una estimanza nuesa. Camentamos que quieren cuntanos una hestoria, per escrito....

            Tamos nerviosos, aliellos, esprecetaos dafechu y damos vuelta al roquéu. Efeutivo, nuna fermosa parede cuasi vertical, a plombu sobro Tudela, vamos descubriendo coses nel criptograma d'esotra capiella sixtina...

         - Mira, esto paez una "U". Ta tapada pol mufu. Repásala coll picu'l cayáu pa estremala meyor...

           Y ellí en mediu... Unos petroglíficos xeométricos, faciendo ángulos y triángulos... ¿Qué hestoria nos tán cuntando? ¿Qué representa esta escena?

          - Asemeyen númberos romanos... Y allá arriba, a mandrecha tenemos más ferraures...

Ferraures elevaes a mandrecha

          - Oi, y al par d'elli, per debaxo y a manzorga acolumbro unes rayines... Pero malpenes se ven..
          - Ties razón... Más dibuxos xeométricos... Pero tan esaniciándose... Ye lo que camentamos... Por nun curialo...

Estos xeroglíficos tan a puntu esaniciase. Una historia perdida para siempre.

          - H.oder, y les perres que gasten n'otros sitios pa descifrar xeroglíficos.....
          - Méte-y el zoom p'ampliar el textu. A ver si lo pues descifrar. Yo creo que trai : "Puxa Asturies. By Roma"
          - ¡H.a, h.a h.a! ... By, By..
                                                   ******************

          - ¡¡¡¡Mira ésto!!!!  

 ¿Dexó esti santu la ROBLA
 na historia que nos cuntó? 
 ¿Sedrá acasu esti poeta,
 quiciabes, güelu Galdós?.

          - ¡Dios, la robla!. Esti rupícola sabía lo que facía. ¡Menuda firma, esti artista! Grabó la capiella sixtina y dexónosla roblada, como nun podía ser d'otra miente...
         - O la mía...
         - Pa nada, chatina... En tal casu ye la de mio. Mira, equí trae: "ACA".
         - Non, esto ye una "Pi" griega... Per equí fai una F y a lo cabero la A. Ye la mía...
         - Toi sintiéndovos dende casa... Nun sigáis cola espirica que ta bien clara la "CH". Eso roblélo yo.

Equí s'escribió la hestoria 
de los Picos deBerrubia 
como nun nos demos priesa
¡adiós "Capiella Sixtina"!

           Bueno, yá pasen les dos y media y ye la hora xintar. Acabosé'l discutiniu...  Pel otru llaú del  llienzu tengo visto un sentaeru de lo más afayaizo. ¿Un tronu pal rei del Santuariu?. Quiciabes... A nós viennos perbién p'agustar.

El "Tronu les ferraures" tien les paredes internes enllenes de "Us". 
Empresta atención. Nós, de mano,  nun les viemos.

          Un bollu preñáu de la Tahona Vega, una casadiella y un cuartiyu de vinu apaguen les fogueres de la fame de la que nun nos decatáremos... ¿Quién va pensar en comer tando nun Santuariu?.
          Acabemos y, ensin tiempu pa folgar, siguimos a la cata'l petroglíficu mientres tornábemos pal aparcamientu faciendo, más o menos, el mesmu camín de la ida. Al arribar cerca del primer finxu y ensin contar con ello, ¡zas! , una roca abarrotada d' UUUUUUUUUUUUs.

Nun te viere de primeres
 pero esta vez nun m'escapes;
depués de tar tola triba
 trabayando a fargataes...
Y que na Edá del Bronce
entá nun había radiales...

          Vamos tornando pal coche. El día cundió la pena. Ya otra nueva semeya d'esti entornu, d'esta maravieya..

Retornando pel camín
 vimos tola maraviya
 que contemplen ensin fín
  los vecinos de  Berrubia.

          Dexamos atrás el Picu . Tasmos cerca l'aparcamientu.A mandrecha una pradera que da al valle del Nalón ta zarrada por una muria mal avenceyada de bloques, más bien pequeños, de la pizarra arenisco. Como teníemos lleío que munches de les finques colindantes al Picu Berrubia emplegaben los fragmentos de roca que se desperendiere de lo alto entamamos a echar una mirada aliella a aquel zarru... Enseguida...
          - ¡Ven, cuerri! Mi que "U" más guapa...

