" C27H46O...XIXILANDO..."

                                      " C27H46O...XIXILANDO..." 
                 

Xixilando "El Colesterol" dende "El Mirador del Cabu S. Llorienzu" 

                        Xixón. Meudía. Ta murnio ya amenaza lluvia, talo que los díes pasaos.  ¿Ónde dir nunes poques hores?...Tien que ser cerca casa y onde haya un pisu secu, ensin llamargues. ¿Hailu?...Pos claro; una ruta bien trasegada, la socorrida  "Sienda costera : Santa Catalina- La Ñora", más conocía - sobre too na so primera mitá- pola "RUTA'L COLESTEROL". Esto ye lo que vamos facer, ¿merecerá la pena?
                        (Delles imáxenes pertenecen a otres salides pela mesma ruta) 
                                 

                                              

El Cerru Santa Catalina

                  

                            Esti ye l'aniciu propiu de la ruta, al par del Cerru; pero nós dexamos el coche cerca'l Tostaderu ya aforramos el paseu de la playa.
                            Imposible evitar una semeya ente los "CHAPLONES" ....Unes planches escures de fierro que dexen pasar la lluz al traviés d'unos furacos que descubren vistes curioses. Son les cuatro estaciones: Primavera, Branu, Seronda ya Iviernu.
                              

"Sombras de luz": Fernando Alba

                           Dempués de caminar un cachu dexando atrás : Bellavista, El Pery y el Sanatoriu Marítimu pasamos al par de la  Ma del Emigrante, monumentu n'alcordanza al sufrimientu de les madres que vieron  a los sos fíos colar p' América camentando que difícilmente los volveríen a ver .....Mano tendida, despedida y ponte ente dos mundos ....
                                     

La Ma del Emigrante: Ramón Muriedas

                      
     Talamente paez que "La LLoca", de la que despidimos con señaldá, ta curiando la playa y roqueru del Rinconín. Nun hai sitiu más afayaizu qu'esti pa estudiar la "Intermareal", esa zona de la costa bañada en parte pola mar qu'orixina un ecosistema complexu ya apasionante. Xurgando na guía d'itinerarios rurales editatada nel añu 94 pola F.M.C. y la U.P. con autoría de Javier Gil V. y dibuxos de Jose L. Benito vimos la oportunidá  faer esti esquemín y acompañalu d'algún dibuxu por si daqué paganu poco avezáu - talo que nós -  tien l'enfotu d'echar una güeyada a lo que podría alcontrase nuna intermareal...
                         

                          P'aidanos un poco vamos recordar que la intermareal ye esa estaya mariniega o costera que ta influyida pola mor de les marees......
                        La zona más alta: d' Alitu [hálitu] marín o aerohalófila, que recibe l'aliendu la mar (¡cuánta poesía!) y l' agua salao de los chiscazos de la batiente.
                        A continuación tenemos otra - zona Suprallitoral - que ta embaxo l' agua...si la marea ye viva. Darréu queda albentestaste, que ye la mayor parte'l tiempu.
                               

Horizonte Suprallitoral

                    Hai otra un pelín más baxa: la zona Meridional, que tien agua tolos díes - mas non tou'l día - arriendes de les marees diaries...Asina que pasa parte del día somorguiada y esotra a vista de pasiantes, talo ye'l nuesu casu...Esta conocémosla bien ¿eh, gallu?...O vas dicime que nunca nun fuisti a pañar moxones o a la gueta d'oricios ...Bueno, otru tiempu; güei día échente una multa por amirar pa ellos con cara picardiosa...Ye una zona enantada, asina que pa entendela meyor suel dixebrase n'otres tres estayes: M. superior, M. media ya Inferior. Preciso dicir qu'al pasar güei per esta zona, que ta y nun ta, quixi facer una semeya. Saqué-y el zoom a la cámara, recoldéme na barandiella, pa enfocar a lo Marcelo, y apunté al roqueru. D'esmenu vi pasar a carrenderes un cosucu pequeñu, cuadráu, con una reciella pates.... Un guxarapa que más que correr esnalaba...Petecióme baxar a retratalu pero nun taba'l día pa ello; pola mor de la tardanza y del calzáu poco afayaizo que llevaba. Pero esto nun va quedar asina...Voi saber yo quién yes tu, fernandoalonso...Tengo tornar a falar contigo...

                                

Horizonte mediullitoral superior

                Entá nos queda otra zona embaxo, la Infrallitoral, que ta somorguiada de contino sacante....les marees mui vives, qu'amuesen hasta los refaxos. Pero ésto pasa poques veces al añu, ya hai que dir a velo espreso...Nun se sopelexen les partes íntimes de buenes a primeres...Estes coses hai que sudales, ¿o non?. Si quixeres poner unes gafes de buceu y date un vueltu embaxo l'agua veríes una función espelurciante:  un vals de Schubert interpretáu por unes Laminaries (algues) pergrandes al compás de la marea...Dellos peces y actinies colándose pente'l mediu y, chisbándolo too, esponxes, moluscos,...Nun se pue dir pal otru mundu ensin conocer, in situ, un pelín esti inframundu...Si tienes edá pa ello, claro. Otramiente confórmate coles andariques del chigre...
                 Dexamos atrás esta ayalga costera y pasando ente la playa y les cases del Rinconín aportamos delantre un parque que caltién esti orixinal monumentu: "Solidaridá": Unos esllabones entrellazos ya abiertos...Xuntos, pero llibres.
                                         

"Solidaridad": Pepe Noja

               
                               

"Solidarios"

           

                Bien cerca d'elli atopábase esti otru monumentu: "Ensin Títulu", que nos facía camentar nun
equilibriu imposible en permanente tensión...Bueno, tala yera la tensión que terminó por desprendese en parte...

Sin Título (antaño)

Ensin tensión...(anguaño)

 
                 Siguimos caminando pela enllabanada sienda, dexando atrás el camping, hasta algamar a los cantiles del Cervigón.  Darréu xubir un cuetu apruz ante nós la vistosa casa de Rosario Acuña. Dende llueu bien agüeyó esta muyer pa entamilgar la casa; hemos vela dende cuaquier puntu de la ruta. Esta placa danos una pista sobre tan célebre señora.

                              Rosario  Acuña foi una figura relevante de les lletres españoles de finales del XIX ya entamu del XX. Muyer adelantada al so tiempu: feminista, republicana, masona - como Riego -  y escritora apasionada de teatru; anque tocó tolos palos. Tuvo bien considerada pola crítica coetánea, como Clarín o Galdós, que tenía a gala ser amigu suyu. Pasó los caberos años de la so vida en Xixón. Dende la llomba la  casina, onde suañaba cola llibertá, cantaba:
                             

Casa de la escritora Rosario Acuña

     " ¡Xixón! ¡Xixón! El mar a llugaes                        esmaralla en tí so infinita poesía..."

                                                                                       
                                



   



                   Nel Cervigón, esmuciendo sobro'l cantil, atopamos esta cenciella poliescultura...
                                                         

"Cantu a los díes fuxíos": Adolfo Manzano.

                 Asientu pa pescadores de caña y sedal. Caminantes fatigaos alcuentren un bon requexu pa ponese a camentar nos díes fuxíos .......Nós, miramos enfrente y sentimos una fonda señaldá....
                                         

Vela, Musel, trabayu...

 
                      Colingando sobro'l cantil decatámonos de la presencia d'una abondante planta rastrera de fueya gordo ya aciculiforme. De cuando en cuando unes florines fusia paecen bordar esi mantu verde. ¿Cómo pue resplandir en suelu tan probe onde l'agua dulce malpenes apara y entá recibe les chiscadures los refolones?.  Creemos recordales pero asina y too consultamos un llibrín de plantes que davezu va con nós. Y alcontramos : Uña de lleón (Carpobrotus edulis). Tien bayura de nomes, como "Uña de gatu" (el gatu debía ser pintu..), "Figu marín", "Yerba de cuchiellu" ...Tamién los hai que-y llamen "Diente de lleón", pero esta ye otra.
                                 