Sofitada ta la muria 
por ferradura perfecha,
ye la historia más antigua
que se conoz en Tudela, 
ye la historia de Berrubia.
Ganes pasé de traela,
pero, rediez, nun ye mía.
A fin de cuentes dexéla
por si la quies faer tuya.
Yo tamién pienso volver,
asina tengo disculpa.

          - ¡Una non, dos!
          - Yá podía ser dalgo más pequeña...
          - ¡Eh, quieto parao!. Sé lo que tas pensando... Petezte marchar con ella. Nun fastidies, amás ta faciendo de base.
          - Tranqui, que nun voi llevala... Magar tuviere meyor nel Muséu Arqueolóxicu...
          - Fai una semeya y mánda-yla al supercicuta, a ver qué te diz...

                           ******************

           Aguardamos aliellos un cachín......
- Yá llega'l wasap... Encamientanos poner una referencia sobro l'oxetu : un boli, una moneda... A la fin de poder saca-y la escala. Asina que  "dicho y fecho"; una moneda de 50 céntimos.



-  Bueno, difícil será que nun atopemos más. Vamos a güeyar un poco...
- Oi, mira que tengo equí. ¿Estes "picadures" na piedra paecente artificiales?
- Dafechu. Esta retícula nun ye natural, ta fecha arrémente. Y allarribones nun tenemos alcontrao denguna asemeyada ...
- Ya envolubrada n'esta lluvia hai una güelga o"pisada d'ave"...
- Ye verdá, asemeya una güelga d'un páxaru grande fecha sobro'l sable.
- Claro, que tamién pue ser tridente ...
 - Sí, señor; una trente ... Mira, tal paez que del vértice quier salir un mangu... Nun s'aprecia mui bien pero tien anicios...
 - Pos a eso mio güelu llamábalo forcáu, y emplegábesmolu pa esparder los marallos de yerba...

La  PETRORRETÍCULA de Picu Berrubia. 
¿Qué nos cuenta esti cronista? ¿Ye una plegaria  a los Dioses pa prevocar la lluvia y fravorecer les colleches? 
¿Y esa triente na esquina superior de la manzorga?

            - Habrá que consultar l'informe del profesor De Blás. ("Los grabados rupestres del Pico Berrubia").
           Siguimos dando vueltines y, ensin abandonar la MURIA, atopamos atra "U". Pero tamopoco ta sola. Tien al llau d'ella un furacu fechu tamién a posta.
          - Mira que "U" tan guapa con un furacu al par d'ella. Arriba tamién los hai, más que nun reparáremos n'ellos. Hai quien diz que son recientes, que son marques xeodésiques feches na picalina los montes.
          - Pos esti paezme a min que ye enantes de Carolo...

Ferradures y furacos suelen ser primos hermanos.
 Dende la Edá del Bronce,
va d'eso tres mil años, 
los artistes de Tudela
estes histories grabaron
pa que los dioses, beninos,
 andecharen nos sos suaños.

         Ta claro, nidio como una patena, que güei ye'l nuesu día. Camentado nello tábemos cuando apruz esta "Yerba" grabada nuna arenisca:

Quedó corteza grabada
 na mesma piedra arenisca ;
el Carboníferu clamia:
¡ déxovosla a la vista!

          - ¡Ai, mamina! Voi consultar l'oráculu.- Mando un wasap cola semeya.
          - Ye un restu vexetal, quiciabes una corteya. Alcuérdate que tas nel Carboníferu. 
          - ¡Vaya día! ¿Dámoslu por fináu?   
          - Yo que tu  nun lo facía. mira lo qu'acabo ver....
          - ¡Ai, Dios míu, qué ye esto!
          - ¿Un tridente?
          - O una cruz...
          - Tu tas llocu, ¿una cruz enantes la Edá del Fierro?  ¿Ánde taba Xesucristo?
          - Esto ye una pasada. Vamos a consultar... Voi mandar un wasap...