Uña de lleón: (Carprobrotus Edulis)

Qué bien suena lo d' edulis. Suaño en seta : ¡Boletus edulis!. Pero nun ye'l casu. Esos, pa otru día. Xurgamos un poco so la información. Quedamos sorprendíos como siempre que caltriamos na vida de cualquier ser vivu: La fueya carga la enerxía solar de día, claro, pero zarra los estomes pa nun perder gota d'agua pola mor de la evaporación. Asina que trabaya de nueche; como los panaderos tien fotosíntesis noctuna. El frutu (karpo), una especie de figu pequeñu, ye comestible (edulis) si ta madurín pero nun convién pasase, a menos que teas "blandiu"; ye mui astrinxente.Tamién s'emplega la fueya en ensalaes. Debió ser una planta mui recurrida polos marinos d'antaño por aciu de la vitamina C, pa evitar l'escorbutu. Lo mesmo ocurre con otra del mesmu entornu : El Cenoyu marín (Crithmum maritimun), pero güei pasóme inalvertía.         
                    Pasu ente pasu vamos averándonos a los cantiles de la playa de Peñarubia, que debía nomase "Peñaroxa", porque roxa queda al atapecer nos díes que la baña'l sol...Guapa semeya será'l día que la sorprendamos ansí...Entrín y non dexaremos esta :

                                      

 

<<Peñarroxa>>

                  Los afloramientos xurásicos n'Asturies tan comprendíos ente'l Cabu San Llorienzu (Xixón), el que visitamos güei, y la playa d'Arra (Ribesella). Les roques que podemos alcontrar puen amosase en forma d'estratos o de conglomeraos. Pa conocer un poco la hestoria d'esta fastera vamos tentar d'interpretar a  CHema:
                Nos primeros tiempos del Xurásicu (X. Inferior) había nesta zona una mariña baxa, rica en basa carbonatao que va conformando una sucesión d'estratos  fósilesde caliza y marga. Más tarde'l nivel del mar xube quedando somorguiada la mayor parte d'Asturies ( y norte de Lleón, qu'en Babia ta enlleno fósiles marinos - y del carboníferu -  colos que tengo compartío munches vacaciones).
                Pero tiempu más tarde, na dómina del Xurásicu Superior, hai un cambiu total nel paisax por aciu de delles falles folixeres qu'entren n'actividá. Arriendes d'ello les capes que taben embaxo l'agua salen a la superficie y entamen a cambiar pola mor de l'atmósfera...El mar retírase, la flora cambia y el nuevu llitoral ye un petite pa dinosaurios, pexes, llagartos y hasta reptiles voladores...¿Maxínestelo?...Los de güei día son asina:
             

"PARAPENTALIA:  Volador del Cuaternariu"

                  Estos chavales tuvieron afalagándonos tou'l camín. Taben empeñaos que diéremos un vueltu  entamilgaos n'artiluxu talu...Nun sedría mala idea faer un reportax fotográficu dende altures movedices.... Pero ún siéntese más pexe que páxaru. En cualquier casu igual tu yes más arrechu y t'apetez alquilalu. Por eso voi dexate equí les señes d'esta empresina; hai que da-yos bola a los mozos con iniciativa:
                                  parapentalia@gmail.com 

                   Los superpuestos estratos de marga y caliza, perteneciente a la formación Rodiles de la dómina'l Xurásicu, déxennos bayura de fósiles: ammomites, belemnites, griphaees, rynchonelles, trigonies, terebrátules....que fueron el nuesu petite en tiempos más bien ¿llonxanos?....Agora voi apurrivos unes semeyes de fósiles que podéis atopar:
                                         

                                   . Ammnites (3-4-5-6)    . Belemnites (1-2)
                                   . Bivalvo (8)                   . Griphaea (7)
                                   . Rynchonella (10)          . Terebrátula (9)
                         
       Quedo al pendiente d'amosavos la semeya - entá nun fecha - d'un anmonite xigante al cabu'l roqueru.... Pa ello preciso d'una baxamar en condiciones. Mentanto conformaivos con estes:
                                    

Ammonite

Belemnite

                  Si de verdá queréis saber lo que pasó en Xixón, na dómina del Xurásicu, lo que tenéis que faer ye metevos nesti blog:
          << Mi  Geoblog: Geología y algo más >> de José María Montes Villa.
 Y buscáis la entrada de la "Playa de Peñarrubia". Naide nun conoz meyor qu'elli lo que tien ocurrío naquél entós.....Y n'otres dómines....Faéime casu y nun vos lu perdáis... Les semeyes qu'aneyo equí tómoles prestaes del citáu blog, faltaría más...
                 Cruciamos una guapa ponte de madera hasta que damos con esti testimoniu: "Enxamás" n'alcordanza los asturianos que regalaron la vida a la llibertá y finaron nos campos d'esterminiu nazi.

                                                     
                  Averámonos al Área Recreativa "Joaquín Rubio Camín", artista xixonés qu'ideó - cola "zapatiella" un barcu - esti <<naufraxu en tierra>> arriendes de la recuperación del peciu "El Castiellu de Salas", buque graneleru fundíu, enllenu carbón, nel añu 1986. Taba fondeáu fuera del Musel y al garriar l'ancla - vamos, que nun agarró - embarrancólu  enfrente Santa Catalina.  Aprovechando la campera pue esfrutase d'una afayadiza tranquilidá. Bon sitiu pa tomar la parva, si ye que madrugastis...Como nun ye'l nuesu casu, nós al kiwi, les ñueces y galletuques de casa...(Oye, y que nun s'entere'l mélicu...Un plizcu chorizu...pero yera de la "Cai Tras", eh...Y el pan de la Camocha ....Amás, unes pingaretes de vinu ensiguida dilíen la grasa, que'l sangre tien que correr bien.... Cuando voi de ruta suelo llevar xinta mista: una parte pal colesterol y otra pa min ).
                            

 

Área Recreativa "Joaquín Rubio Camín"

                   Por cierto, falando de zapatiella y obxetos voladores....Tengo n'alcordanza que mio madre yera la meyor llanzadora de zapatiella de la dómina franquista na cuenca minera. (Claro que... siempre me pillaba descuidáu asemeyando a Biempica..)

                Xubiendo estes escaleres de madera .....
                                       

enllordiaes ente toxos, salgueres y plumeros invasores algamamos dica "La Peñona fabuda"- como se la noma nel argot -, un conglomeráu o pudinga, que domina tol valle de Peñarrubia. Un llugar ensin comparanza pa reponer fuercies si amás tas acompañáu por una cometa faciendo parapente.  
                                      

"La peñona fabuda". Merenderu.

                       El conglomeráu o pudinga ye roca sedimentario compuesto por xial y sable que ye arrastrao pol agua - d'ehí esa forma arredondiada- hasta'l fondu d'un valle fluvial. Gracies a la presión, al tiempu y a un cementu que los xunce van tomando l'aspeutu actual. Por cierto, les meyores muestres de pudinga que te pueas alcontrar verásles nesta fastera de la costa asturiana. Un poco más allá tan les inigualables de La Ñora. Pa otru día.

                        Nesta semeya pues apreciar meyor lo que ye un conglomeráu...
                         

Conglomeráu, a vista de páxaru

                               Siguiendo los xuegos de la sierpe tripulada adentrámonos nel parque del Cabu San Llorienzu. Al entamu fuimos gratible sorprendíos polos xiblíos d'una banda de paxarinos col llombu verde-oliva: ¡xip!¡xip!....¡Raitanes!. Saltaben dende les cotoyes - ¿territoriu comanche? -al camín y d'ehí al verde inmensu qu'acoricia'l mar . Paecíen buscar daqué; yá sabemos lo que-y presta al Raitán  ( Erithacus rubecula, ) enredar pel suelu, a la cata merucos. Igual nun alcontraben inseutos bastantes pa fartucase, yá que'l tiempu nun yera de lo más afayaizo pa ellos.   ¿Sabes qu'amidida se faen mayorucos va gustándo-yos la fruta, cuantu más dulce meyor?... Estos llambiones nagüen polos pasteles- tienenme dicho -, y si-yos das unos tortinos de maíz con miel...talo qu'a nós, claro.
                       Paecíame qu'había muncha mocedá ente ellos. Fixéme n'ún....    