"La CRUZ  de  NIRIA"   
 Bien cerca d'equí pasaron 
Rigio y so amada fía
que tuvieren atechaos 
nel adriu d'una capilla.
¿Por qué nun pudieron ellos
  cargar la Cruz de Berrubia? 
Dende güei sedrá pa nós
 el logu, la nuesa guía.
Esta yera ya señal 
  por nosotros debecida
pa empencipiar col  " Camín
aniciáticu, de Niria" 

- Wasap: << ¿Qué te paez esti petroglifu ?.... Nun alcontraremos nada asemeyao nel Picu. Nin recuerdo tenelo visto nel to blog...>>
 - R.W.: << Nun lo pudiste ver porque nun lo tengo puesto. Nin lo vi en Berrubia nin en la documentación del profesor De Blas. Pa min tamién ye ¡NUEVO!. Y si te das cuenta tien al llau como un ferradura ensin acabar. Aguarda un momentín, voi consultar n'internet....>>
- W.: << ¿Sedrá una ferradura inacabada o sedrá un "siete" (7)?.. Igual ye la nota que-y puso'l profe al alumnu...
- De pone-y una nota ¿nun sedrá'l símbolu de "sobresaliente cum laude"?
- Ties razón, esta cruz ye lo máximo... Yo fáigome apropiu d'ellla. Esti sedrà'l mio amuletu pa percorrer los caminos que me lleven hasta Niria...
- Acabo d'entrar n'internet, nel blog : "www.tierradeamacos.blogspot.com.es" y alcontré daqué que s'asemeyao.... mándame'l to corréu pa unviate l'enllaz. 
- Val, d'alcuerdu. Ehí te vas. Toi arranáu por velu. Tienesme esmolecíu dafechu.
- Esto ye nuevo. Hai que documentalo ya entrar nuna páxina a la que tengo accesu . Pue ser una bomba. ¿Quién sabe?
- D'alcuerdu, yá nos vemos. Oi, yá qu'andes per Llumeres...
         << Si hasta Viodo t'averares
          has mandame una semeya
          que ye llugar de galanes
          dende que la fía Rigio
          aportó a esos llares.
          Ye pa min llugar divinu
           fechu de cielu énte mares.>>

                         .........Toi esperando pola to semeya....

          Tengo'l corazón contentu,
           foi un día estraordinariu,
           los amigos de Berrubia
          diéronme abondo cuayu
           pa siguir <<Camín de Niria>>
           polo menos, otru añu.

¿Gustóte, amiguín del alma?
¿Qué esperes pa visitame?
 Con que saltes la portiella 
yá tas al cabu la calle.
 Yo déxote unes semeyes
 pa que nun pierdas detalle.
 Pelegrín, nun eches tiempu
 qu'esto pue esaniciase. 
 ¡Venga, ho... Garra'l petate!

Entemecíu nuna muria 
esti TRASGU vela armes
 pa que dengún petroglifu  
puea " llevantar les pates"  
Agora yá tiro a gustu, 
queda'l Picu en bones manes.

                                                 AGASAYOS    
       Equí naide inventa nada. Son too copies naturales: Copio un árbol, una planta, una casa o un palaciu. Y si se me pon a mano hasta retrato un páxaru. ¿ Y qué dicir d'otros collacios? Si tienen un blog afayaizu , ¡Plas!, ehí toi yo pa saca-y brillu. En fin, esta vegada recuerdo qu'anduvi tres los pasos de:
. " Mi Geoblog: Geología y más" de José Mª Montes Villa. Ye'l momentu de reconocer el llabor d'esti xeólogu no que cinca al Santuariu de Picu Berrubia. Per aciu les sos investigaciones alcontró, y donó al Muséu Arqueolóxicu d'Uviéu, esti Ídolu Placa:

Estos son "Ídolos Placa". El superior a manzaorga ye l'alcontráu pol nuesu mocín, José Mª MV.

. La wikipedia ye l'arma más emplegada pa buscar información.
. El documentu de Miguel A. de Blas Cortina : " Los grabados rupestres de Picu Berrubia"
. Los llibros:
       "A la sombra de los abedules" de Florencio Argüelles.
       " Guía de los árboles d'Asturies" de Bertu Ordiales y Guillermo C. Ruiz
       " Diccionariu de sinónimo" de Luis A. Prieto García.
       " Potestas" de Xulio Arbesú.
       " La enciclopedia de la naturaleza de Asturias" de la VOZ DE ASTURIAS (q.e.p.d.)

        Supongo que miré, por viciu, los blogs de Acebedo, ARTURTSALIA, Ciencia y Biología, Corazonleon ...
        Pero sobre too da-y les gracies a J. Mª Montes Villa (Mi Geoblog) pola so prestancia y la información en direuto, vía wasap, que nos aportó. ¿Alcuérdeste, Jalichi, cuando díbemos a escuela con pizarra y pizarrín? Ye difícil refugar que Dios esiste....

        Y mañana tres los pasos de Niria pela fastera'l Narancu... ¿Qué faigo entá llevantáu?