                            

" Papín Coloráu": Raitán (Erithacus rubecula)

                    Vilu a tiru piedra - por dicir daqué -  y preparé la máquina....En cuantes que se decató'l  puñefleru  púnxose bien sollerte, remingó la cabeza ya amirónos de llau con esi güeyu saltón que tien, inxertáu nun mar de colorao, que-y vien dende'l  blancor de la panza.  Dionos buena guerra pa poder toma-y esta semeya. Nun paraba quietu, andaba a carrenderes, paraba y saltaba. Cuando díbemos colar entamó a  mover la cola como faciéndonos una reverencia...¡Très poli! 
       Pero mereció la pena ¿eh?..Quedó plancháu'l Petirroxu, como se lu conoz davezu.
Entós amirónos y dio un esnalíu...¡Ta llueu!. Yá falaremos....Esto nun va quedar asina Papín coloráu.... Tornaré a vete. Toi faciendo munchos amigos nesta ruta...¡Qué prestoso!
                             Si siguimos caminando pela sienda más averada a los cantiles damos con una escultura, n'aceru cortén,  n'homenax a "Galileo Galilei XV ", d' Amadeo Gabino, que fai referencia  a la bayura de planetes que Galileo buscaba nel comos. ¿Veis los planetes alredor de la figura?...¡Coimes, que poca fe!

"Homenax a Galileo Galilei ": Amadeo Gabino.

                        A la vuelta la esquina un requexu increyible : la Islla La Tortuga convida a una reflexón so la vida. 
           

Islla La Tortuga.

                      No cimero la llomba, presidiéndolo too, sobresal la imponente proa d'un barcu, fecha en formigón, que nun ye otro qu'un Mirador que te permite contemplar una parte importante del llitoral del conceyu Xixón y de los vecinos: al oeste'l Carreño y al Este Villaviciosa. Meyor volver un día claru.

Mirador y....almirador.

              

                 Entamó a orbayar. Abellugámonos un ratín embaxo'l monumentu mientres lleíamos los grafitis que dellos poetes de caleya , ¡grandes!, nos dexaron pal recuerdu. ¿Queréis velos?:
 

      

                               Miguel Ángel Lombardía tamién dexa constancia de la so imaxinación - y de la nuesa - con esta esculta en bronce: " Paisax xerminador". 
                                            

"Paisaje Germinador" de Miguel A. Lombardía

                             Salimos con murnia del parque.  Enseguidina aportamos delantre d'una capiella: La Ermita de  La Virxe de la Providencia qu'abelluga una virxen negra - talo que La Virxen de La Caridá, na Rebollá (Llaviana) - que recibe cantidá de romeros a diario y sobre too nel caberu domingu de Mayu, que celebra la  fiesta grande: misa cantada (na que s'abracen los cures), procesión alredor de la ermita, volaores, puya'l ramu, xuegos y concursu d'arroz con llechi.
                           

Vidriera

La Virxen Negra 

Ermita de La Providencia

           Damos cuatro pasos y tamos na "Colina'l Cuervu". Prestosu nome pa Rosario, celebrada avicultora ya amiga de los páxaros. Ellí, esmuciendo na pequeña rasa, mirando al mar, acolumbramos un panel indicativu con un poema de Rosario Acuña que nós intentamos interpretar na nuesa llingua; defeutu que nos prui davezu pero que col tiempu y trabayu igual se torna nuna virtú...
                       

                                        _"¡¡¡ ASTURIES !!!"
                              Altes xerres arispies, coronaes
                              por daqué cendal d'impoluta ñeve:
                              praos cercaos de floriada sebe;
                              maizales, viñeos, pomaraes.

                              Onde nin el sol a caltriar s'atreve;
                              regatos nidios de corriente sele,
                              y ríos que descienden en cascaes.

                              ¿Quién pue, ho, describir les fermosures
                              qu'Asturies toa guarda en sos rincones?
                    
                             ¡ Cuando l'Home se cure de llocures
                              ya odie l'odiu ya encalce sos pasiones,
                              podrá vivir la vida d'aventures
                              que brinda una rexón con tales dones!.

                   Collacios, dempués de lleer esto yá nun soi dicir más nada....Ye la hora de colar... 
                   Agarro la puerta y pesllo.
                                             

                                                     
                                                           ¡¡ Fasta ceo, romeros!!

P.S.: ¡Ah!, encerriscáu como taba nos "affaires" de la ruta pa nada nun m'aldordé del COLESTEROL : C27H46O. Noto que me muevo meyor, que respiro más fondo y que tengo unes ganes tremendes de faer los deberes que m' encamienta la ruta ....Porque siéntome como'l Sporting, col  "H" xubíu y l' "L" a sucu baxeru...Pa min que nun paso de los doscientos (200 mg/dl)...¡Vamos pa primera!